1. Ino raha manahiran̈a ankamarozantsika?

 EFA nisy fotoan̈a ma sarotro taminao nanakatra tanjon̈onao arapan̈ahy? b Tsy anao zaraiky tatranizen̈y. Karaha zen̈y iziô, ohatra, Philip. Izy tihankatsara vavakanany ndreky tihivavaka matetiky, kanefa sarotro taminany nahita fotoan̈a hivavahan̈a. Erika ndraiky tihiezaka tsy ho tara amy fivorian̈a alohany fanompoan̈a. Kanefa izy mbala tara fo, efa ho isaka fivorian̈a. Efa matetiky koa Tomáš niezaka hamaky Baiboly firaka amparany. Hoizy: “Zaho foeky tsy tia mamaky Baiboly. Efa intelo zaho nan̈ohatra, fa isaka zaho avy amy Levitikosy, zaho nijanon̈o.”

2. Nan̈ino atsika tsy tôkony ho rivan̈a izikoa misy tanjon̈o arapan̈ahy tsy mety tatrantsika?

² Anao amiziô ma efa mifen̈y mare manakatra tanjonao fa raha io tsy mety tatra? Koa zen̈y, anao aza rivan̈a. Nan̈ino? Ndray tanjon̈o tsotra mbala mitaky fotoan̈a ndreky ezaka mare manakatra izy. Matoa anao mbala man̈iry hanakatra tanjon̈onao, dikanizen̈y valera aminao ankitin̈y fifandraisan̈anao amy Jehovah avio anao tihan̈amia ny farany tsara vitanao. Ravoravo Jehovah mahita ezakanao. Matokisa fa, izy tsy han̈iraka anao han̈ano raha tsy ho vitanao. (Sal. 103:14; Mika 6:8) Ke raha ho vitanao fo tôkony hataonao tanjon̈o. Ino raha mety hataonao baka ho tatranao tanjon̈onao? Alo atsika handiniky sosokevitry vitsivitsy.

3. Nan̈ino atsika mila man̈iry mare hanakatra tanjon̈o?

³ Ten̈a raha maventy fanan̈ana fan̈irian̈a hanakatra tanjon̈o arapan̈ahy. Izikoa anao man̈iry hanakatra tanjon̈onao, anao hifen̈y mare han̈ano raha hanakaran̈a izio. Fan̈irian̈antsika hanakatra tanjon̈ontsika io mety ampiran̈iny amy tsiko man̈aposy lakalay. Izikoa tsy mijanon̈o tsiko, ho avy amy tany hingoany olo mitondra lakan̈a io. Izikoa baka tsiko mare tsarabe, halakilaky ho avy izy. Karaha zen̈y koa, arakaraka fan̈irin̈antsika hanakatra tanjon̈o, hahavy atsika hahavita izio. Nivolan̈a karaha ty David, rahalahy araiky baka Salvadaoro: “Izikoa anao man̈iry mare hanakatra tanjonon̈ao, anao loso tafifen̈y mare, sady tsisy raha ambelanao hanakana anao tsy hanakatra izio.” Ke ino raha mety ataonao baka anao han̈iry mare hanakatra tanjon̈onao?

4. Ino raha mety angatahintsika amy vavaka? (Filipianina 2:13) (Zahava koa sary.)

⁴ Mivavaha baka anao han̈iry mare hanakatra tanjon̈o. Jehovah afaka mampiasa fan̈ahy masin̈inany han̈ampian̈a anao han̈iry hanakatra tanjon̈onao. (Vakia Filipianina 2:13.) Misy fotoan̈a atsika man̈ano tanjon̈o han̈ano raha araiky fotony haintsika fa zen̈y tôkony hatao. Tsara zen̈y. Fa problemo, amy fotoan̈a in̈y, atsika mety tsy ten̈a tihan̈ano raha io. Karaha zen̈y iziô Norina, ranabavy araiky baka Ogandà. Izy nan̈ano tanjon̈o hitariky fampianaran̈a Baiboly. Kanefa izy tsy ten̈a nan̈iry hanan̈o raha io fotony izy nieritreritry fa izy tsy mahay mampianatra. Ke ino raha nan̈ampy izy? Hoizy: “Isanandra zaho nivavaka baka Jehovah han̈ampy zaho hampitombo fan̈irian̈anaka hitariky fampianaran̈a Baiboy. Baka io zaho nifen̈y nankatsara fahaizako mampianatra. Fanjava vitsivitsy tafaranizen̈y, tsapako fa zaho nahainan̈iry hampianatra fo. Ke tamy taon̈o io fo zaho efa nanomboko nitariky fampianaran̈a Baiboly aroe aby.”

