1. Nan̈ino ma atsika mamaly teny koa fa mivory?

 NAN̈INO ma atsika mandeha mivory? Voanalohany, mba hidera Jehovah. (Sal. 26:12; 111:1) Man̈aton̈o fivorian̈a koa atsika baka atsika afaka mifankahery amy namantsika, an̈atiny andra sarotro zioty. (1 Tes. 5:11) Hahavita raha aroe zen̈y atsika lera mamaly teny ampivorian̈a.

2. Lera ino aby atsika afaka mamaly teny?

² Isaka herin̈iandra, atsika afaka man̈amia valinteny koa fa fivorian̈a. Ohatra, afaka mamaly teny atsika lera farany herin̈iandra amy fianaran̈a Tilikambo Fiambesan̈a ataony fiangonan̈a. Afaka mamaly teny koa atsika amy fivorian̈a andavanandra lera mitsakaraka Valera Arapan̈ahy, amy Fianaran̈a Baiboly Ataony Fiangonan̈a, na aminy anjara hafa misy fiarahan̈a midiniky.

3. Nan̈ino mety ho sarotro amintsika hamaly teny, avio nan̈ino Hebreo 10:24, 25 afaka man̈ampy atsika?

³ Atsika jiaby samby tihidera Jehovah ndreky hankahery piaramanompo, amy valinteny ataontsika. Fa misy raha mety hanakan̈a atsika tsy hamaly teny. Atsika mety mavozo mamaly teny, na atsika mety tihan̈amia valinteny maromaro fa tsy voatondro matetiky erakany tadiavintsika. Ke akory basy atao? Han̈ampy atsika mare raha nivolan̈iny apostoly Paoly amy taratasy nalefany tamindro Hebreo aby io. Nikoran̈iny tao nan̈ino fandihanan̈a mivory io raha ten̈a maventy, ke izy nivolan̈a fa ‘hifankahery’ tôkony ho tanjon̈ontsika aminizio. (Vakia Hebreo 10:24, 25.) Tsy havozo hamaly teny atsika izikoa mangala onon̈o fa valintenintsika ndray fohiky afaka mankahery olo fo, fotony izio man̈aboaka finoan̈antsika. Avio afaka ho ravoravo fo atsika ndray tsy voatondro matetiky erakany itiavantsika izy, fotony mba afaka mamaly teny koa olo hafa.​—1 Pet. 3:8.

4. Ino raha telo hidinihintsika amy lahatsoratra ty?

⁴ Akory ataontsika hifankahery izikoa atsika amy fiangonan̈a madiniky ke vitsy olo mamaly teny? Akory ndraiky izikoa atsika amy fiangonan̈a maventy ke maro olo mamaly teny? Avio akory hahavy valintenintsika hankahery olo tsarabe? Hidinihintsika amy lahatsoratra ty raha telo zen̈y.

5. Akory hahavitantsika hifankahery koa vitsy pan̈atriky?

⁵ Vitsy pamaly teny amy fiangonan̈a madiniky na aminy antokopitory. Ndraikindraiky, mety voatery miambin̈y elaela rahalahy pitariky fianaran̈a vo misy tan̈ana mitsangana. Koa zen̈y, mety ho hitantsika ela oe fivorian̈a, ke loso tsy mankahery atsika. Ino basy raha mety ataonao? Atsangàna matetiky tan̈anao. Zen̈y handrisiky olo hafa hamaly teny matetitetiky koa.

6-7. Ino han̈ampy atsika tsy havozo loatra hamaly teny?

⁶ Ndray mieritreritry hamaly teny fo ma efa mampavozo anao? Tsy anao zaraiky mahatsapa karaha zen̈y fa olo maro. Ke nan̈ino basy izikoa mitady fomba han̈ampy anao tsy havozo loatra hamaly teny, baka anao afaka hankahery iro rahalahy ndreky anabavinao aby io tsarabe? Ino raha mety ataonao?

⁷ Mety han̈ampy anao iziô mimpody mandiniky sosokevitry sasany efa naboaka tamy Tilikambo Fiambesan̈a. b Ohatra amy zen̈y, man̈omàn̈a tsarabe. (Ohab. 21:5) Arakaraka ahaizanao raha handeha hianaran̈a hahavy anao ho von̈ono hamaly teny. Avio ataova fohiky valinteninao. (Ohab. 15:23; 17:27) Tsy havozo loatra anao izikoa tsy maro koran̈a. Valinteny fohiky zen̈y mety fehezanteny araiky na aroe fo. Ino mahatsara zen̈y? Ho moramora amindro rahalahy ndreky ranabavy aby io hahazo raha tianao koran̈iny izikoa anao tsy man̈azava hevitry maro. Izikoa anao man̈amia valinteny tsotra sady amy fomba fivolan̈anao ho hita fa anao nan̈oman̈a tsarabe avio mazava aminao tsara fianaran̈a.

