1-2. Nan̈ino Kristianin̈y araiky mety ampiran̈iny amy tran̈o be? (1 Korintianina 15:58)

 TAMINY 1978, nisy tran̈o etazy araiky habo be naorin̈y ta Tokyo, ta Japon. Maro olo nieritreritry karaha ty: ‘Raha mba hahatanty horohorontany edy tran̈o io?’ Nieritreritry zen̈y iro fotony an̈y matetiky misy horohorontany. Kanefa karakory ma fomba nan̈amboaran̈a tran̈o io? Izio nataondro ainzeniera aby io fatatra ndreky mahavita miriran̈a hely man̈araka fitsefany tany baka tsy rongana foeky. Miran̈a amy tran̈o be io koa atsika Kristianin̈y. Amy fomba akory?

² Kristianin̈y tsy maintsy mahay mandanjalanja, ke tsy han̈eky ho voahozongozon̈o kanefa mahay milefitry koa. Izy tsy tôkony hiovaova foeky, fa ho tapakevitry han̈araka lalàn̈any Jehovah ndreky fitsipikinany. (Vakia 1 Korintianina 15:58.) Izy “von̈ono han̈araka volan̈a” Jehovah ndreky tsy mampandefitry fitsipikinany. Fa ndray zen̈y, izy mila “mahay mandanjalanja”, ke milefitry izikoa mbala azo atao na izikoa ilain̈y. (Jak. 3:17) Kristianin̈y araiky mahay mandanjalanja zen̈y tsy mentitry loatra baka io koa tsy milefitry loatra. Amy lahatsoratra ty atsika handiniky akory hahavy atsika tsy han̈eky ho voahozongozon̈o. Hidinihintsika koa raha dimy ataony Satana baka atsika tsy ho tapakevitry han̈araka volan̈a Jehovah, ndreky akory hahavitantsika hanohitry tetikinany.

3. Ino aby lalàn̈a napetrakany Pan̈amia Lalàn̈a Fara Tampony, hita aminy Asan’ny Apostoly 15:28, 29?

³ Jehovah Pan̈amia Lalàn̈a Fara Tampony, ke lalàn̈anany  ataony mazava tsara amy vahoakanany. (Isaia 33:22) Ohatra, filankevipitantan̈ana tamy taonjato voanalohany nikoran̈a raha telo tsy maintsy arehany Kristianin̈y: 1) Tsy manompo sampy, fa manompo Jehovah zaraiky fo, 2) man̈eky fa masin̈y lio, baka io 3) man̈araka lalàn̈any Baiboly hifady fijangajangan̈a. (Vakia Asan’ny Apostoly 15:28, 29.) Akory an̈aboahany Kristianin̈y amy zioty fa iro man̈araka raha volan̈iny Jehovah momba raha telo zen̈y?

4. Akory an̈aboahantsika fa atsika manompo Jehovah zaraiky fo? (Apokalypsy 4:11)

⁴ Atsika tsy manompo sampy fa manompo Jehovah zaraiky fo. Jehovah nan̈iraka iro Israelita aby io hanompo izy zaraiky fo. (Deot. 5:6-10) Tamy Devoly nitsapa jery Jesosy in̈y koa Jesosy nivolan̈a fa Jehovah zaraiky fo tsy maintsy tompoentsika. (Mat. 4:8-10) Zen̈y mahavy atsika tsy manompo sampy ndreky tsy manjan̈ahary olo, na pitondra fivavahan̈a zen̈y, na pan̈ano politiky, na koa olo malaza karaha ataony pan̈ano spaoro, pihira, na pisoma filma. Atsika milan̈y amy Jehovah, ke izy zaraiky fo tompoentsika fotony izy “niasa raha jiaby.”​—Vakia Apokalypsy 4:11.

