1. Ino ma “fiadan̈ana Zan̈ahary” zen̈y, avio ino hatsaran̈a azontsika izikoa atsika mahazo izio? (Filipianina 4:6, 7)

 MISY karazan̈a fiadan̈ana araiky tsy hainolo amy donia ty foeky. Ino ma izio? “Fiadan̈ana Zan̈ahary.” Izio filaminantsain̈y tsapanolo araiky mifandray tsarabe amy Zan̈ahary, Babantsika andan̈itry an̈y. Mahatsiaro voaro mare olo araiky mahazo fiadan̈ana Zan̈ahary io. (Vakia Filipianina 4:6, 7.) Tsy zen̈y fo fa mifandray tsarabe aminolo tia Zan̈ahary koa izy sady mifandray marikitry amy ‘Zan̈ahariny fiadan̈ana.’ (1 Tes. 5:23.) Ke izikoa atsika mahay Babantsika io, avio matoky izy ndreky man̈araka volan̈anany, fiadan̈ana Zan̈ahary io afaka mampilamin̈y fontsika, lera atsika miatriky raha sarotro.

2. Nan̈ino atsika matoky fa atsika afaka hahazo fiadan̈ana Zan̈ahary?

² Maro problemo mety tojy atsika, karaha ataony valan̈aretin̈y, antambo, korontan̈a, na fan̈injehan̈a. Afaka hahazo fiadan̈ana Zan̈ahary fo ma atsika ndray miatriky raha sarotro aby io? Na araiky amindro io fo efa mampavozo mare. Fa ndray zen̈y, Jesosy nivolan̈a tamy pianatranany karaha ty: ‘Fonaro aza ambela hitotoko na havozo.’ (Jaona 14:27) Nakiry izy maro rahalahy ndreky ranabavy nan̈araka torohevitry namezany Jesosy io. Nampiany Jehovah iro, ke nilamin̈y fo sain̈indro ndreky fondro, tan̈atiny iro niatriky fitsapan̈a sarotro mare.

3. Nan̈ino valan̈aretin̈y mety hahavy atsika tsy hiadan̈a?

³ Miova ankitin̈y fiainan̈a koa fa misy valan̈aretin̈y. Aleva onon̈o baka vokatrany COVID-19 taminy ankamarozanolo. Tamy fan̈adihadihan̈a araiky, ohatra, mandilatra antsasakanolo  nan̈ontanian̈a, nivolan̈a fa tsy nahita tôro tsara tan̈aty valan̈aretin̈y in̈y. Nahainaro fo koa olo nazony asaloha dila loatra, kivy mare, nivarin̈y amy figian̈a toaka ndreky fihinanan̈a jamala, mamopoko vady na zanaka, avio olo tihamono ten̈a. Izikoa misy valan̈aretin̈y amy tany misy anao, akory hahavy anao hahazo fiadan̈ana Zan̈ahary fa tsy hiasaloha loatra?

4. Nan̈ino fahaizantsika faminanian̈any Jesosy momba andra farany, mahavy atsika hilamintsain̈y?

⁴ Jesosy efa nivolan̈a fa aminy andra farany, hisy aretin̈y mamono, na valan̈aretin̈y hiparitaka “amy tany maro.” (Lioka 21:11) Nan̈ino fahaizantsika zen̈y mahavy atsika hilamintsain̈y? Tsy gaga atsika koa fa misy valan̈aretin̈y. Raha aby io efa nivolan̈iny Jesosy. Ke arehantsika torohevitry namezany Jesosy olo miain̈y aminy andra farany ty: “Anaro aza mavozo.”​—Mat. 24:6.

5. a) Erakany Filipianina 4:8, 9, ino raha tokony hangatahintsika amy vavaka lera misy valan̈aretin̈y? b) Nan̈ino fitandrin̈esan̈a vaky Baiboly nalain̈a feo mety han̈ampy anao?

