1. Akôry fahitanao fahamarin̈ana io?

 VAHOAKAN’I Jehovah tia ny marin̈y ambaran’ny Baiboly ao. Miôrin̈y amizio finoan̈antsika. (Rom. 10:17) Haintsika fa Jehovah nan̈ano fiangonan̈a kristianin̈y io nataony “andry ndreky tohan̈an’ny fahamarin̈ana.” (1 Tim. 3:15) Ravoravo koa atsika man̈eky “irô mitariky amintsika” lera irô man̈azava ny marin̈y baka amy Baiboly, ndreky man̈amia tari-dalan̈a mifan̈araka amy sitrapôn’ny Zan̈ahary.​—Heb. 13:17.

2. Izikoa Jakoba 5:19 zahan̈a, ino raha mety hahazo atsika nata atsika efa mahay ny marin̈y?

² Fa kanefa, atsika ndray efa nan̈eky ny marin̈y io, ndreky efa nan̈eky fa atsika mila man̈araka tari-dalan̈a baka amy fandaminan̈an’ny Zan̈ahary, atsika mbala mety ho voafitaka fo. (Vakia Jakoba 5:19.) Tian’i Satana mare baka han̈ano raha hahavy atsika tsy hatoky Baiboly io, ndreky tsy hatoky tari-dalan̈a azontsika baka amy fandaminan̈an’ny Zan̈ahary.​—Efes. 4:14.

3. Ino raha tokôny hataontsika baka atsika tsy hiala amy fahamarin̈ana? (Efesianina 6:13, 14)

³ Vakia Efesianina 6:13, 14. Teteky iô Devoly mbala hampiasa vandy mandilatran’ny taloha, hamitahany firenena jiaby, baka irô hanohitry Jehovah. (Apok. 16:13, 14) Ampoizin̈y koa fa Satana mbala hahaihifen̈y fo han̈ano raha hamitahan̈a vahoakan’i Jehovah. (Apok. 12:9) Ke ten̈a raha maventy, izikoa rango iziôty atsika efa zatra man̈avaka raha tsy mampiran̈a ny marin̈y ndreky vandy, baka atsika hahavita han̈araka ny marin̈y fo. (Rom. 6:17; 1 Pet. 1:22) Miankin̈y amy fahaizantsika man̈avaka ny marin̈y ndreky diso zen̈y ny hahatafitsaka velon̈o atsika amy fahorian̈a be!

4. Ino raha hidinihintsika amy lahatsoratra ty?

 ⁴ Amy lahatsoratra ty atsika handiniky toetry aroe ilaintsika, baka atsika hahay han̈avaka ny marin̈y baka amy Baiboly ndreky han̈eky tari-dalan̈a azontsika baka amy fandaminan̈an’ny Zan̈ahary. Aviô atsika handiniky sôso-kevitry telo han̈ampy atsika tsy hiala amy fahamarin̈ana.

TOETRY ILAINTSIKA HAHAVY ATSIKA HAHAY HAN̈AVAKA NY MARIN̈Y

5. Nan̈ino ma favozoan̈a Jehovah han̈ampy atsika hahay han̈avaka ny marin̈y?

⁵ Favozoan̈a Jehovah. Ino ma dikan’ny mavozo Jehovah zen̈y? Dikan’izio, tia izy mare ke tsy man̈ano raha tsy mamparavoravo izy foeky. Vôn̈ono koa atsika hianatra raha tsy mampiran̈a ny marin̈y ndreky diso aviô fahamarin̈ana ndreky vandy, baka Jehovah hankasitraka atsika. (Ohab. 2:3-6; Heb. 5:14) Matetiky raha mamparavoravo olombelon̈o tsy mamparavoravo Jehovah, ke atsika tsy mila man̈ambela favozoan̈a olo hanjary beben’ny favozoantsika Jehovah.

