1-2. Izikoa anao mbala tsy afaka hatao batisa, nan̈ino anao tsy tôkony ho rivan̈a? (Zahava sary amy fon̈ony gazety ty.)

 MIERITRERITRY han̈ano batisa ma anao? Ten̈a tsara tanjon̈onao zen̈y. Ke efa von̈ono ma anao izikoa raha zen̈y atao niany? Koa anao fa pare ankitin̈y avio man̈eky zen̈y koa antipan̈ahy aby io, aza misalasala lera misy fan̈anaovan̈a batisa amy man̈araka. Izikoa anao man̈ano batisa, matokisa fa ho maro raha hamparavoravo anao amy fanompoan̈a Jehovah!

² Akory ndraiky izikoa nisy olo nivolan̈a taminao fa mbala misy raha mila hiezahanao alohany anao hatao batisa, na anao foeky nahatsapa zen̈y? Koa zen̈y, aza rivan̈a. Anao mbala afaka miezaka han̈ano raha hatakaranao tanjon̈o matomboko be io, na firy taon̈o anao na firy taon̈o.

3. Ino ma fan̈ontanian̈a napetraka tandapa etiopianin̈y araiky tamy Filipo, avio ino fan̈ontanian̈a aboakanizen̈y? (Asan’ny Apostoly 8:36, 38)

³ Vakia Asan’ny Apostoly 8:36, 38. Pitory vaovao tsara Filipo. Nisy tandapa etiopianin̈y araiky nan̈ontany izy karaha ty: ‘Ino ma misakana zaho tsy hatao batisa?’ Nan̈iry han̈ano batisa tandapa io, kanefa izy ma efa ten̈a afaka man̈ano dingana maventy be io?

4. Akory ahitan̈a fa mbala von̈ono hianatra raha maro tandapa etiopianin̈y io?

⁴ ‘Nandeha nivavaka ta Jerosalema’ lelahy etiopianin̈y io. (Asa. 8:27) Safe, izy tsy maintsy ho an̈isanolo nan̈eky Fivavahan̈a Jiosy. Tsy isalasalan̈a fa izy efa nianatra raha momba  Jehovah, baka tamy Soratra Hebreo. Fa ndray zen̈y, izy mbala tihianatra raha maro. Ino raha hitany Filipo nataony lelahy io iro koa fa nifanojy tamy lalan̈a? Izy namaky mare horonambokiny paminan̈y Isaia. (Asa. 8:28) Ten̈a ventinkanin̈y arapan̈ahy raha zen̈y! Tandapa io tsy nijanon̈o tamy fahamarin̈ana fototro efa hainy, fa izy mbala nan̈iry tihahay raha maro.

5. Nataony lelahy etiopianin̈y io karakory raha nianarany?

⁵ Manampahifan̈a ambony tambany fifihezany Kandasy panjakavaviny Éthiopie lelahy io; izy ‘niandraikitry harian̈a jiabiny’ panjakavavy io. (Asa. 8:27) Ke azo antoko fa izy naro andraikitry sady be asa. Fa ndray zen̈y, izy mbala nanokan̈a fotoan̈a hanompoan̈a Jehovah fo. Izy tsy vitany nianatra fahamarin̈ana fo fa nan̈araka raha nianarany koa. Akory ahitan̈a zen̈y? Izy nan̈ano dia baka ta Éthiopie handihanan̈a hivavaka tamy Jehovah, tamy tempoly ta Jerosalema. Evandraha lavitry salakady nandany vola dia io. Fa ndray karakory ndray karakory, lelahy io von̈ono fo handeha hanompo Jehovah.

6-7. Akory nahavy lelahy etiopianin̈y in̈y nanjary nahaitia Jehovah fo?

