TANTARAMPIAIN̈ANA
“Zaho Tihan̈ano Asany Jehovah”
ZAHAY nan̈elakelaka tan̈ana nan̈ano viloma olo vitsivitsy baka nitsidihinay marikitry tanànany Granbori, tan̈aty alabeny Suriname tan̈y. Zahay baka tio niondran̈a lakana kakazo, namakivaky Ten̈aranony Tapanahoni. Tsy ela, zahay koa fa navy tamy rano mahery, nikon̈o vato elisiny moterany lakananay. Direkty nilentiky tan̈aty rano lohany lakana io ke tafideky tan̈aty rano zahay. Nitotoko mare fonaka tamy zen̈y. Marin̈y fa efa taon̈otaon̈o zaho nivezivezy tamy ten̈arano io, izikoa fa nan̈ano asany faritry, fa zaho mbala tsy mahay milomaon̈o fo!
Alohany hitantarako aminaro raha nandalo tafaranizen̈y, alô ambarako anaro antsendriky akory nahavy zaho loso panompo manontolo andra.
Zaho teraka ta Curaçao taminy 1942. Izio nosy tsara a Caraïbe an̈y. Papako baka Suriname, fa baka taminy asanany nahavy izy nifindra tamy nosy io. Kadiriny taon̈o aroe talohany zaho teraka izy vita batisa. Izy an̈isany Vavolombelon̈o Jehovah voanalohany ta Curaçao. a Isaka herin̈iandra izy niaraka nianatra Baiboly taminay zanany fo, ndray nisy fotoan̈a zahay tsy nahefa. Tamy zaho 14 taon̈o, zahay nindesiny papako nifindra ta Suriname, fotony mamany efa natoe ke nila fikarakaran̈a.
NAKIRY ZAHO NANAN̈A NAMAN̈A TSARA
Ta Suriname teto, zaho nikamarady tamy tanora nazoto nanompo Jehovah, tan̈aty fiangonan̈a. Iro mbala zokiko hely amy taon̈o salakady pisava lalan̈a maharitry. Hitako iro ravoravo be zay izikoa fa nitantara raha hitandro tamy fanompoan̈a. Izikoa fa rava baka nivory, zahay ndreky ry namako aby io niaraka nikoran̈a fotokevitry arabaiboly. Misy zahay niboaka tantany nisan̈andra lakintan̈a lera nikoran̈a. Iro namako aby io ten̈a nan̈ampy zaho hahay ino raha tiako hatao amy fiain̈ana. Zaho tihan̈ano asany Jehovah. Ke tamy zaho 16 taon̈o zaho natao batisa. Avio tamy zaho 18 taon̈o, zaho nanomboko nan̈ano pisava lalan̈a maharitry.
NISY LESON MARO MAVENTY NIANARAKO
Tamy zaho pisava lalan̈a ta Paramaribo
Maro raha nianarako zaho koa fa nan̈ano pisava lalan̈a. Raha aby zen̈y nan̈ampy zaho tamy fanompoan̈a manontolo andra nataoko. An̈isany leson voanalohany nianarako, ten̈a ilain̈a mampiofan̈a olo. Tamy zaho vo nanomboko nan̈ano pisava lalan̈a, nisy misionera zay ten̈a nan̈ampy zaho. Willem van Seijl an̈arany. b Izy nampianatra zaho fomba han̈anaovan̈a andraikitry an̈aty fiangonan̈a. Mbala tsendriky haiko tamy fotoan̈a zen̈y fa kaiky ilaiko mare raha nampianariny zaho io. Taon̈o nan̈araka izy in̈y baka zaho navoantendry pisava lalan̈a manokan̈a, sady nanomboko tio zaho nan̈ampy antoko pitory mitokan̈a tan̈aty alabeny Suriname. Ravoravo zaho fotony navy tamy fotoan̈a nilavako izy tsarabe fampiofan̈ana nazoko tamy rahalahy aby io! Ke rango tamy zen̈y, nifen̈y koa zaho nanokan̈a fotoan̈a hampiofan̈ana olo, karaha nataondro taminaka.
