Fanta zen̈y “voady na vava na fan̈ambaran̈a atao na fampan̈antinan̈a fa han̈ano raha araiky. Matetiky, olo koa fa mifanta, Zan̈ahary atao vavolombelon̈o.” Fanta io mety atao ambava na antsoratra.

Misy olo mieritreritry fa tsy mety foeky mifanta, fotony Jesosy efa nivolan̈a karaha ty: ‘Aza mifanta foeky ... Volan̈anaro koa fa “Ia”, ia; izikoa fa “Ehe”, ehe, fotony ankoatranizen̈y efa baka aminy araiky ratsy in̈y edy.’ (Mat. 5:33-37) Mazava ho azy, fa hainy Jesosy tsarabe fa tamy fotoan̈a sasany, tsy maintsy nifanta iro Israelita aby io, fotony nitaky zen̈y Lalàn̈any Mosesy. Ary nisy panompony Jehovah tsy nivadiky nifanta na nan̈ano vava. (Gen. 14:22, 23; Eks. 22:10, 11) Hainy Jesosy koa fa ndray Jehovah mba nifanta ndraikindraiky. (Heb. 6:13-17) Hitantsika baka amy zen̈y, fa tsy nampirisiky olo tsy hifanta foeky i Jesosy. Fa izy fo nampitandrin̈y fa tsy mety mifantafanta karaha io fo ndreky man̈ano vava han̈ano raha tsisy dikany. Fanta io tokony hiverintsika ho raha masin̈y. Ke raha koa fa nivolan̈intsika, tsy maintsy tantirahintsika.

Akory fo basy tokony hataonao izikoa misy olo man̈iraka anao hifanta? Voanalohany, aleva antoko tsarabe izikoa ten̈a ho vitanao han̈atanteraka izio sa karakory. Izikoa tsy azonao antoko raha zen̈y, sitrany anao tsy mifanta. Fotony Volan̈a Zan̈ahary efa mampitandrin̈y karaha ty: ‘Sitrany anao tsy mifanta, tozay anao mifanta kanefa tsy vitanao aby han̈antanteraka izio.’ (Mpito. 5:5) Baka io, diniha ino aby toro lalan̈any Baiboly mifandray amy resaka fifantàn̈a io. Koa fa vitanao zen̈y, areha amy zay raha volan̈iny feony fieritreretan̈anao. Ino aby ma sasany amy toro lalan̈a aby zen̈y?

Vava na fanta tsy mifanohitry amy sitrapôny Zan̈ahary. Man̈ano voady na man̈ano vava iziô Vavolombelon̈o Jehovah izikoa fa man̈ano mariazy. Karazan̈a mifanta fo izy koa fa man̈ano zen̈y. Fotony iro roe hanjary fivadiany io mampan̈anten̈a aminy andaniny ndreky ankilany man̈oloan̈a Zan̈ahary ndreky olo jiaby man̈aton̈o izio, fa hifankatia ndreky hifan̈aja fo iro izikoa mbala velon̈o. (Olo fivadiany sasany ndraiky tsy ten̈a mampiasa volan̈a aby io, kanefa iro man̈ano voady na vava man̈oloan̈a Zan̈ahary fo.) Afaranizen̈y iro vo mety koran̈iny fa fivadiany. Komansy iô, vadian̈andro tokony ho miran̈a lambanakôho, ke faty isarahan̈a. (Gen. 2:24; 1 Kor. 7:39) Aminany tsarabe voady amy mariazy io, sady tsy mifanohitry amy sitrapôny Zan̈ahary.

Vava na fanta mifanohitry amy sitrapôny Zan̈ahary. Misy olo mifanta fa hiaro tanindrazan̈andro, ke iro mampiasa fitaovan̈a findesin̈y miady. Sasany vôn̈ono hiala finoan̈andro foeky hiarovan̈a izio. Ten̈a Kristian̈iny ndraiky tsy mifanta amy raha karaha zen̈y foeky. Mandika didiny Zan̈ahary baka izy koa man̈ano zen̈y. Kristianin̈y tsy tokony hidikiditry amy raha momba lagera na malomalony donia ty,  fotony izy “tsy an̈isany donia ty.”​—Jaona 15:19; Isaia 2:4; Jak. 1:27.