8. Karakory fahitany Jehovah ezaka mare ataonao?

⁸ Akory ndraiky izikoa anao efa nan̈araka sosokevitry aby io kanefa anao mbala mavozo mare hamaly teny mihoatrany indraiky na indroe? Matokisa fa Jehovah mankasitraka ezaka ataonao han̈anaovan̈a zay vitanao. (Lioka 21:1-4) Jehovah tsy man̈iraka anao han̈ano raha tsy ho vitanao. (Fil. 4:5) Ke iritrireta ino raha mety ho vitanao, man̈anaova tanjon̈o mifan̈araka amy zen̈y, avio mivavaha baka anao tsy havozo. Amy voanalohany, ohatra, ataova tanjon̈o han̈amia valinteny fohiky araiky.

9. Nan̈ino mety ho sarotsarotro hahazo valinteny amy fiangonan̈a maventy?

⁹ Mety hafa ndraiky raha manahiran̈a anao izikoa anao amy fiangonan̈a maro pitory. Anao mety matetiky tsy voatondro fotony maro rahalahy ndreky ranabavy mazoto manangantan̈ana. Karaha zen̈y iziô raha tsapany Danielle. c Izy farandraha mazoto mamaly teny eky. Aminany izio an̈isany fanompoan̈a Jehovah ndreky fomba araiky hankahirezan̈a olo, avio man̈ampy izy hatoky tsarabe raha ampianariny Baiboly. Fa lera izy nifindra tamy fiangonan̈a maventy, izy loso mahalan̈a voatondro. Misy fotoan̈a aby izy tsy voatondro foeky na indraiky. Hoizy: “Nahinihiny mare zaho. Karaha hitako very tombontsoa foeky zaho. Izikoa matetiky loatra anao tsy voatondro,  anao loso tafieritreritry tsao izio raha mba efa kinian̈a foeky.”

10. Ino aby raha mety ataontsika baka atsika afaka han̈amia valinteny?

¹⁰ Asa anao efa nahatsapa raha tsapany Danielle io? Izikoa zen̈y, anao mety efa tihan̈etraka foeky ke tsy hamaly teny eky fa hitandren̈y fo. Kanefa aza voly manangantan̈ana. Ino raha mety ataonao? Man̈omàn̈a valinteny maromaro isaka fivorian̈a. Karaha io, izikoa anao tsy voaton̈ono amy voalohandohany fianaran̈a, anao mbala afaka man̈amia valinteny fo afarafara an̈y. Avio lera anao man̈oman̈a Fianaran̈a Tilikambo Fiambesan̈a, diniha ino ifandraisany titrany lahatsoratra io amy fehintsoratra tsiaraikiaraiky. Izikoa anao man̈ano zen̈y, mety hahita raha koran̈iny fo anao amy fianaran̈a io. Fan̈ampinizen̈y koa, anao mety man̈oman̈a valinteny amy fehintsoratra misy fahamarin̈ana lalin̈y sarotsarotro azavain̈y. (1 Kor. 2:10) Nan̈ino? Fotony mety vitsy olo manangantan̈ana amy fehintsoratra karaha zen̈y. Akory ndraiky izikoa anao mbala tsy voatondro fo, ndray efa nifen̈y nan̈araka sosokevitry aby zen̈y, tan̈atiny fivorian̈a maromaro? Anao mety man̈aton̈o rahalahy pitariky fianaran̈a io, alohany fivorian̈a manomboko. Ke volàn̈a aminany, amy fan̈ontanian̈a faha firy anao tihamaly.

11. Mandrisiky atsika han̈ino Filipianina 2:4?

¹¹ Vakia Filipianina 2:4. Nahazo fan̈ahy masin̈y apostoly Paoly ke nandrisiky Kristianin̈y hitady raha mahatsara olo hafa. Akory mety han̈arehantsika torohevitry zen̈y koa fa mivory? Man̈ano zen̈y atsika izikoa mangala onon̈o fa mba tihamaly teny karaha atsika koa olo hafa.

12. Ino fomba tsara mety hankahirezantsika olo hafa koa fa mivory? (Zahava koa sary.)

 ¹² Diniha baka ty: Tsy ambelanao mivolan̈a foeky ma ry namanao lera anaro mikoran̈a, fa tianao anao fo midredran̈a? Hay be fa tsy zen̈y. Tianao koa iro hikoran̈a. Karaha zen̈y koa lera mivory. Tiantsika izikoa maro olo afaka mamaly teny. Ke ambelantsika iro han̈aboaka finoan̈andro. Zen̈y an̈isany fomba ten̈a tsara hankahirezantsika iro rahalahy ndreky ranabavintsika aby io. (1 Kor. 10:24) Alo hizahavantsika akory fomba mety han̈anaovantsika zen̈y.

13. Ino raha mety ataontsika baka ho maromaro olo afaka mamaly teny?

¹³ Voanalohany, ataontsika fohiky valintenintsika baka maromaro olo afaka mamaly. Antipan̈ahy ndreky pitory hafa efa zadraharaha samby afaka man̈amia modely amy zen̈y. Avio ndray fohiky valinteninao, aza mikoran̈a hevitry maro loatra. Izikoa koran̈inao aby hevitry jiaby amy fehintsoratra ao, tsy hahita raha hikoran̈iny eky olo hafa. Amy fehintsoratra araiky ty, ohatra, misy sosokevitry aroe mety koran̈iny: Mila atao fohiky valinteny avio tsy mikoran̈a hevitry maro. Ke izikoa anao mahazo valinteny voanalohany amy fehintsoratra ty, nan̈ino izikoa araiky aminy hevitry aroe io fo koran̈inao.

