LAHATSORATRA FIANARAN̈A 33
Jehovah Mikarakara Sady Miaro Panomponany
“Masony Jehovah mitsinjo zay olo mavozo izy.”—SAL. 33:18.
HIRA 4 “Jehovah no Mpiandry Ahy”
HO HITA ATO *
1. Nan̈ino ma Jesosy niangavy Jehovah hiaro pan̈aradia izy aby io?
TAMINY alin̈y talohany nifatesany Jesosy, nisy raha somary hafa hely nangatahiny tamy Babany. Niangavy Jehovah izy hiaro pan̈aradia izy aby io. (Jaona 17:15, 20) Marin̈y ndraiky fa, Jehovah efa mikarakara ndreky miaro panomponany fo. Kanefa, hainy Jesosy fa Satana tsy maintsy hanohitry pan̈aradia izy. Ndray ino ndray ino raha ataony Devoly hamangoan̈a iro pan̈aradia izy aby io, natoky Jesosy fa ho vitandro fo hiaritry zen̈y izikoa Jehovah man̈ampy iro.
2. Izikoa Salamo 33:18-20 zahan̈a, nan̈ino ma atsika tsy tokony havozo izikoa fa misy raha sarotro mandalo?
2 Satana manjaka amy donia ty, ke maro raha sarotro tsy maintsy hiaretany Kristianin̈y amy zioty. Atsika mety ho kivy, ary raha sarotro aby zen̈y mety hitsapa tsy fivadihan̈antsika amy Jehovah. Eraka raha handeha hidinihintsika ato, tsisy raha tokony hampavozo atsika fotony Jehovah miaro atsika. Hitany raha sarotro diavintsika, ary izy vôn̈ono han̈ampy atsika. Atsika iziô hizaha tantara aroe amy Baiboly ao ahitantsika fa Jehovah ten̈a “mitsinjo zay olo mavozo izy.”—Vakia Salamo 33:18-20.
LERA ATSIKA MAHATSIARO LATSATOKAN̈A
3. Lera karakory aby ma atsika mety hahatsiaro latsatokan̈a?
3 Manan̈a rahalahy ndreky ranabavy maro atsika an̈ivony fiangonan̈a, fa ndray zen̈y mety hahatsiaro latsatokan̈a fo atsika. Mety ho zen̈y iziô raha tsapany tanora araiky, lera izy man̈azava raha inoany aminolo lekaoly araiky aminany, na lera izy mifindra fiangonan̈a. Mety halahelo na ho kivy koa sasany amintsika. Mety hisalasala atsika hikoran̈a aminolo raha tsapantsika, fotony atsika mavozo tsao tsy ho azondro raha mahazo atsika. Misy fotoan̈a, atsika mety ho lôso diniky foeky izikoa ten̈a misy olo mijery atsika. Samby isany antony mahavy atsika mahatsiaro latsatokan̈a fa raha itovizany fo, atsika jiaby samby mety hahatsiaro tsisy angôvo ndreky miasaloha mare. Tsy tiany Jehovah hahatsapa raha karaha zen̈y atsika. Nan̈ino ma atsika mivolan̈a zen̈y?
4. Nan̈ino ma paminan̈y Elia nivolan̈a: “Zaho zaraiky fo tavela”?
4 Diniha baka tantarany Elia, lelahy tsy nivadiky. Tsy maintsy nilefa izy sady nan̈ano dia vity mandilatra 40 andra, fotony Jezebela tihamono izy. (1 Mpanj. 19:1-9) Farany, izy nisitriky tan̈atiny lavabato. Izy zaraiky fo tao. Nitomoan̈y izy sady nivolan̈a karaha ty tamy Jehovah: “Zaho zaraiky fo [paminan̈y] tavela.” (1 Mpanj. 19:10) Mbala nisy paminan̈y hafa tamy tany nisy iro. Mandeha 100 aby paminan̈y nasitrikiny Obadia, amy zen̈y iro tsy ho hitany Jezebela ke hivoneny. (1 Mpanj. 18:7, 13) Ke nan̈ino fo basy i Elia nahatsiaro latsatokan̈a? Mety tsy hainy donko fa nisy paminan̈y nasitrikiny Obadia. Mety nieritreritry koa donko izy fa tsisy olo foeky nan̈araka izy nanompo Jehovah, tafaranizy namono paminan̈iny Bala tamy Bongo Karmela in̈y. Mety nihevitry koa donko izy fa tsy hainolo foeky raha mahazo izy, na koa tsisy olo foeky mijery izy. Baiboly tsy man̈azava antony nahavy i Elia nahatsapa zen̈y. Ndray zen̈y, azontsika antoko fa hainy Jehovah antony nahavy Elia nahatsiaro latsatokan̈a avio hainy Jehovah koa fomba ten̈a mety han̈ampian̈a izy.
