1-2. a) Ino aby fan̈ontanian̈a hidinihintsika ato? b) Nan̈ino atsika mivolan̈a fa Jehovah ten̈a tihan̈ampy atsika ankitin̈y?

 JEHOVAH mahavita man̈ampy atsika hiaritry problemo ndreky ho ravoravo amy fanompoan̈a masin̈y ataontsika. Amy fomba akory? Avio akory hahavy atsika hahazo hatsaran̈a feno baka amy fan̈ampian̈a amezany Jehovah? Hahita valiny fan̈ontanian̈a aby zen̈y atsika amy lahatsoratra ty. Fa alohany zen̈y, alô antsendriky atsika handiniky fan̈ontanian̈a araiky ty: Jehovah ma ten̈a man̈iry han̈ampy atsika ankitin̈y?

² Man̈ampy atsika hahita valiny fan̈ontanian̈a io raha nisoratiny apostoly Paoly tamy taratasy nalefany taminy Hebreo. Hoizy: “Jehovah pan̈ampy zaho, ke tsy havozo foeky zaho. Ino ma raha mety ho vitanolo hatao aminaka?” (Heb. 13:6) Misy boky momba Baiboly mikoran̈a fa volan̈a “pan̈ampy” aminy andininy io ivolan̈ana olo milomoay malaky man̈avotro olo mikaiky vonjy. Miniminia hely baka Jehovah milomoay malaky man̈avotro olo sahiran̈a. Tsy hitanao baka amy zen̈y fa Jehovah tihan̈ampy atsika ankitin̈y? Nohony fan̈ampiany Jehovah, manjary vitantsika miaritry fitsapan̈a mahazo atsika sady ho ravoravo fo.

3. Ino fomba telo an̈ampiany Jehovah atsika hiaritry fitsapan̈a sady ho ravoravo fo?

³ Akory aby ma fomba an̈ampiany Jehovah atsika hiaritry fitsapan̈a sady ho ravoravo fo? Hamalian̈a zen̈y, atsika hamaky andininy sasany amy bokiny Isaia. Nan̈ino? Fotony maro amy faminanian̈any Isaia tanteraka amy panompony Zan̈ahary aminy andra zioty. Tsy zen̈y fo, matetiky, Isaia koa fa mikoran̈a raha momba Jehovah, izy mampiasa volan̈a mora azontsika. Aminy Isaia toko faha-​30, ohatra, efa ahitantsika sasany amy zen̈y. Ten̈a tsara fomba ikoran̈any Isaia fomba an̈ampiany Jehovah  vahoakanany, amy toko io. Nanoratra izy fa Jehovah 1) mitandren̈y atsika tsarabe ndreky mamaly vavaka ataontsika, 2) man̈amia taridalan̈a atsika, avio 3) man̈amia hatsaran̈a atsika rango zioty ndreky aminy amaray. Ke alô hizahavantsika tsarabe iro fomba telo an̈ampiany Jehovah atsika.

4. a) Ino raha nivolan̈iny Jehovah momba iro Jiosy taminy andrany Isaia, avio ino raha nambelany hahazo iro? b) Ino raha nampan̈antinainy Jehovah lan̈iany tsy nivadiky? (Isaia 30:18, 19)

⁴ Amy fanombohany Isaia toko faha-​30, Jehovah nivolan̈a fa iro Jiosy aby io ‘zanaka mafy loha’ sady tsy voly ‘manosoko fahotan̈a.’ Nivolan̈a koa Izy fa ‘iro io vahoaka tia manohitry, … sady tsy von̈ono hitandren̈y lalàn̈any Jehovah.’ (Isaia 30:1, 9) Tsy nan̈eky nitandren̈y vahoaka aby io, ke zen̈y nahavy Isaia nan̈ambara fa Jehovah han̈ambela iro ho tatrany antambo. (Isaia 30:5, 17; Jer. 25:8-11) Zen̈y marin̈y raha nandalo izikoa Babylonianin̈y aby io fa nan̈ano sesitany iro. Fa ndray zen̈y, tsy nivadiky sasany tamindro Jiosy aby io, ke nisy hafatra man̈amia fan̈antinan̈a nambarany Isaia iro. Izy nivolan̈a fa andra araiky an̈y Jehovah han̈ampody iro ndraiky a Jerosalema. (Vakia Isaia 30:18, 19.) Ary zen̈y marin̈y raha niboaka. Navotany Jehovah baka ta Babylony iro. Fa ndray zen̈y, tsy tio ny iô izy nan̈avotro iro. Baiboly baka nivolan̈a fa “mbala miambin̈y fo Jehovah, fotony tihahinakinaka anaro.” Dikanizen̈y, nambelany nandeha antsendriky fotoan̈a zay izy vo nan̈avotro olo tsy nivadiky aby io. Nahadin̈y 70 taon̈o iro Israelita aby io natao sesitany ta Babylony tan̈y. Tapitry zen̈y vo nahazo nody ta Jerosalema sasany tamindro. (Isaia 10:21; Jer. 29:10) Ke iro koa fa tafimpody tamy tanindro, halahelondro taminiro sesitany in̈y nivadiky ranomasony haravoan̈a!