⁵ Mora miasaloha mare ndreky mavozo atsika koa fa misy valan̈aretin̈y. Zen̈y ziô raha nahazo ranabavy Desi. b Natiny COVID-19 papaheliny, zanaka papabeny, avio dokoteranany. Ke izy navozo mare tsao ho voany virisy io koa, ke hamindra izio amy mamanany efa matoe. Navozo koa izy tsao ho very asa, ke tsy hahita vola hividianan̈a hanin̈y ndreky han̈ifan̈a tran̈o. Asalohanany aby zen̈y nahavy izy ndraiky tsy tafandry foeky. Nakiry izy, Desi nimpody nilamintsain̈y ndraiky. Ino raha nataony? Vavakanany nataony voafaritry tsara. Izy nangataka Jehovah han̈ampy izy ho kalma ndreky hieritreritry raha mampahery. (Vakia Filipianina 4:8, 9.) Tsy zen̈y fo, izy nitandren̈y Jehovah “nikoran̈a” taminany. Tamy fomba akory? Izy nitandren̈y vaky Baiboly nalain̈a feo. Hoizy: “Kalma oe feony pamaky Baiboly io, ke nampakirikiry asalohanaka ndreky nampahatsiaro zaho fa Jehovah mikarakara zaho.”​—Sal. 94:19.

6. Nan̈ino fianaran̈a manokan̈a ndreky fivorian̈a afaka han̈ampy anao?

⁶ Tsy ho vitantsika han̈ano raha jiaby fataontsika, izikoa fa misy valan̈aretin̈y. Fa ndray zen̈y, aza ambela ho tapaka fianaran̈a manokan̈a ndreky fivorian̈a. Maro tantarany piaramanompo amy boky ndreky gazetintsika, avio amy video. Iro io hampahatsiaro anao fa rahalahy ndreky ranabavinao aby io tsy mivadiky foeky, ndray miaritry raha miran̈a amy ninao. (1 Pet. 5:9) Fivorian̈a han̈ampy anao handiniky raha mankahery baka amy Baiboly. An̈y koa anao afaka mankahery olo hafa ndreky mahazo fankahirezan̈a. (Rom. 1:11, 12) Iritrireta akory fomba nan̈ampiany Jehovah panomponany narary, navozo na latsatokan̈a.  Anao koa man̈ano zen̈y, hatanjaka finoan̈anao ndreky anao hatoky fa Jehovah han̈ampy anao.

7. Ino raha ianaranao baka aminy apostoly Jaona?

⁷ Mifen̈a fo mifandray amindro rahalahinao ndreky ranabavinao aby io. Koa fa misy valan̈aretin̈y, atsika mety tsy afaka hiaroaro na hifandray mivantan̈a aminolo, firaka amy piaramanompo. Amy fotoan̈a karaha zen̈y, anao mety hahatsapa karaha raha tsapany apostoly Jaona. Izy tihahita maso i Gaio kamaradinany. (3 Jaona 13, 14) Efa hainy Jaona fa tamy fotoan̈a io izy mbala tsy afaka hahita Gaio. Akory nataony? Nandifasany taratasy Gaio. Ke izikoa anao mbala tsy afaka mamangy iro rahalahy ndreky ranabavinao aby io, nan̈ino izikoa mba mikaiky iro amy telefony, na man̈ano appel vidéo, na mandefa mesazy amindro? Tsy hahatsiaro latsatokan̈a loatra ndreky hahaiho kalma fo anao izikoa mifen̈y fo mifandray amy piaramanompo. Akory ndraiky tokony hataonao izikoa mbala mare fo asalohanao? Mikahia antipan̈ahy, avio raisa tsara fankahirezan̈a feno fitiavan̈a amezandro.​—Isaia 32:1, 2.

8. Nan̈ino antambo mety hahavy anao tsy hilamintsain̈y?

⁸ Anao ma efa niatriky tondradrano, na horohorontany na motro? Mety niasaloha mare anao tafaranizen̈y, sady mety nahadin̈y ela koa asalohanao. Izikoa nisy olo marikitry fônao naty taminizio, na ravan̈a fanan̈ananao, mety halahelo mare anao, hahatsiaro tsisy tany hitodian̈a, na ho meloko foeky. Fa zen̈y tsy mivolan̈a fa anao tia fanan̈ana loatra na tsy ampy finoan̈a. Mety efa ampoizinolo hahatsapa raha karaha zen̈y anao, fotony mafy raha nahazo anao. (Joba 1:11) Fa ndray an̈atiny raha farany sarotro, anao mbala afaka hilamintsain̈y fo. Amy fomba akory?