Leson faharoe nianarako, ten̈a tsara manan̈a fiain̈ana tsotra ndreky mandamindraha tsialohaloha. Isaka nanomboko fanjava, efa nidinihinay roeny pisava lalan̈a namako io ino aby hanin̈y ndreky raha ilainay an̈atiny herin̈iandra vitsivitsy. Baka tio araiky taminay, nandeha firaka tamy kapitaly tan̈y nivanga raha aby io. Nila hainay tsara nitantan̈a vola fan̈ampian̈a nazonay isaka fanjava, ndreky nitsinjara vatsinay baka hahadin̈y firaka farany fanjava. Fotony baka tan̈aty ala tan̈y, vitsy fo izikoa nisy, olo afaka nan̈ampy zahay izikoa lany vatsinay. Rango zaho mbala hely efa nianatra hanan̈a fiain̈ana tsotra ndreky hahay handamindraha. Zaho matoky fa zen̈y nan̈ampy zaho hifantoko tsarabe taminy asany Jehovah firaka amy zioty.
Hitako koa fa misy vokany tsara izikoa olo ampianarin̈y amy fivolan̈anandro. Zen̈y leson fahatelo nazoko. Zaho koa fa nahaibe loso nahay volan̈a holandey, angiley, papiamento. Zaho koa nahay tsara volan̈a sranantongo (na sranan). Izio volan̈a fampiasainolo a Suriname eto. Fa tamy zaho tan̈aty ala tan̈y, hitako fa tianolo nitandren̈y vaovao tsara nitorianay io izikoa fa natao tamy fivolan̈anandro. Kanefa nisy fivolan̈ana sasany hitako ten̈a sarotro, karaha ataony Saramaccan. Amy volan̈a io baka feo manonga mijotso. Fa zaho niezaka fo nianatra izio. Ke ezakanaka zen̈y tsy very borin̈y. Fotony koa fa nandeha taon̈o, loso nahainaro fo olo nampianariko fahamarin̈ana, nohony zaho nahay volan̈andro.
Nisy fotoan̈a zaho voabaraka. Tandraraiky zaho tihan̈ontany pianatra Baiboly mivolan̈a Saramaccan karaha ty: ‘Akory naniny kibonao?’ Kanefa kaiky zaho tafihan̈ontany izy: ‘Mavesatra ma anao?’ Hay be fa nampasanganehan̈a izy raha nivolan̈iko. Disodiso ndraikindraiky raha volan̈iko, fa zaho mbala nifen̈y fo nampiasa volan̈anolo tamy faritany nanendren̈a zaho.
NAHAZO ANDRAIKITRY FAN̈AMPINY
Navoatendry piandraikitry faritry zaho taminy 1970. Tamy taon̈o io zaho nampizaha sary diapositives taminy antoko pitory maromaro, nitokan̈a tan̈aty ala tan̈y. Titranizio: “Alô Hitsidiky Foibeny Vavolombelon̈o Jehovah.” Fa baka avianay tamindro piaramanompo aby tan̈aty ala tan̈y, zaho ndreky rahalahy sasany tsy maintsy niondran̈a lakana namakivaky ten̈arano. Zahay nitondra gropy, zerigany misy esansy, jiro petroly, avio projécteur andifasan̈a sary io. Baka tio zahay koa fa navy tantety, zahay tsy maintsy nitety atiala nilanja entan̈a jiaby in̈y firaka tamy tany handifasan̈a izio. Raha ten̈a tsaroako tamy dia nataonay aby in̈y, farandraha tianolo aby amy toeran̈a mitokan̈a aby io eky programo in̈y. Ravoravo mare zaho nan̈ampy olo hahay momba Jehovah ndreky fandaminan̈anany ambony tany atỳ. Zaho koa fa mahita fa iro olo aby io loso marikitry Jehovah, mahatsiaro ravoravo mare zaho nan̈ano asa mafy aby in̈y.
TADY TELO HOSIN̈Y
Zaho ndreky Ethel nan̈ano mariazy tamy Septambra 1971
Haiko fa noranora taminaka nan̈ano asa nanendren̈a zaho izikoa zaho tsy nanambady. Fa ndray zen̈y, zaho mba nan̈iry hanambady. Ke nivavaka manokan̈a momba zen̈y zaho. Nivavaka zaho baka hahita vady ho ravoravo hanompo manontolo andra miaraka aminaka, sady hahavita hiaritry raha sarotro an̈aty ala an̈y. Kadiriny taon̈o araiky tafaranizen̈y, nanomboko niaraka zahay roeny Ethel, ranabavy pisava lalan̈a manokan̈a sady ten̈a mahafoe ten̈a. Rango mbala hely, farandraha tiany Ethel eky tantarany apostoly Paoly. Ke izy koa mba tihan̈ano erakany vitany amy fanompoan̈a, karaha nataony Paoly. Nan̈ano mariazy zahay taminy 1971, avio zahay fivadiany niaraka nan̈ano asany faritry.
