1. Akory ahitan̈a fa Matthew nino fitsanganan̈a amy maty ankitin̈y?

 NARARY mare tsaiky lelahy araiky kahian̈a Matthew ke izy tsy maintsy nididian̈a matetiky. Niaraka nizaha programo miboaka isaka fanjava tamy Tele JW izy ndreky fianakavian̈anany tandraraiky. Fito taon̈o izy tamy zen̈y. Tamy farany video io nisy hira man̈aboaka olo mitsena havan̈a natsangana tamy maty. b Koa fa tapitry programo io, naton̈iny Matthew ry olobeny, nitanany tan̈anandro, avio hoizy tamindro: “Hitanaro Mama ndreky Papa, zaho ndray maty, zaho mbala hatsangana. Aza mazovo fa atsika mbala hitraotro!” Mba iritrireta hely ino raha tsapany olobeny koa fa nahita fa zanakandro ten̈a mino fitsanganan̈a amy maty.

2-3. Nan̈ino mahatsara atsika mieritreritry fampan̈antinan̈a fitsanganan̈a amy maty?

² Mahatsara atsika mieritreritry matetiky fampan̈antinan̈a momba fitsanganan̈a amy maty. (Jaona 5:28, 29) Nan̈ino? Fotony tsy haintsika ombian̈a atsika mety hiatriky aretimpatatra na mety hisy olo marikitry fontsika maty tampoko. (Mpito. 9:11; Jak. 4:13, 14) Ke fan̈antinan̈antsika io afaka man̈ampy atsika hiaritry problemo karaha zen̈y. (1 Tes. 4:13) Soratra Masin̈y man̈amia toky atsika fa Babantsika andan̈itry an̈y mahay atsika sady tia atsika ankitin̈y. (Lioka 12:7) Hainy tsarabe atsika matoa vitany han̈ampody amintsika ndraiky toetrintsika ndreky fitadidian̈antsika jiaby, lera atsika hatsangana amy maty. Tiany mare atsika ke amezany fahafahan̈a hiain̈y mandrakizay. Baka io, ndray maty atsika mbala hatsangany fo!

³ Amy lahatsoratra ty, voanalohany, atsika handiniky antony mahavy atsika afaka matoky fampan̈antinan̈a fitsanganan̈a amy maty. Avio atsika handiniky tantara mankahery an̈aty Baiboly ao, nangalan̈a volan̈a ty: “Ho velon̈o anadahinao.” (Jaona 11:23) Farany, atsika hianatra akory hahavy atsika hatoky tsarabe fampan̈antinan̈a io.

4. Ino mahavy atsika matoky fampan̈antinan̈a araiky? Hazavà aminy ohatra.

⁴ Atokisantsika fampan̈antinan̈a araiky izikoa atsika resy lahatra fa olo mampan̈anten̈a izio ten̈a man̈iry han̈ano izio sady manan̈a angovo, na fahaizan̈a, han̈atantirahan̈a zen̈y. Ty misy ohatra araiky: Nirobatiny sikilony mare tran̈onao. Ke misy namanao araiky mampan̈anten̈a anao karaha ty: ‘Zaho han̈ampy anao han̈amboatra tran̈onao io.’ Baka amy fonany izy mivolan̈a zen̈y ary hitanao fa izy tihan̈ampy anao ankitin̈y. Hainao fa ho vitany tsarabe han̈ampy anao izikoa namanao io pan̈amboatra tran̈o mahay sady manan̈a fitaovan̈a. Baka amy raha aby zen̈y mahavy anao matoky izy. Fa akory ndraiky Zan̈ahary? Izy ma ten̈a man̈iry hanangana olo maty? Manan̈a angovo han̈atantirahan̈a zen̈y ankitin̈y ma izy?

5-6. Nan̈ino atsika matoky fa Jehovah man̈iry mare hanangana olo maty?

