1. Ino ma raha ten̈a mamolavola toetrintsika?

 NA VO tsy ela atsika vita batisa na efa ela, samby tihanan̈a toetry tiany Jehovah aby atsika jiaby. Akory havitantsika zen̈y? Atsika mila mifehy eritreritrintsika. Ino antony? Fotony misy vokany amy toetrintsika raha iritriretintsika. Izikoa raha tiany ain̈intsika fo raha dinihintsika, hivolan̈a ndreky han̈ano raha ratsy edy atsika. (Efes. 4:17-19) Mifanohitry amy zen̈y ndraiky, izikoa raha tsara fo ampidirintsika an̈aty jerintsika, ho moramora amintsika hivolan̈a ndreky han̈ano raha mamparavoravo Babantsika, Jehovah.​—Gal. 5:16.

2. Ino aby fan̈ontanian̈a hidinihintsika ato?

² Hitantsika tamy lahatoratra taloha in̈y fa, mety hisy eritreritry ratsy fo ho avy amy jerintsika, ndray atsika efa miezaka tsy han̈ano zen̈y. Kanefa, atsika afaka mifidy tsy han̈ano raha ratsy. Alohany atsika han̈ano batisa, mila volezantsika raha jiaby halany Jehovah, na volan̈a zen̈y na raha atao. Zen̈y dingana voanalohany sady ten̈a maventy, izikoa atsika tihan̈adoso toetry taloha. Kanefa izikoa tihamparavoravo Jehovah ankitin̈y atsika, mila arehantsika koa didinany ty: ‘Sikìna toetry vaovao.’ (Kol. 3:10) Hivaliantsika amy lahatsoratra ty ato valiny fan̈ontanian̈a aby ty: Ino ma “toetry vaovao” zen̈y? Akory atao misikiny izio? Avio, akory hanan̈antsika izio fo?

3. Ino ma “toetry vaovao” zen̈y, avio akory atao misikiny izio? (Galatianina 5:22, 23)

³ “Toetry vaovao” zen̈y toetsain̈y ndreky raha fatao ahitan̈a taratrany toetriny Jehovah. Misikin̈y “toetry vaovao” olo araiky izikoa izy man̈aboaka vokatrany fan̈ahy ndreky man̈ambela fan̈ahy masin̈iny Zan̈ahary hibeko eritreritinany, fihetsehampônany,  ndreky raha ataony. (Vakia Galatianina 5:22, 23.) Olo manan̈a “toetry vaovao” iziô tia Jehovah ndreky Vahoakanany. (Mat. 22:36-39) Ravoravo fo izy ndray miaritry raha sarotro. (Jak. 1:2-4) Pampihavan̈a koa izy. (Mat. 5:9) Maharidraha ndreky tsara fan̈ahy izy koa fa mifandray aminolo. (Kol. 3:13) Izy tia raha tsara sady mifen̈y man̈ano ny tsara. (Lioka 6:35) Hita amy raha ataony fa izy ten̈a matoky Babany andan̈itry an̈y. (Jak. 2:18) Malemy toetry fo izy ndray lera misy olo mikatsiky ady aminany na man̈ano raha mampameloko izy, baka io mahafehy ten̈a izy izikoa fa misy raha mitsapa jery izy.​—1 Kor. 9:25, 27; Tit. 3:2.

4. Nan̈ino ma atsika mila miezaka hanan̈a toetry jiaby koran̈iny Galatianina 5:22, 23?

⁴ Mila miezaka hanan̈a toetry jiaby koran̈iny Galatianina 5:22, 23 ndreky andininy maro hafa amy Baiboly ao atsika, fotony zen̈y raha han̈ampy atsika hisikiny toetry vaovao. * Atsika mety manan̈a lamba isankarazany, fa matetiky araiky fo sikinintsika isaka atsika man̈ano lamba. Fa akory fo toetry aby koran̈iny Galatianina io? Ny marin̈y aminany, toetry aby io tsy afaka misaraka. Ohatra iziô, atsika koa tia olo ankitin̈y, atsika haharidraha aminolo io ndreky ho tsara fan̈ahy aminany. Avio olo araiky koa tsara toetry ankitin̈y, izy malemy toetry ndreky mahafehy ten̈a.

