1-2. Ino raha matetiky hitantsika izikoa fa misy batisa, avio ino raha hidinihintsika ato?

 ANAO ma efa navy nizaha olo handeha atao batisa? Lera iro mamaly fan̈ontanian̈a aroe napetraka pan̈ano kabaro, ren̈inao amy feondro fa iro von̈ono mare. Hitanao ravoravo mare koa havandro ndreky namandro. Lera iro fa baka najibiky, ren̈inao rombo maresaka avio hitanao amy sorandro fa iro ravoravo ankitin̈y. Isaka herin̈iandra, kadiriny andrivony olo manokanten̈a amy Jehovah ndreky hatao batisa.

² Akory ndraiky anao? Izikoa anao mieritreritry han̈ano batisa, dikanizen̈y anao an̈isanolo valera an̈aty donia ratsy ty, fotony anao ‘mitady Jehovah.’ (Sal. 14:1, 2) Lahatsarotra ty natao ninao, na tanora anao na matoe. Fa akory ndraiky lan̈iany efa vita batisa? Izity koa afaka han̈ampy iro hitana voady nataondro hanompo Jehovah mandrakizay. Maro antony mahavy atsika tihanompo Jehovah, fa alô atsika handiniky telo amy zen̈y.

3. Nan̈ino panompony Jehovah tia fahamarin̈ana ndreky raha mahitsy? (Salamo 119:128, 163)

³ Jehovah man̈iraka vahoakanany ho ‘tia fahamarin̈ana.’ (Zak. 8:19) Jesosy nandrisiky pan̈aradia izy hitsakaraka fahamarin̈ana. (Mat. 5:6) Dikanizen̈y, atsika mila man̈iry mare tihan̈ano raha marin̈y, tsara, ndreky madio man̈oloan̈a Zan̈ahary. Ke asa anao tia fahamarin̈ana ndreky raha mahitsy? Azo antoko. Anao tsy tia vandy ndreky raha tsy marin̈y avio raha ratsy. (Vakia Salamo 119:128, 163.) Olo araiky izikoa mavandy,  izy mangala tahaka jeriny Satana, pamehy donia ty. (Jaona 8:44; 12:31) An̈isany tanjon̈o Satana iziô hankaratsy an̈aran̈a masin̈iny Zan̈ahary Jehovah. Efa letry tamy fikomian̈a ta Edena tan̈y, Satana tsy voly nan̈aparitaka vandy momba Zan̈aharintsika. Ataony raha hahavy olo hieritreritry fa Jehovah Pitondra tia ten̈a, tsy man̈ano ny marin̈y avio tsy man̈amia raha tsara olo. (Gen. 3:1, 4, 5) Firaka iziô, vandiny Satana aby zen̈y mbala mahavy olo mieritreritry raha ratsy momba Jehovah fo. Izikoa tsy ‘tia fahamarin̈ana’ olo araiky, vitany Satana mitaon̈o izy han̈ano raha tsy marin̈y ndreky ratsy isankarazany.​—Rom. 1:25-31.

4. Akory nan̈aboahany Jehovah fa izy ‘Zan̈ahariny fahamarin̈ana’? (Zahava koa sary.)

⁴ Jehovah ‘Zan̈ahariny fahamarin̈ana’, ke ampianariny fahamarin̈ana lan̈iany olo tia izy. (Sal. 31:5) Vokatranizen̈y, iro efa tsy voafitakany vandiny Satana eky. Jehovah koa mampianatra panomponany han̈ano ny marin̈y. Raha zen̈y man̈ampy iro hahatsiaro misy dikany sady milamintsain̈y. (Ohab. 13:5, 6) Asa anao efa nahatsapa zen̈y rango nianaranao Baiboly? Nianaranao fa fitsipiky Jehovah mahatsara olombelon̈o jiaby, an̈isanizen̈y anao. (Sal. 77:13) Ke anao zioty man̈iry han̈ano raha marin̈y man̈oloan̈a Zan̈ahary. (Mat. 6:33) Anao tihiaro fahamarin̈ana ndreky han̈aporofo fa diso fankaratsian̈a nataony Satana mikasiky Jehovah Zan̈aharintsika. Akory mety han̈anaovanao zen̈y?

5. Akory han̈aboahanao fa anao tia fahamarin̈ana ndreky raha mahitsy?

⁵ Afaka aboakanao amy fomba fiain̈ananao fa anao tsy man̈eky vandiny Satana, fa milan̈y amy fahamarin̈ana. Mety aboakanao koa fa Jehovah zaraiky fo tianao ho Pitondra anao, avio anao tihan̈ano lan̈iany raha volan̈iny fa marin̈y. Akory mety han̈anaovanao zen̈y? Manokanten̈a amy Jehovah amy vavaka, avio man̈ano batisa. Fitiavan̈a raha marin̈y ndreky raha mahitsy an̈isany antony maventy mandrisiky olo hifidy atao batisa.

