1. Ino raha azontsika antoko?

 PANOMPONY Jehovah atsika, ke azontsika antoko fa atsika tiany sady tiany hanan̈a fiain̈ana farany tsara. (Rom. 8:35-39) Resy lahatra koa atsika fa izikoa atsika man̈araka toro lalan̈a amy Baiboly, atsika tsy maintsy mahazo hatsaran̈a. (Isaia 48:17, 18) Fa akory ndraiky izikoa atsika miatriky problemo tsy ampoizin̈y?

2. Ino aby problemo mety atrefintsika, avio mahavy atsika tafieritreritry karakory zen̈y?

² Panompony Jehovah jiaby tsisy vita vaksiny amy problemo. Atsika, ohatra, mety ho diso fan̈antinan̈a amy raha ataonolo an̈atiny fianakavian̈antsika. Misy amintsika koa marary ke manjary tsy mahavita be amy fanompoan̈a eky. Atsika mety hijaly vokatrany antambo. Na koa atsika miaritry fan̈injehan̈a nohony finoan̈antsika. Lera atsika miatriky problemo karaha zen̈y, atsika mety ho loso diniky karaha ty: ‘Nan̈ino ma zaho avoa raha karaha ty? Ino ma raha tsy mety nataoko? Jehovah donko efa tsy mitahy zaho ay?’ Asa anao efa nahatsapa raha karaha zen̈y? Izikoa zen̈y, aza rivan̈a. Maro panompony Jehovah tsy mivadiky efa nahatsapa karaha zen̈y koa.​—Sal. 22:1, 2; Hab. 1:2, 3.

3. Ino raha ianarantsika baka amy Salamo 34:19?

³ Vakia Salamo 34:19. Misy hevitry maventy aroe koran̈iny salamo io: 1) Miatriky problemo olo marin̈y. 2) Jehovah mankafaka atsika amy raha manahiran̈a atsika. Amy fomba akory han̈anaovany zen̈y? Ampiany atsika han̈eky fa izikoa mbala amy donia ty fo, atsika tsy maintsy ho tojy raha manahiran̈a. Marin̈y fa Jehovah mampan̈anten̈a fa ho ravoravo atsika izikoa manompo izy. Fa ndray zen̈y, izy tsy nivolan̈a fa atsika tsy ho hisy problemo foeky amy zioty. (Isaia 66:14) Zen̈y mahavy izy  mandrisiky atsika hifantoko amy fiain̈ana mandrakizay hamezany atsika aminy amaray. (2 Kor. 4:16-18) Fa parapavianizen̈y, isanandra izy man̈ampy atsika baka ho vitantsika fo hanohy hanompo izy.​—Fitom. 3:22-24.

4. Ino raha hianarantsika amy lahatsoratra ty?

⁴ Atsika hangala fianaran̈a baka amy panompony Jehovah tsy mivadiky taminy andrany Baiboly ndreky aminy andrantsika zioty. Ho hitantsika fa atsika io mety hiatriky problemo tsy ampoizin̈y. Fa izikoa ndraiky atsika milampy amy Jehovah, izy tsy maintsy han̈ampy atsika. (Sal. 55:22) Lera atsika mandiniky ohatra aby io, man̈ontania ten̈a karaha ty: ‘Karakory nataoko izikoa zaho tatrany raha karaha zen̈y? Nan̈ino modelindro mankafatatra fatokisako Jehovah? Ino leson azoko baka amy zen̈y?’

5. Ino aby problemo niaretany Jakoba baka tamy Labana? (Zahava sary amy fon̈ony gazety ty.)

⁵ Maro tamy panompony Jehovah taloha tan̈y tojy raha manahiran̈a tsy nampoizindro. Diniha baka raha navoa Jakoba. Babany nan̈iraka izy handeha hangala vady, araiky tamy zanaka Labana. Labana io havandro salakady panompony Jehovah. Jakoba namiany babany toky fa izy tsy maintsy tahiny Jehovah mare. (Gen. 28:1-4) Ke narehany Jakoba volan̈any babany. Izy niala ta Kanana avio nandeha firaka tamy tran̈ony Labana tan̈y. Labana nanan̈a zanaka aroe vavy, Lea araiky zoky, avio Rahely araiky zandry. Tiany Jakoba mare Rahely, ke izy nan̈eky hiasa fito taon̈o tamy Labana baka hazahoany i Rahely. (Gen. 29:18) Fa tsy arakaraka raha niritriretiny Jakoba foeky raha nandalo! Izy nifitahiny Labana. Loso Lea ndraiky namezany izy. Herin̈iandra tafaranizen̈y, Labana vo nan̈eky han̈amia izy Rahely izikoa izy man̈eky hiasa aminany fito taon̈o ndraiky. (Gen. 29:25-27) Nikatramoeny Labana fo koa izy taminy asa nataondro. Izikoa atao konty, niasa nan̈araraotro Jaboka fo Labana tan̈atiny 20 taon̈o!​—Gen. 31:41, 42.

