1. Ambelany Jehovah hivavaka aminany atsika. Karakory tokony fiheverantsika raha zen̈y?

 MISY kadô ten̈a miavaka namezany Jehovah, Pamôron̈o lan̈itry ndreky tany, atsika. Tsy ino zen̈y fa vavaka. Miniminia hely baka ty: Mety koran̈intsika amy Jehovah aby raha jiaby an̈atiny fôntsika, na kelera na kelera, avio na ino na ino volan̈a ampiasaintsika. Ary atsika koa fa hivavaka, tsy mila mangataka randevò aminany. Mety mivavaka atsika lera atsika marary a lôpitaly na lera atsika amy prizon. Matoky atsika fa hitandren̈y atsika fo Babantsika be fitiavan̈a io. Ke tsy haintsika tsy hankasitraka kadô ten̈a tsara namezany atsika zen̈y!

2. Akory nan̈aboahany Davida fa izy ten̈a nankasitraka tombontsoa hivavaka amy Jehovah?

² Panjaka Davida ten̈a nankasitraka kadô namezany Jehovah izy io, tsy ino zen̈y fa vavaka. Nanoratra hira izy han̈aboahany fankasitrahany Jehovah. Ho izy: ‘Irarian̈a vavakanaka hanjary karaha emboko man̈itry voaoman̈a tsarabe man̈oloan̈a anao!’ (Sal. 141:1, 2) Taminy andrany Davida, nampiasain̈a tamy fanompoampivavahan̈a marin̈y emboko masin̈y io. Iro pisôron̈o aby io koa fa nan̈amboatra izio, nitandrin̈y mare iro. (Eks. 30:34, 35) Ino nahavy i Davida nampiran̈a vavakanany taminy emboko man̈itry? Fotony tiany homan̈iny tsara raha handeha hivolan̈iny amy Babany andan̈itry an̈y. Karaha zen̈y koa, tiantsika hamparavoravo Jehovah vavakantsika.

3. Karakory ma tokony hataontsika izikoa fa mivavaka? Ino antony?

³ Izikoa atsika mivavaka amy Jehovah, mila mitandrin̈y atsika tsao manjary tsy man̈aja. Ny marin̈y aminany baka, atsika koa fa mivavaka, tokony ho hita fo fa atsika man̈aja Jehovah. Miniminia  hely baka fahitan̈a miavaka nazony Isaia, Ezekiela, Daniela, avio apostoly Jaona. Samby isany fahitan̈a nazondro, kanefa misy raha itovizandro jiaby. Hita amy fahitan̈a aby io fa Jehovah ten̈a Panjaka be voninahitry. Isaia iziô nahita ‘Jehovah nipetraka tamy sezy fiandrianan̈a farany an̈abo.’ (Isaia 6:1-3) Ezekiela ndraiky nahita Jehovah nipetraka amy saretinany andan̈itry an̈y. Nisy ‘hazavan̈a be nan̈odidin̈y izy, karaha hazavan̈any sobeha.’ (Ezek. 1:26-28) Daniela ndraiky nahita Jehovah, ‘Lay Efa Nisy Letry Ela Be’ tan̈y, nan̈ano lamba malandy, avio nisy môtro mizelazela baka amy sezy fiandrianan̈anany. (Dan. 7:9, 10) Ino fo basy raha hitany apostoly Jaona? Izy nahita Jehovah nipetraka tamy sezy fiandrianan̈a; nisy sobeha tsara mare karaha emerôdy mahitso in̈y nan̈odidin̈y izy. (Apok. 4:2-4) Hitantsika baka amy zen̈y fa tsisy olo manan̈a voninahitry ambaka Jehovah. Atsika koa fa misaintsain̈y momba zen̈y, manjary tsapantsika fa ten̈a tombontsoa miavaka ankitin̈y man̈aton̈o Jehovah zen̈y, ke tokony ho feno fan̈ajan̈a fo atsika izikoa fa man̈ano zen̈y. Kanefa ino ma raha mety koran̈intsika koa fa mivavaka?

