1. Ino raha tsapany ankamarozanolo vo sambany man̈atriky fivorian̈antsika? (Zahava koa sary.)

 IRITRIRETA hely baka, misy olo fivadiany vo sambany man̈aton̈o fivorian̈a amy Tran̈o Fivorian̈any Vavolombelon̈o Jehovah. Lany fan̈ahy iro fotony iro niraisin̈y tsara sady hitandro mifankatia mare koa piaramanompo. Iro koa fa tamy lalan̈a hody, araiky viavy nivolan̈a tamy vadiny karaha ty: ‘Miavaka kony Vavolombelon̈o Jehovah ay! Tiako oe miaraka amindro.’

2. Nan̈ino olo sasany loso tsy nanompo Jehovah?

² Ten̈a miavaka marin̈y fifankatiavan̈a misy amy fiangonan̈a kristianin̈y. Fa ndray zen̈y, tsy lavorary Vavolombelon̈o Jehovah. (1 Jaona 1:8) Ke arakarakany hahaizantsika piaramanompo aby io, ahitantsika fa manan̈a toetry ratsy koa iro. (Rom. 3:23) Kanefa mampalahelo fa misy olo nanjary tsy nanompo Jehovah nohony tsy fahalavorarian̈anolo.

3. Akory ahaizan̈a ten̈a pan̈aradia Jesosy? (Jaona 13:34, 35)

³ Zahava ndraiky andininteny fototro amy lahatroratra ty. (Vakia Jaona 13:34, 35.) Ino raha ahaizan̈a ten̈a pan̈aradia Kristy? Fitiavan̈a. Fa Baiboly tsy mivolan̈a fa iro lavorary. Aleva onon̈o koa fa Jesosy tsy nivolan̈a: ‘Zen̈y hahaizanaro fa anaro pianatranaka.’ Fa hoizy: “Zen̈y hahaizanolo jiaby fa anaro pianatranaka.” Dikanizen̈y, tsy pan̈aradia Jesosy zaraiky fo afaka hahay fa ten̈a pan̈aradia izy tsy tia ten̈a ndreky mifankatia, fa firaka aminolo tsy an̈isany fiangonan̈a kristianin̈y koa.

4. Ino raha mety tianolo sasany ho hay momba ten̈a Kristianin̈y?

⁴ Mety han̈ontany karaha ty iziô olo sasany tsy Vavolombelon̈o Jehovah: ‘Nan̈ino ma fitiavan̈a ten̈a ahaizan̈a pan̈aradia Jesosy? Akory nan̈aboahany Jesosy fa izy tia apostolinany?  Avio akory mety angalantsika tahaka izy amy zioty?’ Ndray atsika Vavolombelon̈o Jehovah koa tsara mieritreritry valiny fan̈ontanian̈a aby io. Nan̈ino? Fan̈anaovantsika zen̈y mety han̈ampy atsika han̈aboaka fitiavan̈a tsarabe, intsaka eky izikoa atsika miaritry tsy fahalavorarian̈any namantsika.​—Efes. 5:2.

5. Hazavà dikany volan̈a Jesosy amy Jaona 15:12, 13.

⁵ Nazavainy Jesosy mazava tsara fa miavaka karazan̈a fitiavan̈a hahaizan̈a ten̈a pan̈aradia izy. (Vakia Jaona 15:12, 13.) Aleva onon̈o baka didy namiany iro ty: ‘Anaro mifankatiava, karaha nitiavako anaro in̈y.’ Ino ma dikanizen̈y? Eraka raha nazavainy Jesosy, Kristianin̈y zen̈y be fitiavan̈a ndreky mahafoe ten̈a. Iro von̈ono hofoaty amy plasiny piaramanompo foeky izikoa ilain̈a. b

6. Akory an̈aboahany Volan̈a Zan̈ahary fa ten̈a raha maventy fitiavan̈a?

⁶ Ampianariny Volan̈a Zan̈ahary fa ten̈a raha maventy fitiavan̈a. An̈isany andininteny ten̈a tianolo maro iziô andininy aby ty: “Zan̈ahary io fitiavan̈a.” (1 Jaona 4:8) “Tiava namanao, karaha ataonao tia ain̈inao in̈y.” (Mat. 22:39) “Fitiavan̈a io mandrakotro fahotan̈a maro.” (1 Pet. 4:8) “Fitiavan̈a io tsy ho ravan̈a mandrakizay.” (1 Kor. 13:8) Hita baka aminy andininy aby io ndreky andininteny hafa fa ten̈a raha maventy manan̈a ndreky man̈aboaka toetry tsarabe io.

