1-2. Azôvy ma Zadoka zen̈y? (1 Tantara 12:22, 26-28)

 MINIMINIA hely baka. Misy lelahy maro mandilatra 340 000, vory handeha han̈ano Davida ho mpanjakan’Israely. Tan̈atin’ny telo andra, irô nidôko narikitry tazoa feno vatovato narikitry Hebrona. Naresaka tokiky baka iô korambe, aviô irô ravoravo nidera Jehovah. (1 Tant. 12:39) Tan̈atin’olo marobe io, nisy manafolahy araiky, Zadoka an̈arany. Mety tsy hain’olo aby fa Zadoka koa mba tao. Fa Jehovah ndraiky nahita izy, baka iô tiany koa atsika hahay fa Zadoka koa mba tan̈y. (Vakia 1 Tantara 12:22, 26-28.) Azôvy ma Zadoka zen̈y?

² Zadoka io mpisôron̈o niaraka niasa marikitry tamin’i Abiatara Mpisôron̈obe. Zadoka koa olo mpahita, ke izy nahay nan̈avaka sitrapôn’ny Zan̈ahary ndreky nanan̈a fahendrena niavaka. (2 Sam. 15:27) Olo nandeha nan̈aton̈o izy, izikoa fa nitady torohevitry tsara. Izy koa lelahy nisy korazy. Ke toetrinany araiky zen̈y raha handeha hidinihintsika amy lahatsoratra ty.

3. a) Nan̈ino ma mila manan̈a korazy mpanompon’i Jehovah? b) Ino raha hidinihintsika amy lahatsoratra ty?

³ An̈atin’ny andra farany ty, hahaimare fo fan̈afihan’i Satana vahoakan’ny Zan̈ahary. (1 Pet. 5:8) Ke mila manan̈a korazy mare atsika, mandra-pan̈adosoan’ny Zan̈ahary i Satana ndreky donia ratsinany ty. (Sal. 31:24) Ke alô atsika handiniky fomba telo hangalantsika tahaka fanan̈an’i Zadoka korazy.

TOHÀN̈A FANJAKAN̈AN’NY ZAN̈AHARY

4. Nan̈ino ma vahoakan’i Jehovah mila misy korazy izikoa fa manohan̈a Fanjakan̈an’ny Zan̈ahary? (Zahava koa sary.)

⁴ Atsika vahoakan’i Jehovah manohan̈a Fanjakan̈anany amy fô jiaby, kanefa matetiky mila korazy vo mahavita raha zen̈y. (Mat. 6:33) Ohatra, amy donia ratsy ty, ten̈a mila korazy atsika vo mahavita man̈araka fitsipikin’ny Zan̈ahary, ndreky mitory vaovao tsaran’ny Fanjakan̈anany. (1 Tes. 2:2) Baka iô koa ten̈a ilàn̈a korazy tsy mibidabida raha momba politiky amy donia misaratsaraka  ty. (Jaona 18:36) Maro amy vahoakan’i Jehovah koa mijaly amy velon-ten̈a, popohin̈y, na nigadrain̈a foeky, fôtony tsy man̈eky han̈ano politiky na han̈ano maramila.

5. Nan̈ino ma Zadoka nila nisy korazy izikoa fa nanohan̈a Davida?

⁵ Dian’i Zadoka ta Hebrona tsy zisty handeha hankalaza Davida natao mpanjaka io fo fa izy nandeha tan̈y efa nitondra fitaovan̈a findesin̈y miady, sady izy efa vôn̈ono hiady foeky. (1 Tant. 12:38) Izy koa vôn̈ono han̈araka Davida handeha hiady, hiaro irô Israelita aby io amy fahavalondrô. Zadoka ndraiky tsy ten̈a maramila mpiady, fa izy fo lelahy ten̈a nisy korazy.

