1. Akory ahaizantsika fa Jehovah tihan̈aton̈o atsika?

 JEHOVAH mikaiky atsika han̈aton̈o izy. (Jak. 4:8) Izy baka tihanjary Zan̈aharintsika, Babantsika, ndreky Kamaradintsika. Ke valiany vavakantsika avio hampiany atsika lera misy problemo. Mampiasa fandaminan̈anany koa izy hampianaran̈a ndreky hiarovan̈a atsika. Fa ino fo basy raha mila ataontsika baka atsika harikitry izy?

2. Akory han̈aton̈antsika Jehovah?

² Man̈aton̈o Jehovah atsika lera mivavaka aminany avio mamaky ndreky misaintsain̈y Volan̈anany. Atsika koa man̈ano zen̈y, loso tiantsika ndreky ankasitrahintsika mare izy. Ke atsika manjary tihan̈araka volan̈anany ndreky tihidera izy fotony haintsika fa izy zaraiky fo man̈eva raha zen̈y. (Apok. 4:11) Arakaraka ahaizantsika Jehovah, atsika loso mahaimatoky izy ndreky fandaminan̈anany fo. Izio baka hampiasainy han̈ampy atsika.

3. a) Akory ataony Satana hampisaraka atsika amy Jehovah? b) Ino raha han̈ampy atsika tsy hiala amy Jehovah ndreky fandaminan̈anany? (Salamo 31:13, 14)

³ Devoly ndraiky mitady fomba hampisaraka atsika amy Jehovah, intsaka eky lera atsika tojy raha manahiran̈a. Ino tetikinany? Ataony raha hampihen̈y moramora fatokisantsika Jehovah ndreky fandaminan̈anany. Fa atsika afaka miaro ten̈a amy zen̈y. Amy fomba akory? Izikoa fatatra finoan̈antsika avio tsy voahozongozon̈o fatokisantsika Jehovah, tsisy andra hialantsika  aminany ndreky amy fandaminan̈anany.​—Vakia Salamo 31:13, 14.

4. Ino raha hidinihintsika amy lahatsoratra ty?

⁴ Amy lahatsoratra ty, atsika hahita raha telo baka ambelan̈a fiangonan̈a, mety hampihen̈y fatokisantsika Jehovah ndreky fandaminan̈anany. Amy fomba akory hahavy raha telo aby io hampisaraka atsika amy Jehovah? Baka io akory hiadivantsika amy tetikiny Satana aby zen̈y?

5. Nan̈ino problemo mandalo amy fiain̈anantsika mety hampihen̈y fatokisantsika Jehovah ndreky fandaminan̈anany?

⁵ Ndraikindraiky atsika mety ho tojy raha manahiran̈a. Lafamintsika, ohatra, mety manohitry atsika na koa atsika mety very asa. Nan̈ino raha aby zen̈y mety hampisaraka atsika amy Jehovah ndreky hampihen̈y fatokisantsika fandaminan̈anany? Izikoa efa elaela atsika niaritry problemo araiky, atsika mety ho kivy ndreky ho very fan̈antinan̈a. Ke hararaotiny Satana raha zen̈y baka atsika hieritreritry fa Jehovah tsy tia atsika. Tiany hieritreritry koa atsika fa baka amy Jehovah ndreky fandaminan̈anany fo mahavy atsika mijaly. Zen̈y ziô raha nahazo Israelita sasany ta Ezipty tan̈y. Tamy voanalohany, iro nino fa Jehovah nanendry Mosesy ndreky Arona han̈avotro iro baka tamy fan̈adivozan̈a. (Eks. 4:29-31) Fa baka tio, izikoa iro fa nahainampijaliany Farao, iro nivadiky nan̈amia tsin̈y Mosesy ndreky Arona. Karaha ty ho iro tamindro roe lahy: ‘Efa nataonaro raha hahavy zahay ho halany Farao ndreky panomponany, sady nasianaro sabatra amy tan̈anandro misy hamonoany zahay.’ (Eks. 5:19-21) Mampalahelo fa iro panompony Zan̈ahary tsy mivadiky aby io ndraiky namezandro tsin̈y! Miatriky raha sarotro koa ma anao? Efa nahadin̈y elaela ma izio? Ino raha mety ataonao baka ho fatatra fo fatokisanao Jehovah ndreky fandaminan̈anany?