6. Ino koa problemo niaretany Jakoba?

⁶ Tsy zen̈y fo problemo niaretany Jakoba. Izy naro anaka, kanefa ndraikindraiky iro zanany lelahy aby io tsy nifan̈araka. Ndray Josefa nalafondro zokiny aby io ho andevo foeky. Simeona ndreky Levy koa nan̈ano raha nangala baraka an̈arany Jehovah ndreky fianakavian̈andro. Fan̈ampinizen̈y koa, naty Rahely, vadiny tiany be in̈y, taminizy niteraka zanakandro faharoe. Nisy mosary mare koa tamy tany nisy iro ke tsy maintsy nifindra ta Ezipty iro, ndray Jakoba tamy zen̈y efa natoe mare.​—Gen. 34:30; 35:16-19; 37:28; 45:9-11, 28.

7. Akory nan̈aboahany Jehovah fa izy nankasitraka Jakoba?

⁷ Fa ndray tio problemo jiaby zen̈y, Jakoba tsy voly natoky Jehovah ndreky fampan̈antinan̈anany. Ke naboakany Jehovah tamy Jakoba fa izy nankasitrahiny. Tamy fomba akory? Ndray tio, ohatra, katramony Labana, nataony Jehovah nanandraha fo Jakoba. Misaora nankasitraka Jehovah mare koa Jakoba taminizy nifankahita ndraiky tamy Josefa! Sambarany efa naty efa ela baka zanany io. Ino nahavy Jakoba nahavita niatriky problemo aby in̈y? Fotony izy nifandray marikitry tamy Jehovah. (Gen. 30:43; 32:9, 10; 46:28-30) Ho vitantsika koa hiatriky problemo tsy ampoizin̈y izikoa atsika mifandray marikitry amy Jehovah fo.

8. Ino ma fan̈irian̈any Panjaka Davida?

 ⁸ Panjaka Davida tsy afaka nan̈ano raha jiaby tiany natao tamy fanompoan̈a Jehovah. Nisy fotoan̈a, ohatra, izy tihan̈orin̈y mare tempoliny Zan̈aharinany. Ke raha zen̈y nikoran̈iny tamy paminan̈y Natana. Ho Natana taminany: ‘Ataova lan̈iany raha an̈aty fonao, fa araiky Zan̈ahary marin̈y manohan̈a anao.’ (1 Tan. 17:1, 2) Nisaora ravoravo mare Davida naharen̈y zen̈y! Ndray izy aby mety efa direkty nanomboko nikarakara asa be io.

9. Akory nataony Davida koa fa naharen̈y vaovao nandiso fan̈antinan̈a izy?

⁹ Tsy ela, paminan̈iny Jehovah in̈y nimpody ndraiky tamy Davida tan̈y nitondra vaovao nandiso fan̈antinan̈a izy. ‘Taminy alin̈izin̈y fo’, Jehovah efa nivolan̈a tamy Natana fa tsy Davida han̈orin̈y tempoly io fa araiky amy zanany lelahy. (1 Tan. 17:3, 4, 11, 12) Akory nataony Davida koa fa naharen̈y zen̈y? Nahitsiny tanjon̈onany. Izy nifantoko tamy famorian̈a vola ndreky fitaovan̈a hilainy Solomona zanany aminy asa io.​—1 Tan. 29:1-5.

10. Akory nataony Jehovah nitahy Davida?

¹⁰ Jehovah koa fa baka nan̈ambara tamy Davida fa tsy izy han̈orin̈y tempoly io, direkty Jehovah nan̈ano fifan̈ikian̈a taminany. Izy nampan̈anten̈a Davida fa araiky amy taranakanany hanjaka mandrakizay. (2 Sam. 7:16) Miniminia akory haravoan̈any Davida amy donia vaovao, koa fa hainy fa kaiky Jesosy Panjakany Fanjakan̈a Arivo Taon̈o io, araiky amy taranakanany! Hitantsika baka amy tantara io fa ndray atsika tsy afaka man̈ano raha jiaby tiantsika hatao amy fanompoan̈a Jehovah, mety misy fitahian̈a hafa tsy niritriretintsika foeky hamezany Jehovah atsika.

