1. Nan̈ino Kristianin̈y mila mifen̈y hitovy amy kakazo? (Zahava koa sary.)

 MISY fomba fivolan̈ana zay: “Kakazo mahay miron̈o tsy mora rongana tsiko.” Zen̈y man̈aboaka fa mila mahavita miron̈o, na milefitry, kakazo sasany baka tsy folaka tsiko. Karaha zen̈y koa, mila mahay milefitry atsika izikoa tihahavita hanompo Jehovah fo salakady ho ravoravo. Karakory ma zen̈y? Atsika mila mahay mandanjalanja ke man̈eky fiovan̈a misy amy fiain̈anantsika, avio man̈aja hevitrinolo ndreky fanapahankevitrindro.

2. Ino aby toetry han̈ampy atsika hahavita hiatriky fiovan̈a amy fiain̈anantsika, avio ino raha hidinihintsika amy lahatsoratra ty?

² Panompony Jehovah atsika, ke tiantsika hahay handanjalanja karaha izy. Tiantsika koa hanetry ten̈a ndreky hahay hahinakinaka. Ho hitantsika amy lahatsoratra ty nan̈ino toetry aby zen̈y nan̈ampy Kristianin̈y sasany niatriky fiovan̈a tamy fiain̈anandro. Ho hitantsika ato koa nan̈ino toetry aby zen̈y han̈ampy atsika. Fa alo antsendriky atsika handiniky modeliny Jehovah ndreky Jesosy, fotony iro modely lavorary amy fahaizan̈a mandanjalanja.

3. Akory ahaizantsika fa Jehovah mahay mandanjalanja?

³ Jehovah kahian̈a “Lampimbato” fotony izy tsy miovaova ndreky tsy voahozongozon̈o. (Deot. 32:4) Fa ndray zen̈y, izy mahay mandanjalanja. Miovaova raha amy donia ty, fa hainy Jehovah miain̈y mifan̈araka amy raha misy baka fikasan̈anany tanteraka fo. Jehovah koa fa niasa atsika, atsika nataony miran̈a sora aminany. Zen̈y mahavy atsika afaka miain̈y mifan̈araka amy raha misy, ndray miovaova fiain̈anantsika. Atsika koa namezany toro lalan̈a mazava tsara amy Baiboly ao han̈ampy atsika hahay hanapakevitry, na ino na ino raha sarotro atrefintsika. Modeliny Jehovah ndreky toro lalan̈a namezany atsika aby io man̈aboaka tsarabe fa nata Jehovah “Lampimbato” izy mahay mandanjalanja.

4. Ino ohatra ahitan̈a fa Jehovah mahay mandanjalanja? (Levitikosy 5:7, 11)

 ⁴ Tsisy tsin̈iny salakady misy fahaizan̈a mandanjalanja raha jiaby ataony Jehovah. Izy tsy mentitry loatra aminy olombelon̈o. Diniha baka karakory nan̈aboahany Jehovah fahaizan̈a mandanjalanja taminizy nifandray tamindro Israelita aby io. Izy tsy nan̈izingizin̈y fa mila mitovy fo soron̈o ataonolo jiaby, na manandraha na masikiny. Ndraikindraiky olo nambelany nifidy raha nataondro soron̈o, arakaraka raha nanan̈andro.​—Vakia Levitikosy 5:7, 11.

5. Man̈ameza ohatra ahitan̈a fa Jehovah manetry ten̈a ndreky mahinakinaka olo.

⁵ Jehovah mandanjalanja fotony izy manetry ten̈a ndreky mahinakinaka olo. Naboakany Jehovah, ohatra, fa izy manetry ten̈a taminizy handeha handripaka olo ratsy fan̈ahy ta Sodoma. Izy nan̈iraka anjelinany nivolan̈a tamy Lota fa izy mila milefa amy faritry be bongo. Lota navozo nandeha tan̈y, ke izy niangavy baka izy ndreky fianakavian̈anany ambela hilefa a Zoara. Kanefa izio an̈isany tanàna seky hiravan̈iny Jehovah koa. Jehovah afaka nan̈izingizin̈y fa Lota tsy maintsy man̈araka raha volan̈iny, fa tsy zen̈y nataony. Nikeny fangatahan̈any Lota, ke tsy niravan̈iny foeky tanànany Zoara. (Gen. 19:18-22) Taonjato maro tafara tatỳ, naboakany Jehovah koa fa izy nahinakinaka olo nipetraka ta Ninive. Jehovah nandefa paminan̈y Jona nivolan̈a tamindro olo ratsy fan̈ahy nipetraka ta Ninive tao fa iro handeha haripaka, avio tanànandro hiravan̈iny. Fa iro Ninivita aby io koa fa nibebaka, Jehovah namindra fô tamindro, avio tsy niravan̈iny tanàna io.​—Jona 3:1, 10; 4:10, 11.

