1. Ino fitsapan̈a nahazo Josefa, baka io akory nataony?

 MARESAKA fitsapan̈a nahazo Josefa zanakany Jakoba. Nisy man̈angy zay nivolan̈a taminany: ‘Mavia hoandry aminaka.’ Tsy azovy man̈angy io fa vadiny Potifara, sefony Josefa. Fa Josefa tsy nan̈eky. Amy zioty, misy olo mety hieritreritry nan̈ino ma Josefa tsy nan̈eky? Potifara tsy tiô. Sady Josefa lastiô andevondro. Mety nampiadan̈iny man̈angy io izy izikoa izy nan̈eky hiaraka taminany. Maty koa mandry fa, Josefa tsy nan̈eky foeky! Asa nan̈ino? Ho izy: “Hataoko akory han̈ano raha ratsy be zen̈y, ke hanota amy Zan̈ahary?”​—Gen. 39:7-12.

2. Akory nahaizany Josefa fa fijangajangan̈a zen̈y fahotan̈a maventy amy Jehovah?

² Akory ma nahaizany Josefa fa fijangajangan̈a zen̈y raha ‘ratsy mare’ amy Zan̈aharinany? Ny raha misy baka efa 200 taon̈o tafara, iro Israelita aby io vo nahazo Lalàn̈any Mosesy, nivolan̈a karaha ty: “Aza mandiadia vady.” (Eks. 20:14) Ndray zen̈y, hainy Josefa loatra i Jehovah ke tsy sarotro taminany nahay fa fijangajanga zen̈y raha ten̈a halany Jehovah. Ohatra iziô, mety efa hainy Josefa fa Jehovah koa fa namôron̈o vadian̈a, Izy nampitambatra lelahy araiky ndreky man̈angy araiky. Mety efa ren̈iny koa fomba niarovany Jehovah voninahitriny Saraha, taminizy tseky ningainy Farao kanefa izy efa vadiny Abrahama. Azony onon̈o koa fomba niarovany Jehovah i Rebeka, vadiny Isaka. (Gen. 2:24; 12:14-20; 20:2-7; 26:6-11) Nisaintsain̈y momba zen̈y i Josefa, ke hainy ino raha hiveriny Jehovah fa tsara ndreky ratsy. Tapakevitry han̈aja fitsipikiny Jehovah momba fitondranten̈a i Josefa, fotony izy tia Jehovah ndreky Fitsipikinany.

3. Ino aby raha hidinihintsika ato?

³ Asa anao mba tia fahamarin̈ana? Azo antoko fa anao tia! Fa izy fo, atsika jiaby io samby tsy lavorary, ke izikoa atsika tsy  mitandrin̈y, mety handrobaka toetsain̈intsika fomba fihevitriny donia ty momba raha zen̈y. (Isaia 5:20; Rom. 12:2) Ino marin̈y ma fahamarin̈ana zen̈y, baka io ino hatsaran̈a ho azontsika izikoa atsika tia izio? Zen̈y raha hidinihintsika iziô, avio atsika hizaha dingana telo han̈ampy atsika ho tia fitsipikiny Jehovah mare.

4. Karakory olo hiveriny Jehovah fa marin̈y?

⁴ Pitondra fivavahan̈a taminy andrany Jesosy nihevitry iro ho olo marin̈y. Kanefa, Jesosy lastiô nan̈amia tsin̈y iro, fotony iro tia mitsaratsara olo, avio iro tômpiny fo namôron̈o fitsipiky tiandro momba ny tsara ndreky ratsy. (Mpito. 7:16; Lioka 16:15) Misy olo sasany koa aminy andra iziô man̈ano karaha nataondro zen̈y. Iro mivolan̈a fa mety aby raha ataondro, kanefa raha hiverindro fa mety fo ataondro. Matetiky iro man̈ambony ten̈a, tia mitsaratsara olo, na miheviten̈a ho tsara mandilatra olo hafa. Kanefa halany Jehovah toetry aby io, ke tsy honohono man̈ano ny marin̈y foeky olo man̈ano karaha zen̈y.

