1. Ino raha irahiny Jehovah ataony panomponany? (Zahava koa sary.)

 AMINJOVY afaka hitodihantsika lera atsika mila fankahirezan̈a ndreky taridalan̈a? Haintsika valiny fan̈ontanian̈a zen̈y: Amy Jehovah. Atsika afaka mikoran̈a aminany amy vavaka. Zen̈y lastio raha irahiny Jehovah ataontsika. Tiany atsika mivavaka matetiky na koa tsy “voly mivavaka.” (1 Tes. 5:17) Afaka mivavaka malalaka aminany atsika ndreky mangataka taridalan̈anany amy lafiny jiaby amy fiain̈anantsika. (Ohab. 3:5, 6) Jehovah io Zan̈ahary farandraha mahatariky eky, ke izy man̈ambela atsika hivavaka aminany na impiry na impiry.

2. Ino raha hidinihintsika amy lahatsoratra ty?

² Mankasitraka Jehovah mare atsika fotony ambelany hivavaka aminany. Kanefa, maro raha atao atsika isanandra ke mety sahiran̈a atsika mahita fotoan̈a hivavahan̈a. Mety hitantsika koa fa mila hankatsarain̈a vavaka ataontsika. Nakiry izy, amy Baiboly ao afaka ahitantsika fankahirezan̈a ndreky taridalan̈a maro. Amy lahatsoratra ty atsika handiniky nan̈ino modeliny Jesosy man̈ampy atsika hahita fotoan̈a ivavahan̈a. Hisy hevitry dimy maventy koa hidinihintsika baka han̈ampy atsika hankatsara vavakantsika.

3. Ino raha hainy Jesosy momba vavaka?

³ Hainy Jesosy fa ten̈a raha maventy amy Jehovah vavaka ataontsika. Efa ela be talohany izy navy tambony tany tatỳ, izy efa nahita Babany namaly vavakany lelahy ndreky man̈angy tsy mivadiky. Tankilany Babany tiô, ohatra, izy tamy Jehovah namaly vavaka baka amy fô nataony Hana, Davida, ndreky Elia. Karaha zen̈y koa tamy vavakanolo hafa maro tsy mivadiky. (1 Sam. 1:10, 11, 20; 1 Mpanj. 19:4-6; Sal. 32:5) Ke tsy mahagaga izikoa Jesosy nampianatra pianatranany hivavaka matetiky ndreky hatoky fa Babany hamaly vavakandro.​—Mat. 7:7-11.

4. Ino raha ianarantsika baka amy vavaka nataony Jesosy?

 ⁴ Jesosy nan̈ambela modely arehany pianatranany izikoa fa nivavaka tamy Jehovah. Tamy fotoan̈a nanompoany tambony tany tatỳ, Jesosy nivavaka matetiky. Matetiky izy maro raha natao ndreky nivorianolo, ke izy tsy maintsy nanokan̈a fotoan̈a ivavahan̈a. (Mar. 6:31, 45, 46) Izy nifoha maraindrain̈y be, ke nan̈araraotro nivavaka tamy fotoan̈a mbala tsisy olo. (Mar. 1:35) Avio indraiky fara fahaheliny, izy nivavaka nampikiakandra talohany hangalany fanapahankevitry maventy. (Lioka 6:12, 13) Avio taminy alin̈y talohany hamonoan̈a izy, taloha heliny izy hankefa tapany farany sarotro taminy asanany tambony tany tatỳ, Jesosy nivavaka isaka teteky.​—Mat. 26:39, 42, 44.

5. Akory mety angalantsika tahaka Jesosy izikoa atsika fa mivavaka?

⁵ Modeliny Jesosy mampianatra atsika fa ndray atsika maro raha atao be karakory, atsika mila manokan̈a fotoan̈a ivavahan̈a fo. Karaha Jesosy, atsika afaka mitady fotoan̈a ivavahan̈a. Ohatra, mifoha bonera be koa fa maraindrain̈y na koa mandry taratara hely aminy alin̈y. Atsika koa man̈ano zen̈y, aboakantsika Jehovah fa atsika mankasitraka kado miavaka io. Ravoravo mare, ohatra, ranabavy araiky kahian̈a Lynne, taminizy vo sambany nahay fa atsika afaka mivavaka. Izy nivolan̈a: “Zaho koa fa nahay fa zaho afaka mikoran̈a amy Jehovah amy fotoan̈a jiaby, loso karaha namako marikitry oe fahitako izy. Zen̈y koa nandrisiky zaho hankatsara vavaka ataoko.” Hay be fa maro amintsika koa mahatsapa karaha zen̈y. Ke alo atsika handiniky raha dimy maventy mety ampidirintsika amy vavaka.