6. Akory aby fomba nan̈aboahany Jesosy fa izy nangala tahaka Jehovah amy fahaizan̈a mandanjalanja?

⁶ Nangala tahaka fahaizany Jehovah mandanjalanja Jesosy. Izy nalefa tambony tany tatỳ hitory taminy “ondrikondriky very amy taranaka Israely.” Fa ndray zen̈y, izy nandanjalanja fo koa fa nitory. Nan̈ino atsika mivolan̈a zen̈y? Tandraraiky, nisy man̈angy araiky tsy Israelita nilafidafiky taminany, niangavy izy hampajanga zanany man̈angy nijaly mare fotony “misy demony.” Nahinakinaka man̈angy io Jesosy, ke nikeny fangatahan̈anany, ke nataony janga tsaiky io. (Mat. 15:21-28) Misy ohatra araiky hafa koa. Ho Jesosy tamy somilany izy nan̈ano fanompoan̈anany: “Lan̈iany olo tsy man̈eky kahian̈a pianatranaka ..., tsy hikeko koa izy.” (Mat. 10:33) Fa ndray zen̈y, tsy nataony karaha zen̈y Petera, ndray intelo izy nan̈ano sary tsy nahay Jesosy. Hainy Jesosy fa Petera nanen̈iny mare tamy raha nataony. Hainy koa fa izy lelahy manampinoan̈a ankitin̈y. Ke Jesosy koa fa natsangana tamy maty, izy niboaka tamy Petera, avio namiany toky tsarabe Petera fa izy efa nan̈ambela hadisovan̈anany salakady mbala tia izy fo.​—Lioka 24:33, 34.

7. Eraka Filipianina 4:5, tiantsika karakory fahitanolo atsika?

⁷ Hitantsika tio fa Jehovah Zan̈ahary ndreky Jesosy Kristy samby mahay mandanjalanja.  Akory ndraiky atsika? Tiany Jehovah hahay handanjalanja koa atsika. (Vakia Filipianina 4:5.) Misy fandikanteny araiky mandika andininy io karaha ty: “Aboaha amy raha ataonao fa anao mahay mandanjalanja.” Ke tsara atsika man̈ontany ten̈a karaha ty: ‘Karakory ma fahitanolo zaho? Zaho ma olo mahay mandanjalanja, mora atao, avio mandefitry, sa olo sarotindraha, masiaka, ndreky miziriziry aminy hevitrinaka? Zaho ma tsy man̈eky izikoa tsy arehan̈a aminy antsipiriany raha volan̈iko? Sa zaho mba mitandren̈y olo ndreky man̈araka hevitrindro koa mbala azo atao?’ Arakaraka ahaizantsika mandanjalanja ahitan̈a fa atsika mangala tahaka Jehovah ndreky Jesosy ankitin̈y. Alo atsika iziô handiniky raha aroe ilavan̈a fahaizan̈a mandanjalanja: 1) Izikoa fa miova fiain̈anantsika, avio 2) izikoa fa tsy miran̈a amy nintsika hevitrinolo ndreky fanapahankevitrindro.

8. Ino raha han̈ampy atsika hahay handanjalanja izikoa fa miova fiain̈anantsika? (Zahava koa lamariky amy pazy ambany.)

⁸ Mahay mandanjalanja olo araiky izikoa mahay mampifan̈araka fiain̈ananany amy fiovan̈a mandalo. Mety hiteraka problemo tsiary niritriretintsika fiovan̈a amy fiain̈anantsika. Atsika, ohatra, mety harary tampoko. Mety hisabadidaka koa fiain̈anantsika izikoa fa manonga tampoko vidindraha na misy korontan̈a arapolitiky. (Mpito. 9:11; 1 Kor. 7:31) Tsy zen̈y fo, na fanendrena vaovao baka amy fandaminan̈a fo koa mety efa hanahiran̈a atsika. Fa na ino na ino raha sarotro atrefintsika, ho vitantsika hampifan̈araka fiain̈anantsika amy raha misy izikoa atsika man̈araka raha efatra aby ty: 1) Man̈eky fa efa zen̈y raha misy, 2) mifantoko aminy amaray, 3) mifantoko amy raha tsara, avio 4) man̈ampy olo. b Alo hizahavantsika nan̈ino fan̈anaovan̈a raha aby zen̈y nan̈ampy rahalahy ndreky ranabavintsika sasany.

