1. Taloha heliny nifatesany Jesosy, ino raha nivolan̈iny taminy olondratsy araiky nahanton̈o tankilanany? (Lioka 23:39-43)

 NIJALY mare Jesosy ndreky iro dahalo aroe nihanton̈o tankilanany in̈y koa fa nanomboko niady fahin̈ana. (Lioka 23:32, 33) Tsy pianatranany iro olondratsy aroe io fotony ndray iro fo samy nan̈adroadro Jesosy. (Mat. 27:44; Mar. 15:32) Fa araiky tamindro baka tio niova. Ke izy nivolan̈a karaha ty: “Jesosy, mba tsarova zaho, anao koa fa amy Fanjakan̈anao an̈y.” Ho Jesosy taminany: “Niany zaho mivolan̈a aminao fa anao hiaraka aminaka amy Paradisa an̈y.” (Vakia Lioka 23:39-43.) Tsisy porofo ahitan̈a fa olondratsy io nan̈eky hafatra momba ‘Fanjakan̈any lan̈itry’, nitoriany Jesosy. Avio Jesosy tsiary nivolan̈a fa lelahy io ho an̈isany Fanjakan̈a io. (Mat. 4:17) Dikanizen̈y, Paradisa ambony eto nikoran̈iny Jesosy taminio. Nan̈ino atsika mivolan̈a zen̈y?

2. Nan̈ino atsika mivolan̈a fa Jiosy lelahy nibebaka io?

² Mety Jiosy lelahy araiky nibebaka io. Karaha ty hoizy taminy araiky namany: ‘Anao mbala tsy mavozo Zan̈ahary fo, ndray anao efa voasazy karaha izy?’ (Lioka 23:40) Zan̈ahary tokana nitompoendro Jiosy aby io, fa olo baka tamy firenena hafa ndraiky nino zan̈ahary maro. (Eks. 20:2, 3; 1 Kor. 8:5, 6) Izikoa iro baka tamy firenena hafa, mety ho karaha ty fan̈ontanian̈any araiky io: “Anao mbala tsy mavozo iro zan̈ahary aby io fo?” Tsy basinizen̈y, fa Jesosy koa tsy nirahin̈y handeha aminy hafa firenena, fa ‘aminy ondrikondriky very tamy taranaka Israely.’ (Mat. 15:24) Efa nambarany Zan̈ahary iro Jiosy aby io fa Izy mbala hanangana olo maty. Ke raha zen̈y mety efa hainy lelahy nibebaka io. Hita tamy raha nivolan̈iny koa fa izy nino fa Jehovah mbala hamelon̈o Jesosy, baka hanjary panjaka amy Fanjakan̈anany. Mety nan̈anten̈a koa lelahy io fa Zan̈ahary hanangana izy amy maty.

3. Mety ino navy tan̈aty jeriny lelahy nibebaka io tamy Jesosy nikoran̈a momba Paradisa? Hazavà. (Genesisy 2:15)

 ³ Azo antoko fa lelahy nibebaka io nahay raha momba Adama ndreky Eva, avio Paradisa nan̈apitrahany Jehovah iro, fotony izy Jiosy. Ke izy mety nino fa zaridain tsara ambony tany eto, Paradisa nivolan̈iny Jesosy io.​—Vakia Genesisy 2:15.

4. Mandrisiky atsika han̈ino raha nivolan̈iny Jesosy taminy olondratsy in̈y?

⁴ Raha nivolan̈iny Jesosy taminy olondratsy io tokony handrisiky atsika hieritreritry karakory fiain̈ana amy Paradisa. Ino han̈ampy atsika hahay zen̈y? Raha nisy taminy andra nanjakany Panjaka Solomona. Niadan̈a mare baka olo tamy zen̈y. Kanefa Baiboly mivolan̈a fa Jesosy mbala bebeny Solomona. Ke atsika afaka man̈anten̈a fa Jesosy ndreky iro olo hiaraka hanjaka aminany aby io han̈ova tany ty hanjary Paradisa. (Mat. 12:42) Dikanizen̈y, “ondrikondriky hafa” tokony han̈iry hahay ino raha mila ataondro baka iro ho afaka hiain̈y mandrakizay amy Paradisa.​—Jaona 10:16.

