1. Nan̈ino ho sambatra atsika izikoa “mahatsiaro fa mila Zan̈ahary”?

 TEN̈A hasambaran̈a zen̈y tsy raha fihetsehampo mielan̈a fo, fa mahadin̈y ela. Amy fomba karakory? Tamy Toriteninany Tan̈abo Bongo in̈y Jesosy nivolan̈a: “Sambatra lan̈iany mahatsiaro fa mila Zan̈ahary.” (Mat. 5:3) Hainy Jesosy fa atsika olombelon̈o niforon̈iny Jehovah han̈iry mare hahay ndreky hanompo Zan̈ahary niasa atsika. Jehovah lasitio “Zan̈ahary sambatra”, ke lan̈iany olo manompo izy afaka ho sambatra koa.​—1 Tim. 1:11, l.p.a.

2-3. a) Azovy koa volan̈iny Jesosy afaka ho sambatra? b) Ino raha hidinihintsika amy lahatsoratra ty ato, avio nan̈ino raha zen̈y ilain̈y?

² Mila tsisy problemo foeky ma atsika zay vo sambatra? Ehe. Maharikian̈a raha nivolan̈iny Jesosy, tamy toriteninany in̈y. Izy baka nivolan̈a fa ndray olo “malahelo” afaka ho sambatra fo. Malahelo amy nino ma izio? Mety malahelo aminy hadisovan̈a vitandro, na koa iro mety miatriky raha sarotro. Jesosy koa nivolan̈a fa afaka ho sambatra firaka aminolo “ampijalinolo baka amy fahamarin̈ana”, na olo mijaly fotony “ankaratsianolo” noho izy pan̈aradia Kristy. (Mat. 5:4, 10, 11) Akory mety hampasambatra olo miatriky raha karaha zen̈y?

³ Jesosy nampianatra fa tsy miambin̈y efa mandeha mahitsy raha jiaby amy fiain̈anantsika zay atsika vo ho sambatra. Fa atsika ho sambatra izikoa mahatsapa fa mila Zan̈ahary, avio mifandray marikitry aminany. (Jak. 4:8) Amy lahatsoratra  ty, atsika handiniky raha telo mila ataontsika baka atsika ho sambatra tsarabe.

4. Ino raha voanalohany mila ataontsika izikoa tiantsika ho sambatra ankitin̈y? (Salamo 1:1-3)

⁴ RAHA 1: Izikoa atsika tiho sambatra ankitin̈y, atsika mila mamaky ndreky mianatra Baiboly. Volan̈a Zan̈ahary io nampitovisiny Jesosy taminy hanin̈y. Na olo na biby, samby mila mihinankanin̈y baka ho velon̈o. Fa olombelon̈o zaraiky fo ndraiky afaka mamaky Volan̈a Zan̈ahary. Sady ten̈a ilaindro man̈ano raha zen̈y. Zen̈y nahavy Jesosy nivolan̈a: “Tsy mofo fo tsy maintsy ivilomanolo, fa volan̈a jiaby baka amy vavany Jehovah.” (Mat. 4:4) Ke tsy tokony hisy nata andra araiky tsy hamakiantsika Volan̈a Zan̈ahary. Karaha ty baka nivolan̈iny pan̈ano salamo: ‘Sambatra olo tia lalàn̈any Jehovah, ke lalàn̈anany io vakiny matsan̈a alin̈y.’​—Vakia Salamo 1:1-3.

5-6. a) Ino aby raha ianarantsika amy Baiboly ao? b) Nan̈ino man̈ampy atsika mamaky Baiboly?

⁵ Tiany Jehovah mare atsika, ke nambarany atsika amy Baiboly ao raha mila ataontsika baka ho sambatra amy fiain̈ana. Hitantsika ao ino antony niasany atsika. Ao koa hahaizantsika akory hahafahantsika mifandray aminany ndreky mahazo familankeloko. Hitantsika amy Baiboly ao koa fa misy raha tsara hampan̈antinainy Zan̈ahary atsika aminy hoavy. (Jer. 29:11) Ke iro fahamarin̈ana aby ianarantsika amy Baiboly io, mahavy atsika ravoravo mare!

⁶ Haintsika koa fa amy Baiboly ao feno torohevitry mety harehan̈a amy fiain̈ana andavanandra. Ke ho sambatra atsika  izikoa man̈araka iro io. Lera anao kivy amy problemo mandalo amy fiain̈ananao, mangalà fotoan̈a hamakian̈a tsarabe ndreky hisaintsain̈ana Volan̈any Zan̈ahary. Jesosy nivolan̈a: “Zay olo mitandren̈y volan̈a Zan̈ahary, ke mitandrin̈y zen̈y fo sambatra!”​—Lioka 11:28.

