1. Koa 1 Tesalonianina 5:11 zahavan̈a, ino asa mila ataontsika jiaby?

 EFA nisy fotoan̈a ma fiangonan̈anaro nan̈ôrin̈y na nan̈avao Tran̈o Fivorian̈a? Izikoa zen̈y, azo antoko fa azonao onon̈o tsara fivorian̈anaro voanalohany tamy tran̈o vaovao io! Nankasitraka Jehovah mare anao tamy zen̈y. Mety ravoravo loatra aby anao ke efa kalikaly ho latsaka ranomaso, taminy hira nanombohan̈a fivorian̈a. Farandraha tsara eky fomba nan̈amboaran̈a Tran̈o Fivorian̈a io ke lôso mahazo dera Jehovah. Mbala bebenizen̈y voninahitry azony Jehovah izikoa atsika mifen̈y man̈ano karazan̈a fan̈oren̈ana hafa ataontsika. Tsy ino zen̈y fa fan̈ampian̈a lan̈iany olo avy amy fivorian̈a. Izio mbala valera mandilatra tran̈o. Zen̈y tsarabe karazan̈a fan̈oren̈ana tan̈atiny jeriny apostoly Paoly, izy koa fa nanoratra volan̈a aby amy 1 Tesalonianina 5:11, avoasoratra aminy andininteny fôtotro amy fianaran̈a ty.​—Vakia.

2. Ino aby raha hidinihintsika amy lahatsoratra ty ato?

² Apostoly Paoly modely ten̈a tsara amy fahaizan̈a mankahery piaramanompo. Izy baka nahay nitepô iro. Amy lahatsoratra ty, atsika handiniky akory nan̈ampiany iro rahalahiny ndreky ranabaviny aby io 1) hiaritry fanoheran̈a, 2) hihavan̈a tsara amindro samby iro, avio 3) hatoky Jehovah mare. Alô hizahavantsika akory mety hangalantsika tahaka Paoly baka atsika hahavita hankahery iro rahalahy ndreky ranabavintsika aminy andra zioty.​—1 Kor. 11:1.

3. Akory ahitan̈a fa nahay nandanjalanja i Paoly?

³ Ten̈a tiany Paoly iro rahalahiny aby io. Maro problemo nandalo tamy Paoly. Ke iro piaramanompo taminany aby io koa fa niatriky fitsapan̈a, tsy sarotro taminany nahinakinaka na nitepô iro. Nisy fotoan̈a Paoly tsisy vola foeky sady tsy maintsy nitady asa namilomany ten̈a ndreky nikarakarany olo dia araiky taminany. (Asa. 20:34) Pan̈amboatra tran̈olay asanany. Izy koa fa  navy ta Korinto, niaraka niasa taminy Akoila ndreky Prisila antsendriky izy, fotony iro samby pan̈amboatra tran̈olay. Fa ‘isaka Sabata’, izy nandeha nitory tamindro Jiosy ndreky Griky aby io. Ke Silasy ndreky Timoty koa fa navy, ‘Paoly nanomboko nifantoko mare tamy volan̈a Zan̈ahary.’ (Asa. 18:2-5) Tsiary ndraiky niala tan̈atiny jeriny Paoly tanjon̈onany tamy fiain̈ana, hanompo Jehovah. Niasa mare Paoly ke mety tsarabe izikoa izy nampahery iro rahalahiny ndreky ranabaviny aby io. Nampatsiarôviny iro fa ndray mafy fiain̈ana ndreky fitadiavan̈a raha hamiloman̈a fianakavian̈a, zen̈y tsy tokony hataondro tamban̈a tsy han̈anaovan̈a “raha ten̈a maventy”; tsy ino zen̈y fa lafiny jiaby amy fanompoan̈a Jehovah.​—Fil. 1:10.

