Jehovah izikoa fa nan̈iraka olombelon̈o ‘hameno tany avio hanjaka amizio’, tiany aboaka amy zen̈y fa hanjary paradisa tany jiaby afara an̈y. (Gen. 1:28) Mila man̈araka didy io koa lan̈iany olo hiain̈y mandrakizay. Fa amy zen̈y mbala tsendriky misy tany paradisa mety hitarin̈y, fotony zaridainy Edena efa tsisy. Ke miaraka Aramagedona tapitry, maro asa mila hataontsika fotony atsika han̈adio tany robadrobaka jiaby. Azo antoko fa mafy asa miambin̈y atsika!

Raha zen̈y mampatsiaro atsika asa nataondro Israelita aby io, iro koa fa nimpody baka ta Babylony. Tsisy olo nipetraka tamy tanindro tan̈atiny 70 taon̈o. Nakiry izy, Isaia efa nivolan̈a fa ho vitandro han̈ampody ndraiky tany io ho tsara, fotony Jehovah hitahy iro. Karaha ty nambarany faminanian̈a io: ‘Hataony karaha Edena tany tsisy raha maniry an̈y, avio lemaka paiky hatao miran̈a zaridain̈iny Jehovah.’ (Isaia 51:3) Ino raha niboaka baka tio? Nampiany Jehovah iro Israelita aby io, ke vitandro ankitin̈y nan̈ampody tany io ho tsara karaha taloha. Karaha zen̈y koa, Jehovah  hitahy iro olo handova tany ke ho vitandro han̈ova izio ho paradisa. Ke izikoa anao man̈iry han̈amia tan̈ana aminy asa be zen̈y, rango ziô anao efa afaka man̈aboaka fahavon̈osan̈anao.

Ataova erakany vitanao baka madio ndreky milamin̈y fo, ohatra, tran̈onao avio tokotaninao, nata tsy man̈ano karaha zen̈y iry jiraninao. Ankoatrany zen̈y, anao koa afaka man̈ampy amy fan̈adiovan̈a ndreky fikobabian̈a Tran̈o Fivorian̈a ndreky Tran̈o Fan̈anaovan̈a Fivoriambe. Izikoa anao afaka, anao mety mameno fangatahan̈a han̈ano asa antsitrapo han̈ampy olo tatrany antambo. Fan̈anaovanao raha zen̈y man̈aboaka fa anao von̈ono han̈ampy izikoa fa ilain̈y. Ke iritrireta ty: ‘Ino ma raha mety hianarako rango zioty, ke hampiasaiko izikoa zaho ambelany Jehovah handova tany?’

Niaraka Jesosy baka namelon̈o tsaiky man̈angy zanakany Jairo in̈y, izy nan̈iraka tsaiky io hamezan̈a hanin̈y. (Mar. 5:42, 43) Nety tsy sarotro nikarakara tsaiky 12 taon̈o io. Fa miniminia ndraiky asa be miambin̈y atsika lera fa tanteraka volan̈a Jesosy ty: ‘Olo jiaby ampasan̈a haharen̈y feonany, ke iro hiboaka.’ (Jaona 5:28, 29) Marin̈y fa Baiboly tsy mikoran̈a raha maro, fa hay be fa olo aby io tsy maintsy hampian̈a hahazo hanin̈y, tran̈o hipitrahan̈a, ndreky lamba. Ke rango zioty, asa anao efa afaka man̈aboaka fa anao von̈ono han̈ampy? Ty misy raha vitsivitsy tsara iritriretinao.

Asa anao mba manoratra an̈aran̈a hikaiky piandraikitry faritry hihina antran̈onao an̈y, lera misy filazan̈a fa iro ho avy hitsidiky fiangonan̈anaro? Izikoa misy Betelita voatendry hanompo amy saha, na misy piandraikitry faritry tsy man̈ano asany faritry eky, asa anao afaka man̈ampy iro hitady tran̈o? Izikoa misy fivoriambeny vondromparitry na vondromparitry manokan̈a atao amy faritry misy anao, afaka man̈ano asa antsitrapo aloha na afarany fivoriambe ma anao? Sa anao afaka man̈ampy hitsena vahiny?

Eraka raha koran̈iny Asan’ny Apostoly 24:15, atsika man̈anten̈a fa mandeha andrivony tapitrisa olo hatsangana amy maty. Maro amindro io mbala tsiary nahay raha momba Jehovah. Fa lera iro hatsangana amy maty iro ho afaka hianatra raha momba izy. a Panompony Jehovah tsy mivadiky sady efa zadraharaha hampianatra iro. (Isaia 11:9) Efa miambin̈y mare fotoan̈a zen̈y i Charlotte. Izy efa nitory tan Eropy, Ameriky Atsimo, ndreky Afriky. Ravoravo izy nivolan̈a karaha ty: “Efa tsy din̈iko hampianatra olo hatsangana amy maty aby io. Lera zaho mamaky momba olo taloha tan̈y, matetiky ho zaho an̈aty jeriko an̈y: ‘Mety tsy karaha io foeky fiain̈ananany izikoa izy nahay Jehovah.’ Efa tsy din̈iko hikoran̈a amindro raha momba Jehovah ndreky han̈ambara amindro fa ho tsara mare fiain̈anandro izikoa iro manompo izy.”

Nata iro panompony Zan̈ahary tsy nivadiky, velon̈o talohany naviany Jesosy tambony tany, mbala mila mianatra raha maro koa. Maro faminanian̈a nisoratiny Daniela kanefa tsy hainy dikany. (Dan. 12:8) Iritrireta hely haravoan̈a ndreky tombontsoa anan̈antsika han̈azava aminany fomba nahatantirany faminanian̈a aby io. Karaha zen̈y koa lera han̈azava amy Rota ndreky Naomy fa Mesia mbala an̈isany taranakandro. Ho ravoravo mare atsika amy zen̈y hampianatra olo erantany. Amy fotoan̈a zen̈y, efa tsisy eky problemo ndreky sakantsakan̈a misy amy donia ratsy ty.

Akory an̈aboahanao rango zioty fa anao efa von̈ono hampianatra iro olo hatsangana amy maty aby io? Ty misy fomba araiky: Mifen̈a hahay hampianatra tsarabe avio mazotoa mitory tsy tapaka. (Mat. 24:14) Amy zioty anao mety efa matoe na miatriky raha hafa tsy man̈ambela anao hitory erakany tianao, fa ndray zen̈y, mifen̈a fo man̈ano erakany vitanao. Zen̈y han̈aboahanao fa anao ten̈a man̈iry hampianatra iro olo hatsangana amy maty aby io.

Ke ty misy fan̈ontanian̈a maventy tsara dinihinao: Anao ma efa man̈iry handova tany ty ankitin̈y? Efa tsy din̈inao ma han̈ova tany ho paradisa, avio hikarakara ndreky hampianatra olo hatsangana amy maty? Izikoa zen̈y, rango zioty, mifen̈a man̈ano asa mitovitovy aminy asa miambin̈y anao lera anao handova tany. Zen̈y han̈aboahanao fa anao efa pare hiain̈y tsisy farany ambony tany.