1-2. Ino raha mila ataontsika parapaviany donia vaovao?

 JEHOVAH mampan̈anten̈a fa donia ty hisoloany donia vaovao hanjakany fahamarin̈ana. (2 Pet. 3:13) Ten̈a valera amintsika fampan̈antinan̈a zen̈y. Marin̈y fa tsy haintsika ombian̈a aviany donia vaovao io, fa ndray zen̈y, raha mandalo amy donia ty man̈aboaka fa efa tsy ambaka zay eky tavela.​—Mat. 24:32-34, 36; Asa. 1:7.

² Fa mandrapaviany zen̈y, atsika jiaby samby mila mankafatatra fatokisantsika fampan̈antinan̈a io, na firy taon̈o na firy taon̈o atsika tamy fahamarin̈ana. Nan̈ino? Fotony finoan̈a ndray fatatra mbala mety halemy fo. Apostoly Paoly nivolan̈a fa tsy fahampiany finoan̈a io, ‘ota mora manakantsakan̈a atsika.’ (Heb. 12:1) Ke baka finoan̈antsika tsy halemy, mila dinihintsika matetiky iro porofo ahitan̈a fa ten̈a efa marikitry donia vaovao.​—Heb. 11:1.

3. Ino raha hidinihintsika amy lahatsoratra ty?

³ Amy lahatsoratra ty, atsika handiniky fomba telo mety hankafatarantsika fatokisantsika donia vaovao ampan̈antinainy Jehovah: 1) Misaintsain̈y vidipan̈avotan̈a, 2) mandiniky angovony Jehovah, avio 3) manokan̈a fotoan̈a han̈anaovan̈a raha arapan̈ahy. Hizahavantsika koa amy karakory hafatra Jehovah taminy Habakoka in̈y mankafatatra finoan̈antsika aminy andra zioty. Fa alo antsendriky atsika handiniky raha sasany mety hatrefintsika amy zioty, ke ilavan̈a fatokisan̈a tsarabe fa ho avy ankitin̈y donia vaovao.

 RAHA ILAVAN̈A FINOAN̈A MATANJAKA

4. Ino aby fanapahankevitry ilavan̈a finoan̈a matanjaka?

⁴ Isanandra, atsika man̈ano fanapahankevitry ilavan̈a finoan̈a matanjaka. Atsika, ohatra, tsy maintsy manapakevitry momba naman̈a, fangalan̈a diandian̈a, fianaran̈a, vadian̈a, zanaka, ndreky asa. Ke tsara atsika man̈ontany ten̈a karaha ty: ‘Hita amy safidy ataoko ma fa zaho matoky tsarabe fa donia ty mandalo fo, avio tsy ho ela izity hisoloany Zan̈ahary donia vaovao? Sa safidy ataoko mitovy amy safidinolo tsisy fan̈antinan̈a?’ (Mat. 6:19, 20; Lioka 12:16-21) Ho tsara fanapahankevitry ataontsika izikoa atsika mankafatatra finoan̈antsika ke matoky fa efa ten̈a marikitry ankitin̈y donia vaovao.

5-6. Nan̈ino atsika mila finoan̈a matanjaka lera mandalo fitsapan̈a? Man̈ameza ohatra.

⁵ Miatriky fitsapan̈a ilavan̈a finoan̈a matanjaka koa atsika. Ohatra, atsika mety miatriky fan̈injehan̈a, aretimpatatra, na raha hafa mety hampalemy troko atsika. Amy voanalohany, atsika mety mieritreritry fa ho vitantsika hiatriky problemontsika. Kanefa matetiky problemo karaha zen̈y mahadin̈y ela, ke mila manan̈a finoan̈a matanjaka atsika baka hahavita hiaritry ndreky hanohy hanompo Jehovah sady ho ravoravo fo.​—Rom. 12:12; 1 Pet. 1:6, 7.

⁶ Atsika koa fa miatriky fitsapan̈a, hitantsika ela aviany donia vaovao. Zen̈y ma midika fa atsika nanjary nalemy finoan̈a? Tsy voatery. Diniha baka ohatra ty: Izikoa latsaka fo mahalen̈y an̈atiny herin̈iandra maromaro, atsika mety hieritreritry fa tsy hibian̈a foeky andra. Kanefa andra mbala hibian̈a fo. Karaha zen̈y koa, atsika koa fa kivy mare, atsika loso mieritreritry fa donia vaovao zen̈y efa tsy ho avy foeky. Fa izikoa fatatra finoan̈antsika, haintsika fa tsy maintsy ho tanteraka fampan̈antinan̈any Zan̈ahary. (Sal. 94:3, 14, 15; Heb. 6:17-19) Ke fatokisan̈a anan̈antsika zen̈y han̈ampy atsika han̈ano voanalohantoeran̈a fanompoan̈a Jehovah amy fiain̈anantsika.