7. Nan̈ino tsy ho vitany Satana foeky ten̈a hampifankatia ndreky hampiray sain̈y olo?

 ⁷ Maro olo man̈ontany karaha ty: ‘Akory ma ahaizan̈a fivavahan̈a marin̈y? Fivavahan̈a jiaby samy mivolan̈a fa mampianatra ny marin̈y, kanefa samy hafa raha ampianarindro momba Zan̈ahary.’ Vitany Satana nampisy fivavahan̈a diso isankarazany ke tsy hitanolo eky aia fivavahan̈a marin̈y. Fa tsy ho vitany foeky ndraiky hahavy Kristianin̈y baka amy firenena jiaby hifankatia mira pirahalahy. Jehovah zaraiky fo mahavita man̈ano zen̈y. Masaky mivolan̈a zen̈y atsika fotony baka amy Jehovah ten̈a fitiavan̈a. Ke lan̈iany olo misy fan̈ahinany ndreky tahiny fo mahavita mifankatia tsarabe. (1 Jaona 4:7) Zen̈y nahavy Jesosy nivolan̈a fa amy pan̈aradia izy fo ahitan̈a ten̈a fitiavan̈a.

8-9. Maro olo mahita fa Vavolombelon̈o Jehovah mifankatia. Ino vokanizen̈y tamindro?

⁸ Eraka raha efa nivolan̈iny Jesosy, baka amy fifankatiavan̈a misy amindro samby iro nahaizanolo maro azovy ten̈a pan̈aradia izy. An̈isanizen̈y rahalahy araiky kahian̈a Ian. Mbala tsaroany fo fivoriambeny vondroparitry voanalohany naton̈iny. Izio natao tamy stady narikitry iro. Nizaha laboly tamy stady io Ian fanjava vitsivitsy talohanizen̈y. Karaha ty hoizy: “Hafa foeky fihetsikinolo tamy fivoriambe io. Nahalala fomba iro Vavolombelon̈o Jehovah aby io sady tsara pozindro. Zanakandro misy jery aby.” Karaha ty koa hoizy: “Fa ny ten̈a nahavarian̈a zaho, iro hitako afapo ndreky mihavan̈a tsara. Ary zen̈y tsarabe raha tadiaviko. Tsisy azoko onon̈o kabaro natao tan̈y, fa fihetsikindro ndraiky tsy mety adin̈ako.” c Ino ma mahavy atsika man̈ano karaha zen̈y? Fotony atsika ten̈a mifankatia. Tiantsika iro rahalahy ndreky ranabavintsika aby io ke atsika tsara fan̈ahy amindro ndreky man̈aja iro.

⁹ Karaha zen̈y koa tsapany rahalahy araiky kahian̈a John, taminizy nivory voanalohany. Karaha ty hoizy: “Iro jiaby tsara fan̈ahy. Naharikian̈a zaho mare raha zen̈y .... Iro ten̈a mifankatia ke resy lahatra zaho fa nahita fivavahan̈a marin̈y.” d Hita amy tantara maro karaha zen̈y fa vahoakany Jehovah ten̈a Kristianin̈y ankitin̈y.

10. Lera karakory atsika ten̈a tôkony han̈aboaka fa tiantsika iro rahalahy ndreky ranabavintsika aby io? (Zahava koa lamariky amy pazy ambany.)

¹⁰ Eraka nikoran̈intsika taloha tarỳ, tsy lavorary aby piaramanompo amintsika jiaby. Ndraikindraiky, iro mety hivolan̈a na han̈ano raha mampameloko atsika. e (Jak. 3:2) Lera misy raha karaha zen̈y, afaka aboakantsika amy raha volan̈intsika ndreky raha ataontsika fa iro tiantsika ankitin̈y. Ke ino raha mety ianarantsika baka amy Jesosy amy raha momba zen̈y?​—Jaona 13:15.

11. Ino toetry ratsy naboakany Jakoba ndreky Jaona? (Zahava koa sary.)

¹¹ Jesosy tsy nan̈anten̈a pan̈aradia izy ho lavorary. Tiany mare pianatranany ke nampiany iro han̈itsy toetry ratsindro, baka iro hamparavoravo Jehovah. Nisy apostoly aroe, ohatra, tihahazo toeran̈a an̈abo tamy Fanjakan̈any Zan̈ahary. Tsy azovy zen̈y fa Jakoba ndreky Jaona. Ke iro nan̈iraka mamandro hangataka raha zen̈y tamy Jesosy. (Mat. 20:20, 21) Hita baka tamy zen̈y fa nan̈ambony ten̈a ndreky tihalaza i Jakoba ndreky Jaona.​—Ohab. 16:18.

