1-2. a) Ino raha ataony fitondrampanjakan̈a sasany amy vahoakany Jehovah, kanefa akory ataondro ndray iô zen̈y? b) Nan̈ino atsika afaka ho sambatra fo nata injehin̈y? (Hazavà koa sary amy fon̈ony gazety ty.)

 AMY zioty mandilatra 30 tany mandrova na manakantsakana asa ataontsika. Manampahifan̈a sasany amy tany aby io man̈agadra iro rahalahy ndreky anabavintsika foeky. Ino ma raha ratsy nataondro? Tsisy, izikoa amy Jehovah edy. Fotony iro raha namaky ndreky nianatra Baiboly fo, baka io nikoran̈a taminolo raha inoandro, avio niaraka nivory taminolo finoan̈a araiky amindro. Tsy nan̈eky han̈ano politiky koa iro. Ndray nitoherin̈y mare iro panompony Zan̈ahary aby io, iro tsy nivadiky foeky. b Naboakandro baka tamy zen̈y fa Jehovah fo tiandro. Ary raha zen̈y mahavy iro mahatsiaro sambatra.

² Ten̈a misy korazy iro namantsika aby io. Anao mety efa navy nahita sariny sasany amindro, hitanao iro mimoemoe. Asa nan̈ino? Ravoravo iro fotony haindro fa Jehovah ravoravo mahita iro tsy mivadiky foeky. (1 Tan. 29:17a) Jesosy nivolan̈a: “Sambatra zay olo ampijalinolo baka amy fahamarin̈ana io ... Miravoravoa ndreky mitsinjaha mare anaro, fotony maventy radinaro.”​—Mat. 5:10-12.

3. Erakany Asan’ny Apostoly 4:19, 20, akory nataondro apostoly aby io koa fa ninjehin̈y, avio nan̈ino iro nan̈ano zen̈y?

³ Mitovy amy raha nahazo apostoly tamy taonjato voanalohany raha mahazo rahalahy ndreky anabavintsika aby io. Apostoly aby io ninjehin̈y fotony nitory momba Jesosy. Efa impirimpiry Fitsaran̈a Avo Jiosy ‘tsy nan̈omba iro hivolan̈a aminy an̈arany Jesosy eky.’ (Asa. 4:18; 5:27, 28, 40) Akory nataondro apostoly aby io? (Vakia Asan’ny Apostoly 4:19, 20.) Haindro fa olo ‘nan̈iraka iro hitory ndreky han̈azava tsara’ raha momba Jesosy io mbala manan̈a fahifan̈a an̈abo mandilatra iro pitsara tamy fitsaran̈a io. (Asa. 10:42) Petera ndreky Jaona nisolo ten̈a apostoly aby io man̈oloan̈a fitsaran̈a. Tsy navozovozo foeky iro nivolan̈a fa Zan̈ahary tokony harehandro volan̈a fa tsy iro pitsara aby io. Zahay, ho iro, tsy ho voly hikoran̈a raha momba Jesosy. Mira nivolan̈a karaha ty iro taminio: ‘Anaro ma mieritreritry fa anaro ny tokony tandrin̈esan̈a fa tsy Zan̈ahary?’

4. Koa zahan̈a Asan’ny Apostoly 5:27-29, ino raha nataondro apostoly aby io, avio akory angalantsika tahaka iro?

⁴ Ten̈a ohatra tsara apostoly aby io. Rango tamy zen̈y, ten̈a Kristianin̈y man̈araka modely namiandro. Iro tapakevitry ‘han̈araka volan̈a Zan̈ahary fo fa tsy ninolo, fotony izy pitondra iro.’ (Vakia Asan’ny Apostoly 5:27-29.) Apostoly aby io tsy nivadiky foeky. Zen̈y nahavy iro nibomaboman̈a. Fa iro koa fa niala man̈oloan̈a Fitsaran̈a Avo Jiosy tio, ‘iro ravoravo, fotony iro natao man̈eva alain̈y baraka baka aminy an̈arany [Jesosy].’ Nitohizandro fo koa fitorian̈a nataondro.​—Asa. 5:40-42.

