Izikoa misy lelahy araiky nangala vady hafa, ke iro roe efa nisoratra amy fanjakan̈a, fahitany fiangonan̈a izy efa tapitry iô na ravan̈a vadian̈any lelahy io tamy vadiny taloha. Nan̈ino ma? Alô baka zahavantsika raha nivolan̈iny Jesosy momba divaorsy ndreky fanambadianan̈a olo hafa.

Koran̈iny Jesosy amy Matio 19:9 fa antony araiky fo mety hisarahan̈a ke hanambadianan̈a olo hafa. Karaha ty koran̈inizio ao: “Ty raha ambarako anaro: Lan̈iany lelahy misarabadian̈a, ke manambady olo hafa, izy mandiadia vady, izikoa tsy raha baka amy fijangajangan̈a zaraiky fo antony hisarahany.” Hitantsika amy raha nivolan̈iny Jesosy io fa 1) fijangajangan̈a zaraiky fo antony arakany Soratra Masin̈y mety hisarahan̈a. 2) Mandiandia vady lan̈iany lelahy misaraka amy vadiny ke manambady olo hafa, kanefa tsisy antony arakany Soratra Masin̈y. a

Tihivolan̈a ma Jesosy fa lelahy araiky koa fa nijangajanga avio nisaraka amy vadiny, mety manambady olo hafa ndraiky izy? Akory ho Soratra Masin̈y? Tsy voatery. Lelahy io koa nandiandia vady, anjarany lay viavy tsy manantsin̈y manapakevitry handefitry amy vadiny izy sa karakory. Izikoa viavy io tsy vôn̈ono hilefitry ke nisaraka aradalàn̈a iro, samby afaka manambady olo hafa ndraiky iro na lay lelahy zen̈y na lay viavy, izikoa iro vita divaorsy.

Ny raha mety ho hisy koa, man̈angy io mety mbala tihan̈avotro vadian̈andro sady vôn̈ono han̈ambela hadisovan̈any vadiny. Fa lelahy io tsy man̈eky fa mila hisaraka aminany fo. Izikoa Soratra Masin̈y zahan̈a, tsy afaka manambady olo hafa izy, fotony viavy io vôn̈ono han̈ambela hadisovan̈anany sady mbala man̈iry ho vadiny fo. Izikoa ndraiky lelahy io mitôron̈o hevitrinany fo ke tsy mijery raha volan̈iny Soratra Masin̈y fa manambady olo hafa, dikanizen̈y mandiandia vady ndraiky koa izy. Ke tokony hanangan̈a komity pitsara ndraiky koa iro antipan̈ahy aby io handaminan̈a problemo io.​—1 Kor. 5:1, 2; 6:9, 10.

Izikoa lelahy araiky manambady olo hafa, kanefa tsy ambelany Soratra Masin̈y man̈ano zen̈y izy, akory tokony fiheverany fiangonan̈a vadian̈a araiky taloha ndreky araiky vaovao? Izikoa Soratra Masin̈y zahavan̈a, mbala tsendriky tapaka ma vadian̈a araiky taloha in̈y? Mbala afaka manapakevitry han̈ambela hadisovan̈any vadiny fo ma lay vady tsy manantsin̈y sa karakory? Mety koran̈iny mijangajanga ma lay vady vao sa akory fandehany?

Taloha atsika nihevitry fa mbala mijangajanga fo lay vady vao izikoa lay vady tsy manantsin̈y io mbala velon̈o, na mbala tsy nanambady, na tsy takatra nijangajanga taminolo hafa. Kanefa, tamy Jesosy nan̈azava momba divaorsy ndreky fanambadianan̈a olo hafa ndraiky, izy tsy nikoran̈a momba vady tsy manantsin̈y foeky. Ny raha nazavainy, mandiandia vady lan̈iany lelahy misarabadian̈a  ke manambady olo hafa, izikoa tsisy antony arakany Soratra Masin̈y. Dikanizen̈y, komansy iô tapaka na ravan̈a vadian̈a araiky taloha in̈y.

