LAHATSORATRA FIANARAN̈A 22
Mandihana amy ‘Lalan̈any Fahamasin̈ana’ Fo
‘Ho hisy lalabe an̈y, ... Lalan̈any Fahamasin̈ana.’—ISAIA 35:8.
HIRA 31 Miaraha Mandeha Amin’Andriamanitrao!
HO HITA ATO a
1-2. Ino fanapahankevitry maventy tsy maintsy nataondro Jiosy nipetraka ta Babylony tan̈y? (Ezra 1:2-4)
NISY vaovao maventy nilatsaka! Jiosy jiaby babo ta Babylony tan̈atiny 70 taon̈o, nahazo nody tamy tanindrazan̈andro tan Israely. (Vakia Ezra 1:2-4.) Tsy maintsy Jehovah fo nahavy raha zen̈y tanteraka. Nan̈ino atsika mivolan̈a zen̈y? Tsy fataony Babylony baka mamosotro olo nazondro babo. (Isaia 14:4, 17) Fa Babylony koa fa resy, nivolan̈a pitondra vaovao tao fa afaka mody amy tanindro iro Jiosy aby io. Ino eky vokatranizen̈y tamindro Jiosy aby io? Iro jiaby, intsaka eky lohany fianakavian̈a, tsy maintsy hanapakevitry: Hijanon̈o a Babylony sa handeha an Israely. Nety tsy nora tamindro hangala fanapahankevitry zen̈y. Asa nan̈ino?
2 Maro tamindro efa natoe mare ke tsy afaka han̈ano dia lavitry io. Ankamarozandro Jiosy aby io koa teraka ta Babylony, ke efa tan̈y fo tanànandro haindro. Tamindro, tsy tanànandro Israely fa tanindrazan̈andro. Tsy vitanizen̈y koa fa, Jiosy sasany efa nanjary nanandraha mare ta Babylony. Iro nanan̈a tran̈o tsara avio varotrondro nandeha mare. Nety sarotro tamindro hiala fanan̈anandro ke handeha amy tany tsy haindro.
3. Ino fitahian̈a niambin̈y iro Jiosy nanampinoan̈a nody tan Israely?
3 Naleony Jiosy nanampinoan̈a nimpody tan Israely, fotony haindro fa tsisy dikany raha hafoendro koa ampiran̈iny amy hatsaran̈a ho azondro. Ary momba fanompoan̈a Jehovah hatsaran̈a farany maventy niambin̈y iro. Hainao firy tempoliny panompo sampy ta Babylony? Mandilatra 50! Fa tsisy tempoliny Jehovah foeky tan̈y, nata araiky. Tan̈y tsisy alitara nety nan̈anaovandro fan̈atitry, erakany nitakiny Lalàn̈any Mosesy. Tsisy pisoron̈o voalamin̈y han̈ano soron̈o koa tan̈y. Sosoko zen̈y koa, panompo sampy naronaro tan̈y tozay olo nan̈aja Jehovah ndreky nan̈araka fitsipikinany. Ke andrivony Jiosy tia Jehovah von̈ono handeha hody tamy tanindrazan̈andro, han̈ampody ndraiky fivavahan̈a madio.
4. Ino fan̈ampian̈a nampan̈atinainy Jehovah tamindro Jiosy hody tan Israely?
4 Tsy raha marikidrikitry lalan̈a baka ta Babylony nandeha tan Israely, fotony efatra fanjava vo avy an̈y. Fa Jehovah nampan̈anten̈a fa hadosony aby raha jiaby mety hanakan̈a iro amy lalan̈a. Karaha ty nambarany Isaia: ‘Omàn̈a lalan̈a himboany Jehovah! Man̈anaova lalabe mahitsy mamakivaky tany paiky, mba himboany Zan̈aharintsika. ... Ataova mitovy tantan̈a tany misy dongodongony, avio ataova manjary lemaka tany mitsatoantoan̈a.’ (Isaia 40:3, 4) Aleva sary antsain̈y hely baka ty: Misy lalabe araiky mahitsy mamakivaky tany paiky, ndreky lemaka an̈ivony bongo. Misaora mamparavoravo mare nandeha tamy lalan̈a io! Ho moramora dia ataondro man̈araka lalabe mahitsy tsara, tozay hanonga mijotso bongo ndreky tazoa na vavasaha. Nampalaky diandro koa raha zen̈y.
