Misy olo mamaky tantara io mekimeky fo ke iro lôso nieritreritry raha karaha zen̈y. Kanefa, nisy olo aroe samby isany nanan̈a an̈aran̈a Mefiboseta, koran̈iny andininy aby io. Alô dinihintsika marikitry raha nandalo tamy zen̈y.

Saoly panjakany Israely nanan̈a zanaka sivy, fito lelahy avio aroe man̈angy. Jonatana talan̈olonany. Tafara, panjaka io niteraka Mefiboseta tamy Rizpah vadihelinany. Ny raha nisy amy zay, Jonatana koa fa niteraka lelahy, nataony Mefiboseta koa an̈aran̈any zanany. Safe, samby Mefiboseta an̈aran̈any zanakany Panjaka Saoly ndreky zafiny.

Nisy fotoan̈a Panjaka Saoly nanomboko nankahala iro Gibeonita niaraka niain̈y tamindro Israelita aby io, ke izy nitady fomba handripahan̈a iro. Ankevitriny naro Gibeonita naty! Ten̈a ratsy raha nataony Saoly zen̈y, fotony iro piadidy israelita taminy andrany Josoa efa nan̈ano fifan̈ikian̈a tamy Gibeonita fa hihavan̈a amindro.​—Jos. 9:3-27.

Mbala nanankery fo fifan̈ikian̈a io firaka taminy andrany Panjaka Saoly. Kanefa raha zen̈y tsy nahoany Saoly foeky fa izy nitady handripaka iro Gibeonita aby io fo. Ino vokany baka tiô? ‘Saoly ndreky fianakavian̈anany voaheloko nandatsaka lionolo.’ (2 Sam. 21:1) Koa fa nandeha fotoan̈a, nanjary Panjaka Davida. Tsy naty tamy fandripahan̈a io Gibeonita sasany, ke nikoran̈indro tamy Davida fahotan̈a maventy nataony Saoly tamindro. Davida baka tiô nan̈ontany iro, ino raha takindro hamafan̈a raha ratsy mare nataony Saoly, baka Jehovah hitahy taniny Israely. Iro Gibeonita aby io tsy nangataka vola, fa iro nangataka baka hivonen̈a ndreky hahanton̈o fito lahy tamy zanakany lelahy ‘nan̈ano tetiky handripahan̈a’ iro. (Nom. 35:30, 31) Nikeny Davida fangatahan̈andro.​—2 Sam. 21:2-6.

Saoly ndreky Jonatana tamy zen̈y efa naty tamy lagera, fa Mefiboseta zanakany Jonatana ndraiky mbala velon̈o. Fa tamy Mefiboseta zanakany Jonatana mbala hely, nisy aksidan nahazo izy ke nanjary nalemy vitinany. Hay be fa tsy an̈isanolo namany dadilahiny, namono iro Gibeonita aby io izy. Nan̈ano fifan̈ikian̈a tamy Jonatana kamaradiny koa i Davida, ke mety nahazo hatsaran̈a baka tamizio Mefiboseta fotony izy taranakany Jonatana. (1 Sam. 18:1; 20:42) Karaha ty koran̈iny Baiboly: ‘Panjaka [Davida] namindra fô tamy Mefiboseta, zanakany Jonatana zanakany Saoly, fotony Davida ndreky Jonatana efa nan̈ano fifan̈ikian̈a man̈oloan̈a Jehovah.’​—2 Sam. 21:7.

Ndray zen̈y, nikeny Davida fangatahan̈andro Gibeonita aby io. Natôndrony Davida tamindro Gibeonita aby io aroe lahy tamy zanakany Saoly, ke an̈aran̈a araiky tamindro io Mefiboseta avio dimy lahy tamy zafiny Saoly. (2 Sam. 21:8, 9) Raha nataony Davida zen̈y nahavy taniny Israely nafaka tamy trosandio.

Misy raha maventy ianarantsika amy tantara io. Mazava lalàn̈any Zan̈ahary: ‘Zanaka tsy tokony hivonen̈a baka amy fahotan̈any babany. Kila olo hivonen̈a baka amy fahotan̈anany tômpiny.’ (Deot. 24:16) Tsy mety nikeny Jehovah hivonen̈a eky zanaka Saoly aroe lahy ndreky zafiny dimy aby in̈y, izikoa iro tsy nanantsin̈y. Matoa iro nambelany nivonen̈a, dikanizen̈y iro nankasitraka tetikiny Saoly handripahan̈a iro Gibeonita aby io. Ke iro fito io samby nivonen̈a baka taminy hadisovan̈andro tômpiny.

Misy olo mieritreritry na mivolan̈a fa tsy diso izy ndray nan̈ano raha ratsy fotony izy nan̈araka beko fo. Hitantsika baka tamy tantara io ndraiky fa zen̈y tsy fialantsin̈y. Misy ohabolan̈a feno fahendrena zay mivolan̈a: ‘Ataova mahitsy tsara tany andihanany vitinao, amy zen̈y ho azo antoko tsara lalan̈anao jiaby.’​—Ohab. 4:24-27; Efes. 5:15.