1. Ino raha iriny raimandreny amy zanakandro?

 HAINAY fa anaro raimandreny man̈iry han̈ampy zanakanaro hahay Jehovah ndreky ho tia izy. Kanefa Zan̈ahary tsy hita maso. Ke akory han̈ampianaro zanakanaro hahatsapa fa izy ten̈a misy ankitin̈y? Akory han̈ampianaro iro han̈aton̈o izy?​—Jak. 4:8.

2. Akory mety han̈ampiany raimandreny zanakandro hahay toetriny Jehovah?

² Ty fomba araiky maventy han̈ampian̈a zanaka han̈aton̈o Jehovah: Mianatra Baiboly miaraka amindro. (2 Tim. 3:14-17) Fa misy fomba hafa koa volan̈iny Baiboly mety han̈ampian̈a tsaiky hahay Jehovah. Amy bokiny Ohabolana ao, misy baba araiky mampatsiaro zanany tsy ho voly handiniky zavaboary fotony iro io man̈aboaka toetriny Jehovah. (Ohab. 3:19-21) Hidinihintsika fomba sasany mety ampiasany raimandreny iro zavaboary aby io mba han̈ampian̈a zanakandro hahay toetriny Jehovah.

3. Ino raha mila ampianariny raimandreny zanakandro?

³ Karaha ty raha volan̈iny Baiboly momba Zan̈ahary: ‘Toetrinany tsy hita maso ... hita mazava tsara rango niasany zao tontolo zao, fotony toetrinany hita amy raha nataony.’ (Rom. 1:20) Mety farandraha tianaro raimandreny eky mitsangatsangana miaraka amy zanakanaro. Ke izikoa anao raimandreny, nan̈ino izikoa amy leranizen̈y anao man̈araraotro man̈ampy zanakanao hahay ino ifandraisany ‘raha niasainy’ Jehovah ndreky toetrinany mahavarian̈a aby io? Alo baka hizahavantsika raha azony raimandreny ianaran̈a baka amy fomba nampianarany Jesosy.

4. Akory nataony Jesosy nampiasa zavaboary koa fa nampianatra? (Lioka 12:24, 27-30)

 ⁴ Aleva onon̈o akory nataony Jesosy nampiasa zavaboary koa fa nampianatra. Tandraraiky, izy nan̈iraka pianatranany aby io handiniky goaka ndreky lisy. (Vakia Lioka 12:24, 27-30, l.p.a.) Jesosy afaka nikoran̈a karazan̈a voron̈o na raha maniry hafa, fa tsy zen̈y nataony. Araiky ten̈a hainy pianatranany nikoran̈iny. Mety nahita goaka nitilitilin̈y tan̈abony lohandro tiô pianatra aby io, lera izy nikoran̈a izio. Mety feno folera namelan̈a koa tiô. Aleva sary antsain̈y baka Jesosy sady mikoran̈a avio manondro raha aby io. Ino raha nataony tafaranizen̈y? Izy nampianatra iro leson maventy momba toetriny Jehovah aby ty: Tsy matity avio tsara fan̈ahy. Jehovah man̈amia hanin̈y goaka ndreky mampisikiny iro folera aby io, ke azo antoko fa izy koa han̈amia hanin̈y ndreky lamba panomponany tsy mivadiky.

5. Ino zavaboary mety ampiasainy raimandreny hampianaran̈a zanakandro momba Jehovah?

⁵ Afaka mangala tahaka Jesosy koa anaro raimandreny lera mampianatra zanakanaro. Amy fomba akory? Afaka koran̈inao amy zanakanao, ohatra, zavaboary araiky ten̈a tianao, karaha ataony biby na raha maniry. Lera anao man̈ano zen̈y, aza adin̈a man̈azava aminany ino raha ampianariny zavaboary io momba Jehovah. Mety an̈ontanianao izy koa ino biby na raha maniry ten̈a tiany. Izikoa raha tiany ampiasainao han̈azavan̈a toetriny Jehovah, mety hifantoko tsarabe izy lera mitandren̈y anao.

