1. Ino raha koran̈iny Baiboly momba ten̈a fitiavan̈a?

 FITIAVAN̈A io mira ‘lelamotro mizelazela, lelamotro baka amy Jehovah. Ndray darobany rano be tsy mahafaty motrony fitiavan̈a. Ndray ten̈arano tsy mahavita man̈ombotro izio.’ b (Tonon. 8:6, 7) Tsara mare raha koran̈iny Baiboly momba ten̈a fitiavan̈a. Volan̈a aby io man̈amia toky olo manambady fa afaka hahadin̈y mandrakizay fifankatiavandro.

2. Ino raha mila ataonolo fivadiany baka fifankatiavandro tsy hihen̈y?

² Mila miezaka mare olo fivadiany baka iro hifankatia fo firaka iro maty. Ty baka misy ohatra: Anao koa mandoky aminy alamaiky, akory hahavy motronao tsy hofoaty? Soron̈inao matetitetiky motro, tsy zen̈y? Karaha zen̈y koa, hifankatia mare fo olo fivadiany izikoa iro tsy voly man̈ano raha hankafatatra fifandraisandro. Fa ndraikindraiky, misy olo fivadiany mety mahatsapa fa nihen̈y mare fifankatiavandro, intsaka eky lera iro tsisy vola, na marary, na sahiran̈a amy fitaizan̈a. Ke izikoa anao manambady, ino raha mety ataonao baka ‘lelamotro baka amy Jehovah’ hirehitry fo? Lahatsoratra ty hikoran̈a raha telo hankafatatra fifandraisanaro fivadiany ndreky hahavy tokantran̈onaro ho sambatra. c

3. Nan̈ino fifandraisan̈a tsara amy Jehovah man̈ampy olo fivadiany hifankatia fo? (Mpitoriteny 4:12) (Zahava koa sary.)

³ Anaro fivadiany samby mila mifen̈y mare mankafatatra fifandraisan̈a amy Jehovah baka ‘lelamotro baka amy Jehovah’  io hirehitry fo. Nan̈ino ma raha zen̈y ten̈a ilain̈y? Izikoa matomboko aminolo fivadiany fifandraisandro amy Babandro andan̈itry an̈y, iro tsy mirekireky man̈araka sosokevitry ambarany. Vokany, ho vitandro hiary ndreky handresy lan̈iany problemo mety hampihen̈y fifankatiavandro. (Vakia Mpitoriteny 4:12.) Olo tsara fifandraisan̈a amy Jehovah mifen̈y erakany vitandro mangala tahaka Jehovah ndreky toetrinany, karaha ataony tsara fan̈ahy, maharidraha, avio man̈ambela hadisovan̈a. (Efes. 4:32–5:1) Izikoa olo fivadiany samby man̈aboaka toetry aby io, iro hahaihifankatia fo. Efa mandilatra 25 taon̈o vadian̈any Ranabavy Lena. Hoizy: “Mora mankatia ndreky man̈aja olo mifandray tsara amy Jehovah.”

4. Nan̈ino Josefa ndreky Maria nifidiny Jehovah hanjary olobeny Mesia?

⁴ Ty misy ohatranolo tantarainy Baiboly: Josefa ndreky Maria. Maro taranakany Davida, kanefa iro roe fivadiany nifidiny Jehovah hanjary olobeny Mesia. Nan̈ino? Fotony iro roe samby tsara fifandraisan̈a tamy Jehovah. Ke efa hainy Jehovah fa iro fivadiany han̈ano voanalohantoeran̈a sitraponany an̈aty vadian̈andro. Ino raha ianaranolo manambady baka amy Josefa ndreky Maria?

