1. Karakory ma olo mafatoky zen̈y?

 OLO mafatoky zen̈y mifen̈y mitana volan̈a nataony ndreky tsy mavandy. (Sal. 15:4) Hainolo fa izy olo mety tavandrain̈y tsarabe. Tiantsika izikoa karaha zen̈y fahitandro piaramanompo aby io atsika. Ke ino raha mila ataontsika baka iro hatoky atsika?

2. Akory an̈aboahantsika fa atsika olo mafatoky?

² Atsika tsy afaka hiforse olo hatoky atsika. Mila hitandro baka amy raha ataontsika fa atsika olo mety atokisan̈a. Fotony fatokisan̈a io mira vola, sarotro azo fa mora very. Jehovah iziô nan̈ano raha hahavy atsika hatoky izy. Ke afaka matoky izy fo atsika fotony izy ‘mafatoky amy raha jiaby ataony.’ (Sal. 33:4) Tiany Jehovah atsika hangala tahaka izy. (Efes. 5:1) Alô atsika ziô handiniky ohatranolo sasany nanompo Jehovah taloha tan̈y. Iro nifen̈y nangala tahaka Babandro andan̈itry an̈y, sady raha nataondro koa nan̈aboaka fa iro olo mety atokisan̈a. Hizahantsika koa toetry dimy han̈ampy atsika hanjary olo mafatoky.

3-4. Akory nan̈aboahany Daniela fa izy olo mafatoky? Avio, ino aby fan̈ontanian̈a tokony saintsain̈intsika?

³ Ten̈a ohatra tsara paminan̈y Daniela fotony izy nalaza olo mafatoky. Naboakany raha zen̈y tsy ela tafarany izy loso sesitany  ta Babylony. Nampiany Jehovah izy ke vitany nan̈ambara dikany nofiny Panjaka Nebokadnezara. Vokatrany zen̈y, izy nahainatokisanolo fo. Nisy fotoan̈a koa Daniela nila korazy mare nandeha nivolan̈a tamy panjaka fa Jehovah tsy ravoravo taminany. Tsy nora nan̈ano zen̈y fotony tsisy panjaka tihaharen̈y hafatra karaha zen̈y. Nebokadnezara koa aminio olo mora meloko ndreky kafiry mare. (Dan. 2:12; 4:20-22, 25) Taon̈o maro tafara tatỳ, mbala naboakany Daniela fo fa izy olo mafatoky, lera izy nan̈ambara dikany soratra hafahafa niboaka tamy ribany lapany panjaka tao. (Dan. 5:5, 25-29) Tafara tatỳ koa, hitany Panjaka Dariosy ndreky iro manampahifan̈anany aby io, fa farandraha nahirantsain̈y eky Daniela. Haindro fa Daniela io olo ‘mafatoky avio tsy nan̈ano kilevaleva foeky sady nan̈ano ny marin̈y fo.’ (Dan. 6:3, 4) Ke firaka amindro pitondra fanjakan̈a panompo sampy aby io nan̈eky fa mafatoky marin̈y panompony Jehovah araiky io.

⁴ Izikoa anao fa misaintsain̈y ohatrany Daniela zen̈y, man̈ontania ten̈a karaha ty: ‘Mba karakory fahitanolo tsy manompo Jehovah aby io zaho? Zaho ma malaza ho olo tsy milefa adidy sady mety atokisan̈a?’ Ilain̈y man̈ontany karaha zen̈y fotony izikoa atsika malaza ho olo mafatoky, Jehovah hahazo dera.

5. Ino nahavy Hanania nanjary olo mafatoky?

⁵ Tamy taon̈o 455 T.K., Nehemia governera koa fa baka nan̈oriny ribany Jerosalema, izy nitady olo ten̈a mety atokisan̈a hikarakara tanàna io. Taminolo maro tao, Hanania nifidiny Nehemia natao sefony Lapa.  Baiboly mikoran̈a fa Hanania io ‘farandraha olo mafatoky eky sady navozo Zan̈ahary mandilatra olo maro.’ (Neh. 7:2) Hanania ten̈a tia Jehovah ndreky navozo tsao man̈ano raha tsy mamparavoravo izy. Iro toetry aby zen̈y nandrisiky Hanania han̈ano tsara zay asa nampan̈anaovin̈y izy. Ke toetry aby zen̈y koa hahavy atsika hatokisan̈a amy fanompoan̈a ataontsika.