5. Ino aby fan̈ontanian̈a mila valian̈a?

⁵ Izikoa atsika fa mandiniky raha nataondro apostoly aby io, atsika mety han̈ontany ten̈a karaha ty: ‘Baiboly mivolan̈a fa mila “man̈eky manampahifan̈a”, ke akory nahavitandro apostoly aby io nan̈araka volan̈a Zan̈ahary sady nan̈eky manampahifan̈a? (Rom. 13:1) Apostoly Paoly koa nivolan̈a fa atsika tokony han̈eky “pitondra  fanjakan̈a ndreky manampahifan̈a.” Ke akory koa basy hahavitantsika han̈ano zen̈y salakady tsy hivadiky amy Zan̈ahary, Pitondra farany an̈abo?’​—Tit. 3:1.

6. a) Azovy ma iro “manampahifan̈a” koran̈iny Romanina 13:1 io, avio ino adidintsika amindro? b) Karakory fahifan̈a anan̈andro pitondra aby io?

⁶ Vakia Romanina 13:1. Azovy ma iro manampahifan̈a koran̈iny aminy andininy io? Izio iro pitondra fanjakan̈a mifehy olo. Kristianin̈y mila man̈eky iro io. Iro io baka man̈ano raha hisiany filaminan̈a, man̈ano lalàn̈a, avio ndraikindraiky iro miaro vahoakany Jehovah. (Apok. 12:16) Zen̈y mahavy atsika mila man̈efa latety, avio mavozo ndreky man̈aja iro, erakany tadiavindro. (Rom. 13:7) Kanefa tsy ho nanan̈a fahifan̈a iro pitondra aby io, izikoa tsy Jehovah nan̈ambela iro hanan̈a zen̈y. Zen̈y tsarabe raha nazavainy Jesosy izikoa fa nan̈ontany izy Pontio Pilato, governera romanin̈y. Pilato koa fa nivolan̈a fa izy manan̈a fahifan̈a han̈avotro Jesosy na hamono izy, karaha ty raha nambarany Jesosy taminany: ‘Anao tsy ho nanan̈a fahifan̈a taminaka foeky, izikoa zen̈y tsy namian̈a anao baka tan̈abo tan̈y.’ (Jaona 19:11) Karaha niny Pilato, voafetra fo koa amy zioty, fahifan̈a anan̈any pitondra fanjakan̈a ndreky pan̈ano politiky jiaby.

7. Lera karakory atsika tsy tokony han̈araka volan̈any pitondra fanjakan̈a, avio ino raha tsara ho haindro?

⁷ Kristianin̈y man̈eky lalàn̈a apetrakany pitondra fanjakan̈a, izikoa mbala tsy mifanohitry amy lalàn̈any Zan̈ahary. Fa karakory ndraiky izikoa iro man̈iraka atsika han̈ano raha tsy ikeny Zan̈ahary, na koa tsy man̈omba atsika han̈ano raha takiny? Atsika tsy man̈araka volan̈andro. Ny raha misy baka, manafolahy jiaby mety hirahindro han̈ano maramila. c Na koa iro mety handrova Baibolintsika avio boky ndreky gazetintsika. Atsika mety tsy hambelandro hitory ndreky hivory. Izikoa iro man̈araraotro fahifan̈andro, ke man̈enjiky pianatra Kristy, Zan̈ahary hamaly iro. Mandiniky raha ataondro baka Jehovah.​—Mpito. 5:8.