9. Ino raha nivolan̈iny Jesosy, ke efa mampioman̈a atsika aminy antambo?

⁹ Aleva onon̈o faminanian̈any Jesosy. Misy olo amy donia ty mieritreritry fa iro tsy ho azony antambo, fa atsika ndraiky tsy karaha zen̈y. Atsika efa man̈ampo fa hahaiho maro antambo, ke mety hisy amindro io avoa atsika. Jesosy baka efa nivolan̈a tamy pan̈aradia izy fa ho hisy “horohorontany matanjaka” ndreky antambo hafa, alohany aviany farany. (Lioka 21:11) Naminan̈y koa izy fa ‘hahaiho maro fo olo tsy man̈araka lalàn̈a’, karaha amy zioty io. Olo, ohatra, mamono olo, kafiry, iô koa fanafihany terôrista. (Mat. 24:12) Jesosy tsiary nivolan̈a fa olo efa tsy jireny Jehovah fo ho voany antambo aby io. Maro panompony Jehovah tsy mivadiky tatrany problemo aby io. (Isaia 57:1; 2 Kor. 11:25) Jehovah mety tsy han̈ano fahagagan̈a hiarovan̈a atsika tsy ho tatrany antambo. Fa ndray zen̈y, izy han̈amia zay raha ilaintsika baka atsika ho kalma fo.

10. Nan̈ino fioman̈antsika amy faviany antambo rango ziô, man̈aboaka fa atsika manan̈a finoan̈a? (Ohabolana 22:3)

¹⁰ Izikoa atsika efa mioman̈a tsialohaloha aminy antambo, ho moramora amintsika ho kalma fo lera izio avy. Tsy ampy finoan̈a ma olo mioman̈a amy faviany antambo zen̈y? Ehe. Fan̈omanan̈a tsialohaloha ataontsika io man̈aboaka tsara fa atsika ten̈a matoky fa Jehovah afaka mikarakara atsika. Nan̈ino? Volan̈a Zan̈ahary baka man̈iraka atsika hioman̈a aminy antambo mety handalo. (Vakia Ohabolana 22:3.) Efa matetiky fandaminan̈a man̈iraka atsika hioman̈a amy raha tampoko. c Hitantsika raha zen̈y na amy gazetintsika, na amy fivorian̈a, na amy filazan̈a. Ke izikoa anao matoky Jehovah ankitin̈y, areha torohevitry zen̈y rango ziô mbala tsisy antambo io.

11. Ino raha ianaranao baka tamy raha nataony Margaret?

 ¹¹ Diniha hely baka raha niain̈any ranabavy Margaret. Manampahifan̈a nan̈iraka izy niala tamy tran̈onany fotony nisy motro naresaka tamy faritry nisy izy. Tamy zen̈y, niaraka nilefa olo jiaby ke feno tomabily lalan̈a, ke tsisy afaka niteky. Margaret tsy afaka niala tamy tomabilinany tao foeky, fotony feno setroko joby tany jiaby. Fa ndray zen̈y, izy tsy naty fotony izy efa nioman̈a tsialohaloha. Akory nataony? Efa nisy sarintany nataony tamy sakanany, ke izio nampiasainy nizahavan̈a lalan̈a hafa hialan̈a tamy faritry io. Efa nisy fotoan̈a aby izy kinia nitondra tomabily tamy lalan̈a io, ke noranora taminany nahita aia tany handihanan̈a koa sendra misy problemo. Nohony izy nioman̈a tsialohaloha, izy tsy naty.