⁶ Nisy fahamarin̈ana vaovao maventy maromaro nianarany lelahy etiopianin̈y io tamy Filipo. An̈isanizen̈y iziô azovy Mesia. (Asa. 8:34, 35) Hay be fa ravoravo izy nahay raha efa nataony Jesosy taminany. Akory nataony izikoa izy fa nahay raha aby zen̈y? Nidoko tamy Fivavahan̈a Jiosy narehany io fo ma izy, fotony izy efa najainolo tao? Ehe. Nitombo mare fitiavany Jehovah ndreky Jesosy, ke izy nangala fanapahankevitry maventy han̈ano batisa, baka hanjary pan̈aradia Jesosy Kristy. Hitany Filipo fa lelahy io efa von̈ono mare, ke nataony batisa.

⁷ Izikoa anao man̈araka modeliny lelahy etiopianin̈y in̈y, anao ho von̈ono amy batisa. Ke anao tsy havozovozo hivolan̈a: ‘Ino ma misakana zaho tsy hatao batisa?’ Ty aby dingana nataony tandapa io: Izy nanohy nianatra fo, nan̈araka raha nianarany, avio tsy voly nampitombo fitiavany Zan̈ahary. Alô hidinihintsika akory mety han̈arehanao iro dingana aby io.

8. Izikoa Jaona 17:3 zahan̈a, ino raha mila ataonao?

⁸ Vakia Jaona 17:3. Tsy nahavy anao tapakevitry hianatra Baiboly volan̈a Jesosy io? Maro amintsika iziô karaha zen̈y. Ke volan̈anany io koa ma mbala mandrisiky atsika hanohy hianatra fo? Zen̈y tsarabe. Atsika tsy ho voly ‘hianatra baka mahay ... Zan̈ahary tokana sady marin̈y.’ (Mpito. 3:11) Hianatra fo  atsika mandrakizay. Arakaraka ahaizantsika Jehovah, hahavy atsika hahaiharikitry izy fo.​—Sal. 73:28.

9. Ino raha mbala mila ataontsika ndray atsika efa mahay fahamarin̈ana fototro?

⁹ Atsika koa fa manomboko mianatra raha momba Jehovah, fahamarin̈ana fototro antsendriky ianarantsika voanalohany. Tamy taratasy nalefany tamindro Hebreo aby io, apostoly Paoly nivolan̈a fa iro io “raha fototro.” Izy tsy nivolan̈a fa “fampianaran̈a fototro” io tsisy dikany. Ndray izio aby nampiran̈iny amy raha araiky ten̈a ilainy zazamena, tsy ino zen̈y fa ronono. (Heb. 5:12; 6:1) Fa izy fo nandrisiky Kristianin̈y tsy ho voly hianatra, baka tsy fampianaran̈a fototro fo raha haintsika fa fahamarin̈ana lalin̈y koa. Anao ma efa tia mianatra iro fampianaran̈a lalin̈y amy Baiboly? Mbala von̈ono handroso arapan̈ahy fo ma anao, ke manohy mianatra momba Jehovah ndreky fikasan̈anany?

10. Nan̈ino sarotro aminolo sasany mianatra?

¹⁰ Tsy olo jiaby tia mianatra. Anao ke? Tia namaky teny ndreky nazoto nianatra ma anao ta lekoly? Anao ma olo tia nianatra, ke ravoravo koa fa nahay raha isankarazany? Sa anao nieritreritry fa tsy ninao foeky vaky boky? Izikoa zen̈y, tsy anao zaraiky mahatsapa zen̈y. Fa izy fo, Jehovah afaka man̈ampy anao. Tsisy karaha izy izikoa mbala papianatra fo, fotony izy Papianatra lavorary.