6. Izikoa zahan̈a Apokalypsy 4:10, 11, Jehovah man̈eva hahazo ino?

⁶ Midera Jehovah. Tamy fahitan̈a araiky miavaka, apostoly Jaona nahita antipan̈ahy 24 nanompo Jehovah tandan̈itry tan̈y. Iro nidera Zan̈ahary fotony haindro fa izy man̈eva hahazo “voninahitry, fan̈ajan̈a ndreky angovo.” (Vakia Apokalypsy 4:10, 11.) Maro koa antony mahavy iro anjely tsy mivadiky aby io hidera ndreky han̈amia voninahitry Jehovah. Iro nanjary nahay Jehovah tsarabe fotony iro miaraka aminany andan̈itry  an̈y. Hitandro mibaribary amy raha ataony toetrinany. Loso tihidera Jehovah iro izikoa fa mahita fomba fan̈anaovany raha.​—Joba 38:4-7.

7. Ino raha mety hiderantsika Jehovah?

⁷ Tiantsika koa hidera Jehovah lera mivavaka, ke koran̈intsika aminany ino raha ten̈a itiavantsika izy ndreky nan̈ino atsika man̈aja izy. Lera anao mamaky ndreky mianatra Baiboly, diniha ino toetriny Jehovah ten̈a tianao. (Joba 37:23; Rom. 11:33) Baka io, volàn̈a amy Jehovah raha tsapanao momba toetry aby io. Afaka midera Jehovah koa atsika noho izy man̈ampy atsika ndreky iro rahalahintsika erantany. Izy baka tsy voly mikarakara ndreky miaro atsika.​—1 Sam. 1:27; 2:1, 2.

8. Ino aby raha sasany tôkony han̈anaovantsika mersy Jehovah? (1 Tesalonianina 5:18)

⁸ Mankasitraka Jehovah. Maro antony tôkony han̈anaovantsika mersy Jehovah lera mivavaka. (Vakia 1 Tesalonianina 5:18.) Baka amy Jehovah fan̈amezan̈a tsara jiaby, ke atsika mety man̈ano mersy izy amy raha tsara jiaby anan̈antsika. (Jak. 1:17) Ohatra, atsika mety man̈ano mersy izy amy tany tsarabe ty ndreky raha maro tsara niasainy. Mety ataontsika mersy koa izy nan̈amia atsika fahin̈ana, fianakavian̈a, naman̈a, avio fan̈antinan̈a. Tiantsika koa hankasitraka Jehovah noho izy man̈ambela atsika hinaman̈a aminany.

9. Nan̈ino atsika mila mifen̈y hahay hankasitraka Jehovah?

⁹ Mety mila miezaka mare atsika vo mahita antony tôkony han̈anaovantsika mersy Jehovah. Nan̈ino? Fotony atsika miain̈y amy donia tsy mahay mankasitraka. Matetiky olo mieritreritry fomba hazahoandro raha tadiavindro fo, fa tsy mandiniky akory fomba han̈aboahan̈a fankasitrahan̈a amy raha efa anan̈andro. Izikoa mifindra amintsika toetsain̈y karaha zen̈y, mety hiasa hangataka fo atsika lera mivavaka. Ke izikoa tsy tiantsika ho karaha zen̈y, atsika mila mifen̈y fo hahay hankasitraka raha jiaby ataony Jehovah amintsika, ndreky mitady fomba han̈anaovan̈a mersy izy.​—Lioka 6:45.

10. Nan̈ino fahaizan̈a mankasitraka nan̈ampy ranabavy araiky hiaritry? (Zahava koa sary.)

¹⁰ Fahaizan̈a mankasitraka man̈ampy atsika hiaritry raha sarotro. Diniha baka tantarany Kyung-sook, amy Ny Tilikambo Fiambenana 15 Zanvie 2015. Izy navoa kanserany havokavoko, sady izio efa nitombo be. Hoizy: “Nampakivy zaho aretin̈y io. Navozo mare zaho fotony karaha nadoso taminaka raha jiaby nanan̈ako.” Ino raha nan̈ampy izy hiaritry? Izy nivolan̈a fa isaka alin̈y alohany izy hoandry, izy manonga amy tafontran̈onany mivavaka, ke nivolan̈iny mare raha dimy ten̈a nankasitrahany taminy andra io. Ke zen̈y nan̈ampy izy hilamintsain̈y ndreky nandrisiky izy hivolan̈a amy Jehovah fa izy tiany. Hitany karakory ataony Jehovah manohan̈a  panomponany tsy mivadiky izikoa fa miatriky raha sarotro. Loso tsapany koa fa mbala bebeny problemo mahazo atsika fitahian̈a azontsika. Karaha i Kyung-sook, maro koa antony mety han̈anaovantsika mersy Jehovah, ndray atsika miatriky raha sarotro. Atsika hahavita hiaritry ndreky ho ravoravo fo izikoa atsika mankasitraka Jehovah lera mivavaka.