5. Izikoa Baiboly zahavan̈a, ino ma dikany fahamarin̈ana zen̈y? Man̈ameza ohatra.

⁵ Fahamarin̈ana io ten̈a toetry tsara. Izikoa atao volan̈a tsotra, dikany fahamarin̈ana io man̈ano ny marin̈y amasony Jehovah Zan̈ahary. Amy Baiboly ao, dikany “fahamarin̈ana” zen̈y man̈araka fitsipikiny Jehovah, ary fitsipikinany ny ten̈a an̈abo. Jehovah iziô nan̈amia lalàn̈a fa olo pivarotro tokony hampiasa vatony balansy ‘tsy mavandy.’ (Deot. 25:15) Izikoa dinihin̈y volan̈a hebreo nandikan̈a ‘tsy mavandy’ io, ‘marin̈y’ koa mety ivolan̈ana izio. Dikanizen̈y, Kristianin̈y araiky koa tiho marin̈y amasony Jehovah, izy tsy tokony havandy na hikatramo izikoa fa man̈ano asanany. Olo marin̈y koa tsy mahadin̈y mahita olo avoa raha tsy rariny. Izy ‘tihan̈ano raha mamparavoravo’ Jehovah fo, ke isaka izy hanapakevitry, tsy afaka an̈atiny jerinany akory fahitany Jehovah raha handeha hataony.​—Kol. 1:10.

6. Nan̈ino ma atsika matoky fa efa fitsipikiny Jehovah momba ny tsara ndreky ratsy edy ny ten̈a mety? (Isaia 55:8, 9)

⁶ Koran̈iny Baiboly fa Jehovah “Loharanony fahamarin̈ana.” (Jer. 50:7) Jehovah niasa raha jiaby, ke izy zaraiky fo manan̈a zò han̈apetraka fitsipiky momba ny tsara ndreky ratsy. Jehovah lavorary, ke fomba fihevitrinany momba zen̈y an̈abo mandilatrany nintsika. Tsy lavorary sady panota atsika, ke raha zen̈y misy vokany amy fomba fahitantsika raha. (Ohab. 14:12; vakia Isaia 55:8, 9.) Ndray izy man̈ano zen̈y, Jehovah koa fa niasa atsika, atsika nataony misy itovizan̈a aminany. Ke ho vitantsika fo han̈araka fitsipikinany momba ny tsara ndreky ratsy. (Gen. 1:27) Ary zen̈y raha tiantsika hatao. Fitiavantsika Jehovah mandrisiky atsika hangala tahaka izy, erakany mety ho vitantsika.​—Efes. 5:1.

7. Nan̈ino ma atsika mila fitsipiky azo antoko? Man̈ameza ohatra.

⁷ Atsika fo hahita hatsaran̈a izikoa man̈araka fitsipikiny Jehovah momba ny tsara ndreky ratsy. Fotony nan̈ino? Diniha baka ty: Han̈ano akory eky izikoa samby isany raha ampiasainolo pan̈amboatra tran̈o lera mandrefy? Mety ho ratsy mare vokany. Akory izikoa samby isany fitsipiky arehany dokotera lera mitaha olo? Mety hofoaty marary sasany. Hitantsika baka amy zen̈y fa iankinany fahin̈ana fan̈arehan̈a fitsipiky azo antoko. Karaha zen̈y koa, miaro atsika fitsipikiny Zan̈ahary momba ny tsara ndreky ratsy.