11. Jehovah nitahy iro Kristianin̈y tamy taonjato voanalohany ndray Fanjakan̈any Zan̈ahary tsy navy tamy fotoan̈a niritriretindro. Tamy fomba akory? (Asan’ny Apostoly 6:7)

¹¹ Niatriky raha tsy nampoizindro iro Kristianin̈y tamy taonjato voanalohany. Efa tsy din̈indro, ohatra, haviany Fanjakan̈any Zan̈ahary, fa tsy haindro fo ombian̈a izio manomboko mitondra. (Asa. 1:6, 7) Ke ino raha nataondro? Iro nifen̈y mare nitory. Arakaraka nifen̈andro nitory tamy tany maro, nahitandro fa Jehovah nitahy ezaka nataondro.​—Vakia Asan’ny Apostoly 6:7.

12. Akory nataondro Kristianin̈y tamy taonjato voanalohany lera nisy mosary?

¹² Nisy fotoan̈a nisy mosary mare ‘erantany.’ (Asa. 11:28) Tatranizen̈y koa iro Kristianin̈y tamy taonjato voanalohany. Miniminia hely vokanizen̈y tamindro. Raimandreny iziô mety niasaloha mare aia ahitan̈a hanin̈y. Fa akory fo iro tanora aby efa nieritreritry han̈itatra fanompoan̈a? Asa iro mety nieritreritry tsao tôkony hiambin̈y lera tsisy mosary vo han̈ano zen̈y? Ndray tio raha nahazo iro zen̈y, niezaka Kristianin̈y aby io nampifan̈araka fiain̈anandro tamy raha nisy. Iro nifen̈y fo nitory, erakany vitandro. Ravoravo koa iro nizara raha nanan̈andro tamindro Kristianin̈y ta Jodia tan̈y.​—Asa. 11:29, 30.

13. Ino hatsaran̈a nazondro Kristianin̈y aby io tan̈atiny mosary in̈y?

¹³ Ino hatsaran̈a nazondro Kristianin̈y aby io tan̈atiny mosary in̈y? Lan̈iany nahazo fan̈ampian̈a nahatsapa tsarabe fa nan̈ampy iro Jehovah. (Mat. 6:31-33) Nahatsapa nahainarikitry piaramanompo nan̈ampy iro koa iro. Akory ndraiky iro nan̈amia fan̈amezan̈a na nan̈ano fan̈ampian̈a tamy fomba hafa? Nahatsapa sambatra iro fotony nan̈amia. (Asa. 20:35) Iro jiaby samby nitahiny Jehovah fotony iro nampifan̈araka fiain̈anandro tamy raha nisy.

14. Ino raha nahazo Barnabasy ndreky apostoly Paoly, avio ino vokatranizen̈y? (Asan’ny Apostoly 14:21, 22)

¹⁴ Matetiky niatriky fan̈injehan̈a Kristianin̈y tamy taonjato voanalohany. Ndraikindraiky raha zen̈y tamy fotoan̈a tsy niritriretindro foeky. Diniha baka raha nahazo Barnabasy ndreky apostoly Paoly, taminiro nitory ta  Lystra. Tamy voanalohany, iro olo aby nitandren̈y iro nandray iro tsarabe. Fa tafara tatỳ, nisy panohitry ‘nandresy lahatra vahoaka’ aby io, ke mbala sasany tamindro olo aby nandray iro fo nitorabato Paoly. Efa sambarandro naty izy vo nambelandro. (Asa. 14:19) Fa Barnabasy ndreky Paoly nanohy nitory tantany hafa koa. Ino vokatranizen̈y? Iro nahavita ‘nan̈ampy olo maro hanjary pianatra.’ Tsy zen̈y fo, fa raha nivolan̈indro ndreky modelindro koa nankafatatra mare finoan̈any piaramanompo tamindro. (Vakia Asan’ny Apostoly 14:21, 22.) Maro olo nahazo hatsaran̈a fotony iro roe lahy tsy rivan̈a foeky ndray tio fan̈injehan̈a tampoko. Ke hahazo hatsaran̈a koa atsika izikoa tsy rivan̈a fa manohy man̈ano asa nan̈irahany Jehovah fo.