6. Ino raha ianarantsika baka amy paminan̈y Habakoka izikoa atsika fa miatriky problemo? (Habakoka 3:17-19)

⁶ Mivavaha ke ambarà Jehovah raha jiaby an̈aty fonao, avio mangataha fan̈ampian̈a aminany. Maro raha sarotro niain̈any paminan̈y Habakoka. Ke nisy fotoan̈a izy nanjary nisalasala tsao Jehovah tsy mijery izy. Akory nataony? Izy nivavaka. Nikoran̈iny tamy Jehovah raha jiaby tan̈aty fonany. Hoizy: “Jehovah e, firaka ombian̈a zaho hangataka vonjy, kanefa tsy tandrin̈esinao? ... Karaha zahanao fo raha ratsy mandalo io?” (Hab. 1:2, 3) Nivaliany Jehovah vavaka baka amy fô nataony panomponany tsy mivadiky io. (Hab. 2:2, 3) Ke nimpody ravoravo ndraiky Habakoka koa fa baka nisaintsain̈y mare fomba nan̈avotany Jehovah olonany. Resy lahatra izy fa Jehovah mikarakara izy sady han̈ampy izy hiaritry fitsapan̈a. (Vakia Habakoka 3:17-19.) Ino raha ianarantsika baka amy zen̈y? Izikoa fa misy problemo, mivavaha amy Jehovah ke tantarà aminany raha an̈aty fonao. Avio mangataha fan̈ampian̈a aminany. Anao koa man̈ano zen̈y, matokisa fa Jehovah han̈amia anao angovo hahavitanao hiaritry. Hahaihatoky izy fo anao izikoa tsapanao fa izy man̈ampy anao.

7. Ino ma raha tiany havany Shirley hampidirin̈y tan̈aty jerinany, avio ino raha nan̈ampy izy hatoky Jehovah fo?

⁷ Tohiza fo fahazaran̈a arapan̈ahy anan̈anao. Zen̈y raha nan̈ampy ranabavy Shirley baka a Papouasie-Nouvelle-Guinée, taminizy tojy problemo. b Masikiny mare fianakavian̈any Shirley, ke ndraikindraiky nahevoko mare iro vo nahita hanin̈y. Nisy havany araiky zay nitady hampihen̈y fatokisany Jehovah. Karaha ty raha nivolan̈iny tamy Shirley:  “Aia mba fan̈ahy masin̈iny Zan̈ahary man̈ampy anao zen̈y e? Lafaminao karaha mbala masikiny fo. Lany andra fo anao mitory io!” Shirley nivolan̈a: “Zaho loso diniky: ‘Zahay edy mba jireny Zan̈ahary va?’ Ke zaho direkty nivavaka tamy Jehovah, ke nivolan̈iko taminany raha jiaby tan̈aty jerinaka. Zaho tsy voly namaky Baiboly avio boky ndreky gazety. Nandeha nitory ndreky nivory fo koa zaho.” Tsy ela, tontohitry izy fa mikarakara iro ankitin̈y Jehovah. Tsy natiny mafo baka lafaminany, sady iro ravoravo fo. Nambarany Shirley: “Tsapako fa Jehovah namaly vavakanaka.” (1 Tim. 6:6-8) Aza ambela hampisaraka anao amy Jehovah koa na problemo zen̈y na fisalasalan̈a. Man̈ano zen̈y anao izikoa tohizinao fo fahazaran̈anao arapan̈ahy.