5. Ino toky amezany Isaia 30:19 atsika?

⁵ Afaka mankahery atsika amy zioty volan̈a aby ty: ‘Izy hahinakinaka anao ankitin̈y koa fa maharen̈y anao mikaiky vonjy.’ (Isaia 30:19) Isaia man̈amia toky atsika fa hitandrin̈esany Jehovah tsarabe atsika koa fa mangataka vonjy aminany, avio hivaliany malaky vavakantsika. Nivolan̈a karaha ty koa Isaia: ‘Miaraka anao ren̈iny, Izy hamaly anao edy.’ Ten̈a man̈amia toky atsika volan̈a aby zen̈y! Mampatsiaro atsika koa zen̈y fa Babantsika andan̈itry an̈y io man̈iry mare han̈ampy lan̈iany olo mangataka vonjy aminany. Fahaizantsika raha zen̈y man̈ampy atsika hiaritry sady ho ravoravo fo.

6. Nan̈ino raha nivolan̈iny Isaia man̈aboaka fa mitandren̈y vavakany panomponany tsiaraikiaraiky Jehovah?

⁶ Ino koa raha hafa ampianariny andininy io momba vavaka ataontsika? Jehovah mitandren̈y tsarabe vavakantsika tsiaraikiaraiky. Nan̈ino ma atsika mivolan̈a zen̈y? Amy tapany voanalohany aminy Isaia toko faha-​30, Jehovah mampiasa volan̈a “anaro” fotony izy mikoran̈a amy vahoakanany amy fitambarany. Fa aminy andininy faha-19 ndraiky, volan̈a “anao” ampiasain̈y, fotony koran̈a io mandeha aminolo tsiaraikiaraiky. Ty aby raha nivolan̈iny Isaia: ‘Anao tsy hitomoan̈y eky’; ‘izy hahinakinaka anao ankitin̈y’; ‘izy hamaly anao.’ Tsy hitanao baka amy zen̈y fa Baba be fitiavan̈a marin̈y Jehovah? Ke izy tsy mety hivolan̈a karaha ty amy zanany araiky efa kivy: “Anao tokony tsy mora kivy karaha iry rahalahinao na rahavavinao aby io.” Mifanohitry amy zen̈y aby, atsika tsiaraikiaraiky karakarainy. Mitandren̈y tsara koa izy lera atsika mivavaka.​—Sal. 116:1; Isaia 57:15.

7. Eraka raha nikoran̈iny Isaia ndreky Jesosy, nan̈ino atsika mila tsy voly mivavaka?

⁷ Atsika koa fa mikoran̈a raha manahiran̈a atsika amy Jehovah, akory mety han̈ampiany  atsika? Voanalohany, mety amezany angovo hiaretan̈a problemo io antsendriky atsika. Izikoa mbala tsy mety mivaha erakany nantinaintsika raha manahiran̈a io, tsara izikoa atsika mimpodimpody mangataka angovo aminany ndraiky. Izy man̈iraka atsika han̈ano zen̈y. Isaia 62:7 nivolan̈a: “Aza ambela hangala kajo foeky [Jehovah].” Ino ma raha tiany zen̈y koran̈iny? Atsika mila tsy voly mivavaka amy Jehovah, ke karaha efa tsy man̈ambela izy hangala kajo foeky. Volan̈any Isaia io mampahatsiaro atsika fan̈oharan̈a momba vavaka nataony Jesosy amy Lioka 11:8-10, 13. Amizio ao, Jesosy mandrisiky atsika ‘hisisiky hangataka’ avio ‘tsy voly hangataka’ fan̈ahy masin̈y. Afaka miangavy Jehovah koa atsika baka hamezany taridalan̈a han̈ampy atsika hahay hanapakevitry.

