1. Nan̈ino atsika mila misaintsain̈y fampan̈antinan̈any Jehovah momba fiain̈ana tsisy farany?

 JEHOVAH mampan̈anten̈a fa hahazo “fiain̈ana tsisy farany” lan̈iany olo man̈araka volan̈anany. (Rom. 6:23) Arakaraka hisaintsain̈antsika raha tsarabe hamezany atsika io, hahaihitombo fo fitiavantsika Jehovah. Iritrireta hely baka ty: Tia atsika mare Babantsika be fitiavan̈a andan̈itry an̈y matoa izy man̈amia atsika kadô io, amy zen̈y atsika tsy hisaraka aminany foeky.

2. Man̈ampy atsika han̈ino fampan̈antinan̈a fiain̈ana tsisy farany?

² Maro raha mitsapa finoan̈antsika amy zioty, fa fampan̈antinan̈any Zan̈ahary fiain̈ana tsisy farany io man̈ampy atsika hiaritry raha aby zen̈y. Ke ndray mandrahon̈o hamono atsika iro fahavalontsika aby io, atsika tsy voly hanompo Jehovah. Nan̈ino? Antony araiky zioty, haintsika fa izikoa atsika tsy mivadiky amy Jehovah, ndray atsika maty, izy hamelon̈o atsika. Tsy zen̈y fo fa atsika koa afaka man̈anten̈a tsy hofoaty eky. (Jaona 5:28, 29; 1 Kor. 15:55-58; Heb. 2:15) Nan̈ino atsika matoky fa ho afaka hiain̈y tsisy farany ankitin̈y atsika? Handiniky zen̈y atsika ziô.

3. Nan̈ino atsika matoky fa Jehovah mahavita man̈ano raha hahavy atsika ho velon̈o tsisy farany? (Salamo 102:12, 24, 27)

³ Haintsika fa vitany Jehovah man̈ano raha hahavy atsika ho velon̈o tsisy farany. Nan̈ino? Fotony izy Loharanony fahin̈ana sady velon̈o tsisy farany. (Sal. 36:9) Jehovah efa nisy fo letrizay, sady mbala ho hisy fo koa mandrakizay. Misy andininteny vitsivitsy mankamarin̈y zen̈y. Ohatra, Salamo 90:2  mivolan̈a fa Jehovah efa nisy ‘letrizay firaka mandrakizay.’ Karaha zen̈y koa koran̈iny Salamo faha-​102. (Vakia Salamo 102:12, 24, 27.) Karaha ty koa raha nisoratiny paminan̈y Habakoka momba Babantsika andan̈itry an̈y: ‘Tsy efa nisy fo ma anao letrizay, Jehovah e? Tsy hofoaty anao Zan̈ahariko ô, anao Araiky Masin̈y ivavahako.’​—Hab. 1:12.

4. Tokony hiasaloha ma atsika izikoa tsy takatra jerintsika fa Jehovah efa nisy fo rango zay? Hazavà.

⁴ Sarotro aminao ma mieritreritry fa Jehovah misy fo “mandrakizay”? (Isaia 40:28) Tsy anao zaraiky mahatsapa karaha zen̈y. Karaha ty raha nivolan̈iny Eliho momba Zan̈ahary: ‘Tsy takatry jery foeky firy taon̈onany.’ (Joba 36:26) Fa ndray misy raha araiky tsy takatra jerintsika, zen̈y tsy midika fa raha io tsy marin̈y. Karaha zen̈y, ohatra, hazavan̈a. Mety tsy ten̈a haintsika tsarabe raha mombamomba izio, ke zen̈y ma midika fa hazavan̈a io tsisy? Ehe. Miran̈a zen̈y koa, tsisy andra hahaizantsika tsarabe nan̈ino Jehovah efa nisy fo rango zay ndreky firaka mandrakizay. Fa ndray zen̈y tsy mazava amintsika, zen̈y tsy midika fa Zan̈ahary tsy velon̈o mandrakizay. Tsy miankin̈y amy raha takatra jerintsika raha marin̈y momba Pamoron̈o io. (Rom. 11:33-36) Izy efa nisy talohany nisiany raha jiaby, an̈isany zen̈y masoandra ndreky lakintan̈a. Jehovah man̈amia toky atsika fa izy ‘Araiky niasa tany ty taminy angovonany.’ Efa nisy fo koa izy talohany izy ‘namelatra lan̈itry.’ (Jer. 51:15; Asa. 17:24) Ino koa antony hafa mahavy atsika matoky fa atsika ho afaka hiain̈y tsisy farany?

