1. Ino raha efa ampoizintsika, kanefa ino raha atokisantsika?

 ATSIKA koa fa mitory, efa ampoizintsika fa tsy maintsy hisy olo hanohitry atsika. Ary raha zen̈y mbala mety hahaihandombolombo fo aminy hoavy. (Dan. 11:44; 2 Tim. 3:12; Apok. 16:21) Fa ndray zen̈y, atsika afaka matoky fa Jehovah han̈ampy atsika. Nan̈ino? Efa rango zay, Jehovah nan̈ampy panomponany hahavita raha nirahiny nataondro, ndray izio sarotro be karakory. Ohatra araiky amy zen̈y paminan̈y Ezekiela. Alô atsika handiniky raha sasany nandalo tamy paminan̈y io, taminizy nitory tamindro Jiosy natao sesitany ta Babylony.

2. Olo karakory handeha hitoriany Ezekiela ho Jehovah, avio ino raha hidinihintsika amy lahatsoratra ty? (Ezekiela 2:3-6)

² Olo karakory ma handeha hitoriany Ezekiela? Jehovah nivolan̈a fa iro io olo ‘mierin̈y olo’, ‘mafy fô’, avio ‘tia manohitry.’ Iro io mira fatsiky ndreky hala, ke mety handratra ndreky hamono foeky. Tsy mahagaga izikoa Jehovah natetiky nivolan̈a taminy Ezekiela: ‘Anao aza mavozo iro.’ (Vakia Ezekiela 2:3-6.) Nahavita nitory fo Ezekiela fotony 1) Jehovah nan̈iraka izy, 2) fan̈ahy masin̈iny Zan̈ahary nan̈amia angovo izy, baka io 3) nankafatatra finoan̈anany volan̈a Zan̈ahary. Nan̈ino raha telo aby zen̈y nan̈ampy Ezekiela? Amy karakory koa iro io man̈ampy atsika?

3. Ino aby volan̈a mety nankahery Ezekiela, avio karakory nataony Jehovah nan̈amia toky fa han̈ampy izy?

³ Jehovah nivolan̈a taminy Ezekiela: ‘Zaho man̈iraka anao.’ (Ezek. 2:3, 4) Hay be fa ten̈a nankahery Ezekiela volan̈a aby io. Nan̈ino? Azo antoko fa mety tsaroany fa Jehovah efa navy nivolan̈a raha karaha zen̈y koa tamy Mosesy ndreky Isaia, taminizy nifidy iro hanjary paminan̈inany. (Eks. 3:10; Isaia 6:8) Efa hainy Ezekiela koa fomba nan̈ampiany Jehovah paminan̈y aroe io hahavita  asa sarotro mare. Ke izy natoky tsarabe fa Jehovah hanohan̈a izy izikoa Jehovah fa nivolan̈a taminany indroe aby: ‘Zaho man̈iraka anao.’ Tsy indraiky tsy indroe Ezekiela nanoratra karaha ty: ‘Jehovah nivolan̈a taminaka.’ (Ezek. 3:16) Matetiky koa izy nanoratra karaha ty: ‘Nimpody nivolan̈a taminaka ndraiky Jehovah.’ (Ezek. 6:1) Ke azo antoko fa Ezekiela natoky tsarabe fa Jehovah nan̈iraka izy. Salakady izy lastio zanaka pisoron̈o, ke mety efa nampianariny babany izy fa Jehovah nan̈amia toky paminan̈inany fo fa Izy tsy maintsy han̈ampy iro. Karaha ty, ohatra, raha nivolan̈iny Jehovah taminy Isaka ndreky Jakoba, avio Jeremia: “Zaho miaraka anao.”​—Gen. 26:24; 28:15; Jer. 1:8.

4. Ino aby raha nivolan̈iny Jehovah ke mety nankahery Ezekiela?

⁴ Karakory fihetsikiny ankamaraozany Israelita koa fa maharen̈y hafatra hitoriany Ezekiela? Ty raha nambarany Jehovah momba iro: ‘Taranakany Israely tsy hitandren̈y anao, fotony iro tsy tihitandren̈y zaho.’ (Ezek. 3:7) Dikanizen̈y, mira tsy nitandren̈y Jehovah fo iro koa fa tsy nitandren̈y Ezekiela. Volan̈a aby io nan̈amia toky Ezekiela fa izikoa olo tsy nitandren̈y izy, zen̈y tsy midika fa tsy nataony tsara andraikitrinany. Nan̈amia toky Ezekiela koa Jehovah fa lera tanteraka didipitsaran̈a nitoriany io, “tsy maintsy ho haindro fo fa nisy paminan̈y tamindro tio.” (Ezek. 2:5; 33:33) Azo antoko fa ten̈a nankahery Ezekiela raha aby zen̈y, ke nan̈amia angovo izy hahavitany fanompoan̈anany.

