LAHATSORATRA FIANARAN̈A 39
Efa An̈atiny “Bokiny Fiain̈ana” ao ma An̈aranao?
“Nisy boky fahatsiarovan̈a nisoratin̈y man̈oloan̈a izy, hahatsiarovan̈a iro olo mavozo Jehovah.”—MAL. 3:16.
HIRA 61 Mandrosoa, ry Vavolombelona!
HO HITA ATO *
Rango taminy andrany Abela, nampiditry an̈aranolo tamy “bokiny fiain̈ana” fo Jehovah (Zahava fehintsoratra 1-2)
1. Izikoa Malakia 3:16 zahan̈a, ino boky nisoratiny Jehovah, avio ino raha an̈atiny izio ao?
MISY boky araiky nisoratiny Jehovah efa mandeha andrivony taon̈o zay. Tsisy boky miran̈a izio! An̈atiny izio ao misy listiny an̈aranolo maro, manomboko aminy Abela, olo voanalohany tsy nivadiky tamy Zan̈ahary. * (Lioka 11:50, 51) Rango tamy zen̈y, mbala nampiany Jehovah an̈aranolo hafa maro koa tao. Ke amy zioty efa antapitrisany an̈aranolo voasoratra an̈aty boky io ao. Amy Baiboly, boky io kahian̈a “boky fahatsiarovan̈a” na “bokiny fiain̈ana”, na koa “horonambokiny fiain̈ana.” Fa amy lahatsoratra ty, “bokiny fiain̈ana” ikahiantsika izio.—Vakia Malakia 3:16; Apok. 3:5; 17:8.
2. a) An̈aranjovy aby ma voasoratra an̈aty bokiny fiain̈ana io? b) Ino raha mila ataontsika baka an̈arantsika voasoratra an̈aty ao?
2 Hita an̈aty boky miavaka io ao an̈aranolo jiaby mavozo Jehovah ndreky man̈aja izy tsarabe sady ten̈a tia an̈aranany. Iro afaka hahazo fiain̈ana mandrakizay. Mety mba ho voasoratra an̈aty boky io ao koa ma an̈arantsika? Ia, posibla raha zen̈y izikoa atsika mifandray marikitry amy Jehovah. Baka amy soron̈o nataony Jesosy Kristy hahavitantsika zen̈y. (Jaona 3:16, 36) Na man̈anten̈a handeha andan̈itry atsika na hiain̈y ambony tany, atsika jiaby samby man̈iry an̈arantsika ho voasoratra an̈aty boky io ao.
3-4. a) Efa azo antoko hahazo fiain̈ana mandrakizay ma atsika izikoa an̈arantsika efa misoratra an̈aty bokiny fiain̈ana ao? Hazavà. b) Ino raha hidinihintsika amy lahatsoratra ty ndreky araiky man̈araka?
3 Zen̈y ma mivolan̈a fa azo antoko hahazo fiain̈ana mandrakizay olo jiaby voasoratra an̈aran̈a an̈aty boky io? Raha nivolan̈iny Jehovah tamy Mosesy aminy Eksodosy 32:33, ahitantsika valiny fan̈ontanian̈a zen̈y. Karaha ty ho Jehovah: “Lan̈iany an̈aranolo nanota taminaka fo hifafako amy bokinaka.” Ke dikanizen̈y, mbala mety fafan̈a na adoso an̈aran̈a efa an̈aty boky io. Fotony mira nisoratiny Jehovah amy crayon fo antsendriky iro io. (Apok. 3:5, l.p.a.) Ke atsika mila man̈ano raha hahavy an̈arantsika tsy ho afaka an̈aty boky ao, firaka izio loso tsy azo fafan̈a karaha soratra stylo in̈y.
4 Atsika mety han̈ontany karaha ty: Ino ma raha volan̈iny Baiboly momba olo voasoratra ndreky tsy voasoratra an̈aran̈a an̈aty bokiny fiain̈ana? Ombian̈a ma hahazo fiain̈ana mandrakizay lan̈iany olo tsy voafafa an̈aran̈a an̈aty boky io? Akory ndraiky iro olo naty kanefa mbala tsiary nahay raha momba Jehovah? Mbala ho posibla ho voasoratra an̈aty boky io edy an̈arandro? Hamaly fan̈ontanian̈a aby zen̈y lahatsoratra ty ndreky araiky man̈araka.
AN̈ARANJOVY ABY MA AN̈ATY BOKY IO AO?