Lera atsika mahatsiaro latsatokan̈a, nan̈ino hankahery atsika mandiniky fomba nan̈ampiany Jehovah i Elia? (Zahava fehintsoratra 5-6)
5. Akory nan̈amezany Jehovah toky i Elia fa izy tsy latsatokan̈a?
5 Jehovah nan̈ampy Elia tamy fomba isankarazany. Elia koa fa kivy, nampirisihiny Jehovah izy hikoran̈a raha tsapany. Indroe aby Jehovah nan̈ontany izy karaha ty: ‘Ino ma raha ataonao atỳ?’ (1 Mpanj. 19:9, 13) Nitandrin̈esany Jehovah tsarabe Elia izikoa fa nikoran̈a raha tan̈atiny fônany. Jehovah koa fa namaly koran̈any Elia, nataony tsapany Elia fo fa Izy tankilanany tiô, avio Izy farany mahery. Namezany toky koa i Elia fa mbala maro Israelita nanompo izy. (1 Mpanj. 19:11, 12, 18) Ino raha tsapany Elia, izy koa fa baka nikoran̈a raha tan̈atiny fônany? Ino raha tsapany izy koa fa naharen̈y raha nambarany Jehovah? Hay be fa ten̈a nahatsiaro nahivankivan̈a izy. Nan̈ankin̈any Jehovah andraikitry maro maventy koa izy. Nirahiny Jehovah izy hanendry i Hazaela hanjary panjakany Syria, baka io Jeho hanjary panjaka tan Israely, avio Elisa hanjary paminan̈y. (1 Mpanj. 19:15, 16) Fanendren̈a nazony aby io nan̈ampy izy hifantoko amy raha tsara. Namezany Zan̈ahary naman̈a koa izy hiaraka hanompo aminany, tsy azovy zen̈y fa i Elisa. Anao ke, akory han̈ampiany Jehovah anao lera anao mahatsiaro latsatokan̈a?
6. Lera anao mahatsiaro latsatokan̈a, ino aby raha mety hangatahanao koa fa mivavaka? (Salamo 62:8)
6 Jehovah mikaiky anao hivavaka aminany. Hitany raha manahiran̈a anao, ke anao koa fa mivavaka aminany, na kelera na kelera, man̈amia toky anao izy fa hitandrin̈esany vavakanao. (1 Tes. 5:17) Ravoravo Jehovah mitandren̈y vavakany panomponany. (Ohab. 15:8) Ino raha mety hangatahanao amy vavaka, lera anao mahatsiaro latsatokan̈a? Karaha nataony Elia in̈y, koràn̈a amy Jehovah zay raha tsapanao. (Vakia Salamo 62:8.) Koràn̈a aminany raha mampiasaloha anao, ndreky vokatranizen̈y aminao. Angataha Jehovah han̈ampy anao hahay raha tokony hatao lera anao malahelo. Izikoa ohatra anao mavozo mitory aminolo lekaoly araiky aminao, iangavia Jehovah han̈amia anao korazy baka anao hasaky hivolan̈a. Anao mety mangataka fahendrena aminany foeky, baka anao ho kalma fo lera anao man̈azava raha inoanao amindro. (Lioka 21:14, 15) Izikoa ndraiky anao kivy, mivavaha baka Jehovah han̈ampy anao hikoran̈a raha tsapanao amy Kristianin̈y araiky matotro. Anao koa mety mivavaka baka Jehovah han̈ampy olo hitantaranao raha mahazo anao io, amy zen̈y ho takany tsarabe fihetsehampônao. Koràn̈a amy Jehovah raha an̈atiny fônao, ke zahava akory hataony mamaly vavakanao, baka io ikia fan̈ampian̈a amezanolo anao; tsy hahatsiaro latsatokan̈a eky anao izikoa man̈ano zen̈y.