4. Akory fomba nan̈ampiany Paoly ndreky Timoty piaramanompo niatriky fan̈injehan̈a?

⁴ Tsy ela tafarany niforaon̈any fiangonan̈a ta Tesalonika, efa tôjy fanoheran̈a mare iro piaramanompo vaovao aby tan̈y. Tandraraiky, nisy panohitry maro sady ratsy jery nitady Paoly ndreky Silasy. Ino raha nataonolo aby io koa fa tsy hitandro iro roe lahy? Nantsoritsoritindro nandeha tamy sefony tanàna tan̈y sasany tamindro rahalahy aby io. (Asa. 17:6, 7) Mba iritrireta hely baka karakory favozoan̈andro rahalahy vaovao aby io, koa fa naharen̈y fa halanolo aby tamy tanàna io tao iro! Mety nanjary tsy nazoto tamy fanompoan̈a aby iro. Akory nataony Paoly nan̈ampy iro? Tsy maintsy niala ta Tesalonika baka iro roeny Silasy, fa talohany iro nandeha, nataondro azo antoko fa avoakarakara tsara fiangonan̈a vaovao io. Nampahatsiaro iro Tesalonianina aby io karaha ty i Paoly: “Nirahinay i Timoty, rahalahinay salakady panompony Zan̈ahary mitory vaovao tsara momba Kristy. Nirahinay izy baka hazahoanaro angôvo ndreky hampahery anaro, amy zen̈y anaro hanan̈a finoan̈a matanjaka. Ke tsy ho voahozongozon̈o anaro ndray iô raha manahiran̈a aby zen̈y.” (1 Tes. 3:2, 3) Timoty efa niatriky fan̈injehan̈a karaha zen̈y koa taminizy ta Lystra, tanàna faviany. Hitany karakory nankahirezany Paoly iro rahalahy aby tan̈y. Hitany tsara koa fomba nan̈ampiany Jehovah iro, ke vitany Timoty tsarabe nan̈amia toky iro rahalahy ndreky ranabavy vaovao aby io fa mbala hilamin̈y fo problemondro.​—Asa. 14:8, 19-22; Heb. 12:2.

5. Ino hatsaran̈a nazony Bryant baka tamy fan̈ampiany antipan̈ahy araiky?

⁵ Akory koa fomba hafa nankahirezany Paoly iro piaramanompo aminany aby io? Nisy fotoan̈a iro roeny Barnabasy nimpody nitsidiky fiangonan̈a ta Lystra, ta Ikonioma, baka io ta Antiokia. Ke iro taminio ‘nanendry antipan̈ahy tamy fiangonan̈a aby io.’ (Asa. 14:21-23) Azo antoko fa nankahery fiangonan̈a tan̈y iro lelahy voatendry aby io, miran̈a aminy antipan̈ahy amiziô fo. Zen̈y iziô raha tsapany Rahalahy Bryant. Ho izy: “Zaho koa fa feno 15 taon̈o, papako niala zahay, avio mamako voaroaka. Zaho nahatsapa narian̈a salakady kivy.” Ino raha nan̈ampy Bryant hiaritry tamy fotoan̈a sarotro be zen̈y? Ho izy: “Misy antipan̈ahy zay, Tony an̈arany; matetiky izy nikoran̈a taminaka, zaho koa fa navy tampivorian̈a na tamy fotoan̈a hafa. Nikoran̈iny taminaka olo sasany niaritry raha sarotro kanefa mbala ravoravo fo. Nivakiany taminaka koa Salamo 27:10. Matetiky koa izy nikoran̈a taminaka momba Hezekia. Tsy nivadiky tamy Jehovah foeky Hezekia, ndray babany tsy modely tsara.” Mba ten̈a nan̈ampy Bryant edy ma raha aby zen̈y? Karaha ty ho izy: “Nifen̈y i Tony nankahery zaho. Izikoa fa nandeha fotoan̈a, zaho nahavita nan̈ano fanompoan̈a manontolo andra, ary izio asa ten̈a mahafapô.” Anaro antipan̈ahy, aleva onon̈o tsao misy olo mila ‘volan̈a mankahery’ miran̈a Bryant io amy fiangonan̈anaro, ke ampia izy.​—Ohab. 12:25.