8. Ino raha mety hahazo iro rahalahy manan̈a andraikitry amy fandaminan̈any Jehovah?

⁸ Fahavalontsika aby io man̈aparitaka vandy na tsaho amy radio na tele ndreky tranonkala fifaneraseran̈a momba iro rahalahy manan̈a andraikitry amy fandaminan̈any Jehovah. (Sal. 31:13) Baka amy zen̈y nahavy rahalahy sasany nisamborin̈y, avio nan̈odian̈a nan̈ano raha ratsy. Efa nandalo raha miramira zen̈y koa iro Kristianin̈y tamy taonjato voanalohany. Nisy olo nan̈odihody raha apostoly Paoly ke nisamborin̈y izy. Akory eky nataondro?

9. Akory nataony Kristianin̈y sasany koa fa nigadrain̈a apostoly Paoly?

⁹ Tsy nanohan̈a apostoly Paoly eky Kristianin̈y sasany tamy taonjato voanalohany, koa izy fa nigadra ta Roma. (2 Tim. 1:8, 15) Nan̈ino? Iro ma nen̈atra fotony olo nihevitry fa Paoly olondratsy? (2 Tim. 2:8, 9) Sa iro navozo tsao injehin̈y koa? Na ino na ino antony, iritrireta hely akory mety ho fihetsehampony Paoly. Baka tamy fitiavany iro fo nahavy izy niatriky problemo maro ndreky nirisiky fahin̈anany. (Asa. 20:18-21; 2 Kor. 1:8) Irarian̈a atsika tsy han̈ano karaha iro olo nan̈ary Paoly, tamy fotoan̈a ten̈a nilany fan̈ampian̈a. Ino raha mila alaintsika onon̈o izikoa fa misy rahalahy manan̈a andraikitry injehin̈y?

10. Ino raha mila alaintsika onon̈o izikoa fa injehin̈y rahalahy manan̈a andraikitry aby io, avio nan̈ino?

 ¹⁰ Aleva onon̈o nan̈ino atsika injehin̈y, avio azovy mahavy raha zen̈y. Mivolan̈a 2 Timoty 3:12: “Hampijalin̈y koa lan̈iany olo man̈iry hahafoe ten̈a amy Zan̈ahary ndreky hihavan̈a amy Kristy Jesosy.” Ke tsy tokony ho gaga atsika izikoa iro rahalahy manan̈a andraikitry aby io kindreny Satana mare. Tiany hivadiky amy Jehovah baka iro, avio izy tihampavozo atsika.​—1 Pet. 5:8.

11. Ino raha ianarantsika baka aminy Onesiforosy? (2 Timoty 1:16-18)

¹¹ Aza voly man̈ampy iro rahalahintsika aby io, avio aza ialan̈a iro. (Vakia 2 Timoty 1:16-18.) Paoly koa fa nigadra, Onesiforosy, Kristianin̈y araiky tamy taonjato voanalohany, tsy nan̈ano karaha piaramanompo sasany. ‘Tsy nampamen̈atra izy foeky silisily vy namihezan̈a [Paoly].’ Ndray izy aby nitsakaraka mare tany nisy Paoly. Akory nataony koa fa hitany i Paoly? Nikarakarainy tsara izy, avio nampiany baka hahazo raha nilainy. Nirisiky fahin̈ananany Onesiforosy tamy raha nataony zen̈y. Ino raha ianarantsika baka amy zen̈y? Atsika tsy mila mavozo olo, avio zen̈y tsy ambelantsika hisakan̈a atsika tsy han̈ampy piaramanompo. Fa hifen̈y erakany vitantsika atsika han̈ampy piaramanompo. (Ohab. 17:17) Iro baka mila mahatsapa fa atsika tia iro ndreky man̈ampy iro.

12. Ino raha ianarantsika baka amindro rahalahy ndreky ranabavy a Russie?

¹² Diniha hely akory ataondro rahalahy ndreky ranabavy a Russie man̈ampy piaramanompo amindro migadra. Koa fa misy amindro hindesin̈y hitsarain̈y amy tribinaly, maro piaramanompo avy manohan̈a iro. Ino raha ianarantsika baka amy zen̈y? Aza mavozo koa fa misy rahalahy manan̈a andraikitry an̈odianolo nan̈ano raha ratsy, na voasambotro, na injehin̈y. Maro fomba mety han̈aboahanao fa anao manohan̈a iro. Ohatra, mivavaka nindro, mikarakara fianakavian̈andro, na koa anao afaka mitady hevitry hafa.​—Asa. 12:5; 2 Kor. 1:10, 11.