Asa anao mba mitady hevitry hampitombosan̈a fanompoan̈anao ndreky hiarahan̈a manompo aminolo isankarazany? (Zahava fehintsoratra 7)
7. Ino raha ianaranao baka amy tantarany Mauricio?
7 Atsika jiaby io samby namezany Jehovah asa ten̈a maventy, na an̈ivony fiangonan̈a zen̈y na amy fanompoan̈a. Ke matokisa anao fa hitany sady ankasitrahiny raha jiaby ataonao. (Sal. 110:3) Ary izikoa anao mifen̈y fo man̈atanteraka asa io, anao tsy hahatsiaro latsatokan̈a loatra. Diniha baka tantarany rahalahy tanora araiky, Mauricio an̈arany. * Tsy ela tafarany batisany Mauricio, nisy araiky tamy kamaradiny marikitry niala tsihelihely tamy fahamarin̈ana. Karaha ty ho Mauricio momba zen̈y: “Ten̈a nisy vokany taminaka nahita izy niala fahamarin̈ana, fotony nanjary tsy natoky ten̈a zaho. Ho zaho tamy jeriko tan̈y, ‘Raha mba ho vitako edy hitana voady nataoko tamy Jehovah ke hanompo izy, avio ho an̈isany fianakavian̈any Jehovah fo?’ Nahatsiaro latsatokan̈a mare zaho sady nieritreritry fa tsy mazava aminolo foeky fihetsehampônaka.” Ino raha nan̈ampy i Mauricio? Ho izy: “Niezaka zaho nampitombo fanompoan̈anaka, ke zen̈y nan̈ampy zaho tsy hifantoko be loatra aminy ain̈inaka ndreky fihetsehampônaka. Zaho koa fa niaraka nanompo tamy naman̈a, zaho nanjary ravoravo sady tsy dia latsatokan̈a eky.” Mety tsy ho afaka hitory mivantan̈a miaraka amy piaramanompo atsika; ndray zen̈y, mbala afaka man̈ano zen̈y fo atsika lera man̈ano fitorian̈a amy taratasy na amy telefaony. Ino koa raha hafa nan̈ampy i Mauricio? Karaha ty koa ho izy: “Niezaka fo zaho ho maro raha atao an̈ivony fiangonan̈a. Noman̈iko tsara koa anjaranaka ampivorian̈a. Anjara aby io nahavy zaho hahatsapa fa misy valera amy Jehovah ndreky aminolo hafa zaho.”
LERA ATSIKA KIVY NOHONY FITSAPAN̈A MAHAZO ATSIKA
8. Izikoa atsika miatriky fitsapan̈a, ino mety ho vokatranizen̈y amintsika?
8 Miain̈y aminy andra farany atsika, ke efa ampoizintsika fa hiatriky raha sarotro atsika. (2 Tim. 3:1) Fa ndraikindraiky, mety ho tampoko amintsika raha sasany mety hisedra atsika. Ohatra iziô, tampoko iô mety tsisy vola atsika, na mety hisy dokotera hivolan̈a amintsika fa marary mare atsika, na mety hisy olo ten̈a tiantsika maty. Izikoa fa mandalo raha aby zen̈y, mety ho kivy atsika ke ndray raha sambôrin̈y tsy hay, intsaka eky izikoa fitsapan̈a mahazo atsika io misesisesy na avy indraiky mipàka. Ndray izy man̈ano zen̈y, tsaraova fa hitany Jehovah raha mahazo atsika. Na ino na ino fitsapan̈a mahazo atsika, ho vitantsika fo hiatriky izio fotony Jehovah man̈ampy atsika.