8. Ino tsy mampitovy Jehovah ndreky iro pitondra fanjakan̈a aby io, avio nan̈ino zen̈y mila haintsika?

⁸ Marin̈y ndraiky fa ‘manan̈a fahifan̈a’ iro pitondra fanjakan̈a aby io, fa ndray zen̈y, iro tsy manan̈a fahifan̈a fara tampony. Jehovah Zan̈ahary zaraiky fo manan̈a fahifan̈a farany an̈abo. Amy Baiboly ao, inefatra izy kahian̈a ‘Zan̈ahary Fara Tampony.’​—Dan. 7:18, 22, 25, 27.

9. Ino raha hitany paminan̈y Daniela tamy fahitan̈a?

⁹ Paminan̈y Daniela nahita fahitan̈a maromaro. Iro io man̈aboaka fa Jehovah manan̈a fahifan̈a an̈abo mandilatra niny manampahifan̈a jiaby. Izy antsendriky nahita biby efatra maventy be. Iro io mifan̈itsy amindro firenena matanjaka taloha tan̈y ndreky amy firenena matanjaka amy zioty: Babylony, Media-Persy, Gresy, Roma, avio Angiley-Amerikain. (Dan. 7:1-3, 17) Baka io, Daniela nahita Jehovah Zan̈ahary nipetraka tamy toeran̈a fitsarany andan̈itry an̈y. (Dan. 7:9, 10) Nisy raha hafa koa hitany paminan̈y tsy nivadiky io, ary raha zen̈y fampitandreman̈a handeha amy pitondra aminy andra zioty.

10. Izikoa Daniela 7:13, 14, 27 zahan̈a, amiany Jehovah azovy fahifan̈a hifehy tany ty, avio man̈aporofo ino momba Jehovah raha zen̈y?

¹⁰ Vakia Daniela 7:13, 14, 27. Adosony Zan̈ahary amindro pitondra fanjakan̈a aby io fahifan̈a jiaby, ke handeha amiany olo matanjatanjakandro  salakady ten̈a vain̈y hahazo zen̈y. Azovy ma zen̈y? Jesosy Kristy, izy araiky “karaha zanakolo”, ndreky ‘iro olo masin̈iny Zan̈ahary Fara Tampony’, tsy azovy fa iro 144 000 hanjaka ‘mandrakizay mandrakizay.’ (Dan. 7:18) Hita tsarabe baka amy zen̈y fa Jehovah ankitin̈y ‘Zan̈ahary Fara Tampony’, fotony izy zaraiky fo manan̈a fahifan̈a han̈ano zen̈y.

11. Ino koa raha nisoratiny Daniela man̈aboaka fa Jehovah manan̈a fahifan̈a fara tampony amindro firenena aby io?

¹¹ Mifan̈araka amy raha hitany Daniela zen̈y raha nivolan̈iny talohanio. Izy nivolan̈a fa ‘Zan̈ahariny lan̈itry man̈ongana panjaka ndreky mametraka panjaka amy plasy.’ Hoizy koa: “Araiky Farany An̈abo in̈y Pitondra amy fanjakan̈anolombelon̈o, ke lan̈iany tiany hamian̈a fitondrasan̈a amiany izy.” (Dan. 2:19-21; 4:17) Efa nisy fotoan̈a ma Jehovah nan̈ongana panjaka ndreky nametraka panjaka tamy plasy? Ia!