9. Akory nahavitandro misionera aroe fivadiany io niatriky fitsapan̈a tsy nampoizindro?

⁹ Ikia fa efa zen̈y raha misy. Voatendry misionera tantany hafa Emanuele ndreky Francesca. Kanefa taminy iro vo hanomboko hianatra volan̈a amy tany io ndreky hifankazatra tamy piaramanompo tamy fiangonan̈andro vaovao io, navy valan̈aretin̈y COVID-19, ke iro tsy nafaka nifan̈osihosy taminolo foeky. Avio naty tampoko koa mamany Francesca. Tihandeha tamy fianakavian̈anany mare Francesca, kanefa tsisy hevitry nohony valan̈aretin̈y. Ino raha nan̈ampy ranabavy io hiatriky raha sarotro aby zen̈y? Voanalohany, iro fivadiany niaraka nivavaka tamy Jehovah, nangataka fahendrena baka tsy hiasaloha be loatra fa hiatriky problemo an̈atiny andra tsiaraikiaraiky fo. Jehovah nampiasa fandaminan̈anany hamalian̈a vavakandro tamy fotoan̈a nilavandro izy tsarabe. Tamy fomba akory? Iro, ohatra, nahazo fankahirezan̈a mare tamy raha nivolan̈iny rahalahy araiky tamy video. Ho rahalahy io: “Atsika koa malaky man̈eky fiovan̈a, tsy ela koa atsika ho ravoravo edy sady hahavita han̈araraotro raha mahazo anten̈a io hanompoan̈a Jehovah ndreky han̈ampian̈a olo hafa koa.” c Faharoe, iro tapakevitry hankatsara fahaizandro mitory amy telefaony, ke iro nahavita nitariky fampianaran̈a Baiboly araiky. Fahatelo, iro nan̈eky nampiany rahalahy ndreky ranabavy, avio iro nankasitraka raha zen̈y koa. Nisy ranabavy araiky tsara fan̈ahy  iziô nandefa mesazy hely tamindro isanandra tan̈atiny taon̈o araiky. Mesazy io misy andininy araiky baka amy Baiboly. Ke izikoa atsika man̈eky fiovan̈a vaovao misy amy fiain̈anantsika, atsika afaka ho ravoravo amy raha mbala mety ataontsika.

10. Akory nataony ranabavy araiky niain̈y nifan̈araka tamy fiovan̈a maventy tamy fiain̈ananany?

¹⁰ Mifantoha aminy amaray ndreky amy raha tsara. Kivy hely Christina, ranabavy baka a Romania fa mipetraka a Japon, izikoa fa nifoan̈ana fiangonan̈a miteny angiley nisy izy. Fa izy fo tsy nifantoko loatra tamy zen̈y. Izy tapakevitry hifindra tamy fiangonan̈a miteny japoney, avio izy nifen̈y erakany vitany nitory taminolo niteny japoney. Nisy man̈angy araiky niaraka niasa taminany taloha koa nirahiny nan̈ampy izy hianatra teny japoney. Ny raha nahagaga, man̈angy io nan̈eky nampiasa Baiboly ndreky bokikely Mankafiza Fiain̈ana Tsisy Farany! hampianaran̈a Christina teny japoney. Ke tsy vitany nahay teny japoney fo Christina, fa man̈angy io koa nanjary tihahay raha maro baka amy Baiboly. Ke izikoa atsika mifantoko aminy amaray ndreky amy raha tsara fo, mety hitondra fitahian̈a tsy ampoizintsika fiovan̈a tampoko misy amy fiain̈anantsika.

11. Ino raha nan̈ampy olo fivadiany nanan̈a problemo arabola?

¹¹ Mitadiava fomba han̈ampian̈a olo. Loso sahiran̈a arabola olo fivadiany mipetraka amy tany araiky mandrova asantsika izikoa fa fahity firenena io. Akory nataondro niain̈y nifan̈araka tamy zen̈y? Voanalohany, nahen̈indro depansindro, baka io iro tsy nifantoko tamy problemondro fa nifen̈y nitory baka hahavita han̈ampy olo farany maro. (Asa. 20:35) Ho rahalahy io: “Azony zahay mandany fotoan̈a be amy fitorian̈a, zahay loso tsy mifantoko be amy problemonay fa mifantoko amy fan̈anaovan̈a sitrapony Jehovah.” Ke izikoa fa miova fiain̈anantsika, tsy mila adin̈antsika fa fan̈ampian̈a olo ny raha ten̈a maventy, intsaka eky baka aminy asa fitorian̈a.