9. Tantarà ino fitsapan̈a sasany nahazo i Joba.
9 Miniminia baka fomba nan̈ampiany Jehovah i Joba, lelahy tsy mivadiky. Maro fitsapan̈a nahazo izy, tan̈atiny fotoan̈a fôhiky fo. Tan̈atiny andra araiky fo, ren̈iny Joba fa biby nitarimiany jiaby nangalarinolo na nivonenolo, baka io naty piasanany ndreky firaka amy zanakanany. (Joba 1:13-19) Tsy ela tafaranizen̈y, izy mbala tan̈atiny alahelo mare in̈y, izy nazony aretin̈y nampijaly sady nampanehotehoko mare. (Joba 2:7) Nafy ankitin̈y raha nahazo i Joba, ke izy efa tihofoaty foeky. Karaha ty ho izy: “Halako foeky fiain̈ananaka. Sitrany zaho maty. Ialànaro zaho, fotony andranaka mielan̈a mira fofonain̈y.”—Joba 7:16.
Jehovah nivolan̈a tamy Joba fa Izy mikarakara raha ilainy Zavaboarinany. Man̈amia toky i Joba raha zen̈y fa tia sady hikarakara izy koa i Jehovah. (Zahava fehintsoratra 10)
10. Akory nataony Jehovah nan̈ampy Joba taminizy niaritry fitsapan̈a? (Zahava sary amy fon̈ony gazety ty.)
10 Hitany Jehovah raha nahazo i Joba. Tiany Jehovah i Joba, ke namezany izy raha nilainy baka izy hahavita hiaritry ndreky tsy hivadiky. Jehovah koa fa nikoran̈a tamy Joba, nampatsiarôviny izy fa tsisy farany Fahendrenanany, avio Izy ten̈a mikarakara zavaboarinany. Jehovah nikoran̈a momba biby maro maventy sady mahalany fan̈ahy. (Joba 38:1, 2; 39:9, 13, 19, 27; 40:15; 41:1, 2) Nampiasa Eliho, tanora araiky tsy nivadiky, koa i Jehovah hankahery ndreky han̈amia korazy i Joba. Eliho nan̈amia toky izy fa Jehovah tsy maintsy han̈amia hatsaran̈a Panomponany nohony iro niaritry. Ndray zen̈y, nampiasa i Eliho koa i Jehovah han̈anatra i Joba tampitiavan̈a. Eliho nan̈ampy izy hifantoko amy raha ten̈a maventy; nampatsiarôviny izy fa tsisy dikany foeky atsika izikoa ampiran̈iny amy Jehovah, Pamôron̈o raha jiaby. (Joba 37:14) Tsy zen̈y fo. Misy raha koa nirahiny Jehovah hataony Joba. Izy nan̈iraka Joba hivavaka nindro namany telo lahy nanota aby in̈y. (Joba 42:8-10) Akory koa han̈ampiany Jehovah atsika aminy andra zioty, lera atsika miatriky raha sarotro?