8. Ino aby hatsaran̈a miambin̈y lan̈iany olo tia man̈araka fitsipikiny Jehovah momba ny tsara ndreky ratsy?

⁸ Tahiany Jehovah lan̈iany olo mifen̈y man̈araka fitsipikinany. Ty toky namezany atsika: “Olo marin̈y handova tany, ke hipetraka iô tsisy farany.” (Sal. 37:29) Miniminia hely  baka, han̈ano akory fiain̈ana izikoa olo jiaby man̈araka fitsipikiny Jehovah? Olo jiaby hiray sain̈y, hiadan̈a avio ho sambatra. Karaha zen̈y fiain̈ana tiany Jehovah hamian̈a anao. Ke ten̈a maro antony itiavantsika fahamarin̈ana io. Ino basy raha mety ataontsika baka atsika ho tia toetry io mare? Alô atsika handiniky dingana telo.

9. Ino raha han̈ampy anao ho tia fahamarin̈ana?

⁹ Dingana 1: Tiava Jehovah, lay nan̈amia atsika fitsipiky io. Jehovah nan̈apetraka fitsipiky momba raha mety ndreky tsy mety. Tsy ho vitantsika han̈araka fitsipikinany izikoa atsika tsy tia izy. Arakarakany itiavantsika izy hahavy atsika han̈iry han̈aja fitsipikinany. Ohatra iziô, Adama ndreky Eva koa tia Jehovah, narehandro volan̈anany.​—Gen. 3:1-6, 16-19.

10. Akory nahaizany Abrahama tsarabe fomba fisain̈anany Jehovah?

¹⁰ Tsy tiantsika foeky han̈ampody hadisovan̈a nataony Adama ndreky Eva in̈y. Ke ino raha mila ataontsika? Atsika mila manohy mianatra raha momba Jehovah ndreky tia toetrinany. Mila haintsika koa fomba fisain̈ananany. Izikoa atsika man̈ano zen̈y, hahaihitombo fitiavantsika Jehovah. Karaha zen̈y iziô i Abrahama. Izy tia Jehovah tamy fônany. Tsy raha jiaby nataony Jehovah zay nazava taminany aby, kanefa izy natoky Jehovah fo. Niezaka fo izy nan̈ano raha nahaizany tsarabe Jehovah. Ohatra iziô Jehovah koa fa tapakevitry handravan̈a Sodoma ndreky Gomora, Abrahama direkty navozo. Niasaloha izy tsao lera ‘Pitsara tany jiaby’ io handripaka olo ratsy fan̈ahy, hofoaty miaraka amindro io koa olo marin̈y. Taminy Abrahama, raha zen̈y ten̈a tsy rariny. Nanetry ten̈a izy nan̈ontany Jehovah. Naharidraha Jehovah, ke nivaliany aby fan̈ontanian̈any Abrahama. Ke hainy Abrahama fo tamy farany fa Jehovah mandiniky fônolo tsiaraikiaraiky. Tsy honohono Jehovah foeky handeha han̈asazy olo tsy manantsin̈y miaraka aminolo nan̈ano raha ratsy.​—Gen. 18:20-32.

11. Akory nan̈aboahany Abrahama fa izy tia Jehovah sady natoky izy?

¹¹ Nisy vokany maventy taminy Abrahama koran̈a nataondro roeny Jehovah momba tanànany Sodoma ndreky Gomora in̈y. Nahaitiany fo Babany io sady najainy. Taon̈o maro tafara, nisy raha nitsapa fatokisany Abrahama i Jehovah. Tamy fomba karakory? Jehovah nan̈iraka izy han̈ano sôron̈o Isaka. Tiany Abrahama mare zanany io. Efa naro raha hainy Abrahama momba Zan̈aharinany io, ke taminio izy tsy nan̈ontany eky fa direkty narehany volan̈any Jehovah. Nafy taminy Abrahama nan̈ano raha nan̈irahany Jehovah izy zen̈y. Kalikaly hapoaka donko fônany tao! Izy taminio donko mety nisaintsain̈y mare raha nianarany momba Jehovah. Hainy fa Jehovah tsara fan̈ahy sady man̈ano ny rariny. Nivolan̈a apostoly Paoly fa Abrahama natoky fa ndray maty zanakanany ten̈a tiany io, vitany Jehovah fo hamelon̈o izy. (Heb. 11:17-19) Jehovah lastiô efa nampan̈anten̈a fa hisy firenena hiboaka baka aminy Isaka, kanefa Isaka taminio mbala tsy honohono ho teraka aby. Abrahama tia i Jehovah, ke natoky izy fa Babany io tsy mety han̈ano raha tsy rariny. Ke ndray sarotro taminany raha nangatahiny Jehovah, nataony fo, fotony izy nanan̈a finoan̈a.​—Gen. 22:1-12.

