1-2. Nan̈ino mahatsara antipan̈ahy mandiniky modely nambelany apostoly Paoly?

 TIANY apostoly Paoly mare iro rahalahiny aby io. Nan̈ano erakany vitany izy nan̈ampy iro. (Asa. 20:31) Ke tsy foendro mare izy! Ohatra, ‘nitomoan̈y mare’ iro antipan̈ahy aby ta Efesosy tan̈y, izikoa fa haindro fa tsy hahita i Paoly eky iro. (Asa. 20:37) Amy zioty, mahafoe ten̈a karaha zen̈y koa iro antipan̈ahintsika aby io. Tiandro mare piaramanompo amindro, ke tsy mitsitsy ain̈y foeky iro man̈ampy piaramanompo. (Fil. 2:16, 17) Fa iro antipan̈ahy aby io koa ndraikindraiky mba misy problemo. Asa ino raha han̈ampy iro?

² Iro antipan̈ahy mazoto miasa aby io mety mandiniky modeliny Paoly. (1 Kor. 11:1) Ndray izy man̈ano zen̈y, Paoly tsy anjely. Olombelon̈o tsy lavorary izy, ke ndraikindraiky sarotro taminany nan̈ano ny tsara. (Rom. 7:18-20) Naro koa raha nanahiran̈a izy. Kanefa, izy tsy rivan̈a fa ravoravo fo. Izikoa iro antipan̈ahy aby io mangala tahaka Paoly, ho ravoravo fo iro manompo Jehovah ndray maro raha manahiran̈a iro. Zen̈y raha hidinihintsika iziô.

3. Ino raha hidinihintsika ato?

³ Handiniky raha efatra manahiran̈a antipan̈ahy atsika amy lahatsoratra ty: 1) Tsisy fotoan̈a itorian̈a fotony maro andraikitry, 2) tsy mahita fotoan̈a hampahirezan̈a piaramanompo, 3) manan̈a fahalimian̈a, avio 4) miaraka miasa aminolo tsy lavorary. Hizahavantsika ato koa ino raha nan̈ampy Paoly hiatriky raha aby io, ndreky raha mety hataony antipan̈ahy hangalan̈a tahaka izy.

4. Nan̈ino mety ho sarotro aminy antipan̈ahy hitariky asa fitorian̈a?

⁴ Nan̈ino ma zen̈y mety ho problemo? Maro andraikitriny antipan̈ahy, ankoatrany mitariky asa fitorian̈a. Ohatra, mifandimby  iro mitaridraharaha amy fivorian̈a andavanandra ndreky mitariky Fianaran̈a Baiboly Ataony Fiangonan̈a. Man̈ano kabaro koa iro. Tsy zen̈y fo fa, mazoto iro mampiofan̈a pikarakara fiangonan̈a. Ravoravo fo koa iro mampahery piaramanompo. (1 Pet. 5:2) Antipan̈ahy sasany ndraiky man̈ôrin̈y ndreky mikobaby Tran̈o Fivorian̈a ndreky tran̈o hafa ampiasainy fandaminan̈a. Fa karaha ataony pitory jiaby an̈ivony fiangonan̈a, fitorian̈a vaovao tsara andraikitrindro voanalohany.​—Mat. 28:19, 20.

5. Nan̈ino ma Paoly ten̈a modely tsara taminy asa fitorian̈a?

⁵ Ino raha ianarany antipan̈ahy baka amy Paoly? Farandraha naro asa eky Paoly, fa zen̈y tsy nataony tamban̈a tsy itorian̈a. Ino raha nan̈ampy izy? Karaha ty ho izy amy Filipianina 1:10 ao: ‘Ataova hevitry hahaizanaro ny raha ten̈a maventy.’ Paoly tsy nan̈ano pitaribato vilambava, fa narehany koa torohevitry namezany io. Navoatendry han̈ano fanompoan̈a izy, ary izio ny raha ten̈a maventy taminany, tan̈atiny taon̈o maro. Nitory ‘tamy tany maro olo ndreky isaka tran̈o’ izy. (Asa. 20:20) Tsy nasiany erany foeky amy lera karakory izy mitory an̈atiny andra araiky, na indraiky fo izy mitory isaka herin̈iandra. Nan̈araraotro nitory fo i Paoly, isaka izy nahita ôkazion han̈anaovan̈a zen̈y. Ohatra, taminizy niambin̈y iry namany ta Athènes tan̈y, izy nitory taminolo nanan̈a plasy an̈abo tamy tanàna io tao, ary sasany tamindro io ten̈a tia nitandren̈y vaovao tsara. (Asa. 17:16, 17, 34) Ndray taminizy efa nigadra ta prizon, izy mbala nitory taminolo nan̈odidin̈y izy fo.​—Fil. 1:13, 14; Asa. 28:16-24.

