1. Ino fan̈antinan̈a namiany Jehovah atsika?

 ATSIKA namiany Jehovah fan̈antinan̈a hiain̈y tsisy farany. Sasany amintsika man̈anten̈a ho loso zavaboary arapan̈ahy tsy mety maty, ke hiain̈y mandrakizay andan̈itry an̈y. (1 Kor. 15:50, 53) Fa ankamarozantsika ndraiky man̈anten̈a ho salama tsara ndreky hiadan̈a mandrakizay ambony tany eto. (Apok. 21:3, 4) Na atsika man̈anten̈a hiain̈y mandrakizay andan̈itry an̈y na ambony tany eto, maventy amintsika fan̈antinan̈antsika.

2. Miorin̈y aminino ma fan̈antinan̈antsika, avio nan̈ino atsika mivolan̈a zen̈y?

² Dikany “fan̈antinan̈a” zen̈y amy Baiboly ao, “fiambesan̈a mare raha tsara ho avy.” Azo antoko fan̈antinan̈antsika fotony baka amy Jehovah. (Rom. 15:13) Haintsika raha nampan̈antinainy. Haintsika koa fa izy tsiary ndraiky tsy nitana volan̈anany. (Nom. 23:19) Atsika matoky fa Jehovah tihan̈atanteraka zay raha nivolan̈iny, avio manan̈a angovo han̈anaovan̈a zen̈y. Dikanizen̈y, fan̈antinan̈antsika io tsy raha nofinofy na fan̈irian̈antsika fo, fa izio miorin̈y amy raha ten̈a misy.

3. Ino aby raha hidinihintsika amy lahatsoratra ty? (Salamo 27:14)

³ Ten̈a tia atsika Babantsika andan̈itry an̈y, ke tiany atsika hatoky izy. (Vakia Salamo 27:14.) Izikoa atsika man̈anten̈a mare Jehovah, atsika hahavita hiaritry fitsapan̈a. Tsy vitanizen̈y fo fa hanan̈a korazy koa atsika, sady ho ravoravo fo ndray ino raha miboaka. Ke alô atsika handiniky nan̈ino fan̈antinan̈a io miaro atsika. Fa alohany zen̈y, hizahavantsika antsendriky nan̈ino fan̈antinan̈a io ampiran̈iny amy vatofantsiky ndreky amy raha fiarovan̈a loha. Hikoran̈intsika koa akory hahavy fan̈antinan̈antsika ho fatatra tsarabe.

4. Nan̈ino ma fan̈antinan̈a io miran̈a amy vatofantsiky? (Hebreo 6:19)

⁴ Tamy taratasy nalefany apostoly Paoly taminy Hebreo, nampiran̈iny tamy vatofantsiky fan̈antinan̈antsika io. (Vakia Hebreo  6:19.) Efa matetiky baka Paoly niondran̈a sambo, ke hainy tsarabe fa vatofantsiky io misakana sambo tsy hindesindrano ndreky tsiko. Tandraraiky tamy dia nataony, nisy tsiko mare tandranomasin̈y. Hitany Paoly iro piasany sambo io nandatsaka vatofantsiky hisakanan̈a sambo io tsy hikon̈o amy vato. (Asa. 27:29, 39-41) Fan̈antinan̈antsika io koa mira vatofantsiky mitana sambo tsy hihetsiketsiky. Izio man̈ampy atsika hifandray marikitry amy Jehovah fo. Ke lera atsika tojy problemo mira andra ratsy, atsika tsy ho voatariky hiala aminany. Tsy taitaitry koa atsika fotony atsika matoky fa andra ratsy mbala hisava. Aleva onon̈o fa Jesosy efa nivolan̈a fa hisy olo han̈enjiky atsika. (Jaona 15:20) Ke hahavita hanompo Jehovah fo atsika izikoa misaintsain̈y hatsaran̈a nampan̈antinainy atsika.

5. Nan̈ino fan̈antinan̈a io nan̈ampy Jesosy lera izy handeha hofoaty?

⁵ Diniha baka amy karakory fan̈antinan̈a io nan̈ampy Jesosy hahavita tsy hivadiky foeky, ndray efa hainy fa hangirifiry aminany mare fomba hifatesany. Taminy andrany Pantekoty taon̈o 33, apostoly Petera nivolan̈a faminanian̈a araiky baka tamy bokiny Salamo tao. Izio man̈aboaka tsarabe fatokisan̈a nanan̈any Jesosy, salakady izy tsy taitaitry foeky. Hoizy: ‘Han̈anten̈a fo zaho, fotony zaho tsy hambelanao hidoko amy Fasan̈a ao, sady panomponao tsy mivadiky tsy mety hambelanao ho lo. ... Hataonao ravoravo mare zaho man̈oloan̈a anao.’ (Asa. 2:25-28; Sal. 16:8-11) Efa hainy Jesosy fa izy hofoaty, fa ndray zen̈y, izy nan̈anten̈a mare fa Zan̈ahary mbala hamelon̈o izy ndraiky. Ke hainy fa izy ho ravoravo mare fotony izy hiaraka ndraiky amy Babany andan̈itry an̈y.​—Heb. 12:2, 3.