13. Nan̈ino fankaratsian̈a ataonolo mety hampihen̈y fatokisantsika Jehovah ndreky fandaminan̈anany?

¹³ Mety hikotran̈a atsika havantsika, piaramiasa na tsaiky lekoly araiky amintsika. Nan̈ino? Fotony atsika mitory avio man̈araka fitsipiky Jehovah momba fitondranten̈a. (1 Pet. 4:4) Ke iro mety hivolan̈a karaha ty: “Anao ndraiky tsy halanay fa fivavahan̈anao io fo sarotiny loatra sady efa tsy maharaka toetrandra!” Sasany koa mety hankaratsy atsika amy fomba ifandraisantsika aminolo voaroaka, ke hivolan̈a: “Anaro ziô masaky mivolan̈a fa anaro tia olo?” Fankaratsian̈a karaha zen̈y, mety hampiditry fisalasalan̈a amintsika. Ke atsika mety hanomboko hieritreritry karaha ty: ‘Tsy ndraiky efa maro loatra eky raha takiny Jehovah aminaka va? Tsao fandaminan̈a sarotiny loatra ay?’ Izikoa anao hankaratsianolo karaha zen̈y, ino han̈ampy anao tsy hiala Jehovah ndreky fandaminan̈anany?

14. Akory tokony hataontsika lera misy olo mankaratsy atsika nohony atsika man̈araka fitsipikiny Jehovah? (Salamo 119:50-52)

¹⁴ Anao mila tapakevitry han̈araka fitsipiky Jehovah. Joba nan̈araka fitsipikiny Jehovah fo ndray nankaratsianolo. Nisy araiky tamindro olo aby nan̈ano sary namany in̈y tihandresy lahatra izy fa tsy jireny Jehovah zen̈y Joba na man̈araka fitsipikinany na tsy man̈araka. (Joba 4:17, 18; 22:3) Fa Joba tsy nino vandy zen̈y, fotony hainy fa marin̈y fitsipiky Jehovah momba ny tsara ndreky ratsy. Ary izy efa tapakevitry han̈araka izio. Tsisy olo nambelany hampivadiky izy amy Jehovah! (Joba 27:5, 6) Ino raha ianarantsika baka amy zen̈y?  Fankaratsian̈a ataonolo aby io aza ambela hahavy anao hisalasala amy fitsipikiny Jehovah. Iritrireta baka raha efa niain̈anao. Tsy hitanao nahaitsara fiain̈ananao koa anao fa nan̈araka fitsipikiny Jehovah? Mety efa matetiky anao mahatsapa karaha zen̈y. Ke mifen̈a ho tapakevitry tsy hiala amy fandaminan̈a man̈araka fitsipiky aby io. Anao koa man̈ano zen̈y, anao tsy ho voly hanompo Jehovah ndray maro karakory fankaratsian̈a ataonolo.​—Vakia Salamo 119:50-52.

15. Nan̈ino Brizit nisy nankaratsy?

¹⁵ Diniha baka raha niain̈any Brizit, ranabavy araiky an Inde. Lafaminany nankaratsy izy nohony finoan̈anany. Tafara heliny batisanany taminy 1997, nafaka asa vadiny. Tsy Vavolombelon̈o Jehovah vadiny io. Ke nanapakevitry lelahy io fa hifindra amy raimandreniny an̈y iro tran̈o araiky, izy ndreky Brizit avio zanany telo vavy. Nipetraka tamy tanàna hafa raimandreniny io. Kanefa nahainitombo fo problemo nahazo Brizit koa fa navy tan̈y. Tsy maintsy niasa man̈ariva andra izy hamiloman̈a fianakavian̈anany, fotony tsisy asa vadiny. Fa tsy zen̈y fo, kadiriny 350 kilometara tany nisy fiangonan̈a farany narikitry iro. Mampalahelo fa fianakavian̈any vadiny io koa nanohitry izy nohony finoan̈anany. Nahainare fo fan̈injehan̈a io, ke tsy maintsy nifindra ndraiky koa iro. Sosoko zen̈y koa, naty tampoko vadiny Brizit. Tafara tatỳ koa, natiny kansera zanany araiky, kanefa mbala vo 12 taon̈o fo. Mbala nahainanosoko problemonany fo koa havany Brizit. Izy ndraiky ny namiandro tsin̈y, fotony tsy ho nisy zen̈y problemo aby io izikoa izy tsy loso Vavolombelon̈o Jehovah. Fa ndray zen̈y raha niain̈any Brizit, izy mbala natoky Jehovah fo, sady tsy niala tamy fandaminan̈anany foeky.