5. Ino an̈aran̈a lalabe an̈ohatra baka Babylony nandeha tan Israely?
5 Amy zioty, maro lalabe misy an̈aran̈a na nimero. Nisy an̈aran̈a koa lalabe an̈ohatra nikoran̈iny Isaia io. Karaha ty nisoratiny: ‘Ho hisy lalabe an̈y, ia, lalan̈a io kahian̈a Lalan̈any Fahamasin̈ana. Tsy handeha amizio olo tsy madio.’ (Isaia 35:8) Ino dikany fampan̈antinan̈a zen̈y taminy Israelita tamy zen̈y? Avio, midika ino koa izio amintsika amy zioty?
‘LALAN̈ANY FAHAMASIN̈ANA’ TAMY ZEN̈Y NDREKY AMY ZIOTY
6. Nan̈ino ma lalan̈a io kahian̈a masin̈y?
6 ‘Lalan̈any Fahamasin̈ana’! Tsy hitanao tsara an̈aran̈a lalabe zen̈y? Nan̈ino ma lalan̈a io kahian̈a masin̈y? Fotony tsy nimboan̈a nandeha tan Israely lan̈iany ‘olo tsy madio’, tsy azovy zen̈y fa lan̈iany Jiosy naloto fitondranten̈a, nanompo sampy, na nan̈ano fahotan̈a maventy hafa. Iro Jiosy nimpody ta Jerosalema aby io baka nila nanjary ‘vahoaka masin̈y’ amy Zan̈aharindro. (Deot. 7:6) Fa zen̈y ndraiky tsy mivolan̈a fa efa namparavoravo Jehovah aby raha jiaby nataondro ke efa tsisy raha nila nivoandro eky.
7. Ino aby fan̈ovoan̈a nila nataony Jiosy sasany? Man̈ameza ohatra.
7 Erakany hitantsika taloha tarỳ, ankamarozany Jiosy aby io teraka ta Babylony, avio naro tamindro mety efa zatra fomba fisain̈ana ndreky fomba fiain̈anany Babylonianin̈y. Tsiotampolo sivy amby taon̈o tafarany nodiandro Jiosy andiany voanalohany tan Israely tan̈y, Ezra naharen̈y fa nisy sasany tamindro nanambady man̈angy panompo sampy. (Eks. 34:15, 16; Ezra 9:1, 2) Tafara tatỳ koa, taitry mare Governera Nehemia nahita fa iro tsaiky teraka tan Israely tao tsy nahay fivolan̈ana jiosy foeky. (Deot. 6:6, 7; Neh. 13:23, 24) Akory eky hahavy iro tsaiky aby io ho tia Jehovah ndreky hanompo izy izikoa iro tsy nahay teny hebreo, kanefa izio nanoratan̈a ankamarozany Volan̈a Zan̈ahary? (Ezra 10:3, 44) Hita baka amy zen̈y fa mbala nisy fiovan̈a maventy nila nataondro Jiosy aby io. Ho moramora amindro han̈ano fan̈ovoan̈a aby zen̈y tan Israely tan̈y, fotony efa nimpody tsihelihely fivavahan̈a madio tan̈y.—Neh. 8:8, 9.