7. Ino toetsain̈y mila tandremantsika?

⁷ Mila finoan̈a matanjaka koa atsika baka hahavita asa fitorian̈a. Maro aminolo itoriantsika aby io mieritreritry fa vandy fo “vaovao tsara” mikasiky donia vaovao hampan̈antinainy Zan̈ahary io. (Mat. 24:14; Ezek. 33:32) Mila mitandrin̈y atsika tsao hifindrany toetsain̈y feno fisalasalan̈a karaha zen̈y. Akory hiarovantsika ten̈a amy zen̈y? Mila ataontsika fatatra fo finoan̈antsika. Alo atsika handiniky fomba telo mety han̈anaovantsika zen̈y.

SAINTSAIN̈A VIDIPAN̈AVOTAN̈A

8-9. Nan̈ino ho fatatra finoan̈antsika izikoa atsika misaintsain̈y vidipan̈avotan̈a?

⁸ Fisaintsain̈ana vidipan̈avotan̈a fomba voanalohany han̈ampy atsika hankafatatra finoan̈antsika. Baka amy vidipan̈avotan̈a mahavy atsika matoky fa tsy maintsy ho tanteraka fampan̈antinan̈any Zan̈ahary. Ke izikoa atsika misaintsain̈y tsarabe antony nan̈amezan̈a vidipan̈avotan̈a ndreky habezany raha nafoeny Jehovah nan̈anaovan̈a izio, ho fatatra finoan̈antsika sady hatoky koa atsika fa tsy maintsy ho tanteraka fampan̈antinan̈any Zan̈ahary han̈amia atsika fiain̈ana tsisy farany amy donia araiky tsara oe. Nan̈ino atsika afaka mivolan̈a zen̈y?

⁹ Diniha, ino raha nafoeny Jehovah han̈anaovan̈a vidipan̈avotan̈a? Talan̈olonany ten̈a tiany sady namany marikitry, nalefany tambony tany tatỳ baka hanjary olombelon̈o lavorary. Maro raha sarotro niaretany Jesosy taminizy tatỳ. Nijaly mare izy talohanizy  hofoaty. Tsy somasoma raha nafoeny Jehovah zen̈y! Ke tsy posibla Zan̈aharintsika be fitiavan̈a io han̈ambela Zanany hijaly ndreky hofoaty izikoa fiadan̈ana betibetiky fo raha ho azontsika. (Jaona 3:16; 1 Pet. 1:18, 19) Matoa zanany ten̈a tiany foeky nafoeny Jehovah, dikanizen̈y tsy maintsy ataony azo antoko fa atsika ho afaka hiain̈y tsisy farany amy donia vaovao.

DINIHA ANGOVONY JEHOVAH

10. Ino raha vitany Jehovah izikoa zahavan̈a Efesianina 3:20?

¹⁰ Fandinihan̈a angovony Jehovah fomba faharoe han̈ampy atsika hankafatatra finoan̈antsika. Jehovah manan̈a angovo han̈atantirahan̈a raha jiaby nivolan̈iny. Amy zioty maro olo mieritreritry fa fiain̈ana mandrakizay amy donia vaovao zen̈y raha tsy posibla. Kanefa, efa matetiky Jehovah mampan̈anten̈a raha tsy posibla ho vitanolombelon̈o. Izy baka Zan̈ahary Farany Mahery. (Joba 42:2; Mar. 10:27) Ke tsy gaga atsika izikoa izy mampan̈anten̈a raha tsy takatra jerintsika!​—Vakia Efesianina 3:20.

11. Man̈ameza ohatra araiky amy fampan̈antinan̈a miavaka nataony Zan̈ahary. (Zahava efajoro “ Fampan̈antinan̈a Miavaka Efa Tanteraka.”)