Tsy dia nanandraha fianakavian̈any Ethel, ke tsy sarotro taminany niaraka taminaka nan̈ano asany faritry tan̈aty ala tan̈y. Ohatra ziô, hely fo entan̈a nindesinay zahay koa fa nitsidiky fiangonan̈a tan̈aty ala be tan̈y. Tamy ten̈arano fo zahay niseky ndreky nanasa lamba. Avio zahay tsy niavonkanin̈y. Nihoaninay fo zay raha nalokindro rahalahy ndreky ranabavy aby io, na karazan̈a androngo zen̈y, na laoko piranha, na koa raha hafa nazondro tan̈aty ala na tamy ten̈arano. Koa fa tsisy kapila, zahay nihina tamy raviny katakata. Baka io, koa fa tsisy sotro, zahay nihina tamy tan̈ana. Hitanay roeny Ethel fa loso nahainifandray fo zahay, karaha tady telo hosin̈y in̈y, fotony zahay samby nahafoe ten̈a niaraka nan̈ano asany Jehovah. (Mpito. 4:12) Tsisy raha atakalonay raha aby niain̈anay in̈y!
Tamy zahay baka nitsidiky iro rahalahy aby tan̈aty ala be tan̈y, zahay navoa raha nitantaraiko tamy voanalohany tarỳ in̈y. Koa fa navy tamy rano mahery zahay, tampoko tio, tafilentiky hely tan̈aty rano lakana niondran̈anay. Nakiry izy zahay nan̈ano gilet de sauvetage ndreky tsy latsaka tan̈aty rano. Fa lakananay ndraiky feno rano, ke tsy maintsy narianay hanin̈y tan̈aty boatinay. Boaty io baka tio nan̈arianay rano.
Very aby hanin̈inay jiaby, ke namintan̈a foeky zahay tamy lalan̈a. Fa zahay tsy nahazo raha. Ke zahay nivavaka tamy Jehovah baka izy han̈amia zahay hanin̈y nilainay taminy andra io. Vita vavakanay, natsipiny rahalahy araiky vintan̈anany, ke izy nahazo laoko araiky maventy, nahavoky zahay dimy taminy alin̈y io!
SADY BABA, VADY, AVIO PIANDRAIKITRY FARITRY
Nahazo fitahian̈a tsy nampoizin̈y zahay roeny Ethel, dimy taon̈o tafarany niarahanay nan̈ano asany faritry. Hahazo zanaka zahay! Ravoravo zaho naharen̈y vaovao zen̈y, fa tsy haiko fo ino ho vokatra zen̈y tamy fain̈ananay. Mbala tihanohy hanompo manontolo andra baka zaho ndreky Ethel, izikoa mbala mety. Teraka taminy 1976 i Ethniël zanakanay talan̈olo. Taon̈o aroe sy tapany tafaranizen̈y, zahay niteraka Giovanni zanakanay faharoe.
Mizaha batisa tamy Ten̈aranony Tapanahoni marikitry Godo Holo, amy faritry antin̈ianany Suriname taminy 1983
Vitsy piandraikitry faritry ta Suriname tamy zen̈y, ke nambelany birôny sampan̈a hanohy asany faritry fo zaho ndray zahay nitarimy tsaiky. Tamy zanakanay mbala hely, fiangonan̈a vitsivitsy fo nirahin̈y nitsidihiko. Ke isaka fanjava, herin̈iandra aroe zaho nitsidiky fiangonan̈a, fa ankoatranizen̈y ndraiky zaho nan̈ano pisava lalan̈a tamy fiangonan̈a nanendren̈a zahay. Niaraka taminaka Ethel ndreky iro zanakanay aroe lahy, izikoa tsy lavitry fiangonan̈a nitsidihiko. Nandeha manokana ndraiky zaho izikoa tan̈aty ala tan̈y zaho nitsidiky fiangonan̈a ndreky nan̈ano fivoriambe.