12. Jakoba ndreky Jaona fo ma nan̈aboaka toetry ratsy? Hazavà.

¹² Tsy Jakoba ndreky Jaona fo nan̈aboaka toetry ratsy tamy fotoan̈a io. Aleva onon̈o koa baka fihetsikindro apostoly sasany aby io. ‘Neloko tamindro mirahalahy iro folo lahy izikoa  fa naharen̈y zen̈y.’ (Mat. 20:24) Mety nankany mare taminiry Jakoba ndreky Jaona iro apostoly sasany aby io. Mety nisy tamindro nivolan̈a karaha ty: ‘Azovy ma anaro ke mangataka toeran̈a an̈abo amy Fanjakan̈any Zan̈ahary? Izio ma anaro fo kajo niaraka niasa tamy Jesosy? Zahay koa anie mba vain̈y hahazo plasy tsara ay!’ Na karakory na karakory raha nisy, nadin̈andro apostoly aby io taminio fa iro tôkony hifankatia fo ndreky ho tsara fan̈ahy amindro samby iro.

13. Akory nataony Jesosy izikoa fa nahita toetry ratsindro apostolinany aby io? (Matio 20:25-28)

¹³ Akory nataony Jesosy izikoa fa nahita zen̈y? Izy tsy neloko. Izy tsy nivolan̈a fa izy hitady olo hafa metimety atao apostoly, mba lelahy manetry ten̈a ndreky hifankatia tsarabe. Hainy Jesosy tsarabe fa pianatranany aby io nanan̈a fô tsara. Naharidraha izy ke nampisaintsain̈iny moramora iro. (Vakia Matio 20:25-28.) Tsy sambany sady tsy taminio iro farany nankany momba azovy farany an̈abo tamindro. Fa ndray zen̈y, Jesosy mbala tsara fan̈ahy tamindro fo.​—Mar. 9:34; Lioka 22:24.

14. Karakory kolontsain̈y nahabe iro apostoliny Jesosy aby io?

¹⁴ Azo antoko fa hainy Jesosy tsara fa nisy vokany taminy apostoly aby io kolontsain̈y nahabe iro. (Jaona 2:24, 25) Pitondra fivavahan̈a tamy zen̈y nampianatra fa tsisy dikany olo araiky izikoa tsy manan̈a toeran̈a an̈abo. (Mat. 23:6; ampiràn̈a amy lahatsoratra  “Tao Amin’ny Synagoga no Nitory i Jesosy sy ny Mpianany”, amy Ny Tilikambo Fiambenana 1 Avrily 2010, pazy 16-17.) Niheviten̈a ho marin̈y mandilatra olo hafa koa iro pitondra fivavahan̈a jiosy aby io. f (Lioka 18:9-12) Hainy Jesosy tsara fa nety nisy vokany tamy fomba fiheverany apostoly aby io ain̈indro ndreky olo hafa raha zen̈y. (Ohab. 19:11) Ke izy tsy nan̈anten̈a pianatranany tsy han̈ano diso foeky, fa izy naharidraha tamindro fo lera iro sendra nan̈ano raha tsy mety. Hainy fa iro nanan̈a fô tsara. Ke iro nampiany tsihelihely baka tsy han̈ambony ten̈a ndreky tsy han̈iry halaza, fa hifankatia fo.

15. Ino raha ianarantsika baka tamy raha nandalo tamy Jakoba ndreky Jaona avio apostoly sasany aby in̈y?

¹⁵ Maro raha ianarantsika baka tamy raha nandalo tamy Jakoba ndreky Jaona avio iro apostoly sasany in̈y. Tsy nety raha nataondro roe lahy nangataka hahazo toeran̈a an̈abo tamy Fanjakan̈any Zan̈ahary in̈y. Kanefa tsy nety koa raha nataony apostoly sasany aby io. Fotony raha nandalo io nambelandro hahavy iro tsy hiray sain̈y. Fa ndray zen̈y, Jesosy mbala tsara fan̈ahy tamindro jiaby, sady mbala tia iro fo. Ino raha ianarantsika baka amy zen̈y? Tsy raha tsy nety nataonolo fo ny ten̈a mikonty, fa firaka amy fihetsikintsika man̈oloan̈a hadisovan̈andro ndreky toetry ratsindro koa. Ke ino raha han̈ampy atsika lera misy piaramanompo man̈ano raha mampameloko atsika? Tsara man̈ontany ten̈a karaha ty: ‘Nan̈ino ma mampameloko zaho mare raha nataony io? Misy toetry ratsinaka ma miboaka ke tôkony hahitsiko? Misy problemo ma izy an̈y ke mety zen̈y nahavy izy tafan̈ano raha nampaneloko zaho io? Ndray rariny helokonaka, nan̈ino edy ma izikoa zaho mankatia izy fo ke man̈ambela hadisovan̈anany?’ Izikoa atsika mifen̈y fo mifankatia, aboakantsika amy zen̈y fa atsika ten̈a pan̈aradia Jesosy.