⁵ Jehovah ma ten̈a man̈iry hanangana olo maty ankitin̈y? Tsy misalasala atsika mivolan̈a ia. Maro panoratra Baiboly nirahiny Jehovah nanoratra momba fampan̈antinan̈anany hanangana olo maty. (Isaia 26:19; Hosea 13:14; Apok. 20:11-13) Sady Jehovah koa fa mampan̈anten̈a raha, izio tsy maintsy tantirahiny fo. (Jos. 23:14) Efa tsy din̈iny Jehovah foeky handeha hamelon̈o olo maty. Nan̈ino atsika mivolan̈a zen̈y?

⁶ Diniha hely baka raha nivolan̈iny Joba. Izy natoky tsarabe fa izikoa izy maty, Jehovah han̈iry mare hahita izy ho velon̈o ndraiky. (Joba 14:14, 15, l.p.a.) Karaha zen̈y koa raha tsapany Jehovah momba panomponany jiaby efa naty. Efa tsy din̈iny aviany fotoan̈a hamilomany iro, sady hahita iro ho salama ndreky ravoravo. Ataony akory fo basy iro olo mandeha andrivony tapitrisa naty kanefa tsy afaka nianatra ny marin̈y momba izy? Hivilominy Zan̈aharintsika be fitiavan̈a io koa iro. (Asa. 24:15) Tiany iro ho afaka hikamarady aminany salakady hiain̈y tsisy farany ambony tany eto. (Jaona 3:16) Hitantsika baka amy zen̈y fa man̈iry hanangana olo maty ankitin̈y Jehovah.

7-8. Nan̈ino atsika matoky fa Jehovah manan̈a angovo hamiloman̈a olo maty?

⁷ Jehovah koa manan̈a angovo hamiloman̈a olo maty. Izy ‘Farany Mahery.’ (Apok. 1:8) Tsisy dikany aminany handresy fahavalo jiaby, an̈isanizen̈y fahafatesan̈a. (1 Kor. 15:26) Tsy mankahery anao raha zen̈y? Diniha hely baka tantarany Ranabavy Emma Arnold. Niatriky fitsapan̈a mare izy ndreky fianakavian̈anany, tan̈atiny Ady Lehibe II. Maro taminolo marikitry fondro naty tamy toby fitanany Nazỳ olo. Karaha ty nataony nankahery zanany man̈angy: “Izikoa olo maty efa tsy afaka ho velon̈o eky, dikanizen̈y fahafatesan̈a mahery mandilatra Zan̈ahary, sa karakory?” Hay be fa tsisy raha mahery mandilatra Jehovah! Zan̈ahary farany mahery niasa fahin̈ana io mahavita mamelon̈o ndraiky lan̈iany olo maty.

⁸ Ty koa misy antony hafa mahavy atsika matoky fa Zan̈ahary mahavita manangana olo maty: Tsisy fetrany fitadidian̈anany. Izy mikaiky lakintan̈a aby io aminy an̈arandro tsiaraikiaraiky. (Isaia 40:26) Azony onon̈o koa olo maty jiaby. (Joba 14:13; Lioka 20:37, 38) Tsy sarotro amy Jehovah mahatadidy tsipiriandraha jiaby momba olo hatsangany amy maty. An̈isanizen̈y pozipozindro, sorandro avio toetrindro, fitadidian̈andro ndreky raha niain̈andro talohany iro naty.

9. Nan̈ino anao mino fa Jehovah mbala hamelon̈o olo maty?

 ⁹ Hitantsika baka amy zen̈y fa atsika afaka matoky fa Jehovah mbala hamelon̈o olo maty aminy amaray an̈y, fotony haintsika fa izy tsy vitany man̈iry han̈ano zen̈y fo fa manan̈a angovo han̈anaovan̈a zen̈y koa. Ankoatranizen̈y, ty koa misy antony hafa mahavy atsika mino fampan̈antinan̈any Zan̈ahary io: Jehovah efa navy namelon̈o olo maty. Taminy andrany Baiboly, nisy lelahy tsy mivadiky vitsivitsy, an̈isanizen̈y Jesosy, namezany Jehovah angovo nahavitandro namelon̈o olo maty. Alo baka atsika handiniky araiky amy tantaranolo natsangany Jesosy tamy maty, voakoran̈a amy Jaona toko faha-11.

