Papako an̈isany olobe tamy Leglizy Nitambatra ta Kanada teto. Ke isaka herin̈iandra, zahay roeny anabaviko nalefany nan̈ano sekoly alahady. Avio koa fa 11:00, zahay nindesiny nandeha lamesy. Folakandra ndraiky zahay niaraka tamy Mama nandeha tamy Tran̈o Fivorian̈a. Ke hitanay tsarabe raha tsy mampitovy fivavahan̈a aroe io.

Bob ndreky Marion Hutcheson kamaradiny mamako efa rango ela. Nikoran̈iny tamindro koa raha nianarany tan̈aty Baiboly, ke iro nan̈eky fahamarin̈ana. Taminy 1958, zaho nindesindro niaraka tamindro ndreky zanakandro telo lahy nan̈atriky Fivoriambe Iraisampirenena Sitrapony Zan̈ahary, natao tamy tanànany New York. Fivoriambe io nahadin̈y valo andra. Tsapako amy zioty fa ten̈a tsy nora tamindro nitondra zaho, kanefa fivoriambe in̈y an̈isany fotoan̈a ten̈a tsara tamy fiain̈ananaka.

Zaho koa fa bebe, zahay nipetraka tamy tany fitarimian̈a biby. Tiako nikarakara biby, ke zaho nanjary tiho veterinaira. Nikoran̈iny mamako taminy antipan̈ahy araiky raha zen̈y. Tsara fan̈ahy antipan̈ahy io nampatsiaro zaho fa atsika efa miain̈y aminy “andra farany”, avio nan̈ontaniany zaho han̈ano akory fifandraisako amy Jehovah izikoa zaho mianatra aminy iniversite an̈aty taon̈o maro. (2 Tim. 3:1) Ke zaho tapakevitry tsy nandeha taminy iniversite.

 Koa fa tapitry fianaran̈anaka tamy lise, zaho mbala nandiniky ino raha handeha hataoko. Zaho nandeha nanompo isaka farany herin̈iandra, fa izio fo tsy ten̈a nankafiziko sady zaho tsy tihan̈ano pisava lalan̈a. Tamy fotoan̈a zen̈y, papako ndreky rahalahiny nandrisiky zaho hiasa amy sosiete maventy pan̈ano assurance ta Toronto. Iro roe samby tsy Vavolombelon̈o Jehovah. Papaheliko io koa an̈isany sefo tamy sosiete io. Ke zaho nan̈eky asa io.

Ta Toronto, ankamarozany fotoan̈anaka lany taminy asa ndreky fiarahan̈a taminolo tsy Vavolombelon̈o Jehovah, ke zaho natetiky tsy nivory ndreky tsy nanompo. Tamy voanalohany, zaho niaraka nipetraka tamy dadilahiko tsy Vavolombelon̈o Jehovah. Fa izikoa izy fa naty, zaho tsy maintsy nitady tran̈o hafa.

Iry Hutcheson fivadiany nitondra zaho tamy fivoriambe taminy 1958 in̈y efa karaha raimandreniko. Zaho nalaindro niaraka nipetraka tamindro, avio nampiandro hifandray tsarabe amy Jehovah. Taminy 1960, zahay roeny John zanakandro niaraka nan̈ano batisa. Nanjary nahainazoto nitory fo zaho koa fa nahita John nan̈ano pisava lalan̈a. Izikoa fa hitandro rahalahy tamy fiangonan̈a tao fa zaho nahaimatotro, zaho nitindrendro nanjary piandraikitry Sekoliny Fanompoan̈a. a

Taminy 1966, zahay roeny Randi Berge nan̈ano mariazy. Izy pisava lalan̈a mazoto sady nan̈iry hanompo amy tany mbala ilavan̈a pitory. Nitady fomba han̈ampian̈a zahay piandraikitry faritrinay ke izy nandrisiky zahay handeha han̈ampy fiangonan̈a ta Orillia, a Ontario. Ke direkty zahay nifindra tan̈y.

Niaraka zahay navy ta Orillia, zaho koa mba nan̈ano pisava lalan̈a. Nifindra taminaka hafanampony Randi. Zaho koa fa nifen̈y mare taminy asany pisava lalan̈a, zaho nanjary ravoravo nampiasa Baiboly ndreky nahita olo loso nahay fahamarin̈ana. Nisy olo fivadiany zay ta Orillia tan̈y nampiako nan̈ova fiain̈anandro avio iro nanjary panompony Jehovah. Ten̈a ravoravo zaho nan̈ampy iro.

