Nan̈ino ma lelahy kahian̈a “Ngiahy” in̈y nivolan̈a fa ho “robaka” lovanany izikoa izy manambady Rota? (Rota 4:1, 6, l.p.a.)

Taminy andrany Baiboly, izikoa nisy lelahy manambady naty kanefa tsy niteraka, karaha ty aby fan̈ontanian̈a nipetraka: Atao akory taninany? Ho very mandrakizay ma an̈arany fianakavian̈anany? Mamaly fan̈ontanian̈a aby zen̈y Lalàn̈any Mosesy.

Atao akory taniny lelahy araiky izikoa izy naty na loso masikiny mare ke voatery nandafo taninany? Rahalahiny na havany marikitry afaka mividy na man̈avotro taninany io. Amy zen̈y, tany io tsy miala amy lafamindro.​—Lev. 25:23-28; Nom. 27:8-11.

Akory hahavy an̈arany fianakavian̈any lelahy naty io tsy ho very? Rahalahiny araiky tsy maintsy man̈ainga vady nambelany. Karaha zen̈y iziô tamy Rota. Izikoa maty lelahy araiky kanefa tsy niteraka, araiky amy rahalahiny mila mangala vady man̈angy maty vady io, baka izy mahazo zanaka. Fa tsaiky teraka io hitondra an̈arany lelahy araiky naty io sady handova taninany. Ten̈a tsara fandaharan̈a io fotony firaka amy man̈angy io koa nahazo tombony tamizio.​—Deot. 25:5-7; Mat. 22:23-28.

Diniha baka tantarany Naomy. Elimeleka an̈arany vadiny. Izikoa fa naty Elimeleka ndreky zanakandro aroe lahy, efa tsisy lelahy afaka nikarakara izy eky tamy fianakavian̈anany. (Rota 1:1-5) Naomy koa fa tafimpody ta Joda, izy nan̈iraka Rota vinantony hangataka Boaza han̈avotro tanindro. Pihavan̈a maletry baka Elimeleka ndreky Boaza. (Rota 2:1, 19, 20; 3:1-4) Kanefa hainy Boaza fa tao mbala nisy olo hafa ten̈a havany Elimeleka marikitry. “Ngiahy” ikahiany Baiboly olo io. Ke lelahy io nanan̈a tombontsoa voanalohany hanjary pan̈avotro.​—Rota 3:9, 12, 13.

Tamy voanalohany, “Ngiahy” von̈ono han̈ampy tsarabe. (Rota 4:1-4) Hainy fa izy tsy maintsy hiala volabe hividianan̈a tany io. Fa ndray zen̈y, von̈ono fo izy fotony hainy fa Naomy efa matoe ke tsy afaka miteraka tsaiky handova taniny Elimeleka. Ke ho azony lelahy io taniny Elimeleka ke hanjary an̈isany lovanany. Tsy maty vola foeky izy dikanizen̈y.

Kanefa niova hevitry lelahy io izikoa fa hainy fa izy tsy maintsy hangala vady Rota. Karaha ty raha nivolan̈iny: ‘Izikoa zen̈y basy zaho tsy afaka man̈avotro ay, tsao ho robaka lovanaka.’ (Rota 4:5, 6, l.p.a.) Nan̈ino ma izy niova hevitry?

Izikoa izy na olo hafa manambady Rota, ke iro mahazo tsaiky lelahy, manjary tsaiky io mandova taniny Elimeleka. Nan̈ino ma raha zen̈y ‘nandrobaka lovany’ Ngiahy? Tsy volan̈iny Baiboly ndraiky valinizen̈y, fa ty fo mety ho antony sasany:

• Voanalohany, ho very fo vola nividianany taniny Elimeleka fotony tany io tsy hanjary lovanany fa ho losony zanakany Rota.

• Faharoe, izy tsy maintsy hamelon̈o ndreky hikarakara Naomy ndreky Rota.

• Fahatelo, izikoa Rota mbala miteraka tsaiky hafa amy Ngiahy, iro tsaiky aby io tsy maintsy hizara lova amy zanakanany hafa.

• Fahefatra, izikoa Ngiahy tsisy zanaka hafa, azony tsaiky nazony tamy Rota io taninany ndreky niny Elimeleka. Ke lera izy maty, loso tsaiky mitondra an̈arany Elimeleka fa tsy an̈aran̈anany, mandova taninany. Hitany maty antoko izy izikoa man̈ampy Naomy. Ke nambelany foeky Boaza han̈ano andraikitry tôkony nataony, fotony Boaza olo faharoe afaka nan̈avotro. Boaza ndraiky von̈ono han̈ano zen̈y fotony tiany ‘tsy ho very an̈aran̈anolo maty io ndreky lovanany.’​—Rota 4:10.

Tia ten̈a lelahy io. Fomba tsy han̈adin̈asan̈a an̈aranany ndreky tsy hampavery lovanany ny raha ten̈a tsy afaka tan̈aty jerinany. Kanefa mifanohitry amy zen̈y raha niboaka, fotony ndray an̈aranany tsy haintsika amy zioty. Tsy nazony koa tombontsoa miavaka nazony Boaza. Ino izio? Boaza nanjary an̈isany razambeny Mesia, na Jesosy Kristy. Ke nibaby vokany nampalahelo Ngiahy, fotony fitiavanten̈a fo nahavy izy tsy nan̈ampy olo nila fan̈ampian̈a!​—Mat. 1:5; Lioka 3:23, 32.