5. Ino raha mety saintsain̈intsika baka hitombo fan̈iriantsika hanakatra tanjon̈o?

⁵ Saintsain̈a raha efa nataony Jehovah taminao. (Sal. 143:5) Apostoly Paoly nisaintsain̈y hatsarampan̈ahy miavaka naboakany Jehovah taminany, ke raha zen̈y nandrisiky Paoly hazoto mare hanompo Jehovah. (1 Kor. 15:9, 10; 1 Tim. 1:12-14) Mira zen̈y koa, arakaraka isaintsain̈anao raha nataony Jehovah taminao, hahavy anao han̈iry mare hanakatra tanjon̈onao. (Sal. 116:12) Diniha baka ino raha nan̈ampy ranabavy araiky baka Honduras hanakatra tanjon̈onany han̈ano pisava lalan̈a. Hoizy: “Niminimineko habezany fitiavany Jehovah zaho. Zaho nitahominy ho an̈isany vahoakany. Izy mikarakara ndreky miaro zaho. Ke zaho nahaitia izy fo, avio zaho nanjary nahaitihanakatra tanjon̈onaka fo.”

6. Ino koa han̈ampy atsika han̈iry mare hanakatra tanjon̈o?

⁶ Mifantoha aminy hatsaran̈a azonao lera anao mahatatra tanjon̈onao io. Aleva onon̈o  ino raha nan̈ampy Erika, ranabavy nifen̈y tsy ho tara, nikoran̈intsika taloha tarỳ in̈y. Hoizy: “Maro raha tsy harako zaho koa tara amy fivorian̈a alohany fanompoan̈a. Fa zaho koa fa avy aloha, zaho afaka miarahaba ndreky mikoran̈a amindro ranadahy ndreky rahavavy aby io sady afaka maharen̈y sosokevitry mahomby han̈ampy zaho ho tia ndreky hankatsara fanompoan̈anaka.” Erika nifantoko taminy hatsara azony koa izy tsy tara, ke loso tatrany tanjon̈onany. Iritrireta ino aby hatsaran̈a ho azonao lera anao mahatatra tanjon̈onao io. Izikoa anao tihankatsara vaky Baiboly na vavaka ataonao, diniha nan̈ino raha zen̈y hankafatatra fifandraisanao amy Jehovah. (Sal. 145:18, 19) Anao ndraiky koa tihanan̈a toetry tsara araiky, iritrireta nan̈ino toetry io han̈ampy anao ho tsara fihavan̈ana aminolo. (Kol. 3:14) Ataova listy ino aby antony mahavy anao tihanakatra tanjonon̈onao io, avio zahava matetitetiky listy nataonao io. Nivolan̈a karaha ty Tomáš, rahalahy nikoran̈intsika taloha in̈y: “Arakaraka nahitako antony maro tôkony hanakarako tanjon̈o araiky, mahavy zaho tsy rivan̈a hanakatra izy.”

7. Ino raha nan̈ampy Julio ndreky vadiny hanakatra tanjon̈ondro?

⁷ Miaraha aminolo handrisiky anao hanakatra tanjon̈onao. (Ohab. 13:20) Diniha baka ino raha nan̈ampy Julio ndreky vadiny hanakatra tanjon̈ondro hampitombo fanompoan̈a. Hoizy: “Zahay ninaman̈a taminolo nandrisiky zahay hanakatra tanjon̈onay, avio nikoran̈inay tamindro tanjon̈onay. Maro tamindro efa nahavita nanakatra tanjon̈ondro, ke iro afaka nan̈amia sosokevitry tsara zahay. Nan̈ontaniandro zahay koa akory naniny tanjon̈onay, avio namiandro korazy zahay koa fa nila zen̈y.”