5. Araka hevitrinao, han̈ano karakory ma fiain̈ana amy Paradisa zen̈y?

⁵ Ino ma raha avy an̈aty jerinao anao koa fa mandiniky fiain̈ana amy Paradisa? Anao mety tafieritreritry toeran̈a araiky tsara oe, karaha zaridainy Edena in̈y. (Gen. 2:7-9) Mety tsaroanao faminanian̈a nivolan̈iny Mika. Olony Zan̈ahary, hoizy, “samy hipetraka ambaniny rezaindro ndreky aviavindro.” (Mika 4:3, 4) Mety azonao onon̈o koa iro andininteny aby mivolan̈a fa ho treka mare hanin̈y amy zen̈y. (Sal. 72:16; Isaia 65:21, 22) Ke karaha efa hitanao anao an̈aty zaridain tsara, mipetraka amy latabatra araiky feno hanin̈y maro manjary. Mira ren̈inao koa tsitsiko madio salakady man̈itry folera ndreky raha maniry hafa. Ren̈inao koa tokikindry havanao ndreky namanao ravoravo tafiaraka, an̈isanizen̈y iro natsangana tamy maty. Raha aby zen̈y tsy nôfy. Atsika afaka matoky fa ho hisy ambony tany eto ankitin̈y raha zen̈y. Tsy zen̈y fo, ho hisy asa tsara koa miambin̈y atsika amy Paradisa.

6. Ino asa miambin̈y atsika amy Paradisa? (Zahava sary.)

⁶ Jehovah koa fa niasa atsika, atsika nataony afaka mankafỳ asantsika. (Mpito. 2:24) Misaora haresaka tsarabe asantsika amy Fanjakan̈a Arivo Taon̈ony Kristy! Tsy maintsy mila lamba, hanin̈y, ndreky tany hipitrahan̈a baka iro olo tafitsaka velon̈o amy fahorian̈a be. Fa tsy iro fo fa, iô koa olo antapitrisany hatsangana amy maty. Ke ho maro asa miambin̈y atsika, fa izy fo hamparavoravo! Adama ndreky Eva nirahin̈y nikarakara tany. Karaha zen̈y koa, atsika koa hanan̈a tombontsoa hikarakara tany ty firaka izio loso Paradisa. Diniha hely koa baka. Misaora ho tsara mare  hampianatra olo antapitrisany hatsangana amy maty! Misy amindro io ziô mbala tsy mahay raha maro momba Jehovah ndreky fikasan̈anany. Fa sasany ndraiky efa panompony Jehovah tsy nivadiky, talohany naviany Jesosy tambony tany, ke mila hampianarin̈y iro raha jiaby nandalo tafarany nifatesandro.

7. Ino raha mety atokisantsika, avio nan̈ino?

⁷ Atsika afaka matoky fa hiadan̈a mare atsika amy Paradisa. Zay raha ilaintsika ho azontsika, avio raha jiaby hilamin̈y. Nan̈ino atsika mivolan̈a zen̈y? Fotony efa nisy ohatra araiky nan̈aboahany Jehovah tamintsika han̈ano akory fiain̈ana lera Zanany mitondra. Ahitantsika zen̈y fiain̈ana tamy fotoan̈a nanjakany Panjaka Solomona.

8. Karakory nampatanteraka Salamo 37:10, 11, 29, tafarany nanoratany Panjaka Davida izio? (Zahava “Fan̈ontanian̈any Pamaky” amy gazety ty ato.)