6. Nan̈ino ma Davida modely tsara narehan’i Zadoka tamy fanan̈ana korazy? (Salamo 138:3)

⁶ Karakôry ma nahavy lelahy mpisôron̈o karaha nataon’i Zadoka lôso nisy korazy be karaha zen̈y? Izy nahay lelahy maro fatatra sady nisy korazy koa, ke baka tamindrô zen̈y nangalany fianaran̈a. Ohatra araiky amy zen̈y Davida. Izy nisy korazy ‘nitariky irô israelita aby io izikoa fa nisy ady.’ Ke irô Israelita aby io nanohan̈a izy tamy fô jiaby. (1 Tant. 11:1, 2) Davida nitavandra Jehovah han̈ampy izy fo, izikoa fa niady tamindrô fahavalonany aby io. (Sal. 28:7; vakia Salamo 138:3.) Zadoka koa nangala fianaran̈a tamindrô olo niaraka niain̈y taminany, karaha ataon’i Joiada ndreky Benaia lelahy mpiady zanakan’i Joiada, baka iô koa tiô irô lelahy 22 sefon’ny foko nilan̈y tamy Davida. (1 Tant. 11:22-25; 12:26-28) Irô lelahy jiaby zen̈y tapa-kevitry hanohan̈a Davida hanjary mpanjakandrô ndreky niaro izy.

7. a) Tantaran-jôvy nanan̈a korazy amy ziôty mety hangalantsika fianaran̈a? b) Ino raha ianaranao baka amy Rahalahy Nsilu, koran̈in’ny video in̈y?

⁷ Akôry hanan̈antsika angôvo ndreky korazy karaha zen̈y? Lôso hanan̈a angôvo ndreky korazy atsika, izikoa mandiniky tantarandrô olo naro nisy korazy tsy nivadiky tamy Jehovah  ndreky nanohan̈a Fanjakan̈anany. Jesosy Kristy Mpanjakantsika tsy nan̈eky hanjary mpitondra tamy fanjakan̈a ara-politikin’i Satana foeky, ndray nisy olo nanery izy han̈ano zen̈y. (Mat. 4:8-11; Jaona 6:14, 15) Jesosy koa nitavandra Jehovah han̈amia izy angôvo baka hahavitany han̈ano ny tsara. Amy ziôty koa, misy tanora maro nahavita tsy nivadiky ke tsy nan̈eky han̈ano raha tsy niken’ny eritreritrindrô, na koa tsy nan̈eky han̈ano politiky. Ke nan̈ino anao izikoa mamaky tantarandrô zen̈y amy jw.org ao? a

AMPIA IRÔ RAHALAHINAO ABY IO

8. Lera karakôry irô anti-pan̈ahy aby io ten̈a mila manan̈a korazy, baka mahavita man̈ampy irô rahalahy ndreky ranabavy aby io?

⁸ Vahoakan’i Jehovah faran-draha tia mifan̈ampy eky. (2 Kor. 8:4) Fa ndray zen̈y, ndraikindraiky, ten̈a ilan̈a korazy man̈ano raha zen̈y. Ohatra, izikoa fa misy ady, haindrô anti-pan̈ahy aby io fa irô rahalahindrô ndreky ranabavindrô aby io ten̈a mila fankahirezan̈a ndreky mila olo manohan̈a irô. Baka iô koa, irô mety mila fan̈ampian̈a ara-pan̈ahy na raha ilaindrô amy fiain̈ana foeky. Ke nohon’ny fitiavandrô ôndrikôndrikin’ny Zan̈ahary, irô anti-pan̈ahy aby io vôn̈ono hirisiky ain̈indrô baka han̈amezan̈a raha ilaindrô mpiara-manompo aby io. (Jaona 15:12, 13) Zen̈y an̈aboahandrô fa irô ten̈a mangala tahaka fanan̈an’i Zadoka korazy.