5. Afaka nan̈anten̈a ino Adama ndreky Eva?

⁵ Ankoatrany olombelon̈o, raha manampahin̈ana jiaby niasainy Jehovah ambony tany eto mety maty aby. Ten̈a miavaka fahafahan̈a namezany Jehovah olombelon̈o fotony iro nataony afaka tsy hofoaty foeky. Fa ndray zen̈y, izy nampitandrin̈y Adama karaha ty: “Aza ahanin̈y voany kakazo ahaizan̈a ny tsara ndreky ratsy, fa aminy andra ihinananao izio, anao hofoaty ankitin̈y.” (Gen. 2:17) Tsy naty Adama ndreky Eva otrizay izikoa iro nan̈araka volan̈any Jehovah. Azo antoko fa mety nambelany Jehovah hihina tamy ‘voany kakazony fiain̈ana’ koa iro. Izio baka nan̈amia toky fa iro ‘hiain̈y tsisy farany’, eraka raha efa nivolan̈iny Jehovah. b​—Gen. 3:22.

6-7. a) Nan̈ino koa atsika mivolan̈a fa olombelon̈o tsy niforon̈iny hofoaty? b) Ino raha mba tianao hatao lera anao miain̈y mandrakizay? (Zahava sary.)

⁶ Hitany pahay siansy sasany fa betrontsika io mahavita mikajy fan̈azavan̈a maromarony  raha ampidirintsika an̈aty jerintsika aminy andra jiaby iain̈antsika, amy zioty. Ten̈a maharikian̈a raha zen̈y! Taminy 2010, nisy gazety amerikain araiky momba siansy nan̈ambara fa betrontsika io afaka man̈ajary fan̈azavan̈a kadiriny 2,5 tapitrisa ziga. Raha zen̈y efa miran̈a hamarozany fan̈azavan̈a mandeha amy tele an̈atiny telo tapitrisa lera (na mandilatrany 300 taon̈o). Kanefa betrontsika io mety mbala mahavita mikajy fan̈azavan̈a maromarony zen̈y. Zen̈y porofo fa betrontsika io nataony Jehovah afaka mikajy fan̈azavan̈a maromarony raha haintsika an̈atiny 70 na 80 taon̈o fo.​—Sal. 90:10.

⁷ Ankoatrany zen̈y, Jehovah koa fa niasa atsika, atsika nataony man̈iry ho velon̈o fo. Baiboly mivolan̈a fa nataony Zan̈ahary ‘tan̈aty fonolombelon̈o fan̈irian̈a hiain̈y mandrakizay.’ (Mpito. 3:11) Zen̈y mahavy fahafatesan̈a io hitantsika mira fahavalontsika. (1 Kor. 15:26) Tsisy amintsika, ohatra, izikoa fa marary mare, mipetraka fo miambin̈y andra hifatesan̈a. Fa ino raha ataontsika? Matetiky atsika mandeha amy dokotera avio mihina aody. Atsika man̈ano zay raha vitantsika baka tsy hofoaty. Tsy zen̈y fo fa, izikoa misy havantsika maty, na tanora izio na matoe, atsika malahelo mare an̈aty fotoan̈a lava. (Jaona 11:32, 33) Ke matoa atsika nataony Pamoron̈o be fitiavan̈a io afaka mianatra raha fo mandrakizay, avio nataony man̈iry hiain̈y fo, dikanizen̈y atsika tiany hiain̈y tsisy farany. Fa mbala misy antony maro koa mahavy atsika mino fa atsika afaka hiain̈y tsisy farany. Alô atsika handiniky raha nataony Jehovah taloha tan̈y ndreky amy zioty, man̈aporofo fa mbala tsy niova fikasan̈anany tamy voanalohany tan̈y.

8. Ino raha ampianariny Isaia 55:11 atsika momba fikasan̈any Jehovah amintsika?

⁸ Adama ndreky Eva koa fa nanota, nanjary maty koa taranakandro. Fa ndray zen̈y, fikasan̈any Jehovah mbala tsiary niova. (Vakia Isaia 55:11.) Mbala tiany hiain̈y mandrakizay fo lan̈iany olo tsy mivadiky. Nan̈ino atsika mivolan̈a zen̈y? Fotony efa nisy raha nivolan̈iny ndreky nataony baka raha zen̈y ho tanteraka.

