1. Ino raha nandalo tamy Jesosy nan̈ano fahagagan̈anany voanalohany?

 MINIMINIA hely raha nandalo tamy faramparany taon̈o 29. Vo nanampono fanompoan̈anany Jesosy tamy zen̈y. Izy ndreky Maria reniny, avio pianatranany sasany nikahian̈a han̈aton̈o mariazy araiky ta Kana. Izio tanàna hely tavaratrany Nazareta, tany faviany Jesosy. Fianakavian̈anolo hatao mariazy io kamaradiny Maria. Ke izy mety nan̈ampin̈ampy tamy fikarakaran̈a vahiny nan̈aton̈o izio. Kanefa tanten̈anten̈any fety io, nisy problemo niboaka mety hangala baraka mare vady vao io ndreky lafamindro. Lany baka divain tao. b Mety nihoatra donko vahiny navy tamizio. Ke direkty Maria nandeha tamy Jesosy, ke hoizy: “Tsisy divain eky iro.” (Jaona 2:1-3) Ke ino raha nataony Jesosy? Izy nan̈ano fahagagan̈a ke nan̈ova rano nanjary “divain tsara oe.”​—Jaona 2:9, 10.

2-3. a) Ino aby fahagagan̈a nataony Jesosy? b) Nan̈ino atsika tôkony handiniky iro io?

² Mbala maro koa fahagagan̈a hafa nataony Jesosy lera izy nan̈ano fanompoan̈anany. c Izy nampiasa angovonany han̈ampian̈a olo mandilatra folo arivo. Tamy fahagagan̈a aroe nataony, ohatra, izy nan̈amia hanin̈y lelahy 5 000 avio tafara  tatỳ lelahy 4 000. Amy fitambarany, mety ho mihoatrany 27 000 iro io izikoa konten̈a miaraka amy tsaiky ndreky man̈angy navy tiô. (Mat. 14:15-21; 15:32-38) Tamy fotoan̈a aby io, Jesosy koa nampahivan̈a olo narary maro. (Mat. 14:14; 15:30, 31) Misaora lany fan̈ahy mare olo aby io Jesosy koa fa nan̈ano fahagagan̈a nampajanga ndreky nan̈amia hanin̈y iro!

³ Maro raha mety ianarantsika baka amy fahagagan̈a aby nataony Jesosy io. Ho hitantsika amy lahatsoratra ty sasany amy leson ten̈a mankahery azontsika baka amindro fahagagan̈a aby in̈y. Hidinihintsika koa fomba mety hangalantsika tahaka fanetrenten̈any Jesosy ndreky fahaizany nahinakinaka olo.

4. Fahagagan̈a nataony Jesosy aby in̈y mampianatra atsika leson mankahery momba azovy?

⁴ Fahagagan̈a nataony Jesosy aby in̈y mampianatra atsika leson maro mankahery momba izy ndreky Babany. Sady Jehovah lastio nan̈amia izy angovo nahavitany nan̈ano fahagagan̈a aby in̈y. Asan’ny Apostoly 10:38 mivolan̈a karaha ty: ‘Nisoriny Zan̈ahary tamy fan̈ahy masin̈y izy [Jesosy] avio namezany angovo, ke izy nandeha erany faritry io nan̈ano raha tsara ndreky nampahivan̈a olo jiaby nampijaliany Devoly, fotony Zan̈ahary nan̈ampy izy.’ Tsarova koa fa Jesosy nangala tahaka tanteraka fomba fisain̈ana ndreky fihetsehampony Babany tamy raha jiaby nataony ndreky nivolan̈iny, an̈isanizen̈y tamy fahagagan̈a nataony. (Jaona 14:9) Atsika handiniky leson telo mety ianarantsika baka tamy fahagagan̈a aby nataony Jesosy.

5. Ino nahavy Jesosy nan̈ano fahagagan̈a? (Matio 20:30-34)

⁵ Voanalohany, tiany Jesosy ndreky Babany mare atsika. Akory nan̈aboahany Jesosy fa izy ten̈a tia atsika olombelon̈o? Taminizy tambony tany tatỳ, izy nan̈ano fahagagan̈a fotony izy tihan̈ampy olo mijaly. Tandraraiky, nisy lelahy gila aroe nangataka vonjy taminany. (Vakia Matio 20:30-34.) “Nahinakinaka” iro Jesosy ke nataony nahita masondro. Matoanteny griky nandikan̈a volan̈a “nahinakinaka” io manondro hinakinaka mare tsapanolo araiky an̈aty fonany lalin̈y an̈y. Baka amy fitiavan̈a mahavy olo man̈aboaka hinakinaka karaha zen̈y. Fihetsehampo io koa nandrisiky Jesosy han̈amia hanin̈y olo mosary ndreky han̈adio olo boka. (Mat. 15:32; Mar. 1:41) Matokisa fa Jehovah ndreky Zanany tia atsika mare salakady malahelo mahita atsika mijaly. Zan̈ahary ‘ten̈a mahay mahinakinaka’ baka Jehovah. (Lioka 1:78; 1 Pet. 5:7) Efa tsy din̈indro foeky han̈adoso raha jiaby mampijaly atsika olombelon̈o!