5. Nan̈ino atsika mbala man̈araka lalàn̈any Jehovah momba fahamasin̈any fahin̈ana ndreky lio?

⁵ Atsika man̈araka lalàn̈any Jehovah momba fahamasin̈any fahin̈ana ndreky lio. Nan̈ino? Fotony Jehovah mivolan̈a fa amy lio misy fahin̈ana, sady izio kado valera baka aminany. (Lev. 17:14) Tamy Jehovah nan̈amia lalan̈a olo voanalohany hihinankena, iro tsy nimboany nihina lio. (Gen. 9:4) Nampodiny ndraiky didy zen̈y taminizy nan̈amia Lalàn̈any Mosesy iro Israelita aby io. (Lev. 17:10) Izy koa nan̈iraka filankevipitantan̈ana tamy taonjato voanalohany han̈aboaka didy fa Kristianin̈y jiaby mila ‘mifady lio.’ (Asa. 15:28, 29) Mbala man̈araka didy zen̈y fo atsika lera hifidy fitahan̈a atao amintsika. b

6. Ino aby raha mila ataontsika baka ho vitantsika han̈araka fitsipiky Jehovah momba fitondranten̈a?

⁶ Arehantsika tsarabe fitsipiky Jehovah momba fitondranten̈a. (Heb. 13:4) Apostoly Paoly man̈iraka atsika ‘hamono’ fan̈irian̈a ratsy amy rantsambatan̈antsika. Dikanizen̈y atsika tôkony hifen̈y mare han̈adoso fan̈irian̈a ratsy jiaby an̈atintsika. Akory han̈anaovan̈a zen̈y? Atsika tsy mizaha ndreky tsy man̈ano raha mety hahavy atsika hijangajanga. (Kol. 3:5; Joba 31:1) Izikoa atsika tojy fakampan̈ahy, direkty adosontsika an̈aty jerintsika eritreritry ratsy, na ialantsika malaky raha mety hahavy atsika han̈ano raha handrobaka fifandraisantsika amy Zan̈ahary.

7. Tôkony ho tapakevitry han̈ino atsika, avio nan̈ino?

⁷ Tiany Jehovah ‘baka amy fontsika atsika man̈araka volan̈anany.’ (Rom. 6:17) Raha mahatsara atsika fo raha irahiny ataontsika, avio atsika tsy afaka man̈ova lalàn̈anany. (Isaia 48:17, 18; 1 Kor. 6:9, 10) Atsika man̈ano erakany vitantsika hamparavoravo Jehovah ndreky mifen̈y hanan̈a toetsain̈y karaha niny pan̈ano salamo ty: ‘Zaho tapakevitry han̈araka fitsipikinao, ndreky han̈araka zen̈y fo firaka amy farany.’ (Sal. 119:112) Fa Satana ndraiky mifen̈y man̈ano raha tsy hahavitantsika zen̈y. Ino aby tetikinany?

8. Akory ataony Satana mampiasa fan̈injehan̈a baka hampivadiky atsika?

⁸ Fan̈injehan̈a. Devoly man̈ano raha ampijalian̈a ndreky ampitahoran̈a atsika baka atsika hivadiky. Izy karaha lion mitady ‘hihina’  atsika, ke tanjon̈onany handrobaka fifandraisantsika amy Jehovah. (1 Pet. 5:8) Nampitahorin̈y, nipopohin̈y ndreky nivonen̈y Kristianin̈y tamy taonjato voanalohany fotony tsy nan̈eky hivadiky. (Asa. 5:27, 28, 40; 7:54-60) Mbala mampiasa fan̈injehan̈a koa Satana amy zioty. Ahitantsika zen̈y fampijalian̈a mare mavoa iro rahalahy ndreky ranabavintsika a Russie ndreky antany hafa. Iô koa fan̈injehan̈a amy fomba hafa.

9. Man̈ameza ohatra ahitan̈a fa atsika mila mitandrin̈y tsao man̈eky forsenolo ankolaka.

⁹ Olo miforse ankolaka. Ankoatrany fan̈injehan̈a, mampiasa ‘tetiky ratsy’ hafa koa Satana. (Efes. 6:11) Diniha baka raha niain̈any rahalahy araiky kahian̈a Bob. Izy tafiditry lopitaly fotony nila natao didy be. Izy efa nivolan̈a tamy dokotera fa na ino na ino raha hiboaka, izy tsy han̈eky hampidiran̈a lio foeky. Dokotera handidy izy io nan̈aja fanapahankevitrinany zen̈y. Fa taminy alin̈y talohany handidian̈a izy, izikoa fa roso fianakavian̈anany, nisy dokotera hafa koa navy tamy Bob tao. Izy nivolan̈a: ‘Zahay ndraiky tsy hampiditry lio aminao, fa izio ataonay paripare iô fo tsao fo ilain̈a.’ Dokotera io nieritreritry fa mety hiova hevitry Bob fotony efa tsy ankilanany iô fianakavian̈anany. Fa Bob tsy nan̈eky ho voahozongozon̈o foeky. Izy nivolan̈a fa izy tsy han̈eky hampidiran̈a lio foeky, na ino na ino raha miboaka.