Izikoa lelahy io nisaraka tamy vadiny ke nanambady olo hafa, lay man̈angy tsy manantsin̈y efa tsy afaka mifidy han̈ambela na tsy han̈ambela hadisovan̈any vadiny io eky. Tsy voatery han̈ano fanapahankevitry sarotro io eky izy. Avio, tsy miankiny amy raha mandalo amy vady tsy manantsin̈y eky fiheverany fiangonan̈a vadian̈a vaovao io. Ino ma raha mety ho hisy? Pôsibla, mety naty lay vady tsy manantsin̈y, na nanambady olo hafa, na voaheloko ho nijangajanga. b

Hitantsika taminy ohatra araiky taloha tiô in̈y fa nandiandia vady lay lelahy ke zen̈y nahavy divaorsy io. Akory fo basy izikoa lelahy io tsy nandiandia vady, fa izy nangataka divaorsy baka io nanambady olo hafa? Na akory ndraiky izikoa tsy nijangajanga foeky izy talohany divaorsy, fa lera vita divaorsy izy vo nijangajanga ke nanambady olo hafa, kanefa lay vady tsy manantsin̈y mbala vôn̈ono hanambady izy? Izikoa ohatra jiaby nikoran̈intsika tiô aby in̈y zahavan̈a, ravan̈a vadian̈a taloha in̈y. Nandiandia vady baka izy fotony izy tsy vitany nisaraka tamy vadiny fo fa nanambady olo hafa koa. Ndray zen̈y, vadian̈a vaovao io aradalàn̈a amy fanjakan̈a. Karaha ty nazavainy Tilikambo Fiambesan̈a (angiley) 15 Novambra 1979, pazy 32: “Izikoa lelahy araiky efa nanambady olo hafa, izy tsy ho pôsibla hisaraka karakaraha io fo amy vadiny vaovao io ke himpody amy vadiny taloha. Efa ravan̈a baka vadian̈anany taloha, fotony izy efa vita divaorsy tamy vadiny, nandiandia vady, avio nanambady olo hafa.”

Fan̈itsian̈a zen̈y tsy man̈iraka Kristianin̈y hihevitry vadian̈a tsy ho masin̈y, na san̈atrianizen̈y hihevitry fa fandiadiavan̈a vady io fahotan̈a hely tsisy dikany. Tokony hananganan̈a komity pitsara lan̈iany lelahy mandiandia vady ke misaraka amy vadiny nohony antony tsy arakany Soratra Masin̈y, baka io nanambady olo hafa kanefa izy tsy imboàny Soratra Masin̈y man̈ano zen̈y. (Izikoa Kristianin̈y olo nalainy vady io, tokony hananganan̈a komity pitsara koa izy fotony nangalatra vadinolo.) Ary ndray tsy mijangajanga fiheveran̈a iro amy vadian̈andro io, lelahy io mbala tsy mahafeno fepetra hahazo tombontsoampanompoan̈a manokan̈a an̈ivony fiangonan̈a fo, an̈atiny taon̈otaon̈o. Tsy hahazo tombontsoampanompoan̈a aby zen̈y koa izy izikoa olo an̈ivony fiangonan̈a mbala meloko tamy raha nataony, na mihevitry iro fa izy mbala tsy vain̈y hajain̈a. Mila dinihin̈y koa raha mahazo lay vady tsy manantsin̈y ndreky zanakandro tsy ampy taon̈o fotony iro mety niaritry raha tsy rariny, tamy lelahy io niala tokantran̈o.​—Mal. 2:14-16.

Hitantsika tiô fa, izikoa tsy arakany Soratra Masin̈y antony hisarahanolo araiky amy vadiny ke manambady olo hafa, ratsy fo vokany. Misy jery Kristianin̈y araiky izikoa izy mifen̈y fo hitovy hevitry amy Jehovah, ke hihevitry vadian̈a io raha masin̈y.​—Mpito. 5:4, 5; Heb. 13:4.