6. Akory nataony Paoly nankahery iro rahalahiny ndreky ranabaviny aby io? Nan̈ino izy nan̈ano zen̈y?

 ⁶ Nampahatsiarôviny Paoly iro piaramanompo taminany aby io fa misy “vavolombelon̈o maro be mira rôndro” efa nahavita niaritry raha sarotro, fotony Jehovah nan̈amia angôvo iro. (Heb. 12:1) Ino nahavy i Paoly nikoran̈a momba tantaranolo tsy nivadiky ndreky nahavita niaritry raha sarotro aby taloha tan̈y? Hainy fa raha zen̈y han̈amia korazy iro piaramanompo taminany aby io ndreky nan̈ampy iro hifantoko amy ‘tanànany Zan̈ahary velon̈o.’ (Heb. 12:22) Mbala marin̈y fo koa raha zen̈y amy zioty. Azovy amintsika iziô tsy mahatsapa mahazo angôvo izikoa fa mamaky fomba nan̈ampiany Jehovah i Gideona, Baraka, Davida, Samoela ndreky olo maro hafa? (Heb. 11:32-35) Mbala misy modely tsara miran̈a amy zen̈y koa aminy andrantsika zioty. Matetiky, misy piaramanompo amintsika mandefa taratasy amy Foibe mivolan̈a fa ten̈a nankahery iro namaky tantarampiain̈anany panompony Jehovah tsy mivadiky aminy andra iziô.

7. Ino raha ianaranao baka amy torohevitriny Paoly amy Romanina 14:19-21?

⁷ Mankahery iro piaramanompo amintsika aby io atsika izikoa atsika mivolan̈a na man̈ano raha hisiany fihavanan̈a an̈atiny fiangonan̈a. Tsy ambelantsika hampisarasaka atsika hevitry tsy miran̈a. Tsy man̈izingizin̈y hevitrintsika atsika izikoa tsisy fitsipikiny Baiboly voadika. Diniha hely baka ohatra ty. Nisy Jiosy ndreky Griky iro Kristianin̈y tamy fiangonan̈a ta Roma. Efa tsy fady hanin̈y sasany eky iro, fotony iro efa tsy nila nitandrin̈y Lalàn̈any Mosesy. (Mar. 7:19) Nanomboko tamy zen̈y, ravoravo Kristianin̈y jiosy sasany fotony nahazo nihina karazan̈a hanin̈y jiaby. Fa sasany ndraiky tsy karaha zen̈y. Mbala hitandro tsy mety fo mihina iro hanin̈y aby io ke nanjary nizarazara olo tan̈atiny fiangonan̈a tao. Nambarany Paoly mazava tsara fa mila tia fihavanan̈a ndreky mahay mandiniky iro. Ho izy: “Sitrany tsy mihinan̈a hena na migiaka divain na man̈ano raha hafa mety hanafintohin̈y rahalahinao.” (Vakia Romanina 14:19-21.) Ke tiany Paoly hazava tsarabe tamindro piaramanompo taminany aby io fa tsy mahatsara iro tsiaraikiaraiky malomalo karaha zen̈y salakady mampisaratsaraka fiangonan̈a. Vôn̈ono koa izy hilefitry amy raha tiany baka tsy hanafintohin̈y olo. (1 Kor. 9:19-22) Ke izikoa anjarany tsiaraikiaraiky mifidy raha tiany hatao, atsika tsy tokony hiziriziry aminy hevitrintsika. Hahavita hankahery ndreky han̈ano raha hisiany fihavanan̈a fo atsika izikoa man̈ano zen̈y.