6. Akory nan̈aboahany Tykiko fa izy naman̈a afaka natokisany apostoly Paoly?

⁶ Aleva onon̈o koa baka Tykiko kamaradiny apostoly Paoly. Farandraha natokisany Paoly eky izy. Tamy Paoly nigadrain̈y tamy tran̈o araiky ta Roma, izy nitavandra Tykiko, ke izy nivolan̈a fa Tykiko ‘panompo mafatoky.’ (Efes. 6:21, 22) Paoly natoky i Tykiko ke izy nirahiny hitondra taratasy handeha amindro rahahaly ta Efesosy ndreky Kolosia. Fa tsy zen̈y fo fa, nirahiny koa izy hankahery iro piaramanompo aby io. Modeliny Tykiko zen̈y mampatsiaro atsika iro lelahy mikarakara raha ilaintsika amy lafiny arapan̈ahy, amy zioty. Iro io ten̈a mafatoky sady tsy mivadiky.​—Kol. 4: 7-9.

7. Mafatoky iro antipan̈ahy ndreky pikarakara fiangonan̈a aby io. Ino raha ianaranao baka amy zen̈y?

⁷ Amy zioty koa, atsika ten̈a mankasitraka iro antipan̈ahy ndreky pikarakara fiangonan̈a aby io fotony iro ten̈a mafatoky. Miran̈a Daniela, Hanania, ndreky Tykiko, ataondro tsara koa andraikitrindro. Lera atsika man̈atriky fivorian̈a andavanandra in̈y, ohatra, efa haintsika fa efa misy olo man̈ano anjara tsiaraikiaraiky. Sady ravoravo iro antipan̈ahy aby io mahita fa, efa von̈ono han̈ano anjarandro iro rahalahy ndreky ranabavy namezan̈a anjara! Izikoa atsika fa mikaiky pianatra Baibolintsika han̈aton̈o fivorian̈a amy farany herin̈iandra, atsika matoky fa tsy maintsy misy olo fo han̈ano kabaro. Matoky koa atsika fa ho azontsika iro boky ndreky gazety ilaintsika amy fanompoan̈a. Mikarakara atsika tsarabe iro rahalahy mafatoky aby io. Man̈ano mersy Jehovah nan̈amia iro io atsika. Ke akory koa basy han̈aboahantsika fa atsika olo mafatoky?

8. Akory han̈aboahantsika fa atsika mahay mandanjalanja izikoa fa mikoran̈a olo? (Ohabolana 11:13)

⁸ Tiantsika iro piaramanompo amintsika aby io ke tiantsika ho hay akory nanindro. Fa ndray zen̈y, atsika mila mahay mandanjalanja ke man̈aja raha momba fiain̈anandro manokan̈a. Nisy Kristianin̈y sasany tamy taonjato voanalohany tia ‘mitsiko olo avio miditry amy raha tsy afairandro, sady mikoran̈a raha tsy tokotro koran̈iny.’ (1 Tim. 5:13) Tsy tiantsika hanjary karaha iro. Ke izikoa misy olo mikoran̈a sekirenany amintsika avio mangataka atsika tsy hikoran̈a izio aminolo, atsika tokony han̈aja raha zen̈y. Mety karaha zen̈y, ohatra, izikoa misy ranabavy araiky mikoran̈a aretin̈inany amintsika na problemonany hafa. Tsy tokony handeha tantaraintsika aminolo raha zen̈y. * (Vakia Ohabolana 11:13.) Lera karakory koa ma ten̈a ilain̈y mitana sekire?

9. Karakory han̈aboahanolo tsiaraikiaraiky an̈aty fianakavian̈a fa izy olo mafatoky?

⁹ An̈aty fianakavian̈a. Olo tsiaraikiaraiky an̈aty fianakavian̈a ao tsy tokony han̈aboely sekireny fianakavian̈andro. Mety misy fahazaran̈any vadiny, ohatra, mampimoe lelahy araiky. Tsy tokony hikoran̈iny aminolo  izio fotony mety hampamen̈atra vadiny. Tiany baka vadiny io, ke izy tsy han̈ano raha hamparary fonany foeky. (Efes. 5:33) Mila alainy raimandreny onon̈o koa fa mba tiandro tanora aby io iro hajain̈y. Mety ho men̈atra baka iro izikoa tantaraindry olobendro aminolo hadisovan̈a nataondro. (Kol. 3:21) Firaka amy tsaiky koa mila mahay mitana sekire, ke tsy mitantara aminolo raha mety hampamen̈atra havandro. (Deot. 5:16) Hifandray tsarabe fianakavian̈a araiky, izikoa iro jiaby samby mifen̈y tsy han̈aboely sekireny fianakavian̈andro.