10. Nan̈ino mamandriky hevitrinolombelon̈o? (1 Korintianina 3:19, 20)

¹⁰ Hevitrinolombelon̈o. Izikoa atsika man̈araka hevitrinolo tsy man̈ahoa lalàn̈any Jehovah, atsika mety tsy hijery Jehovah ndreky lalàn̈anany. (Vakia 1 Korintianina 3:19, 20.) “Fahendrenany donia ty” matetiky mandrisiky olo tsy han̈araka volan̈a Zan̈ahary. Kristianin̈y sasany ta Pergamosy ndreky ta Tyatira nan̈araka jerinolo tanàna araiky tamindro, kanefa iro olo aby io ratsy fitondranten̈a ndreky nanompo sampy. Nivolan̈iny Jesosy mare fiangonan̈a aroe io, fotony iro nilefitry tamy fijangajangan̈a. (Apok. 2:14, 20) Amy zioty koa, olo man̈odidin̈y atsika mety handrisiky atsika han̈araka hevitry diso. Fianakavian̈antsika ndreky olo haintsika mety hivolan̈a fa atsika sarotiny loatra, ke iro mety handresy lahatra atsika tsy han̈araka lalàn̈any Jehovah. Iro, ohatra, mety hivolan̈a fa tsy mampan̈ino ndray atsika man̈eky resiny fan̈irian̈antsika baka io efa lany daty fitsipikiny Baiboly momba fitondranten̈a.

11. Ino raha mila tandremantsika?

¹¹ Ndraikindraiky atsika mety hieritreritry fa tsy tena mazava toromariky amezany Jehovah atsika. Ke atsika mety hitady “hihoatra raha voasoratra.” (1 Kor. 4:6) Zen̈y iziô fahotan̈a nataony pitondra fivavahan̈a taminy andrany Jesosy. Lalàn̈a nisosohandro fitsipiky niforon̈indro, ke loso sarotro taminolo maro nan̈araka izio. (Mat. 23:4) Jehovah man̈amia atsika taridalan̈a mazava tsara baka amy Volan̈anany ndreky fandaminan̈anany. Ke tsisy raha mbala tôkony hampiantsika amy toromariky amezany atsika. (Ohab. 3:5-7) Atsika tsy mila mihoatra raha voasoratra, na han̈ano fitsipiky mila arehany piaramanompo amy raha miankin̈y aminolo tsiaraikiaraiky.

12. Akory ataony Satana man̈aparitaka “fitaka tsisy dikany”?

¹² Fitaka. Satana mampiasa “fitaka tsisy dikany” ndreky ‘jeriny donia ty’ hamitahan̈a ndreky hampisaratsarahan̈a olo. (Kol. 2:8) Tamy taonjato voanalohany zioty, izy nampiasa filozofinolombelon̈o ndreky fampianaran̈a Jiosy tsy miorin̈y amy Soratra Masin̈y, avio fampianaran̈a mivolan̈a fa Kristianin̈y tsy maintsy mitandrin̈y Lalàn̈any Mosesy. Kanefa fitaka fo raha aby zen̈y fotony nahavy  olo hahailavitry Jehovah, araiky ten̈a Loharanony fahendrena. Amy zioty, Satana mampiasa radio ndreky tele avio Internet han̈aparitahan̈a tsaho ndreky vaovao tsy marin̈y baka amy pan̈ano politiky. Maro vaovao karaha zen̈y ren̈intsika tan̈atiny valan̈aretin̈y COVID-19 in̈y. c Lan̈iany Vavolombelon̈o Jehovah nitandren̈y taridalan̈a baka tamy fandaminan̈antsika tsy vaky asaloha karaha iro olo nitandren̈y vaovao tsy marin̈y aby io.​—Mat. 24:45.