Zaho matetiky nandeha lakana lera nitsidiky fiangonan̈a tamy toeran̈a mitokana, tamy zaho nan̈ano asany faritry
Tsy maintsy nahay nandamindraha zaho baka ho vitako tsara andraikitrinaka jiaby. Nataoko azo antoko fa nan̈ano fianarampianakavian̈a fo zahay isaka herin̈iandra. Izikoa zaho fa nandeha nitsidiky fiangonan̈a tan̈aty ala tan̈y, Ethel nitariky fianarampianakavian̈a niaraka tamindro zanakanay aby io. Nan̈ano raha niaraka fo zahay izikoa mbala nety. Matetiky zahay roeny Ethel nan̈ano fangalan̈a diandian̈a niaraka tamindro tsaiky aby io. Misy zahay niaraka nisoma na koa nandeha niboaboaka. Matetiky koa zaho tara nandry izikoa fa nan̈oman̈a anjaranaka. Ethel ten̈a vady tsara, karaha raha koran̈iny Ohabolana 31:15. Nifoha man̈ena akoho izy, nikarakara hanin̈inay baka zahay afaka niaraka nan̈ano teny vakina ndreky niaraka nihina maraindrain̈y, talohany zanakanay nandeha lekoly. Tsy basinizen̈y, fa tio fo izy nan̈ampy zaho baka ho vitako tsarabe andraikitry jiaby namezany Jehovah zaho. Haravoan̈a ninaka nahazo vady mahafoe ten̈a karaha izy!
Nifen̈y mare zahay fivadiany nan̈ampy zanakanay aroe lahy io ho tia Jehovah ndreky ho tia manompo. Ten̈a tianay izikoa iro mifidy hanompo manontolo andra. Tianay izikoa tsy nohony zahay nandrisiky iro han̈anaovandro zen̈y, fa nohony safidindro tompiny. Nikoran̈inay matetiky tamindro fa ten̈a mamparavoravo manompo manontolo andra. Nikoran̈inay tamindro koa raha sarotro hitanay, fa raha ten̈a nikoran̈inay fomba nan̈ampiany Jehovah zahay ndreky nitahiany zahay tran̈o araiky. Nalainay antoko koa fa zanakanay aby io nikamarady taminolo man̈ano fanompoan̈a Jehovah amy toeran̈a voanalohany.
Jehovah nan̈amia zahay raha jiaby nilainay tamy zahay nitarimy zanakanay. Mazava ho azy, fa zaho koa nan̈ano erakany vitako namelon̈o fianakavian̈anaka. Nan̈ampy zaho hahay hitsinjo ny amaray raha niain̈ako tan̈aty ala tan̈y, tamy zaho mbala pisava lalan̈a manokana ndreky mbala tsy nanambady. Kanefa ndraikindraiky, ndray nifen̈y karakory zahay, mbala tsy ampy fo raha tampelantan̈ananay. Fa Jehovah nan̈ampy zahay fo, tamy fotoan̈a karaha zen̈y. Nisy korontan̈a, ohatra, ta Suriname teto tamy faramparany iro taon̈o 1980 tan̈y, firaka tamy voalohandohany iro taon̈o 1990 tan̈y. Ten̈a sarotro nahazo raha nilain̈a andavanandra tamy fotoan̈a aby zen̈y. Fa ndray zen̈y, Jehovah nan̈amia raha nilainay fo.—Mat. 6:32.
KOA FA MANDINIKY RAHA NIAIN̈AKO
Baka ankavia mandeha ankavanan̈a: Miaraka aminy Ethel vadiko
Ethniël zanakanay talan̈olo ndreky Natalie vadiny
Giovanni zanakanay ndreky Christal vadiny
Nikarakara zahay fo Jehovah rango zay, sady nan̈ampy zahay ho sambatra ndreky ho afapô. Ten̈a fitahian̈a mare taminay zanakanay aby io, avio tombontsoa oe nan̈ampy iro hanompo Jehovah. Farandraha ravoravo eky zahay fotony iro koa nifidy hanompo manontolo andra! Samy efa nahazo diplomy tamy sekoly arabaiboly i Ethniël ndreky Giovanni. Zioty, samy manompo amy birôny sampan̈any Suriname iro roe lahy miaraka amy vadindro.
Efa matoe mare zahay roeny Ethel amy zioty, fa mbala be atao aminy asany Jehovah fo fotony zahay pisava lalan̈a manokana. Ten̈a maro raha atao zahay, ke mbala mitady fotoan̈a hianaran̈a milomaon̈o fo zaho firaka amy zioty! Fa tsisy raha nanin̈enako ndraiky. Ke zaho koa fa mandiniky fiain̈ananaka, tsapako fa fanapahankevitry nataoko tamy zaho mbala tanora in̈y, an̈isany fanapahankevitry farany tsara nataoko. Tsy ino zen̈y fa nifidy hanompo manontolo andra.
b Tantarampiain̈anany Willem van Seijl, “Mihoatra Noho Izay Nantenaiko ny Zava-misy” naboaka tamy Mifohaza! 8 Oktobra 1999.