⁸ Panjaka Davida nitaritiny fan̈ahy ke nanoratra momba fiain̈ana amy fotoan̈a hanjakany panjaka araiky misain̈y ndreky tsy mivadiky. (Vakia Salamo 37:10, 11, 29.) Matetiky, izikoa atsika fa mikoran̈a momba Paradisa aminolo, atsika mamaky Salamo 37:11. Mety tsarabe zen̈y, fotony Jesosy koa mba nanon̈ono andininy io tamy Toriteninany Tan̈abo Bongo in̈y, ke nan̈ambara fa izio mbala ho tanteraka koa aminy hoavy. (Mat. 5:5) Fa volan̈any Davida io koa ahitan̈a karakory fiain̈ana taminy andrany Panjaka Solomona. Tamy Solomona nitondra vahoakany Israely, niadan̈a ndreky nilamin̈y mare fiain̈ana. Vahoakany Zan̈ahary niain̈y tamy tany ‘treka ronono ndreky antely.’ Zan̈ahary nivolan̈a: ‘Izikoa anaro tsy voly man̈araka fitsipikinaka … hataoko manjaka amy tany io filaminan̈a, ke tsisy raha hampavozo anaro lera anaro mandry.’ (Lev. 20:24; 26:3, 6) Tanteraka raha aby nampan̈antinainy Jehovah zen̈y tamy fotoan̈a nanjakany Solomona. (1 Tan. 22:9; 29:26-28) Jehovah koa nampan̈anten̈a fa olo ratsy fan̈ahy ‘tsy ho hisy eky.’ (Sal. 37:10) Dikanizen̈y efa tanteraka taloha tan̈y, sady mbala ho tanteraka aminy hoavy koa raha koran̈iny Salamo 37:10, 11, 29.

9. Ino raha nivolan̈iny panjakavaviny Sheba momba fitondrasan̈any Solomona?

 ⁹ Ren̈iny panjakavaviny Sheba fa niadan̈a ndreky nilamin̈y fiain̈anany Israelita aby io koa fa nanjaka Solomona. Ke izy nan̈ano dia lavitry firaka ta Jerosalema, baka ahitany masonany raha zen̈y. (1 Mpanj. 10:1) Izikoa izy fa baka nahita fanjakan̈any Solomona, karaha ty hoizy: ‘Mbala tsy antsasany foeky nambara zaho. ... Sambatra olonao, avio sambatra koa panomponao mitsangana man̈oloan̈a anao eto fo, fotony iro maharen̈y fahendrenanao.’ (1 Mpanj. 10:6-8) Fa fiain̈ana tamy fotoan̈a nanjakany Solomona io kandindon̈ony raha handeha hataony Jehovah aminy olombelon̈o lera Jesosy Zanany mitondra.

10. Nan̈ino atsika mivolan̈a fa Jesosy mbala bebeny Solomona?

¹⁰ Jesosy mbala bebeny Solomona, amy raha jiaby. Solomona tsy lavorary. Maro hadisovan̈a maventy nataony ke nisy vokany ratsy tamy vahoakany Zan̈ahary. Jesosy ndraiky tsy karaha zen̈y. Izy Pitondra lavorary, ke tsy man̈ano diso foeky. (Lioka 1:32; Heb. 4:14, 15) Tsy vitany zen̈y fo fa, izy tsy nivadiky tamy Jehovah foeky ndray tio fitsapan̈a farany mafy nataony Satana. Naboakany Kristy tsarabe fa tsisy andra izy hanota na hampiditry problemo aminolo indesiny. Ke tsisy Panjaka tsara mandilatra izy!

11. Azovy han̈ampy Jesosy hitondra?

¹¹ Ho hisy olo 144 000 hiaraka hanjaka amy Jesosy. Iro hiaraka hiasa aminany hikarakara olombelon̈o ndreky han̈atanteraka fikasan̈any Jehovah momba tany. (Apok. 14:1-3) Efa maro fitsapan̈a ndreky raha sarotro niaretandro taminiro mbala tambony tany, ke ho tsapandro tsarabe raha mavoa olombelon̈o. Fa ino ma asa ten̈a hataondro?

12. Ino asa hirahiny Jehovah hataondro 144 000 aby io?

¹² Mbala maromarony asa nataony Solomona, asa handeha hataony Jesosy ndreky iro voahosotro aby io. Nikarakara vahoaka tamy tany araiky fo baka Panjaka Solomona. Fa olo aby hanjaka amy Fanjakan̈any Zan̈ahary ndraiky handeha hikarakara olo andrivony tapitrisa man̈erantany. Maventy ankitin̈y voninahitry amezany Jehovah iro 144 000 aby io!