Rango taminy 1919, mandeha antapitrisany lelahy ndreky man̈angy avio tsaiky niala tamy Babylony Be, ke nanomboko nandeha tamy ‘Lalan̈any Fahamasin̈ana’ (Zahava Fehintsoratra 8)
8. Nan̈ino atsika tôkony ho lian̈a amy raha nandalo taloha ela be tan̈y? (Zahava sary amy fon̈ony gazety ty.)
8 Mety hieritreritry karaha ty olo sasany: ‘Tsara ho hay raha jiaby zen̈y, fa misy ifandraisany amintsika amy zioty koa ma raha nandalo tamindro Jiosy efa ela be io?’ Zen̈y tsarabe, fotony miran̈a mandeha amy ‘Lalan̈any Fahamasin̈ana’ io koa atsika. Na an̈isany voahosotro atsika na ondrikondriky hafa, atsika samby mila mifen̈y tsy hiala amy ‘Lalan̈any Fahamasinan̈a’ io. Fandihanantsika amy lalan̈a io han̈ampy atsika tsy ho voly hanompo Jehovah sady hahavy atsika hahazo fitahian̈a lera mitondra Fanjakan̈any Zan̈ahary aminy hoavy. b (Jaona 10:16) Rango taminy 1919, antapitrisany lelahy, man̈angy, avio tsaiky niala tamy Babylony Be, na fivavahan̈a diso jiaby, ke nanomboko nan̈araka lalan̈a an̈ohatra io. Mety an̈isanizen̈y anao. Marin̈y fa efa kadiriny 100 taon̈o nisokafany lalan̈a io, kanefa taon̈o maro talohanizen̈y, efa nanomboko fan̈amboaran̈a lalabe io!
FAN̈AMBOARAN̈A LALAN̈A
9. Izikoa Isaia 57:14 zahan̈a, akory nahavy ‘Lalan̈any Fahamasin̈ana’ io ho voamboatra?
9 Iro Israelita aby io izikoa fa hiala ta Babylony, nadosony Jehovah raha jiaby mety hanakantsakan̈a lalan̈andro hody. (Vakia Isaia 57:14.) Akory fo ‘Lalan̈any Fahamasin̈ana’ amy zioty io? Anjatony taon̈o talohany 1919, Jehovah efa nanomboko nampiasa lelahy navozo izy, han̈azava lalan̈a hahafanolo hiala amy Babylony Be. (Ampiràn̈a aminy Isaia 40:3.) Nohony asa nataondro loso noranora taminolo manan̈a fô tsara niala tamy fivavahan̈a diso ke hanompo Jehovah miaraka amy vahoakanany. Ino aby ma asa tafiditry tamy zen̈y? Alo atsika handiniky sasany aminy asa vitandro.
Tan̈atiny taonjato maro, nisy lelahy navozo Zan̈ahary nisava lalan̈a hiboahan̈a amy Babylony Be (Zahava fehintsoratra 10-11)
10-11. Nan̈ino fisiany pirinty ndreky fandikanteny nahavy olo maro nanjary nahay Baiboly? (Zahava koa sary.)
10 Pirinty. Nadika tan̈ana fo Baiboly firaka kadiriny tamy taon̈o 1450 tan̈y. Noho zen̈y, ela mare vo nahavita dika soratra araiky, ke sasatra salakady lafo mare Baiboly. Fa izikoa fa nisy lamasiny fan̈anaovan̈a pirinty, loso naro Baiboly vita dika soratra avio naro koa olo afaka nahazo Baiboly.
11 Fandikanteny. Tan̈atiny taon̈o maro, mbala tamy volan̈a latin fo ankamarozany Baiboly. Kanefa olo nahita fianaran̈a fo nahay volan̈a io. Fa izikoa ndraiky efa nanomboko namalan̈a fan̈anaovan̈a pirinty, nisy lelahy vitsivitsy mavozo Zan̈ahary nifen̈y mare nandika Baiboly tamy volan̈a ten̈a fampiasainolo. Ke olo namaky Baiboly loso afaka nizaha tsao raha ampianarindro pitondra fivavahan̈a aby io tsy mitovy amy raha ampianariny Baiboly.