11. Jesosy koa fa nimpody tandan̈itry, nan̈ino pianatranany aby io nila nanan̈a korazy?

¹¹ Angataha Jehovah han̈ampy anao hasaky hitory. Taloha heliny Jesosy handeha hanonga andan̈itry, izy nampatsiaro pianatranany aby io fa iro mila man̈ambara raha momba izy “a Jerosalema ndreky a Jodia jiaby ndreky Samaria ndreky amy tany farany lavitry an̈y.” (Asa. 1:8; Lioka 24:46-48) Tafara hely tatỳ, iro pitondra jiosy aby io nanambotro apostoly Petera ndreky Jaona, avio nitondra iro tamy Fitsaran̈a Avo Jiosy. Iro tamy fitsaran̈a io nan̈iraka lelahy tsy mivadiky aby io ho voly hitory, avio nandrahon̈o iro lastio. (Asa. 4:18, 21) Ke akory nataony Petera ndreky Jaona?

12. Izikoa zahan̈a Asan’ny Apostoly 4:29, 31, ino raha nataondro pianatra aby io?

¹² Karaha ty raha nivolan̈iny Petera ndreky Jaona tamindro pitondra fivavahan̈a jiosy aby io: “Anjaranaro mitsara na marin̈y man̈oloan̈a Zan̈ahary na tsy marin̈y hitandrin̈esanay anaro, fa tsy hitandrin̈esanay Zan̈ahary. Fa izikoa zahay fo, zahay tsy mety ho voly hivolan̈a raha efa hitanay ndreky ren̈inay.” (Asa. 4:19, 20) Lera Petera ndreky Jaona navosotrondro, iro pianatra aby io nivavaka tamy Jehovah baka izy han̈ampy iro han̈ano sitraponany. Iro nivavaka karaha ty: ‘Ataova raha hahavy zahay panomponao hasaky mare hitory volan̈anao.’ Jehovah namaly vavaka baka amy fô nataondro io.​—Vakia Asan’ny Apostoly 4:29, 31.

13. Ino raha ianarantsika baka tamy raha nataony Jin-hyuk?

¹³ Izikoa iro pitondra fanjakan̈a aby io mandrova atsika tsy hitory, atsika afaka man̈ano karaha nataondro pianatra aby io ke mitory fo. Diniha baka raha nataony Jin-hyuk, rahalahy araiky nigadra fotony tsy nan̈eky han̈ano maramila. Tamy prizon tan̈y, izy nirahin̈y nikarakara gadra sasany natokana toeran̈a, fa izy fo tsy nahazo nikoran̈a tamindro raha tsisy ifandraisany taminy asanany foeky, ndray momba Baiboly. Izy nangataka tamy Jehovah han̈ampy izy hasaky hitory ndreky hahita fomba han̈anaovan̈a zen̈y, isaka nisy hiriky. (Asa. 5:29) Hoizy: “Nivaliny Jehovah vavakanaka ke zaho namiany korazy ndreky fahendrena. Vokany, zaho nanjary nahavita nitariky fampianaran̈a Baiboly maro tan̈atiny dimy minity, tamy varavaran̈any gadra aby io tio. Avio, koa fa alin̈y, zaho nanoratra taratasy handeha hamiako iro gadra aby io amarainizin̈y.” Atsika koa afaka matoky fa Jehovah tsy maintsy han̈ampy atsika hahavita fanompoan̈antsika. Karaha Jin-hyuk, atsika afaka mangataka korazy ndreky fahendrena amy Jehovah.

14. Ino raha mety han̈ampy anao izikoa anao miatriky problemo? (Salamo 37:3, 5)

¹⁴ Angataha Jehovah han̈ampy anao hiaritry problemo. Maro amintsika iziô marary na malahelo mare, maty havan̈a, misy problemo amy fianakavian̈a, injehin̈y, na miatriky problemo hafa. Mahaisarotro fo koa miatriky ankamarozany problemo aby io nohony valan̈aretin̈y ndreky ady. Ke ino han̈ampy anao? Ambarà Jehovah raha an̈aty fonao. Koràn̈a aminany raha mavoa anao, karaha ataonao mikoran̈a amy kamaradinao marikitry  in̈y. Baka io, matokisa fa Jehovah ‘han̈ampy anao.’​—Vakia Salamo 37:3, 5.