8. Izikoa lera atsika mazoto fo vo hanakatra tanjon̈ontsika, ino raha mety hiboaka? (Zahava koa sary.)

⁸ Misy fotoan̈a atsika mety tsy man̈iry han̈ano raha araiky. Zen̈y ma midika fa tsy ho vitantsika foeky hanakatra tanjon̈ontsika? Ehe. Aleva onon̈o baka: Tsiko iziô koa fatatra, mora aminany man̈aposy lakalay amy tany himboany. Kanefa tsiko mety hiovaova. Ndraikindraiky izio mety halemy na tsisy foeky. Dikanizen̈y, efa tsy afaka miteky eky ma lakalay io? Tsy voatery. Misy lakalay sasany iziô manan̈a motera, sasany koa misy fivehy. Ke pitondra lakana afaka mampiasa raha aby zen̈y baka izy ho tody amy tany hingoany. Fan̈irian̈antsika koa mety ampiran̈iny amy tsiko. Misy andra atsika mety mazoto hanakatra tanjon̈o, fa ndraikindraiky atsika mety tsy nahefa foeky. Kanefa izikoa hiambin̈y atsika hazoto vo hanakatra tanjon̈o, mety tsy ho tatrantsika foeky izio. Fa izikoa atsika man̈ano karaha pitondra lakana mitady fomba hafa havian̈a amy tany hingoany, atsika ho afaka han̈ano raha hanakaran̈a tanjon̈ontsika ndray tsy mazoto atsika ndraikindraiky. Tsy ho mora ndraiky zen̈y, fa ho ravoravo atsika izikoa tatrantsika tanjon̈ontsika. Ke ino raha mety ataontsika? Alohany  hamalian̈a zen̈y, misy fan̈ontanian̈a araiky hivalintsika antsendriky.

9. Mety ma izikoa atsika mbala mifen̈y fo manakatra tanjon̈o araiky, ndray atsika tsy tihan̈ano izio? Hazavà.

⁹ Atsika tiany Jehovah hanompo izy antsitrapo ndreky ankaravoan̈a. (Sal. 100:2; 2 Kor. 9:7) Ke atsika ma tôkony mbala hifen̈y fo hanakatraka tanjon̈o araiky ndray izio tsy tiantsika? Diniha raha nataony apostoly Paoly. Hoizy: ‘Sireko mare vatan̈anaka ke andivoziko.’ (1 Kor. 9:25-27, l.p.a.) Paoly niforse ain̈inany han̈ano raha nasainy Jehovah nataony, ndray izy tsy tihan̈ano izio. Nankasitrahiny Jehovah edy ma raha nataony zen̈y? Zen̈y tsarabe! Namezany Jehovah valisoa izy nohony ezakanany.​—2 Tim. 4:7, 8.

10. Ino mahatsara atsika mifen̈y fo manakatra tanjon̈o araiky ndray izio tsy mampazoto atsika?

¹⁰ Miran̈a zen̈y koa, ravoravo Jehovah mahita atsika mifen̈y manakatra tanjon̈ontsika, ndray tsy mampazoto atsika han̈ano izio. Hainy baka fa raha io tsy ten̈a tiantsika fa fitiavantsika izy fo mahavy atsika mifen̈y man̈ano izio. Hamezany hatsaran̈a koa atsika, karaha nataony tamy Paoly in̈y. (Sal. 126:5) Izikoa anao mahatsapa tahiny Jehovah, anao mety hanjary tihifen̈y hanakatra tanjon̈o. Karaha ty raha nivolan̈iny Lucyna, ranabavy baka a Pologne: “Misy fotoan̈a zaho tsy nahefa handeha hanompo foeky, intsaka eky zaho koa fa kajo. Kanefa ravoravo zaho koa fa baka manompo, mira nahazo kado maventy.” Ke ino raha mety ataontsika izikoa atsika tsy man̈iry hanakatra tanjon̈ontsika?