5. Koa Isaia 44:8 zahan̈a, ino raha man̈amia angovo atsika?

⁵ Karaha Ezekiela, mahazo angovo koa atsika fotony haintsika fa Jehovah nan̈iraka atsika hitory. ‘Vavolombelon̈onany’ ikahiany  atsika. (Isaia 43:10) Tombontsoa tsisy ambaka zen̈y! Karaha nataony taminy Ezekiela in̈y koa, Jehovah mivolan̈a amintsika: ‘Aza mavozo.’ Nan̈ino ma atsika tsy tokony havozo iro panohitry atsika aby io? Fotony mira Ezekiela fo, atsika iraka Jehovah salakady izy manohan̈a atsika.​—Vakia Isaia 44:8.

6. a) Akory azahoantsika antoko fa Jehovah han̈ampy atsika? b) Ino raha mankahery atsika?

⁶ Jehovah mampan̈anten̈a fa izy han̈ampy atsika. Akory ahaizantsika zen̈y? Taloha helinizy nivolan̈a ‘anaro vavolombelon̈onaka’, izy nivolan̈a karaha ty: “Anao koa mitsaka rano, zaho han̈ampy anao, tsy ho tondraka ndreky tsy hamofo anao ten̈arano hitsakanao. Anao koa fa mamakivaky motro, anao tsy ho may, ndray lelany motro tsy han̈ôro anao.” (Isaia 43:2) Atsika koa fa mitory, ndraikindraiky atsika tojy raha maro mety hisakantsakan̈a atsika, miran̈a tondradrano in̈y, ndreky fitsapan̈a karaha motro. Fa ndray zen̈y, atsika mbala mahavita mitory fo, fotony Jehovah man̈ampy atsika. (Isaia 41:13) Karaha taminy andrany Ezekiela, maro koa olo tsy mitandren̈y hafatra torintsika. Fa zen̈y tsy mivolan̈a fa atsika tsy nan̈ano tsarabe andraikitrintsika. Mankahery atsika mahay fa Jehovah ravoravo amintsika izikoa atsika mbala manohy mifen̈y mitory angovo jiaby. Karaha ty nambarany apostoly Paoly: “Samby hahazo valisoanany aby olo tsiaraikiaraiky, arakarakany raha nataony.” (1 Kor. 3:8; 4:1, 2) Misy ranabavy pisava lalan̈a efa ela, nivolan̈a karaha ty: “Mamparavoravo zaho mahay fa Jehovah hamaly hatsaran̈a ezaka ataontsika.”

7. Ino raha tsapany Ezekiela izikoa izy fa nandiniky ndraiky fahitan̈a hitany in̈y? (Zahava sary amy fon̈ony gazety ty.)

⁷ Hitany Ezekiela fa matanjaka ankitin̈y fan̈ahy masin̈iny Zan̈ahary. Karakory nahitany zen̈y? Hitany tamy fahitan̈a fa fan̈ahy masin̈y io man̈ampy iro anjely mahery aby io, sady izio koa mampandeha laro maventibeny kalesy araiky andan̈itry an̈y. (Ezek. 1:20, 21) Nan̈ano akory Ezekiela koa fa nahita raha zen̈y? Karaha ty raha nisoratiny: ‘Nankohoko zaho koa fa nahita zen̈y.’ Gaga loatra Ezekiela ke lavo tamy tany. (Ezek. 1:28) Tafara tatỳ, lera izy nandiniky ndraiky fahitan̈a maharikian̈a be in̈y, azo antoko fa loso nahainatoky fo izy fa tsy maintsy ho vitany fo fanompoan̈anany fotony fan̈ahy masin̈iny Zan̈ahary han̈ampy izy.

8-9. a) Nan̈ano akory Ezekiela koa fa nirahiny Jehovah ‘nitsangana’? b) Tsy nora nitory tamy faritaniny Ezekiela, kanefa akory koa nataony Jehovah nankahery izy?