5. Ino raha ianarany lelahy manambady baka amy Josefa?

⁵ Josefa von̈ono han̈araka taridalan̈any Jehovah fo. Zen̈y nahavy izy loso vady tsara. Intelo fara fahaheliny, izy nahazo taridalan̈a baka tamy Zan̈ahary amy raha mikasiky fianakavian̈anany. Fa isaka Josefa nahazo taridalan̈a, ndray izio tsy nora taminany, izy tsy nirekireky nan̈araka volan̈any Jehovah. (Mat. 1:20, 24; 2:13-15, 19-21) Fan̈arehany taridalan̈any Zan̈ahary nahafahany niaro ndreky nikarakara Maria. Azo antoko fa baka tamy raha nataony Josefa io nahavy Maria nahaitia ndreky nahainan̈aja izy fo. Izikoa anao lelahy manambady, aleva tahaka Josefa ke mitadiava taridalan̈a amy Baiboly amy fomba hikarakaranao fianakavian̈anao. d Izikoa anao man̈ano zen̈y, ndray izio tsy mora aminao, hahaiho fatatra fo vadian̈anaro salakady ho hitany vadinao fa anao tia izy ankitin̈y. Misy ranabavy araiky baka a Vanuatu, nanambady mandilatrany 20 taon̈o, mivolan̈a karaha ty: “Mahaihajaiko fo vadiko koa izy fa mitady ndreky man̈araka taridalan̈any Jehovah. Zaho mahatsiaro voaro, avio atokisako tsarabe fanapahankevitrinany.”

6. Ino raha ianarany man̈angy manambady baka amy Maria?

⁶ Maria ten̈a nifandray marikitry tamy Jehovah. Finoan̈anany tsy niankin̈y tamy Josefa. Izy nahay Soratra Masin̈y salakady nanokan̈a fotoan̈a nisaintsain̈y raha nianarany. (Lioka 2:19, 51). Azo antoko fa nohony Maria  tsara fifandraisan̈a tamy Jehovah nahavy izy nanjary vady tsara. Maro koa man̈angy amy zioty mifen̈y man̈ano karaha Maria. Karaha ty, ohatra, raha nivolan̈iny Ranabavy Emiko: “Tamy zaho mbala tsy nanambady, zaho efa zatra nan̈ano raha arapan̈ahy. Fa zaho koa fa nanambady, vadiko nan̈ano vavakanay, avio izy nitariky fianaran̈anay. Ke tsapako fa finoan̈anaka loso niankin̈y be taminany. Tontohitry zaho fa zaho koa mba mila man̈ano raha hankafataran̈a fifandraisako amy Jehovah. Ke zaho nanokan̈a fotoan̈a hivavahan̈a, hamakian̈a ndreky hisaintsain̈ana Volan̈anany.” (Gal. 6:5) Izikoa anao man̈angy manambady, aza voly mankafatatra fifandraisanao amy Jehovah. Izikoa anao man̈ano zen̈y, vadinao hahaiho tia anao sady hahaihahita raha tsara hideran̈a anao fo.​—Ohab. 31:30.

7. Ino raha ianaranolo fivadiany baka amy Josefa ndreky Maria mikasiky fiarahan̈a manompo Jehovah?

⁷ Josefa ndreky Maria koa niaraka nan̈ano raha hankafataran̈a fifandraisandro tamy Jehovah. Haindro fa ten̈a raha maventy fiarahany fianakavian̈a manompo Jehovah. (Lioka 2:22-24, 41; 4:16) Nety tsy nora tamindro nan̈ano zen̈y izikoa fa nahainaro zanakandro, kanefa nataondro fo. Iro ten̈a modely tsara aminolo manambady aminy andra zioty! Izikoa anaro mananjanaka karaha Josefa ndreky Maria, mety tsy ho mora aminaro koa mandeha mivory na manokan̈a fotoan̈a han̈anaovan̈a fotoampivavahan̈any fianakavian̈a. Mety ho sahiran̈a mare koa anaro roe fivadiany mitady fotoan̈a hiarasanaro roe mianatra ndreky mivavaka. Fa ndray zen̈y, tsarova fa izikoa anaro miaraka man̈ano raha mifandray amy fanompoan̈a Jehovah, anaro hahaihifandray marikitry aminany ndreky aminy anaro samby anaro. Ke ataova raha farany maventy fanompoan̈a.

8. Ino raha han̈ampy olo fivadiany ho ravoravo hiaraka han̈ano fotoampivavahan̈a izikoa nisy raha tsy nampifankahazo iro?

⁸ Akory fo izikoa anaro roe fivadiany tsy fankahazo? Mety tsy tihiaraka han̈ano fotoampivavahan̈any fianakavian̈a foeky baka anaro amy leranizen̈y. Ke ino raha mety ataonaro? Amy voanalohany, miaraha midiniky raha fohiky sady mamparavoravo. Tsara izikoa izio hevitry samby tianaro roe. Zen̈y mety han̈ampy anaro hahaihifankatia ndreky han̈iry hiaraka han̈ano raha arapan̈ahy.