Lera karakory fo basy Kristianin̈y araiky mila mampiasa feony fieritreretan̈anany koa fa hifanta? Ndraikindraiky, alohany atsika hanapakevitry hifanta na tsy hifanta, tsara atsika mandiniky torohevitry namezany Jesosy ty: “Ifà amy Kaisara lan̈iany raha tokony hifain̈a amy Kaisara, fa ameza Zan̈ahary ndraiky lan̈iany raha tokony hamian̈a Zan̈ahary.”​—Lioka 20:25.

Miniminia hely ohatra araiky ty: Misy Kristianin̈y araiky mangataka nationalité na tihan̈amboatra pasipaoro. Mety irahin̈y hifanta izy. Fa mila dinihiny, ino aby raha tafiditry amy fifantàn̈a karaha zen̈y amy tany io? Izikoa raha takiandro aminany mifanohitry amy lalàn̈any Zan̈ahary, feony fieritreretan̈anany tsy mety han̈aomba izy hifanta. Na mety ikeny fanjakan̈a izikoa somary hivoany hely fo fifantàn̈a mila ataony io, baka tsy han̈enjiky izy eritreritrinany.

Izikoa fa nivoan̈a karaha zen̈y fifantàn̈a io, mety hifan̈araka amy toro lalan̈any Baiboly amy Romanina 13:1 ao raha zen̈y. Karaha ty raha avoakoran̈a ao: “Irarian̈a olo jiaby samby han̈eky manampahifan̈a.” Ke mety hieritreritry Kristianin̈y io fa tsisy maharatsy izy han̈ano zen̈y, fotony ndray Zan̈ahary fo mba man̈iraka han̈ano zen̈y.

Akory fo basy izikoa anao irahin̈y mampiasa raha na man̈ano fihetsiky sasany lera mifanta? Izikoa zen̈y, miankiny aminy eritreritrinao fo. Karaha nataondro Romanin̈y ndreky Skytianin̈y taloha tan̈y, iro koa fa mifanta mampiasa sabatra. Sabatra baka marky ahaizan̈a zan̈ahariny ady, ke mampiasa izio iro han̈amezan̈a toky fa iro tsy hivadiky. Iro Griky aby io ndraiky manangantan̈ana koa fa mifanta. Zen̈y fomba nan̈aboahandro fa misy zan̈ahary araiky an̈y mandiniky raha jiaby volan̈indro ndreky ataondro, ke zan̈ahary io hitsara olombelon̈o jiaby.

Ndray izy man̈ano zen̈y, panompony Jehovah tsy mety ampiasa drapô na sain̈impirenena izikoa fa hifanta. Akory fo basy izikoa amy tribinaly an̈y anao irahin̈y man̈apetraka tan̈ananao an̈abony Baiboly, avio hifanta fa hivolan̈a ny marin̈y? Aminy araiky zen̈y ndraiky, anao tômpiny fo mahay fanapahankevitry hataonao. Fotony nisy olo tsy nivadiky tamy Zan̈ahary taloha tan̈y koran̈iny Soratra Masin̈y fa nifanta, avio nan̈ano fihetsiky sasany. (Gen. 24:2, 3, 9; 47:29-31) Fa aza adin̈a fa mifanta amy Zan̈ahary anao izikoa fa man̈ano karaha zen̈y. Ke mila vôn̈ono anao hivolan̈a ny marin̈y amy fan̈ontanian̈a jiaby apetraka aminao.

Ten̈a raha maventy amintsika fihavanan̈antsika amy Jehovah. Ke isaka atsika irahin̈y mifanta, atsika tokony handiniky ndreky hivavaka. Mila alaintsika antoko fa tsisy toro lalan̈any Baiboly nidikavintsika, avio atsika tsy tokony han̈ano raha hahavy eritreritrintsika han̈enjiky atsika. Ke anao koa fa mifanta, tsy maintsy ifainao vava nataonao io.​—1 Pet. 2:12.