⁸ Ho Jehovah taminy Ezekiela: ‘Zanakolo, mitsangàna fa zaho hivolan̈a raha aminao.’ Baka tamy volan̈a zen̈y ndreky fan̈ahy masin̈iny Zan̈ahary nazahoany Ezekiela angovo nahavitany nitsangana baka tamy tany. Karaha ty nisoratiny: ‘Niasa taminaka fan̈ahy masin̈y ke nampitsangana zaho.’ (Ezek. 2:1, 2) Tafara tatỳ, tamy fanompoan̈a jiaby nataony, ‘angovony’ Zan̈ahary, na fan̈ahy masin̈y fo nitariky Ezekiela. (Ezek. 3:22; 8:1; 33:22; 37:1; 40:1) Fan̈ahiny Zan̈ahary nan̈amia angovo Ezekiela baka hahavitany asa nan̈irahan̈a izy. Tsy ino asa io fa, hitory amy faritany misy olo ‘mierin̈y olo’ ndreky ‘mafy fô.’ (Ezek. 3:7) Jehovah nivolan̈a taminany: ‘Ke hataoko mahery mira sorandro koa soranao, avio hataoko mahery mira laharandro laharanao. Ataoko mahery mira diaman laharanao, sady mbala mahery mandilatra vatoafo. Aza mavozo iro, na mangorohoro mahita sorandro.’ (Ezek. 3:8, 9) Ke Jehovah miran̈a nivolan̈a karaha ty: ‘Aza man̈eky ho rivan̈a amy raha ataonolo mierin̈y olo aby io. Zaho han̈amia angovo anao.’

⁹ Nan̈ampy Ezekiela fo fan̈ahy masin̈iny Zan̈ahary tafarany zen̈y, izikoa izy fa nitory tamy faritaninany. Hoizy: ‘Tsapako fa niasa mare taminaka angovony Jehovah.’ Nila herin̈iandra araiky Ezekiela hianaran̈a ndreky handinihan̈a  tsara hafatra io, zay izy vo nafana fô tsarabe han̈ambara izio taminolo. (Ezek. 3:14, 15) Jehovah baka tio nan̈iraka izy nandeha tamy tany lemaka araiky, ke tan̈y izy ‘nahazo fan̈ahy masin̈y.’ (Ezek. 3:23, 24) Ino vokany? Nanjary von̈ono hanomboko fanompoan̈anany amy zay Ezekiela.

10. Ino raha ilaintsika baka hahavitantsika mitory, avio nan̈ino?

¹⁰ Ino ma fan̈ampian̈a ilaintsika baka hahavitantsika mitory? Ahitan̈a valinizen̈y, diniha ndraiky baka raha nandalo taminy Ezekiela. Talohanizy hanomboko hitory, fan̈ahiny Zan̈ahary nan̈amia izy angovo nilainy. Karaha zen̈y koa atsika aminy andra zioty. Satana mifen̈y miady amintsika fotony izy tihanakan̈a asa fitorian̈a, fa vitantsika fo asa io fotony fan̈ahiny Jehovah man̈ampy atsika. (Apok. 12:17) Izikoa zahan̈a indraiky, karaha tsy ho posibla foeky atsika hahavita handresy Satana zen̈y! Kanefa atsika afaka mandresy izy. Karakory? Baka aminy asa fitorian̈a ataontsika. (Apok. 12:9-11) Nan̈ino atsika mivolan̈a zen̈y? Lera atsika mandeha manompo, aboakantsika fa atsika tsy mavozo fampitahoran̈a ataony Satana. Ke isaka atsika mitory, Satana resy. Ino vokany zen̈y amintsika? Loso tsapantsika fa matoa mbala vitantsika fo mitory nata misy panohitry, dikanizen̈y Jehovah nan̈amia atsika angovo baka tamy fan̈ahy masin̈inany. Tsapantsika koa fa atsika ankasitrahiny Jehovah.​—Mat. 5:10-12; 1 Pet. 4:14.