9. Nan̈ino olo fivadiany mila manokan̈a fotoan̈a hiarahan̈a man̈ano raha?

⁹ Hirehitry fo motrony fifankatiavan̈anolo fivadiany izikoa iro manokan̈a fotoan̈a man̈ano raha miaraka. Fotony, zen̈y han̈ampy iro hahay raha an̈aty jeriny vadindro ndreky hahatakatra fihetsehamponany. (Gen. 2:24) Aleva onon̈o baka raha tsapany Lilia ndreky Ruslan tsy ela heliny nivitany mariazindro, kadiriny 15 taon̈o loso zay. Ho Lilia: “Hitanay fa zahay tsy afaka niaraka be erakany niritriretinay aby. Zahay baka lany fotoan̈a taminy asanay, na tampiasan̈a na tantran̈o. Avio tafara tatỳ, zahay nanjary sahiran̈a tamy fikarakaran̈a zanakanay. Ke tsapanay fa izikoa zahay tsy manokan̈a fotoan̈a hiarahanay roe fivadiany, mety hanintsy fifankatiavan̈anay.”

10. Akory mety han̈arehanolo manambady toro lalan̈a aminy Efesianina 5:15, 16?

¹⁰ Ino raha mety ataonolo fivadiany baka iro hahita fotoan̈a hiarahan̈a? Ampidira an̈aty programonao fotoan̈a hiarahan̈a amy vadinao. (Vakia Efesianina 5:15, 16.) Nivolan̈a karaha ty Rahalahy Uzondu baka a Nizeria: “Lera zaho mandamin̈y fandaharampotoan̈anaka, efa ampidiriko an̈aty ao koa fotoan̈a hiarasako amy vadiko. Tsy ambanindraha aminaka foeky fotoan̈a io.” (Fil.  1:10) Diniha akory nataony Anastasia, vadiny piandraikitry faritry araiky a Moldavie an̈y, nampiasa tsara fotoan̈anany. Hoizy: “Amy fotoan̈a han̈anaovany vadiko andraikitrinany, efa vitaiko sandra lan̈iany raha tôkony hataoko. Aminin̈y, zahay baka io afaka man̈ano raha miaraka.” Fa akory ndraiky izikoa anao maletry mare ke tsy mahita fotoan̈a hiarahan̈a man̈ano raha amy vadinao foeky?

11. Ino aby raha nataony Akoila ndreky Prisila niaraka?

¹¹ Izikoa anao manambady, anao afaka mangala tahaka modeliny Akoila ndreky Prisila. Iro io olo fivadiany najainy Kristianin̈y maro tamy taonjato voanalohany tan̈y. (Rom. 16:3, 4) Baiboly tsy mikoran̈a raha maro momba vadian̈andro, kanefa ambarany ao fa iro roe niaraka fo izikoa fa niasa, nitory, ndreky nan̈ampy olo. (Asa. 18:2, 3, 24-26) Avio isaka Baiboly manon̈ono an̈arany Akoila, tsy maintsy voaton̈ono fo koa Prisila.

12. Ino raha mety hataonolo fivadiany miaraka? (Zahava koa sary.)

¹² Akory mety hangalanolo fivadiany tahaka ohatrany Akoila ndreky Prisila? Diniha, ohatra, ino aby asa na raha hafa mila ataonaro. Nan̈ino izikoa hiarasanao amy vadinao sasany amy raha aby zen̈y? Niaraka nitory, ohatra, Akoila ndreky Prisila. Asa anaro koa mba efa nan̈amboatra programo tsy tapaka hiarasanaro manompo? Akoila ndreky Prisila koa niaraka niasa. Marin̈y fa mety tsy asa araiky anaro roeny vadinao, fa anaro ndraiky afaka miaraka man̈ano asa antran̈o. (Mpito. 4:9) Izikoa anaro mifan̈ampy aminy asa araiky, hahaiho tsapanaro fo fa anaro ekipy araiky salakady anaro hisy fotoan̈a hikoran̈ana tsarabe. Efa mandilatrany 50 taon̈o tokantran̈ony Robert ndreky Linda. Karaha ty ho Robert: “Tsy asitriko fa tsy be fotoan̈a iarahanay mangala diandian̈a. Fa ravoravo oe zaho lera vadiko avy aminaka iô lera zaho manasa lasiety, zaho manasa izy mamotro, na lera zaho miasa amy zaridainay ke izy avy manahitahy zaho. Mahaimitambatra fo zahay izikoa fa miaraka miasa. Ke zahay mahaimifankatia fo.”