11. Akory han̈ampiany Baiboly atsika lera atsika miatriky raha sarotro?
11 Amy zioty, Jehovah efa tsy mikoran̈a amintsika mivantan̈a, karaha nataony tamy Joba in̈y. Mampiasa Baiboly izy hikoran̈ana amintsika. (Rom. 15:4) Mankahery atsika izy, ke ataony raha hahavy atsika han̈anten̈a raha tsara aminy hoavy. Diniha hely baka hevitry vitsivitsy baka amy Baiboly aby ty, fotony iro io ten̈a hankahery atsika lera atsika miaritry raha sarotro. Amy Soratra Masin̈y ao, Jehovah man̈amia toky atsika fa tsisy olo na raha “hahavita hampisaraka atsika amy fitiavan̈any Zan̈ahary.” (Rom. 8:38, 39) Man̈amia toky atsika koa izy fa izy “tsy lavitry zay olo mikaiky izy” amy vavaka. (Sal. 145:18) Mampan̈anten̈a Jehovah fa ho vitantsika hiatriky fitsapan̈a sady ho ravoravo, ndray mbala iô raha mampijaly atsika izikoa atsika mitavandra izy. (1 Kor. 10:13; Jak. 1:2, 12) Mampatsiaro atsika koa Volan̈a Zan̈ahary fa fitsapan̈a mahazo atsika io mielan̈a fo izikoa ampitovisin̈y aminy hatsaran̈a mandrakizay hamezany Jehovah atsika. (2 Kor. 4:16-18) Amezany Jehovah fan̈antinan̈a azo antoko koa atsika, fotony izy han̈adoso fôtotrony problemo, tsy avozy zen̈y fa Satana Devoly ndreky iro olo ratsy fan̈ahy karaha izy. (Sal. 37:10) Ke asa anao mba mahazo onon̈o andininteny mampahery mety han̈ampy anao hiatriky fitsapan̈a mbala ho avy?
12. Izikoa anao tihahita hatsaran̈a baka amy Volan̈a Zan̈ahary, ino raha antin̈ainy Jehovah fa ho ataonao?
12 Man̈anten̈a i Jehovah fa hanokan̈a fotoan̈a atsika hianaran̈a Baiboly tsy tapaka, avio hisaintsain̈y raha nivakiantsika tao. Izikoa arehantsika raha ianarantsika, hahaiho fatatra fo finoan̈antsika, avio hahaiharikitry Babantsika andan̈itry an̈y koa atsika. Hahazo angôvo hiaretan̈a fitsapan̈a atsika, izikoa fa man̈ano zen̈y. Amezany Jehovah fan̈ahy masin̈inany koa lan̈iany olo mitady taridalan̈a amy Volan̈anany ao. Fan̈ahy masin̈y io man̈amia atsika ‘angôvo bebeny anan̈anolombelon̈o’, indesintsika hiatriky zay fitsapan̈a mandalo.—2 Kor. 4:7-10.
13. Ino ma raha man̈ampy atsika hiaritry fitsapan̈a? Amy fomba akory?
13 Nohony fan̈ampiany Jehovah, “panompo atokisan̈a ndreky mahadiniky raha” man̈aboaka lahatsoratra, video, avio hira maro natao han̈ampian̈a atsika hanan̈a finoan̈a matanjaka ndreky hifoha amy lafiny arapan̈ahy. (Mat. 24:45) Mila haintsika man̈araraotro raha jiaby amezany Jehovah amy fotoan̈a mety aby io. Vo tsy ela, nisy ranabavy baka Etazonỳ nivolan̈a fankasitrahany hanin̈y arapan̈ahy aby io. Karaha ty ho izy: “Tan̈atiny 40 taon̈o nanompoako Jehovah, maro raha nitsapa tsy fivadihan̈anaka.” Ino aby an̈isany raha sarotro nidiaviny? Naty nikôn̈ony tomôbily dadilahiny. Namo sofera nitondra tomôbily io. Narary fatatra koa ery olobeny, baka io naty foeky tamy farany. Indroe avoany kansera koa izy. Ino raha nan̈ampy izy hiaritry? Karaha ty nazavainy: “Jehovah nikarakara zaho fo. Nan̈ampy zaho hiaritry iro hanin̈y arapan̈ahy namezany Jehovah baka amy panompo atokisan̈a ndreky mahadiniky raha. Mitovy amy raha tsapany Joba raha tsapako. Izy nivolan̈a: ‘Zaho tsy han̈eky hivadiky nata zaho afaka fahin̈ana.’ ”—Joba 27:5.