12. Nan̈ino ohatrany Paoly afaka man̈ampy atsika hampifan̈araka koran̈antsika aminolo itoriantsika?

¹² Mila mahay mandanjalanja koa atsika koa fa man̈ano fanompoan̈a, fotony olo itoriantsika samby amy raha inoandro ndreky fombandro, avio iro samby amy tany faviandro. Apostoly Paoly nahay nampifan̈araka raha nisy. Afaka mangala tahaka izy koa atsika. Jesosy nanendry Paoly ho ‘apostoliny hafa firenena.’ (Rom. 11:13) Ke Paoly afaka nitory tamy Jiosy, tamy Griky, taminolo nahita fianaran̈a, tamy pamboly, tamy pitondra fanjakan̈a ndreky tamy panjaka. Akory nataony Paoly baka izy nahavita nanohin̈y fony karazanolo jiaby zen̈y? Izy “nanjary raha jiaby tamy karazanolo jiaby.” (1 Kor. 9:19-23) Nidinihiny tsarabe baka aia olo aby io, ino raha inoandro, avio ino fombandro. Ke loso hainy nampifan̈araka koran̈anany taminolo tsiaraikiaraiky, baka iro han̈aton̈o Zan̈ahary. Hahaihahita vokatra amy fanompoan̈a fo koa atsika izikoa mahay mitady hevitry ndreky mampifan̈araka koran̈antsika aminolo tsiaraikiaraiky itoriantsika.

13. Eraka 1 Korintianina 8:9, ino problemo tsy ho hisy izikoa atsika man̈aja hevitrinolo?

¹³ Fahaizan̈a mandanjalanja man̈ampy atsika han̈aja hevitrinolo. Misy ranabavy iziô tia man̈ano makiazy, fa sasany ndraiky tsy karaha zen̈y. Misy piaramanompo sasany koa tia migiagiaka fa helihely fo, fa sasany ndraiky nanapakevitry tsy higiaka toaka foeky. Atsika Kristianin̈y jiaby samby tiho salama. Fa ndray zen̈y, atsika samby amy fomba fikarakarany fahasalaman̈anany. Izikoa atsika miziriziry amy safidintsika ke mitaon̈o olo han̈araka zen̈y, atsika mety hanafintohin̈y olo ndreky hampisy  fisaratsarahan̈a. Tsy mety atsika eky tihan̈ano raha karaha zen̈y! (Vakia 1 Korintianina 8:9; 10:23, 24) Alo atsika iziô handiniky ohatra aroe man̈aboaka nan̈ino fan̈arehan̈a toro lalan̈any Soratra Masin̈y han̈ampy atsika hahay handanjalanja ndreky hiray sain̈y fo.

14. Ino toro lalan̈any Baiboly mila arehantsika lera atsika mifidy sanjy ndreky fisikinan̈a ataontsika?

¹⁴ Lamba ndreky fan̈eva. Jehovah tsy nan̈amia listiny sanjy mety ndreky tsy mety, fa atsika namezany toro lalan̈a. Sanjintsika mila man̈amia voninahitry Zan̈ahary ndreky ahitan̈a fa atsika mahay mandanjalanja, manetry ten̈a, avio ‘misain̈y tsara.’ (1 Tim. 2:9, 10; 1 Pet. 3:3) Tsy tiantsika han̈antsory masonolo amy fisikinan̈antsika. Toro lalan̈a amy Baiboly koa man̈ampy antipan̈ahy tsy han̈apetraka lalàn̈a momba lamba ndreky fan̈eva. Nisy antipan̈ahy tamy fiangonan̈a araiky, ohatra, tihan̈ampy rahalahy tanora vitsivitsy. Iro io baka nan̈ano koafy namalan̈a; fan̈eva adoso ambany be baka io misy mikorontan̈a. Akory ataondro antipan̈ahy aby io han̈ampy tanora aby io kanefa tsy han̈apetraka lalàn̈a? Karaha ty raha nirahiny piandraikitry faritry hikoran̈indro amy tanora aby io: “Izikoa anao an̈abony lampihazo, ke olo mitandren̈y anao mifantoko amy sanjinao fa tsy amy raha koran̈inao, dikanizen̈y mety tsy paripare lambanao ndreky fan̈evanao.” Fan̈azavan̈a tsotra karaha zen̈y nan̈ampy iro tanora aby io hahay raha tôkony hataondro sady nan̈ampy antipan̈ahy tsy han̈apetraka lalàn̈a momba sanjy ndreky fisikinan̈a. d