6. Ino raha nampiofaniny Paoly iro namany aby io?

⁶ Hainy Paoly nampiasa tsara fotoan̈anany. Matetiky izy nitaon̈o olo hiaraka hanompo taminany. Ohatra iziô, tamy dia misionera voanalohany nataony, izy nitondra i Jaona Marka; avio tamy dia misionera faharoe nataony, izy nitondra i Timoty. (Asa. 12:25; 16:1-4) Hay be fa nan̈ano zay vitany i Paoly nampiofanan̈a iro. Nampianariny iro fomba handaminan̈a fiangonan̈a ndreky hikarakaran̈a ondrikondrikiny Zan̈ahary, avio nampiany koa iro hankatsara fahaizandro mampianatra.​—1 Kor. 4:17.

7. Akory mety han̈arehany antipan̈ahy fampirisihan̈any Paoly aminy Efesianina 6:14, 15?

⁷ Leson. Karaha nataony Paoly in̈y, mila vôn̈ono hitory koa antipan̈ahy isaka iro mahita ôkazion han̈anaovan̈a zen̈y, fa tsy lera mitory isaka tran̈o fo. (Vakia Efesianina 6:14, 15.) Azondro atao, ohatra, mitory lera iro mandeha bazary na lera iro ampiasan̈a. Lera iro man̈ampy amy fan̈oren̈ana Tran̈o Fivorian̈a, iro mety mitory vaovao tsara aminolo man̈odidin̈y, na amy pivarotro. Izikoa fa  lera fan̈anaovan̈a fanompoan̈a, mangala tahaka Paoly iro izikoa mazoto mampiofan̈a olo hafa, an̈isanizen̈y iro pikarakara fiangonan̈a aby io.

8. Ino ndraikindraiky raha mila ataony antipan̈ahy?

⁸ Antipan̈ahy mila mahay mandanjalanja. Iro tsy tokony ho rikian̈a loatra aminy asandro an̈ivony fiangonan̈a na amy faritry misy iro, ke efa tsy ho hisy fotoan̈a hitorian̈a eky. Ndraikindraiky aby iro mety mila mivolan̈a fa tsy vitandro andraikitry sasany azondro. Antipan̈ahy araiky koa fa baka nivavaka ndreky nandiniky tsarabe, mety ho hitany fa tsy afaka han̈eky fanendren̈a araiky izy, fotony izy koa man̈ano izio, mety tsy ho vitany eky han̈ano raha hafa mbala bebeny araiky io. Ohatra, mety tsy hahavita hitariky Fotoampivavahan̈any Fianakavian̈a isaka herin̈iandra izy, na tsy ho hisy fotoan̈a firy izy hitorian̈a, na koa mety tsy hahavita hampiofan̈a iry zanany hitory eky izy. Ndray zen̈y, mahazo matoky iro antipan̈ahy aby io fa hainy Jehovah tsarabe fa iro tihahay handanjalanja amy raha jiaby.

9. Ino raha manahiran̈a antipan̈ahy maro asa?

⁹ Nan̈ino ma zen̈y mety ho problemo? Maro problemo mahazo vahoakany Jehovah. Samby mila korazy, fan̈ampian̈a, ndreky fampahirezan̈a aby atsika jiaby aminy andra farany iziô. Misy fotoan̈a, sasany amintsika mila hampian̈a baka tsy han̈ano raha ratsy. (1 Tes. 5:14) Marin̈y ndraiky fa tsy ho vitany antipan̈ahy hamaha problemo jiaby mahazo atsika. Kanefa, tiany Jehovah izikoa iro mifen̈y man̈ano erakany farany tsara vitandro mampahery ndreky miaro ondrikondrikinany. Akory eky ahitandro fotoan̈a han̈anaovan̈a zen̈y kanefa iro maro asa?