9. Ino raha nampan̈antinainy Zan̈ahary? (Daniela 12:2, 13)

⁹ Jehovah nampan̈anten̈a fa olo maty mbala hatsangany avio hataony afaka hiain̈y tsisy farany. (Asa. 24:15; Tit. 1:1, 2) Lelahy tsy nivadiky i Joba. Izy natoky tsarabe fa Jehovah man̈iry mare hanangana olo maty. (Joba 14:14, 15) Paminan̈y Daniela koa efa nahay fa olo maty mbala hivilomin̈y ke ho afaka hiain̈y tsisy farany. (Sal. 37:29; vakia Daniela 12:2, 13.) Iro Jiosy taminy andrany Jesosy koa efa nahay fa Jehovah afaka man̈amia ‘fiain̈ana tsisy farany’ panomponany tsy mivadiky. (Lioka 10:25; 18:18) Matetiky Jesosy nikoran̈a fampan̈antinan̈a io. Salakady izy lasitio koa efa natsangany Babany tamy maty.​—Mat. 19:29; 22:31, 32; Lioka 18:30; Jaona 11:25.

10. Man̈aporofo ino fananganan̈a olo maty taloha tan̈y? (Zahava sary.)

¹⁰ Jehovah Pan̈amia fahin̈ana, ke izy manan̈a angovo hananganan̈a olo maty. Izy, ohatra, nan̈amia angovo paminan̈y Elia, ke vitany paminan̈y io namelon̈o zanaka man̈angy maty vady ta Zarefata. (1 Mpanj. 17:21-23) Tafara tatỳ koa, Elisa nampiany Jehovah ke nahavita nanangana tsaiky lelahy zanaka man̈angy sonemita araiky. (2 Mpanj. 4:18-20, 34-37) Tantara aby zen̈y ndreky tantaranolo hafa natsangan̈a amy maty, samby man̈aporofo fa Jehovah manan̈a angovo hamiloman̈a olo maty. Tamy Jesosy tambony tany teto, naboakany fa izy namezany Babany angovo hahavitan̈a manangana olo maty. (Jaona 11:23-25, 43, 44) Efa andan̈itry an̈y Jesosy amy zioty, avio efa namian̈a izy “fahifan̈a jiaby andan̈itry an̈y ndreky ambony tany eto.” Ke vitany tsarabe man̈atanteraka fampan̈antinan̈a hamelon̈o ndraiky olo “jiaby ampasan̈a”, ke iro ho afaka hiain̈y tsisy farany.​—Mat. 28:18; Jaona 5:25-29.

11. Nan̈ino baka amy vidipan̈avotan̈a io mahavy atsika afaka hiain̈y tsisy farany?

¹¹ Nan̈ino ma Jehovah nan̈ambela Zanakanany tiany be in̈y hofoaty? Ty valiny namezany Jesosy: “Be ankitin̈y fitiavany Zan̈ahary zao tontolo zao, ke namiany Zanany lahitokana baka tsy hofoaty olo jiaby man̈aboaka finoan̈a izy fa hahazo fiain̈ana tsisy farany.” (Jaona 3:16) Zanany io namezany hatao vidipan̈avotan̈a handrakofan̈a fahotan̈antsika, baka atsika hahazo fiain̈ana mandrakizay. (Mat. 20:28) Apostoly Paoly nan̈azava fa zen̈y an̈isany tapany maventy amy fikasan̈any Zan̈ahary. Hoizy: ‘Fotony baka taminolo araiky naviany fahafatesan̈a, ke baka aminolo araiky koa aviany fitsanganan̈a amy maty. Fa karaha ataony olo jiaby maty baka tamy raha nataony Adama, miran̈a zen̈y koa, baka tamy raha nataony Kristy olo jiaby hivilomin̈y.’​—1 Kor. 15:21, 22.

12. Akory ataony Fanjakan̈any Zan̈ahary han̈atanteraka fikasan̈any Jehovah momba atsika?

¹² Jesosy nampianatra pan̈aradia izy hivavaka baka aviany Fanjakan̈any Zan̈ahary ndreky baka ho tanteraka ambony tany eto sitrapony Zan̈ahary. (Mat. 6:9, 10) An̈isany fikasan̈any Zan̈ahary ziô, olombelon̈o hiain̈y mandrakizay ambony tany. Ke baka raha zen̈y tanteraka, Jehovah nanendry Zanany ho Panjaka amy Fanjakan̈any Mesia. Zan̈ahary koa efa namory olo 144 000 baka ambony tany,  hiaraka hiasa amy Jesosy han̈atanteraka sitrapony Zan̈ahary.​—Apok. 5:9, 10.