Akory mety han̈ampiantsika olo an̈ivony fiangonan̈a? (Zahava fehintsoratra 14)
14. Akory ataony Jehovah mampiasa piaramanompo amintsika, han̈ampian̈a atsika hiatriky fitsapan̈a? (1 Tesalonianina 4:9)
14 Jehovah efa nampiofan̈a vahoakanany baka iro hahavita han̈aboaka fitiavan̈a ndreky hankahery olo an̈atiny sarotro. (2 Kor. 1:3, 4; vakia 1 Tesalonianina 4:9.) Mangala tahaka Eliho iro rahalahy ndreky ranabavintsika aby io, fotony tsy mijijy tamban̈a foeky iro man̈ampy atsika tsy hivadiky, lera atsika mandalo raha sarotro. (Asa. 14:22) Karaha zen̈y tsara nataonolo fiangonan̈a araiky tamy Diane. Izikoa fa narary fatatra vadiny Diane, iro piaramanompo aminany aby io nankahery izy sady nan̈ampy izy ho fatatra arapan̈ahy. Karaha ty nambarany: “Ten̈a tsy nora taminaka raha zen̈y. Kanefa, tsapako fa Jehovah ten̈a tia zaho ary hitako koa tan̈ananany nan̈ampy zaho tan̈atiny fanjava maromaro ten̈a sarotro in̈y. Ten̈a nan̈ampy zahay fiangonan̈a misy zahay. Namangy zahay iro, nikaiky, avio nitolon̈o zahay, ke nan̈ampy zahay hiaritry raha aby zen̈y. Nalaindro ranadahy ndreky rahavavy aby io fo zaho, isaka handeha hivory. Mbala nalaindro fo koa zaho isaka zaho afaka manompo, fotony zaho tsisy tomôbily.” Ten̈a ravoravo atsika manan̈a rahalahy ndreky ranabavy be fitiavan̈a karaha zen̈y, an̈ivony fiangonan̈a misy atsika!
MIKARAKARA ANAO AMPITIAVAN̈A JEHOVAH KE ANKASITRAHA IZY
15. Ino mahavy atsika matoky fa ho vitantsika fo hiatriky fitsapan̈a?
15 Atsika jiaby io samby mbala hiatriky fitsapan̈a aby. Fa eraka raha efa hitantsika tiô, atsika tsy miady manokan̈a. Karaha ataony baba araiky be fitiavan̈a, Jehovah han̈amia raha ilaintsika fo. Izy tsy lavitry atsika, ary atsika koa fa mivavaka ke mangataka fan̈ampian̈a aminany, izy vôn̈ono hitandren̈y atsika ndreky han̈ampy atsika. (Isaia 43:2) Matoky atsika fa ho vitantsika fo hiatriky raha sarotro mahazo atsika fotony amezany atsika aby zay raha ilaintsika, ke ho vitantsika fo hiaritry. An̈isanizen̈y vavaka, Baiboly, hanin̈y arapan̈ahy maro be, avio rahalahy ndreky ranabavy be fitiavan̈a man̈ampy atsika lera atsika sahiran̈a.
16. Ino aby raha mila ataontsika izikoa tiantsika hikarakara atsika fo Jehovah?
16 Ten̈a mankasitraka Babantsika andan̈itry an̈y atsika, fotony izy ten̈a mikarakara atsika! “Ravoravo fôntsika izikoa fa mandiniky raha ataony.” (Sal. 33:21) Akory an̈aboahantsika fa mankasitraka izy atsika? Mila haintsika man̈araraotro raha jiaby ataony han̈ampian̈a atsika. Mila ataontsika koa raha hahavy Jehovah hikarakara atsika fo. Karakory ma zen̈y? Mila mifen̈y atsika man̈ano zay vitantsika han̈arehan̈a volan̈a Jehovah ndreky man̈ano ny marin̈y man̈oloan̈a izy. Izikoa atsika man̈ano zen̈y, hikarakara atsika mandrakizay izy!—1 Pet. 3:12.
HIRA 30 Jehovah no Raiko sy Namako
^ Maro raha sarotro diavintsika amy zioty, ke ten̈a mila fan̈ampiany Jehovah atsika vo hahavita hiatriky zen̈y. Lahatsoratra ty han̈amia toky atsika fa Jehovah mikarakara panomponany. Hainy aby raha sarotro mahazo atsika tsiaraikiaraiky, avio amezany atsika koa raha ilaintsika baka atsika hahavita hiatriky zen̈y.
^ Nivoan̈a an̈aran̈a sasany.