15. Ino aby lalàn̈a ndreky toro lalan̈a afaka man̈ampy atsika hifidy fomba ikarakaran̈a fahasalaman̈a? (Romanina 14:5)

¹⁵ Fikarakaran̈a fahasalaman̈a. Anjarany Kristianin̈y tsiaraikiaraiky mifidy fomba tiany ikarakarany fahasalaman̈anany. (Gal. 6:5) Fa ndray zen̈y, lera izy mifidy fitahan̈a tiany, misy  lalàn̈a vitsivitsy tsy maintsy arehany amy Baiboly ao. An̈isanizen̈y, mifady lio ndreky fifandraisan̈a amy fan̈ahy ratsy. (Asa. 15:20; Gal. 5:19, 20) Ankoatranizen̈y ndraiky, samby olo mifidy fitahan̈a tiany. Misy olo iziô fitahan̈a amy lopitaly fo ninany, misy ndraiky tia man̈araka fitahan̈a hafa. Fa na karakory na karakory fahitantsika fitahan̈a araiky, atsika mila man̈aja safidindro rahalahy ndreky ranabavintsika aby io amy fomba tiandro ikarakaran̈a fahasalaman̈andro. Ke tsy mila adin̈antsika raha efatra aby ty: 1) Fanjakan̈any Zan̈ahary zaraiky fo afaka mampajanga atsika tanteraka. (Isaia 33:24) 2) Kristianin̈y tsiaraikiaraiky tsy maintsy ‘resy lahatra’ amy raha ten̈a mety amy fahasalaman̈anany. (Vakia Romanina 14:5.) 3) Atsika tsy tôkony hitsaratsara fanapahankevitriny namantsika na han̈ano raha hanafintohin̈y iro. (Rom. 14:13) 4) Man̈aboaka fitiavan̈a Kristianin̈y araiky izikoa firaisantsain̈y an̈atiny fiangonan̈a ny raha ten̈a maventy aminany fa tsy hevitrinany manokan̈a. (Rom. 14:15, 19, 20) Izikoa tsy hadin̈antsika raha jiaby zen̈y, atsika ho tsara fihavanan̈a amindro rahalahy ndreky ranabavintsika aby io fo, avio atsika han̈ano raha hampiray sain̈y fiangonan̈a.

16. Akory an̈aboahany antipan̈ahy araiky fa izy mahay mandanjalanja izikoa fa miaraka miasa amindro antipan̈ahy namany aby io? (Zahava koa sary.)

¹⁶ Antipan̈ahy tôkony ho ohatra tsara amy fahaizan̈a mandanjalanja. (1 Tim. 3:2, 3) Antipan̈ahy araiky iziô tsy tôkony hieritreritry fa tsy maintsy arehan̈a fo hevitrinany fotony izy bebe taon̈o tozay antipan̈ahy hafa. Hainy baka fa fan̈ahy masin̈iny Jehovah afaka man̈ampy antipan̈ahy tsiaraikiaraiky hahita hevitry tsara han̈ampy iro han̈ano fanapahankevitry feno fahendrena. Ke izikoa misy fanapahankevitry araiky ikeny ankamarozany antipan̈ahy, avio izio tsy mifanohitry amy toro lalan̈a Baiboly, akory ataony antipan̈ahy araiky mahay mandanjalanja? Tohan̈any fo fanapahankevitry io, ndray tsy lanilaniny.

17. Ino aby hatsaran̈a ho azontsika izikoa atsika mahay mandanjalanja?

¹⁷ Maro hatsaran̈a ho azontsika izikoa atsika mahay mandanjalanja. Atsika ho tsara fihavan̈ana amindro rahalahy ndreky ranabavintsika aby io, avio hiray sain̈y fo fiangonan̈a. Ravoravo atsika manan̈a rahalahy ndreky ranabavy samby amy toetriny ndreky samby amy fombany, kanefa miray sain̈y manompo Jehovah. Fa ny raha ten̈a maventy, ravoravo atsika mahay fa atsika mangala tahaka Jehovah, Zan̈ahary mahay mandanjalanja.