12. Nan̈ino hiaro ain̈intsika atsika izikoa man̈araka toromariky?

¹² Manampahifan̈a mety han̈amia atsika toromariky, na han̈iraka atsika hifindra, na han̈iraka atsika han̈ano raha hafa hiarovan̈a ain̈intsika ndreky olo hafa. Fa ny raha misy, misy olo tsy man̈araka toromariky aby io fotony iro tsy mahafoe fanan̈anandro. Fa akory ndraiky tokony hataontsika Kristianin̈y? Baiboly mivolan̈a karaha ty: ‘Nohony amy Tompo ikia fahifan̈a jiaby naorin̈inolombelon̈o: Na panjaka zen̈y, fotony izy olo an̈abo, na governera, fotony izy nirahiny panjaka.’ (1 Pet. 2:13, 14) Man̈amia taridalan̈a hiarovan̈a atsika koa fandaminan̈a Zan̈ahary. Matetiky, ohatra, atsika ampatsiarovin̈y han̈amia antipan̈ahy nimero azahoan̈a atsika, amy zen̈y iro afaka mikaiky atsika lera misy raha tampoko. Asa ninao efa namianao iro? Mety hahazo taridalan̈a man̈iraka atsika midoko antran̈o atsika, na atsika mety hirahin̈y mandeha mifindra, na ambara atsika fomba hazahoan̈a fan̈ampian̈a, na akory ndreky ombian̈a atsika afaka man̈ampy olo hafa. Ke izikoa atsika tsy man̈araka toromariky aby io, atsika mety hanalisaly fahin̈anantsika ndreky nindro antipan̈ahy aby io. Aleva onon̈o fa iro lelahy tsy mivadiky aby io miaro atsika. (Heb. 13:17) Nivolan̈a karaha ty Margaret: “Zaho ten̈a matoky fa fan̈arehan̈a taridalan̈a namezany antipan̈ahy aby io ndreky fandaminan̈a nan̈avotro zaho.”

13. Akory nahavy Kristianin̈y maro ho ravoravo ndreky hilamintsain̈y fo, ndray iro nifindra toeran̈a?

¹³ Maro rahalahy ndreky ranabavy tsy maintsy nifindra fotony tamy tany nisy iro nisy antambo, na korontan̈a, na lagera. Fa ndray  zen̈y, iro nifen̈y hiain̈y mifan̈araka tamy raha nisy ndreky nan̈ano erakany vitandro tamy fanompoan̈a Jehovah. Mira iro Kristianin̈y tamy taonjato voanalohany niparitaka nohony fan̈injehan̈a, iro rahalahy aby io koa tsy voly ‘mitory vaovao tsarany volan̈a Zan̈ahary.’ (Asa. 8:4) Mitory fo iro fotony zen̈y man̈ampy iro hifantoko amy Fanjakan̈any Zan̈ahary fa tsy amy problemo mahazo iro. Ino vokany? Iro loso ravoravo ndreky milamintsain̈y fo.

14. Nan̈ino fan̈injehan̈a mety hahavy atsika tsy ho kalma?

¹⁴ Koa fa misy fan̈injehan̈a, atsika mety tsy ho afaka han̈ano raha aby man̈ampy atsika ho kalma. Mahatsiaro ravoravo atsika koa fa afaka mivory ndreky mitory malalaka, avio man̈ano raha hafa fataontsika, fotony atsika tsy mavozo tsao ho voasambotro. Fa atsika ndraiky koa sakanan̈a amy raha aby io, atsika mety hiasaloha mare, ndreky hazovo amy raha mety hiboaka. Tsy diso atsika koa mahatsapa karaha zen̈y, fa atsika fo mila mitandrin̈y. Jesosy nivolan̈a fa fan̈injehan̈a mety hahavy pan̈aradia izy halemy finoan̈a. (Jaona 16:1, 2) Ke akory hahavy atsika ho kalma fo ndray misy fan̈injehan̈a?