10. Karakory ma olo ten̈a naman̈a zen̈y? (Ohabolana 17:17)

¹⁰ Amy naman̈a. Tsy maintsy misy fotoan̈a fo atsika mahatsapa tihikoran̈a raha an̈aty fontsika amy naman̈a araiky marikitry. Fa mety tsy ho mora raha zen̈y ndraikindraiky. Atsika baka mety tsy zatra mikoran̈a aminolo raha an̈aty fontsika. Ke izikoa ren̈intsika fa raha nikoran̈intsika taminany in̈y nitantarainy taminolo, atsika mety ho kivy mare. Fa izikoa ndraiky izy mifen̈y mitana sekirentsika, atsika ravoravo mare. “Olo ten̈a naman̈a” ankitin̈y izy izikoa zen̈y.​—Vakia Ohabolana 17:17.

11. a) Akory han̈aboahany antipan̈ahy ndreky vadiny fa iro olo mety atokisan̈a? b) Tsy tantarainy antipan̈ahy amy fianakavian̈anany sekireny piaramanompo. Ino raha ianarantsika baka amy zen̈y? (Zahava sary.)

¹¹ An̈aty fiangonan̈a. Antipan̈ahy izikoa malaza mahatana sekire, izy hanjary ‘toeran̈a fisitrihan̈a lera misy tsiko, ndreky fialofany’ rahalahy aby io. (Isaia 32:2) Atsika matoky fa tsy handeha taterindro antipan̈ahy aby io aminolo raha nikoran̈intsika tamindro. Ke tsy mihafahafa foeky atsika mikoran̈a sekirentsika amindro. Atsika tsy tokony hanery iro hivolan̈a amintsika raha araiky sekire. Mankasitraka vadiny antipan̈ahy aby io koa atsika, fotony iro tsy mitsokoriky sekirenolo amy vadindro. Tsy mahatsara iro lasitio mahay sekirendro rahalahy ndreky ranabavy aby io. Nivolan̈a karaha ty ranabavy araiky  vadiny antipan̈ahy: “Ravoravo zaho fotony tsy koran̈iny vadiko aminaka foeky raha momba olo mila fan̈ampiany antipan̈ahy; nata an̈arandro tsy ambarany. Ten̈a ravoravo zaho fotony tsy misosoko asalohanaka. Sady tsisy raha mety ataoko amizio. Ke milamin̈y tsara jerinaka lera zaho mikoran̈a aminolo jiaby amy fiangonan̈a. Avio zaho koa fa mikoran̈a raha an̈aty fonaka na problemonaka amy vadiko, zaho matoky fa izio tsy handeha tantarainy aminolo.” Tiantsika izikoa atsika malaza ho olo mafatoky. Ke alô atsika handiniky toetry dimy han̈ampy atsika amy zen̈y.

12. Hazavà nan̈ino atokisanolo atsika izikoa tia iro.

¹² Fitiavan̈a mahavy atsika ho olo mafatoky. Atsika mila tia Jehovah ndreky tia namantsika. Zen̈y ho Jesosy didy aroe farany maventy. (Mat. 22:37-39) Tsisy olo mafatoky mandilatra Jehovah. Tia Jehovah atsika ke mangala tahaka modelinany. Amy fomba akory? Atsika ziô tsy han̈aboely sekireny piaramanompo fotony iro tiantsika. Tsy tiantsika foeky hitantara aminolo raha mety hampisy problemo, na hampamen̈atra, na hampalahelo iro.​—Jaona 15:12.

13. Nan̈ino fanetrenten̈a man̈ampy atsika hanjary olo mafatoky?

¹³ Atokisanolo atsika izikoa manetry ten̈a. Karakory ma zen̈y? Atsika tsy mihevitry atsika ho farany maharaka, ke tsy maintsy baka amintsika fo ahaizanolo vaovaondraha. (Fil. 2:3) Tsy ataontsika koa raha hahavy olo hieritreritry fa atsika mahay sekirendraha araiky. Manetry ten̈a koa atsika ke tsy han̈aparitaka aminolo hevitrintsika manokan̈a momba raha tsy koran̈iny Baiboly na boky na gazetintsika aby io.

