LAHATSORATRA FIANARAN̈A 40
‘Han̈ampy Olo Maro Han̈araka Fahamarin̈ana’
“Lan̈iany man̈ampy olo maro han̈araka fahamarin̈ana hikintakintan̈a karaha lakintan̈a, mandrakizay mandrakizay.”—DAN. 12:3.
HIRA 151 Hiantso i Jehovah
HO HITA ATO *
1. Ino raha tsara mare miambin̈y atsika amy Fanjakan̈a Arivo Taon̈o?
AMY Fanjakan̈a Arivo Taon̈ony Kristy, hanomboko hivilomin̈y olo maty. Misaora tsara mare aminy zen̈y! Efa tsy din̈inolo manan̈a havan̈a maty, hahita havandro ho velon̈o ndraiky. Karaha zen̈y koa Jehovah. (Joba 14:15) Miniminia baka haravoan̈anolo jiaby ambony tany eto koa fa hitsena havandro natsangana amy maty. Efa nianarantsika tamy lahatsoratra taloha in̈y fa an̈aranolo “marin̈y” efa avoasoratra an̈aty bokiny fiain̈ana, ke iro “hatsangana amy fiain̈ana.” (Asa. 24:15; Jaona 5:29) Mety ho maro aminy havantsika aby io hatsangana afara heliny Aramagedona. * Sosoko zen̈y koa, “hatsangana amy fitsaran̈a” iro “olo tsy marin̈y”, tsy azovy fa olo mbala tsiary nahay Jehovah na mbala tsiary nanompo izy talohany iro naty.
2-3. a) Izikoa zahan̈a Isaia 11:9, 10, ino ma asa fampianaran̈a tsisy ambaka izy io? b) Ino raha hidinihintsika amy lahatsoratra ty?
2 Iro olo jiaby nivilomin̈y aby io mila ampianarin̈y. (Isa. 26:9; 61:11) Zen̈y mahavy misy asa fampianaran̈a tsisy ambaka izy, handeha halamin̈y. (Vakia Isaia 11:9, 10.) Olo tsy marin̈y aby io mbala mila ampianarin̈y momba Jesosy Kristy, Fanjakan̈any Zan̈ahary, vidipan̈avotan̈a, avio adihevitry momba an̈arany Jehovah ndreky zonany hitondra. Ndray olo marin̈y koa mbala mila ampian̈a haharaka raha nampianariny Jehovah tsihelihely vahoakanany momba fikasan̈anany amy tany. Panomponany sasany baka naty efa elabe talohany nahavitan̈a fanoratan̈a Baiboly. Ke na olo marin̈y na olo tsy marin̈y, samby mbala mila mianatra aby.
3 Amy lahatsoratra ty, atsika handiniky fan̈ontanin̈a aby ty: Akory ma fomba han̈anaovan̈a asa fampianaran̈a tsisy ambaka izy io? Han̈ano akory olo man̈eky fampianaran̈a io? Ke izikoa iro tsy man̈eky ke, han̈ano akory iro? Ten̈a maventy hahaizantsika valiny fan̈ontanian̈a aby io. Ho hitantsika fa misy faminanian̈a mahavarian̈a amy bokiny Daniela ndreky Apokalypsy ao. Iro io han̈ampy atsika hahay tsarabe raha hiboaka amy fotoan̈a hananganan̈a olo maty. Fa alô antsendriky atsika handiniky raha mahavarian̈a koran̈iny faminanian̈a amy Daniela 12:1, 2.
HIFOHA IRO MANDRY AMY LAPOSIERA AO
4-5. Ino raha ambarany Daniela 12:1 momba fotoan̈any farany?
4 Vakia Daniela 12:1. Bokiny Daniela man̈ambara amintsika filaharany raha maro mahavarian̈a hiboaka an̈aty fotoan̈any farany. Ohatra ziô, Daniela 12:1 mivolan̈a fa i Mikaela, na i Jesosy Kristy, ‘mitsangana hiaro vahoakany Zan̈ahary.’ Nanomboko tanteraka faminanian̈a io taminy 1914, tamy Jesosy navoatendry hanjary panjakany Fanjakan̈any Zan̈ahary andan̈itry an̈y.
5 Nivolan̈a koa Daniela fa Jesosy “hitsangana” an̈aty “fotoan̈any fijalian̈a mbala tsisy ambaka izy, rango nisiany firenena ke firaka amy fotoan̈a zen̈y.” Tsy ino “fotoan̈any fijalian̈a” io fa “fahorian̈a be” avoakoran̈a amy Matio 24:21. Ke izikoa fa tapitry fotoan̈any fijalian̈a io, dikanizen̈y aminy Aramagedona, Jesosy hitsangana hiaro vahoakany Jehovah. Amy bokiny Apokalypsy ao, iro io kahian̈a “vahoaka be baka tamy fahorian̈a be.”—Apok. 7:9, 14.