11. Ino porofo fa Jehovah ‘Papianatra Be Voninahitry’?

¹¹ Jehovah foeky mivolan̈a fa izy ‘Papianatranao Be Voninahitry.’ (Isaia 30:20, 21) Izy baka Papianatra maharidraha, tsara fan̈ahy, avio mahay raha tsapantsika. Raha tsara ataony pianatranany fo ten̈a zahavany. (Sal. 130:3) Tsy vitany zen̈y fo, fa izy tsy mety han̈iraka atsika han̈ano raha tsy ho vitantsika. Aza adin̈a fa izy niasa betrontsika. Izio kado ten̈a tsara. (Sal. 139:14) Atsika niforon̈iny han̈iry hianatra raha. Atsika baka tiany Pamoron̈o tsy ho voly hianatra raha mandrakizay, sady ho ravoravo izikoa fa mianatra. Ke hendry atsika izikoa rango iziô efa ‘man̈iry mare’ hianatra fahamarin̈ana amy Baiboly. (1 Pet. 2:2) Man̈apitraha tanjon̈o mety ho takatranao, avio mamakia ndreky mianara Baiboly tsy tapaka. (Jos. 1:8) Jehovah han̈ampy anao, ke anao hahaiho ravoravo fo hamaky ndreky hianatra raha momba izy.

12. Nan̈ino atsika tôkony hianatra momba fiain̈anany Jesosy ndreky fanompoan̈anany lera mianatra manokan̈a?

¹² Manokàna fotoan̈a tsy tapaka handinihan̈a momba fiain̈anany Jesosy ndreky fanompoan̈anany. Izikoa tiantsika hahavita hanompo Jehovah fo, intsaka eky aminy andra sarotro zioty, atsika mila mangala tahaka tsarabe raha nataony Jesosy. (1 Pet. 2:21) Jesosy efa nivolan̈a tamy pianatranany fa iro ho tojy problemo isankarazany. (Lioka 14:27, 28) Ndray zen̈y, izy natoky fa ten̈a pan̈aradia izy hahavita tsy hivadiky amy Zan̈ahary, karaha nataony. (Jaona 16:33) Ke ianara raha jiaby nandalo tamy fiain̈anany Jesosy, avio ataova tanjon̈o hangala tahaka izy amy raha jiaby ataonao.

13. Anao mila tsy voly mangataka ino amy Jehovah, avio nan̈ino?

¹³ Fahaizan̈a io raha ten̈a ilain̈a. Fotony, lera atsika mianatra atsika loso mahay raha maro momba Jehovah ndreky loso manan̈a toetry tsara, ohatra, tia Jehovah ndreky mino izy. Kanefa tsy ampy izikoa fahaizan̈a fo. (1 Kor. 8:1-3) Ke isaka anao mianatra, angataha fo Jehovah hampitombo finoan̈anao. (Lioka 17:5) Izy tia mamaly vavaka karaha zen̈y. Izikoa hinoanao tsarabe raha marin̈y nianaranao momba Zan̈aharintsika io, zen̈y han̈ampy anao handroso.​—Jak. 2:26.

14. Akory nan̈aboahany apostoly Petera fa ilain̈y man̈araka raha ianarantsika? (Zahava koa sary.)

¹⁴ Apostoly Petera nikoran̈a momba tantarany Noa baka han̈aboahan̈a nan̈ino ten̈a ilainy pan̈aradia Kristy man̈araka fo raha nianarandro. Jehovah nivolan̈a tamy Noa fa olo ratsy fan̈ahy jiaby tamy fotoan̈a zen̈y, handeha haripany amy safodrano. Kanefa fahaizandro zen̈y ma efa hahavotro Noa ndreky fianakavian̈anany? Ehe. Aleva onon̈o fa Petera tio nikoran̈a raha nandalo talohany naviany Safodrano ndreky ‘tamy fotoan̈a niasan̈a sambofiara.’ (1 Pet. 3:20) Zen̈y man̈aboaka fa Noa ndreky fianakavian̈anany nan̈ano raha mifan̈araka tamy raha nambarany Zan̈ahary tamindro. Iro niasa sambo maventy. Sambofiara ikahian̈a izio. (Heb. 11:7) Raha nataony Noa io nampiran̈iny Petera tamy batisa. Karaha ty nisoratiny: “Batisa ny raha mifandray amy zen̈y amy zioty, fotony izio koa man̈avotro anaro.” (1 Pet. 3:21) Ke mitovy amy raha nataony Noa ndreky fianakavian̈anany tan̈aty taon̈otaon̈o niasandro sambofiara, raha ataonao hioman̈ana amy batisa. Ino raha mila ataonao baka anao ho von̈ono hatao batisa?

