1. Ino ma dikany misain̈y tsara zen̈y? (2 Timoty 4:5)

 METY ho sarotro amintsika tsy hivadiky amy Jehovah ndreky fandaminan̈anany lera misy raha mampameloko atsika. Ino raha han̈ampy atsika hiatriky zen̈y? Atsika mila misain̈y tsara fo, tsy mora rikian̈a, avio miorin̈y tsara amy finoan̈a. (Vakia 2 Timoty 4:5.) Hahavita hisain̈y tsara atsika izikoa tsy malaky mialamboetry, mandiniky tsara, avio mifen̈y hitovy hevitry amy Jehovah. Izikoa atsika man̈ano zen̈y, atsika tsy ho mora hindesimpô.

2. Ino raha hidinihintsika ato?

² Tamy lahatsoratra taloha in̈y, atsika nahita problemo telo mety hatrefintsika baka amy raha ataonolo ambelany fiangonan̈a. Fa amy lahatsoratra ty ndraiky, atsika handiniky problemo telo baka an̈atiny fiangonan̈a. Mety ho sarotro amintsika tsy hivadiky amy Jehovah lera atsika miatriky iro io. Ino aby ma zen̈y? 1) Lera atsika mahatsapa fa nisy piaramanompo araiky nan̈ano raha tsy rariny tamintsika, 2) lera atsika mahazo fan̈anaran̈a, avio 3) lera sarotro amintsika man̈eky fan̈ovoan̈a ataony fandaminan̈a. Ino han̈ampy atsika hisain̈y tsara fo, ke tsy hivadiky amy Jehovah ndreky amy fandaminan̈anany koa atsika sendra raha aby io?

3. Mety han̈ano akory atsika izikoa atsika mahatsapa fa nisy piaramanompo nan̈ano raha tsy rariny tamintsika?

³ Asa anao efa nahatsapa fa nisy piaramanompo nan̈ano raha tsy rariny taminao, mety olo manan̈a andraikitry an̈ivony fiangonan̈a donko izy? Mety tsy hampameloko anao aby tanjon̈onany. (Rom. 3:23; Jak. 3:2) Fa raha nataony io fo ten̈a nampameloko  anao mare. Ndray anao aby mety tsy nahita tôro foeky nandiniky raha nataony io. Mety tafieritreritry karaha ty aby anao: ‘Mba fandaminan̈any Zan̈ahary tsarabe edy ty va? Aia ke rahalahy man̈ano raha karaha in̈y!’ Kanefa efa zen̈y edy raha tiany Satana hiritriretinao. (2 Kor. 2:11) Eritreritry karaha zen̈y mety hitariky atsika tsy hanompo Jehovah ndreky hiala amy fandaminan̈anany. Ke izikoa atsika mahatsapa fa nisy piaramanompo nan̈ano raha tsy rariny tamintsika, akory hahavy atsika hisain̈y tsara? Avio ino raha han̈ampy atsika tsy hieritreritry raha mety hisy vokany ratsy amintsika?

4. Ino raha nan̈ampy Josefa hahavita hisain̈y tsara fo lera izy navoa raha tsy rariny, avio ino raha ianarantsika baka amy zen̈y? (Genesisy 50:19-21)

⁴ Aza meloko. Tamy Josefa mbala hely, nan̈ano raha tsy rariny taminany iro zokilahiny aby io. Tsy vitany iro fa tsy tia izy fo fa, sasany tamindro tihamono izy foeky. (Gen. 37:4, 18-22) Ke izy nalafondro hatao andevo. Baka tamy raha nataondro zen̈y, nahavy Josefa niaritry jaly kadiriny 13 taon̈o. Josefa afaka nieritreritry fa Jehovah tsy ten̈a tia izy, na nan̈ary izy foeky tamy fotoan̈a ten̈a nilavany fan̈ampian̈a. Fa izy tsy nan̈ano karaha zen̈y. Izy tsy neloko, fa nahay nandiniky tsara, ke kalma fo. Izy tsy namaly faty iro rahalahiny aby io foeky ndray izy nanan̈a okazion han̈anaovan̈a zen̈y. Fa akory nataony? Nitiaviny fo iro avio nambelany hadisovan̈andro. (Gen. 45:4, 5) Ino ma raha nan̈ampy izy hahavita zen̈y? Izy nisain̈y tsara. Tsy problemonany raha nifantohany, fa sitrapony Jehovah. (Vakia Genesisy 50:19-21.) Ino raha ianarantsika baka amy zen̈y? Izikoa fa misy raha tsy rariny mavoa anao, aza meloko amy Jehovah, avio aza mieritreritry fa anao efa nariany. Fa saintsain̈a fomba an̈ampiany anao hiaritry fitsapan̈a io. Avio izikoa fa misy olo man̈ano raha tsy rariny aminao, mifen̈a fo han̈ambela hadisovan̈a avio tsarova fa ‘fitiavan̈a mandrakotro fahotan̈a maro.’​—1 Pet. 4:8.