5-6. a) Erakany Filipianina 4:3, an̈aranjovy ma an̈isany voasoratra amy bokiny fiain̈ana ao? b) Ombian̈a an̈arandro efa tsy ho voafafa an̈aty boky io ao eky?
5 An̈aranjovy aby ma voasoratra an̈aty bokiny fiain̈ana ao? Hamalian̈a zen̈y, alô atsika handiniky antokonolo dimy samby hafa. Misy amindro io efa voasoratra an̈aran̈a an̈aty bokiny fiain̈ana ao, fa sasany ndraiky tsy ao.
6 Ty antokonolo voanalohany: Iro olo aby nifidin̈y hiaraka hanjaka amy Jesosy andan̈itry an̈y. Efa voasoratra an̈aty boky io ao ma an̈arandro? Izikoa zahavan̈a raha nivolan̈iny apostoly Paoly tamindro “piaramiasa” taminany ta Filipy, efa an̈aty boky io ao amy zioty, an̈arandro voahosotro hiaraka hanjaka amy Jesosy. (Vakia Filipianina 4:3.) Fa izikoa tiandro tsy ho voafafa an̈aty boky io an̈arandro, iro mila tsy mivadiky foeky. Alohany iro maty na alohany fahorian̈a be manomboko, iro asian̈a tombokase farany. Ke amy zen̈y, efa tsy ho voafafa an̈aty boky io eky an̈arandro.—Apok. 7:3.
7. Izikoa zahan̈a Apokalypsy 7:16, 17, ombian̈a an̈arany vahoaka be vo tsy mety fafàn̈a an̈aty bokiny fiain̈ana?
7 Antokonolo araiky faharoe ndraiky vahoaka be an̈isany ondrikondriky hafa. Efa voasoratra an̈aty bokiny fiain̈ana io ao ma an̈arandro? Ia. Mbala an̈aty boky io ao fo ma an̈arandro lera iro efa tafitsaka aminy Aramagedona? Ia. (Apok. 7:14) Jesosy nivolan̈a fa iro io ‘hahazo fiain̈ana tsisy farany.’ (Mat. 25:46) Fa ndray zen̈y, tsy miaraka iro tafitsaka aminy Aramagedona efa mahazo fiain̈ana tsisy farany edy. Fotony mbala karaha nisoratin̈y tamy crayon fo an̈arandro. Amy Fanjakan̈a Arivo Taon̈o, Jesosy “hiambin̈y iro karaha ataony piambin̈y ondrikondriky in̈y, ke hitariky iro handeha amy loharanony ranony fahin̈ana.” Ho tavela an̈aty bokiny fiain̈ana ao an̈arany lan̈ianolo man̈araka tsarabe taridalan̈any Kristy, avio hita fa tsy mivadiky amy Jehovah foeky amy fitsaran̈a farany.—Vakia Apokalypsy 7:16, 17.
8. An̈aranjovy ma tsy voasoratra an̈aty bokiny fiain̈ana io ao, avio akory hiafarandro?
8 Antokonolo fahatelo ndraiky iro bengy haripaka aminy Aramagedona. Tsy an̈aty bokiny fiain̈ana ao an̈arandro. Jesosy nivolan̈a fa iro io handeha ‘haripaka mandrakizay.’ (Mat. 25:46) Niasa tamy Paoly fan̈ahy masin̈y, ke izy nivolan̈a fa iro io handeha ‘hitsarain̈y ke hisazin̈y, na koa haripaka mandrakizay.’ (2 Tes. 1:9; 2 Pet. 2:9) Karaha zen̈y koa hiafarandro olo aby kinia manota amy fan̈ahy masin̈y. Tsy fiain̈ana mandrakizay raha ho azondro fa fandripahan̈a mandrakizay. Mazava hoazy koa fa, iro tsy ho hatsangana amy maty. (Mat. 12:32; Mar. 3:28, 29; Heb. 6:4-6) Alô atsika zioty handiniky tsarabe antokonolo aroe handeha hatsangana ambony tany eto.
IRO HATSANGANA AMY MATY
9. Koa zahan̈a Asan’ny Apostoly 24:15, azovy aby antokonolo aroe hatsangana ambony tany eto, avio ino tsy mampitovy iro roe io?