16. Ino hatsaran̈a nazony Brizit, nohony izy tsy niala Jehovah ndreky fandaminan̈anany?

¹⁶ Ten̈a lavitry fiangonan̈a tany nipitrahany Brizit, ke piandraikitry faritry nampirisiky izy hitory tamy tanàna nisy izy io sady hitariky fivorian̈a antran̈onany ao. Nieritreritry izy tamy voanalohany fa tsy ho vitany foeky han̈ano zen̈y, fa ndray zen̈y, narehany fo toromariky io. Nitory izy, nan̈ano fivorian̈a  tantran̈onany tao, avio nanokana fotoan̈a han̈anaovan̈a fotoampivavahany fianakavian̈a niaraka tamindro zanany man̈angy aby io. Ke ino vokany? Brizit loso nanan̈a fampianaran̈a Baiboly maro, avio maro tamy pianatranany koa natao batisa. Nanomboko nan̈ano pisava lalan̈a maharitry izy taminy 2005. Nahazo hatsaran̈a izy fotony natoky Jehovah ndreky tsy nivadiky tamy fandaminan̈any. Amy zioty, manompo Jehovah sady tsy mivadiky aby iro zanany man̈angy aby io. Avio nanjary nisy fiangonan̈a aroe amy tanàna misy iro. Resy lahatra i Brizit fa Jehovah nan̈amia angovo izy ankitin̈y, ke vitany niatriky problemo aby nahazo izy, sady niaritry fankaratsian̈a nataony havany.

17. Tokony ho tapakevitry han̈ino atsika?

¹⁷ Tiany Satana atsika hino fa Jehovah han̈ary atsika lera atsika miatriky raha sarotro. Tiany koa atsika hino fa hahaiho sarotro fo fiain̈anantsika izikoa atsika manohan̈a fandaminan̈any Jehovah. Tiany Satana havozo koa atsika lera misy rahalahy manan̈a andraikitry an̈odian̈a nan̈ano raha ratsy, na injehin̈y, na gadrain̈y. Araraotiny koa fankaratsian̈a ataonolo baka atsika hieritreritry fa tsy mahatsara atsika fitsipikiny Jehovah, ke hihen̈y tsihelihely fatokisantsika fandaminan̈anany. Kanefa, haintsika tsarabe tetiky ratsiny Satana, ke atsika tsy voafitakany zen̈y. (2 Kor. 2:11) Ataova raha hahavy anao ho tapakevitry tsy hino vandiny Satana, avio aza mivadiky amy Jehovah ndreky fandaminan̈anany. Aza adin̈a fa Jehovah tsy han̈ary anao foeky. (Sal. 28:7) Ke aza ambela hisy raha hampisaraka anao amy Jehovah!​—Rom. 8:35-39.

18. Ino raha hidinihintsika amy lahatsoratra man̈araka?

¹⁸ Hitantsika tamy lahatsoratra ty iro problemo atrefintsika baka amy raha ataonolo tsy an̈isany fiangonan̈a. Kanefa mety ho sarotro amintsika koa hatoky Jehovah ndreky fandaminan̈anany, nohony problemo baka an̈aty fiangonan̈a. Ino han̈ampy atsika hahavita hiatriky zen̈y? Hikoran̈a momba zen̈y atsika amy lahatsoratra man̈araka.