8. Akory nataony Paoly izikoa fa nisy problemo maventy nitady handrobaka fihavanan̈a tan̈atiny fiangonan̈a?

⁸ Hainy Paoly nan̈ano raha nisiany fihavanan̈a fo ndray nisy olo tsy nifan̈araka momba raha araiky maventy. Nisy olo sasany tamy fiangonan̈a tamy taonjato voanalohany iziô nivolan̈a fa tsy maintsy vosiran̈a lan̈iany olo tsy Jiosy ke niova Kristianin̈y. Nety nieritreritry iro fa zen̈y mety hahavy iro Jiosy aby io tsy hikritìky iro. (Gal. 6:12) Paoly ten̈a tsy nitovy hevitry tamindro. Fa ndray zen̈y, izy tsy niziriziry taminy hevitrinany foeky fa nanetry ten̈a, ke izy nangataka sosokevitry tamindro apostoly ndreky antipan̈ahy aby ta Jerosalema tan̈y. (Asa. 15:1, 2) Ino vokany? Raha nataony Paoly zen̈y nan̈ampy fiangonan̈a tan̈y hahita haravoan̈a fo salakady hihavan̈a tsara.​—Asa. 15:30, 31.

9. Akory mety han̈arehantsika modeliny Paoly?

⁹ Izikoa fa misy raha maventy tsy ifan̈arahan̈a, man̈ano raha hisiany fihavanan̈a atsika izikoa mangataka taridalan̈a aminy antipan̈ahy, fotony iro nirahiny Jehovah hikarakara fiangonan̈a. Matetiky atsika mahita toro lalan̈a baka amy Baiboly amy boky ndreky gazetintsika  na amy taridalan̈a amezany fandaminan̈a. Ke man̈ano raha hisiany fihavanan̈a an̈ivony fiangonan̈a atsika, izikoa man̈araka tsara taridalan̈a aby zen̈y fa tsy miziriziry aminy hevitrintsika.

10. Ino koa raha nataony Paoly baka hihavan̈a tsara olo amy fiangonan̈a?

¹⁰ Paoly nikoran̈a toetry tsarandro rahalahiny ndreky ranabaviny aby io fo fa tsy toetry ratsindro, ke raha zen̈y ten̈a nampisy fihavanan̈a. Ohatra iziô, tamy taratasy faramparany nalefany tamindro Kristianin̈y ta Roma, izy nanon̈ono an̈aran̈anolo marobe, ary nikoran̈iny niaraka tamizio tao koa raha tsara nataony ankamaraozandro. Mangala tahaka Paoly atsika izikoa tsy mihafahafa mikoran̈a toetry tsarany piaramanompo. Atsika koa man̈ano zen̈y, hanjary pinaman̈a tsarabe iro rahalahy ndreky ranabavy aby io salakady hahaihifankatia fo fiangonan̈a.

11. Ino raha mety ataontsika baka atsika hihavan̈a ndraiky koa fa misy raha tsy mampifankahazo?

¹¹ Ndraikindraiky, ndray Kristianin̈y matotro mbala mety hisy raha tsy hampifankahazo iro fo. Karaha zen̈y Paoly ndreky Barnabasy. Pinaman̈a be iro io, kanefa nisy fotoan̈a iro tsy nitovy hevitry foeky. Barnabasy tihitondra Marka amy dia misionera ataondro man̈araka, fa Paoly tsy nan̈eky. ‘Ambavako ambavanao iro roe sady neloko mare’, ke iro samby nan̈ano diandro. (Asa. 15:37-39) Fa ndray zen̈y, na Paoly na Barnabasy na Marka, samby nan̈ano raha himpodianany fihavanan̈andro ndraiky. Hita baka amy zen̈y fa ten̈a raha maventy tamindro marin̈y fihavanan̈a ndreky firaisantsain̈y an̈ivony fiangonan̈a. Nikoran̈a raha tsara momba Barnabasy ndreky Marka i Paoly tafara tatỳ. (1 Kor. 9:6; Kol. 4:10) Atsika koa tokony ho tapakevitry handamin̈y tsy fifankazahoan̈a misy amintsika samby atsika, ke hifantoko amy toetry tsarany naman̈a, amy zen̈y atsika hihavan̈a ndreky hiray sain̈y fo.​—Efes. 4:3.