6. Ino raha nivolan̈iny rahalahy araiky momba fan̈antinan̈a?

⁶ Efa maro rahalahy ndreky anabavy nahavita niaritry fotony iro nanan̈a fan̈antinan̈a. Ohatra amy zen̈y, Leonard Chinn, rahalahy tsy nivadiky nipetraka tan Angletera. Taminy Ady Lehibe I, izy nigadrain̈a fotony tsy nan̈eky han̈ano maramila. Natokan̈a toeran̈a izy tan̈aty fanjava aroe. Baka io izy nampan̈anaovin̈y asa anterivozon̈o. Karaha ty raha nisoratiny tafara tatỳ: “Baka tamy raha niain̈ako in̈y nahitako fa fan̈antinan̈a io ten̈a man̈ampy atsika hahavita hiaritry. Modeliny Jesosy ndreky apostoly aby io, avio paminan̈y aby in̈y man̈ampy atsika ho be fan̈antinan̈a ndreky hanan̈a angovo hiaretan̈a. Mbala iô koa iro fampan̈antinan̈a maro tsara an̈aty Baiboly ao.” Ke karaha tamy Leonard, mety ataontsika vatofantsiky koa fan̈antinan̈a io.

7. Nan̈ino mahaifatatra fo fan̈antinan̈antsika izikoa atsika fa mandalo fitsapan̈a? (Romanina 5:3-5; Jakoba 1:12)

⁷ Lera atsika miaritry fitsapan̈a, atsika mahita karakory ataony Jehovah man̈ampy atsika. Loso tsapantsika koa fa atsika hankasitrahiny, ke mahaimatoky raha ampan̈antinainy fo atsika. (Vakia Romanina 5:3-5; Jakoba 1:12.) Ke fan̈antinan̈antsika loso fatatra tsarabe mandilatra tamy fotoan̈any atsika vo nan̈eky vaovao tsara. Fitsapan̈a aby io tiany Satana hampakivy atsika. Kanefa ho vitantsika fo handresy iro io fotony Jehovah man̈ampy atsika.

8. Nan̈ino fan̈antinan̈a io mitovy amy raha fiarovan̈a loha? (1 Tesalonianina 5:8)

⁸ Fan̈antinan̈antsika io koa ampitovisiny Baiboly amy raha fiarovan̈a loha. (Vakia 1 Tesalonianina 5:8.) Misatroko raha fiarovan̈a loha, ohatra, maramila amy zen̈y lohanany tsy avoany fahavalo. Manan̈a fahavalo koa atsika, tsy azovy fa Satana. Maro fakampan̈ahy ndreky hevitry diso haparitany misy handrobatan̈a toetsain̈intsika. Ke mila arovantsika tsarabe eritreritrintsika baka tsy ho azony. Karaha raha fiarovan̈a loha mahavita miaro lohany  maramila, fan̈antinan̈antsika io koa miaro eritreritrintsika. Ke manjary vitantsika fo tsy mivadiky amy Jehovah.

9. Ino vokany izikoa olo tsy manan̈a fan̈antinan̈a?

⁹ Man̈anten̈a hiain̈y mandrakizay atsika. Fan̈antinan̈antsika zen̈y han̈ampy atsika han̈ano safidy tsara. Fa ino ndraiky vokany izikoa mihen̈y fan̈antinan̈antsika, ke manjary raha tiantsika fo mitana jerintsika? Mety ho adin̈antsika fan̈antinan̈antsika hiain̈y mandrakizay. Aleva onon̈o baka Kristianin̈y sasany ta Korinto. Iro loso tsy nino fampan̈antinan̈any Zan̈ahary momba fitsanganan̈a amy maty, kanefa raha zen̈y ten̈a matomboko. (1 Kor. 15:12) Paoly nivolan̈a fa lan̈iany olo tsy mino fitsanganan̈a amy maty, man̈ano raha metimety aminy ain̈inany tompiny fo. (1 Kor. 15:32) Amy zioty koa, maro olo tsy mino fampan̈antinan̈any Zan̈ahary, ke iro mifen̈y angovo jiaby man̈ano raha hampatsaratsara fiain̈anandro. Fa atsika ndraiky tsy karaha zen̈y. Atsika matoky fiain̈ana ampan̈antinainy Zan̈ahary aminy amaray. Mira raha fiarovan̈a loha in̈y fo fan̈antinan̈antsika, ke izio miaro jerintsika sady man̈ampy atsika tsy han̈ano zay raha tiantsika fo. Ho robaka baka fifandraisan̈antsika amy Jehovah izikoa atsika man̈ano zen̈y.​—1 Kor. 15:33, 34.