6. Ino raha hiboaka koa fa tafitsaka velon̈o amy fahorian̈a be iro vahoaka be aby io? Hazavà. (Zahava amy gazety ty ato koa “Fan̈ontanian̈any Pamaky” momba olo hatsangana amy maty ambony tany eto.)
6 Vakia Daniela 12:2. Ino amy zay ma raha hiboaka koa fa tafitsaka velon̈o amy fotoan̈any fijalian̈a io vahoaka be? Nieritreritry atsika taloha fa fitsanganan̈a amy maty an̈ohatra, na fifohazany panompony Zan̈ahary amy lafiny arapan̈ahy an̈atiny andra farany, izy koran̈iny andininy io. * Ny marin̈y aminany, izio manondro fananganan̈a amy maty amy donia vaovao. Nan̈ino ma atsika mivolan̈a zen̈y? Amy Joba 17:16 koa ahitan̈a volan̈a “laposiera” io. Ampitovisin̈y amy ‘fasan̈a’ izio ao. Dikanizen̈y, Daniela 12:2 io manondro fananganan̈a amy maty arabakiteny, lera tapitry andra farany ndreky ady Aramagedona.
7. a) Akory hahavy olo sasany hatsangana “hahazo fiain̈ana mandrakizay”? b) Nan̈ino ma zen̈y fitsanganan̈a ‘ten̈a tsara’?
7 Daniela 12:2 mivolan̈a fa hisy olo sasany hatsangana “hahazo fiain̈ana mandrakizay.” Karakory ma zen̈y? Aminy 1 000 taon̈o, lan̈iany olo hatsangana amy maty ke manjary mahay, na mifen̈y fo hahay Jehovah ndreky Jesosy, avio man̈araka volan̈andro, hahazo fiain̈ana tsisy farany. (Jaona 17:3) Efa nisy olo natsangana tamy maty taloha tan̈y, fa araiky zen̈y ‘ten̈a tsara.’ (Heb. 11:35) Mbala naty fo baka iro olo taloha aby in̈y.
8. Nan̈ino olo sasany hatsangana “ho afabaraka ndreky tsy hasian̈a fotiny mandrakizay”?
8 Kanefa tsy olo jiaby hatsangana amy maty han̈eky ampianariny Jehovah. Faminanian̈any Daniela mivolan̈a fa sasany amindro io hatsangana baka “ho afabaraka ndreky tsy hasian̈a fotiny mandrakizay.” Tia mikomy iro io, zen̈y hahavy an̈arandro tsy ho voasoratra amy bokiny fiain̈ana. Ke iro tsy hahazo fiain̈ana mandrakizay. Fa iro handeha haripaka, na tsy “hasian̈a fotiny mandrakizay.” Dikanizen̈y, Daniela 12:2 io mikoran̈a raha miambin̈y olo jiaby natsangana amy maty, arakaraka raha ataondro afarany iro baka nivilomin̈y. * (Apok. 20:12) Sasany hahazo fiain̈ana mandrakizay, fa sasany ndraiky tsy hahazo.
‘HAN̈AMPY OLO MARO HAN̈ARAKA FAHAMARIN̈ANA’
9-10. Ino koa raha hiboaka afarany fahorian̈a be, avio azovy ma iro “hikintakintan̈a mazava be karaha lan̈itry” io?
9 Vakia Daniela 12:3. Ino koa raha hiboaka koa fa tapitry “fotoan̈any fijalian̈a” io? Ankoatrany Daniela 12:2, mikoran̈a raha handalo afarany fahorian̈a be koa andininy faha-3 io.
10 Azovy ma iro “hikintakintan̈a mazava be karaha lan̈itry” io? Man̈ampy atsika hahay valiny zen̈y volan̈any Jesosy amy Matio 13:43 ty: ‘Amy fotoan̈anizen̈y olo marin̈y hipilapilatra mira masoandra, amy Fanjakan̈any Babandro ao.’ Izikoa zahan̈a andininteny man̈odidin̈y, Jesosy mikoran̈a momba iro “zanakany Fanjakan̈a.” Tsy azovy iro io fa, iro rahalahiny voahosotro hiaraka hanjaka aminany andan̈itry. (Mat. 13:38) Ke dikanizen̈y, Daniela 12:3 io mikoran̈a momba voahosotro ndreky asa hataondro amy Fanjakan̈a Arivo Taon̈o.