13. Nan̈ino atsika mila mitandrin̈y baka tsy ho varian̈a?

¹³ Raha mahavarian̈a. Atsika mila mifantoko amy “raha maventy.” (Fil. 1:9, 10) Mety handany lerantsika ndreky angovontsika raha mahavarian̈a. Tafiditry amy zen̈y raha fataontsika andavanandra, karaha ataony mihina, migiaka, mangala diandian̈a, ndreky asa. Ho varian̈a atsika izikoa raha aby zeny ataontsika raha ten̈a maventy amy fiain̈anantsika. (Lioka 21:34, 35) Ankoatranizen̈y, isanandra atsika maharen̈y vaovao isankarazany momba lagrevo ndreky adihevitry politiky. Atsika tsy mila rikianiny raha karaha zen̈y, fotony izikoa tsy zen̈y atsika ho tafilan̈y aminy araiky amindro pan̈ano adihevitry aby io an̈aty fontsika ndreky sain̈intsika an̈y. Satana mampiasa tetiky jiaby nikoran̈intsika tiô in̈y baka atsika tsy ho tapakevitry han̈ano ny tsara eky. Ke alo hizahavantsika akory hahafahantsika hanohitry tetikinany ndreky hiorin̈y tsarabe.

14. Ino, ohatra, raha araiky han̈ampy atsika tsy ho voahozongozon̈o?

¹⁴ Iritrireta nan̈ino anao nanokanten̈a tamy Jehovah ndreky nan̈ano batisa. Nan̈ano dingana aby zen̈y anao fotony anao tihilan̈y amy Jehovah. Diniha ndraiky ino nahavy anao resy lahatra fa nahita fahamarin̈ana. Anao nanjary nahay raha momba Jehovah, ke anao loso nan̈aja ndreky tia Babanao andan̈itry an̈y io. Loso nitombo finoan̈anao ke anao nibebaka. Nivolezanao koa lan̈iany raha tsy tiany Jehovah, fa raha tiany fo nataonao. Nanjary nahivankivan̈a anao izikoa fa nahay fa Zan̈ahary nan̈ambela hadisovan̈anao. (Sal. 32:1, 2)  Anao nanomboko nivory ndreky nikoran̈a taminolo raha tsara nianaranao. Nanokanten̈a ndreky natao batisa koa anao, ke anao zioty efa man̈araka lalan̈a mengo amy fiain̈ana sady tapakevitry fo han̈araka lalan̈a io.​—Mat. 7:13, 14.

15. Nan̈ino mahatsara atsika mianatra ndreky misaintsain̈y?

¹⁵ Mianara Volan̈a Zan̈ahary baka io saintsain̈a raha nianaranao. Tsy mora rongana kakazo araiky izikoa lalin̈y tsara vahatranany. Tsy ho voahozongozon̈o karaha zen̈y koa atsika izikoa miorin̈y tsarabe amy Volan̈a Zan̈ahary finoan̈antsika. Arakaraka hitombosany kakazo araiky, vahatranany mahay lalin̈y ndreky mahay misandrahaka fo. Izikoa atsika mianatra Volan̈a Zan̈ahary ndreky misaintsain̈y raha nianarantsika, finoan̈antsika hahaiho fatatra fo. Loso mahaimatoky fo koa atsika fa fomba fan̈anaovany Zan̈ahary raha ny ten̈a tsara. (Kol. 2:6, 7) Saintsain̈a nan̈ino toromariky, taridalan̈a, avio fiarovan̈a baka tamy Jehovah nan̈ampy panomponany taloha tan̈y. Ohatra, tamy fahitan̈a araiky hitany Ezekiela, nisy anjely araiky hitany nandrefy tempoly. Akory nataony Ezekiela? Nalainy onon̈o tsara raha nataony anjely io. Ten̈a nankahery Ezekiela fahitan̈a io. Izio koa mampianatra atsika akory tôkony han̈arehantsika fitsipiky Jehovah momba fivavahan̈a madio. (Ezek. 40:1-4; 43:10-12) Hahazo hatsaran̈a karaha Ezekiela koa atsika izikoa manokan̈a fotoan̈a ianaran̈a ndreky isaintsain̈ana raha lalin̈y an̈atiny Volan̈a Zan̈ahary.