11. Man̈ampy atsika han̈ino fan̈ahy masin̈iny Zan̈ahary, avio ino raha mila ataontsika izikoa tiantsika hahazo izio fo?

¹¹ Ino koa raha ianarantsika lera atsika mandiniky fomba nan̈amezany Jehovah angovo Ezekiela baka hahavitany mitory? Fan̈ahiny Zan̈ahary io afaka man̈amia angovo hahavitan̈a mandresy problemo mety ho tojy atsika amy fanompoan̈a. (2 Kor. 4:7-9) Ke ino raha mila ataontsika baka atsika mahazo fan̈ahy masin̈y fo? Atsika mila tsy voly mangataka izio amy vavaka. Mila matoky koa atsika fa Jehovah  hitandren̈y vavakantsika. Jesosy nampianatra pianatranany karaha ty: ‘Mangataha fo, … mitadiava fo, … konkon̈a fo.’ Nan̈ino? Fotony Jehovah “han̈amia fan̈ahy masin̈y lan̈iany olo mangataka zen̈y aminany.”​—Lioka 11:9, 13; Asa. 1:14; 2:4.

12. Izikoa zahan̈a Ezekiela 2:9–3:3, baka taia ma horonamboky io avio ino raha tan̈atinizio tao?

¹² Fan̈ahy masin̈iny Zan̈ahary nan̈ampy Ezekiela hasaky hitory. Fa tsy zen̈y fo, volan̈a Zan̈ahary koa ten̈a nankafatatra finoan̈anazy. Tamy fahitan̈a araiky, izy nahita tan̈ana nitana horonamboky. (Vakia Ezekiela 2:9–3:3.) Baka taia ma horonamboky io? Ino raha tan̈atinizio tao? Avio, nan̈ino izio nankafatatra finoan̈any Ezekiela? Horonamboky io baka tamy sezy fiandrianan̈any Zan̈ahary. Jehovah mety nan̈iraka araiky tamindro anjely efatra efa hitany Ezekiela tamy fahitan̈a in̈y, han̈amia izy horonamboky io. (Ezek. 1:8; 10:7, 20) Tan̈atinizio tao nisy volan̈a Zan̈ahary. Izio hafatra lava momba didipitsaran̈a baka amy Zan̈ahary, mila hambarany Ezekiela tamindro olo natao sesitany aby io. Iro baka tsy nan̈araka volan̈any Zan̈ahary. (Ezek. 2:7) Ambadikambadikiny horonamboky io samby nanoratan̈a hafatra io.

13. Nirahiny Jehovah nataony Ezekiela karakory ma horonamboky io, avio nan̈ino izio mamy?

¹³ Ezekiela nirahiny Jehovah nihina horonamboky io sady nila ‘nifinoany izio kibonany.’ Ezekiela nan̈araka volan̈a Jehovah, ke nihoaniny horonamboky io jiaby. Ino ma dikany tapany fahitan̈a zen̈y? Nila nazava tsarabe taminy Ezekiela antsendriky hafatra mila hambarany io. Nila ninoany koa izio baka izy hafana fô tsarabe koa fa mikoran̈a izio. Ke raha io koa fa nihoaniny, ten̈a maharikian̈a raha niboaka. Hitany Ezekiela fa horonamboky io ‘mamy karaha antely.’ (Ezek. 3:3) Nan̈ino? Fotony taminy Ezekiela, mamy na tsara mare tombontsoa misolonten̈a Jehovah. (Sal. 19:8-11) Ravoravo izy fotony nikeny Jehovah hanjary paminan̈inany.

14. Ino raha nan̈ampy Ezekiela ho von̈ono han̈ano asa nan̈irahan̈a izy?

¹⁴ Tafara tatỳ, Jehovah nivolan̈a karaha ty taminy Ezekiela: ‘Tandrin̈esa tsara avio ampidira an̈aty fonao raha jiaby hikoran̈iko aminao.’ (Ezek. 3:10) Toromariky namezany Jehovah io nan̈iraka Ezekiela hangala onon̈o ndreky hisaintsain̈y raha jiaby voasoratra tan̈atiny horonamboky io. Nanjary natanjaka mare finoan̈any Ezekiela izikoa fa nan̈ano zen̈y, sady izy loso nanan̈a hafatra matomboko mila hambara olo. (Ezek. 3:11) Izikoa fa nazava tsarabe taminy Ezekiela sady ninoany hafatra Zan̈ahary io, nanjary von̈ono amy zay izy hitory ndreky hankefa asa nan̈irahan̈a izy io firaka tamy farany.​—Ampiràn̈a amy Salamo 19:14.