6. Izikoa zahan̈a Salamo 45:4, nan̈ino anao tia Jesosy Kristy?

⁶ Nan̈ino ma anao tia Jesosy Kristy? Misy antony sasantsasany koran̈iny Salamo 45:4. (Vakia.) Jesosy tia fahamarin̈ana, fahitsian̈a ndreky manetry ten̈a. Ke izikoa anao tia fahamarin̈ana ndreky raha mahitsy, hay be fa anao tia Jesosy Kristy koa. Diniha karakory  nataony Jesosy niaro raha marin̈y ndreky raha mahitsy. (Jaona 18:37) Akory fo ma nataony Jesosy nampianatra atsika hanetry ten̈a?

7. Nan̈ino mahasariky anao fanetrenten̈any Jesosy?

⁷ Nan̈amia modely Jesosy, baka hampianaran̈a atsika hanetry ten̈a. Babany fo, ohatra, namezany voninahitry fa tsy ain̈inany. (Mar. 10:17, 18; Jaona 5:19) Akory tsapanao koa fa mandiniky fanetrenten̈any Jesosy? Tsy mahaimandrisiky anao hankatia Zanaka Zan̈ahary io ndreky han̈aradia izy ma zen̈y? Azo antoko tsarabe. Nan̈ino ma Jesosy nanetry ten̈a? Fotony izy tia salakady nangala tahaka Babany, Zan̈ahary manetry ten̈a. (Sal. 18:35; Heb. 1:3) Jesosy nahavita nangala tahaka toetriny Jehovah tamy fomba lavorary. Tsy mahavy anao mahaitia Jesosy fo fahaizan̈a raha zen̈y?

8. Nan̈ino atsika ravoravo manan̈a Jesosy ho Panjakantsika?

⁸ Ravoravo atsika manan̈a Jesosy Panjakantsika fotony tsisy Pitondra tsara mandilatra izy. Jehovah lastio nampiofan̈a Zanany io sady nanendry izy hitondra. (Isaia 50:4, 5) Be fitiavan̈a ndreky nahafoe ten̈a koa Jesosy. (Jaona 13:1) Jesosy vain̈y tiavintsika fotony izy Panjakantsika. Izy nivolan̈a fa tôkony han̈araka didinany lan̈iany olo tia izy ankitin̈y sady kahiany namany. Zen̈y fomba han̈aboahandro fa iro tia izy. (Jaona 14:15; 15:14, 15) Tsisy voninahitry be mandilatrany loso kamaradiny Zanaka Jehovah zen̈y!

9. Ino raha mampitovy batisany Kristy ndreky niny pan̈aradia izy?

⁹ Jesosy nivolan̈a fa pan̈aradia izy tôkony han̈ano batisa. (Mat. 28:19, 20) Izy foeky efa nan̈amia modely. Misy raha tsy mampitovy batisanany amy niny pan̈aradia izy. (Zahava efajoro “ Ino Tsy Mampiran̈a Batisany Jesosy Ndreky Niny Pan̈aradia Izy?”) Fa amy lafiny araiky, izio mitovy fo. Jesosy nan̈ano batisa an̈aboahany fa izy von̈ono han̈ano sitrapony Babany. (Heb. 10:7) Karaha zen̈y koa, pan̈aradia Kristy man̈ano batisa, an̈aboahandro aminolo fa iro efa nanokanten̈a amy Jehovah Zan̈ahary. Manomboko iô, efa fan̈anaovan̈a sitrapony Zan̈ahary fo raha ten̈a maventy amindro, fa tsy sitrapondro tompiny. Ke iro man̈araka modeliny Tompondro.

10. Nan̈ino fitiavanao Jesosy tôkony handrisiky anao hatao batisa?

¹⁰ Anao mino fa Jesosy io Zanaka lahitokany Jehovah. Ravoravo mare koa anao fotony izy Panjaka nifidiny Zan̈ahary hitondra atsika. Hainao fa Jesosy manetry ten̈a sady mangala tahaka tanteraka Babany. Efa nianaranao koa fa izy nan̈amia hanin̈y olo, nankahery olo nalemy troko, avio nampahivan̈a olo marary. (Mat. 14:14-21) Efa hitanao koa akory ataony mitariky fiangonan̈a aminy andra zioty. (Mat. 23:10) Hainao koa fa mbala ho maromarony zen̈y raha hataony Jesosy aminy amaray an̈y, fotony izy Panjakany Fanjakan̈any Zan̈ahary. Akory basy han̈aboahanao fa anao tia Jesosy? Anao mila man̈araka modelinany. (Jaona 14:21) Hanombohanao izy, anao mila manokanten̈a amy Jehovah ndreky man̈ano batisa.