6. Namezany Zan̈ahary angovo karakory Jesosy?

⁶ Faharoe, Jesosy namezany Zan̈ahary angovo hahavitan̈a man̈adoso raha jiaby manahiran̈a zanakolombelon̈o. Naboakany Jesosy baka tamy fahagagan̈a nataony aby in̈y fa izy manan̈a angovo mahavita man̈adoso problemo tsy ho afakantsika olombelon̈o foeky. Izy, ohatra, mahavita man̈adoso fototro aviany jaly, tsy ino zen̈y fa fahotan̈a nilovaintsika ndreky vokatra ratsinizen̈y. An̈isanizen̈y, aretin̈y ndreky fahafatesan̈a. (Mat. 9:1-6; Rom. 5:12, 18, 19) Hita baka tamy fahagagan̈a nataony aby in̈y fa izy mahavita man̈adoso ‘karazan̈a aretin̈y jiaby’, ndreky firaka amy mamelon̈o olo maty. (Mat. 4:23; Jaona 11:43, 44) Izy koa manan̈a angovo mahavita mifehy toetrandra ratsy ndreky mahavita mandresy fan̈ahy ratsy. (Mar. 4:37-39; Lioka 8:2) Ten̈a mankahery mahay fa namiany Jehovah angovo mahavita raha karaha zen̈y Zanakanany!

7-8. a) Ino toky anan̈antsika izikoa fa mandiniky fahagagan̈a nataony Jesosy? b) Ino fahagagan̈a efa ten̈a tsy din̈inao ho hita amy donia vaovao?

⁷ Fahatelo, afaka matoky tsarabe atsika fa ho tanteraka hatsaran̈a jiaby hindesiny Fanjakan̈any Zan̈ahary. Baka amy fahagagan̈a aby nataony Jesosy taminizy tambony tany tatỳ, ahitantsika raha mbala handeha hataony erantany lera izy fa Panjakany Fanjakan̈any Zan̈ahary andan̈itry an̈y. Aleva onon̈o baka han̈ano karakory fiain̈ana lera Jesosy mitondra. Ho salama tanteraka atsika fotony ho adosony aretin̈y ndreky antsa jiaby mampijaly atsika. (Isaia 33:24; 35:5, 6; Apok. 21:3, 4) Efa tsy ho hisy eky mosary na antambo. (Isaia 25:6; Mar. 4:41) Ho ravoravo mare atsika hitsena iro havantsika naty aby in̈y. (Jaona 5:28, 29) Ino fahagagan̈a efa ten̈a tsy din̈inao ho hita amy donia vaovao?

⁸ Tamy Jesosy nan̈ano fahagagan̈a aby io, izy nanetry ten̈a fo salakady nahinakinaka olo. Atsika tôkony hangala tahaka toetrinany aby zen̈y. Alo atsika handiniky fahagagan̈a aroe nataony. Hidinihintsika voanalohany araiky tamy mariazy ta Kana in̈y.

9. Ino raha nataony Jesosy tamy mariazy in̈y? (Jaona 2:6-10)

⁹ Vakia Jaona 2:6-10. Izio ma Jesosy voatery tsy maintsy nan̈ano raha koa fa lany divain tamy mariazy in̈y? Ehe. Tsisy faminanian̈a nivolan̈a fa Mesia handeha han̈ano fahagagan̈a hampisy divain. Kanefa miniminia  hely ino raha tsapanao izikoa lany raha igian̈a amy mariazinao. Mety nahinakinaka fianakavian̈a io Jesosy, intsaka eky iro vady vao io, ke tsy tiany iro ho afabaraka. Zen̈y nahavy izy nan̈ano fahagagan̈a nikoran̈intsika in̈y. Izy nan̈ova rano kadiriny 390 litara hanjary divain farany tsara. Nan̈ino eky izio nataony marobe karaha zen̈y? Amy zen̈y donko mba misy lambiny tavela mety ampiasainy vady vao io afara an̈y na halafondro baka hazahoandro vola. Misaora ravoravo mare vady vao io!