5. Ino nan̈ampy Miqueas hisain̈y tsara fo izikoa fa tsapany fa izy navoa raha tsy rariny?

⁵ Diniha baka raha navoa Miqueas, b antipan̈ahy araiky baka Ameriky Atsimo. Tsapany fa tsy rariny raha nataony rahalahy sasany nanan̈a andraikitry, taminany. Hoizy: “Zaho mbala tsiary niasaloha marerenizen̈y. Zaho navozo. Tsy tafandry zaho sady nitomoan̈y fotony hitako karaha tsisy raha azoko atao.” Ndray tio zen̈y, Miqueas nifen̈y nisain̈y tsara fo ndreky tsy nan̈eky nindesimpô. Izy nivavaka matetiky tamy Jehovah, baka hahazo fan̈ahy masin̈y ndreky angovo hiaretan̈a. Nitady fan̈azavan̈a afaka nan̈ampy izy tamy boky ndreky gazetintsika koa izy. Ino raha ianarantsika baka amy zen̈y? Izikoa tsapanao fa nan̈ano raha tsy rariny taminao rahalahy na anabavy araiky, mifen̈a ho kalma fo, avio aza indesimpô. Mety tsy hainao baka ino nahavy olo io nivolan̈a na nan̈ano raha karaha in̈y. Mivavaha amy Jehovah, ke angataha izy han̈ampy anao hatakatra nan̈ino olo io tafihan̈ano raha karaha in̈y. Zen̈y mety han̈ampy anao hieritreritry fa piaramanompo aminao io tsy raha tihan̈ano raha ratsy aminao aby. Ke mety ho vitanao hamindra fô aminany. (Ohab. 19:11) Aza adin̈a fa hitany Jehovah raha mavoa anao, ke izy han̈amia angovo anao hahavitanao hiaritry.​—2 Tan. 16:9; Mpito. 5:8.

6. Nan̈ino ten̈a ilain̈a mangala onon̈o fa fitiavan̈a mahavy Jehovah man̈anatra atsika? (Hebreo 12:5, 6, 11)

⁶ Mety halahelo mare atsika lera hanarin̈y. Fa izikoa atsika mifantoko aminy alahelo tsapantsika io fo, loso tsy hahoantsika fan̈itsian̈a nazontsika io. Mety hieritreritry baka  atsika fa tsy rariny izio sady tsy mahakasiky atsika, na mentitry loatra. Ke izikoa zen̈y edy, ten̈a ho matiantoko atsika, fotony tsy ho tsapantsika fa fitiavan̈a mahavy Jehovah man̈anatra atsika. (Vakia Hebreo 12:5, 6, 11.) Ke izikoa alahelontsika fo ifantohantsika, atsika miran̈a man̈amia lalan̈a Satana han̈araraotro fihetsehampontsika. Tiany baka atsika tsy han̈eky hanarin̈y. Fa ny ten̈a ratsy, tiany atsika ho voly tsihelihely hanompo Jehovah ndreky hiala amy fiangonan̈a foeky. Ke ino basy raha han̈ampy anao hisain̈y tsara fo izikoa anao nahazo fan̈itsian̈a?

7. a) Koa sary io zahavan̈a, nampiasainy Jehovah taminino Petera koa fa nan̈eky hahitsy? b) Ino raha ianaranao baka amy Petera?

⁷ Man̈ikia anatra, ke ahitsia raha mila ahitsy. Tsy indraiky fo Jesosy nan̈itsy Petera tankilany apostoly sasany. (Mar. 8:33; Lioka 22:31-34) Mety nen̈atra foeky Petera tamy zen̈y. Fa ndray zen̈y, Petera tsy nivadiky tamy Jesosy. Nan̈eky nahitsy izy, avio nangala fianaran̈a baka taminy hadisovan̈a nataony. Ino vokany? Jehovah nan̈amia hatsaran̈a Petera nohony izy tsy nivadiky. Namezany andraikitry maventy tamy fiangonan̈a koa izy. (Jaona 21:15-17; Asa. 10:24-33; 1 Pet. 1:1) Ino raha ianarantsika baka amy Petera? Mahazo hatsaran̈a atsika ndreky olo hafa izikoa atsika man̈eky fan̈itsian̈a avio miova, fa tsy mifantoko aminy hen̈atra tsapantsika. Zen̈y hahavy atsika hahaiho azony Jehovah ampiasain̈a fo sady ho mety tavandrainy piaramanompo.