6. Nan̈ino ma favozoan̈a olo nahavy irô mpiadidy israelita folo aby in̈y tsy nan̈araka ny marin̈y?

⁶ Izikoa favozoan̈a olo bebe tozay favozoan̈a Zan̈ahary, ho tafiala amy marin̈y atsika. Diniha baka irô mpiadidy 12 nirahin̈y nandeha nizaha tany nivolan̈in’i Jehovah fa hamiany irô Israelita aby io. Folo tamindrô io navozo Kananita aby io nandilatra fitiavandrô Jehovah. Irô nivolan̈a tamy namandrô Israelita aby io: “Atsika tsy hahavita hanonga hiady amindrô olo aby io, fôtony irô fatatra mare mandilatra atsika.” (Nom. 13:27-31) Karaha misy mahamarin̈y izy volan̈andrô zen̈y, fôtony izikoa fizahavan’olombelon̈o izy fo, Kananita aby io fatatra marin̈y tozay irô Israelita aby io. Kanefa hita baka amy volan̈andrô Israelita aby io fa irô nan̈adin̈a fa Jehovah mbala bebendrô Kananita aby io. Irô mpitsikilo aby io ndray navozo, irô  tôkony nieritreritry raha tian’i Jehovah hataondrô Israelita aby io. Aviô irô tôkony nangala onon̈o raha nataon’i Jehovah tamindrô taloha tan̈y. Irô koa nan̈ano zen̈y, ho azondrô onon̈o fa angôvondrô Kananita aby io tsisy dikany foeky izikoa ampiran̈iny amin’ny angôvon’i Jehovah, fôtony izy Zan̈ahary faran’ny mahery. Fa kanefa, Josoa ndreky Kaleba tsy niran̈a irô folo lahy tsy natoky Jehovah aby io, fôtony tiandrô Jehovah hankasitraka irô. Irô nivolan̈a tamin’olo aby io: “Izikoa Jehovah miaraka amintsika, izy tsy maintsy hitariky atsika amy tany io fo, ndreky han̈amia izio atsika.”​—Nom. 14:6-9.

7. Akôry hampitombosantsika favozoantsika Jehovah? (Zahava koa sary.)

⁷ Baka fitiavantsika Jehovah mahaimitombo fo, atsika mila mieritreritry ino raha mamparavoravo izy, isaka atsika hangala fanapahan-kevitry. (Sal. 16:8) Ke izikoa anao mamaky tantara amy Baiboly, man̈ontania ten̈a: ‘Izikoa zaho irô ty, ino fanapahan-kevitry nataoko?’ Ohatra, miniminia baka izikoa anao tiô, tamin’irô mpiadidy aby in̈y nivolan̈a fa Israelita aby io tsy mety haharesy irô Kananita aby io. Anao ma nan̈eky raha nivolan̈indrô zen̈y ke navozo olo, sa fitiavanao Jehovah ndreky fitiavan̈a han̈ano raha mamparavoravo izy bebe tozay favozoanao olo? Irô jiaby tamy firenenan’Israely io tsy nan̈eky ny marin̈y nambaran’i Josoa ndreky Kaleba tamindrô. Ke vokany? Jehovah tsy nan̈omba irô niditry tamy Tany Nampan̈antinain̈y.​—Nom. 14:10, 22, 23.

8. Ino toetry mila ifen̈antsika hanan̈ana, aviô nan̈ino?

⁸ Fanetren-ten̈a. Jehovah man̈ambara ny marin̈y amin’olo manetry ten̈a. (Mat. 11:25) Manetry ten̈a atsika, fôtony atsika man̈eky ampianarin̈y fahamarin̈ana. (Asa. 8:30, 31) Fa kanefa, atsika mbala mila mitandrin̈y fo tsao atsika manjary man̈ambony ten̈a. Atsika koa man̈ambony ten̈a, atsika mety hieritreritry fa hevitrintsika ny faran’ny tsara fa tsy torolalan̈an’ny Baiboly ndreky toromariky azontsika baka amy fandaminan̈an’i Jehovah.

9. Akôry hahavy atsika hanetry ten̈a fo?

⁹ Izikoa tiantsika hanetry ten̈a fo, mila tsy adin̈antsika fa atsika io hely, izikoa ampiran̈iny amin’ny habezan’i Jehovah. (Sal. 8:3, 4) Mila mivavaka amy Jehovah koa atsika, mangataka izy han̈ampy atsika hanjary hahaihanetry ten̈a fo ndreky ho mora ampianarin̈y. Jehovah han̈ampy atsika, baka atsika han̈isy valerany raha ianarantsika baka amy Baiboly ndreky baka amy fandaminan̈anany, fa tsy han̈izinkizin̈y hevitrintsika manokan̈a. Ke izikoa anao mamaky Baiboly, zahava porofo ivolan̈ana fa Jehovah tia olo manetry ten̈a, fa tsy tia olo man̈ambony ten̈a, miavonkavon̈o ndreky poerapoera. Aviô mifen̈a fo hanetry ten̈a, izikoa anao mahazo tombontsoa karaha mahavy anao hanan̈a fahifan̈a sasany ndreky hahavy anao ho hita be.

AKÔRY HAHAVY ATSIKA TSY HIALA AMY FAHAMARIN̈ANA?