8. Taloha tan̈y, akory nampatanteraka Isaia 30:20, 21?

⁸ Vakia Isaia 30:20, 21. Maramila babylonianin̈y aby io koa fa nan̈ano fahirano tanànany Jerosalema tan̈atiny taon̈o araiky sy sasany, nijaly mare olo tao. Ke efa nahazatra karaha ataony mofo ndreky rano foeky jaly. Fa aminy andininy faha-20 ndreky 21, Jehovah nampan̈anten̈a han̈avotro iro Jiosy aby io, izikoa iro mibebaka ndreky miova. Isaia nampan̈anten̈a iro fa Jehovah hampianatra iro karakory fomba ten̈a tiany hanompoan̈a Izy, fotony Izy ‘Pampianatrandro Be Voninahitry.’ Tanteraka volan̈a aby zen̈y iro Jiosy aby io koa fa nafaka babo. Naboakany Jehovah tamindro tsarabe fa izy Pampianatra Be Voninahitry. Izy nan̈amia iro taridalan̈a, ke loso vitandro nan̈ampody ndraiky fivavahan̈a marin̈y. Amy zioty koa, ten̈a ravoravo atsika fotony ampianariny Jehovah, Pampianatra Be Voninahitry!

9. Ino fomba araiky han̈amezany Jehovah taridalan̈a atsika, amy zioty?

⁹ Aminy andininy aby io, atsika ampiran̈iny Isaia amy pianatra, ke misy fomba aroe, hoizy, ampianarany Jehovah atsika. Voanalohany, hoizy: ‘Masonao foeky hahita Pampianatranao Be Voninahitry io.’ Amy fan̈oharan̈a io, Isaia mivolan̈a fa Pampianatra io mitsangana mifan̈atriky amy pianatranany. Mahazo tombontsoa maventy atsika amy zioty fotony ampianariny Zan̈ahary! Karakory ma ataony mampianatra atsika? Izy mampiasa fandaminan̈anany. Mahazo taridalan̈a atsika amy fivorian̈a ndreky fivoriambe, amy boky ndreky gazety, amy programo amy Tele JW, ndreky amy fomba maro hafa. Iro io nataony Jehovah han̈ampian̈a atsika hahavita hiaritry sady ho ravoravo fo, lera misy raha sarotro mandalo. Ke atsika mankasitraka mare taridalan̈a aby amezany fandaminan̈any Jehovah.

10. Nan̈ino atsika mivolan̈a fa atsika maharen̈y ‘volan̈a baka afarantsika ao’?

 ¹⁰ Ino fomba faharoe ampianarany Jehovah atsika ho Isaia? Hoizy: ‘Sofin̈inao foeky haharen̈y volan̈a baka afaranao ao.’ Eto, paminan̈y io mivolan̈a fa Jehovah miran̈a pampianatra araiky von̈ono han̈ampy, ke baka afarany pianatranany ao izy man̈ambara iro lalan̈a imboandro. Ke karakory koa atsika aminy andra zioty? Maharen̈y Jehovah mivolan̈a baka afarantsika ao koa atsika, fotony efa ela be nanoratan̈a volan̈a Zan̈ahary amy Baiboly ao, efa taon̈o maro loso zay. Ke atsika koa fa mamaky Baiboly, atsika miran̈a maharen̈y feony Zan̈ahary mivolan̈a baka afarantsika ao.​—Isaia 51:4.