11. Akory an̈ampiany Jehovah atsika hahafehy ten̈a?

¹¹ Mivavaha baka hahavita hifehy ten̈a. Mahafehy ten̈a olo araiky izikoa mahafehy fihetsehamponany ndreky raha ataony. Matetiky volan̈a io ivolan̈ana olo araiky miforse ain̈inany tsy han̈ano raha ratsy. Kanefa, tsy amy zen̈y fo ilavan̈a izio. Mila mifehy ten̈a koa atsika baka hahavita han̈ano ny tsara, intsaka eky izikoa raha io sarotro na tsy ten̈a mampazoto atsika. Tsarova fa fifihezanten̈a io an̈isany vokatrany fan̈ahy. Ke mangataha fan̈ahy masin̈y amy Jehovah baka anao hanan̈a toetry maventy io. (Lioka 11:13; Gal. 5:22, 23) David, araiky nikoran̈intsika taloha in̈y nan̈iry tsy hanapatapaka fianaran̈a manokan̈a. Izy nitantara fa vavaka ten̈a nan̈ampy izy. Hoizy: “Zaho nivavaka baka ampiany Jehovah hifehy ten̈a. Nampiany zaho, ke nahavita nan̈ano fandaharampotoan̈a mety tsara, avio vitako koa nan̈ano izio tsy tapaka.”

12. Nan̈ino toro lalan̈a amy Mpitoriteny 11:4 man̈ampy atsika hanakatra tanjon̈ontsika?

¹² Aza miambin̈y raha jiaby mandeha mahitsy. Izikoa mbala amy donia fo, tsisy andra tsy hisiany problemo. Ke izikoa anao hiambin̈y raha jiaby milamindamin̈y vo han̈ano raha, tsisy andra hahatakaranao tanjon̈onao. (Vakia Mpitoriteny 11:4.) Karaha ty nambarany rahalahy araiky kahian̈a Dayniel: “Antanàna anao izikoa hiambin̈y rano ritry, ke sitrany direkty man̈ano raha.” Paul, rahalahy araiky baka Ogandà, koa nivolan̈a antony hafa mahavy atsika tsy tôkony hangatakandra. Hoizy: “Izikoa atsika direkty man̈ano raha ndray tsy mora, Jehovah hitahy atsika.”​—Mal. 3:10.

13. Ino mahatsara manakatra tanjon̈o tsihelihely?

¹³ Atomboha tsihelihely. Ndraikindraiky mety hitanao sarotro takarin̈y loatra tanjon̈onao, ke tsy mampazoto anao. Izikoa zen̈y, zarazaray tsihelihely tanjon̈onao. Ohatra, izikoa anao manan̈a tanjon̈o hanan̈a toetry tsara araiky, nan̈ino tsy mitady fomba tsotsotra antsendriky han̈aboahanao toetry io? Izikoa ndraiky tanjon̈onao hamaky Baiboly firaka amparany, nan̈ino izikoa andininy vitsivitsy fo ankendriky vakianao isanandra? Tomáš, araiky nikoran̈intsika taloha in̈y,  sahiran̈a nanakatra tanjon̈onany hankefa vaky Baiboly an̈atiny taon̈o araiky. Hoizy: “Hitako fa zaho nitady hanakatra raha lavitry loatra, ke zaho nanapakevitry han̈andran̈a ndraiky. Fa tamy diany araiky ty, andininy vitsivitsy fo nivakiko isanandra, avio zaho nisaintsain̈y raha nivakiko. Ke nanjary tiako mamaky Baiboly.” Arakaraka nahitany Tomáš hafizany famakian̈a Baiboly, nahavy izy nahaitihamaky izio elaela. Ke farany, voavakiny firakamparany Baiboly. c

14. Ino aby raha mety hanakan̈a atsika tsy hatakatra tanjon̈ontsika?

¹⁴ Ndray atsika man̈iry karakory han̈ano raha araiky ndreky efa mifehy ten̈a mare baka hahavita izio, mampalahelo fa mety mbala hisy problemo fo. Fotony atsika, ohatra, mety ho tatrany raha “tsy ampoizin̈y” mety hampataraiky fanakarantsika tanjon̈ontsika. (Mpito. 9:11) Mety hiatriky raha sarotro mampakivy ndreky mandany angovo koa atsika. (Ohab. 24:10) Mety hahavy atsika han̈ano raha tsy hatakarantsika tanjon̈ontsika koa ain̈intsika tsy lavorary. (Rom. 7:23) Atsika koa mety ho kajo. (Mat. 26:43) Ke ino basy raha han̈ampy atsika handresy sakantsakan̈a mety hiboaka?