15. Ino raha mila ampidirintsika ‘an̈aty fô’ baka atsika hahavita hiaritry?

¹⁵ Hahavita hiaritry raha mety ho tojy atsika amy fanompoan̈a koa atsika izikoa ambelantsika volan̈a Zan̈ahary hankafatatra finoan̈antsika. Mila ampidirintsika ‘an̈aty fô’ raha jiaby volan̈iny Jehovah amintsika. Amy zioty, Jehovah mampiasa Baiboly ikoran̈ana amintsika. Ke ino raha mila ataontsika baka Volan̈a Zan̈ahary hisy vokany aminy eritreritrintsika, fihetsehampontsika, avio aminy antony mahavy atsika man̈ano raha?

16. Mila ataontsika karakory Volan̈a Zan̈ahary, avio akory hahavy izio ho tafiditry an̈aty fontsika?

¹⁶ Izikoa atsika mihina avio levon̈o tsara hanin̈y nihoanintsika, hahazo angovo edy atsika. Karaha zen̈y koa, ho fatatra finoan̈antsika izikoa atsika mianatra ndreky misaintsain̈y Volan̈a Zan̈ahary. Tsarova leson nianarantsika  momba horonamboky in̈y. Tiany Jehovah izikoa ‘kibontsika finoantsika’ Volan̈anany. Dikanizen̈y, tiany hazava tsara amintsika Volan̈anany io. Ho vitantsika han̈ano zen̈y, izikoa atsika mivavaka, mamaky avio misaintsain̈y. Ke alohany anao hamaky Baiboly, mivavaha antsendriky baka fonao ho von̈ono han̈eky hevitriny Zan̈ahary. Baka io amy zay, mamakia andininy vitsivitsy. Avio, mijanòna hely misaintsain̈y ndreky mandiniky tsarabe raha baka nivakinao. Ino vokany izikoa anao man̈ano zen̈y? Arakarakany hazahoanao raha ampianariny Baiboly, hahavy finoan̈anao hahaiho fatatra fo.

17. Nan̈ino ten̈a raha maventy misaintsain̈y koa fa baka mamaky Baiboly?

¹⁷ Ten̈a raha maventy mamaky Baiboly ndreky misaintsain̈y raha volan̈inizio. Nan̈ino? Atsika koa man̈ano zen̈y, rango izioty atsika hahazo angovo ke hahavita hitory hafatra momba Fanjakan̈any Zan̈ahary. Hasaky han̈ambara didipitsaran̈any Zan̈ahary koa atsika, lera avy fotoan̈a tokony han̈anaovan̈a zen̈y, teteky iô. Ankoatranizen̈y, izikoa atsika misaintsain̈y toetry tsarany Jehovah, atsika hahaiharikitry izy fo. Ho mamy na ho tsara mare koa fiain̈anantsika fotony atsika hilamintsain̈y ndreky ho afapô.​—Sal. 119:103.

18. Ino raha tsy maintsy ho hainolo amy faritanintsika, avio nan̈ino?

¹⁸ Paminan̈y i Ezekiela, fa atsika ndraiky tsy karaha zen̈y. Fa ndray zen̈y, atsika tapakevitry fo han̈ambara hafatrany Jehovah amy Baiboly ao, firaka izio vita erakany mahafapô izy. Ke izikoa fa avy fotoan̈a han̈anaovany didipitsaran̈a, olo amy faritanintsika tsy afaka hivolan̈a fa tsisy olo nampitandrin̈y iro, na hivolan̈a fa iro tsy nahoany Zan̈ahary. (Ezek. 3:19; 18:23) Ho haindro tsarabe amy fotoan̈a zen̈y, fa baka amy Zan̈ahary hafatra nambarantsika.

19. Ino raha han̈ampy atsika hahazo angovo hahavitantsika fanompoan̈a?

¹⁹ Ino raha han̈ampy atsika hahazo angovo hahavitantsika fanompoan̈a? Iro raha telo nan̈ampy Ezekiela hahazo angovo in̈y. Mahavita mitory fo atsika fotony haintsika fa Jehovah man̈iraka atsika, man̈amia angovo atsika koa fan̈ahy masin̈iny Zan̈ahary, avio Volan̈a Zan̈ahary mankafatatra finoan̈antsika. Man̈ampy atsika Jehovah, ke von̈ono fo atsika han̈ano fanompoan̈antsika sady hiaritry “firaka amy farany.”​—Mat. 24:13.