8-9. Tamy voanalohany, karakory tsapany Bernardo koa izy fa nahazo fan̈anaran̈a, fa ino ndraiky raha nan̈ampy izy han̈ova toetsain̈inany?

⁸ Diniha raha nandalo tamy Bernardo, rahalahy araiky a Mozambiky an̈y. Antipan̈ahy izy taloha, fa baka tio izy nadoso taminy andraikitrinany io. Akory tsapany Bernardo tamy voanalohany? Hoizy: “Neloko mare zaho tamy zen̈y, fotony halako fan̈itsian̈a nazoko io.” Izy baka niasaloha tamy raha mety iritriretiny piaramanompo momba izy. Niaiky karaha ty izy: “Efa afaka fanjava vitsivitsy vo tsapako fa ten̈a nilaiko fan̈itsian̈a in̈y. Tamy zen̈y koa zaho vo nimpody natoky ndraiky Jehovah ndreky fandaminan̈anany.” Ino raha nan̈ampy Bernardo han̈ova toetsain̈inany?

⁹ Nahitsiny Bernardo toetsain̈inany. Karaha ty baka hoizy: “Tamy zaho mbala antipan̈ahy, zaho nampiasa Hebreo 12:7 han̈ampian̈a olo handray tsara fan̈itsian̈a baka amy Jehovah. Ke zaho nan̈ontany ten̈a karaha ty: ‘Azovy  ma tokony han̈araka raha volan̈iny andininy io?’ Panompony Jehovah jiaby, an̈isany zen̈y zaho!” Nifen̈y Bernardo baka tio nan̈ano raha hahavy izy himpody hatoky Jehovah ndreky fandaminan̈anany. Akory nataony? Nahainifen̈y fo izy namaky Baiboly, avio nampitombosiny fotoan̈a hisaintsain̈any raha baka nivakiany. Mbala nampiasaloha izy fo raha iritriretiny piaramanompo momba izy, fa ndray zen̈y, izy niaraka nanompo tamindro fo sady namaly teny koa fa nivory. Koa fa nandeha fotoan̈a, navoatendry antipan̈ahy ndraiky Bernardo. Izikoa anao nahazo fan̈anaran̈a karaha Bernardo, ino raha tokony hataonao? Aza mifantoko aminy hen̈atranao, fa ikia fan̈anaran̈a nazonao io, avio ivoà raha tokony hivoan̈a. c (Ohab. 8:33; 22:4) Izikoa anao man̈ano zen̈y, matokisa fa Jehovah han̈amia anao hatsaran̈a, fotony anao tsy nivadiky taminany sady tsy niala fandaminan̈anany.

10. Ino fan̈ovoan̈a mety nitsapa tsy fivadihan̈any lelahy israelita sasany?

¹⁰ Iro fan̈ovoan̈a aby ataony fandaminan̈a io mety hitsapa tsy fivadihan̈antsika. Mety hiala amy Jehovah foeky atsika izikoa tsy mitandrin̈y. Mba iritrireta hely baka, ohatra, taminy andrandro Israelita aby io. Niova mare fiain̈anandro izikoa iro fa nahazo Lalàn̈any Mosesy. Talohany nisiany Lalàn̈a io baka, lohany fianakavian̈a nan̈ano raha aby fataony pisoron̈o. Iro, ohatra, nan̈orin̈y alitara avio nisolo ten̈a fianakavian̈andro koa fa han̈ano fan̈atitry amian̈a Jehovah. (Gen. 8:20, 21; 12:7; 26:25; 35:1, 6, 7; Joba 1:5) Fa koa fa navy Lalàn̈any Mosesy, efa tsy nahazo nan̈ano zen̈y eky lohany fianakavian̈a. Jehovah efa nanendry pisoron̈o baka amy fianakavian̈any Arona, ke iro fo nahazo nanolotro fan̈atitry. Nanomboko tio, izikoa nisy lohany fianakavian̈a tsy an̈isany taranakany Arona mbala nan̈ano asany pisoron̈o, izy nivonen̈a edy. d (Lev. 17:3-6, 8, 9) Mety baka tamy fan̈ovoan̈a zen̈y nahavy Kora, Datana, Abirama avio iro piadidy 250 in̈y, nanohitry fahifan̈any Mosesy ndreky Arona. (Nom. 16:1-3) Fa zen̈y ndraiky tsy ten̈a azontsika antoko. Fa na ino na ino antony, haintsika fa Kora ndreky iro namany aby io nivadiky tamy Jehovah. Ke ino raha mety ataonao izikoa sarotro aminao tsy hivadiky, lera misy fan̈ovoan̈a ataony fandaminan̈a?