9 Koran̈iny Baiboly fa misy antokonolo aroe hatsangana amy maty, ke iro io hiain̈y mandrakizay ambony tany. “Olo marin̈y ndreky tsy marin̈y” kahian̈a iro io. (Vakia Asan’ny Apostoly 24:15.) “Olo marin̈y” koran̈iny io, olo tsy nivadiky tamy Jehovah taminiro mbala velon̈o. Olo “tsy marin̈y” ndraiky olo tsiary nanompo Jehovah talohany iro naty. Matetiky, iro tsy nan̈ano raha marin̈y taminiro mbala velon̈o. Samy hatsangana amy maty antokonolo aroe io. Ke dikanizen̈y ma samby voasoratra an̈aty bokiny fiain̈ana ao an̈arandro? Hamalian̈a fan̈ontanian̈a zen̈y, alô hidinihintsika tsiaraikiaraiky antsendriky raha momba iro io.
10. Nan̈ino iro “olo marin̈y” aby io hatsangana amy maty, avio ino tombontsoa ho azony sasany amindro? (Zahava amy gazety ty ato koa “Fan̈ontanian̈any Pamaky” momba olo hatsangana amy maty ambony tany eto.)
10 Antokonolo fahefatra: “Olo marin̈y.” Talohany iro naty, an̈arandro efa voasoratra an̈aty bokiny fiain̈ana. Ke iro koa fa naty, nadoso tamy boky io tao ma an̈arandro? Ehe. Mbala “velon̈o” fo baka iro an̈aty fitadidian̈any Jehovah. Mivolan̈a Lioka 20:38 fa Jehovah “tsy Zan̈ahariny maty, fa niny velon̈o fotony aminany iro jiaby io velon̈o aby.” Dikanizen̈y, lera olo marin̈y aby io himpody hivilomin̈y ndraiky ambony tany eto, an̈arandro mbala amy bokiny fiain̈ana ao fo, fa izy fo mbala amy crayon. (Lioka 14:14) Sasany amindro io hahazo tombontsoa hanjary ‘andriana amy tany jiaby.’—Sal. 45:16.
11. Mila mianatra ino iro olo “tsy marin̈y” aby io, baka ho voasoratra amy bokiny fiain̈ana an̈arandro?
11 Atsika iziô ndraiky handiniky iro olo “tsy marin̈y”, antokonolo fahadimy farany. Iro io mety tsy nahay lalàn̈any Jehovah, taminiro mbala velon̈o. Zen̈y nahavy iro tsy nan̈ano ny marin̈y. Ke an̈arandro tsy voasoratra amy bokiny fiain̈ana. Fa ndray zen̈y, iro mbala hivilominy Jehovah ndraiky, amy zen̈y iro afaka han̈ano raha hahavy an̈arandro ho voasoratra amy bokiny fiain̈ana. Mbala mila hampian̈a mare iro olo “tsy marin̈y” aby io. Talohany iro naty baka, nisy tamindro nan̈ano raha ten̈a tsy nanjary. Ke iro mila ampianarin̈y hiain̈y mifan̈araka amy fitsipiky Jehovah. Karakory hahavitan̈a zen̈y? Fanjakan̈any Zan̈ahary handamin̈y asa fampianaran̈a mbala tsisy ambaka izy, ambony tany eto.
12. a) Azovy hampianatra iro olo tsy marin̈y aby io? b) Hatao karakory lan̈iany tsy man̈araka raha nampianarin̈y iro?
12 Azovy ma handeha hampianatra iro olo tsy marin̈y aby io? Vahoaka be ndreky iro olo marin̈y hatsangana amy maty. Ho voasoratra an̈aty bokiny fiain̈ana ao an̈aranolo tsy marin̈y aby io izikoa iro mifandray amy Jehovah ndreky manokanten̈a aminany. Baka andan̈itry an̈y, Jesosy Kristy ndreky iro voahosotro aby io handiniky tsarabe raha hataonolo tsy marin̈y aby io. Zahavandro asa iro man̈eky raha nampianarin̈y iro, sa tsy man̈eky. (Apok. 20:4) Ke hatao karakory lan̈iany tsy man̈araka raha nampianarin̈y iro? Iro hivonen̈a. Ary nata iro efa 100 taon̈o, iro mbala hivonen̈a fo. (Isaia 65:20) Jehovah ndreky Jesosy mahita raha an̈aty fô. Tsy ambelandro hisy olo foeky handeha handrobaka donia vaovao.—Isaia 11:9; 60:18; 65:25; Jaona 2:25.
OLO HATSANGANA AMY FIAIN̈ANA NDREKY AMY FITSARAN̈A
13-14. a) Taloha, akory fazahoantsika raha nivolan̈iny Jesosy amy Jaona 5:29? b) Ino raha mila alaintsika onon̈o amy raha nivolan̈iny aby io?