12. Ino aby sasany amy problemo iaretany rahalahy ndreky ranabavy?

¹² Mankahery iro piaramanompo amintsika aby io atsika izikoa mankafatatra fatokisandro Jehovah. Misy amindro io kotran̈iny lafamìndro na olo miaraka miasa amindro na tsaiky lekoly araiky amindro. Sasany ndraiky marary fatatra na man̈ameloten̈a mare, ke miady mare amy zen̈y. Misy koa Kristianin̈y efa vita batisa efa taon̈o maro fa mbala miambin̈y fotoan̈a hifaran̈any donia ty fo. Raha jiaby zen̈y mety hitsapa finoan̈any Kristianin̈y aminy andra zioty. Tsisy nihafa amy zen̈y problemo natrefindro Kristianin̈y tamy taonjato voanalohany tan̈y. Ino raha nataony Paoly hankafataran̈a finoan̈andro?

13. Akory nan̈ampiany Paoly piaramanompo kotran̈inolo baka amy raha inoany?

¹³ Nampiasa Soratra Masin̈y i Paoly koa fa nankafatatra finoan̈any piaramanompo taminany. Mety tsy haindro Kristianin̈y jiosy aby io iziô raha hivolan̈indro, havandro koa fa nivolan̈a fa fivavahan̈a jiosy an̈abon̈abo tozay fivavahan̈a kristianin̈y. Hay be fa nankahery iro tsarabe taratasy nalefany Paoly handeha tamy Kristianin̈y hebreo. (Heb. 1:5, 6; 2:2, 3; 9:24, 25) Nazava tsarabe fomba nan̈azavany Paoly raha zen̈y, ke haindro Kristianin̈y aby io tsara raha tôkotro hivolan̈indro taminy havandro nan̈araka fivavahan̈a jiosy aby io. Amy zioty koa, maro piaramanompo amintsika hadroedroenolo. Akory mety han̈ampiantsika iro? Ambarantsika iro fan̈azavan̈a baka amy boky ndreky gazetintsika aby io, amy zen̈y iro hahavita hiaro finoan̈andro. Akory ndraiky han̈ampiantsika iro tanorantsika aby io, izikoa iro ankadalainolo fotony mino famoron̈ana? Mety ampiantsika iro hahita fan̈azavan̈a amy bokikely Nisy Namorona ve Izao Rehetra Izao? ndreky Ahoana no Nampisy Antsika? Fanontaniana Dimy Mila Dinihina.

14. Ino koa raha nataony Paoly, ndray izy efa be atao taminy asa fitorian̈a ndreky fampianaran̈a?

 ¹⁴ Paoly nandrisiky iro rahalahiny ndreky ranabaviny aby io han̈amboaka fitiavan̈a baka aminy “asa tsara.” (Heb. 10:24) Izy koa fa nan̈ampy iro, tsy tamy vava fo fa tamy raha nataony koa. Ohatra, izikoa fa nisy mosary ta Jodia tan̈y, Paoly mba nitondra raha hely tamindro. (Asa. 11:27-30) Ankamaraozany fotoan̈any Paoly lany taminy asa fitorian̈a ndreky fampianaran̈a. Ndray zen̈y, izy mbala nitady fomba fo nan̈ampiany piaramanompo sahiran̈a. (Gal. 2:10) Fan̈anaovany zen̈y nahavy iro piaramanompo taminazy aby io natoky tsarabe fa Jehovah hikarakara iro fo. Amy zioty koa, atsika vôn̈ono hafoe fotoan̈antsika, angôvontsika ndreky fahaizan̈antsika han̈ampian̈a iro namantsika tatrany antambo, amy zen̈y finoan̈andro ho fatatra fo. Man̈ampy piaramanompo koa atsika izikoa fa man̈ano fan̈amezan̈a hanohan̈ana asa erantany. Fan̈anaovantsika raha aby zen̈y ndreky raha hafa koa mahavy piaramanompo amintsika hatoky fa Jehovah tsy mety hiala iro.

15-16. Izikoa misy piaramanompo nanjary nalemy finoan̈a, akory mety han̈ampiantsika izy?