9. Eraka raha koran̈in’ny 2 Samoela 15:27-29, nirahin’i Davida nan̈ino Zadoka? (Zahava koa sary.)

⁹ Nisy fotoan̈a Davida efa tseky nivonen’olo. Absaloma zanany baka tapa-kevitry hanjary mpanjaka, ke izy tseky hamono Davida foeky. (2 Sam. 15:12, 13) Ke Davida nila niala malaky ta Jerosalema! Ke karaha ty ho Davida tamindrô mpanomponany aby io: “Alô atsika hilefa. Hivonen’i Absaloma atsika jiaby io, izikoa atsika tsy miala eto!” (2 Sam. 15:14) Tamin’irô mpanomponany jiaby nilefa in̈y, tontohitry  Davida fa nila nisy olo nidôko ta Jerosalema baka han̈ambara aminany tetiky mbala handeha hataon’iry Absaloma. Ke izy nandefa Zadoka ndreky irô mpisôron̈o aby io himpody tan-tanàna tan̈y, baka hitsikilo raha ataon’iry Absaloma. (Vakia 2 Samoela 15:27-29.) Fa irô nila nitandritandrin̈y izikoa fa nan̈ano zen̈y. Ten̈a sarotro sady nety hamono irô raha nirahin’i Davida ataondrô io. Absaloma baka olo kafiry sady tia ten̈a, baka iô tsisy dikany taminany foeky nivadiky tamy babany. Diniha baka karakôry hataony, izikoa hainy fa Zadoka ndreky irô mpisôron̈o aby io nitsikilo raha nataony, baka hiarovan̈a Davida!

10. Karakôry nataon’i Zadoka ndreky irô namany aby io niaro Davida?

¹⁰ Ke Davida nan̈iraka Zadoka ndreky Hosay, namany tsy nivadiky taminany, han̈ampy izy tamy tetiky araiky nataony. (2 Sam. 15:32-37) Ke karaha ty tetiky io: Hosay nan̈ano sary nanohan̈a Absaloma, ke nan̈ambara tamin’i Absaloma karakôry hataondrô hanafiky Davida. Fa soso-kevitry namezan’i Hosay io ndraiky, nahafan’iry Davida nioman̈a amy fan̈afihan̈a hataon’iry Absaloma io. (2 Sam. 17:8-16) Baka tiô amy zay, nambaran’i Hosay tamy Davida ndreky Abiatara ino tetikadin’iry Absaloma fan̈araka. Baka tiô amy zay, irô lelahy aroe io nitondra volan̈a zen̈y tamy Davida tan̈y. (2 Sam. 17:17) Baka tamy fan̈ampian’i Jehovah, nahavita niaro fahin̈anan’i Davida i Zadoka ndreky irô mpisôron̈o aby io.​—2 Sam. 17:21, 22.

11. Akôry hangalantsika tahaka fanan̈an’i Zadoka korazy, lera atsika man̈ampy irô rahalahintsika aby io?

¹¹ Akôry hanan̈antsika korazy karaha Zadoka, lera atsika hirahin̈y man̈ampy irô rahalahintsika ndreky ranabavintsika tôjy raha sarotro? 1) Man̈araha toromariky. An̈atin’ny raha sarotro be karaha zen̈y, ten̈a raha maventy fan̈arahan̈a toromariky, amy zen̈y atsika miray sain̈y fo. Ke areva toromariky baka amy birôn’ny sampan̈a, amy tany misy anarô. (Heb. 13:17) Anti-pan̈ahy koa tôkony matetiky mandiniky  toromariky mikasiky fioman̈ana amin’ny antambo, ndreky karakôry tôkony hatao izikoa fa misy antambo. (1 Kor. 14:33, 40) 2) Manàn̈a korazy ndreky mitandritandrema fo. (Ohab. 22:3) Mandiniha tsara antsendriky alohan’ny han̈ano raha. Aza mirisiky ain̈inao amy raha tsisy dikany. 3) Milampia amy Jehovah. Tsarova fa Jehovah ten̈a mitady raha mahatsara anao ndreky irô rahalahy aby io. Anarô samy tsy tiany ho voa raha. Izy mahavita man̈ampy anao, amin’ny anao miaro irô rahalahinao aby io.

12-13. Ino raha ianaranao baka amy tantaran’i Viktor ndreky Vitalii? (Zahava koa sary.)