13 Nikoran̈a momba iro olo hivilomin̈y ambony tany eto koa Jesosy. Hoizy: “Ho avy fotoan̈a harin̈esandro jiaby ampasan̈a an̈y feonany, ke iro hiboaka. Zay nan̈ano ny tsara hatsangana amy fiain̈ana, fa zay nan̈ano raha ratsy, hatsangana amy fitsaran̈a.” (Jaona 5:28, 29) Ino ma dikanizen̈y?
14 Atsika taloha nihevitry fa aminy andininy aby io, Jesosy mikoran̈a momba raha handeha hataonolo afarany iro hivilomin̈y. Nieritreritry atsika fa ho hisy sasany amindro hatsangana io han̈ano raha tsara, fa sasany ndraiky han̈ano raha ratsy. Kanefa, aleva onon̈o fa Jesosy iô tsy mivolan̈a fa iro olo vo baka nivilomin̈y aby io han̈ano ny tsara na han̈ano raha ratsy. Fa izy nampiasa maripotoan̈a manondro raha efa loso. Izy mikoran̈a momba lan̈iany olo “nan̈ano ny tsara” ndreky lan̈iany “nan̈ano raha ratsy.” Dikanizen̈y izio mivolan̈a raha nataondro talohany iro naty. Zay izy vo mazava tsara. Fotony tsisy olo hambela han̈ano raha ratsy amy donia vaovao. Tsy maintsy efa raha ratsy vitandro olo tsy marin̈y aby io talohany iro naty fo izy koran̈iny io. Ke ino basy raha tiany Jesosy volan̈iny lera izy nivolan̈a fa hisy olo “hatsangana amy fiain̈ana” ndreky “hatsangana amy fitsaran̈a”?
15. Azovy “hatsangana amy fiain̈ana”, avio nan̈ino?
15 Talohany iro naty, iro olo marin̈y aby io nan̈ano raha tsara, ke iro “hatsangana amy fiain̈ana.” Sady an̈arandro koa baka efa misoratra amy bokiny fiain̈ana ao. Dikanizen̈y mbala iro olo “nan̈ano ny tsara” koran̈iny Jaona 5:29 io fo, iro “olo marin̈y” hatsangana amy maty koran̈iny Asan’ny Apostoly 24:15. Fan̈azavan̈a zen̈y mifan̈araka tsara amy raha koran̈iny Romanina 6:7 ty: “Olo koa fa maty, afaka madiodio amy fahotan̈anany.” Dikanizen̈y, efa nifafany Jehovah fahotan̈anolo marin̈y aby io, iro koa efa naty. Fa raha tsara jiaby nataondro ndreky tsy fivadihan̈andro ndraiky mbala tsaroany fo. (Heb. 6:10) Fa nata iro efa natsangana, iro mbala mila tsy mivadiky fo, baka an̈arandro ho tavela amy bokiny fiain̈ana ao.
16. Ino ma dikany “hatsangana amy fitsaran̈a” zen̈y?
16 Akory fo iro olo nan̈ano raha ratsy talohany iro naty? Efa voafafa fahotan̈andro izikoa iro fa naty. Fa ndray zen̈y, mbala tsy voasoratra an̈aty bokiny fiain̈ana ao an̈arandro fotony iro mbala tsiary nanompo Jehovah. Dikanizen̈y iro olo “nan̈ano raha ratsy” hivilomin̈y io mbala iro “olo tsy marin̈y” hatsangana amy maty koran̈iny Asan’ny Apostoly 24:15. Iro “hatsangana amy fitsaran̈a.” * Karakory ma zen̈y? Jesosy handeha handiniky tsarabe raha ataondro olo tsy marin̈y aby io. (Lioka 22:30) Arakaraka handihanany fotoan̈a, izikoa hitany Jesosy fa iro miala amy raha ratsy nataondro taloha avio manokanten̈a amy Jehovah, an̈arandro hisoratiny an̈aty bokiny fiain̈ana.
17-18. Ino raha mila hataonolo jiaby natsangana tamy maty, avio manondro ino “raha nataondro” koran̈iny Apokalypsy 20:12, 13?