13. Ino raha mila ataonolo fivadiany baka iro hifandray marikitry tsarabe?

¹³ Aza adin̈a fa olo fivadiany ndray samby iô, iro tsy voatery hifandray marikitry. Nivolan̈a karaha ty man̈angy araiky manambady baka a Brezily: “Maro raha maharikian̈a atsika amy zioty, ke mety hieritreritry atsika fa efa miaraka amy vadintsika atsika fotony tran̈o araiky aminany. Kanefa hitako fa tsy ampy izikoa samby iô fo, fa zaho koa mba mila mieritreritry raha ilainy vadiko.” Aleva onon̈o akory nataony Bruno ndreky vadiny, baka azondro antoko fa iro samby mitady raha mahatsara ny andaniny ndreky ankilany. Ho Bruno: “Lera zahay fivadiany miaraka mangala diandian̈a, zahay tsy mitanatana telefony foeky fa man̈araraotro mankafỳ fotoan̈a io.”

14. Izikoa misy olo fivadiany tsy tia man̈ano raha miaraka, ino raha mety ataondro?

 ¹⁴ Fa akory ndraiky izikoa anao ndreky vadinao tsy tia man̈ano raha miaraka? Mety tsy mitovy donko raha tianaro, na anaro foeky mora tsy mifan̈araka. Izikoa zen̈y, aleva onon̈o ndraiky motrony alamaiky nikoran̈intsika in̈y. Motro vo rihetin̈y tsy direkty mizelazela, fa mila soron̈iny tsihelihely. Karaha zen̈y koa, nan̈ino izikoa amy voanalohany, anaro manokan̈a fotoan̈a hely isanandra hiarahanaro? Man̈anaova raha araiky tianaro roe, fa tsy raha mora mampimalo anaro. (Jak. 3:18) Izikoa anaro miaraka man̈ano raha tsihelihely karaha zen̈y amy voanalohany, ho hitanaro fa hitombo ndraiky fifankatiavanaro.

15. Nan̈ino hifankatia fo olo fivadiany izikoa mifan̈aja?

¹⁵ Fifan̈ajan̈a io raha ten̈a maventy an̈aty vadian̈a. Izio miran̈a tsiko mampirehitry motro. Izikoa tsisy tsiko, maty motro. Karaha zen̈y koa, izikoa olo fivadiany tsy mifan̈aja, betibetiky fitiavan̈andro efa hanintsy edy. Dikanizen̈y, izikoa lelahy ndreky viavy fivadiany samby mifen̈y mifan̈aja, iro man̈ano raha hampifankatia iro fo. Ke efa man̈aja vady ma anao lera anao mahatsapa fa anao efa man̈ano zen̈y? Ehe, mila vadinao mahatsapa raha zen̈y. Efa mandilatra 25 taon̈o vadian̈any Penny ndreky Aret. Ho Penny: “Feno fitiavan̈a tokantran̈onay fotony zahay mifan̈aja. Zahay roe samby tsy misalasala man̈aboaka hevitrinay fotony maventy aminaka hevitriny vadiko, ary ninaka koa maventy aminany.” Ke ino raha mety ataonao baka vadinao hahatsapa fa anao man̈aja izy ankitin̈y? Diniha ohatrany Abrahama ndreky Saraha.