10. Ino tsipiriandraha sasany matomboko koran̈iny tantara amy Jaona toko faha-2? (Zahava koa sary.)

¹⁰ Misy tsipiriandraha matomboko koran̈iny tantara amy Jaona toko faha-2. Aleva onon̈o sasany amindro io. Tsy Jesosy, ohatra, nameno rano iro sajoa vato aby io, fa izy nan̈iraka panompo. Izy tsy nisariky masonolo taminany. (Andininy 6, 7) Izikoa izy fa baka nan̈ova rano hanjary divain, tsy izy nandeha nitondra izio tamy piandraikitriny fety io, fa izy nan̈iraka panompo. (Andininy 8) Jesosy tsy nitana vera nisy divain nitsangana nan̈oloan̈a olo jiaby navy tiô, ke nipoera karaha ty: ‘Mavia man̈andran̈a divain vo namboariko ty!’

11. Fahagagan̈a nataony Jesosy in̈y mampianatra atsika ino?

¹¹ Fahagagan̈a nataony Jesosy nan̈ova rano hanjary divain in̈y mampianatra atsika hanetry ten̈a. Jesosy tsy nipoera fahagagan̈a vitany. Izy tsiary ndraiky ke nipoerapoera raha vitany. Mifanohitry amy zen̈y, izy nanetry ten̈a ke isaka teteky Babany fo namezany voninahitry ndreky dera jiaby. (Jaona 5:19, 30; 8:28) Izikoa atsika manetry ten̈a karaha Jesosy, atsika tsy hidera ten̈a amy raha vitantsika koa. Na ino na ino raha ataontsika amy fanompoan̈a, Zan̈ahary miavaka be tompoentsika io fo hamezantsika voninahitry, fa tsy ain̈intsika. (Jer. 9:23, 24) Ke alo atsika hidera izy, fotony izy man̈eva amian̈a zen̈y. Sady ino ma raha ho vitantsika izikoa Jehovah tsy man̈ampy atsika?​—1 Kor. 1:26-31.

12. Akory koa an̈aboahantsika fa atsika manetry ten̈a karaha Jesosy? Hazavà aminy ohatra.

¹² Misy fomba hafa koa afaka hangalantsika tahaka fanetrenten̈any Jesosy. Diniha baka ohatra ty: Misy antipan̈ahy araiky mandany lera maro han̈ampian̈a rahalahy tanora araiky pikarakara fiangonan̈a, han̈oman̈a kabaronany voanalohany. Ke vokany, ten̈a nankahery kabarony rahalahy tanora io sady ravoravo mare fiangonan̈a. Lera rava, nisy olo nan̈aton̈o antipan̈ahy io sady nivolan̈a fa ten̈a tsara kabarony rahalahy in̈y. Ino raha tôkony hataony antipan̈ahy io? Izy ma tôkony hivolan̈a fa izy nandany fotoan̈a be nan̈ampy rahalahy tanora io han̈oman̈a izio? Sa izy tôkony hanetry ten̈a ke hivolan̈a: ‘Ia tsara ankitin̈y kabaronany in̈y’? Izikoa atsika manetry ten̈a, atsika tsy mitady hahazo dera baka amy raha tsara nataontsika taminolo. Efa mahafapo atsika mahay fa Jehovah mahita ndreky mankasitraka raha ataontsika. (Ampiràn̈a amy Mat. 6:2-4; Heb. 13:16) Hay be fa ho ravoravo amintsika Jehovah izikoa atsika mangala tahaka Jesosy ke mifen̈y manetry ten̈a.​—1 Pet. 5:6.

13. Ino raha hitany Jesosy narikitry tanànany Naina, avio ino raha nataony? (Lioka 7:11-15)

¹³ Vakia Lioka 7:11-15. Diniha raha nandalo tanten̈anten̈any fanompoan̈any Jesosy tambony tany tatỳ. Izy tamy zen̈y nandeha ta Naina, tanàna araiky ta Galilia. Izio tsy lavitry Sonema, tanàna namilomany paminan̈y Elisa zanaka man̈angy araiky,  kadiriny 900 taon̈o talohanio. (2 Mpanj. 4:32-37) Jesosy koa fa narikitry varavaran̈any tanànany Naina, izy nahita olo maro niboaka baka tao. Iro io handeha handevin̈y. Ten̈a nampalahelo raha nandalo tamy zen̈y. Naty baka zanaka man̈angy araiky efa naty vady, kanefa efa io fo zanany. Nalahelo mare fony man̈angy io. Nisy vahoaka maro baka tamy tanàna io tao niaraka taminany. Nasainy Jesosy nijanon̈o iro, avio nisy raha ten̈a mahagaga nataony tamy man̈angy io. Nivilominy zanakanany! Telo olo natsangany Jesosy tamy maty tantarainy Filazantsara. Io araiky voanalohany.