11. Ino raha ianarantsika baka amy Levita Kehatita sasany?

¹¹ Ikia amy fô jiaby fan̈ovoan̈a ataony fandaminan̈a. Nanan̈a andraikitry miavaka iro Kehatita aby io taminiro nandeha tamy tany paiky. Isaka iro Israelita aby io nifindra toby, Kehatita sasany nitondra Vata nisy fifan̈ikian̈a nialoha lalan̈a olo jiaby. (Nom. 3:29, 31; 10:33; Jos. 3:2-4) Tombontsoa maventy raha zen̈y! Kanefa niova raha zen̈y lera iro nipetraka tamy Tany Nampan̈antinain̈y. Tsy nila nafindrafindra eky baka Vata in̈y. Ke Solomona koa fa loso panjaka, nahazo fanendrena hafa iro Kehatita aby io. Sasany tamindro natao pihira, piambin̈y varavaran̈a, fa sasany ndraiky nikarakara tran̈o fikajian̈a entan̈a. (1 Tan. 6:31-33; 26:1, 24) Tsy koran̈iny Baiboly foeky fa nisy Kehatita nin̈on̈on̈o na nitaky hahazo fanendrena tsaratsaranizen̈y, ndray farandraha niavaka eky fanendrena nazondro taloha. Ino raha ianarantsika baka amy zen̈y? Ikia amy fô jiaby zay fan̈ovoan̈a ataony fandaminan̈a, ndray izio misy vokany amy  fanendrena nazonao. Mifen̈a ho ravoravo amy zay fanendrena amian̈a anao. Aza adin̈a fa tsy fanendrena azonao mahavy anao ho ten̈a valera amy Jehovah. Aminany, fan̈arehanao volan̈anany mbala bebeny asa anendren̈a anao.​—1 Sam. 15:22.

12. Karakory tsapany Zaina koa fa izy efa tsy nirahin̈y hanompo tamy Betela eky?

¹² Iritrireta hely raha nahazo anabavy Zaina. Efa mandilatra 23 taon̈o izy nanompo tamy Betela. Ten̈a tiany mare tombotsoanany io. Kanefa nahazo fanendrena vaovao izy, ke tsy maintsy niala tamy tombontsoa tiany be io. Izy navoatendry pisava lalan̈a manokan̈a. Ke hoizy: “Mira nilatsahambaratra zaho koa fa naharen̈y fanendrena vaovao io. Tsapako karaha tsisy raha nilan̈a zaho foeky, ke ho zaho: ‘Ino ma raha tsy mety nataoko?’ ” Mbala nanosoko halahelonany io koa raha nivolan̈iny rahalahy ndreky ranabavy sasany tamy fiangonan̈a. Ho iro taminany: “Anao koa ten̈a nilain̈y, anao tsy nadosony fandaminan̈a.” Nisy fotoan̈a Zaina ten̈a kivy mare, ke nitomoan̈y fo isaka alin̈y. Fa ndray zen̈y, karaha ty hoizy: “Zaho tsiary ndraiky tsy natoky fandaminan̈a ndreky fitiavany Jehovah zaho.” Ino ma raha nan̈ampy Zaina hisain̈y tsara fo?