10. Koa zahan̈a 1 Tesalonianina 2:7, akory nataony Paoly nikarakara vahoakany Jehovah?

¹⁰ Ino raha ianarany antipan̈ahy baka amy Paoly? Nitady fomba fo i Paoly nideran̈a ndreky nankahirezan̈a piaramanompo. Tsara man̈ano karaha zen̈y koa antipan̈ahy, ke hifen̈y ho be fitiavan̈a ndreky ho tsara fan̈ahy amy rahalahy ndreky ranabavy. (Vakia 1 Tesalonianina 2:7.) Namezany Paoly toky iro piaramanompo taminany aby io fa tiany mare iro, ary tia iro karaha zen̈y koa Jehovah. (2 Kor. 2:4; Efes. 2:4, 5) Miran̈a kamarady fomba nitondrasany Paoly olo fiangonan̈a araiky taminany, baka io izy nahafoe fotoan̈a niarahan̈a tamindro. Naboakany tsara fa iro natokisany, ke tsy nihafahafa foeky izy nivolan̈a tamindro raha nampavozo izy ndreky raha mbala nila niezahany. (2 Kor. 7:5; 1 Tim. 1:15) Fa ndray izy man̈ano zen̈y, Paoly tsy rikian̈a tamy raha nahazo izy. Tihan̈ampy iro rahalahiny aby io koa izy.

11. Nan̈ino ma Paoly nan̈amia torohevitry piaramanompo taminany?

¹¹ Ndraikindraiky koa Paoly nila nan̈amia torohevitry  iro rahalahiny ndreky ranabaviny aby io. Kanefa, tsy nohony izy neloko tamindro antony nan̈anaovany zen̈y, fa nohony fitiavany iro. Tiany harovan̈a koa iro io baka tsy ho azondraha. Nitady fomba izy beky ho mora aminolo han̈eky torohevitrinany. Tiany hiraesindro tsarabe baka torohevitry namezany. Ohatra, Paoly koa fa nanoratra taratasy tamy Korintianin̈y, mentitry mare torohevitry namezany iro. Tafara, nirahiny nandeha tamindro tan̈y i Titosy, fotony tiany ho hay karakory fandraisandro Korintianin̈y aby io torohevitry namezany iro. Haravoan̈a ma ninany, izy koa fa naharen̈y fa niraesindro tsarabe torohevitrinany!​—2 Kor. 7:6, 7.

12. Akory mety hankahirezany antipan̈ahy iro piaramanompo aminany?

¹² Leson. Mangala tahaka modely nambelany Paoly iro antipan̈ahy aby io izikoa iro manokan̈a fotoan̈a iarahan̈a amy piaramanompo. An̈isany fomba mety han̈anaovandro zen̈y iziô amy favian̈a bonera ampivorian̈a. Hahavita han̈ano koran̈a mankahery amy piaramanompo iro izikoa man̈ano zen̈y. Matetiky, zisty minity vitsivitsy fo efa ampy hankahirezan̈a rahalahy na ranabavy araiky. (Rom. 1:12; Efes. 5:16) Ino koa fomba hafa mety hangalany antipan̈ahy araiky tahaka i Paoly? Azony atao koa mampiasa Soratra Masin̈y hankafataran̈a finoan̈any piaramanompo, ndreky han̈amezan̈a toky iro fa ten̈a tia iro i Jehovah. Mila ataony antipan̈ahy tsapany piaramanompo fo fa izy ten̈a tia iro. Lera izy man̈amia torohevitry, mila ataony baka amy Volan̈a Zan̈ahary raha zen̈y. Izikoa tiany han̈araka torohevitrinany rahalahy araiky na ranabavy araiky, tokony hataony voafaritry tsarabe torohevitry io, avio tokony ho tsara fan̈ahy izy koa fa man̈amia izio.​—Gal. 6:1.

