Asa nivakianao tsarabe Tilikambo Fiambesan̈a tamy taon̈o ty? Izikoa zen̈y, zahava asa hainao valiny fan̈ontanian̈a aby ty:

Ino hatsaran̈a ho azontsika izikoa atsika mampiasa fotoan̈antsika hikoran̈ana, hitandrin̈esan̈a, avio hieritreretan̈a raha momba Jehovah?

Atsika hanjary han̈ano fanapahankevitry tsara, hitombo fahaizantsika mampianatra, hahaiho fatatra finoan̈antsika, avio hitombo fitiavantsika Jehovah.​—w22.01, p. 30-31.

Ino vokany izikoa rango zioty atsika efa mianatra matoky Jehovah ndreky solonten̈anany aby io?

Rango zioty atsika mila mianatra matoky fomba andaminany Jehovah raha, ke hatoky taridalan̈a ndreky fanapahankevitrindro antipan̈ahy aby io. Amy zen̈y koa fa avy fahorian̈a be, atsika efa von̈ono han̈araka toromariky jiaby azontsika, ndray somary hafahafa na karaha sarotro arehan̈a.​—w22.02, p. 4-6.

Ino raha tiany anjely araiky koran̈iny taminizy nivolan̈a tamy Zakaria momba ‘pilao (na fil à plomb) amy tan̈any Zerobabela’ governera? (Zak. 4:8-10)

Fahitan̈a io nan̈amia toky vahoakany Zan̈ahary fa ho vita firaka amy farany fiasan̈a tempoly io, sady hifan̈araka tsarabe aminy itiavany Jehovah izy, ndray izio zahan̈a karaha tsotra hely.​—w22.03, p. 16-17.

Akory hahavy atsika “ho modely ... amy volan̈a”? (1 Tim. 4:12)

Atsika tsara fan̈ahy ndreky man̈aja olo koa fa manompo, mihira amy fô jiaby ndreky mifen̈y fo man̈amia valinteny isaka fivorian̈a, tsy mavandy, man̈ano koran̈a mankahery, avio tsy manihitihy olo.​—w22.04, p. 6-9.

Apokalypsy 13:1, 2 mikoran̈a momba biby dy (fanjakan̈a) karaha amy Daniela toko faha-​7. Fa amy Daniela ao fo biby dy efatra samihafa, fa aminy Apokalypsy ndraiky araiky fo. Nan̈ino?

Tsy manondro fanjakan̈a araiky, karaha ataony Roma fo biby dy koran̈iny Apokalypsy toko faha-​13 io. Fa izio manondro fanjakan̈a arapolitiky jiaby nisy tambony tany teto rango nisiany tantaranolombelon̈o.​—w22.05, p. 9.

Akory an̈aboahanao fa anao matoky fan̈anaovany Jehovah ny rariny?

Izikoa nisy olo nanihitihy anao, na nan̈ano raha mampameloko anao, na nanota taminao, aza meloko na mitana heloko ampô eky. Ankìn̈a amy Jehovah raha mahazo anao. Izy han̈adoso raha ratsy jiaby vokatrany fahotan̈a.​—w22.06, p. 10-11.

Ino raha tokony halainy rahalahy araiky onon̈o izikoa izy irahin̈y mivavaka amy fivorian̈a?

Vavaka tsy natao han̈anaran̈a fiangonan̈a na han̈anaovan̈a filazan̈a. Tsy mila atao ‘lava be’ vavaka, intsaka eky amy fanombohany fivorian̈a. (Mat. 6:7)​—w22.07, p. 24-25.

“Hatsangana amy fitsaran̈a” olo “nan̈ano raha ratsy”, ino ma dikanizen̈y? (Jaona 5:29)

Iro tsy ho voaheloko amy raha nataondro talohany iro naty. Iro hitsarain̈y arakaraka raha hataondro ndreky fitondranten̈andro, afarany hananganan̈a iro.​—w22.09, p. 18.

Ino fampirisihan̈a nataony J. Rutherford tamy fivoriambe araiky tamy Septambra 1922?

Tamy fivoriambe araiky ta Cedar Point, ta Etazonỳ, izy nan̈ambara karaha ty: “Efa manjaka Panjaka! Anaro irahiny han̈ambara raha zen̈y. Ke ambarà, ambarà, ambarà, raha momba Panjaka io ndreky Fanjakan̈anany!”​—w22.10, p. 3-5.

Eraka raha koran̈iny Isaia toko faha-​30, ino aby fomba telo an̈ampiany Zan̈ahary atsika hiaritry?

Aboakany toko io fa izy 1) mitandren̈y ndreky mamaly vavakantsika, 2) man̈amia taridalan̈a atsika, avio 3) mitahy atsika rango zioty firaka aminy hoavy.​—w22.11, p. 9.

Nan̈ino atsika mivolan̈a fa Salamo 37:10, 11, 29 efa tanteraka taloha tan̈y sady mbala ho tanteraka koa aminy hoavy?

Raha nivolan̈iny Davida io mety tsara ivolan̈ana fitahian̈a nazondro Israelita aby io, tamy fotoan̈a nanjakany Solomona. Nanon̈ono andininy faha-11 i Jesosy sady nivolan̈a fa izio ho tanteraka amy Paradisa. (Mat. 5:5; Lioka 23:43)​—w22.12, p. 8-10, 14.