Tamy zahay nandalo ta Toronto, zaho nifanojy taminy Arnold MacNamara. Izy an̈isany rahalahy nitariky tamy Betela. Zahay nan̈ontaniany tsao tihan̈ano pisava lalan̈a manokan̈a. “Ia pare”, ho zaho taminany, “fa tsy a Québec fo!” Efa nifindra taminaka baka jery ratsinolo miteny angiley ta Kanada, mikasiky olo miteny fransay ta Québec. Tamy zen̈y, olo nigrevo fotony Québec tiandro hanjary faritany mahaleo ten̈a fa tsy hitambatra amy Kanada.

Ho Arnold: “Mbala a Québec zaraiky fo tany andifasany sampan̈a pisava lalan̈a manokan̈a amy zioty.” Ke zaho direkty nan̈eky handeha an̈y. Sady efa haiko fa Randi han̈eky. Tafara tatỳ, tsapako fa in̈y an̈isany fanapahankevitry ten̈a tsara nataonay!

Zahay nianatra teny fransay tan̈atiny dimy herin̈iandra. Koa fa tapitry izio, zahay roeny Randi ndreky olo fivadiany araiky zay niaraka nandeha ta Rimouski. Izio kadiriny 540 kilometara avaratra antin̈ianany Montréal. Zahay mbala tsy ten̈a nahay teny fransay. Hita be raha zen̈y tamy zaho namaky filazan̈a sasany tamy fivorian̈a zay. Zaho nivolan̈a fa amy fivoriambenay ho avy io, ho marobe “vahiny ôtrisy” ho avy kanefa “vahiny ôtrisiain” raha tôkony nivolan̈iko.

Nisy ranabavy selibatera efatra maro mazoto niaraka tamindry Huberdeau fivadiany ndreky zanakandro aroe vavy navy nan̈ampy zahay efatra ta Rimouski tan̈y. Ry Huberdeau fivadiany namondro tran̈o araiky maventy zay, fa pisava lalan̈a jiaby nipetraka tao ndraiky nan̈ampin̈ampy iro nan̈efa fondrontran̈o. Tran̈o Fotsy fikahianay tran̈o io fotony potonany ndreky alohanany samby fotsy. Matetiky, 12 na 14 zahay niaraka nipetraka tao. Zahay roeny Randi pisava lalan̈a manokan̈a, ke na maraindrain̈y na folakandra na hariva zahay mandeha manompo fo. Ravoravo zahay fotony nisy naman̈a fo lera nandeha nanompo, nata lera alin̈y nanintsy be in̈y.

Zahay nanjary fankazatra mare tamindro pisava lalan̈a tsy mivadiky aby io, ke iro efa nira fianakavian̈anay. Ndraikindraiky zahay nandrehitry hazomaty baka io zahay niaraka namindro tio, na zahay nan̈ano lokibe. Nisy araiky tamindro rahalahy aby io nahay nisoma lamoziky, ke matetiky lera sabotsy hariva zahay nihirahira ndreky nitsinjatsinjaka.

Naro olo lian̈a tamy fahamarin̈ana ta Rimouski. Tan̈atiny dimy taon̈o, ravoravo zahay nahita pianatra Baiboly maromaro nandroso ke natao batisa. Nitombo 35 isakany pitory tamy fiangonan̈anay.

Nahazo fiofan̈ana tsara zahay ta Québec. Hitanay fa Jehovah nan̈ampy zahay tamy fanompoan̈a, avio izy nan̈ampy zahay hahazo raha nilainay. Zahay koa nianatra ho tia olo mivolan̈a teny fransay, mboany fivolan̈anandro ndreky kolontsain̈indro. Ke zahay nanjary tia kolontsain̈y hafa koa.​—2 Kor. 6:13.

Tsy nampoizinay fa zahay nirahiny sampan̈a nifindra tamy tanànany Tracadie. Izio tamy sisindranomasin̈y antin̈ianany Nouveau-Brunswick. Sahirantsain̈y hely zahay taminio fotony zahay vo baka nan̈ano taratasy hitana tran̈o araiky zay. Zaho lastio vo hampianatra tapapotoan̈a tamy lekoly araiky zay. Tsy basinizen̈y fa sasany tamy pianatra Baibolinay koa vo nanjary pitory, baka io zahay mbala tan̈aty fan̈amboaran̈a Tran̈o Fivorian̈a.