10. Nan̈ino fan̈antinan̈a io miaro atsika aminy eritreritry diso?

¹⁰ Fan̈antinan̈antsika io koa miaro atsika tsy hieritreritry fa tsy ho vitantsika foeky hamparavoravo Jehovah. Misy olo ziô mivolan̈a karaha ty: ‘Zaho baka tsy mety hahazo fiainan̈a mandrakizay zen̈y. Koa zaho edy tsy posibla! Fotony tsisy lera hahavitako han̈ano sitrapony Zan̈ahary.’ Tsarova fa miramiran̈a amy zen̈y raha nivolan̈iny Elifaza koa izy fa nan̈ano nampahery Joba. Izy nivolan̈a: ‘Ino ma olombelon̈o mety maty ke hadio?’ Karaha ty koa raha nivolan̈iny momba Zan̈ahary: ‘Zahava fa ndray anjelinany fo tsy atokisany, ary nata lan̈itry mbala hitany tsy madio fo.’ (Joba 15:14, 15) Vandy tsisy bebeny zen̈y! Aza adin̈a fa tiany Satana anao hieritreritry karaha zen̈y. Efa hainy baka fa izikoa tsy miala amy jerinao ao raha karaha zen̈y, hihen̈y fan̈antinan̈anao. Ke aza mino vandy karaha zen̈y; mifantoha fo amy fampan̈antinan̈any Jehovah. Matokisa fa anao tiany Jehovah hiain̈y mandrakizay, ary mbala hampiany koa anao hahazo zen̈y.​—1 Tim. 2:3, 4.

11. Nan̈ino atsika tokony haharidraha parapaviany fotoan̈a han̈atantirahany Jehovah fampan̈antinan̈anany?

¹¹ Izio ma mora fo mitana fan̈antinan̈antsika tsy hihen̈y? Ehe. Mety hisy fotoan̈a baka hitantsika ela Zan̈ahary vo man̈atanteraka volan̈anany. Ny raha misy baka, Zan̈ahary efa nisy letrizay. Ke mety betibetiky fo fahitany raha araiky, kanefa ela be fahitantsika izy. (2 Pet. 3:8, 9) Fampan̈antinan̈anany tsy maintsy hitantirahiny amy fomba ten̈a tsara, fa izy fo mety tsy amy fotoan̈a iritriretintsika. Ke ino han̈ampy atsika hitana fan̈antinan̈antsika tsy hihen̈y parapaviany zen̈y?​—Jak. 5:7, 8.

12. Izikoa zahan̈a Hebreo 11:1, 6, ino ma ifandraisany fan̈antinan̈a ndreky finoan̈a?

¹² Tsy hihen̈y foeky fan̈antinan̈antsika, izikoa atsika mifandray marikitry amy Jehovah fo. Izy baka han̈atanteraka fan̈antinan̈antsika. Baka atsika hanan̈a fan̈antinan̈a fo, atsika mila mino fa misy Jehovah, avio izy “pamaly hatsaran̈a zay olo mitady izy mare”, eraka raha koran̈iny Baiboly. (Vakia Hebreo 11:1, 6.) Ke arakaraka inoantsika fa misy ankitin̈y Jehovah, hahaihatoky fo atsika fa izy han̈atanteraka raha jiaby nampan̈antinainy. Alô atsika handiniky raha sasany han̈ampy atsika hifandray tsarabe amy Jehovah, amy zen̈y tsy hihen̈y fan̈antinan̈antsika.

13. Ino han̈ampy atsika hifandray marikitry amy Zan̈ahary?

 ¹³ Mivavaha amy Jehovah avio vakia Volan̈anany. Ndray atsika tsy afaka mahita Jehovah, atsika afaka mifandray marikitry aminany. Atsika afaka mikoran̈a aminany amy vavaka, sady matoky fa izy hitandren̈y atsika. (Jer. 29:11, 12) Mitandren̈y Zan̈ahary ndraiky atsika izikoa mamaky Volan̈anany ndreky misaintsain̈y raha baka nivakiantsika. Hahaihatoky raha ampan̈antinainy Jehovah fo atsika izikoa mahita karakory nataony nikarakara olo tsy nivadiky tantarainy Baiboly. Raha jiaby amy Volan̈a Zan̈ahary ao, “nisoratin̈y baka hampianaran̈a atsika. Amy zen̈y atsika hanan̈a fan̈antinan̈a, fotony Soratra Masin̈y io man̈ampy atsika hiaritry sady man̈amia fankahirezan̈a atsika.”​—Rom. 15:4.