15. Nan̈ino atsika tsy tôkony ho rivan̈a ndray iô sakantsakan̈a isankarazany? Hazavà. (Salamo 145:14)

¹⁵ Aza rivan̈a ndray iô sakantsakan̈a isankarazany. Baiboly mivolan̈a fa atsika jiaby samby mety ho takatrany problemo matetiky. Kanefa koran̈iny ao mazava koa fa ho vitanao fo hanakatra tanjon̈onao izikoa anao ampiany Jehovah. (Vakia Salamo 145:14.) Karaha ty raha nivolan̈iny Rahalahy Philip, araiky nikoran̈intsika taloha tarỳ in̈y: “Zaho tsy mandiniky impiry zaho tsy nahatakatra tanjon̈onaka, fa impiry zaho nan̈ano raha hanakarako izio ndraiky.” Ho koa David, araiky voakoran̈a taloha tarỳ in̈y: “Tsy ataoko manakan̈a  zaho amy tanjon̈onaka problemo mandalo, fa araraotiko an̈aboahan̈a amy Jehovah fa izy tiako ankitin̈y.” Izikoa anao mifen̈y fo manakatra tanjon̈onao ndray tsy mora, zen̈y man̈aboaka fa anao ten̈a tihan̈ano raha mamparavoravo Jehovah. Ravoravo mare izy mahita anao mifen̈y mare manakatra tanjon̈onao.

16. Mety han̈ampy anao hahita ino problemo mandalo aminao?

¹⁶ Mangalà fianaran̈a baka amy raha nandalo. Aleva onon̈o ino raha nahavy problemo io, avio man̈ontania ten̈a karaha ty: ‘Ino raha mety ataoko baka tsy himpodianany raha karaha in̈y man̈indroe?’ (Ohab. 27:12) Fa ndraikindraiky, izikoa tsy mety takatranao tanjon̈onao, mety hidika zen̈y fa anao man̈ano raha tsy ho vitanao. Ke izikoa anao mahatsapa fa zen̈y raha mavoa anao, diniha tsara ndraiky tanjon̈onao misy ahitanao asa izio mbala mety aminao sa karakory. d Jehovah tsy han̈amia tsin̈y anao amy raha tsy posibla ho vitanao.​—2 Kor. 8:12.

17. Nan̈ino atsika tsy tôkony han̈adin̈a raha efa vitantsika?

¹⁷ Tsarova raha efa vitanao. Baiboly mivolan̈a fa “Zan̈ahary tsy mety han̈ano raha tsy rariny ke han̈adin̈a raha nataonaro.” (Heb. 6:10) Anao koa dikanizen̈y tsy tôkony han̈adin̈a raha tsara vitanao. Diniha ino aby tanjon̈o efa takatranao. Anao, ohatra, mety efa mifandray tsara amy Jehovah, mikoran̈a aminolo raha momba izy, na efa nan̈ano batisa. Karaha nataonao nahavita nandroso ndreky nahatakatra tanjon̈onao arapan̈ahy tamy zen̈y, anao koa mbala afaka mandroso ndreky mifen̈y manakatra tanjon̈onao amy iziô.​—Fil. 3:16.

18. Ino raha tsy mila adin̈anao an̈atiny anao manakatra tanjon̈o? (Zahava koa sary.)

¹⁸ Izikoa anao ampiany Jehovah, ho vitanao hanakatra tanjon̈onao, mira olo araiky pitondra lakana ravoravo mare fotony tody amy tany tiany hingoany. Kanefa tsarova fa, maro amindro pitondra lakana aby io mankafy raha hitandro amy lalan̈a. Ke aza adin̈a koa mandiniky fomba an̈ampiany Jehovah anao, fotony zen̈y han̈ampy anao ho ravoravo fo firaka tanjon̈onao tatranao. (2 Kor. 4:7) Ke izikoa anao tsy rivan̈a, ho maro hatsaran̈a miambin̈y anao.​—Gal. 6:9.