10. Ino raha nandalo tamy fotoan̈any Jesosy nitory tampitany Ten̈aranony Jordana tan̈y, avio ino raha nataony? (Jaona 11:1-3)

¹⁰ Vakia Jaona 11:1-3. Aleva sary antsain̈y baka raha nandalo ta Betania tamy faramparany taon̈o 32. Nipetraka tamy tanàna io Lazarosy ndreky anabaviny aroe, tsy azovy fa Maria ndreky Marta. Iro telo mianadahy samy kamaradiny Jesosy marikitry. (Lioka 10:38-42) Tandraraiky, Lazarosy narary mare, ke vaky asaloha ry anabaviny. Iro nandefa hafatra tamy Jesosy, tampitany Ten̈aranony Jordana tan̈y. (Jaona 10:40) Izio dia vity kadiriny andra aroe miala baka a Betania. Nampalahelo fa naty Lazarosy parapaviany iraka io tamy Jesosy tan̈y. Fa ndray efa hainy Jesosy fa naty kamaradiny io, izy mbala nidoko andra aroe tamy tany nisy izy tan̈y, zay izy vo nandeha ta Betania. Ke efa naty efatra andra Lazarosy, zay Jesosy vo navy. Jesosy handeha han̈ano raha tsara amy kamaradiny aby io, sady raha handeha hataony io han̈amia voninahitry Zan̈ahary.​—Jaona 11:4, 6, 11, 17.

11. Koa tantara io zahan̈a karakory olo kamarady tsara zen̈y?

¹¹ Tantara io mampianatra atsika karakory olo kamarady tsara zen̈y. Aleva onon̈o fa tamy Maria ndreky Marta nandefa hafatra tamy Jesosy, iro tsy raha nangataka izy ho avy ta Betania. Iro zisty nivolan̈a fo fa marary mare kamaradinany. (Jaona 11:3) Lazarosy koa fa naty, vitany Jesosy namelon̈o izy ndray baka lavitry. Fa tsy zen̈y nataony. Jesosy nifidy handeha ta Betania, amy zen̈y izy mba ankilany Maria ndreky Marta kamaradiny. Anao ma misy naman̈a von̈ono han̈ampy anao fo ndray tsy angatahin̈y han̈ano zen̈y? Izikoa zen̈y, matoky anao fa izy han̈ampy anao “aminy andra sarotro.” (Ohab. 17:17) Mangala tahaka Jesosy atsika izikoa mifen̈y baka hanjary naman̈a karaha zen̈y. Alo zahavantsika amy zay tohiny tantara in̈y.

12. Ino raha nampan̈antinainy Jesosy tamy Marta, avio nan̈ino izy afaka natoky raha zen̈y? (Jaona 11:23-26)

¹² Vakia Jaona 11:23-26. Izikoa fa hainy Marta fa Jesosy efa narikitry Betania, direkty izy nilomoay nitsena izy sady nivolan̈a karaha ty: “Anao koa tio, tompoko anao, anadahiko in̈y tsy naty e.” (Jaona 11:21) Marin̈y fa vitany Jesosy tsarabe nampajanga Lazarosy. Kanefa nisy raha hafa ten̈a miavaka tiany Jesosy hatao. Izy nampan̈anten̈a Marta karaha ty: “Ho velon̈o anadahinao.” Baka io nambarany tamy Marta nan̈ino izy tôkony hino raha zen̈y. Hoizy: “Zaho familoman̈a olo maty ndreky fiain̈ana.” Jesosy efa namezany Zan̈ahary angovo mahavita mamelon̈o olo maty. Taloha heliny  io, izy efa nanangana tsaiky viavy hely naty vo tsy ela. Nisy tsaiky lelahy koa natsangany, mety taminy andra nifatesany tsaiky lelahy io fo. (Lioka 7:11-15; 8:49-55) Kanefa mba ho vitany Jesosy edy hamelon̈o olo efa maty efatra andra sady efa manomboko lo?

13. Eraka raha koran̈iny Jaona 11:32-35, karakory nataony Jesosy izikoa fa nahita Maria ndreky olo niaraka taminany nitomoan̈y? (Zahava koa sary.)