12. Akory hangalantsika tahaka i Abrahama? (Salamo 73:28)

¹² Akory hangalantsika tahaka raha nataony Abrahama? Atsika tokony hanohy hianatra raha momba Jehovah fo. Izikoa atsika man̈ano  zen̈y, hahaiharikitry izy fo atsika avio hitombo koa fitiavantsika izy. (Vakia Salamo 73:28.) Hitovy fomba fisain̈ana amy Jehovah atsika, fotony feony fieritreretan̈antsika ho voaofan̈a tsarabe. (Heb. 5:14) Ke izikoa misy olo mitady hitaon̈o atsika han̈ano raha ratsy, atsika tsy mety han̈eky. Tsy honohono atsika foeky hieritreritry han̈ano raha efa haintsika fa hampalahelo Babantsika ndreky mety handrobaka fihavanan̈antsika aminany. Akory koa han̈aboahantsika fa atsika tia fahamarin̈ana?

13. Akory han̈aboahantsika fa mifen̈y fo atsika man̈ano ny marin̈y? (Ohabolana 15:9)

¹³ Dingana 2: Isanandra, ampitombosa fitiavanao fahamarin̈ana. Mila man̈ano fan̈azaranten̈a isanandra olo araiky izikoa tiany ho fatatra hozatranany. Karaha zen̈y koa, mila miezaka koa atsika isanandra baka ho tia raha efa volan̈iny Jehovah fa marin̈y. Tsy sarotro loatra amintsika han̈ano raha zen̈y isanandra. Jehovah mahay mandanjalanja, ke izy tsy hitaky raha tsy ho vitantsika. (Sal. 103:14) Jehovah man̈amia toky fa ‘tiany lan̈iany olo mifen̈y fo man̈ano ny marin̈y.’ (Vakia Ohabolana 15:9.) Iritrireta hely baka ty: Akory tokony hataontsika izikoa misy tanjon̈o tiantsika takarin̈y amy fanompoan̈a Jehovah? Miezaka fo atsika hanakatra izio, tsy zen̈y? Karaha zen̈y koa tokony hataontsika izikoa atsika tihan̈ano ny marin̈y fo. Jehovah han̈ampy atsika tsihelihely, baka ho vitantsika fo han̈ano zen̈y.​—Sal. 84:5, 7.

14. Ino ma “fiarovantratrany fahamarin̈ana”, avio nan̈ino izio ten̈a ilaintsika?

¹⁴ Jehovah ten̈a tia atsika, ke mampatsiaro atsika izy fa tsy sarotro aby man̈ano raha volan̈iny fa marin̈y. (1 Jaona 5:3) Ndray izio aby miaro atsika, sady atsika lastiô mila fiarovan̈a fo isanandra. Azonao onon̈o raha nivolan̈iny apostoly Paoly fa mila sikinintsika izikoa fa man̈ano ady arapan̈ahy? (Efes. 6:14-18) Ino amindro raha aby io miaro fôny maramila? “Fiarovantratra”, tsy zen̈y? Ino koa raha miaro fôntsika an̈ohatra, an̈isanizen̈y fan̈irian̈antsika, fihetsehampôntsika avio  eritreritrintsika? “Fan̈anaovan̈a ny marin̈y” na fitsipikiny Jehovah momba ny tsara ndreky ratsy. Ten̈a ilaintsika fiarovantratrany fahamarin̈ana io!​—Ohab. 4:23.