Nisy lelahy navozo Zan̈ahary nisava lalan̈a hiboahan̈a amy Babylony Be (Zahava fehintsoratra 12-14) c
12-13. Akory nataonolo aby tia nianatra Baiboly, tamy taon̈o 1835 tan̈y, nan̈abaribary vandy ampianariny fivavahan̈a? Man̈ameza ohatra.
12 Boky fianaran̈a Baiboly. Lan̈ianolo ten̈a nazoto nianatra Baiboly nanjary nahay raha naro baka tamy Volan̈a Zan̈ahary. Nikoran̈indro taminolo raha haindro, ke neloko mare iro pitondra fivavahan̈a aby io. Kadiriny tamy taon̈o 1835 tan̈y, ohatra, nisy lelahy tsara fô maromaro nanomboko nan̈aboaka trakty namosa vandy aby ampianarindro fivavahan̈a aby io.
13 Kadiriny taminy 1835 tan̈y, nisy lelahy araiky mavozo Zan̈ahary nan̈aboaka trakty man̈ambara man̈ano akory olo koa fa maty. Henry Grew an̈arany. Nazavainy baka tamy Soratra Masin̈y, tamy trakty io tao, fa tsy marin̈y raha ampianariny fivavahan̈a maro momba fan̈ahy tsy mety maty. Tsisy olo teraka ke efa manan̈a fan̈ahy tsy mety maty zen̈y, fa Zan̈ahary fo afaka man̈ano raha hahavy olo araiky tsy hofoaty. Taminy 1837, nisy pitoriteny araiky kahian̈a George Storrs nahita araiky tamy trakty io taminizy niondran̈a train. Nivakiany trakty io, ke izy resy lahatra fa nahita fahamarin̈ana maventy. Izy tapakevitry hikoran̈a aminolo raha nianarany. Taminy 1842, izy nan̈ano kabaro mifampitohitohy mahalian̈a man̈azava fotokevitry ty: “Tsy Mety Maty ma Olo Ratsy Fan̈ahy?” An̈isanolo namaky asa soratrany George Storrs zen̈y iziô tsaiky lelahy araiky kahian̈a Charles Taze Russell.
14. Ino hatsaran̈a nazony Rahalahy Russell ndreky namany aby io baka tamy fan̈amboaran̈a lalan̈a arapan̈ahy nataonolo talohandro? (Zahava koa sary.)
14 Ino hatsaran̈a nazony Rahalahy Russell ndreky namany aby io baka tamy fan̈amboaran̈a lalan̈a arapan̈ahy nataonolo talohandro? Nanjary tsy sahiran̈a iro lera nianatra fotony efa nisy diksionera ndreky dikanteniny Baiboly isankarazany vita talohaniro hanomboko asandro. Nankamora asandro koa fikarohan̈a momba Baiboly nataoniry Henry Grew, George Storrs, ndreky olo hafa. Rahalahy Russell ndreky namany aby io koa nanohy fan̈amboaran̈a lalan̈a arapan̈ahy io, ke iro nan̈aboaka boky ndreky trakty maro man̈azava raha ampianariny Baiboly.
15. Ino fivoandraha maventy nanomboko taminy 1919?
15 Taminy 1919, efa tsy nahavita nifehy vahoakany Zan̈ahary eky Babylony Be. Tamy taon̈o io baka nanomboko niasa “panompo atokisan̈a ndreky mahadiniky raha.” (Mat. 24:45-47) Ke lan̈iany olo tsara fô afaka nanomboko nandeha tamy lalan̈a vo nibian̈a io, tsy ino zen̈y fa ‘Lalan̈any Fahamasin̈ana.’ Asa nataondro pan̈amboatra lalan̈a taloha in̈y nan̈ampy olo tsara fô nanomboko nandeha tamy lalabe io. Nan̈ino? Fotony nan̈ampy iro hahay raha maro momba Jehovah ndreky fikasan̈anany. (Ohab. 4:18) Afaka nampifan̈araka fiain̈anandro amy raha takiny Jehovah koa iro. Jehovah tsy nan̈antena vahoakanany hahavita hiova indraiky mipaka. Zen̈y nahavy iro nidioviny tsihelihely. (Zahava efajoro “ Nidioviny Jehovah Tsihelihely Vahoakanany.”) Ravoravo mare atsika lera mahavita man̈ano raha mamparavoravo Zan̈aharintsika io amy raha jiaby ataontsika!—Kol. 1:10.