11. Baka atsika hahavita hiaritry sady ho ravoravo fo, ino raha mila ataontsika, avio nan̈ino?

¹¹ Akory hazahoantsika hatsaran̈a maro amy taridalan̈a amezany Jehovah atsika baka amy fandaminan̈anany ndreky Volan̈anany? Aleva onon̈o baka raha nivolan̈iny Isaia ty: “Ty lalan̈a ke areha.” (Isaia 30:21) Dikanizen̈y, misy raha aroe aby mila ataontsika. Ino aby? Mila haintsika antsendriky “lalan̈a” io. Fa zen̈y tsy ampy, fa izio mila ‘arehantsika’ koa. Baka amy Baiboly ndreky fan̈azavan̈a amezany fandaminan̈a hahaizantsika raha takiny Jehovah amintsika. Ianarantsika koa akory fomba an̈arehantsika raha zen̈y. Ke izikoa tiantsika hahavita hiaritry sady ho ravoravo fo lera manompo Jehovah, ino raha mila ataontsika? Atsika mila mianatra ndreky man̈araka raha nianarantsika. Efa zen̈y zaraiky fo fomba azahoantsika antoko fa Jehovah hitahy atsika.

12. Izikoa zahan̈a Isaia 30:23-26, karakory nataony Jehovah nitahy vahoakanany?

¹² Vakia Isaia 30:23-26. Tanteraka tamindro Jiosy navotan̈a baka ta Babylony faminanian̈a io, lera iro tafimpody tamy taniny Israely. Tamy fomba akory? Nitahy iro mare Jehovah, ke nan̈amia raha nilaindro tamy fiain̈ana ndreky tamy lafiny arapan̈ahy. Ohatra, treka mare hanin̈y nazondro. Fa ny ten̈a maventy, namezany Jehovah iro raha jiaby nilaindro baka iro hahavita han̈aton̈o izy ke himpody hanompo izy amy fomba hankasitrahiny. Panompony Zan̈ahary tamy fotoan̈a zen̈y mbala tsiary nahazo hatsaran̈a maro be karaha zen̈y. Andininy faha-26 mivolan̈a fa nitombo mare hazavan̈a arapan̈ahy namezany Jehovah iro, ke loso nazava tsarabe tamindro Volan̈anany. (Isaia 60:2) Ke ino vokatrany fitahian̈a aby zen̈y tamy panomponany? Iro loso ravoravo fo nanompo izy sady nahazo angovo, fotony ‘ravoravo fondro.’​—Isaia 65:14.

13. Tanteraka amy zioty koa ma faminanian̈a momba fan̈ampodianan̈a amy plasy fivavahan̈a marin̈y? Hazavà.

 ¹³ Tanteraka aminy andrantsika zioty koa faminanian̈a momba fan̈ampodianan̈a amy plasy fivavahan̈a marin̈y. Amy fomba akory? Rango taminy 1919, antapitrisany olo nafaka baka tamy Babylony Be, na fivavahan̈a diso jiaby. Izikoa iro fa nadoso baka tao, iro nalefa tamy toeran̈a araiky tsara mandilatra Tany Nampan̈antinain̈y. Tsy ino izio fa paradisa arapan̈ahy. (Isaia 51:3; 66:8) Ino ma paradisa arapan̈ahy zen̈y?

14. Ino ma paradisa arapan̈ahy zen̈y, avio azovy mipetraka ao amy zioty? (Zahava Fan̈azavan̈a.)

¹⁴ Rango taminy 1919, ravoravo voahosotro aby io niain̈y tan̈aty paradisa arapan̈ahy. b Izikoa fa nandeha fotoan̈a, tafiditry tan̈aty paradisa arapan̈ahy io koa “ondrikondriky hafa” man̈anten̈a hiain̈a ambony tany. Ke mba nahazo hatsaran̈a maro baka amy Jehovah koa iro.​—Jaona 10:16; Isaia 25:6; 65:13.

15. Aia ma misy paradisa arapan̈ahy io?

¹⁵ Aia ma misy paradisa arapan̈ahy io amy zioty? Panompony Jehovah miparitaka erantany. Dikanizen̈y, amy tany jiaby misy iro misy paradisa arapan̈ahy. Ke amy zioty, na aia na aia tany misy atsika ambony tany eto, an̈aty paradisa arapan̈ahy io fo atsika izikoa mbala mazoto manohan̈a fivavahan̈a marin̈y.