15. Ino raha ianaranao baka aminy ohatrany Rahalahy Macmillan?

¹⁵ Talohany 1914, vahoakany Jehovah nan̈anten̈a fa hisy raha vitsivitsy hiboaka tsy ho ela. Diniha, ohatra, tantarany Rahalahy Macmillan. Karaha olo maro tamy fotoan̈a zen̈y, Rahalahy Macmillan koa mba nieritreritry fa tsy ho ela izy hanonga andan̈itry. Karaha ty hoizy tamy kabaro nataony tamy Septambra 1914: “Mety ty donko kabaro farany ataoko.” Kanefa tsy io aby kabaro farany nataony. Ty raha nisoratiny tafara tatỳ: “Nety nisy sasany tamintsika nalaky nieritreritry loatra fa atsika direkty hanonga andan̈itry.” Avio hoizy: “Atsika mila mifen̈y fo man̈ano asany Tompo. Efa zen̈y edy raha tôkony hataontsika.” Zen̈y ankitin̈y raha nataony Rahalahy Macmillan. Izy ten̈a nazoto nanompo. Izy nanan̈a tombontsoa hankahery rahalahy maro nigadra nohony finoan̈andro. Nata izy efa natoe, izy mbala nivory tsy tapaka fo. Rahalahy Macmillan nifen̈y fo nan̈ano fanompoan̈a sady niambin̈y valisoanany. Ke ino hatsaran̈a nazony? Ty raha nisoratiny taloha heliny nifatesany taminy 1966: “Finoan̈anaka tsiary nihen̈y.” Ten̈a tsara toetsain̈inany, ke tôkony halaintsika tahaka, intsaka eky izikoa mahadin̈y ela tsy araka niritriretintsika fitsapan̈a iaretantsika.​—Heb. 13:7.

16. Ino problemo tsy nampoizin̈y navoa Herbert Jennings ndreky vadiny? (Jakoba 4:14)

¹⁶ Maro panompony Jehovah miatriky aretin̈y tampoko. Karaha zen̈y, ohatra, Rahalahy Herbert Jennings. b Tamy tantarampiain̈ananany, izy nivolan̈a fa ten̈a tiandro roeny vadiny nan̈ano misionera ta Ghana. Fa tio fo, izy navoany karazan̈a aretintsain̈y mampikorontan̈a fihetsehampo mare. Nangala volan̈a baka tamy Jakoba 4:14 Rahalahy Jennings, ke karaha ty nikahiany raha navoa izy io: “ ‘Amaray’ araiky tsy nampoizinay.” (Vakia.) Karaha ty nisoratiny: “Nila nan̈amboatra sain̈y zahay, ke tsy maintsy niala ta Ghana ndreky kamaradinay aby tan̈y, avio zahay nimpody ta Kanada [han̈araka fitahan̈a].” Jehovah nan̈ampy Rahalahy Jennings ndreky vadiny, ke iro nahavita tsy nivadiky sady nanohy nanompo izy fo ndray tio raha sarotro niain̈andro.

17. Tamy fomba akory modeliny Rahalahy Jennings nankahery piaramanompo?

 ¹⁷ Nankahery olo maro raha nivolan̈iny Rahalahy Jennings amy tantarampiain̈ananany. Nisy ranabavy araiky nanoratra karaha ty: “Ten̈a nanohin̈y fonaka raha nivakiako tan̈aty lahatsoratra io tao. ... Nan̈ampy zaho hanan̈a fomba fihevitry tsara man̈oloan̈a raha mandalo amy fiain̈ananaka nahay fa Ranadahy Jennings tsy maintsy niala taminy asany misionera baka hahavitany hikarakara fahasalaman̈a.” Karaha ty koa raha nisoratiny rahalahy araiky: “Zaho efa antipan̈ahy tan̈aty folo taon̈o, fa avio zaho tsy maintsy niala taminy andraikitrinaka io fotony zaho takany aretintsain̈y. Zaho nahatsiaro efa tsisy dikany foeky, ke matetiky zaho nalahelo mare koa fa namaky tantarampiain̈ananolo. ... Fa ten̈a nankahery zaho nahita fa tsy kivy foeky Rahalahy Jennings.” Hitantsika baka amy zen̈y fa atsika afaka mankahery olo hafa fo, ndray atsika miaritry problemo tsy ampoizin̈y. Nata fiain̈anantsika tsy mandeha erakany niritriretintsika, atsika mbala afaka ho modely amy finoan̈a ndreky fiaretan̈a.​—1 Pet. 5:9.