14. Ino tsipiriandraha sasany matomboko koran̈iny tantara amy Lioka toko faha-7? (Zahava koa sary.)

¹⁴ Misy tsipiriandraha matomboko koran̈iny tantara amy Lioka toko faha-7. Diniha sasany amindro io. Asa nalainao onon̈o fa Jesosy koa fa ‘nahita’ reny nalahelo be io, izy baka tio ‘nahinakinaka izy’? (Andininy 13) Mety hitany Jesosy donko viavy io vaky tan̈y nandeha talohany fatiny zanany. Ke izy nahinakinaka viavy io. Fa Jesosy tsy vitany nahinakinaka fo fa izy nan̈ano raha koa han̈aboahan̈a zen̈y. Izy nikoran̈a tamy man̈angy io. Azo antoko fa nalemy fan̈ahy izy nivolan̈a karaha ty: ‘Aza mitomoan̈y eky.’ Izy baka tio amy zay nan̈ano raha. Nimpody nivilominy zanakany viavy io, avio ‘tsaiky io namezany reniny.’​—Andininy 14, 15.

15. Fahagagan̈a nataony Jesosy in̈y mampianatra atsika ino?

¹⁵ Fahagagan̈a nataony Jesosy io mampianatra atsika hahay hahinakinaka olo nandia fahorian̈a. Marin̈y ndraiky fa atsika tsy mahavita mamelon̈o olo maty karaha nataony Jesosy in̈y. Fa ndray zen̈y, karaha Jesosy, atsika afaka hahinakinaka olo malahelo izikoa mandiniky raha mahazo olo. Ke atsika amy zay man̈ano raha han̈aboahan̈a fa atsika malahelo iro. Amy fomba akory? Mivolan̈a na man̈ano raha mety han̈ampy ndreky hankahery iro. d (Ohab. 17:17; 2 Kor. 1:3, 4; 1 Pet. 3:8) Volan̈a na fihetsiky hely fo efa mety hankahery mare.

16. Karaha hita amy sary io, ino raha ianaranao baka amy tantarany man̈angy araiky vo tsy ela naty zanaka?

¹⁶ Diniha baka tantara ty: Taon̈o maromaro loso zay, tamy lerany fivorian̈a, nisy ranabavy araiky nahita fa nitomoan̈y reny araiky narikitry izy tiô izikoa fa nandeha hira. Hira io baka nikoran̈a momba fitsanganan̈a amy maty, kanefa man̈angy io vo tsy ela naty zanaka. Hainy ranabavy io raha zen̈y, ke direkty izy nan̈aton̈o reny io sady nitolon̈o izy, avio izy niaraka nihira taminany tiô firaka hira io tapitry. Ty raha nivolan̈iny reny io tafara tatỳ: “Tiako mare ranadahy ndreky rahavavy aby io.” Ravoravo mare izy fotony nandeha nivory. Hoizy: “Amy Tran̈o Fivorian̈a an̈y atsika mahazo fan̈ampian̈a ilaintsika.” Matokisa fa hitany Jehovah salakady ten̈a hankasitrahiny raha ataontsika, ndray hely fo, han̈aboahan̈a hinakinaka aminolo ‘kivy.’​—Sal. 34:18.

17. Ino raha nianarantsika tamy lahatsoratra ty?

¹⁷ Ten̈a hankahery atsika mianatra tantara momba fahagagan̈a aby nataony Jesosy an̈aty Baiboly ao. Iro io mampianatra atsika fa Jehovah ndreky Jesosy ten̈a tia atsika mare, salakady Jesosy manan̈a angovo han̈adosoan̈a raha jiaby manahiran̈a atsika olombelon̈o, avio atsika afaka matoky fa tsy ho ela ho tanteraka hatsaran̈a aby hindesiny Fanjakan̈any Zan̈ahary. Lera atsika mandiniky tantara aby io, atsika afaka misaintsain̈y fomba hangalantsika tahaka toetriny Jesosy. Ke nan̈ino izikoa anao mba mandiniky fahagagan̈a hafa nataony Jesosy lera anao man̈ano fianaran̈a manokan̈a na amy Fotoampivavahan̈any Fianakavian̈anaro? Mangalà fianaran̈a baka aminizio, avio koràn̈a aminolo raha nianaranao. Hahita raha mankahery maro mety koran̈iny anao izikoa man̈ano zen̈y.​—Rom. 1:11, 12.

18. Ino raha hikoran̈intsika amy lahatsoratra man̈araka?

¹⁸ Mbala nisy olo natsangany Jesosy, tamy faramparany fanompoan̈anany tambony tany tatỳ. Izio olo fahatelo farany natsangany tamy maty tantarainy Baiboly. Niavaka hely araiky io fotony olo io kamaradiny Jesosy. Salakady hafa foeky koa raha nisy tamy fotoan̈a io. Ino raha ianarantsika baka amy fahagagan̈a io? Ino raha mety ataontsika baka atsika hatoky fa ho hisy ankitin̈y familoman̈a olo maty? Ho hitantsika amy lahatsoratra man̈araka valiny fan̈ontanian̈a aby zen̈y.