7. Akory hazahoanao hatsaran̈a lera anao mamaky Baiboly?

⁷ Lera anao mamaky Baiboly, mangalà fotoan̈a hankafizan̈a tsarabe raha vakianao. Ty baka misy ohatra: Mety efa navy nisy fotoan̈a, nisy olo nandoky hanin̈y ten̈a tianao. Fa anao taminio mety mekimeky na varian̈a fotony nisy raha hafa nandihanany jerinao, ke nanelintelin̈y fo anao fa tsy ten̈a nangala hafizany raha nihoaninao. Lera lany izio, anao vo tontohitry fa nalaky loatra nihinananao izy tio in̈y. Sitrany izin̈y, ho anao, najotso moramora, karaha io mba ren̈y tsara sirony. Mety karaha zen̈y koa ataontsika lera mamaky Baiboly. Ndraikindraiky, atsika mety hamaky malakilaky fo fa tsy ten̈a mankafy hafatra an̈atinizio ao. Ke akory fo basy tokony hatao? Mangalà fotoan̈a hankafizan̈a raha vakianao. Aleva sary antsain̈y raha tantarainy ndreky feonolo na feondraha aby ao, avio diniha raha baka nivakianao. Izikoa anao man̈ano zen̈y, anao hahaiho ravoravo fo.

8. Akory hankifany “panompo atokisan̈a ndreky mahadiniky raha” andraikitry nankin̈iny taminany? (Zahava koa lamariky amy pazy ambany.)

⁸ Voakarakara tsarabe atsika amy lafiny arapan̈ahy fotony Jesosy efa nanendry “panompo atokisan̈a ndreky mahadiniky raha” han̈amia hanin̈y arapan̈ahy amy fotoan̈a mety. b (Mat. 24:45) Hanin̈y arapan̈ahy jiaby aboakany panompo atokisan̈a io ahitan̈a volan̈a Zan̈ahary. (1 Tes. 2:13) Ke zen̈y man̈ampy atsika hahay fomba fihevitriny Jehovah ambarany an̈aty Baiboly ao. Zen̈y mahavy atsika mamaky Tilikambo Fiambesan̈a ndreky Mifohaza!, avio lahatsoratra amy jw.org. Oman̈intsika tsarabe koa fivorian̈a andavanandra ndreky amy farany herin̈iandra. Izikoa fa miboaka Tele JW isaka fanjava, mazoto atsika mizaha. Izikoa atsika mamaky ndreky mianatra Baiboly, ho vitantsika edy han̈ano raha faharoe tsy maintsy hatao baka atsika ho ten̈a sambatra.

9. Ino raha faharoe mila ataontsika izikoa tiantsika ho sambatra ankitin̈y?

⁹ RAHA 2: Izikoa atsika tiho sambatra ankitin̈y, atsika mila man̈araka fitsipiky Jehovah. Pan̈ano salamo nivolan̈a: “Sambatra lan̈iany olo mavozo Jehovah ndreky mandeha amy lalan̈anany.” (Sal. 128:1) Olo mavozo Jehovah zen̈y man̈aja izy farany mare ke tsy man̈ano raha halany foeky. (Ohab. 16:6) Efa ambarany atsika amy Baiboly ao fitsipikinany momba ny tsara ndreky ratsy. Ke mifen̈y mare atsika man̈araka izio. (2 Kor. 7:1) Ho sambatra atsika izikoa man̈ano raha tiany Jehovah avio tsy man̈ano raha halany.​—Sal. 37:27; 97:10; Rom. 12:9.

10. Izikoa zahan̈a Romanina 12:2, ino raha mila ataontsika?

¹⁰ Vakia Romanina 12:2. Efa mahampy ma mahay fa Jehovah manan̈a fahifan̈a hamaritry ny tsara ndreky ratsy? Ehe. Atsika mila tapakevitry han̈araka fitsipikinany koa. Atsika baka hangala ohatra. Mety efa hainolo araiky ziô fa fanjakan̈a manan̈a fahifan̈a hamaritry firy tokony farany mare halirany tomabily mandeha amy lalan̈a araiky. Fa ndray hainy zen̈y, izy mety tsy tapakevitry han̈araka izio. Ke dianany mbala riatany mare mihoatrany  tokony ho izy. Karaha zen̈y koa, hita amy fitondranten̈antsika izikoa atsika mino tsarabe fa mahatsara atsika ankitin̈y man̈araka fitsipiky Jehovah. (Ohab. 12:28) Davida nahatsapa fa ten̈a mahatsara izy man̈araka fitsipiky Jehovah, ke hoizy tamy Jehovah: “Hambaranao zaho lalan̈any fiain̈ana. Man̈oloan̈a anao iô mamparavoravo mare; ankavanan̈anao iô misy hasambaran̈a mandrakizay.”​—Sal. 16:11.