6. Ino raha ianarantsika baka amy mamany Christopher?

⁶ Zen̈y ma midika fa raimandreny tôkony handany fotoan̈a hitadiavan̈a fan̈azavan̈a momba biby na raha maniry araiky alohany hampiasan̈a izio hampianaran̈a toetriny Jehovah amy zanakandro? Tsy voatery. Tamy Jesosy nikoran̈a momba goaka ndreky lisy, izy tsy nan̈azava raha maro, ohatra, ino raha hoaniny goaka na akory ataony lisy mitombo. Zanakanao mety tia mianatra tsipiriandraha momba zavaboary. Fa ndray zen̈y, fan̈azavan̈a na fan̈ontanian̈a tsotra fo efa ampy han̈ampianao izy hahazo raha tianao koran̈iny. Aleva onon̈o baka raha tsaroany rahalahy araiky kahian̈a Christopher, tamy fahazazan̈anany. Hoizy: “Mamako nikoran̈a raha tsotra han̈ampian̈a zahay hankasitraka zavaboary nan̈odidin̈y zahay. Karaha ty, ohatra, nivolan̈iny zahay koa fa nahita bongo: ‘Zahava bongo maro tsara ndreky maro maventy aby io! Ten̈a mahagaga raha ataony Jehovah, tsy zen̈y?’ Zahay ndraiky koa fa nahita ranomasin̈y, hoizy: ‘Mahery daroba aby io! Mahery ankitin̈y Jehovah, tsy zen̈y?’ ” Ho Christopher: “Nisy vokany mare taminay koran̈a tsotra kanefa mampandiniky karaha zen̈y.”

7. Akory mety han̈ampianao zanakanao handiniky zavaboary?

⁷ Izikoa fa mahaibe zanakanao, tsara izy ampianao hianatra handiniky zavaboary tsarabe ndreky hangala onon̈o toetriny Jehovah hita baka amizio. Amy fomba akory? Anao mety mikoran̈a zavaboariny Jehovah araiky avio an̈ontania karaha ty izy: “Ino toetriny Jehovah hitanao baka amizio?” Mety ho lany fan̈ahy anao amy valinteninany.​—Mat. 21:16.

8. Afaka nan̈araraotro nan̈ino raimandreny israelita koa fa nandeha ‘tamy lalan̈a’?

⁸ Raimandreny israelita nampirisihin̈y hampianatra zanakandro didiny Jehovah, lera iro mandeha ‘amy lalan̈a.’ (Deot. 11:19) Nisy lalan̈a maro tambanivolony Israely tan̈y. Tamy lalan̈a aby io mety nahitan̈a biby, voron̈o ndreky folera isankarazany. Ke izikoa fa nisy fianakavian̈a israelita niomba tamy lalan̈a aby io niaraka tamy zanakandro, iro afaka  nan̈araraotro nikoran̈a asantan̈any Jehovah. Anaro raimandreny koa afaka man̈araraotro fotoan̈a karaha zen̈y, ke mampiasa zavaboary hampianaran̈a zanakanaro. Alo hizahavantsika fomba nan̈anaovany raimandreny sasany raha zen̈y.

9. Ino raha ianaranao baka amy Punitha ndreky Katya?

⁹ Karaha ty nivolan̈iny Punitha, reny araiky mipetraka amy tanàna maventy araiky an Inde: “Lera zahay mandeha mamangy fianakavian̈anay ambanivolo, zahay man̈araraotro mampianatra zanakanay momba asantan̈any Jehovah maro tsarabe aby io. Hitako fa loso mahay zavaboary tsarabe zanakanay koa fa miala lavitry toeran̈a feno tomabily ndreky olo mifanefosefo.” Mety tsy ho hadin̈any zanakanao foeky fotoan̈a aby niarasanaro tamy toeran̈a araiky tsara. Ho Katya, ranabavy mipetraka a Moldavie: “Raha ten̈a mbala tsaroako tamy zaho mbala hely, zaho ndreky ry olobeko nandeha tambanivolo. Zaho ten̈a man̈ano mersy iro fotony rango mbala hely zaho efa nampianarindro nizaha ndreky nandiniky raha niasainy Jehovah. Zaho koa nampianarindro hahita toetriny Jehovah baka tamy raha niasainy.”

10. Ino raha mety ataony raimandreny izikoa iro tsy afaka mandeha ambanivolo? (Zahava efajoro “ Sosokevitry Han̈ampian̈a Raimandreny.”)

¹⁰ Karakory fo basy izikoa anaro tsy afaka mandeha ambanivolo? Karaha ty raha nambarany Amol, baka an Inde: “Aminay atỳ, raimandreny miasa fo, salakady lafo fray mandeha ambanivolo. Fa ndray zen̈y, amy zaridaimpanjakan̈a na koa amy lavarangana efa mety ahitan̈a zavaboariny Jehovah ndreky ahafahan̈a mikoran̈a momba toetrinany.” Anao koa mangala onon̈o raha man̈odidin̈y tran̈onao, anao mety hahita zavaboary isankarazany afaka aboakanao zanakanao. (Sal. 104:24) Anao mety hahita voron̈o, biby madiniky, raha maniry, na raha hafa. Kahara ty ho Karina, baka an Allemagne: “Mamako ten̈a tia folera. Tamy zaho mbala hely, zahay roe koa fa niaraka nitsangatsangana, izy tsy maintsy nanondro folera  maro tsara hitanay tamy lalan̈a.” Fandaminan̈a koa efa nan̈aboaka video, avio boky ndreky gazety isankarazany natao hampianaran̈a tsaiky momba zavaboary. Ke anaro raimandreny mety mampiasa tsarabe iro fitaovan̈a aby io. Ndray aia ndray aia tany pitrahanaro, anao afaka man̈ampy zanakanao handiniky raha niasainy Zan̈ahary. Atsika iziô ndraiky hizaha toetriny Jehovah sasany afaka koran̈inao amy zanakanao.