15. Karakory ma ten̈a mibebaka zen̈y?

¹⁵ Voanalohany, atsika tsy maintsy ten̈a mibebaka amy fahotan̈antsika. (Asa. 2:37, 38) Olo araiky izikoa ten̈a mibebaka, zen̈y handrisiky izy hiova ankitin̈y. Ke efa tsy man̈ano raha aby halany Jehovah ma anao? Karaha ataony mijangajanga, mihina lobaka, man̈ano volandraty, na manihitihy. (1 Kor. 6:9, 10; 2 Kor. 7:1; Efes. 4:29) Izikoa anao mbala man̈ano raha aby zen̈y, mifen̈a fo miova. Mikoràn̈a aminolo mampianatra Baiboly anao na mangataha fan̈ampian̈a aminy antipan̈ahy. Anao koa afaka mangataka sosokevitry amindro. Izikoa anao tanora sady mbala mipetraka aminolobenao, mangataha fo fan̈ampian̈a amindro baka ho vitanao hiala fahazaran̈a ratsy misakan̈a anao tsy hatao batisa.

16. Ino tafiditry amy manan̈a fahazaran̈a tsara arapan̈ahy zen̈y?

¹⁶ Ilain̈y koa manan̈a fahazaran̈a tsara amy lafiny arapan̈ahy. An̈isanizen̈y mivory ndreky mamaly teny. (Heb. 10:24, 25) Miaraka anao  mahafeno fepetra hitory, efa mifen̈a edy, avio izio ataova tsy tapaka. Arakaraka hifen̈anao mitory ahitanao sironizio. (2 Tim. 4:5) Anao ma tanora sady mbala mipetraka aminolobenao? Izikoa zen̈y, man̈ontania ten̈a karaha ty: ‘Sitraponaka ma handihanako mivory ndreky mitory io, sa nohoniry olobeko?’ Izikoa sitraponao han̈anaovanao zen̈y, hita fa anao mino ndreky tia Jehovah tsarabe. Zen̈y koa man̈aboaka fa anao mankasitraka izy. “Fahafoizanten̈a” karaha zen̈y, kado afaka hamianao Jehovah. (2 Pet. 3:11; Heb. 13:15) Ten̈a mamparavoravo Zan̈ahary kado jiaby amezantsika izy antsitrapo. (Ampiràn̈a amy 2 Korintianina 9:7.) Man̈ano zen̈y atsika fotony mamparavoravo atsika man̈amia Jehovah ny farany tsara baka amintsika.

17-18. Ino toetry matomboko han̈ampy anao handroso amy batisa, avio nan̈ino? (Ohabolana 3:3-6)

¹⁷ Arakaraka han̈anaovanao fandrosoan̈a amy batisa, ho maro raha sarotro tojy anao. Olo sasany mety hankalefaka anao nohony finoan̈anao vaovao io. Iro mety hanohitry na han̈enjiky anao foeky. (2 Tim. 3:12) Ndraikindraiky koa anao ndray efa mifen̈y miala amy raha ratsy nahazatra anao, anao mety mbala ho lavo fo. Anao koa mety ho kivy na hahinihiny fotony karaha tsy ho tatranao foeky tanjon̈onao. Ke ino raha han̈ampy anao hiaritry? Fitiavanao Jehovah. Izio toetry maventy.