5. Karakory ma “manan̈a sain̈iny Kristy” zen̈y, avio nan̈ino atsika tokony hianatra momba fiain̈anany Jesosy? (1 Korintianina 2:16)

⁵ Vakia 1 Korintianina 2:16. Izikoa atsika tihisikiny toetry vaovao, atsika mila “manan̈a sain̈iny Kristy.” Karakory ma zen̈y? Mila haintsika fomba fisain̈anany Kristy, avio mila alaintsika tahaka izy. Lavorary fomba nan̈aboahany Jesosy vokatrany fan̈ahy. Toetriny Jesosy ten̈a mitovy amy niny Jehovah, ke hita taratra tamy raha nataony Jesosy toetriny Babany. (Heb. 1:3) Izikoa mifen̈y fo atsika mangala tahaka toetsain̈iny Jesosy, ho vitantsika edy han̈ano raha miran̈a amy lay nataony ndreky hangala tahaka toetrinany.​—Fil. 2:5.

6. Ino raha tsara alaintsika onon̈o atsika koa fa mifen̈y hanan̈a toetry vaovao?

⁶ Raha mba ho vitantsika edy hangala tahaka Jesosy zen̈y? Anao mety hieritreritry karaha ty: ‘Jesosy kony lavorary ay, zaho tsy mety hitovy aminany!’ Izikoa zen̈y raha  iritriretinao, ty raha tsara alainao onon̈o: Voanalohany, Jehovah koa fa niasa atsika, atsika nataony mahavita mangala tahaka toetrinany ndreky niny Jesosy. Ke izikoa anao mangala tahaka iro, hitovitovy amy nindro edy toetrinao. (Gen. 1:26) Faharoe, tsisy angôvo matanjaka mandilatra fan̈ahy masin̈iny Zan̈ahary. Ke izio han̈ampy anao hahavita raha tsy pôsibla ho vitanao aminy angovonao manokan̈a foeky. Fahatelo, koa mbala zioty fo, Jehovah tsy mety han̈anten̈a anao han̈aboaka vokatrany fan̈ahy io amy fomba lavorary. Ke namezany Babantsika be fitiavan̈a io 1000 taon̈o lan̈iany olo man̈anten̈a hiain̈y mandrakizay ambony tany eto, beky iro hanjary lavorary. (Apok. 20:1-3) Fa iziô antsendriky, tiany Jehovah atsika hifen̈y han̈ano lay farany tsara vitantsika, ndreky hangataka fan̈ampian̈a aminany.

7. Ino raha hidinihintsika iziô?

⁷ Amy lafiny ino aby atsika afaka mangala tahaka Jesosy? Handiniky toetry efatra an̈isany vokatrany fan̈ahiny Zan̈ahary atsika ato. Ke isaka atsika mandiniky araiky amizio, atsika hangala fianaran̈a baka amy fomba nan̈aboahany Jesosy toetry aby io. Avio atsika handiniky fan̈ontanian̈a sasany han̈ampy atsika hankatsara toetrintsika.