4. Akory nanombohany Jesosy vavaka modely amy Matio 6:9, 10? Ino raha ianarantsika baka amy zen̈y?

⁴ Vakia Matio 6:9, 10. Tamy Toriteny nataony Jesosy Tan̈abony Bongo in̈y, nampianariny iro pianatranany aby io raha tokony hivolan̈indro izikoa tiandro hankasitraka vavakandro i Jehovah. Jesosy koa fa baka nivolan̈a “karaha ty ataova koa fa mivavaka”, nataony mazava tsara fa, raha misy ifandraisany amy fikasan̈any Jehovah ny raha voanalohany tokony hangatahin̈y. Tafiditry amy zen̈y fankamasin̈ana an̈aran̈any Zan̈ahary ndreky faviany Fanjakan̈anany, fotony izio han̈adoso fahavalony Zan̈ahary jiaby ndreky han̈ano raha tsara amy tany ty ndreky aminolombelon̈o. Izikoa atsika mivavaka momba iro raha aby io, dikanizen̈y ten̈a raha maventy amintsika sitrapôny Zan̈ahary.

5. Mety mivavaka momba raha ilaintsika manokan̈a ma atsika?

⁵ Amy tapany man̈araka amy vavaka io, Jesosy nivolan̈a fa afaka mivavaka momba raha ilaintsika manokan̈a atsika. Atsika mety mivavaka baka Jehovah han̈amia atsika hanin̈y aminy andra io, han̈ambela fahotan̈antsika,  hiaro atsika lera misy raha mitsapa finoan̈antsika, avio hankafaka atsika amy Satana lay ratsy. (Mat. 6:11-13) Izikoa atsika mangataka raha aby io amy Jehovah, ho hita fa ten̈a mitavandra Jehovah atsika sady tihan̈ano raha mamparavoravo izy.

6. Izio ma raha avoakoran̈a amy vavaka modely fo mety koran̈intsika izikoa fa mivavaka? Hazavà.

⁶ Izio ma vavaka modely nampianariny Jesosy in̈y tiany hataony pianatranany aby io tsianjery? Aha. Nisy fotoan̈a ohatra Jesosy nivavaka, fa izy tamy fotoan̈anizen̈y nikoran̈a raha hafa nampijaly jerinany. (Mat. 26:39, 42; Jaona 17:1-26) Mety mivavaka momba raha mampiasaloha atsika koa atsika. Isaka atsika hanapakevitry, atsika mety mangataka fahendrena ndreky fahiratantsain̈y. (Sal. 119:33, 34) Akory, ohatra, izikoa sarotsarotro fanendren̈a azonao? Anao mety mivavaka baka Jehovah han̈ampy anao hahavita izio. (Ohab. 2:6) Raimandreny mety mivavaka momba zanakandro, baka io tsaiky koa mety mivavaka momba olobendro. Atsika jiaby mety mivavaka momba olo ampianarintsika Baiboly ndreky olo itoriantsika, sady ten̈a tokony han̈ano zen̈y. Ndray izy man̈ano zen̈y, tsy lera atsika hangataka raha fo vo hikoran̈a amy Jehovah ay!

7. Nan̈ino ma atsika tokony hidera Jehovah lera atsika mivavaka?

⁷ Ty koa raha tsy tokony hadin̈antsika lera atsika mivavaka: Midera Jehovah. Tsisy olo vain̈y derain̈a mandilatra Zan̈aharintsika. Izy “tsara toetry ndreky vôn̈ono han̈ambela hadisovan̈a.” Izy koa ‘mamindra fô sady mahay mahinakinaka olo, tsy mora meloko, avio ten̈a be fitiavan̈a sady tsy mivadiky.’ (Sal. 86:5, 15) Izikoa fa dinihin̈y toetrinany aby zen̈y ndreky raha jiaby ataony, hahita antony maro hideran̈a izy atsika.