13. Mety han̈ano akory fihetsikiny antipan̈ahy araiky koa fa mieritreritry fahalimian̈anany?

¹³ Nan̈ino ma zen̈y mety ho problemo? Mba mahay diso koa antipan̈ahy, fotony iro tsy lavorary karaha olo jiaby fo. (Rom. 3:23) Ndraikindraiky, mety tsy ho mora amindro hanan̈a toetsain̈y tsara momba fahalimian̈andro. Sasany mety ho kivy, fotony iro mifantoko loatra amy fahalimian̈andro. Misy amindro io ndraiky tsy mijery fahalimian̈andro foeky, ke iro tsy mieritreritry hiova.

14. Koa zahan̈a Filipianina 4:13, nan̈ino fanetrenten̈a nan̈ampy Paoly hiady tamy fahalimian̈anany?

¹⁴ Ino raha ianarany antipan̈ahy baka amy Paoly? Nanetry ten̈a Paoly. Nivolan̈a izy fa tsy vitany foeky niady tamy fahalimian̈any izikoa izy tsy nahazo angôvo baka tamy Zan̈ahary. Nan̈enjiky Kristianin̈y mare i Paoly taloha. Kanefa tontohitry izy tafara fa tsy nety raha nataony, ke vôn̈ono izy nan̈ova  toetsain̈inany ndreky toetrinany. (1 Tim. 1:12-16) Nohony fan̈ampiany Jehovah, Paoly nanjary antipan̈ahy be fitiavan̈a, nanetry ten̈a, sady mahay mitepô olo. Hainy Paoly fa maro fahalimian̈anany, fa izy tsy nandany lera nandiniky zen̈y. Natoky izy fa Jehovah han̈ambela hadisovan̈any. (Rom. 7:21-25) Izy tsy nan̈anten̈a hanjary lavorary. Fa nifen̈y fo izy nankatsara toetrinany. Nanetry ten̈a koa izy ke nangataka fan̈ampian̈a tamy Jehovah baka ho vitany fanompoan̈anany.​—1 Kor. 9:27; vakia Filipianina 4:13.

15. Ino toetsain̈y tsara tokony hanan̈any antipan̈ahy, izikoa fa hainy fahalimian̈anany?

¹⁵ Leson. Tsy midika iro rahalahy aby io voatendry ho antipan̈ahy ke lavorary. Fa ndray zen̈y, man̈anten̈a Jehovah fa izikoa iro man̈ano diso, iro han̈eky fa nan̈ano diso ankitin̈y, ke hifen̈y hankatsara toetrindro. (Efes. 4:23, 24) Antipan̈ahy tokony hianatra tsara Volan̈a Zan̈ahary baka ho hitandro ino toetry mbala mila ankatsaraindro. Baka io iro mila man̈ano fan̈ovoan̈a mifan̈araka amy zen̈y. Iro koa man̈ano zen̈y, Jehovah han̈ampy iro, ke iro ho ravoravo fo sady hahavita tsara andraikitrindro.​—Jak. 1:25.

16. Ino raha mety ho hisy izikoa antipan̈ahy mifantoko amy fahalimian̈any piaramanompo?

¹⁶ Nan̈ino ma zen̈y mety ho problemo? Miaraka miasa marikitry aminolo an̈ivony fiangonan̈a antipan̈ahy, ke mora amindro mahita fahalimian̈any piaramanompo. Izikoa antipan̈ahy tsy mitandrin̈y, iro mety ho meloko, hasiaka, na hitsaratsara piaramanompo. Paoly efa nampitandrin̈y Kristianin̈y fa zen̈y tsarabe raha tiany Satana hataondro.​—2 Kor. 2:10, 11.

17. Akory fahitany Paoly piaramanompo taminany?

¹⁷ Ino raha ianarany antipan̈ahy baka amy Paoly? Paoly tsy nieritreritry fa ratsy jery iro piaramanompo taminany aby io. Hainy tsarabe fa iro io mety han̈ano raha tsy mety, ary ndraikindraiky iro io mety han̈ano raha mamparary fô izy foeky. Hainy koa fa, tsy midika olo araiky nan̈ano raha tsy mety ke ratsy fan̈ahy izy. Tiany Paoly iro piaramanompo taminany aby io, ke toetry tsarandro fo nifantohany. Izikoa fa tsy mora tamindro nan̈ano raha manjary, nalainy Paoly onon̈o fo fa hahavita han̈ano ny tsara fo iro io izikoa ampian̈a.