11. Ino ma antony farany maventy mahavy atsika man̈ano batisa, avio nan̈ino?

¹¹ Ino ma antony farany maventy mahavy atsika man̈ano batisa? Nambarany Jesosy didy farany maventy, hoizy: “Tiava Jehovah Zan̈aharinao amy fonao jiaby ndreky vatan̈anao jiaby ndreky jerinao jiaby ndreky angovonao jiaby.” (Mar. 12:30) Ke asa mba karaha zen̈y koa fitiavanao Zan̈ahary?

12. Ino mahavy anao tia Jehovah? (Zahava koa sary.)

¹² Maro antony mahavy atsika tia Jehovah. Nanjary hainao, ohatra, fa izy “loharanony fahin̈ana”, sady Pan̈amia “fan̈amezan̈a tsara jiaby ndreky fan̈amezan̈a lavorary jiaby.”  (Sal. 36:9; Jak. 1:17) Mahatariky Zan̈aharintsika be fitiavan̈a io, fotony baka aminany aby raha tsara jiaby ankafizinao.

13. Nan̈ino vidipan̈avotan̈a io fan̈amezan̈a farany tsara baka amy Jehovah?

¹³ Vidipan̈avotan̈a fan̈amezan̈a farany tsara namezany Jehovah atsika. Nan̈ino atsika mivolan̈a zen̈y? Iritrireta hely karakory fifandraisan̈any Jehovah ndreky Jesosy. Ho Jesosy: ‘Baba tia zaho’ avio ‘tiako Babako.’ (Jaona 10:17; 14:31) Mifandray marikitry ankitin̈y iro, fotony efa mandeha andrivony tapitrisa taon̈o niarahandro. (Ohab. 8:22, 23, 30) Ke miniminia karakory irifiriny Jehovah tamy Zanany io nambelany hijaly ndreky hofoaty. Fa ndray zen̈y, von̈ono fo Izy han̈amia Zanany tiany io hatao soron̈o baka anao ndreky olo hafa afaka hiain̈y mandrakizay. Tsy hitanao baka amy zen̈y fa tiany Jehovah ankitin̈y olombelon̈o, an̈isanizen̈y anao? (Jaona 3:16; Gal. 2:20) Zen̈y antony farany maventy tôkony hitiavantsika Jehovah.

14. Ino tanjon̈o farany maventy mety ataonao amy fiain̈ananao?

¹⁴ Nahaitia Jehovah anao arakaraka nahaizanao izy. Ke tsy mahagaga izikoa anao tihinaman̈a aminany marikitry, rango zioty firaka mandrakizay. Mba posibla edy zen̈y? Ia. Izy mandrisiky anao han̈ano raha mamparavoravo fonany. (Ohab. 23:15, 16) Afaka man̈ano zen̈y anao, tsy amy raha volan̈inao fo fa  firaka amy raha jiaby ataonao koa. Ke aboaha amy fomba fiain̈ananao fa anao tia Jehovah ankitin̈y. (1 Jaona 5:3) Zen̈y tanjon̈o farany maventy mety ataonao amy fiain̈ananao.

15. Akory mety an̈aboahanao fa anao tia Jehovah?

¹⁵ Akory an̈aboahanao fa anao tia Jehovah? Voanalohany, man̈anaova vavaka manokan̈a hanokananao ten̈a amy Zan̈ahary tokan̈a sady marin̈y. (Sal. 40:8) Avio man̈anaova batisa han̈aboahanao aminolo fa anao efa nanokanten̈a. Eraka raha efa nidinihintsika tamy voanalohandohany lahatsoratra ty, batisa io fotoan̈a mamparavoravo ndreky ten̈a maventy amy fiain̈ananao. Aminio, anao manomboko fiain̈ana vaovao, tsy han̈ano sitraponao eky fa niny Jehovah. (Rom. 14:8; 1 Pet. 4:1, 2) Ten̈a maventy fanapahankevitry zen̈y. Fa ndray zen̈y, tsisy tsaratsarany fiain̈ana miambin̈y anao afaranizio. Nan̈ino atsika mivolan̈a zen̈y?

16. Eraka Salamo 41:12, ino raha handeha amezany Jehovah lan̈iany olo manompo izy?

¹⁶ Tsisy olo mahatariky mandilatra Jehovah. Ndray ino ndray ino raha amezanao izy, tsy maintsy bebenizen̈y raha hamiany anao. (Mar. 10:29, 30) Ndray mbala amy donia ratsy ty, anao efa hamezany fiain̈ana farany tsara sady mahafapo, avio feno hatsaran̈a. Fa zen̈y mbala fanombohany fo. Manomboko amy batisanao iô, fiain̈ananao mety hitohy mandrakizay. Ke anao afaka hanompo Babanao be fitiavan̈a io fo mandrakizay. Hahaihitombo fo fifankatiavanaro. Anao ho afaka hiain̈y mandrakizay, karaha izy.​—Vakia Salamo 41:12.