13. Ino ma raha ataony Jehovah amy zioty, fa ino ndraiky anjaranao?

¹³ Amy zioty, Jehovah efa mamory “vahoaka marobe.” Iro io efa ampianariny hiain̈y ambany fitondrasan̈any Fanjakan̈anany. (Apok. 7:9, 10; Jak. 2:8) Mampisaratsaraka olo maro ady ndreky tsy fifankatiavan̈a misy amy donia ty. Fa ndray iô raha zen̈y, iro “vahoaka marobe” io mifen̈y fo hifankatia, na ino firenena na foko misy iro. Aboakandro amy raha ataondro koa fa iro manefy sabatrandro hanjary lasarỳ. (Mika 4:3) Iro tsy midikiditry aminy ady mandripaka olo maro ataony donia ty, fa mampianatra olo momba Zan̈ahary ndreky fikasan̈anany, amy zen̈y olo hahita “ten̈a fiain̈ana.” (1 Tim. 6:19) Iro manohan̈a Fanjakan̈any Zan̈ahary fo. Zen̈y mahavy iro mety hinjehiny havandro, na ho sahiran̈a arabola. Ndray zen̈y, tsy maintsy hamezany Jehovah iro fo raha ten̈a ilaindro. (Mat. 6:25, 30-33; Lioka 18:29, 30) Raha aby zen̈y man̈aporofo fa misy ankitin̈y Fanjakan̈any Zan̈ahary, avio izio tsy voly han̈atanteraka fikasan̈any Jehovah.

14-15. Jehovah nampan̈anten̈a han̈afoan̈a mandrakizay fahafatesan̈a. Akory hampatanteraka zen̈y?

¹⁴ Zioty Jesosy efa Panjakany Fanjakan̈any Zan̈ahary andan̈itry an̈y, ke izy han̈atanteraka  raha jiaby nampan̈antinainy Jehovah. (2 Kor. 1:20) Rango taminy 1914, Jesosy efa nanjaka tamy fahavalonany. (Sal. 110:1, 2) Tsy ho ela, izy ndreky iro olo miaraka manjaka aminany aby io handripaka olo ratsy fan̈ahy jiaby.​—Apok. 6:2.

¹⁵ Amy Fanjakan̈a Arivo Taon̈ony Jesosy, olo maty hivilomin̈y avio lan̈iany man̈araka volan̈a Jehovah hampian̈a hanjary lavorary. Koa fa tapitry fitsapan̈a farany, lan̈iany hitany Jehovah fa olo marin̈y “handova tany, ke hipetraka iô tsisy farany.” (Sal. 37:10, 11, 29) Amy zen̈y, ‘hifoan̈ana fahafatesan̈a, fahavalo farany io.’​—1 Kor. 15:26.

16. Ino ten̈a tokony ho antony hanompoantsika Jehovah?

¹⁶ Hitantsika tamy lahatsoratra ty fa fan̈antinan̈antsika hiain̈y tsisy farany io ten̈a miorin̈y amy Baiboly. Sarotro mare miain̈y aminy andra farany misy atsika zioty, fa fan̈antinan̈antsika io afaka man̈ampy atsika tsy hivadiky. Fa izikoa tiantsika hamparavoravo Jehovah, tsy tokony nohony atsika tsy tihofoaty fo mahavy atsika tsy mivadiky aminany, fa baka amy fitiavantsika mare izy ndreky Jesosy. Zen̈y raha ten̈a maventy. (2 Kor. 5:14, 15) Fitiavantsika iro koa mahavy atsika mangala tahaka toetrindro ndreky mikoran̈a fan̈antinan̈antsika aminolo. (Rom. 10:13-15) Izikoa atsika mifen̈y fo tsy tia ten̈a ndreky tsy matity, ho tiany Jehovah hikamarady amintsika mandrakizay.​—Heb. 13:16.

17. Ino ma andraikitrintsika tsiaraikiaraiky? (Matio 7:13, 14)

¹⁷ Anao ma mba ho an̈isanolo hahazo fiain̈ana mandrakizay? Efa nisokafiny Jehovah varavaran̈a hidiran̈a amy zen̈y. Ke anjaranao foeky ziô manapakevitry han̈araka lalan̈a mengo amy fiain̈ana io, na tsy han̈araka. (Vakia Matio 7:13, 14.) Han̈ano akory fiain̈ana lera atsika ho velon̈o tsisy farany? Ho hitantsika amy lahatsoratra man̈araka valinizen̈y.