12. Akory nataony Jehovah nan̈ongana panjaka taloha tan̈y? (Zahava sary.)

¹² Efa naboakany Jehovah mavaza tsara fa fahifan̈anany an̈abo lavitry tozay nindro “manampahifan̈a” aby io. Alô baka atsika handiniky ohatra telo. Nandivoziny Faraony Ezipty vahoakany Jehovah. Efa impirimpiry izy tsy nan̈eky hamosotro iro. Fa navotany Zan̈ahary vahoakanany, avio Farao nataony dobo tan̈aty Ranomasin̈y Mena. (Eks. 14:26-28; Sal. 136:15) Nisy fotoan̈a Belsazara panjakany Babylony nan̈ano fety be. Izy tamy zen̈y ‘nan̈ambony ten̈a ke nanohitry Tompony lan̈itry.’ Izy ‘nidera zan̈ahary volafotsy ndreky volamena’ aby io, fa tsy Jehovah. (Dan. 5:22, 23) Kanefa naondrikiny Zan̈ahary lelahy man̈ambony ten̈a io. Taminy ‘alin̈izio fo’, nivonenolo Belsazara. Avio fanjakan̈anany namian̈a Medianin̈y ndreky Persianin̈y. (Dan. 5:28, 30, 31) Nasainy Heroda Agripa I, panjakany Palestiny nivonen̈a apostoly Jakoba, avio nigadrainy apostoly Petera. Efa tiany hivonen̈a koa baka Petera. Tsy nambelany Jehovah ho tanteraka tetikinany. ‘Izy nivangoeny anjeliny Jehovah’, ke naty.​—Asa. 12:1-5, 21-23.

13. Akory nataony Jehovah nandresy pitondra maromaro nitambatra, taloha tan̈y?

¹³ Firaka tamy pitondra maromaro mitambatra koa nan̈aboahany Jehovah fa tsisy olo  manan̈a fahifan̈a miran̈a amy ninany. Nisy fotoan̈a, ohatra, nisy panjaka Kananita 31 navy hiady taminy Israely. Jehovah foeky taminio niady tamy plasiny Israely, ke resy iro panjaka aby io sady nazony Israely ankabiazany Tany Nampan̈antinain̈y. (Jos. 11:4-6, 20; 12:1, 7, 24) Tsy zen̈y fo, nampiany Jehovah koa iro Israelita aby io, ke resindro tanteraka Panjaka Beni-hadada ndreky iro pitondra syrianin̈y 32 niady tamindro.​—1 Mpanj. 20:1, 26-29.

14-15. a) Ino raha nivolan̈iny Panjaka Nebokadnezara ndreky Dariosy mikasiky fitondrasan̈any Jehovah? b) Ino raha nivolan̈iny panoratra salamo momba Jehovah ndreky firenenanany?

¹⁴ Tsy indraiky tsy indroe, Jehovah nan̈aporofo fa izy Zan̈ahary Fara Tampony. Nebokadnezara panjakany Babylony ziô koa fa nitoron̈o mare ‘tanjaka angovonany ndreky habezany voninahitrinany’, izy nataony Jehovah loso adala. Nan̈ino? Fotony izy tsy nanetry ten̈a, ke tsy nan̈amia voninahitry Jehovah. Kanefa efa Jehovah zaraiky fo vain̈y amian̈a voninahitry. Tafara tatỳ, Nebokadnezara koa fa janga, izy nidera ‘Araiky Farany An̈abo.’ Nan̈eky izy fa ‘fitondrasan̈any Jehovah io fitondrasan̈a maharitry mandrakizay.’ Karaha ty koa hoizy: ‘Tsisy olo mahasakan̈a Izy.’ (Dan. 4:30, 33-35) Tandraraiky koa, Daniela natsipy tan̈aty lavakany lion, fotony izy tsy nan̈eky hivadiky tamy Zan̈ahary. Fa Jehovah nan̈avotro izy. Ke Panjaka Dariosy nivolan̈a: ‘Olo jiaby tokony hangorohoro ndreky havozo Zan̈ahariny Daniela. Fotony izy Zan̈ahary velon̈o sady maharitry mandrakizay. Fanjakan̈anany tsy ho ravan̈a foeky, salakady fitondrasan̈anany maharitry mandrakizay.’​—Dan. 6:7-10, 19-22, 26, 27.

¹⁵ Nivolan̈a karaha ty koa panoratra salamo: ‘Ataony Jehovah tsy mahomby tetikindro firenena aby io; ataony tsy tanteraka fikasan̈any vahoaka.’ Hoizy koa: “Sambatra firenena manan̈a Jehovah Zan̈aharinany, ndreky olo aby nifidiny hanjary lovanany.” (Sal. 33:10, 12) Tsy hitanao baka amy zen̈y fa atsika tokony tsy hivadiky amy Jehovah?