11. Akory mety han̈ampiany raimandreny zanakandro hahita fa Jehovah be fitiavan̈a?

¹¹ Akory mety han̈ampianao zanakanao hahatsapa fitiavan̈any Jehovah? Mety koran̈inao aminany karakory ataony biby maro mikarakara zanakandro. (Mat. 23:37) Aboaha izy koa fa maro tsara salakady isankarazany raha niasainy Jehovah. Karaha ty nivolan̈iny Karina, araiky voakoran̈a taloha tiô in̈y: “Lera zahay miaraka miboaka, mamako man̈iraka zaho hizaha ndreky handiniky raha mampiavaka folera tsiaraikiaraiky. Irahiny dinihiko koa amy karakory hatsaran̈anizio man̈aboaka fitiavan̈any Jehovah. Nata efa taon̈o maro tafara tatỳ, zaho mbala mangala onon̈o fo lera mahita folera. Zahavako karazan̈anany, poziny ndreky koleranany. Firaka iziô, iro io mbala mampatsiaro zaho fo fa mare ankitin̈y fitiavany Jehovah atsika.”

12. Akory mety han̈ampiany raimandreny zanakandro hahita fahendrenany Zan̈ahary? (Salamo 139:14) (Zahava koa sary.)

¹² Jehovah hendry lavitry mandilatra atsika. (Rom. 11:33) Ampia zanakanao hahita fahendrenany Zan̈ahary. Amy fomba akory? Mety koran̈inao aminany, ohatra, akory mahavy rano mivadiky rondro ndreky nan̈ino tsy sarotro amy rondro mihevaheva sady mifindrafindra plasy. (Joba 38:36, 37) Afaka koran̈inao aminany koa fa ten̈a tsara fomba niasan̈a vatan̈antsika olombelon̈o. (Vakia Salamo 139:14.) Zahava akory nan̈anaovany Vladimir raha zen̈y tamy zanakanany. Hoizy: “Tandraraiky, zanakanay lavo tamy bisikiletinany, ke naratra. Tsy ela efa janga edy bainany. Nazavainay roeny vadiko taminany fa vatan̈antsika io nataony Jehovah mahay janga hoazy. Nivolan̈inay taminany fa raha namboarinolombelon̈o tsy mahavita karaha zen̈y. Tomabily robaka, ohatra, tsy mahavita man̈amboatra raha robaka aminany. Ke hitany zanakanay fa hendry ankitin̈y Jehovah.”

13. Akory mety han̈ampiany raimandreny zanakandro hahita angovony Zan̈ahary? (Isaia 40:26)

¹³ Jehovah man̈iraka atsika hisan̈andra lan̈itry ndreky hangala onon̈o fa mahagaga angovonany, matoa mahavita mitana lakintan̈a jiaby tsy hiala amy pilasindro. (Vakia Isaia 40:26.) Anao afaka man̈iraka zanakanao hisan̈andra lan̈itry ndreky hangala onon̈o raha hitany. Aleva onon̈o raha nivolan̈iny Tingting, ranabavy baka Taiwan, izikoa izy fa nikoran̈a momba fahazazan̈anany. Hoizy: “Nisy fotoan̈a zaho nindesiny mamako nandeha nilasy tan̈aty ala. Nahita lakintan̈a maro zahay tamy zen̈y fotony zahay lavitry hazavan̈any jirony tanàmbe. Niasaloha zaho tamy fotoan̈a io, fotony nisy tsaiky lekoly araiky taminaka nitaon̈o zaho han̈ano raha tsy tiany Jehovah. Ke loso diniky zaho, asa raha ho vitako edy tsy hivadiky amy Jehovah. Zaho nasainy mamako nandiniky momba angovo nampiasainy Jehovah taminizy niasa lakintan̈a jiaby io. Baka io nampirisihiny koa zaho tsy han̈adin̈a fa vitany Jehovah mampiasa angovonany io han̈ampian̈a zaho hiatriky fitsapan̈a jiaby. Ke zaho koa fa baka nandiniky zavaboary tamy dia nataonay io, zaho tapakevitry hianatra momba Jehovah tsarabe. Nahaivon̈ono hanompo izy fo koa zaho.”