15. Akory ahitan̈a fa misikin̈y fiarovantratrany fahamarin̈ana io anao?

¹⁵ Akory ahitan̈a fa misikin̈y fiarovantratra io anao? Isaka anao han̈ano raha, diniha ino raha tiany Jehovah hataonao. Tsy maintsy manapakevitry fo baka atsika isanandra. Ohatra, momba raha hivolan̈intsika, hira tandrin̈esantsika, programo amy tele tiantsika zahan̈a, na boky hivakiantsika. Fa alohany anao han̈ano raha aby io, diniha: ‘Ino raha ambelako mameno fônaka? Tiany Jehovah ma raha iritriretiko hatao ty? Sa izity mampirisiky zaho haloto fitondranten̈a, hanjary kafiry, tsy mety ho afapô, ndreky ho tia ten̈a?’ Aleva onon̈o fa ratsy fahitany Jehovah raha aby zen̈y. (Fil. 4:8) Izikoa fanapahankevitrinao ataonao mifan̈araka amy sitrapôny Jehovah, dikanizen̈y man̈ambela fitsipikiny Jehovah hiaro fônao anao.

16-17. Mifan̈araka amy raha koran̈iny Isaia 48:18, nan̈ino atsika matoky fa ho vitantsika han̈araka fitsipikiny Jehovah mandrakizay?

¹⁶ Asa efa nisy fotoan̈a anao nieritreritry karaha ty: ‘Raha mba ho vitako edy han̈araka fitsipikiny Jehovah fo izikoa fa mandeha andra, miteky taon̈o?’ Diniha baka ohatra nampiasainy Jehovah aminy Isaia 48:18 ao. (Vakia.) Jehovah mampan̈anten̈a fa fahamarin̈anantsika hanjary “karaha darobandranomasin̈y.” Aleva sary antsain̈y baka anao mitsangana amy sisiny ranomasin̈y maventy be, avio hitanao iro daroba aby io tsy vôly mantaoraka amy jia. Raha jiaby man̈odidin̈y anao milamin̈y. Anao tsy mety hieritreritry fa andra araiky an̈y tsy ho hisy daroba eky hantreky amy sisiny laplazy, tsy zen̈y? Fotony hainao fa iro daroba aby io efa tiô fo tan̈atiny andrivony taon̈o zay, ary tsisy andra tsy hisiandro.

¹⁷ Fahamarin̈ananao koa mety hanjary karaha iro darobandranomasin̈y aby io! Amy karakory? Anao koa fa hanapakevitry, diniha antsendriky raha tiany Jehovah hataonao, baka io ataova zen̈y. Mety tsy ho mora fanapahankevitry ataonao io. Kanefa aza adin̈a fa Jehovah Babanao be fitiavan̈a io tsy hiala anao fa han̈ampy anao han̈araka fitsipikinany fo, isanandra.​—Isaia 40:29-31.

18. Nan̈ino ma atsika mila mitandrin̈y baka tsy hitsaratsara olo, amy raha hiverintsika fa mety na tsy mety?

¹⁸ Dingana 3: Ambilà Jehovah hitsara fa tsy anao. Miezaka atsika mampifan̈araka fiain̈anantsika amy fitsipiky marin̈iny Jehovah. Ndray zen̈y, mila mitandrin̈y atsika baka tsy hitsaratsara olo na hiheviten̈a ho marin̈y mandilatra iro. Atsika koa tsy tokony han̈ambany olo, fotony izikoa atsika man̈ano zen̈y, karaha tihivolan̈a fa atsika manan̈a zò hitsara iro, amy raha hiverintsika fa mety. Mila alaintsika onon̈o fo fa, Jehovah “Pitsara tany jiaby.” (Gen. 18:25) Jehovah tsy nan̈amia lalan̈a atsika hitsara olo. Zen̈y nahavy Jesosy nan̈amia beko ty: “Aza mitsara olo eky baka anaro tsy hitsarain̈a.”​—Mat. 7:1. *