10. Azôvy aby taloha tan̈y ndreky amy ziôty ampiasain’i Jehovah nan̈amezan̈a tari-dalan̈a ndreky toromariky vahoakanany?

¹⁰ Aza vôly matoky tari-dalan̈a baka amy fandaminan̈an’i Jehovah. Tamindrô Israely taloha tan̈y, Jehovah nampiasa Mosesy ndreky Josoa nan̈amia toromariky vahoakanany. (Jos. 1:16, 17) Jehovah nitahy irô izikoa irô nan̈eky fa irô lelahy aby io solonten̈an’ny Zan̈ahary Jehovah. Taonjato maro tafaran’izin̈y, izikoa fa nifôron̈o fiangonan̈a kristianin̈y, baka tamindrô apostoly 12 aby io nazahoan’ny fiangonan̈a tari-dalan̈a. (Asa. 8:14, 15) Baka tiô nisy anti-pan̈ahy aby ta Jerosalema tan̈y koa nan̈ampy irô. Ke irô fiangonan̈a  aby io koa fa nan̈araka tari-dalan̈a baka amindrô lelahy tsy nivadiky aby io, “nahainatanjaka fiangonan̈a, aviô nahainaro fo isan’andra isan’andra.” (Asa. 16:4, 5) Aminy andra iziôty koa, Jehovah mitahy atsika, izikoa atsika man̈araka tari-dalan̈a azontsika baka amy fandaminan̈an’i Jehovah. Fa akôry ataon’i Jehovah, izikoa atsika tsy man̈eky irô irahiny mitariky atsika? Baka hamaliantsika fan̈ontanian̈a zen̈y, atsika handiniky raha nandalo tamindrô Israelita aby io, tamin’irô nitarain̈y nandeha tamy Tany Nampan̈antinain̈y tan̈y.

11. Nan̈ano karakôry niafarandrô olo tsy nan̈aja Mosesy ndreky olo nifidin’ i Jehovah hitariky irô? (Zahava koa sary.)

¹¹ Nisy fotoan̈a irô Israelita aby io tamin’irô handeha tamy Tany Nampan̈antinain̈y tan̈y, nanohitry Mosesy irô olo manan-kaja sasany, ndreky tsy nan̈eky fahifan̈a namian’i Jehovah izy. Karaha ty ho irô: “Vahoaka jiaby masin̈y aby [fa tsy Mosesy zaraiky fo] baka iô Jehovah amindrô iô.” (Nom. 16:1-3) Marin̈y ndraiky fa “vahoaka jiaby masin̈y”, tamy Zan̈ahary. Fa ndray zen̈y, Jehovah nifidy Mosesy nitariky vahoakanany. (Nom. 16:28) Ke izikoa irô fa nankaratsy Mosesy, irô nira nankaratsy Jehovah fo. Irô tsy nandiniky raha tian’i Jehovah, fa irô nifantoko tamy raha tiandrô fo. Irô tihahazo fahifan̈a ndreky tihahazo voninahitry. Nivonen’ny Zan̈ahary irô mpanohitry aby io, ndreky irô olo an-drivony nan̈araka raha nataondrô. (Nom. 16:30-35, 41, 49) Azo antoko koa iziôty fa Jehovah koa tsy mankasitraka irô olo tsy man̈araka tari-dalan̈a baka amy fandaminan̈anany.

12. Nan̈ino ma atsika tokôny hatoky fandaminan̈an’i Jehovah fo?

¹² Mety matoky fandaminan̈an’i Jehovah fo atsika. Nan̈ino? Fôtony izikoa fa misy raha mila ahitsy amy fahatakarantsika fahamarin̈ana amy Baiboly, na fomba fandaminan̈a asan’ny Fanjakan̈an’ny Zan̈ahary, Filan-kevi-pitantan̈ana tsy misalasala foeky man̈ano fan̈ovoan̈a ilain̈a. (Ohab. 4:18) Man̈ano zen̈y  irô, fôtony irô tihamparavoravo Jehovah. Irô koa man̈ano erakany vitandrô, baka fanapahan-kevitry alaindrô miôrin̈y amy Volan̈an’ny Zan̈ahary fo. Izio baka modelin’ny volan̈a mahatsara tôkony harehan’ny vahoakan’i Jehovah jiaby.

13. Ino ma “modelin’ny volan̈a mahatsara” zen̈y, aviô mila ataontsika karakôry izio?

¹³ “Aza ialan̈a foeky modelin’ny volan̈a mahatsara.” (2 Tim. 1:13) Ino ma “modelin’ny volan̈a mahatsara” io? Izio fampianaran̈a Kristianin̈y, an̈atin’ny Baiboly ao. (Jaona 17:17) Ke raha jiaby inoantsika, miôrin̈y amizio aby. Man̈ano erakany vitany fandaminan̈an’i Jehovah mampianatra atsika, baka raha inoantsika miôrin̈y amizio fo. Izikoa atsika mifen̈y fo tsy miala modelin’ny volan̈a mahatsara io, hahaihahazo fitahian̈a fo atsika.