8. Akory nan̈aboahany Jesosy fa tia Jehovah ndreky tia olo izy?

⁸ Tiany Jesosy mare Jehovah; nataony raha nan̈irahany Babany izy, ke nan̈ano sôron̈o ain̈inany izy han̈avotan̈a atsika. (Jaona 14:31; 15:13) Izikoa dinihin̈y fomba fiain̈anany Jesosy tambony tany teto, hita tsarabe fa tia olo ankitin̈y izy. Isanandra, izy nifen̈y fo ho tsara fan̈ahy ndreky hitepô olo, ndray nanohitry izy olo sasany. Ino fomba araiky maventy nan̈aboahany Jesosy fitiavany olo? Niezaka izy nampianatra iro raha momba Fanjakan̈any Zan̈ahary. (Lioka 4:43, 44) Jesosy tsy vitany tia Jehovah ndreky tia olo fo fa, nahafoe ten̈a koa izy ke nan̈eky hampijalianolo panota ndreky hivonendro. Baka tamy raha nataony zen̈y mahavy atsika jiaby afaka hiain̈y mandrakizay.

9. Akory mety han̈aboahantsika fa atsika tia Jehovah salakady tia olo, karaha nataony Jesosy?

⁹ Nanokanten̈a tamy Jehovah ndreky natao batisa atsika fotony tiantsika Babantsika be fitiavan̈a io. Ke karaha nataony Jesosy, tokony ho hita amy fomba fitondrasantsika olo fa atsika tia Jehovah. Karaha ty ho apostoly Jaona: “Na rahalahiny hitany maso fo tsy tiany, ke intsaka eky Zan̈ahary tsy hitany masonany?” (1 Jaona 4:20) Mila man̈ontany ten̈a atsika: ‘Mifen̈y ma zaho ho tia olo amy fô jiaby? Mahay mahinakinaka olo ma zaho, ndray iro ratsy fan̈ahy aminaka? Tia olo ma zaho ke vôn̈ono hampiasa fotoan̈anaka ndreky fanan̈ananaka han̈ampian̈a olo hianatra raha momba Jehovah? Vôn̈ono han̈ano zen̈y fo ma zaho nata maro olo tsy nahefa hitandren̈y na manohitry foeky? Mbala mety hampitombosiko ma fotoan̈a han̈anaovako asa fitorian̈a ndreky fampianaran̈a?’​—Efes. 5:15, 16.

10. Akory nan̈aboahany Jesosy fa izy tia fihavanan̈a?

¹⁰ Jesosy tia fihavanan̈a. Izikoa fa nisy olo nan̈ano ratsy izy, izy tsy namaly faty. Izy foeky nan̈ano raha voanalohany baka hisiany fihavanan̈a, avio izy nampirisiky olo hifandamin̈y izikoa nisy raha tsy nampifankahazo iro. Ohatra iziô, izy nampianatra iro fa tsy maintsy mihavan̈a amy rahalahindro iro, beky ikeny Jehovah fanompoan̈a ataondro. (Mat. 5:9, 23, 24) Matetiky koa izy nan̈ampy iro apostolinany aby io tsy himalo azovy ny bebe tamindro.​—Lioka 9:46-48; 22:24-27.

11. Akory hahavy atsika ho pampihavan̈a?

¹¹ Izikoa atsika tihanjary pampihavan̈a, atsika  tsy vitany mitandrin̈y baka tsy hiady aminolo fo fa, atsika foeky mila man̈ano raha hisiany fihavanan̈a. Izikoa fa misy piaramanompo tsy mifan̈araka, ampirisìa iro hifandamin̈y. (Fil. 4:2, 3; Jak. 3:17, 18) Iritrireta ty: ‘Vôn̈ono ma zaho hilefitry baka hisiany fihavanan̈a? Izikoa misy rahalahy na ranabavy nan̈ano raha nampalahelo zaho, mitana heloko ampô ma zaho? Izikoa zaho mieritreritry fa baka taminany naviany problemo io, zaho ma miambin̈y izy han̈ano dingana aminaka, sa zaho vôn̈ono han̈ano raha voanalohany hihavanan̈a aminany? Izikoa misy piaramanompo tsy fankahazo, mampirisiky iro hihavan̈a ma zaho, izikoa ilain̈a zen̈y?’