19. Akory nan̈aboahany Josefa fa izy natoky fitsaran̈any Jehovah?

¹⁹ Alô zahavantsika ndraiky tantarany Josefa, lelahy marin̈y in̈y. Ndray nisy olo nan̈ano raha tsy rariny taminany, izy tsy nitsaratsara iro foeky. Iro rahalahiny aby io nampijaly izy, avio izy nalafondro ke nanjary andevo. Nataondro  koa raha nahavy babandro hieritreritry fa naty i Josefa. Taon̈o maro tafara, nifanôjy tamindry havany ndraiky i Josefa. Izy tamy zen̈y efa olo manan̈a fahifan̈a mare. Kanefa izy tsy nitsaratsara iro rahalahiny aby io na namaly faty iro. Navozo mare iro zokiny aby io, ndray iro efa nanen̈iny tamy raha nataondro. Ino raha nataony Josefa? Namezany toky iro. Ho izy: ‘Anaro aza mavozo. Zaho ma Zan̈ahary ke hitsara anaro?’ (Gen. 37:18-20, 27, 28, 31-35; 50:15-21) Nanetry ten̈a i Josefa, ke Jehovah fo nambelany hitsara.

20-21. Ino raha han̈ampy atsika tsy hiheviten̈a ho marin̈y mandilatra olo hafa?

²⁰ Karaha nataony Josefa in̈y, Jehovah fo ambelantsika hitsara. Ohatra iziô, atsika tsy hieritreritry fa haintsika antony han̈anaovany rahalahintsika na ranabavintsika aby io raha araiky. Atsika tsy mahay raha an̈atiny fônolo. Jehovah zaraiky fo mahay antony mahavy olo man̈ano raha araiky. (Ohab. 16:2) Jehovah tia olo jiaby, na baka aia tany faviany na ino fombanany. Ke Jehovah mampirisiky atsika karaha ty: ‘Biafa miban̈aban̈a fônaro.’ (2 Kor. 6:13) Mifen̈y atsika ho tia piaramanompo amintsika jiaby, fa tsy hitsara iro.

²¹ Atsika koa tsy tokony hitsara olo tsy Vavolombelon̈o Jehovah. (1 Tim. 2:3, 4) Atsika tsy tokony hitsara iro havantsika aby io foeky, ke hivolan̈a: “Koa in̈y edy, tsisy andra ampa Vavolombelon̈o Jehovah izy!” Atsika tsy tokony hiavonkavon̈o na hiheviten̈a ho marin̈y mandilatra iro. Iziô Jehovah mbala man̈amia fotoan̈a ampy tsara baka hahavita hibebaka aby ‘olo jiaby, na azovy izy na azovy.’ (Asa. 17:30) Aleva onon̈o fa Jehovah tsy hihevitry atsika ho an̈isany olo marin̈y, izikoa atsika miheviten̈a ho marin̈y mandilatra olo hafa.

22. Nan̈ino anao tapakevitry ho tia fahamarin̈ana?

²² Ino vokany izikoa atsika tia fitsipikiny Jehovah sady man̈araka raha efa nivolan̈iny fa tsara? Atsika ho ravoravo, avio atsika hanjary modely tsara arehanolo hafa. Ho tsara fihavanan̈a amintsika ndreky amy Zan̈aharintsika iro. Ke irarian̈a anao ho ‘mosary ndreky ho sakara fahamarin̈ana’ fo. (Mat. 5:6) Matokisa fa ravoravo Jehovah mahita ezakanao ndreky fandrosoan̈anao. Mahaimaro fo olo tsy tia man̈ano ny marin̈y amy donia ty, kanefa anao aza rivan̈a! Aleva onon̈o fo fa ‘olo marin̈y fo tiany Jehovah.’​—Sal. 146:8.