13. Ino andraikitry manokan̈a hataondro hiaraka hanjaka amy Jesosy?

¹³ Karaha Jesosy fo, iro 144 000 aby io ho panjaka ndreky pisoron̈o. (Apok. 5:10) Tamy Lalàn̈any Mosesy, andraikitriny pisoron̈o nan̈ampy vahoaka baka iro tsy harary ndreky hifandray marikitry amy Jehovah. Lalàn̈any Mosesy in̈y ‘kandindon̈ony raha tsara ho avy fo.’ Dikanizen̈y, iro hiaraka hanjaka amy Jesosy aby io handeha han̈ampy vahoakany Zan̈ahary ho salama tsara ndreky hifandray marikitry amy Jehovah. (Heb. 10:1) Fa ndray zen̈y, mbala tsendriky haintsika akory fomba hifandraisandro panjaka ndreky pisoron̈o aby io amy vahoakany Fanjakan̈any Zan̈ahary ambony tany eto. Ndray karakory ndray karakory raha handeha hataony Jehovah, ny raha azontsika antoko, tsy maintsy hahazo taridalan̈a ilaindro fo olo hipetraka amy Paradisa ambony tany eto.​—Apok. 21:3, 4.

14. Han̈ano akory fifandraisan̈any “ondrikondriky hafa” ndreky iro rahalahiny Kristy aby io?

¹⁴ “Ondrikondriky vitsy” nikahiany Jesosy iro olo hiaraka hanjaka aminany. (Lioka 12:32) Nisy andianolo hafa koa nikoran̈iny, “ondrikondriky hafa” nikahiany iro io. Andiany ondrikondriky araiky fo iro andiany aroe  io. (Jaona 10:16) Efa miaraka miasa iro io amy zioty, avio mbala hiaraka hiasa fo koa iro lera tany ty hanjary Paradisa. Fa amy fotoan̈a zen̈y, efa andan̈itry an̈y iro “ondrikondriky vitsy” aby io. “Ondrikondriky hafa” ndraiky hankafỳ fiain̈ana mandrakizay ambony tany eto. Fa ndray zen̈y, misy raha mila ataony “ondrikondriky hafa” koa tiandro hiain̈y amy Paradisa.

15. a) Akory ataony “ondrikondriky hafa” miaraka miasa amindro rahalahiny Kristy aby io? b) Akory hangalanao tahaka rahalahy amy farmasỳ io? (Zahava sary.)

¹⁵ Naty olondratsy in̈y tafarany koran̈andro ndreky Jesosy. Ke izy tsy afaka nan̈aboaka fa izy nankasitraka raha nataony Jesosy taminany. Atsika “ondrikondriky hafa” ndraiky tsy karaha zen̈y. Maro raha mety ataontsika an̈aboahan̈a fa atsika mankasitraka Jesosy. Ino ohatra? Amy fomba itondrasantsika iro rahalahinany voahosotro aby io. Jesosy efa nivolan̈a fa arakarakany zen̈y hitsarany atsika. (Mat. 25:31-40) Manohan̈a iro, ziô, atsika izikoa mazoto man̈ampy iro aminy asa fitorian̈a ndreky fampianaran̈a. (Mat. 28:18-20) Zen̈y mahavy atsika tihampiasa tsara iro fitaovan̈a fampianaran̈a Baiboly amezandro atsika, karaha ataony boky Mankafiza Fiain̈ana Tsisy Farany! Efa mitariky fampianaran̈a Baiboly ma anao amy zioty? Izikoa tsendriky, nan̈ino koa man̈ano tanjon̈o hitariky fampianaran̈a Baiboly aminolo maro erakany vitanao?