14. Akory ahaizantsika impiry atsika tôkony hanangantan̈ana? (Zahava koa sary.)

¹⁴ Impiry anao han̈amia valinteny? Anao mila mandiniky tsara baka ahaizanao impiry anao tôkony hanangantan̈ana. Izikoa isaka teteky anao manangantan̈ana, anao miran̈a miforse pitariky fianaran̈a hanondro anao matetiky, kanefa mety misy olo mbala tsendriky namaly. Ke raha zen̈y mety hampakivy olo sasany hanangantan̈ana.​—Mpito. 3:7.

15. a) Tsy tôkony han̈ano akory atsika izikoa tsy voatondro? b) Akory han̈aboahany pitariky fa izy mihevitry olo jiaby? (Zahava efajoro “ Izikoa Anao Mitariky Fianaran̈a.”)

¹⁵ Izikoa maro pitory manangantan̈ana amy fianaran̈a araiky, anao mety tsy ho voatondro matetiky erakany tianao. Ndraikindraiky aby, anao mety tsy ho voatondro foeky. Mety hampakivy ndraiky zen̈y, kanefa aza meloko izikoa anao tsy voatondro.​—Mpito. 7:9.

16. Akory mety hankahirezantsika olo namaly teny?

¹⁶ Ino raha mety ataonao izikoa anao tsy afaka namaly teny erakany tianao? Tandrin̈esa tsara valinteninolo, avio deray iro koa fa ravan̈a. Teny fideran̈a ataonao io mety hankahery iro rahalahinao ndreky ranabavinao aby io, miran̈a amy valinteny tseky nataonao fo. (Ohab. 10:21) Man̈amia teny fideran̈a olo mbala an̈isany fomba hafa ahafahan̈a mifankahery koa.

17. a) Akory mety ataony raimandreny baka han̈ampy zanakandro han̈oman̈a valinteny mety tsara? b) Eraka video io, ino aby raha efatra tôkony hatao koa fa man̈oman̈a valinteny? (Zahava koa lamariky amy pazy ambany.)

¹⁷ Ino koa mety ataontsika baka atsika afaka mifankahery lera mivory? Izikoa anao raimandreny, ampia zanakanao han̈oman̈a valinteny mifan̈araka tsara amy taon̈onany. (Mat. 21:16) Ndraikindraiky, misy hevitry matomboko dinihin̈y amy fianaran̈a, karaha ataony problemony vadian̈a na raha momba fitondranten̈a. Fa ndray zen̈y, mety misy fehintsoratra araiky na aroe afaka valiany tsaiky amizio ao. Ampia koa zanakanao hahay fa tsy voatery ho voatondro fo iro isaka iro manangantan̈ana. Izikoa hazavainao amindro zen̈y, iro tsy ho kivy lera olo hafa voatondro fa tsy iro.​—1 Tim. 6:18. d

18. Akory atao baka atsika tsy hisariky sain̈inolo aminy ain̈intsika lera mamaly teny? (Ohabolana 27:2)

¹⁸ Atsika jiaby afaka man̈oman̈a valinteny man̈amia voninahitry Jehovah sady mankahery piaramanompo. (Ohab. 25:11) Ndraikindraiky atsika mety hitantara hely raha efa niain̈antsika, kanefa tôkony hitandrin̈y atsika amy fotoan̈anizen̈y tsao tafikoran̈a be loatra momba atsika. (Vakia Ohabolana 27:2; 2 Kor. 10:18) Mila mifen̈y atsika mampifantoko  sain̈inolo amy Jehovah, ndreky amy Volan̈anany, avio amy vahoakanany amy fitambarany. (Apok. 4:11) Fa izikoa ndraiky fan̈ontanian̈a amy fehintsoratra araiky man̈iraka atsika hikoran̈a hevitrintsika na raha iain̈antsika, atsika afaka mikoran̈a zen̈y. Misy fan̈ontanian̈a karaha zen̈y iziô ho hitantsika amy fehintsoratra man̈araka.

19. a) Ino vokany izikoa atsika samby mihevitry raha mahatsara pan̈atriky jiaby? (Romanina 1:11, 12) b) Ino raha ten̈a itiavanao man̈amia valinteny amy fivorian̈a?

¹⁹ Ndray tsisy fitsipiky mentitry mikasiky fomba fan̈amezan̈a valinteny, atsika jiaby afaka mifen̈y mankahery olo koa fa mamaly teny. Ohatra, atsika mety man̈amia valinteny matetitetiky, na koa mianatra ho afapo amy valinteny azontsika ndray tsy maro, avio ravoravo koa lera olo hafa mba mahazo valinteny. Izikoa atsika mifantoko amy raha mahatsara olo amy fivorian̈a, ‘ho afaka hifankahery’ atsika jiaby.​—Vakia Romanina 1:11, 12.