¹³ Vakia Jaona 11:32-35. Aleva sary antsain̈y tohiny tantara io. Nan̈aton̈o Jesosy i Maria, anabaviny Lazarosy. Nampodiny ndraiky raha nivolan̈iny rahavaviny in̈y: “Anao koa tio, tompoko anao, anadahiko in̈y tsy naty e.” Nalahelo mare izy ndreky olo niaraka taminany. Nalahelo mare Jesosy koa fa nahita ndreky naharen̈y iro nitomoan̈y. Nahinakinaka iro namany aby io mare izy, ke latsaka foeky ranomasonany. Tsapany fa ten̈a mangirifiry maty havan̈a zen̈y. Ke azo antoko fa, efa tsy din̈iny han̈adoso raha nampalahelo iro.

14. Ino raha ianarantsika momba Jehovah tamy Jesosy nalahelo mare nahita Maria nitomoan̈y?

¹⁴ Mampianatra atsika ino fihetsiky Jesosy koa fa nahita Maria nitomoan̈y in̈y? Hitantsika baka amizin̈y fa Jehovah ten̈a Zan̈ahariny hinakinaka. Efa hitantsika tamy lahatsoratra taloha in̈y, fa miran̈a amy niny Babany toetsain̈iny Jesosy ndreky fihetsehamponany. (Jaona 12:45) Ke izikoa Jesosy nahinakinaka mare ke latsaka ranomaso lera nahita alahelony namany aby io, dikanizen̈y malahelo mare koa Jehovah mahita fahorian̈antsika. (Sal. 56:8) Tsy mandrisiky anao hifandray marikitry amy Zan̈aharintsika be hinakinaka io ma zen̈y?

15. Eraka raha koran̈iny Jaona 11:41-44, ino raha nandalo tamy fasan̈any Lazarosy? (Zahava koa sary.)

¹⁵ Vakia Jaona 11:41-44. Jesosy koa fa navy tamy fasan̈any Lazarosy, nirahiny nadoso vato namody fasan̈a io. Fa Marta tsy nan̈eky. Izy nivolan̈a fa efa mahimbo faty io. Fa ho Jesosy taminany: “Zaho ma tsy efa nivolan̈a taminao fa anao koa mino, hahita voninahitry Zan̈ahary?” (Jaona 11:39, 40) Jesosy baka tio nisan̈andra lan̈itry nivavaka nan̈oloan̈a olo jiaby. Tiany izikoa Jehovah mahazo voninahitry amy raha hiboaka afaranio. Baka io Jesosy nandronton̈o karaha ty: “Lazarosy, miboaha!” Ke Lazarosy niboaka baka tampasan̈a tao. Jesosy nahavita  nan̈ano raha niritriretinolo sasany tsy ho vita foeky. c

16. Nan̈ino tantara amy Jaona toko faha-11 man̈ampy atsika hatoky tsarabe fa olo maty mbala hivilomin̈y?

¹⁶ Tantara amy Jaona toko faha-11 io ten̈a man̈ampy atsika hatoky fa ho hisy ankitin̈y fitsanganan̈a amy maty. Nan̈ino atsika mivolan̈a zen̈y? Tsarova fa Jesosy nampan̈anten̈a Marta karaha ty: “Ho velon̈o anadahinao.” (Jaona 11:23) Jesosy man̈iry hamelon̈o olo maty sady manan̈a angovo han̈atantirahan̈a zen̈y, mira Babany. Ranomasonany in̈y man̈aboaka fa izy ten̈a man̈iry hamelon̈o olo maty ndreky han̈adoso alahelo indesiny fahafatesan̈a. Avio fiboahany Lazarosy baka tampasan̈a tao man̈aboaka tsarabe fa Jesosy manan̈a angovo hamiloman̈a olo maty. Diniha koa raha nivolan̈iny Jesosy tamy Marta ty: “Zaho ma tsy efa nivolan̈a taminao fa anao koa mino, hahita voninahitry Zan̈ahary?” (Jaona 11:40) Ke maro antony mahavy atsika matoky fa Zan̈ahary han̈atanteraka ankitin̈y fampan̈antinan̈anany hamelon̈o olo maty. Ino raha mety ataontsika baka atsika hatoky tsarabe fampan̈antinan̈a zen̈y?