16. Ino koa raha ianarantsika baka amy modeliny Jesosy?

¹⁶ Modeliny Jesosy io koa mampianatra atsika hahay hipetraka amy plasiny piaramanompo amintsika. (Ohab. 20:5) Marin̈y fa atsika tsy karaha Jesosy. Izy baka mahay raha an̈aty fô. Fa ndray zen̈y, atsika afaka mifen̈y haharidraha amy piaramanompo amintsika lera iro man̈ano raha mampameloko atsika. (Efes. 4:1, 2; 1 Pet. 3:8) Ho moramora amintsika han̈ano zen̈y izikoa atsika miezaka hahay iro tsarabe. Diniha baka ohatra araiky ty.

17. Ino hatsaran̈a nazony piandraikitry faritry araiky izikoa izy fa nifen̈y hahay tsarabe rahalahy araiky?

¹⁷ Misy piandraikitry faritry tan Afriky Antin̈iana nahatsiaro fa sarotro taminany nifandray tamy rahalahy araiky sarosarotiny. Ke ino raha nataony piandraikitry faritry io? Hoizy: “Zaho tsy nilefalefa izy, fa nataoko fomba hahaizan̈a rahalahy io tsarabe.” Izikoa izy fa nan̈ano zen̈y, loso hainy fa kaiky fomba nitaizan̈a rahalahy io nisy vokany tamy toetrinany. Karaha ty koa raha nivolan̈iny piandraikitry faritry io: “Izikoa fa haiko fa efa be fiovan̈a vitany ndray tsy nora taminany nankatsara toetrinany, zaho niaiky. Nanjary kamarady zahay.” Hita baka amy zen̈y fa izikoa atsika mifen̈y mipetraka amy plasindro rahalahy ndreky ranabavintsika aby io, ho moramora amintsika hankatia iro.

18. Ino aby fan̈ontanian̈a tsara dinihintsika izikoa nisy piaramanompo nan̈ano raha nampaneloko atsika? (Ohabolana 26:20)

¹⁸ Ndraikindraiky, atsika mety mahatsapa fa atsika tôkony han̈aton̈o rahalahy na ranabavy araiky nan̈ano raha nampaneloko atsika. Fa alohanizen̈y, ty misy fan̈ontanian̈a sasany tsara dinihintsika: ‘Haiko ndraiky antony nahavy izy nan̈ano izin̈y?’ (Ohab. 18:13) ‘Tsao tsy kiniany aby nan̈ano izin̈y?’ (Mpito. 7:20) ‘Zaho ma tsy mba efa navy nan̈ano raha karaha in̈y taminolo?’ (Mpito. 7:21, 22) ‘Tsy ndraiky hahaihan̈etsidraha fo ndraiky zaho izikoa mikoran̈a raha zen̈y aminany?’ (Vakia Ohabolana 26:20.) Izikoa atsika mangala fotoan̈a mandiniky tsara karaha zen̈y, ho hitantsika fa fitiavan̈a io afaka mandrisiky atsika tsy hieritreritry eky raha nampaneloko atsika.

19. Tôkony ho tapakevitry han̈ino atsika?

¹⁹ Mifankatia Vavolombelon̈o Jehovah ke hita fa iro ten̈a pianatra Jesosy. Aboakantsika tsiaraikiaraiky koa fa ten̈a pan̈aradia Jesosy atsika izikoa mifen̈y fo mankatia piaramanompo amintsika ndray iô tsy fahalavorarian̈andro. Izikoa atsika man̈ano zen̈y, ho mora aminolo hahita aia fivavahan̈a marin̈y. Ke iro hiaraka amintsika hanompo Jehovah Zan̈ahariny fitiavan̈a. Ke irarian̈a atsika ho tapakevitry tsy voly han̈aboaka fitiavan̈a fotony baka amizio ahitan̈a azovy ny ten̈a Kristianin̈y.