8. Ino aby raha sasany mety han̈anaovantsika mersy Jehovah? (Salamo 104:12-15, 24)

⁸ Maro raha tsara efa namezany Jehovah atsika. Ke lera atsika mivavaka, atsika tsy raha midera izy fo fa mba tihan̈ano mersy izy koa. Ohatra, lera atsika mahita folera tsara sady manaitry atsika in̈y. Iô koa hanin̈y maro mashiro, ndreky naman̈a mamelombelon̈o namezany atsika. Baka amy Babantsika be fitiavan̈a io aby zen̈y, ary mbala mandilatra zen̈y raha ataony  baka atsika ho ravoravo. (Vakia Salamo 104:12-15, 24.) Fa an̈abony raha jiaby zen̈y, atsika tokony han̈ano mersy Jehovah, fotony atsika amezany hanin̈y arapan̈ahy marobe sady amezany fan̈antinan̈a ten̈a tsara aminy hoavy.

9. Ino raha han̈ampy atsika tsy han̈adin̈a han̈ano mersy Jehovah? (1 Tesalonianina 5:17, 18)

⁹ Maro raha ataony Jehovah han̈ampian̈a atsika, fa atsika mety mora man̈adian̈a man̈ano mersy izy. Misy sosokevitry ty han̈ampy anao tsy han̈adin̈a han̈ano zen̈y: Ataova listy aby raha nangatahinao taminany, baka io zahava matetiky izio misy ahitanao fomba namaliany Jehovah vavakanao aby io, avio ataova mersy izy. (Vakia 1 Tesalonianina 5:17, 18.) Diniha baka ty: Ravoravo salakady mahatsiaro tian̈a atsika izikoa fa misy olo mankasitraka raha nataontsika. Ho ravoravo karaha zen̈y koa Jehovah, izikoa atsika tsy man̈adin̈a misaotra izy amy valimbavaka nazontsika. (Kol. 3:15) Ino koa antony hafa sady maventy tokony han̈anaovantsika mersy Jehovah Zan̈aharintsika?

10. Izikoa 1 Petera 2:21 dinihin̈y, ino koa raha hafa nataony Jehovah ke tokony han̈anaovantsika mersy izy?

¹⁰ Vakia 1 Petera 2:21. Tokony han̈ano mersy Jehovah atsika fotony izy nan̈iraka Zanany ten̈a tiany hampianatra atsika. Atsika koa fa mianatra momba fiain̈anany Jesosy, mahaimaro fo raha haintsika momba Jehovah ndreky raha tokony hataontsika beky Jehovah ho ravoravo amintsika. Mety hanjary kamaradiny Jehovah ndreky hihavan̈a tsara aminany atsika, izikoa atsika mino sôron̈o nataony Kristy.​—Rom. 5:1.

11. Nan̈ino ma atsika mivavaka aminy an̈aran̈any Jesosy?

¹¹ Mankasitraka Jehovah koa atsika, fotony atsika afaka mivavaka aminany aminy an̈aran̈any Jesosy. Zanany io ampiasainy Jehovah hamaly vavakantsika. Tandrin̈esany Jehovah sady valiany vavaka jiaby atao aminy an̈aran̈any Jesosy. Karaha ty nazavainy Jesosy: ‘Hataoko aby zay raha angatahinaro aminy an̈aran̈anaka, amy zen̈y Baba hahazo voninahitry aminy an̈aran̈any Zanaka.’​—Jaona 14:13, 14.