¹² Diniha baka karakôry nataon’i Viktor ndreky Vitalii, anti-pan̈ahy aroe, izikoa fa nan̈atriky hanin̈y ndreky rano tamy rahalahy ndreky ranabavindrô, an Ukraine an̈y. Ho Viktor: “Tsisy tany tsy nandihananay nitadiavan̈a hanin̈y. Natetiky nisy tifitifitry narikitry tany nisy zahay. Fa nisy rahalahy zay nan̈amia hanin̈y efa nakajiny efa ela, ke raha zen̈y nahampy hanin̈y nilain’ny mpitory tan̈atin’ny andra maromaro. Zahay koa fa nampiditry entan̈a aby io tan̈atin’ny kamionay, nisy bomby latsaka kadirin’ny 20 metara niala zahay tiô fa tsy nipofaka. Tan̈atin’ny andra io, zaho tsy vôly nivavaka tamy Jehovah baka izy han̈amia korazy zaho, amy zen̈y zaho tsy ho rivan̈a fa hifen̈y fo han̈ampy irô mpitory aby io.”

¹³ Volan̈in’i Vitalii: “Ten̈a nila nisy korazy zaho tamy zen̈y. Dia nataoko voanalohany baka nahadin̈y 12 lera. Ke zaho nivavaka tamy Jehovah tamy lalan̈a.” Vitalii olo nanan̈a korazy, fa ndray zen̈y, izy nitandritandrin̈y fo. Karaha ty koa ho izy: “Zaho tsy vôly nangataka fahendrena tamy Jehovah ndreky nangataka baka hahavita hanetry ten̈a fo. Ke tamy lalan̈a nimboan’ny fanjakan̈a nandihanan̈a fo nandalovako. Fa raha nankafatatra finoan̈anaka tamy zen̈y, nahita irô rahalahy ndreky ranabavy aby io nahavita niaraka niasa tsarabe. Irô namory hanin̈y ndreky lamba, ndreky raha hafa ten̈a ilain̈a, baka iô nampiditry irô io tan̈atin’ny tomabilinay. Nadosondrô raha nisakan̈a tamy lalan̈a. Irô koa nan̈amia hanin̈y zahay roen’i Viktor ndreky tany nandrian̈a, tamy dia nataonay.”

AZA MIVADIKY AMY JEHOVAH FOEKY

14. Man̈ano karakôry atsika, izikoa misy olo tiantsika niala tamy Jehovah?

¹⁴ An̈isan’ny raha ten̈a tsy din̈intsika, izikoa misy havantsika na namantsika marikitry miala amy Jehovah. (Sal. 78:40; Ohab. 24:10) Ke arakarakan’ny itiavantsika olo io, mahaisarotro amintsika fo miaritry raha zen̈y. Izikoa anao iziôty an̈atin’ny raha zen̈y, hankahery anao ohatran’i Zadoka, fôtony izy tsy nivadiky.

15. Nan̈ino ma Zadoka ten̈a nila nisy korazy baka nahavita tsy nivadiky tamy Jehovah fo? (1 Mpanjaka 1:5-8)

¹⁵ Zadoka tsy nivadiky tamy Jehovah foeky, nata i Abiatara kamaradibenany nifidy hivadiky. Tamy faramparan’ny fanjakan̈an’i Davida raha zen̈y nandalo. Davida tamy zen̈y efa tsy ela hofoaty, ke Adonia zanany nila handrava fanjakan̈a efa nivolan̈in’i Jehovah fa hamiany i Solomona. (1 Tant. 22:9, 10) Abiatara nifidy hilan̈y tamin’i Adonia. (Vakia 1 Mpanjaka 1:5-8.) Izy koa fa nan̈ano zen̈y, tsy raha tamy Davida fo izy nivadiky fa tamy Jehovah koa. Miniminia hely baka Zadoka tamy zen̈y nalahelo sady diso fan̈antinan̈a tamin’i Abiatara. Irô ndreky Abiatara baka samy mpisôron̈o, ke tan̈atin’ny 40 taon̈o irô niaraka niasa mare. (2 Sam. 8:17) Irô niaraka nikarakara “Vata masin̈in’ny ten̈a Zan̈ahary” io. (2 Sam. 15:29) Aviô koa irô samy niaraka nanohan̈a fanjakan̈an’i Davida, aviô niaraka nan̈ano raha maro tamy fanompoan̈a Jehovah.​—2 Sam. 19:11-14.