17. Ino raha mila alaintsika onon̈o lera atsika mamaky tantara amy Baiboly momba familoman̈a olo maty?

¹⁷ Vakia ndreky saintsain̈a tantaranolo natsangana tamy maty. Amy Baiboly ao misy tantaranolo valo natsangana hiain̈y tambony tany teto. d Nan̈ino izikoa dinihinao tsiaraikiaraiky tantara aby zen̈y? Lera anao man̈ano zen̈y, tsarova fa iro io lelahy, man̈angy avio tsaiky efa navy nisy ankitin̈y. Ke diniha ino leson hitanao baka amizio. Iritrireta koa nan̈ino iro tantara tsiaraikiaraiky io ahitan̈a fa Zan̈ahary man̈iry hamelon̈o olo maty sady manan̈a angovo han̈anaovan̈a zen̈y. Aza adin̈a koa mandiniky tsarabe tantarany Jesosy. Aminolo jiaby natsangana  tamy maty, ninany ny ten̈a matomboko. Aleva onon̈o fa anjatony olo nahita maso izy nimpody velon̈o ndraiky, avio raha zen̈y fototro ioren̈any finoan̈antsika.​—1 Kor. 15:3-6, 20-22.

18. Akory mety ampiasanao tsarabe iro hirantsika mikoran̈a momba fitsanganan̈a amy maty? (Zahava koa lamariky amy pazy ambany.)

¹⁸ Ampiasà tsara iro ‘hira masin̈y’ mikoran̈a momba fitsanganan̈a amy maty. e (Efes. 5:19) Hira aby io han̈ampy atsika hatoky fa ho hisy ankitin̈y fitsanganan̈a amy maty. Ke tandrin̈esa iro io, avio hirà matetiky. Hiaraha midiniky amy fotoampivavahan̈any fianakavian̈anaro dikany raha volan̈iny hira aby io. Ataova tsianjery ndreky ampidira an̈aty fonao tononkira aby io. Amy zen̈y, lera anao miatriky fitsapan̈a mety hamono, na misy havanao marikitry maty, fan̈ahiny Jehovah han̈ampy anao hahatsiaro hira aby io. Hira aby io amy zay han̈amia angovo ndreky hankahery anao.

19. Ino aby raha mety saintsain̈inao momba fitsanganan̈a amy maty? (Zahava efajoro “ Ino Raha Han̈ontanianao Iro?”)

¹⁹ Miniminia raha handalo. Atsika nataony Jehovah mahavita mangala sary antsain̈y fiain̈anantsika amy donia vaovao. Karaha ty raha nivolan̈iny ranabavy araiky: “Matetiky zaho mimenimeny raha hataoko amy donia vaovao, ke mira efa ren̈iko hangitry larozy amy Paradisa.” Miniminia anao amy zen̈y hifanojy amy lelahy ndreky man̈angy nanampinoan̈a taminy andrany Baiboly. Azovy olo ten̈a tianao ho hita? Ino raha tianao han̈ontanian̈a izy? Aleva sary antsain̈y koa lera anao hifanojy amindro havanao natsangana amy maty. Iritrireta ino raha voanalohany volan̈inao amindro. Iritrireta koa haravoan̈anao hahita iro ndreky hitolon̈o iro ndraiky.

20. Tôkony ho tapakevitry han̈ino atsika?

²⁰ Ten̈a man̈ano mersy Jehovah atsika nohony izy mampan̈anten̈a fa olo maty mbala hatsangana. Afaka matoky atsika fa tsy maintsy ho tanteraka raha zen̈y, fotony Jehovah ten̈a man̈iry han̈ano zen̈y sady manan̈a angovo han̈anaovan̈a zen̈y. Ke irarian̈a atsika ho tapakevitry hankafatatra fatokisantsika fampan̈antinan̈a tsarabe zen̈y. Izikoa atsika man̈ano zen̈y, atsika hahaihifandray marikitry amy Jehovah, Zan̈ahary mampan̈anten̈a atsika tsiaraikiaraiky karaha ty: ‘Ho velon̈o havanao!’