12. Ino koa antony hafa mahavy atsika mankasitraka Jehovah nohony izy nan̈amia Zanany?

¹² Baka amy vidipan̈avotan̈a nataony Jesosy in̈y, Jehovah mamafa fahotan̈antsika. Koran̈iny Baiboly fa Jesosy ‘pisoron̈obe mipetraka ankavanan̈any Zan̈ahary Be andan̈ity an̈y.’ (Heb. 8:1) Jesosy ‘pan̈ampy atsika [na avôkàntsika] man̈oloan̈a Baba.’ (1 Jaona 2:1) Nakiry izy, Jehovah nan̈amia atsika Pisoron̈obe mahay mahinakinaka atsika amy fahalimian̈antsika, ke izy ‘miangavy Jehovah amy plasintsika.’ (Rom. 8:34; Heb. 4:15) Tsy lavorary atsika, ke izikoa tsy tiô sôron̈o nataony Jesosy in̈y, tsy ho vitantsika foeky han̈aton̈o Jehovah amy vavaka zen̈y. Ten̈a kadô miavaka izy namezany Jehovah in̈y fotony Zanany ten̈a tiany lastiô namezany, ke tsy ho vitantsika foeky hankasitraka amy fomba feno raha nataony jiaby zen̈y.

13. Taminy alin̈y talohany nifatesany Jesosy, akory nan̈aboahany Jesosy fa ten̈a tiany iro pianatranany aby io?

¹³ Taminy alin̈y talohany nifatesany, Jesosy nivavaka ela be beky Babany ‘hiaro iro pianatranany aby io aminy araiky ratsy in̈y.’ (Jaona 17:15) Hitantsika baka amy zen̈y fitiavany Jesosy iro. Efa hainy fa hijaly mare izy tsy ho ela, kanefa mbala niasaloha taminy apostolinany fo izy.

14. Akory han̈aboahantsika fa tiantsika iro rahalahy ndreky ranabavintsika aby io?

¹⁴ Mangala tahaka i Jesosy atsika izikoa tsy mifantoko amy raha ilaintsika fo, fa mba mivavaka tsy tapaka nindro piaramanompo  amintsika aby io koa. Man̈araka bekony Jesosy atsika izikoa man̈ano zen̈y, fotony izy nan̈iraka atsika hifankatia. Zen̈y koa han̈aboahantsika amy Jehovah fa ten̈a tia piaramanompo atsika. (Jaona 13:34) Tsy fandanian̈a lera vavaka ataontsika nindro, fa ten̈a han̈ampy iro. Koran̈iny Volan̈a Zan̈ahary fa ‘fangatahan̈a ataonolo marin̈y ten̈a misy vokany.’​—Jak. 5:16.

15. Nan̈ino ma iro piaramanompo amintsika aby io mila vavaka baka amintsika?

¹⁵ Miaritry fitsapan̈a isankarazany iro piaramanompo amintsika aby io, ke ten̈a ilaindro vavaka baka amintsika. Atsika mety mangataka baka Jehovah han̈ampy iro hiaritry aretin̈y, lagera, fan̈injehan̈a, na raha sarotro hafa. Maro koa piaramanompo mahafoe ten̈a man̈ampy olo amy tany handalaovany antambo, ke mety mivavaka nindro koa atsika. Asa anao mba mahazo onon̈o olo miaritry iro raha aby io? Lera anao mivavaka, ton̈òna an̈arandro. Angataha Jehovah han̈ampy iro. Zen̈y han̈aboahanao fa tianao mare iro.

16. Nan̈ino ma atsika tokony hivavaka nindro rahalahy mitariky atsika aby io?

¹⁶ Ravoravo iro rahalahy mitariky an̈ivony fiangonan̈a aby io, izikoa atsika mba mahatsiaro iro lera mivavaka; ary raha zen̈y ten̈a mahatsara iro. Hainy apostoly Paoly fa ten̈a nilainy raha zen̈y, ke karaha ty raha nisoratiny: ‘Anaro koa fa mivavaka, mba ton̈òna koa an̈aran̈anaka, amy zen̈y ho haiko volan̈a tokony hivolan̈iko lera zaho mivolan̈a. Amy zen̈y zaho tsy havozo lera man̈ambara sekire masin̈y momba vaovao tsara.’ (Efes. 6:19) Amy zioty koa, miasa mare iro rahalahy mitariky atsika aby io. Aboakantsika fa tia iro atsika, izikoa atsika mivavaka baka Jehovah hitahy ezakandro.