16. Ino raha nety nan̈ampy Zadoka, ke nahavitany tsy nivadiky tamy Jehovah fo?

 ¹⁶ Abiatara nata nifidy hivadiky tamy Jehovah, Zadoka mbala tsy nivadiky tamy Jehovah fo. Davida mbala natoky fo fa Zadoka io tsy hivadiky. Ke izikoa fa hay tetiky ratsin’i Adonia io, Davida nan̈iraka Zadoka, Natana, ndreky Benaia handeha han̈ôsotro Solomona hatao mpanjaka. (1 Mpanj. 1:32-34) Nankahery Zadoka mare fiarasany tamin’olo tsy nivadiky tamy Jehovah, karaha ataon’i Natana ndreky olo hafa nanohan̈a Davida. (1 Mpanj. 1:38, 39) Ke Solomona koa fa nanjary mpanjaka, izy “nifidy Zadoka natao mpisôron̈o, natao solon’i Abiatara.”​—1 Mpanj. 2:35.

17. Izikoa misy olo ten̈a tianao niala tamy Jehovah, akôry hangalanao tahaka Zadoka?

¹⁷ Akôry han̈anaovanao karaha Zadoka in̈y? Izikoa misy olo ten̈a tianao niala tamy Jehovah, aboaha fa anao tsy mivadiky amy Jehovah. (Jos. 24:15) Jehovah han̈amia anao angôvo ndreky korazy ilainao, baka anao hahavita han̈ano ny tsara fo. Mivavaha, aviô ataova naman̈a marikitry lan̈iany olo tsy mivadiky amy Jehovah. Ten̈a valera amy Jehovah anao izikoa tsy mivadiky, ke izy tsy maintsy hitahy anao amy zen̈y.​—2 Sam. 22:26.

18. Ino raha ianaranao baka amy Marco ndreky Sidse?

¹⁸ Diniha baka raha nandalo tamy Marco ndreky Sidse. Zanakandrô man̈angy aroe samby efa be, baka iô niala tamy fahamarin̈ana. Ho Marco: “Efa tianao mare zanakanao, miaraka izy teraka, ke anao man̈ano eraka angôvonao baka iarovan̈a irô. Ke izikoa irô mifidy hiala Jehovah, ten̈a mankarary fô raha zen̈y.” Karaha ty koa ho izy: “Fa ndray zen̈y, Jehovah tsiary niala zahay. Nataony azo antoko tsarabe fa izikoa fa zaho fa kivy, vadiko ndraiky natanjaka. Fa vadiko koa fa kivy, zaho ndraiky natanjaka.” Karaha ty ho Sidse: “Izikoa tsy Jehovah nan̈ampy zahay niatriky raha io, tsy ho vitanay foeky niatriky zen̈y. Zaho baka nieritreritry fa tsy maintsy baka aminaka fo nahavy irô nan̈ano karaha in̈y. Ke nivolan̈iko tamy Jehovah raha tsapako jiaby. Andra vitsivitsy tafaran’izin̈y, nisy rahavavy tsy hitako tan̈atin’ny taon̈o maro nan̈aton̈o zaho tamy Tran̈o Fivorian̈a tan̈y, nitana sôrokonaka. Aviô zaho nizahavany tamy masonaka. Baka iô ho izy: ‘Aza adin̈a Sidse fa tsy anao foeky ny diso tamizin̈y.’ Ke baka tamy fan̈ampian’i Jehovah, vitako fo ravoravo nanohy nanompo izy.”

19. Tapa-kevitry han̈ino anao?

¹⁹ Tian’i Jehovah hanan̈a korazy karaha Zadoka aby mpanomponany jiaby. (2 Tim. 1:7) Fa ndray zen̈y, atsika tsy tiany hitôron̈o angôvontsika tômpiny fo, fa tiany atsika hilampy aminany. Ke izikoa anao fa sendra raha ilanao korazy mare, milampia amy Jehovah fo. Matokisa fa izy afaka han̈ampy anao hanan̈a korazy, karaha nataon’i Zadoka in̈y fo!​—1 Pet. 5:10.