13. Ino nan̈ampy Zaina tsy ho kivy loatra eky?

¹³ Nanjary tsy kivy loatra eky Zaina. Karakory ma nataony? Nivakiny zay lahatsoratra mikoran̈a momba raha nahazo izy io, tamy boky ndreky gazetintsika. Nan̈ampy izy mare, lahatsoratra ty: “Afaka Mandresy ny Fahakiviana Ianao!”, tamy Ny Tilikambo Fiambenana 1 Fevrie 2001. Hazavainy lahatsoratra io fa mety nahatsapa karaha raha tsapany io koa i Marka, panoratra Baiboly, lera izy niova fanendrena. Karaha ty nitantarainy Zaina: “Modely namezany Marka nampajanga fonaka ke tsy kivy eky zaho.” Zaina koa tsy nihatakataka tamy namany. Izy tsy nitokantokan̈a na nan̈ameloten̈a. Tontohitry izy fa fan̈ahy masin̈y man̈ampy fandaminan̈any Jehovah koa fa hanapakevitry. Hitany koa fa ten̈a mikarakara izy iro rahalahy manan̈a andraikitry aby io. Tsy zen̈y fo, niaiky koa izy fa fandaminan̈any Zan̈ahary tsy maintsy mitady fomba ten̈a tsara hampandrosoan̈a asany Jehovah.

14. Ino fan̈ovoan̈a nataony fandaminan̈a ke sarotro tamy Vlado nan̈eky izy, avio ino raha nan̈ampy izy?

¹⁴ Iritrireta koa raha nahazo Vlado, antipan̈ahy araiky 73 taon̈o mipetraka a Slovenia. Natambatra tamy fiangonan̈a hafa fiangonan̈a nisy iro, ke tsy nampiasain̈y eky Tran̈o Fivorian̈a  nivoriandro. Tsy nora tamy Vlado raha zen̈y, karaha ty hoizy: “Tsy mazava aminaka nan̈ino Tran̈o Fivorian̈a tsarabe io tsy ampiasain̈a eky! Nalahelo zaho fotony vo tsy ela zahay nan̈avao izio. Zaho pandrafitry, ke zaho nan̈amboatra raha vaovao sasany tao. Maro koa raha nila nahitsy vokatrany fan̈ovoan̈a in̈y, kanefa raha zen̈y tsy mora aminay efa matoe!” Ino raha nan̈ampy Vlado han̈eky toromariky io? Karaha ty nazavainy: “Mahazo hatsaran̈a fo lan̈iany man̈eky fan̈ovoan̈a ataony fandaminan̈any Jehovah, fotony izio man̈oman̈a atsika amy fan̈ovoan̈a maventy mbala ho avy.” Natambatra tamy fiangonan̈a hafa koa ma fiangonan̈a nisy anaro, sa anao nahazo fanendrena vaovao, ke sarotro aminao man̈eky zen̈y? Matokisa fa azony Jehovah tsara fihetsehamponao. Hitahy anao izy izikoa anao man̈eky iro fan̈ovoan̈a aby io sady tsy miala aminany avio tsy mivadiky amy fandaminan̈a ampiasainy.​—Sal. 18:25.

15. Ino han̈ampy atsika hisain̈y tsara fo izikoa miatriky raha sarotro baka an̈atiny fiangonan̈a?

¹⁵ Mahaiman̈aton̈o fo farany donia ty. Ke ampoizintsika fa mety hisy raha sarotro baka amy fiangonan̈a ao hitsapa tsy fivadihan̈antsika amy Jehovah. Ke atsika mila mahay misain̈y tsara fo. Aza meloko izikoa tsapanao fa nisy piaramanompo nan̈ano raha tsy rariny taminao. Izikoa ndraiky anao nahazo fan̈anaran̈a, man̈ikia torohevitry fa aza mifantoko aminy hen̈atra tsapanao, avio ahitsia raha mila ahitsy. Akory ndraiky izikoa misy vokany aminao fan̈ovoan̈a ataony fandaminan̈any Jehovah? Ikia amy fô jiaby fan̈ovoan̈a io, avio areha fo zay taridalan̈a azonao.

16. Ino han̈ampy anao hatoky Jehovah ndreky fandaminan̈anany fo?

¹⁶ Lera misy raha mitsapa tsy fivadihan̈anao, mbala ho vitanao fo hatoky Jehovah ndreky fandaminan̈anany izikoa anao misain̈y tsara fo. Dikanizen̈y, mifen̈y ho kalma fo, mandiniky tsara avio mifen̈y hitovy amy fomba fahitany Jehovah raha. Mitadiava ohatranolo amy Baiboly nahavita niatriky problemo mitovy amy ninao, avio saintsain̈a modelindro. Mangataha fan̈ampian̈a amy Jehovah. Aza mitokantokan̈a foeky, fa miaraha amy fiangonan̈a fo. Izikoa anao man̈ano zen̈y, Satana tsy hahavita hampisaraka anao amy Jehovah na amy fandaminan̈anany foeky, na ino na ino raha hiboaka.​—Jak. 4:7.