17-18. Lera karakory aby ma atsika mety hangataka olo hafa hisoloten̈a atsika amy vavaka, avio ino raha tsy mila adin̈antsika?

¹⁷ Misy fotoan̈a atsika mety hisoloten̈a olo hafa amy vavaka. Ohatra: Mitariky fampianaran̈a Baiboly ranabavy araiky. Mety hiangavy ranabavy hafa miaraka mampianatra aminany izy han̈ano vavaka. Ny raha mety ho hisy, namany io mety tsy ten̈a mahay mombamomba olo ampianarin̈y io, ke evandraha ho ravoravo izy izikoa amy farany fianaran̈a izy vo irahin̈y mivavaka. Karaha io, ho moramora aminany hampifan̈araka vavakanany amy raha ilainy pianatra io.

 ¹⁸ Mety hangatahin̈y hivavaka koa rahalahy araiky lera fivorian̈a alohany fanompoan̈a na lera fivorian̈any fiangonan̈a. Ke zay rahalahy mahazo tombontsoa io tokony hangala onon̈o ino marin̈y antony nan̈anaovan̈a fivorian̈a io. Lera izy mivavaka, izy tsy handeha han̈anatra na hampianatra fiangonan̈a na han̈ano filazan̈a. Aminy ankamaraozany fivorian̈a alamin̈iny fiangonan̈a, tsy mandilatra dimy minity han̈anaovan̈a hira ndreky vavaka, ke rahalahy man̈ano vavaka tsy tokony han̈ano ‘vavaka lava be’, intsaka eky amy fanombohany fivorian̈a.​—Mat. 6:7.

19. Ino raha han̈ampy atsika ho vôn̈ono lera avy andra fitsaran̈any Jehovah?

¹⁹ Ten̈a tokony ho raha maventy amintsika vavaka io, fotony efa mahaimarikitry andra fitsaran̈any Jehovah. Karaha ty nambarany Jesosy momba andra io: “Anaro miambesa fo, ataova fangatahan̈anaro matsan̈a alin̈y, baka anaro ho afaka hilefa raha jiaby tsy maintsy ho avy zen̈y.” (Lioka 21:36) Hahavita hiambin̈y fo atsika izikoa tsy vôly mivavaka, ke tsy ho tampoko amintsika aviany andrany Jehovah.

20. Akory mety hahavy vavakantsika ho miran̈a emboko man̈itry?

²⁰ Ino aby raha nidinihintsika tato? Hitantsika fa vavaka io an̈isany tombontsoa miavaka anan̈antsika. Raha misy ifandraisany amy fikasan̈any Jehovah ny ten̈a tokony hifantohantsika, koa fa mivavaka. Sôsoko zen̈y, mankasitraka Zanaka Zan̈ahary koa atsika ndreky Fanjakan̈anany efa mitondra. Ravoravo koa atsika mivavaka niny piaramanompo amintsika. Ndray izy man̈ano zen̈y, atsika mety mangataka raha ilaintsika isanandra ndreky hivavaka baka izy han̈ampy atsika ho fatatra finoan̈a fo. Mankasitraka tombontsoa miavaka io atsika izikoa alohany atsika hivavaka, efa sakavy dinihintsika tsara antsendriky raha handeha hivolan̈intsika. Izikoa atsika man̈ano zen̈y, hanjary miran̈a emboko man̈itry in̈y fahitany Jehovah vavakantsika, ke ‘farandraha tiany eky mitandren̈y vavakantsika.’​—Ohab. 15:8.