15. Nan̈ino vavaka man̈ampy atsika ‘hiaritry fahorian̈a’? Man̈ameza ohatra.

¹⁵ Izikoa atsika tsy voly mivavaka ho vitantsika ‘hiaritry fahorian̈a.’ (Ro 12:12) Hainy Jehovah raha atrefiny panomponany, avio ‘ren̈iny kaiky vonjy ataondro.’ (Sal. 145:18, 19) Nahatsapa fahamarin̈any raha zen̈y Kristie, ranabavy pisava lalan̈a 29 taon̈o. Tsy nampoizin̈y fa izy nanjary narary mare. Ke vokanizen̈y, izy loso kivy mare. Tsy ela tafaranizen̈y, ren̈iny fa mamany koa voany aretin̈y mahafaty. Ho Kristie: “Zaho nivavaka mare tamy Jehovah baka izy han̈amia angovo ilaiko isanandra. Nifen̈y fo koa zaho hanan̈a fahazaran̈a tsara arapan̈ahy, ke zaho nandeha nivory fo avio nan̈ano fianaran̈a manokan̈a.” Karaha ty koa hoizy: “Vavaka raha nan̈ampy zaho tan̈aty fotoan̈a ten̈a sarotro io. Haiko fa Jehovah iô fo, ke zen̈y raha ten̈a nankahery zaho. Marin̈y fa aretin̈inaka tsy direkty janga, fa Jehovah namaly vavakanaka fotony zaho nampiany hilamintsain̈y ndreky tsy ho taitaitry.” Irarian̈a atsika tsy han̈adin̈a fa “hainy Jehovah man̈avotro olo mahafoe ten̈a amy Zan̈ahary, izikoa fa misy raha ratsy mahazo iro.”​—2 Pet. 2:9.

16. Nan̈ino atsika mila fan̈ampian̈a baka amy Jehovah izikoa tihanohitry fakampan̈ahy?

¹⁶ Angataha Jehovah han̈ampy anao hanohitry fakampan̈ahy. Atsika olombelon̈o tsy lavorary, ke isanandra atsika mila miady mare amy fakampan̈ahy han̈ano raha ratsy. Man̈ano erakany vitany koa Satana baka tsy ho vitantsika hanohitry izio. Fomba araiky an̈anaovany zen̈y iziô, izy mampiasa fangalan̈a diandian̈a vetaveta baka handrobatan̈a jerintsika. Fangalan̈a diandian̈a karaha zen̈y baka mitariky atsika hieritreritry raha ratsy, ke mahavy atsika haloto man̈oloan̈a Jehovah, avio mety hitariky atsika han̈ano fahotan̈a maventy foeky.​—Mar. 7:21-23; Jak. 1:14, 15.

17. Izikoa atsika tihanohitry fakampan̈ahy, ino raha mila ataontsika lera atsika fa baka nangataka fan̈ampian̈a tamy Jehovah? (Zahava koa sary.)

 ¹⁷ Mila fan̈ampian̈a baka amy Jehovah atsika izikoa tihanohitry fakampan̈ahy han̈ano raha ratsy. Ty an̈isany raha nangatahiny Jesosy tamy vavaka modely in̈y: “Aza ambela ho resiny fakampan̈ahy zahay, fa avota aminy araiky ratsy in̈y zahay.” (Mat. 6:13) Jehovah man̈iry han̈ampy atsika, fa atsika fo mila mangataka fan̈ampian̈a aminany. Atsika koa mila man̈ano raha mifan̈araka amy vavakantsika. Amy fomba akory? Atsika mila mifen̈y mare tsy hamaky na hitandren̈y hevitry diso malaza amy doniany Satana ty. (Sal. 97:10) Mila finoantsika raha tsara jerintsika, ke atsika mila mamaky ndreky mianatra Baiboly. Ho voaro koa sain̈intsika izikoa atsika mandeha mivory ndreky manompo. Atsika koa man̈ano raha aby zen̈y, Jehovah mampan̈anten̈a fa atsika tsy hambelany hitsapain̈y mandilatra raha tondrantsika.​—1 Kor. 10:12, 13.

18. Ino aby raha mila ataontsika tsiaraikiaraiky?

¹⁸ Sarotro mare fiain̈ana aminy andra farany zioty. Ke atsika tsiaraikiaraiky samby mila mivavaka mare lombolombony taloha, baka hahavita tsy hivadiky amy Jehovah. Isanandra, manokàn̈a fotoan̈a hivavahan̈a amy fô jiaby. Tiany Jehovah ‘koran̈intsika aminany raha jiaby an̈aty fontsika’ lera atsika mivavaka. (Sal. 62:8) Deray ndreky hankasitraha Jehovah amy raha jiaby nataony. Iangavia izy han̈ampy anao hasaky hitory. Angataha koa izy han̈ampy anao hiaritry lan̈iany problemo mandalo ndreky han̈ampy anao hanohitry fakampan̈ahy mety havoa anao. Aza ambela hisy olo na raha hafa hanakan̈a anao tsy hivavaka tsy tapaka amy Jehovah. Fa akory ndraiky ataony Jehovah mamaly vavakantsika? Amy lahatsoratra man̈araka atsika hahita valiny fan̈ontanian̈a maventy be zen̈y.