18. Ino raha ianaranao baka amy fomba nan̈ampiany Paoly i Eodia ndreky Syntyke? (Filipianina 4:1-3)

¹⁸ Diniha baka fomba nan̈ampiany Paoly ranabavy aroe tamy fiangonan̈a ta Filipỳ. (Vakia Filipianina 4:1-3.) Nisy raha tsy nampifankahazo i Eodia ndreky Syntyke, ke nanjary robaka fihavanan̈andro. Paoly tsy nasiaka na nitsaratsara iro roe mirahavavy, fa niezaka fo izy nifantoko tamy toetry tsarandro. Iro ranabavy tsy mivadiky aby io nanompo Jehovah tan̈atiny taon̈otaon̈o. Hainy Paoly fa tiany Jehovah iro. Izy tsy nieritreritry foeky fa ratsy fan̈ahy iro ranabavy aby io, ke noranora taminany  nampirisiky iro hihavan̈a. Niezaka fo i Paoly nizaha toetry tsaranolo, ke zen̈y nan̈ampy izy ho ravoravo fo ndreky hihavan̈a tsara tamy piaramanompo.

19. a) Ino raha han̈ampy antipan̈ahy hifantoko amy toetry tsarany piaramanompo? b) Ino raha ianaranao baka aminy antipan̈ahy man̈adio Tran̈o Fivorian̈a, amy sary io?

¹⁹ Leson. Antipan̈ahy, aleva onon̈o toetry tsarany piaramanompo. Tsy lavorary aby iro io, kanefa samby amy toetry tsarandro. (Fil. 2:3) Marin̈y ndraiky fa, mety mila man̈itsy toetsain̈iny rahalahy araiky na ranabavy araiky antipan̈ahy. Kanefa, karaha nataony Paoly in̈y, tokony hiezaka mare antipan̈ahy tsy hifantoko amy volan̈a na raha nampameloko nataony piaramanompo. Mila alainy onon̈o fo fa piaramanompo io tia Jehovah, efa niaritry tamy fanompoan̈a, avio mahavita man̈ano raha tsara. Izikoa antipan̈ahy mangala onon̈o toetry tsarany piaramanompo, ho tsapandro rahalahy ndreky ranabavy aby io fa mankatia iro aby olo jiaby an̈ivony fiangonan̈a.

20. Izikoa tiany antipan̈ahy hahazo hatsaran̈a baka amy modeliny Paoly, ino koa raha hafa mbala mety ataondro?

²⁰ Anaro antipan̈ahy, aza vôly mandiniky modely nambelany Paoly, fa ten̈a han̈ampy anaro raha zen̈y. Man̈anaova fikarohan̈a amy Fanondroana Bokin’ny Vavolombelon’i Jehovah. Zahava amy titra maventy “Paoly”, avio mandihana amy lohatenihely “modely ho an’ny anti-panahy.” Anao koa fa mamaky lahatsoratra vitsivitsy amizio ao, man̈ontania ten̈a karaha ty: “Nan̈ino modeliny Paoly man̈ampy zaho ho ravoravo fo sady hahavita andraikitrinaka?”

21. Ino raha mety atokisany antipan̈ahy?

²¹ Antipan̈ahy, tsaraova fa Jehovah tsy mangataka anaro hanjary lavorary. Ny raha tadiaviny, anaro mila mafatoky. (1 Kor. 4:2) Niezaka i Paoly niasa mare sady tsy nivadiky, ke nankasitrahiny Jehovah izy. Anaro matokisa fa mankasitraka fanompoan̈a ataonaro koa Jehovah. Izy tsy mety “han̈adin̈a raha nataonaro ndreky fitiavan̈a naboakanaro taminy an̈aranany, tamy nikarakaranaro ndreky mbala ikarakaranaro iro olo masin̈y aby io.”​—Heb. 6:10.