Nivavaka momba fifindran̈a io fo zahay tan̈aty farany herin̈iandra, baka io zahay nandeha nitsidiky Tracadie. Tan̈y tsy honohono hitovy ta Rimouski foeky. Fa zahay tapakevitry hifindra ta Tracadie fo, fotony tan̈y tany tiany Jehovah handihananay. Zahay nitsapa toetry Jehovah ke hitanay fa nadosony raha jiaby nanakantsakan̈a zahay. (Mal. 3:10) Randi  ten̈a tsara fifandraisan̈a tamy Jehovah, izy nahafoe ten̈a sady tia sangisangy ke loso tsy sarotro taminay nifindra.

Robert Ross zaraiky fo antipan̈ahy tamy fiangonan̈anay vaovao io. Handeha han̈ano pisava lalan̈a diandro roeny vadiny ta Tracadie. Linda an̈arany ranabavy io. Fa izikoa fa teraka zanakandro talan̈olo, iro nanapakevitry nidoko ta Tracadie. Nata iro mbala nitaiza tsaiky hely iro nazoto nandray vahiny ndreky nazoto nanompo. Raha zen̈y ten̈a nankahery zahay.

Tafarany taon̈o aroe nan̈anaovanay pisava lalan̈a ta Tracadie, zahay navoakaiky han̈ano asany faritry. Tsy nampoizinay foeky raha zen̈y. Tan̈aty fito taon̈o zahay nitsidiky faritry miteny angiley, fa baka tio zahay nimpody navoatendry tamy faritry miteny fransay ta Québec. Léonce Crépeault an̈arany piandraikitry vondroparitrinay ta Québec. Izy nidera zaho tamy kabaro nataoko. Avio karaha ty raha matetiky an̈ontaniany zaho: “Akory hahavy kabaronao aby io ho mora arehan̈a?” b Fan̈ontanian̈anany zen̈y nan̈ampy zaho handiniky karakory mety hataoko baka fampianaran̈anaka ho voafaritry tsara sady ho mora azo.

An̈isany fanendrena araiky tsy mety adin̈ako, fanendrena nazoko tamy Fivoriambe Iraisampirenena “Finoan̈a Mandresy” natao ta Montréal, taminy 1978. Zaho tamy zen̈y niasa tamy Sampandraharaha Mikarakara Hanin̈y. Zahay efa nan̈anten̈a handray olo 80 000, ke tsy nitovy tamy taloha fomba an̈amezanay hanin̈y iro. Vaovao fitaovan̈a jiaby handeha ampiasain̈a, ndreky fomba fiasa avio karazan̈a loky handeha hatao. Zahay nanan̈a frizidaira 20 maro maventy, fa tsy nandeha tsara ndraikindraiky. Zahay mbala tsendriky nafaka niditry tamy stady tao taminy andra talohany fivoriambe io izikoa tsy efa sasakalin̈y, fotony mbala nisy olo nan̈ano spaoro tao. Kanefa mahizikiziky zahay efa tsy maintsy nandrehitry lafaoro handokisan̈a hanin̈y maraindrain̈y. Lonja zahay taminio, fa iro piasa antsitrapo niaraka niasa taminaka aby io ten̈a nazoto niasa avio matotro sady tia sangisangy. Maro raha nianarako baka tamy toetsain̈indro zen̈y. Mbala kamarady fo zahay jiaby firaka zioty. Ravoravo zaho nahavita nan̈atriky fivoriambe miavaka ta Québec in̈y, fotony tan̈elan̈elan̈any 1940 ndreky 1960 niatriky fan̈injehan̈a mare iro piaramanompo tamy faritry io.

Maro koa raha nianarako baka tamy piandraikitry hafa niaraka niasa taminaka tamy fivoriambe  ta Montréal in̈y. Nisy fotoan̈a David Splane niandraikitry fivoriambeny vondroparitry. An̈isany Filankevipitantan̈ana izy amy zioty. Tafara tatỳ, zaho voatendry hiandraikitry fivoriambe. David tiô fo nanohan̈a zaho.