16. Ino raha mety ataontsika rango ziô, baka atsika hanjary vahoakany Fanjakan̈any Zan̈ahary?

¹⁶ Efa hiambin̈y avy amy Paradisa ma atsika vo hiezaka hanan̈a toetry tiany Jehovah anan̈anolo hipetraka ao? Ehe. Rango zioty atsika efa afaka mifen̈y ho olo mafatoky, na amy raha volan̈intsika zen̈y na amy raha ataontsika. Mifen̈y koa atsika hahay handanjalanja amy raha ataontsika. Tsy zen̈y fo, miezaka koa atsika tsy hivadiky amy Jehovah, amy vadintsika ndreky amy piaramanompo amintsika. Izikoa rango atsika mbala miain̈y amy donia ratsy ty efa mifen̈y man̈araka volan̈a Jehovah, ho moramora amintsika koa han̈ano zen̈y lera amy donia vaovao. Hita fa von̈ono ankitin̈y atsika hiain̈y amy Paradisa izikoa rango  ziô atsika efa mifen̈y hanan̈a toetry ndreky fahaizan̈a ilain̈y an̈y. Zahava amy gazety ty ato lahatsoratra “Anao ma Efa Von̈ono ‘Handova Tany’?”

17. Tokony hampakivy atsika ma fahotan̈a nataontsika taloha? Hazavà.

¹⁷ Mifen̈a koa tsy han̈ameloten̈a eky izikoa nisy fahotan̈a maventy nataonao taloha. Marin̈y ndraiky fa vidipan̈avotan̈a io tsy handeha ataontsika fan̈odian̈a ‘kinia han̈anaovan̈a fahotan̈a.’ (Heb. 10:26-31) Fa izikoa anao efa nibebaka ankitin̈y tamy fahotan̈a maventy nataonao, sady nangataka fan̈ampian̈a tamy Jehovah ndreky taminy antipan̈ahy, avio niala tamy raha ratsy vitanao, matokisa fa Jehovah efa nan̈ambela hadisovan̈anao. (Isaia 55:7; Asa. 3:19) Aleva onon̈o baka raha nivolan̈iny Jesosy tamindro Fariseo aby io, hoizy: ‘Diako atỳ tsy hikaiky olo marin̈y, fa panota.’ (Mat. 9:13) Vidipan̈avotan̈a io mahampy handrakofan̈a fahotan̈antsika jiaby.

18. Ino raha mba tianao koran̈iny aminy olondratsy naty tankilany Jesosy in̈y?

¹⁸ Miniminia baka anao amy Paradisa mikoran̈a aminy olondratsy nikoran̈esany Jesosy in̈y! Azo antoko fa anaro roe samy hivolan̈a fa anaro ten̈a mankasitraka soron̈o nataony Jesosy. Anao mety han̈iraka izy hitantara aminao raha nandalo taloha heliny nifatesany Jesosy. Mety han̈ontanianao izy koa ino raha tsapany izikoa Jesosy fa namaly fangatahan̈anany. Fa ndray izy koa mety han̈ontany anao karakory fiain̈ana taminy andra farany zen̈y. Tombontsoa maventy nintsika hiaraka hianatra Volan̈a Zan̈ahary aminolo karaha lelahy io!​—Efes. 4:22-24.

19. Nan̈ino tsy mety hampahempaka miain̈y amy Paradisa? (Zahava sary amy fon̈ony gazety ty.)

¹⁹ Tsy mahempaka foeky fiain̈ana amy Paradisa. Amy fotoan̈a zen̈y, hisy olo vaovao fo hifanojy amintsika, sady ho hisy asa matomboko koa hataontsika. Fa ny ten̈a tsara, ho afaka hianatra raha vaovao momba Babantsika andan̈itry an̈y fo atsika isanandra, avio ho ravoravo atsika hankafỳ raha namezany atsika. Atsika tsy ho lany raha hianaran̈a momba izy ndreky momba raha niforon̈iny. Arakarakany ahilan̈any fotoan̈a hiain̈antsika, hitombosany fitiavantsika Zan̈ahary. Ten̈a mankasitraka Jehovah ndreky Jesosy atsika, fotony iro mampan̈anten̈a atsika fa atsika afaka hiain̈y tsisy farany amy Paradisa!