14. Karakôry nahavy Kristianin̈y sasany niala tamy “modelin’ ny volan̈a mahatsara”?

¹⁴ Han̈ano karakôry atsika izikoa miala amy “modelin’ny volan̈a mahatsara” io? Diniha baka ohatra ty. Tamy taonjato voanalohany, nisy Kristianin̈y sasany nan̈aparitaka tsaho, ke nivolan̈a fa andran’i Jehovah zen̈y efa navy. Nety nisy taratasy nikoran̈a raha zen̈y, ke olo nety nieritreritry fa taratasy io nisoratin’ny apostoly Paoly. Ke sasany tamindrô Kristianin̈y ta Tesalonika tan̈y tsy nan̈adihady aby, fa direkty irô nino tsaho io baka iô nan̈aparitaka izio foeky. Ke irô tsy ho voafitaka foeky, izikoa irô nan̈araka raha efa nampianarin’i Paoly irô, tamin’izy tamindrô tan̈y. (2 Tes. 2:1-5) Apostoly io baka nan̈amia torohevitry irô rahalahiny aby io tsy hino zay raha ren̈indrô. Aviô baka han̈ampian̈a irô amin’ny afara, karaha ty namaran̈an’i Paoly taratasy faharoe nisoratiny tamindrô Tesalonianin̈y aby io: “Ty viloma nisoratin’ny tan̈anaka, zaho Paoly, sady hahaizan̈a taratasinaka jiaby. Io soratan̈ananaka.”​—2 Tes. 3:17.

15. Akôry hiarovantsika ten̈a amindrô vandy aby karaha marin̈y aby io? Man̈ameza ohatra. (Zahava koa sary.)

¹⁵ Ino raha ianarantsika baka amy raha nivolan̈in’i Paoly tamindrô Tesalonianin̈y aby io? Izikoa atsika maharen̈y raha tsy mifan̈araka amy raha nianarantsika tamy Baiboly, na maharen̈y tsaho, atsika mila mampiasa fahendrena.  Karaha nataony tamy Firaisan̈a Sovietiky taloha tan̈y, nisy fahavalontsika nan̈amia taratasy, nataondrô hoe taratasy baka tamy foibe zen̈y. Taratasy io nivolan̈a fa irô rahalahy aby io nila nisaraka, hamoron̈o fandaminan̈a mahaleo ten̈a. Karaha baka tamy foibe ankitin̈y taratasy io, fa irô rahalahy tsy nivadiky aby io tsy navoafitakan’izen̈y. Haindrô tsara fa hafatra nazondrô tamy taratasy io tsy nifan̈araka tamy raha nampianarin̈y irô. Karaha zen̈y koa amin’ny andra iziôty. Irô fahavalon’ny fahamarin̈ana aby io mampiasa teknôlozy moderny, hamitahan̈a atsika ndreky hampisaratsarahan̈a atsika. Ke atsika tsy tôkony ‘halaky hikorontan-tsain̈y’ fa mila mandiniky tsarabe raha ren̈intsika na raha nivakintsika io tsao tsy mifan̈araka amy fahamarin̈ana nampianarin̈y atsika.​—2 Tes. 2:2; 1 Jaona 4:1.

16. Mifan̈araka amy raha koran̈in’ny Romanina 16:17, 18, ino raha tôkony hataontsika izikoa misy olo man̈aparitaka fan̈azavan̈a tsy mifan̈araka amy fahamarin̈ana?

¹⁶ Mifen̈a fo hiray sain̈y amin’olo tsy mivadiky amy Jehovah. Tian’ny Zan̈ahary atsika izikoa miray sain̈y fo manompo izy. Hiray sain̈y fo atsika izikoa tsy miala amy fahamarin̈ana. Lan̈iany olo man̈aparitaka fan̈azavan̈a mifanohitry amy fahamarin̈ana io mampisaratsaraka fiangonan̈a. Ke Zan̈ahary mampitandrin̈y atsika, ke mandrisiky atsika ‘hiala irô io.’ Izikoa tsy zen̈y, atsika hanjary hino raha tsy marin̈y koa ke hivadiky amy Jehovah.​—Vakia Romanina 16:17, 18.

17. Ino aby hatsaran̈a azontsika izikoa atsika mahay ny marin̈y ndreky tsy miala amizio?

¹⁷ Izikoa atsika fa mahay fahamarin̈ana ke tsy miala amizio, hahaiharikitry Jehovah fo atsika, aviô ho fatatra fo finoan̈antsika. (Efes. 4:15, 16) Tsy ho voafitakan’ny fampianaran̈an’i Satana atsika ndreky vandy aby aparitany aby io, aviô atsika hikarakarain’i Jehovah tsara an̈atin’ ny fahorian̈a be io ke ho tafitsaka velon̈o. Ke fihin̈a fo ny marin̈y, fa ‘Zan̈aharin’ny fiadan̈ana tsy hiala anao edy.’​—Fil. 4:8, 9.