14. Nan̈ino atsika tokony hisaintsain̈y raha nataony Jehovah taminolo hafa?

¹⁴ Saintsain̈a akory nataony Jehovah nan̈atanteraka volan̈anany. Iritrireta raha nataony taminy Abrahama ndreky Saraha. Efa matoe mare iro, ke efa tsy afaka niteraka. Kanefa Zan̈ahary nampan̈anten̈a fa iro mbala hiteraka. (Gen. 18:10) Ke karakory nataony Abrahama koa fa naharen̈y zen̈y? Karaha ty volan̈iny Baiboly: ‘Izy nino fa izy hanjary babany firenena maro.’ (Rom. 4:18) Ndray tsy hainy Abrahama akory hampatanteraka raha nivolan̈iny Zan̈ahary, izy natoky fo fa Jehovah tsy maintsy han̈atanteraka fampan̈antinan̈anany. Ke tsy diso fan̈antinan̈a izy fotony nanampinoan̈a. (Rom. 4:19-21) Ianarantsika baka amy tantara karaha in̈y fa nata karaha tsy ho posibla foeky raha ampan̈antinainy Jehovah, atsika matoky fa izio tsy maintsy ho tanteraka fo.

15. Nan̈ino atsika tokony hisaintsain̈y raha efa nataony Zan̈ahary tamintsika?

¹⁵ Saintsain̈a raha efa nataony Jehovah taminao. Efa nisy tanteraka taminao ma iro  fampan̈antinan̈a an̈aty Baiboly ao? Saintsain̈a ino hasaran̈a nazonao. Jesosy ziô nampan̈anten̈a fa Babany andan̈itry an̈y han̈amia raha ten̈a ilainao amy fiain̈ana. (Mat. 6:32, 33) Jesosy koa nan̈amia toky fa izikoa anao mangataka fan̈ahy masin̈y amy Jehovah, anao hamiany. (Lioka 11:13) Nitantirahiny Jehovah ankitin̈y fampan̈antinan̈anany aby zen̈y. Asa misy fampan̈antinan̈anany hafa koa efa tanteraka taminao? Jehovah, ohatra, nampan̈anten̈a han̈ambela hadisovan̈anao ndreky hankahery anao, avio han̈amia raha ilainao amy lafiny arapan̈ahy. (Mat. 6:14; 24:45; 2 Kor. 1:3) Izikoa anao misaintsain̈y raha efa nataony Zan̈ahary taminao, anao hahaihatoky fo fa mbala hitantirahiny raha nampan̈antinainy anao aminy hoavy.

16. Nan̈ino ma kadô maventy fan̈antinan̈a io?

¹⁶ Tsara mare fiain̈ana miambin̈y atsika aminy amaray, sady efa tsy din̈intsika haviany izio. Hiain̈y mandrakizay atsika amy zen̈y. Matoky atsika fa raha zen̈y tsy maintsy ho tanteraka. Fan̈antinan̈antsika io kadô maventy baka amy Jehovah. Izio mira vatofantsiky ke man̈ampy atsika hifandray marikitry amy Jehovah fo, amy zen̈y atsika mahavita miaritry fitsapan̈a ndreky fan̈injehan̈a, avio firaka amy fahafatesan̈a. Mira raha fiarovan̈a loha koa izio, ke miaro jerintsika baka atsika tsy han̈ano raha ratsy fa raha tsara fo. Raha ampan̈antinainy Baiboly io man̈ampy atsika hahay Zan̈ahary tsarabe sady man̈aboaka amintsika fa izy ten̈a tia atsika. Hahazo hatsaran̈a maventy atsika izikoa tsy hambelantsika hihen̈y foeky fan̈antinan̈antsika.

17. Nan̈ino fan̈antinan̈a io mitondra haravoan̈a?

¹⁷ Apostoly Paoly nampirisiky karaha ty tamy taratasy nalefany tamy Romanin̈y: “Miravoravoa amy fan̈antinan̈a.” (Rom. 12:12) Paoly afaka niravoravo fotony izy natoky fa izikoa izy tsy mivadiky, hahazo fiain̈ana mandrakizay andan̈itry an̈y. Atsika koa afaka miravoravo amy fan̈antinan̈antsika, fotony azontsika antoko fa hitana volan̈anany Jehovah. Nivolan̈a pan̈ano salamo fa ‘sambatra lan̈iany olo ... man̈anten̈a Jehovah Zan̈ahary, ... Araiky tsy mivadiky foeky io.’​—Sal. 146:5, 6.