15. Nan̈ino atsika tsy tokony havozo fan̈injehan̈a? (Jaona 15:20; 16:33)

¹⁵ Mivolan̈a amintsika karaha ty Volan̈a Zan̈ahary: “Hampijalin̈y koa lan̈iany olo man̈iry hahafoe ten̈a amy Zan̈ahary ndreky hihavan̈a amy Kristy Jesosy.” (2 Tim. 3:12) Sarotro tamy sain̈iny rahalahy Andrei nan̈eky zen̈y, koa fa voasakan̈a asantsika tamy tany nisy iro. Hoizy: ‘Maro Vavolombelon̈o Jehovah eto. Akory hahavitany manampahifan̈a hanambotro zahay jiaby eto?’ Eritreritrinany zen̈y tsy nampilamin̈y jerinany, fa nahainampiasaloha izy fo. Fa rahalahy sasany ndraiky nametraka problemo io tamy Jehovah. Iro tsy nieritreritry foeky fa iro tsy ho voasambotro. Haindro fa tsy maintsy ho voasambotro iro andra araiky an̈y, fa asalohandro kirikiry tozay niny Andrei. Ke Andrei tapakevitry hangala tahaka toetsain̈indro. Izy nifen̈y natoky Jehovah, ke izy nanjary nilamintsain̈y. Amy zioty, izy ravoravo fo ndray mbala maro problemo. Afaka ho ravoravo karaha zen̈y koa atsika. Nivolan̈a Jesosy fa atsika mila man̈ampo fan̈injehan̈a. Fa ndray zen̈y, nan̈amia toky atsika koa izy fa atsika  afaka hahavita tsy hivadiky.​—Vakia Jaona 15:20; 16:33.

16. Ino toromariky mila arehantsika koa fa misy fan̈injehan̈a?

¹⁶ Mety hahazo toromariky baka amy birôny sampan̈a ndreky antipan̈ahy atsika, izikoa fa mandrova na manakantsakana mare asantsika fanjakan̈a. Natao hiarovan̈a atsika iro io, amy zen̈y atsika mahazo hanin̈y arapan̈ahy fo, sady hahavita hanohy hitory fo erakany azo atao. Ke mifen̈a erakany vitanao han̈araka toromariky azonao, ndray tsy mazava tsara aminao ino antony nan̈amezan̈a izio. (Jak. 3:17) Avio aza koran̈iny aminolo tsy tokony hahay izy raha momba rahalahy ndreky ranabavy na momba raha ataony fiangonan̈a.​—Mpito. 3:7.

17. Karaha iro apostoly tamy taonjato voanalohany, tapakevitry han̈ino atsika?

¹⁷ Vahoakany Zan̈ahary ‘nirahin̈y nitory momba Jesosy.’ Ke zen̈y an̈isany antony araiky maventy mahavy Satana miady amindro. (Apok. 12:17) Fa aza ambela hampavozo anao Satana ndreky donianany. Ho ravoravo ndreky hilamintsain̈y atsika izikoa mitory ndreky mampianatra fo ndray misy fanoheran̈a. Tamy taonjato voanalohany, manampahifan̈a jiosy aby io nandrova apostoly hitory. Fa iro tsy nivadiky, fa nan̈araka volan̈a Zan̈ahary fo. Iro nitory fo, ke loso ravoravo iro koa fa nan̈ano izio. (Asa. 5:27-29, 41, 42) Mazava hoazy, lera fanjakana mandrova asantsika, atsika mila mitandrin̈y koa fa mitory. (Mat. 10:16) Fa atsika koa man̈ano erakany vitantsika, hilamin̈y sain̈intsika fotony ravoravo amintsika Jehovah, avio atsika mikoran̈a hafatra man̈avotro fahin̈ananolo.

18. Azovy afaka man̈amia atsika ten̈a fiadan̈ana?

¹⁸ Matokisa fa ndray amy fotoan̈a farany sarotro, atsika mbala afaka hiadantsain̈y fo. Amy fotoan̈a karaha zen̈y, mila alaintsika onon̈o fa atsika mila fiadan̈ana Zan̈ahary. Tsisy olo afaka man̈amia fiadan̈ana io koa tsy Jehovah fo. Ke milampia aminany koa fa misy valan̈aretin̈y, antambo, na fan̈injehan̈a. Aza miala amy fandaminan̈anany foeky. Iritrireta raha tsara miambin̈y anao aminy amaray. Anao koa man̈ano zen̈y, ‘Zan̈ahariny fiadan̈ana hiaraka aminao.’ (Fil. 4:9) Amy lahatsoratra man̈araka, atsika handiniky akory an̈ampiantsika piaramanompo baka iro hahazo fiadan̈ana Zan̈ahary, lera iro miatriky problemo.