16. Ino han̈ampy atsika hifantoko fo aminy hatsaran̈any paradisa arapan̈ahy?

¹⁶ Ino, ohatra, raha farany maventy mila ataontsika baka atsika tsy hiala an̈aty paradisa arapan̈ahy foeky? Atsika tsy maintsy mankasitraka fiangonan̈a kristianin̈y erantany. Akory an̈anaovan̈a zen̈y? Mila mifantoko amy raha tsara momba iro rahalahy ndreky anabavintsika aby io atsika, fa tsy amy toetry ratsindro. (Jaona 17:20, 21) Nan̈ino ma zen̈y ten̈a raha maventy? Iritrireta baka ty: Atsika koa fa mandeha amy parky na zaridain araiky tsara oe, atsika man̈anten̈a hahita kakazo isankarazany. Karaha zen̈y koa aminy andra zioty, an̈aty fiangonan̈a ahitan̈a olo isankarazany. (Isaia 44:4; 61:3) Ke atsika mila mifantoko aminy hatsaran̈any “atiala” io, fa tsy amy raha madiniky tsy  paripare amy “kakazo” tsiaraikiaraiky ankilantsika iô. Atsika mila mitandrin̈y tsao toetry ratsintsika na niny piaramanompo, loso manakotro hatsaran̈any fiangonan̈a kristianin̈y miray sain̈y erantany io.

17. Ino raha mety ataontsika tsiaraikiaraiky baka fiangonan̈a hiray sain̈y fo?

¹⁷ Ino raha mety ataontsika tsiaraikiaraiky baka fiangonan̈a hiray sain̈y fo? Mila mifen̈y ho pampihavan̈a atsika. (Mat. 5:9; Rom. 12:18) Isaka atsika mifen̈y man̈ano raha hisiany fihavan̈ana an̈atiny fiangonan̈a, atsika hahaihankatsara paradisa arapan̈ahy io fo. Mila alaintsika onon̈o fa olo tsiaraikiaraiky an̈aty paradisa arapan̈ahy io nitahominy Jehovah amy fivavahan̈a marin̈y. (Jaona 6:44) Miniminia hely haravoan̈any Jehovah izikoa fa mahita atsika mifen̈y mare man̈ano raha hahavy panomponany hihavan̈a ndreky hiray sain̈y fo. Ten̈a valera aminany baka iro io!​—Isaia 26:3; Hag. 2:7.

18. Ino raha tokony hisaintsain̈intsika matetiky, avio nan̈ino?

¹⁸ Jehovah man̈amia panomponany raha maro tsara. Ke akory hahavy atsika hahazo hatsaran̈a maro baka amy raha aby zen̈y? Atsika mila misaintsain̈y raha ianarantsika amy Volan̈a Zan̈ahary, avio amy boky ndreky gazety. Zen̈y han̈ampy atsika hanan̈a toetry kristianin̈y. Ke vokany amy zay, olo jiaby an̈aty fiangonan̈a “hifankatia karaha ataonolo pirahalahy” avio “hifandray ampô mare.” (Rom. 12:10) Hahaihifandray amy Jehovah fo atsika izikoa mangala onon̈o hatsaran̈a efa azontsika amy zioty. Misaintsain̈y hatsaran̈a handeha amezany Jehovah aminy amaray koa atsika. Zen̈y han̈ampy atsika hahaihatoky fo fa ho afaka hanompo izy mandrakizay ankitin̈y atsika. Raha jiaby zen̈y han̈ampy atsika hahaiho ravoravo manompo Jehovah rango zioty.

19. a) Izikoa zahan̈a Isaia 30:18, ino raha azontsika antoko? b) Ino raha mila ataontsika baka ho vitantsika hiaritry sady ho ravoravo fo?

¹⁹ “Hitsangana” han̈avotro atsika Jehovah lera izy handripaka donia ratsy ty. (Isaia 30:18) Haintsika fa Jehovah “Zan̈ahariny rariny”, ke izy tsy mety han̈ambela doniany Satana ty hidoko iô fo mandilatrany fotoan̈a tokony ho izy. (Isaia 25:9) Jehovah efa miambin̈y andra hamonjiany atsika io, karaha zen̈y koa atsika. Fa mandrapaviany zen̈y, atsika tapakevitry hankafỳ tombontsoa anan̈antsika aby ty: Mivavaka, mianatra ndreky man̈araka Volan̈a Zan̈ahary, avio misaintsain̈y hatsaran̈a azontsika. Atsika koa man̈ano zen̈y, Jehovah han̈ampy atsika hiaritry sady ho ravoravo amy fanompoan̈a izy.