16. Ino raha atokisantsika amy “fahorian̈a be”, avio nan̈ino? (Zahava sary.)

¹⁶ Efa hitantsika tio raha nataony Jehovah taloha. Ke ino koa raha hatokisantsika ataony teteky iô? Amy “fahorian̈a be”, Jehovah han̈avotro panomponany tsy mivadiky. (Mat. 24:21; Dan. 12:1) Tsy ho ela baka, firenena maromaro mitambatra, na Goga baka Magoga, ho romotro mare, ke hanafiky vahoakany Jehovah erantany. Fa ndray hitambatra iro firenena jiaby 193, an̈isany Firenena Mikamban̈a, tsy ho vitandro hiady amy Zan̈ahary Fara Tampony ndreky amy tafikinany andan̈itry an̈y! Nan̈ino atsika matoky zen̈y? Fotony Jehovah mampan̈anten̈a karaha ty: “Hataoko raha hahaizany firenena maro zaho: Haboakako iro angovonaka ndreky maha Zan̈ahary masin̈y zaho. Ke tsy maintsy ho haindro fo fa zaho Jehovah zen̈y.”​—Ezek. 38:14-16, 23; Sal. 46:10.

17. Izikoa Baiboly zahan̈a, akory hiafarandro panjaka amy tany, ndreky olo tsy mivadiky amy Jehovah?

¹⁷ Fanafihany Goga io hitariky aminy ady farany, tsy ino zen̈y fa Aramagedona. Amy zen̈y, Jehovah handripaka ‘panjaka amy tany jiaby.’ (Apok. 16:14, 16; 19:19-21) Fa ‘olo marin̈y fo hipetraka amy tany ty, avio olo tsy mivadiky hidoko eto.’​—Ohab. 2:21, l.p.a.

18. Von̈ono han̈ino ankamarozany ten̈a Kristianin̈y, avio nan̈ino? (Daniela 3:28)

¹⁸ Rango zay, efa maro ten̈a Kristianin̈y von̈ono higadra ndreky hirisiky fahin̈anandro fotony iro tia Jehovah, Pitondra Farany An̈abo. Iro tapakevitry tsy hivadiky amy Jehovah, karaha nataondro Hebreo telo lahy in̈y. Nata iro natsipy tan̈aty lafaoro farany may, iro tsy nan̈eky hivadiky tamy Zan̈ahary Fara Tampony. Ke Jehovah nan̈avotro iro.​—Vakia Daniela 3:28.

19. a) Ino raha zahany Jehovah amy vahoakany, lera izy hitsara iro? b) Ino raha tsy maintsy ataontsika rango zioty?

¹⁹ Nivolan̈a Davida pan̈ano salamo fa ten̈a raha maventy tsy mivadiky amy Zan̈ahary. Karaha ty hoizy: ‘Jehovah han̈aboaka didipitsaran̈a amindro firenena aby io. Jehovah e, tsaray erakany marin̈y nataoko zaho, ndreky erakany tsy fivadihako.’ (Sal. 7:8) Nanoratra karaha ty koa izy: ‘Anò ho voaro zaho fotony tsy mivadiky sady man̈ano raha mahitsy.’ (Sal. 25:21) Ke aza mivadiky amy Jehovah foeky, ndray ino ndray ino raha mandalo. Tsisy fiain̈ana tsaratsarany zen̈y. Izikoa anao man̈ano zen̈y, anao hahatsapa karaha raha nivolan̈iny pan̈ano salamo ty: ‘Sambatra lan̈iany tsy mivadiky ... sady man̈araka lalàn̈any Jehovah.’​—Sal. 119:1, l.p.a.