¹⁵ Paoly tsy kivy nan̈ampy Kristianin̈y nalemy finoan̈a. Akory nataony? Naboakany iro tsara fa izy nahinakinaka iro, avio izy tsara fan̈ahy sady nampiasa volan̈a nankahery. (Heb. 6:9; 10:39) Tamy taratasy nalefany tamindro Hebreo aby io iziô, matetiky izy nampiasa volan̈a “atsika.” Hita baka amy zen̈y fa ndray izy koa mba nila nan̈araka torohevitry nambarany io. (Heb. 2:1, 3) Man̈ano karaha Paoly atsika izikoa tsy rivan̈a man̈ampy iro piaramanompo amintsika nanjary nalemy finoan̈a aby io. Mankahery iro atsika izikoa aboakantsika amindro fa atsika miasaloha amindro. Aleva onon̈o fa tsy raha volan̈intsika fo mety hankahery iro, fa mila ren̈indro amy feontsika fa atsika tsara fan̈ahy amindro sady mitady raha mahatsara  iro. Izikoa atsika man̈ano raha aby zen̈y, ho tsapandro fa atsika tia iro ankitiny.

¹⁶ Namezany Paoly toky iro piaramanompo aminany aby io fa Jehovah tsy han̈adin̈a asa tsara vitandro. (Heb. 10:32-34) Mety man̈ano karaha zen̈y koa atsika lera man̈ampy piaramanompo nanjary nalemy finoan̈a. Anao mety man̈ontany izy fomba nahitany fahamarin̈ana. Na ampia izy hangala onon̈o fomba isankarazany efa nan̈ampiany Jehovah izy. Araraota koa fotoan̈a zen̈y han̈amezan̈a toky izy fa izy efa nan̈aboaka fitiavany Jehovah, ary Jehovah tsy mety han̈adin̈a zen̈y. Jehovah koa tsy hiala izy aminy afara an̈y. (Heb. 6:10; 13:5, 6) Koran̈a karaha zen̈y mety handrisiky iro piaramanompo tsy foentsika aby io han̈iry ndraiky hanompo Jehovah.

17. Ino fahaizan̈a mila ankatsaraintsika fo?

¹⁷ Mahaimahay fo piasa tran̈o arakarakany an̈anaovany asa io. Karaha zen̈y koa, atsika koa tsy vôly mifankahery, hanjary hahay han̈ampy olo fo atsika. Afaka man̈ampy olo hahazo angôvo hiaretan̈a fitsapan̈a atsika izikoa mikoran̈a amindro tantaranolo tsy nivadiky taloha tan̈y, ndray iro niaritry raha mafy. Man̈ano raha hisiany fihavanan̈a atsika izikoa mikoran̈a raha tsara momba olo hafa. Izikoa misy raha tsy hifan̈arahan̈a, alamin̈intsika malaky baka fihavanan̈a tsy ho robaka. Izikoa san̈atria robaka fihavan̈ana, miezaka fo atsika han̈ampody izio. Man̈ano raha mankafatatra finoan̈any rahalahy ndreky ranabavintsika koa atsika izikoa: Zaraintsika amindro hevitry mankahery hitantsika tamy Baiboly, man̈ampy iro lera iro sahiran̈a, avio man̈ampy lan̈iany nanjary nalemy finoan̈a.

18. Tapakevitry han̈ano ino anao?

¹⁸ Ravoravo ndreky afapô iro miasa amy tetikasa fan̈oren̈ana aby io. Ho ravoravo ndreky ho afapô miran̈a zen̈y koa atsika izikoa man̈ampy iro rahalahy ndreky ranabavintsika aby io hanan̈a finoana matanjaka. Ndray izy man̈ano zen̈y, ela ny ela tran̈o mahay robaka. Fa vokatrany fan̈oren̈ana arapan̈ahy ataontsika ndraiky haharitry mandrakizay. Ke irarian̈a atsika ho tapakevitry fo “hifankahery ndreky hifan̈ampy.”​—1 Tes. 5:11.