11-12. a) Ino raha mila tandremantsika, lera atsika miasaloha na kivy? b) Nan̈ino Filipianina 4:8 man̈ampy atsika hifidy fangalan̈a diandian̈a?

¹¹ Lera atsika miasaloha na kivy mare, tiantsika han̈ano raha han̈ampy atsika han̈adin̈adin̈a asalohantsika. Atsika tsy diso koa man̈ano zen̈y. Fa mila mitandrin̈y tsarabe fo atsika tsao tafan̈ano raha tsy tiany Jehovah.​—Efes. 5:10-12, 15-17.

¹² Tamy taratasy nalefany apostoly Paoly tamindro Filipianin̈y aby io, izy nandrisiky Kristianin̈y tsy voly hieritreritry raha ‘marin̈y, madio, mampisy fitiavan̈a, avio misy hatsaran̈a.’ (Vakia Filipianina 4:8.) Marin̈y ndraiky fa raha nikoran̈iny io tsy resaka fangalan̈a diandian̈a. Fa ndray zen̈y, izio afaka man̈ampy atsika hahay hifidy fangalan̈a diandian̈a. An̈ohara hely baka ty: Zay volan̈a “na ino na ino” aminy andininy io soloa “hira”, “filma”, “boky”, na “jeux video.” Anao koa man̈ano zen̈y, ho hainao han̈avaka ino fangalan̈a diandian̈a ikeny Jehovah, ndreky tsy ikeny. Nan̈ino ma atsika tokony han̈ano zen̈y? Fotony atsika tihiain̈y mifan̈araka amy fitsipikinany. Ninany baka ny farany an̈abo. (Salamo 119:1-3) Tsy zen̈y fo, fan̈anaovantsika zen̈y hampilamin̈y eritreritrintsika, avio ho moramora amintsika han̈ano raha araiky fahatelo hahavy atsika ho ten̈a sambatra.​—Asa. 23:1.

13. Ino raha fahatelo han̈ampy atsika hahita ten̈a hasambaran̈a? (Jaona 4:23, 24)

¹³ RAHA 3: Ataova amy toeran̈a voanalohany amy fiain̈ananao fo fanompoan̈a Jehovah. Jehovah baka niasa atsika, ke izy zaraiky fo vain̈y tompoentsika. (Apok. 4:11; 14:6, 7) Fanompoan̈a Jehovah tokony ho raha farany maventy amy fiain̈anantsika. Ary raha zen̈y mila ataontsika erakany itiavany izy, “eraka fan̈ahy ndreky fahamarin̈ana.” (Vakia Jaona 4:23, 24.) Fan̈ahy masin̈iny Zan̈ahary tiantsika mitaridalan̈a atsika, amy zen̈y fanompoan̈a ataontsika hifan̈araka amy fahamarin̈ana amy Baiboly. Atsika nata mipetraka amy tany mandrova na manakantsakan̈a asantsika, mbala fanompoan̈a Jehovah fo tokony hataontsika amy toeran̈a voanalohany. Amy zioty, mandilatra 100 rahalahy ndreky anabavy migadra, fotony iro Vavolombelon̈o Jehovah. c Fa ndray zen̈y, iro mbala ravoravo fo man̈ano erakany vitandro mivavaka, mianatra avio mikoran̈a aminolo raha momba Zan̈ahary ndreky Fanjakan̈anany. Ke nata atsika hankaratsianolo na hinjehin̈y, atsika mbala ravoravo fo. Haintsika baka fa Jehovah iô fo han̈ampy atsika, sady han̈amia atsika hatsaran̈a.​—Jak. 1:12; 1 Pet. 4:14.