Hiaraka hiasa marikitry amy Jesosy Kristy hitariky asa fampianaran̈a hatao an̈atiny 1 000 taon̈o, iro 144 000 aby io (Zahava fehintsoratra 11)
11-12. Ino asa hataony 144 000 aby io an̈atiny 1 000 taon̈o?
11 Akory hataondro voahosotro aby io ‘han̈ampy olo maro han̈araka fahamarin̈ana’? An̈atiny 1 000 taon̈o, iro voahosotro aby io hiaraka hiasa marikitry amy Jesosy Kristy, hitariky asa fampianaran̈a hatao ambony tany eto. Iro 144 000 aby io tsy raha ho panjaka fo fa ho pisoron̈o koa. (Apok. 1:6; 5:10; 20:6) Iro han̈ampy ‘hampajanga firenena’ sady han̈ampy olombelon̈o hanjary lavorary tsihelihely. (Apok. 22:1, 2; Ezek. 47:12) Ho ravoravo mare iro voahosotro aby io amy fotoan̈a zen̈y!
12 Azovy aby iro “olo maro” hampian̈a han̈araka fahamarin̈ana io? Tafiditry amizio iro hatsangana amy maty, iro tafitsaka velon̈o aminy Aramagedona, avio iro tsaiky ho teraka amy donia vaovao. Izikoa fa tapitry 1 000 taon̈o, olo jiaby ambony tany eto efa lavorary aby. Ombian̈a an̈arandro ho voasoratra amy stylo fa tsy amy crayon, ke tsy mety fafan̈a eky an̈aty bokiny fiain̈ana ao?
FITSAPAN̈A FARANY
13-14. Mila man̈ino olo lavorary jiaby vo hahazo fiain̈ana mandrakizay?
13 Tsara alaintsika onon̈o fa olo lavorary tsy voatery hahazo fiain̈ana mandrakizay. Karaha zen̈y ziô Adama ndreky Eva. Samy lavorary iro fivadiany, kanefa iro mbala nila nan̈aboaka fa iro nan̈araka volan̈a Zan̈ahary Jehovah, zay vo hahazo fiain̈ana mandrakizay. Mampalahelo fa iro tsy nan̈araka volan̈anany.—Rom. 5:12.
14 Han̈ano akory olo ambony tany eto amy farany 1 000 taon̈o? Iro jiaby efa lavorary. Ke iro jiaby io ma samy hanohan̈a zony Jehovah hitondra mandrakizay? Sa sasany han̈ano karaha Adama ndreky Eva, ke hivadiky nata efa lavorary? Akory hahaizan̈a valiny fan̈ontanian̈a aby zen̈y?
15-16. a) Ombian̈a olombelon̈o jiaby afaka han̈aboaka fa iro tsy mivadiky amy Jehovah? b) Ino vokatrany fitsapan̈a farany io?
15 Satana higadrain̈y an̈atiny 1 000 taon̈o, ke tsy hahavita hamitaka olo antsendriky. Kanefa havosotro izy amy farany 1 000 taon̈o, ke izy hifen̈y hamitaka olo lavorary. Amy leranizen̈y, olo lavorary jiaby ambony tany eto afaka man̈aboaka tsarabe asa iro han̈aja sa tsy han̈aja an̈arany Zan̈ahary ndreky hanohan̈a zonany hitondra. (Apok. 20:7-10) Ke arakaraka raha ataonolo tsiaraikiaraiky hahitan̈a asa vain̈y hisoratin̈y mandrakizay amy bokiny fiain̈ana ao an̈aranany, sa tsy vain̈y.
16 Baiboly mivolan̈a fa hisy olo sasany hivadiky amy Jehovah karaha Adama ndreky Eva in̈y, ndreky tsy han̈eky fitondrasan̈anany. Ino raha handeha hahazo iro olo aby io? Mivolan̈a Apokalypsy 20:15 fa “lan̈iany tsy voasoratra an̈aran̈a tamy bokiny fiain̈ana tao natsipy tan̈aty matsabory motro.” Dikanizen̈y, haripaka mandrakizay iro pikomy aby io. Fa ankamarozanolo lavorary ndraiky ho tafitsaka amy fitsapan̈a farany io. Ke an̈arandro tsy ho voafafa amy bokiny fiain̈ana ao eky.