12. Akory nan̈aboahany Jesosy fa izy tsara fan̈ahy?

¹² Jesosy tsara fan̈ahy. (Mat. 11:28-30) Ndray nisy problemo, izy mbala tsara fan̈ahy ndreky nahay nandanjalanja fo. Ohatra iziô, man̈angy fenisianin̈y in̈y koa fa niangavy Jesosy hampajanga zanany, tsy nikeny antsendriky fangatahan̈any man̈angy io. Fa izikoa fa hitany finoan̈any viavy io, tsara fan̈ahy Jesosy ke nataony raha nampajanga zanakany man̈angy io. (Mat. 15:22-28) Ndray tsara fan̈ahy i Jesosy, izy tsy nisalasala nan̈amia torohevitry. Mentitry izy nivolan̈a olo marikitry fônany. Ohatra, nisy lera Petera nahitsiny Jesosy tankilany pianatra hafa, fotony Petera taminio tihandresy lahatra izy tsy han̈ano sitrapôny Jehovah. (Mar. 8:32, 33) Tsy raha izy tihangala baraka Petera nahavy izy nan̈ano zen̈y, fa izy tihampiofan̈a Petera. Tihampitandrin̈y pianatranany hafa koa izy, beky iro tsy han̈ambony ten̈a. Mety nen̈atra hely Petera taminio, kanefa nahatsara izy fan̈itsian̈a nazony io.

13. Akory han̈aboahantsika fa tsara fan̈ahy ankitin̈y atsika?

¹³ Tsara fan̈ahy aminolo marikitry fôntsika atsika, izikoa atsika mba masaky man̈anatra iro ndraikindraiky. Aleva tahaka Jesosy, ke ataova miôrin̈y amy toro lalan̈any Baiboly torohevitry amezanao olo. Kanefa, aza masiaka. Matokisa fa tihan̈ano raha tsara iro, ke han̈araka torohevitry feno fitiavan̈a amezanao lan̈iany olo tia Jehovah ndreky tia anao. Man̈ontania ten̈a karaha ty: ‘Izikoa misy olo marikitry fônaka man̈ano raha tsy mety, zaho ma mba masaky mivolan̈a izy? Izikoa zaho ten̈a mila man̈amia torohevitry izy, tsara fan̈ahy ma zaho koa fa mivolan̈a izy, sa zaho masiaka? Heloko ma mahavy zaho mivolan̈a izy, sa zaho mitady raha mahatsara izy?’

14. Akory nan̈aboahany Jesosy fa izy tsara toetry?

¹⁴ Jesosy tsy vitany nahay ino raha tsara, fa nifen̈y koa izy nan̈ano ny tsara. Tiany Jesosy mare Babany, ke nifen̈y fo izy nan̈ano raha mahitsy, ary tsara antony nan̈anaovany zen̈y. Olo araiky tsara toetry zen̈y mizaha fomba han̈ampian̈a olo ndreky han̈anaovan̈a ny tsara aminolo fo. Izio ma efa ampy mahay raha tokony hatao? Ehe. Mila mifen̈y atsika man̈ano raha tsara, avio tokony ho tsara antony han̈anaovantsika izio. Mety ho lôso diniky olo sasany: ‘Izio ma misy olo man̈ano ny tsara kanefa ratsy antony mahavy izy man̈ano zen̈y?’ Ia valiny. Jesosy iziô nivolan̈a fa misy olo nan̈amia raha olo sahiran̈a, kanefa baka io ankalazainy aminolo jiaby raha nataony io beky olo hidera izy. Tsara raha nataony, kanefa tsy nankasitrahany Jehovah.​—Mat. 6:1-4.

15. Akory ahitan̈a fa tsara toetry atsika?

¹⁵ Tsara toetry ankitin̈y atsika izikoa tsara antony mahavy atsika man̈ano raha tsara, fa tsy baka amy fitiavanten̈a. Ke mety han̈ontany ten̈a karaha ty atsika: ‘Haiko tsarabe raha tokony hataoko, fa zaho ma mba miezaka man̈ano zen̈y? Ino ma ten̈a antony mahavy zaho man̈ano ny tsara?’