¹⁸ Fitiavan̈a Jehovah toetrinao farany tsara. (Vakia Ohabolana 3:3-6.) Izikoa anao tia Jehovah mare ho vitanao hiatriky raha sarotro mety hiboaka. Baiboly matetiky mikoran̈a fitiavan̈a tsy miovaova aboakany Jehovah amy panomponany. Dikanizio, Jehovah tsy han̈ary panomponany foeky ndreky ho tia iro fo. (Sal. 100:5) Anao natao mira sora amy Zan̈ahary. (Gen. 1:26) Ke akory mety hangalanao tahaka fitiavan̈anany zen̈y?

19. Ino han̈ampy anao hahay hankasitraka raha jiaby nataony Jehovah taminao? (Galatianina 2:20)

¹⁹ Mahaiza mankasitraka. (1 Tes. 5:18) Isanandra, man̈ontania ten̈a karaha ty: ‘Akory nan̈aboahany Jehovah fa zaho tiany?’ Avio mivavaha ke ataova mersy Jehovah. Ton̈ona ao raha nataony taminao. Aleva onon̈o fa nohony fitiavany anao mahavy izy man̈ano raha tsara aminao. Karaha zen̈y tsarabe raha tsapany apostoly Paoly. (Vakia Galatianina 2:20.) Mandiniha ten̈a karaha ty: ‘Zaho  ma mba tihan̈aboaka aminany fitiavako izy?’ Anao koa tia Jehovah, ho vitanao hanohitry fakampan̈ahy ndreky hiaritry raha sarotro. Zen̈y koa handrisiky anao tsy hiala amy fahazaran̈anao arapan̈ahy, ndreky han̈aboaka isanandra amy Babanao andan̈itry an̈y fa anao tia izy.

20. Karakory ma manokanten̈a amy Jehovah zen̈y, avio nan̈ino izio ten̈a fanapahankevitry maventy?

²⁰ Koa fa mandeha fotoan̈a, fitiavanao Jehovah handrisiky anao han̈ano vavaka manokana hanokananao ain̈inao aminany. Aleva onon̈o fa, amy fotoan̈any anao manokanten̈a amy Jehovah, anao loso manan̈a fan̈antinan̈a miavaka be ty: Anao mety hanjary fanan̈ananany mandrakizay! Lera anao manokanten̈a amy Jehovah, anao man̈ano voady fa anao hanompo izy fo, na amy mora na amy sarotro. Indraiky fo anao man̈ano voady io. Marin̈y ndraiky fa fanokananten̈a zen̈y fanapahankevitry maventy. Fa diniha hely ty: Amy fanapahankevitry jiaby hataonao amy fiain̈ana, ndray misy ny tsara mare, tsisy tsaratsarany manokanten̈a amy Jehovah. (Sal. 50:14) Satana ndraiky hitady fomba fo hampihen̈y fitiavanao Babanao io, baka anao hivadiky aminany. Fa aza ambela handresy Satana! (Joba 27:5) Izikoa mare fitiavanao Jehovah ho voatananao voady nataonao, avio anao hifandray marikitry amy Babanao andan̈itry an̈y fo.

21. Nan̈ino atsika mivolan̈a fa batisa io vo fanombohany fo fa tsy farany?

²¹ Anao koa fa baka nanokanten̈a tamy Jehovah, volàn̈a aminy antipan̈ahy amy fiangonan̈anaro fa anao tihan̈ano dingana maventy fan̈araka zen̈y. Tsarova fo fa, batisa io tsy farany tantara fa mbala vo fanombohany fo. Manomboko iô, anao ho afaka hanompo Jehovah mandrakizay. Ke rango iziô, hankafatara fitiavanao Babanao. Manàn̈a tanjon̈o baka hahaiho fatatra fo fitiavanao izy, isanandra. Zen̈y amy zay handrisiky anao han̈ano batisa. Ho ravoravo mare anao aminy andra io. Kanefa izio mbala vo fanombohany fo. Ke irarian̈a anao tsy voly hampitombo fitiavanao Jehovah ndreky Zanany mandrakizay!