17. Ino raha tsendriky anan̈any Jehovah ke mety hamianao izy?

¹⁷ Baka amy Jehovah raha tsara jiaby anan̈anao ndreky fotoan̈a jiaby mamparavoravo anao. Kanefa lera anao manokanten̈a ndreky hatao batisa, anao manan̈a tombontsoa han̈amia Babanao raha araiky ten̈a valera aminany. Izy Tompiny lan̈itry ndreky tany, fa misy raha araiky tsendriky anan̈any: Fahavon̈osan̈anao hanompo izy ndreky tsy fivadihan̈anao. (Joba 1:8; 41:11; Ohab. 27:11) Tsisy fomba tsaratsaranizen̈y mety ampiasanao fiain̈ananao! Ke tsy isalasalan̈a fa fitiavanao Jehovah antony farany tsara mahavy anao han̈ano batisa.

18. Ino aby fan̈ontanian̈a tôkony hapetrakanao aminy ain̈inao?

¹⁸ Akory hamalianao ty: Efa von̈ono han̈ano batisa ma anao? Anao zaraiky fo afaka mamaly zen̈y. Mety han̈ampy anao iziô, mandiniten̈a karaha ty: ‘Ino ma raha mbala hiambesako?’ (Asa. 8:36) Aleva onon̈o iro antony telo nidinihintsika tio. Voanalohany, anao tia fahamarin̈ana ndreky raha mahitsy. Ke man̈ontania ten̈a karaha ty: ‘Zaho ma ten̈a man̈iry tsarabe hahita andra tsy hisiany olo mavandy eky fa olo jiaby man̈ano raha mahitsy aby?’ Faharoe, anao tia Jesosy Kristy. Man̈ontania ten̈a karaha ty: ‘Ten̈a tiako ho Panjakanaka ankitin̈y ma Zanaka Zan̈ahary? Von̈ono ma zaho han̈araka modelinany?’ Avio fahatelo sady farany maventy, anao tia Jehovah. Man̈ontania ten̈a karaha ty: ‘Zaho ma ten̈a tihamparavoravo fony Jehovah, ke von̈ono hanompo izy?’ Izikoa ia valinteninao amy fan̈ontanian̈a aby io, ino mbala misakan̈a anao tsy hatao batisa? Ino raha mbala hiambesanao?​—Asa. 16:33.

19. Nan̈ino anao tsy tôkony hisalasala han̈ano batisa? Hazavà aminy ohatra. (Jaona 4:34)

¹⁹ Izikoa anao mbala misalasala han̈ano batisa, misy fan̈oharan̈a araiky nataony Jesosy zay tsara dinihinao. (Vakia Jaona 4:34.) Nampiran̈iny Jesosy taminy hanin̈y fan̈anaovan̈a sitrapony Babany. Nan̈ino? Fotony hanin̈y io raha mahatsara atsika. Hainy Jesosy baka fa mahatsara atsika aby raha jiaby asainy Jehovah ataontsika. Jehovah tsy mety han̈iraka atsika han̈ano raha hampiditry problemo amintsika. Ke araka dinikinao, Jehovah ma mitaky anao han̈ano batisa? Zen̈y tsarabe. (Asa. 2:38) Matokisa fa fan̈arehanao didinany zen̈y hahatsara anao. Izikoa anao amian̈a hanin̈y masiro mare, hisalasala ma anao hihina izio? Ke ino fo raha mbala mampisalasala anao tsy han̈ano batisa?

20. Ino raha hianarantsika amy lahatsoratra man̈araka?

²⁰ Ino raha mbala hiambesanao? Mety maro olo hamaly karaha ty: “Zaho mbala tsy von̈ono.” Marin̈y ndraiky fa tsisy fanapahankevitry maventy mandilatrany manokanten̈a amy Jehovah ndreky man̈ano batisa. Ke anao mila mandiniky tsarabe alohany hanapakevitry amy zen̈y. Sady izikoa tianao hahafeno fepetra amizio anao tsy maintsy miezaka, ary raha zen̈y mitaky fotoan̈a. Fa izikoa anao man̈iry ankitin̈y han̈ano batisa, ino raha mety ataonao rango iziô baka anao ho von̈ono? Hamaly fan̈ontanian̈a zen̈y atsika amy lahatsoratra man̈araka.