17 Na olo marin̈y na olo tsy marin̈y, izikoa iro fa natsangana amy maty, iro samy tsy maintsy man̈araka lalàn̈a an̈atiny horonamboky vaovao hisokafin̈y aminy 1 000 taon̈o. Karaha ty raha hitany apostoly Jaona tamy fahitan̈a: “Hitako olo maty na tsaiky na olobe, nitsangana man̈oloan̈a sezy fiandrianan̈a, baka io nisy horonamboky nivilarin̈y. Nisy horonamboky araiky hafa koa nivilarin̈y, izio horonambokiny fiain̈ana. Olo naty jiaby nitsarain̈y eraka raha voasoratra taminy horonamboky aby io, arakaraka raha nataondro.”—Apok. 20:12, 13.
18 “Raha nataondro” taminy ombian̈a ma hitsaran̈a iro olo aby natsangana tamy maty io? Raha nataondro talohany iro naty? Ehe. Tsarova fa iro koa efa naty, iro efa afaka madiodio tamy fahotan̈a vitandro. Dikanizen̈y, “raha nataondro” io tsy manondro raha nataondro talohany iro naty, fa raha hataondro amy donia vaovao, lera iro efa baka nampianarin̈y. Nata iro lelahy tsy nivadiky, ôtry ataondry Noa, Samoela, Davida avio Daniela mbala mila mianatra raha momba Jesosy Kristy ndreky mino soron̈o nataony. Ndray iro fo mila man̈ano zen̈y, ke intsaka eky iro olo tsy marin̈y aby io!
19. Han̈ano akory hiafaranolo tsy man̈eky tombontsoa miavaka be io?
19 Han̈ano akory hiafaranolo tsy man̈eky tombontsoa miavaka be io? Mivolan̈a Apokalypsy 20:15 fa “lan̈iany tsy voasoratra an̈aran̈a tamy bokiny fiain̈ana tao natsipy tan̈aty matsabory motro.” Dikanizen̈y, iro haripaka mandrakizay. Ke mila alaintsika antoko fa voasoratra sady tavela an̈aty bokiny fiain̈ana ao fo an̈arantsika. Zen̈y ten̈a raha maventy!
Rahalahy araiky mandray anjara aminy asa fampianaran̈a tsisy ambaka izy hatao amy Fanjakan̈a Arivo Taon̈o (Zahava fehintsoratra 20)
20. Ino ma asa tsara mare hatao amy Fanjakan̈a Arivo Taon̈o an̈y? (Zahava sary amy fon̈ony gazety ty.)
20 Ho tsara mare fiain̈ana amy Fanjakan̈a Arivo Taon̈o! Amy fotoan̈a zen̈y, panompony Zan̈ahary han̈ano asa fampianaran̈a mbala tsiary nisy ambaka izy. Samby hidinihin̈y tsarabe koa amy fotoan̈a zen̈y, raha ataonolo marin̈y ndreky tsy marin̈y. (Isaia 26:9; Asa. 17:31) Akory fomba han̈anaovan̈a asa fampianaran̈a io? Lahatsoratra man̈araka han̈azava zen̈y sady han̈ampy atsika hankasitraka fandaharan̈a tsarabe io.
HIRA 147 Azo Antoka ny Fiainana Mandrakizay
^ Lahatsoratra ty man̈itsy fazahoantsika volan̈a Jesosy amy Jaona 5:28, 29 momba olo “hatsangana amy fiain̈ana” ndreky “hatsangana amy fitsaran̈a.” Manondro ino ma karazan̈a fitsanganan̈a aroe io? Avio, azovy aby tafiditry amindro io? Hianatra zen̈y atsika ato.
^ Rango tamy “nan̈oren̈ana zao tontolo zao” nanoratan̈a boky io. Dikanizen̈y, rango nisianolo afaka mahazo hatsaran̈a baka amy soron̈o nataony Jesosy. (Mat. 25:34; Apok. 17:8) Ke an̈arany Abela voanalohany voasoratra an̈aty bokiny fiain̈ana io, fotony izy olo marin̈y.
^ Taloha, atsika nan̈azava fa, volan̈a “fitsaran̈a” ampiasain̈a eto io mitovy aminolo araiky avoaheloko amy fitsaran̈a in̈y. Mety ho zen̈y ndraiky koa dikany volan̈a “fitsaran̈a” io. Fa izikoa volan̈a man̈odidin̈y zahan̈a, Jesosy koa fa nampiasa volan̈a “fitsaran̈a” eto io, tsy olo voaheloko raha tiany koran̈iny, fa hamian̈a fotoan̈a olo araiky ke harehan̈a maso izy an̈aty fotoan̈a zen̈y. Misy diksionera griky momba Baiboly mivolan̈a “dinihin̈y tsarabe fitondranten̈anolo araiky.”