16. Nan̈ino niaro Bob fanan̈any fô tsy miovaova? (Salamo 112:7)

¹⁶ Manàn̈a fô tsy miovaova. Taminy hira araiky nataony Panjaka Davida, izy nivolan̈a fa tsisy andra tsy hitiavany Jehovah. Hoizy: ‘A Zan̈ahary e, fonaka tsy miovaova foeky.’ (Sal. 57:7) Afaka hanan̈a fô tsy miovaova karaha zen̈y koa atsika, ke hatoky Jehovah tanteraka. (Vakia Salamo 112:7.) Zen̈y iziô raha nan̈ampy Bob, araiky nikoran̈intsika taloha iny. Izikoa fa ren̈iny fa misy lio efa natao  pare hampidirin̈y aminany izikoa ilain̈a, direkty izy nivolan̈a fa sitrany izy miala amy lopitaly io ao direkty izikoa iro mbala misy eritreritry hampiditry lio aminany. Ho Bob tafara tatỳ: “Zaho tsy nisalasala ndreky tsy navozo foeky nata hely.”

17. Ino raha ianarantsika baka amy tantarany Bob? (Zahava koa sary.)

¹⁷ Tsy niovaova fanapahankevitriny Bob fotony izy efa tapakevitry tsy ho voahozongozon̈o, efa ela talohany nidirany lopitaly. Ino raha nan̈ampy izy? Voanalohany, izy tihan̈ano raha mamparavoravo Jehovah. Faharoe, efa nianarany tsarabe raha nivolan̈iny Baiboly avio boky ndreky gazetintsika, ke hainy fa masin̈y lio ndreky fahin̈ana. Avio fahatelo, izy resy lahatra fa hamezany Jehovah hatsaran̈a mandrakizay izy izikoa man̈araka taridalan̈anany. Afaka hanan̈a fô tsy miovaova karaha zen̈y koa atsika, na ino na ino fitsapan̈a mety atrefintsika.

18. Nan̈ino mampianatra atsika hatoky Jehovah ohatrany Baraka? (Zahava sary amy fon̈ony gazety ty)

¹⁸ Matokisa Jehovah. Diniha nan̈ino fatokisany Baraka taridalan̈any Jehovah nan̈ampy izy nandresy taminy ady. Tamy fotoan̈a zen̈y, vahoakany Israely mbala tsy nanan̈a fiarovantratra na saboha, fa tafikiny Sisera ndraiky ampy fitaovan̈a tsarabe. Fa ndray zen̈y, Jehovah mbala nan̈iraka Baraka hiady tamy maramila kananita aby io fo. (Mpits. 5:8) Paminan̈ivavy Debora nan̈iraka Baraka hijotso tamy tany lemaka ke hiady tamy Sisera ndreky kalesinany 900. Mandeha mare kalesy koa fa amy lemaka, ke ho sarotro amindro Israelita aby io hiady amindro. Hainy Baraka ndraiky zen̈y, fa izy nan̈araka volan̈a Jehovah fo. Iro maramila aby io koa fa nijotso baka tamy Bongo Tabara, Jehovah nandatsaka mahaleny mare. Revo tamy godra iro kalesiny Sisera aby io, ke nataony Jehovah resiny Baraka iro. (Mpits. 4:1-7, 10, 13-16) Karaha zen̈y koa, ataony Jehovah mandresy atsika izikoa matoky izy ndreky taridalan̈a baka amy fandaminan̈anany.​—Deot. 31:6.

19. Nan̈ino anao tapakevitry tsy ho voahozongozon̈o foeky?

¹⁹ Izikoa atsika mbala miain̈y amy donia ty, atsika tsy maintsy miady mare baka tsy ho voahozongozon̈o. (1 Tim. 6:11, 12; 2 Pet. 3:17) Irarian̈a atsika tsy ho voahozongozon̈ony fan̈injehan̈a, olo miforse ankolaka, hevitrinolombelon̈o, fitaka ndreky raha mahavarian̈a. (Efes. 4:14) Fa alo atsika tapakevitry tsy hivadiky amy Jehovah ndreky ho tia izy, avio han̈araka didinany fo. Ndray zen̈y, atsika koa mila mahay mandanjalanja. Amy lahatsoratra man̈araka atsika handiniky nan̈ino Jehovah ndreky Jesosy modely lavorary amy fahaizan̈a mandanjalanja.