14. Ino raha navoa rahalahy tanora araiky baka Tadjikistan, avio nan̈ino?

¹⁴ Misy rahalahy ndreky ranabavintsika sasany niatriky raha ten̈a sarotro. Fa ndray zen̈y, iro mbala mahatsiaro sambatra fo fotony iro nan̈ano raha telo nikoran̈intsika tio aby in̈y. Diniha hely baka raha nahazo Jovidon Bobojonov nohony izy tsy nan̈eky nan̈ano  maramila. Izio rahalahy araiky 19 taon̈o, baka Tadjikistan. Taminy 4 Oktobra 2019, nalain̈a forse baka tantran̈onany izy, baka io nigadrain̈a tan̈atiny fanjava maromaro. Izy nataondro mira olo pamono olo in̈y. Raha tsy rariny navoa izy io niboaka tamy vaovao tamy tany maro. Nivolan̈indro taminizio tao fa rahalahy io nibomaboman̈a mare baka izy han̈eky han̈ano voadiny maramila ndreky hisikiny lambany maramila. Tafaranizen̈y, izy navoaheloko tamy fitsaran̈a, ke nigadrain̈y firaka tamy fotoan̈a nan̈amezany prezidan tamy tany io beko hamotsoran̈a izy. Tan̈aty fotoan̈a jiaby zen̈y, Jovidon tsy nivadiky foeky sady mbala ravoravo fo. Nan̈ino? Fotony izy tsiary nan̈ambela raha arapan̈ahy.

15. Akory fomba nazahoany Jovidon hanin̈y arapan̈ahy, taminizy nigadra?

¹⁵ Tsisy Baiboly na boky ndreky gazety tamy Jovidon, taminizy nigadra tamy prizon tan̈y. Fa ndray zen̈y, izy mbala nianatra raha momba Jehovah fo. Karakory eky nataony? Piaramanompo tamy toeran̈a io koa fa nan̈atriky hanin̈inany, nisoratindro tamy sase nisy izio andininteny amy teny vakina. Ke izy nahavita namaky ndreky nisaintsain̈y Baiboly fo isanandra. Izikoa izy fa nafaka gadra, ty torohevitry namezany olo mbala tsendriky niatriky  fitsapan̈a sarotro: “Araraota anao ziô mbala libra io ke mamakia Volan̈a Zan̈ahary, boky ndreky gazety, baka hahaizanao raha maro momba Jehovah. Ten̈a ilain̈y fan̈anaovan̈a raha zen̈y.”

16. Ino raha nifantohany Jovidon?

¹⁶ Nan̈araka fitsipiky Jehovah tamy fiain̈ananany rahalahintsika io. Izy tsy nan̈eky ho resiny fan̈irian̈a ratsy ndreky tsy nan̈ano raha ratsy foeky. Nifantoko tamy Jehovah fo izy, ke raha tiany Jehovah fo nataony. Tiany Jovidon mare nandiniky raha niasainy Jehovah. Isaka marandrain̈y, izy nitandren̈y voron̈o mihirahira. Koa fa alin̈y, rikian̈a izy nizaha fanjava ndreky lakintan̈a. Hoizy: “Mamparavoravo ndreky mankahery zaho iro kadô aby baka amy Jehovah io.” Hahatsiaro ravoravo atsika izikoa mahay mankasitraka iro fampianaran̈a baka amy Jehovah ndreky raha jiaby namezany atsika. Ke haravoan̈a zen̈y han̈ampy atsika hahavita hiaritry izikoa fa misy raha sarotro.

17. Izikoa atsika tojy problemo miramiran̈a amy niny Jovidon io, ino vokany atsika koa miaritry fo? (1 Petera 1:6, 7)

¹⁷ Jovidon koa nan̈ano fanompoan̈a Jehovah tamy toeran̈a voanalohany. Hainy fa ten̈a raha maventy mifen̈y fo tsy mivadiky amy Zan̈ahary. Jesosy nivolan̈a: “Anao tsy maintsy mankohoko amy Jehovah Zan̈aharinao zaraiky fo, baka io izy zaraiky fo tsy maintsy an̈anaovanao fanompoan̈a masin̈y.” (Lioka 4:8) Tiandro maramila aby io ndreky sefondro hiala amy fivavahan̈anany Jovidon, fa izy tsy nety. Izy nivavaka mare matsan̈a alin̈y, nangataka tamy Jehovah han̈ampy izy tsy hivadiky. Ke ndray tio raha tsy rariny nahazo izy, Jovidon tsy nivadiky foeky. Ino vokany? Amy zioty, ravoravo mare izy fotony loso fatatra tsarabe finoan̈anany, fotony efa nandalo fitsapan̈a. Tsy karaha zen̈y baka finoan̈anany talohanizy nalaindro maramila aby io forse, ndreky nibomabomandro avio nigadraindro.​—Vakia 1 Petera 1:6, 7.

18. Ino raha han̈ampy atsika hahatsiaro sambatra fo?

¹⁸ Hainy Jehovah ino raha ten̈a mampasambatra atsika. Izikoa arehanao raha telo man̈ampy atsika ho ten̈a sambatra in̈y, anao hahatsiaro sambatra fo nata misy raha manahiran̈a. Ke anao koa afaka hivolan̈a karaha ty: “Sambatra vahoaka manan̈a Jehovah ataony Zan̈aharinany!”​—Sal. 144:15.