16. Ino raha ianarany lelahy manambady baka aminy ohatrany Abrahama? (1 Petera 3:7) (Zahava koa sary.)

¹⁶ Abrahama ten̈a nan̈aja Saraha. Akory ahaizantsika zen̈y? Izy nitandren̈y Saraha ndreky nan̈aja fihetsehamponany. Tandraraiky, niasaloha mare Saraha ke nikoran̈iny taminy Abrahama raha nampalahelo izy. Nan̈amia tsin̈y Abrahama foeky izy tamy zen̈y. Neloko taminany ma Abrahama koa fa naharen̈y zen̈y? Tsy zen̈y foeky. Hainy fa Saraha man̈angy man̈aja vady sady man̈eky fanapahankevitrinany. Ke Abrahama nitandren̈y izy sady nitady fomba hamahan̈a problemo io. (Gen. 16:5, 6) Ino raha ianarantsika baka amy zen̈y? Lelahy manambady manan̈a fahifan̈a hanapakevitry amy raha momba fianakavian̈anany. (1 Kor. 11:3) Fa ndray zen̈y, be fitiavan̈a anao izikoa mitandren̈y hevitriny vadinao alohany anao hanapakevitry, intsaka eky izikoa fanapahankevitry io hisy vokany aminany. (1 Kor. 13:4, 5) Misy fotoan̈a vadinao mety miasaloha mare ke tihikoran̈a raha tsapany. Man̈aja fihetsehamponany ma anao ke mitandren̈y izy tsarabe? (Vakia 1 Petera 3:7.) Efa ho 30 taon̈o vadian̈any Angela ndreky Dmitry. Angela nahatsapa tsarabe fa  Dmitry nan̈aja izy. Ho Angela: “Dmitry tsiary ndraiky tsy nitandren̈y zaho lera nisy raha nampalahelo zaho na lera zaho zisty tihikoran̈a fo. Ndray zaho efa nindesimpo ke tafikapokapoko mbala tandrin̈esany fo.”

17. Ino raha ianarany man̈angy manambady baka aminy ohatrany Saraha? (1 Petera 3:5, 6)

¹⁷ Saraha koa ten̈a nan̈aja Abrahama ke nanohan̈a fanapahankevitrinany fo. (Gen. 12:5) Tandraraiky, nisy vahiny navy tampoko taminiry Abrahama tao, ke izy nanapakevitry han̈ano karibo antran̈o iro. Nirahiny najanony Saraha raha nataony avio izy nasainy nan̈amboatra mofo maro. (Gen. 18:6) Akory nataony Saraha? Niaraka izy naharen̈y zen̈y, direkty nataony raha jiaby nivolan̈iny vadiny. Mangala tahaka Saraha koa man̈angy manambady izikoa manohan̈a fanapahankevitriny vadiny. Hahaiho fatatra fo vadian̈anaro izikoa anao man̈ano zen̈y. (Vakia 1 Petera 3:5, 6.) Nazavainy Dmitry, araiky nikoran̈intsika tamy fehintsoratra taloha tio in̈y, fa nataony vadiny tsapany fa izy ten̈a najainy. Hoizy: “Zaho mankasitraka vadiko mare fotony izy miezaka manohan̈a fanapahankevitrinaka, ndray tsy lanilaniny izio ndraikindraiky. Avio ndray raha io tsy nahomby, izy tsy nan̈amia tsin̈y zaho.” Tsy hitanao manjary mora mankatia olo araiky izikoa izy man̈aja anao?

18. Ino hatsaran̈a azonolo fivadiany izikoa iro mifen̈y man̈ano raha hahavy fifankatiavan̈andro tsy ho faty?

¹⁸ Amy zioty, tiany Satana tsisy fifankatiavan̈a foeky an̈atiny tokantran̈o Kristianin̈y. Hainy baka fa izikoa olo fivadiany loso tsy mifankatia, iro mety hiala Jehovah. Fa atsika mahay fa ten̈a fitiavan̈a zen̈y tsy maty vonen̈a! Ke irarian̈a fifankatiavanaro fivadiany ho miran̈a fitiavan̈a koran̈iny bokiny Tonon-kiran’i Solomona in̈y. Mifen̈a ho tapakevitry han̈ano voanalohantoeran̈a sitrapony Jehovah an̈aty tokantran̈onaro. Manokàn̈a fotoan̈a ninaro roe. Baka io hajà fihetsehampony vadinao ndreky tadiava raha mahatsara izy. Izikoa anaro samby man̈ano zen̈y, tokantran̈onaro han̈amia voninahitry Jehovah, Zan̈ahary naviany ten̈a fitiavan̈a, avio fifankatiavan̈anaro hizelazela fo karaha motro voasoron̈o tsarabe.