‘LALAN̈ANY FAHAMASIN̈ANA’ IO MBALA MIBIAN̈A
16. Ino fikobabian̈a natao tamy ‘Lalan̈any Fahamasin̈ana’ nanomboko taminy 1919? (Isaia 48:17; 60:17)
16 Lalabe jiaby samby mila kobabin̈y aby. Rango taminy 1919, nitohy fo fikobabian̈a ‘Lalan̈any Fahamasin̈ana’ baka mahaimaro fo olo afaka miala amy Babylony Be. Niaraka panompo atokisan̈a ndreky mahadiniky raha voatendry, direkty efa niasa. Ke taminy 1921, panompo io nan̈aboaka boky Harpany Zan̈ahary (fransay), natao han̈ampian̈a olo vo manampono mianatra fahamarin̈ana amy Baiboly. Niparitaka mare boky fianaran̈a Baiboly io, fotony izio voadika tamy volan̈a 36, avio efa ho tsiota tapitrisa tamizio voazara. Ke maro olo nahay fahamarin̈ana baka tamizio. Vo tsy ela zay, atsika nahazo boky vaovao araiky ten̈a tsara, natao hampianaran̈a Baiboly. Boky Mankafiza Fiain̈ana Tsisy Farany! An̈atiny andra farany, Jehovah mbala mampiasa fandaminan̈anany han̈amia fampianaran̈a baka amy Volan̈a Zan̈ahary, baka han̈ampian̈a atsika jiaby tsy hiala amy ‘Lalan̈any Fahamasin̈ana.’—Vakia Isaia 48:17; 60:17.
17-18. Mandeha aia ma ‘Lalan̈any Fahamasin̈ana’ io?
17 Ke isaka misy olo man̈eky mianatra Baiboly, izy efa manomboko mandeha amy ‘Lalan̈any Fahamasin̈ana.’ Fa sasany ndraiky tsy loso lavitry aby efa mijanon̈o edy. Sasany ndraiky tapakevitry hanohy dia fo firaka iro tody amy tany hingoandro. Han̈aia ma izio?
18 Lan̈iany olo man̈anten̈a hiain̈y andan̈itry an̈y, indesiny ‘Lalan̈any Fahamasin̈ana’ amy ‘paradisany Zan̈ahary’ andan̈itry an̈y. (Apok. 2:7) Fa lan̈iany man̈anten̈a hiain̈y ambony tany eto ndraiky indesiny lalabe io firaka amy farany Fanjakan̈a Arivo Taon̈ony Kristy. Hanjary lavorary iro amy fotoan̈a zen̈y. Ke izikoa anao efa mandeha amy lalabe io amy zioty, aza mimpody afara eky. Avio aza miala amy lalan̈a io firaka anao tody amy donia vaovao. Ke “soava dia ay!”
HIRA 24 Andao ho any An-tendrombohitr’i Jehovah
a ‘Lalan̈any Fahamasin̈ana’ nikahiany Jehovah lalabe an̈ohatra baka Jerosalema mandeha an Israely. Efa nataony Jehovah mazava karaha lalan̈a io koa ma lalan̈a andihanany panomponany aminy andra zioty? Zen̈y tsarabe! Rango taminy 1919, mandeha antapitrisany olo efa niala tamy Babylony Be ke nanomboko nandeha amy ‘Lalan̈any Fahamasinan̈a.’ Atsika jiaby samby tsy mila miala lalan̈a io firaka atsika avy amy tany hingoantsika.
c FAN̈AZAVAN̈A SARY: Rahalahy Russell ndreky namany aby io nampiasa boky fianaran̈a Baiboly efa naboakanolo talohandro.