¹¹ Nisy raha sasany nampan̈antinainy Jehovah iro vahoakanany taloha tan̈y, kanefa raha aby io karaha tsy ho posibla foeky. Izy iziô nivolan̈a taminy Abrahama ndreky Saraha fa iro hiteraka tsaiky lelahy, kanefa iro taminio efa matoe. (Gen. 17:15-17) Nivolan̈a taminy Abrahama koa izy fa taranakanany hamezany tany Kanana. Karaha tsy ho tanteraka raha zen̈y tan̈atiny taon̈o maro nampahandevo iro Israelita taranaka Abrahama aby io ta Ezipty. Kanefa raha zen̈y tanteraka ankitin̈y. Tafara tatỳ, Jehovah nan̈ambara fa Elizabeta hiteraka, ndray izy efa matoe. Tsy zen̈y fo, nivolan̈a tamy Maria koa Jehovah fa izy hiteraka zanaka Zan̈ahary, ndray izy mbala virjiny. Ke tanteraka raha nampan̈antinainy Jehovah efa andrivony taon̈o, tamy zaridain̈iny Edena!​—Gen. 3:15.

12. Josoa 23:14 ndreky Isaia 55:10, 11 io man̈amia atsika toky karakory momba angovony Jehovah?

¹² Izikoa atsika mandiniky fampan̈antinan̈a jiaby nataony Jehovah, ndreky mandiniky fomba nan̈atantirahany iro io, ho haintsika fa manan̈a angovo ankitin̈y izy. (Vakia Josoa 23:14; Isaia 55:10, 11.) Fahaizantsika zen̈y han̈ampy atsika ho von̈ono han̈ampy olo hahay fa tsy nofy fampan̈antinan̈a donia vaovao io, fa ho hisy ankitin̈y. Jehovah foeky nivolan̈a karaha ty momba lan̈itry vaovao ndreky tany vaovao: ‘Volan̈a jiaby zen̈y marin̈y ndreky atokisan̈a.’​—Apok. 21:1, 5.

MIFEN̈A MAN̈ANO RAHA ARAPAN̈AHY

13. Nan̈ino fivorian̈a mankafatatra finoan̈antsika? Hazavà.

¹³ Ty fomba fahatelo hankafatarantsika finoan̈antsika: Mifen̈y man̈ano raha arapan̈ahy. Diniha, ohatra, ino aby hatsaran̈a azontsika koa fa man̈aton̈o fivorian̈a. Panompo manontolo andra efa tan̈atiny ampolony taon̈o i Anna. b Efa maro karazan̈a fanompoan̈a efa nataony. Hoizy: “Fivorian̈a man̈ampy finoan̈anaka ho fatatra fo. Ndray pan̈ano kabaro tsy ten̈a mahay mampianatra, na tsy mikoran̈a raha vaovao, matetiky mbala misy raha ren̈iko fo man̈ampy zaho hahazo tsarabe raha ampianariny Baiboly. Zen̈y amy zay mankafatatra finoan̈anaka.” Ten̈a mankafatatra finoan̈antsika koa valintenindro rahalahy ndreky ranabavintsika aby io.​—Rom. 1:11, 12; 10:17.

14. Nan̈ino asa fanompoan̈a mankafatatra finoan̈antsika?

¹⁴ Mahaifatatra koa finoan̈antsika izikoa atsika mandray anjara amy fanompoan̈a. (Heb. 10:23) Efa mandilatrany 70 taon̈o Barbara nanompo Jehovah. Karaha ty raha nivolan̈iny: “Hitako fa asa fitorian̈a io ten̈a mankafatatra finoan̈anaka. Arakaraka ikoran̈ako aminolo fampan̈antinan̈any Jehovah maro tsarabe aby io, finoan̈anaka mahaivelon̈o salakady mahaifatatra fo.”

15. Nan̈ino mankafatatra finoan̈antsika fianaran̈a manokan̈a? (Zahava koa sary.)

¹⁵ Ty koa misy raha hafa mankafatatra finoan̈antsika: Fianaran̈a manokan̈a. Hitany Suzanne man̈ampy izy mare fan̈anaovan̈a programo hianaran̈a. Hoizy: “Dimansy zaho man̈oman̈a Tilikambo hianaran̈a aminy herin̈iandra man̈araka. Tinainy ndreky talata zaho man̈oman̈a fivorian̈a andavanandra. Andra hafa ankoatranizen̈y amy zay, zaho man̈ano fianaran̈a manokan̈a.” Loso fatatra finoan̈any Suzanne fotony arehany tsara fandaharampotoan̈anany io. Ranabavy Irène ndraiky efa nanompo tamy foibe tan̈atiny ampolony taon̈o. Izy nivolan̈a fa nankafatatra finoan̈anany nianatra faminanian̈a amy Baiboly. Hoizy: “Maharikian̈a zaho mahita fa tanteraka aby faminanian̈any Baiboly, firaka amy raha farany madiniky.” c