AMY “FOTOAN̈ANY FARANY”
17. Ino ma raha nivolan̈iny anjely tamy Daniela fa hiboaka aminy andrantsika zioty? (Daniela 12:4, 8-10)
17 Farandraha tsara eky mieritreritry raha hiboaka aminy hoavy! Fa nisy anjely koa nivolan̈a tamy Daniela fa hisy raha maventy hiboaka amy “fotoan̈any farany” misy atsika zioty. (Vakia Daniela 12:4, 8-10; 2 Tim. 3:1-5) Anjely io nivolan̈a taminany fa ‘hitombo mare ny ten̈a fahaizan̈a.’ Ke hahaihazava amy vahoakany Zan̈ahary fo faminanian̈a amy bokiny Daniela. Nivolan̈a koa anjely io fa amy fotoan̈a zen̈y, ‘olo ratsy fan̈ahy mbala han̈ano raha ratsy fo. Avio tsisy olo ratsy fan̈ahy hahazo dikany volan̈a zen̈y.’
18. Ino ma raha hahazo olo ratsy fan̈ahy teteky iô?
18 Amizioty, karaha manintsinintsy fo olo ratsy fan̈ahy ndray man̈ano raha ratsy. (Mal. 3:14, 15) Efa tsy ho ela Jesosy hitsara lan̈iany olo ampiran̈iny amy bengy, avio izy han̈asaraka iro aminy ondrikondriky. (Mat. 25:31-33) Ke iro tsy ho tafitsaka velon̈o amy fahorian̈a be, sady tsy hatsangana amy maty amy donia vaovao. Tsy zen̈y fo, an̈arandro tsy ho voasoratra amy “boky fahatsiarovan̈a” voakoran̈a amy Malakia 3:16.
19. Ino ma tokony hataontsika amy zioty, avio nan̈ino? (Malakia 3:16-18)
19 Efa zioty edy atsika tokony han̈aboaka fa atsika tsy an̈isanolo ratsy fan̈ahy. (Vakia Malakia 3:16-18.) Jehovah efa mamory ‘fanan̈ananany manokana’, tsy azovy zen̈y fa olo valera aminany. Azo antoko fa tiantsika ho an̈isanizen̈y.
Amy donia vaovao, “hitsangana” baka hahazo anjarandro Daniela ndreky olo tsy foentsika aby io avio olo maro hafa. Ho ravoravo mare atsika hahita zen̈y! (Zahava fehintsoratra 20)
20. Ino ma fampan̈antinan̈a farany nazony Daniela, avio nan̈ino efa tsy din̈inao andra hahatantirahany zen̈y?
20 Ten̈a miavaka fotoan̈a iain̈antsika zioty. Fa mbala miavaka mandilatra zen̈y raha hiboaka atoato. Handeha hadoso raha ratsy jiaby. Baka io, ho tanteraka raha nampan̈antinainy Jehovah tamy Daniela ty: “Amparany an̈y, anao hitsangana mba hahazo anjaranao.” Zen̈y raha ho hitantsika teteky iô. (Dan. 12:13) Efa tsy din̈inao ma hahita Daniela ndreky iro olo tsy foenao aby io hitsangana amy maty? Koa zen̈y, rango ziô mifen̈a erakany vitanao tsy hivadiky amy Jehovah, amy zen̈y azo antoko tsara fa tsy ho voafafa amy bokiny fiain̈ana ao foeky an̈aranao.
HIRA 80 “Andramo ka Jereo fa Tsara i Jehovah”
^ Lahatsoratra ty man̈itsy fazahoantsika raha koran̈iny Daniela 12:2, 3 momba asa fampianaran̈a tsisy ambaka izy. Hizahavantsika ombian̈a raha zen̈y, avio azovy aby handray anjara amizio. Hizahavantsika koa nan̈ino asa fampianaran̈a io han̈ampy iro olo ambony tany eto ho von̈ono hiatriky fitsapan̈a farany, lera tapitry Fanjakan̈a Arivo Taon̈ony Kristy.
^ Fananganan̈a olo maty io mety hanomboko aminolo naty tan̈atiny andra farany antsendriky, avio miteky amy taranaka naty talohandro, baka io miteky miteky fo. Koa zen̈y edy izy, isaka taranaka ho afaka hitsena olo haindro. Soratra Masin̈y ziô mivolan̈a fa hatsangana ‘eraka filaharany’ iro handeha andan̈itry an̈y. Ke na karakory na karakory, azo antoko fa hilamin̈y tsarabe koa fananganan̈a olo maty ambony tany eto.—1 Kor. 14:33; 15:23.
^ Fan̈azavan̈a io man̈itsy fan̈azavan̈a taloha amy boky Diniho ny Faminanian’i Daniela! toko 17, ndreky amy Ny Tilikambo Fiambenana 1 Oktobra 1987, p. 21-25.
^ “Olo marin̈y” ndreky “olo tsy marin̈y” koran̈iny aminy Asan’ny Apostoly 24:15, avio “zay nan̈ano ny tsara” ndreky “zay nan̈ano raha ratsy” amy Jaona 5:29 ndraiky manondro raha nataonolo hatsangana aby io talohany iro naty.