18. Eraka hitantsika amy sary io, ino raha ianaranao baka amy ranabavy araiky maty vady mipetraka a Nizeria?

¹⁸ Nisy vokany tamy panompony Jehovah maro koa iro antambo karaha ataony valan̈aretin̈y COVID-19 in̈y. Sahiran̈a mare, ohatra, ranabavy araiky ta Nizeria fotony sady tsisy vola, tsisy hanin̈y. Maty vady izy ke izy zaraiky fo mitarimy zanany man̈angy. Tandraraiky, andra maraindrain̈y tamy zen̈y, zanany nan̈ontany izy ino raha handeha hoanindro izikoa fa lany vary kapoaka araiky tavela tamindro tao. Izy nivolan̈a tamy zanany fa iro efa tsisy vola ndreky hanin̈y eky, fa iro mila mangala tahaka viavy maty vady ta Zarefata in̈y, ke handoky hanin̈y tavela ao avio matoky Jehovah mare. (1 Mpanj. 17:8-16) Ndray iro mbala tsendriky tafieritreritry raha handeha hoanindro matsan̈a taminy andra io, iro efa nahazo hanin̈y isankarazany baka tamy piaramanompo. Hanin̈y nazondro io nahampy iro mandilatrany herin̈iandra aroe. Ranabavy io nivolan̈a fa tsy nampoiziny foeky fa kaiky Jehovah nitandren̈y koran̈andro roeny zanany. Hitantsika baka amy zen̈y fa izikoa atsika milampy amy Jehovah, mety hahavy atsika hifandray marikitry aminany raha tsy ampoizin̈y miboaka.​—1 Pet. 5:6, 7.

19. Ino fan̈injehan̈a niaretany Aleksey Yershov?

¹⁹ Maro piaramanompo amintsika niaritry fan̈injehan̈a mety tsy nampoizindro, tatotato zay. Zen̈y iziô raha nahazo Rahalahy Aleksey Yershov mipetraka a Russie. Mbala tsy voasakantsakan̈a loatra asany panompony Jehovah tamy faritry io tamy Rahalahy Yershov vo vita batisa, taminy 1994. Kanefa tafara tatỳ niova rano. Taminy 2020, nidirany lapolisy tran̈onany avio nisavaindro raha jiaby tao. Maro rahanany nalaindro. Fanjava vitsivitsy tafara tatỳ, fanjakan̈a nivolan̈a fa izy zen̈y olondratsy. Baka izy ho azondraha tsarabe, nisy video nalainolo nan̈ano sary tia nianatra Baiboly tan̈aty taon̈o araiky mandilatra, nataondro porofo niampangan̈a izy. Zay fitaka aminy ankitin̈y!

20. Akory nataony Rahalahy Yershov nankafatatra fifandraisany tamy Jehovah?

²⁰ Nisy hatsaran̈a ma nazony Rahalahy Yershov tamy fan̈injehan̈a nahazo izy io? Ia, fotony loso nahaifatatra fo fifandraisany tamy Jehovah. Karaha ty hoizy: “Nahainiaraka nivavaka matetiky fo zahay roeny vadiko. Tsapako fa izikoa tsy tiô Jehovah, tsy ho vitako foeky niaritry raha nandalo in̈y.” Nivolan̈a karaha ty koa izy: “Fianaran̈a manokan̈a nan̈ampy zaho handresy hakivian̈a. Zaho nisaintsain̈y ohatrany panompony Jehovah taloha tan̈y. Maro tantara an̈aty Baiboly ao man̈aboaka fa ten̈a ilain̈y mifen̈y tsy ho taitaitry ndreky matoky Jehovah.”

21. Ino raha nianarantsika tato?

²¹ Ino raha nianarantsika tato? Mety hivadibadiky fiain̈ana amy donia ty. Fa ndray zen̈y, Jehovah tsy maintsy han̈ampy panomponany izikoa iro milampy aminany. Karaha ty volan̈iny andininteny fototro amy fianaran̈a ty: ‘Maro raha sarotro atrefinolo marin̈y, fa Jehovah mamonjy izy amy raha jiaby zen̈y.’ (Sal. 34:19) Ke irarian̈a atsika tsy voly hifantoko aminy angovo hamezany Jehovah atsika, fa tsy amy problemo mahazo atsika. Izikoa atsika man̈ano zen̈y, atsika afaka hivolan̈a karaha raha nivolan̈iny apostoly Paoly ty: “Baka aminy araiky man̈amia angovo zaho in̈y mahavy zaho manan̈a angovo hindesin̈y hiatriky zay raha miboaka.”​—Fil. 4:13.