“IZIO TSY MAINTSY HO TANTERAKA”

16. Toky namezany Jehovah i Habakoka in̈y koa ma mahatsara atsika? Nan̈ino? (Hebreo 10:36, 37)

¹⁶ Efa rango ela panompony Jehovah sasany niambin̈y aviany farany donia ty. Kanefa izio hitanolo sasany ela loatra. Hainy Jehovah raha tsapany panomponany. Zen̈y nahavy izy nan̈amia toky paminan̈y Habakoka karaha ty: “Fa mbala amy fotoan̈a voatondro vo ho tanteraka fahitan̈a io, sady izio milomoay mare man̈aton̈o farany ke tsy havandy. Avio  ndray karaha elaela izio, iambesa fo! Fotony izio tsy maintsy ho tanteraka. Izio tsy ho tara zen̈y!” (Hab. 2:3) Mandeha aminy Habakoka zaraiky fo ma volan̈any Jehovah io, sa mba mandeha amintsika koa? Jehovah nan̈iraka apostoly Paoly han̈ampody volan̈a aby io amy Kristianin̈y miambin̈y mare faviany donia vaovao. (Vakia Hebreo 10:36, 37.) Ke afaka matoky atsika fa ndray karaha hitantsika ela tanteraka fampan̈antinan̈any Jehovah hamonjy atsika, “izio tsy maintsy ho tanteraka. Izio tsy ho tara zen̈y!”

17. Akory nataony ranabavy araiky nan̈araka torohevitry namezany Jehovah i Habakoka?

¹⁷ Maro panompony Jehovah nan̈araka torohevitrinany ‘iambin̈y fo.’ Sasany aby efa niambin̈y tan̈atiny taon̈o maro, an̈isanizen̈y i Louise. Izy nanomboko nanompo Jehovah taminy 1939. Hoizy: “Zaho tamy zen̈y nieritreritry fa mbala tsendriky vita fianaran̈anaka amy lise, efa avy Aramagedona. Fa tsy zen̈y raha nisy. Tan̈atiny taon̈o maro, hitako nan̈ampy zaho oe namaky tantaranolo amy Baiboly niambin̈y fampan̈antinan̈any Jehovah. Ohatra, tantarany Noa, Abrahama, Josefa, avio olo hafa nila niambin̈y ela vo nahazo valisoa nampan̈antinainy Jehovah iro. Ke zaho koa tsy voly miambin̈y. Zen̈y man̈ampy zaho ndreky olo hafa hatoky fa efa marikitry mare donia vaovao.” Maro amy panompony Jehovah efa ela koa mivolan̈a karaha zen̈y!

18. Nan̈ino atsika hahaihatoky fa ho hisy ankitin̈y donia vaovao izikoa mandiniky zavaboary?

¹⁸ Marin̈y ndraiky fa mbala tsendriky avy donia vaovao. Fa diniha hely raha sasany hitantsika maso: Lakintan̈a, kakazo, biby, avio olombelon̈o. Tsisy olo mifamatra fisiany raha aby io, ndray tsiary nisy iro io taloha. Akory nampisy raha aby io? Jehovah nampisy iro io. (Gen. 1:1, 26, 27) Zan̈aharintsika io koa mampan̈anten̈a fa izy hamoron̈o donia vaovao. Izy tsy maintsy han̈atanteraka fikasan̈anany zen̈y. Amy donia vaovao, olo jiaby ho salama tsara sady hiain̈y mandrakizay. Amy fotoan̈a efa voatondrony Jehovah, donia vaovao io ho hitantsika maso ankitin̈y karaha raha jiaby man̈odidin̈y atsika io.​—Isaia 65:17; Apok. 21:3, 4.

19. Akory mety hankafataranao finoan̈anao?

¹⁹ Parapavianizen̈y, mifen̈a erakany vitanao mankafatatra finoan̈anao. Mifen̈a fo mankasitraka vidipan̈avotan̈a. Diniha angovony Jehovah. Mifen̈a man̈ano raha arapan̈ahy. Anao koa man̈ano raha jiaby zen̈y, anao ho an̈isanolo ‘mandova fampan̈antinan̈a fotony anao mino ndreky maharidraha.’​—Heb. 6:11, 12; Rom. 5:5.