16. Ino raha tokony hataontsika, isanandra? Nan̈ino?

¹⁶ Mila mifen̈y hanan̈a toetry vaovao fo atsika, ndray efa vita batisa. Toetry vaovao io mety ampitovisin̈y amy lamba vao. Tandremantsika lamba vaontsika baka tsy ho robaka. Mila mitandrin̈y koa atsika baka tsy hiala amintsika toetry vaovao. Isanandra, atsika mila mitady fomba fo han̈aboahan̈a vokatrany fan̈ahiny Jehovah. Arakarakany han̈aboahantsika toetry aby io hahavy fan̈ahiny Jehovah han̈ampy atsika. Nan̈ino? Fotony Jehovah mampiasa fan̈ahinany io koa fa han̈ano raha. (Gen. 1:2) Hita baka amy zen̈y fa ten̈a mila man̈ano raha atsika. Karaha ty nambarany Jakoba, pianatrany Jesosy: “Finoan̈a koa tsy aboaka amy raha atao, maty.” (Jak. 2:26) Maty karaha zen̈y koa toetry hafa an̈isany vokatrany fan̈ahiny Zan̈ahary izikoa tsy aboakantsika amy raha ataontsika. Ke isaka atsika man̈aboaka toetry aby io, ho hita tsarabe fa miasa amintsika fan̈ahy masin̈y.

17. Ino raha tokony hataonao, izikoa misy fotoan̈a anao tsy mahavita nan̈aboaka vokatrany fan̈ahy?

¹⁷ Ndray efa ela Kristianin̈y araiky vita batisa, mety hisy fotoan̈a fo izy tsy hahavita han̈aboaka vokatrany fan̈ahy. Ndray zen̈y, aza rivan̈a. Mifen̈a fo han̈aboaka toetry aby io. Zen̈y ny raha ten̈a maventy! Akory iziô ataonao izikoa matriaka lambanao araiky ten̈a tianao? Direkty harianao ma izio? Ehe. Hay be fa amboarinao ny robaka aminany, izikoa mbala mety amboarin̈y. Mety hitandrin̈y koa anao aminy afara. Karaha zen̈y koa, izikoa nisy fotoan̈a anao tsy nahavita nan̈aboaka fitiavan̈a, na tsy naharidraha taminolo araiky na tsy tsara fan̈ahy taminany, anao aza rivan̈a. Mety hihavan̈a tsara ndraiky anaro izikoa anao mialatsin̈y aminany amy fô jiaby. Tokony ho tapakevitry han̈ano tsaratsaranizen̈y koa anao amy man̈araka.

18. Ino ma raha atokisantsika?

¹⁸ Nahatsara izy, atsika afaka mangala tahaka modely tsarany Jesosy. Arakarakany hangalantsika tahaka toetsain̈inany, ho moramora amintsika han̈araka raha nataony, avio tsy ho sarotro amintsika hisikiny toetry vaovao. Mbala toetry efatra an̈isany vokatrany fan̈ahy masin̈iny Zan̈ahary fo nidinihintsika tamy lahatsoratra ty. Ke nan̈ino izikoa anao mba mangala fotoan̈a hely handinihan̈a toetry hafa an̈isany vokatrany fan̈ahy, baka io iritrireta ino aby fomba tsara mety han̈aboahanao toetry aby io? Hahita lahatsoratra maromaro man̈azava zen̈y anao, izikoa mikaroko amy Fitaovana Fikarohana ho An’ny Vavolombelon’i Jehovah. Mandihana amy “Fiainan’ny Kristianina”, baka io zahava “Vokatry ny Fanahy.” Matokisa fa anao koa mifen̈y man̈ano anjaranao, Jehovah han̈ampy anao hisikiny toetry vaovao ndreky hanan̈a izio fo.