14. Akory mety ampiasany raimandreny zavaboary han̈ampian̈a zanakandro hahita fa Jehovah Zan̈ahary ravoravo?

¹⁴ Hita baka amy raha niasainy Jehovah fa izy Zan̈ahary ravoravo sady tiany ho ravoravo koa atsika. Hitany pahay siansy aby io fa ankamarozany biby tia misoma, an̈isanizen̈y voron̈o ndreky laoko. (Joba 40:20) Mitokiky ma zanakanao lera mahita biby misoma? Ohatra, lera izy mahita rabosy man̈ian̈a bily na zanaka amboa mikidikidy amy namany. Ke amy man̈araka, lera zanakanao mitokiky koa fa mahita biby mikidikidy, nan̈ino izikoa hampatsiarovinao izy fa Zan̈ahary hivavahantsika io Zan̈ahary ravoravo?​—1 Tim. 1:11.

15. Ino han̈ampy raimandreny hahay raha an̈aty jeriny zanakandro? (Ohabolana 20:5) (Zahava koa sary.)

¹⁵ Sarotro amy raimandreny ndraikindraiky man̈ano raha hahavy zanakandro hikoran̈a problemondro. Izikoa karaha zen̈y mahazo  anao, mila miezaka anao hahay raha an̈aty jeriny zanakanao. (Vakia Ohabolana 20:5.) Hitany raimandreny sasany mora man̈ano zen̈y, lera iro miaraka mankafy zavaboary amy zanakandro. Nan̈ino? An̈isany antony araiky iziô, aminin̈y tsy dia misy raha manabataba na tsaiky aby io na raimandreny. Kanefa mbala misy antony hafa koa. Karaha ty, ohatra, nivolan̈iny Masahiko, baba araiky baka a Taïwan: “Mahazo ain̈y tsarabe zanakanay aby io lera zahay miaraka mitsangatsangana. Ohatra, mandeha man̈aniky bongo, na mitsangatsangana amorondranomasin̈y. Ke loso moramora aminay mampikoran̈a iro ndreky mahay raha an̈aty jerindro.” Karaha ty koa nivolan̈iny Katya, araiky voakoran̈a taloha in̈y: “Nindesiny mama tamy zaridain tsara oe zaho izikoa fa rava baka lekoly. Nilamin̈y oe tan̈y ke noranora taminaka nitantara raha nandalo ta lekoly na raha nampiasaloha zaho.”

16. Fianakavian̈a afaka man̈araraotro mankafy raha niasainy Jehovah koa fa mangala diandian̈a. Amy fomba akory?

¹⁶ Lera fianakavian̈a miaraka mankafy zavaboariny Jehovah, iro mahavita mangala diandian̈a salakady loso mahaimifandray tsara. Mivolan̈a Baiboly fa “misy fotoan̈a itokizan̈a” avio “misy fotoan̈a hitsinjahan̈a.” (Mpito. 3:1, 4, l.p.a.) Jehovah nan̈amboatra toeran̈a maro tsara ambony tany eto, baka hahafahantsika man̈ano raha tiantsika. Ohatra, maro fianakavian̈a tia mitsidiky parky, mandeha ambanivolo, mitsangatsangana an̈aty ala, na mandeha laplazy. Misy tsaiky sasany koa tia milomoay ndreky misoma amy zaridaimpanjakan̈a, mizaha biby, na miloman̈o amy ten̈arano, amy matsabory na andranomasin̈y. Ke maro raha mety ataontsika hankafizan̈a raha niasainy Jehovah.

17. Nan̈ino raimandreny tôkony han̈ampy zanakandro hankafy raha niasainy Zan̈ahary?

¹⁷ Amy donia vaovao, na tsaiky na raimandreny samby ho afaka hankafy tsarabe zavaboariny Jehovah, mandilatrany amy zioty. Tsy havozo biby eky atsika amy zen̈y, sady biby koa efa tsy havozo atsika. (Isaia 11:6-9) Atsika ho afaka hankafy raha niforon̈iny Jehovah mandrakizay. (Sal. 22:26) Kanefa aza miambin̈y amy zen̈y vo han̈ampy zanakanao hankafy zavaboary. Izikoa anao mampiasa zavaboary hampianaran̈a zanakanao momba Jehovah, iro mety hitovy hevitry amy raha nivolan̈iny Panjaka Davida ty: ‘A Jehovah, tsisy olo mahavita raha vitanao.’​—Sal. 86:8.