Zahay nan̈ano asany faritry tan̈aty 36 taon̈o. Fa taminy 2011, zaho voakaiky hampianatra amy Sekoliny Antipan̈ahy. Tan̈aty taon̈o aroe, zahay roeny Randi im-75 niovaova tany nandrian̈a, fa tsy very boriny ezakanay. Isaka tapitry herin̈iandra, antipan̈ahy aby io mankasitraka mare fotony tsapandro fa Filankevipitantan̈ana ten̈a mikarakara arapan̈ahindro.

Tafara tatỳ, zaho nanjary papianatra tamy Sekolin’ny Mpitory Ilay Fanjakana. Matetiky iro pianatra aby io naharen̈y kajo sady niasaloha azony programo maletry loatra. Fianaran̈a io baka mahadin̈y fito lera isanandra, avio isaka hariva iro tsy maintsy man̈ano devoara an̈aty lera telo, baka io isaka herin̈iandra iro mahazo anjara efatra na dimy. Nazavainay roeny papianatra namako io tamindro fa raha zen̈y tsy ho vitandro izikoa tsy tiô Jehovah nan̈ampy iro. Tsaroako fa lany fan̈ahy iro pianatra aby io izikoa fa mahita fa be lavitriny raha niritriretindro ho vita, raha vitandro izikoa iro fa nilampy tamy Jehovah.

Hatsarampan̈ahiny mamako nan̈ampy pianatra Baibolinany nan̈ano fandrosoan̈a, avio nahavy papako tsy nanohitry be eky. Telo andra tafarany nifatesany Mama, lany fan̈ahy zahay nahita papanay navy nitandren̈y kabaro tamy Tran̈o Fivorian̈a. Rango tamy zen̈y izy nivory fo tan̈aty 26 taon̈o. Marin̈y fa Papa tsiary nan̈ano batisa, fa ndray zen̈y, iro antipan̈ahy aby io nivolan̈a taminaka fa tsiary tsy izy fo olo voanalohany avy ampivorian̈a isaka herin̈iandra.

Modeliny Mama koa ten̈a nisy vokany taminaka ndreky tamindro anabaviko aby io. Amy zioty, iro telo samby manompo Jehovah miaraka amy vadindro. Aroe amindro manompo amy birony sampan̈a, araiky a Portugal, fa araiky ndraiky an Haïti.

Amy zioty, zahay roeny Randi pisava lalan̈a manokan̈a a Hamilton, an Ontario. Tamy zahay mbala nan̈ano asany faritry, zahay ravoravo niaraka tamy pitory nandeha nitsidiky ndreky nampianatra pianatrandro. Fa amy zioty ndraiky, zahay ravoravo mahita pianatranay man̈ano fandrosoan̈a. Arakaraka nampikamarady zahay tamindro piaramanompo tamy fiangonan̈anay vaovao io, nanjary hitanay fomba nan̈ampiany Jehovah iro na tamy mora na tamy sarotro. Ke raha zen̈y ten̈a nankahery zahay.

Koa fa dinihinay raha niain̈anay, zahay ten̈a mankasitraka hatsarampan̈ahy naboakanolo taminay. Zahay koa iziô mifen̈y ‘mitady raha hahatsara’ olo, ke mandrisiky iro hanompo Jehovah erakany farany tsara vitandro. (2 Kor. 7:6, 7) Tamy fianakavian̈a araiky zay, ohatra, pisava lalan̈a mamandro ndreky zanakandro aroe mianadahy. Nan̈ontaniako babandro asa izy efa nieritreritry han̈ano pisava lalan̈a koa. Fa izy hoizy efa manohan̈a pisava lalan̈a telo. Ho zaho taminany: “Azovy aminaro roeny Jehovah eky ten̈a mahavita manohan̈a tsarabe?” Avio zaho nandrisiky izy han̈andran̈a raha nankafiziny fianakavian̈anany io. Tsiota fanjava tafaranizen̈y izy nan̈ano pisava lalan̈a.

Zahay roeny Randi tsy ho voly hitantara amy ‘taranaka afara an̈y raha mahagaga’ nataony Jehovah. Zahay matoky fa iro ho ravoravo hanompo Jehovah karaha ataonay koa.​—Sal. 71:17, 18.