14. Nan̈ino fahaizan̈a mandiniky io han̈ampy atsika hanjary olo mafatoky?

¹⁴ Izikoa atsika mahay mandiniky, ho haintsika han̈avaka ombian̈a atsika mila mangin̈y, avio ombian̈a mila mivolan̈a. (Mpito. 3:7) Misy fomba fivolan̈ana araiky ty: “Zay mangin̈y volamena.” Dikanizen̈y, misy fotoan̈a sitrany mangin̈y tozay mivolan̈a. Zen̈y mahavy Ohabolana 11:12 mivolan̈a: ‘Mangin̈y lan̈iany olo mahay mandiniky tsara.’ Ty baka misy ohatra: Misy rahalahy antipan̈ahy araiky efa zadraharaha kahian̈a matetiky han̈ampy fiangonan̈a hafa handamin̈y problemo sarotro. Karaha ty nivolan̈iny antipan̈ahy araiky momba rahalahy io: “Izy mitandrin̈y fo baka tsy hikoran̈a sekireny fiangonan̈a hafa.” Ten̈a hendry rahalahy io, ke man̈aja izy iro antipan̈ahy fiangonan̈a araiky aminany. Iro matoky fa rahalahy io tsy hikoran̈a sekirendro amy fiangonan̈a hafa foeky.

15. Hatoky anao olo izikoa anao man̈ano ny marin̈y. Man̈ameza ohatra.

¹⁵ Mila man̈ano ny marin̈y koa atsika izikoa tiantsika hanjary olo mafatoky. Atsika matoky olo man̈ano ny marin̈y fotony haintsika fa izy tsy havandy. (Efes. 4:25; Heb. 13:18) Anao ziô, ohatra, tihankatsara fahaizanao man̈ano kabaro. Ke anao man̈iraka olo hitandren̈y kabaro ataonao, ndreky han̈amia anao sosokevitry momba raha mila hatsarainao. Olo karakory ma ten̈a han̈ampy anao? Olo zisty mikoran̈a aminao raha tianao ho ren̈y fo, sa olo ten̈a mivolan̈a ny marin̈y aminao? Baiboly mivolan̈a: ‘Sitrany mahazo anatra tsy miolakolaka, tozay fitiavan̈a asitriky. Bay ataony kamaradinten̈a, ahitan̈a fa izy naman̈a tsy mivadiky.’ (Ohab. 27:5, 6) Ke ndray tsy mora maharen̈y izy amy voanalohany, ten̈a hitondra hatsaran̈a amintsika raha marin̈y volan̈iny namantsika momba atsika.

16. Izikoa zahan̈a Ohabolana 10:19, nan̈ino atsika mila mifehy ten̈a?

 ¹⁶ Mila mahay mifehy ten̈a atsika izikoa tiantsika olo hatoky atsika. Toetry io han̈ampy atsika hahay hangin̈y lera atsika mitady hivolan̈a raha araiky sekire. (Vakia Ohabolana 10:19.) Mety ho sarotro hifehy ten̈a lera atsika mampiasa tranonkala fifaneraseran̈a. Izikoa atsika tsy mitandrin̈y, atsika mety hamosa sekire aminolo maro. Ary koran̈a araiky koa fa nalefa aminy Internet, efa tsy vitantsika eky hisakan̈a olo tsy han̈aparitaka izio sady efa tsy ho voasakan̈antsika eky problemo mety hiboaka baka io. Atsika koa mahafehy ten̈a, atsika hahavita hangin̈y fo izikoa fa misy panohitry mitady han̈ano raha hahavy atsika hamosa sekire mety havoazandro rahalahy ndreky ranabavintsika aby io problemo. Raha karaha zen̈y zioty mety hiboaka lera atsika ataony polisy ankety, amy tany mandrova na misakantsakan̈a asantsika. Ke izikoa miboaka raha karaha zen̈y, na raha hafa mitovitovy amy zen̈y, atsika mila ‘mamody vavantsika.’ (Sal. 39:1) Mila mifen̈y ho mafatoky fo atsika na amy fianakavian̈antsika, na amy namantsika, na amy piaramanompo, na aminolo hafa. Hatokisanolo atsika izikoa mahafehy ten̈a.

17. Ino raha mety ataontsika baka fiangonan̈a hifampatoky?

¹⁷ Jehovah man̈ana fianakavian̈a feno olo mifankatia ndreky mifampatoky. Ten̈a man̈ano mersy Jehovah atsika fotony nitahominy ho an̈isany fianakavian̈anany! Andraikitrintsika jiaby man̈ano raha hahavy piaramanompo amintsika hatoky atsika. Hifampatoky olo jiaby an̈atiny fiangonan̈a izikoa kila olo mifen̈y man̈aboaka fitiavan̈a, manetry ten̈a, mahay mandiniky, man̈ano ny marin̈y, ndreky mifehy ten̈a. Isanandra, mila mifen̈y fo atsika man̈aboaka aminolo fa atsika io olo mafatoky. Ke irarian̈a atsika hangala tahaka Jehovah Zan̈aharintsika, ke tsy voly han̈aboaka fa atsika olo mety atokisan̈a.