1. Nan̈ino tsy gaga atsika mahita olo amy donia ty tsy mifampatoky?

 EFA tsy hainolo amy doniany Satana ty eky azovy olo mety hatokisan̈a. Matetiky baka iro diso fan̈antinan̈a amy raha ataony pivarotro, pan̈ano politiky, ndreky pitondra fivavahan̈a. Ke firaka amy namandro, jiranindro, avio havandro mbala tsy hatokisandro fo. Tsy mahagaga atsika raha zen̈y, fotony Baiboly efa nivolan̈a karaha ty: “Aminandra farany an̈y, ... olo ... tsy ho men̈atra mivadiky, ... ho pan̈aratsy olo, ... ho pamadiky.” Dikanizen̈y, olo hangala tahaka jeriny Satana, zan̈ahariny donia ty. Kanefa Satana tsy mety hatokisan̈a foeky.​—2 Tim. 3:1-4; 2 Kor. 4:4.

2. a) Azovy aby ma ten̈a mety atokisantsika? b) Ino fan̈ontanian̈a mety avy amy jerinolo sasany?

² Atsika Kristianin̈y ndraiky mahay fa atsika afaka matoky Jehovah amy raha jiaby. (Jer. 17:7, 8) Atsika matoky fa izy ten̈a tia atsika sady izy tsy han̈ary kamaradinany foeky. (Sal. 9:10) Atsika koa afaka matoky Jesosy Kristy fotony izy nahafoe ain̈inany tamintsika. (1 Pet. 3:18) Afaka matoky toro lalan̈a amy Baiboly koa atsika. Baka tamy raha niain̈antsika nahitantsika zen̈y. (2 Tim. 3:16, 17) Atsika resy lahatra fa atsika afaka matoky Jehovah, Jesosy, ndreky Baiboly. Fa sasany amintsika mety han̈ontany karaha ty: Akory fo iro piaramanompo amintsika aby io, iro koa ma mba mety hatokisan̈a? Ke izikoa ia valiny, nan̈ino?

3. Ino tombontsoa miavaka anan̈antsika? (Marka 10:29, 30)

³ Atsika nifidiny Jehovah ho an̈isany fianakavian̈anany. Tombontsoa tsisy ambaka izy raha zen̈y, fotony hazahoan̈a hatsaran̈a maro! (Vakia Marka 10:29, 30.) Manan̈a rahalahy ndreky anabavy erantany atsika. Karaha atsika fo, iro io tia Jehovah ndreky mifen̈y mare man̈araka fitsipikinany amy fiain̈anandro. Mety tsy hitovy fivolan̈anantsika, kolontsain̈intsika, ndreky fisikinan̈antsika arakaraka toeran̈a misy atsika. Fa ndray zen̈y, efa  tiantsika edy iro, nata mbala vo sambany atsika fanojy iro. Ravoravo mare atsika miaraka amindro midera ndreky manompo Babantsika be fitiavan̈a andan̈itry an̈y.​—Sal. 133:1.

4. Nan̈ino ma atsika mila iro rahalahy ndreky ranabavintsika aby io?

⁴ Lombolombony taloha, atsika amy zioty ten̈a mila miray sain̈y amindro rahalahy ndreky ranabavintsika aby io. Nan̈ino? Ndraikindraiky, iro man̈ampy atsika koa fa misy raha manahiran̈a atsika. (Rom. 15:1; Gal. 6:2) Iro koa mandrisiky atsika hazoto amy fanompoan̈a fo ndreky hifandray marikitry amy Jehovah fo. (1 Tes. 5:11; Heb. 10:23-25) Mahatsiaro voaro koa atsika an̈atiny fiangonan̈a. Fotony iro rahalahy ndreky ranabavintsika aby io man̈ampy atsika hahavita hanohitry Satana Devoly ndreky donia ratsinany. Tsy ho ela, Satana ndreky iro olo fiheziny aby io hanafiky vahoakany Zan̈ahary. Ho ravoravo mare atsika amy zen̈y manan̈a iro piaramanompo amintsika aby io!

5. Nan̈ino mety ho sarotro aminolo sasany hatoky rahalahy ndreky ranabavy?

⁵ Sarotro amy piaramanompo sasany ndraiky matoky iro rahalahy ndreky ranabavy aby io. Nan̈ino? Mety efa nisy piaramanompo baka tsy nahatana sekire na nivadiky tamy fifan̈ikian̈a. Na koa nety nisy olo tamy fiangonan̈a nivolan̈a na nan̈ano raha nankarary fôndro mare. Anao ma efa navoa raha karaha zen̈y? Izikoa zen̈y mety ho sarotro aminao hatoky olo. Ke ino basy raha han̈ampy anao hatoky piaramanompo?

6. Nan̈ino fitiavan̈a io man̈ampy atsika hatoky olo? (1 Korintianina 13:4-8)

⁶ Atokisantsika olo araiky izikoa tiantsika. Mikoran̈a toetry maro mampiavaka fitiavan̈a Korintianina voanalohany toko faha-​13. Iro toetra aby zen̈y han̈ampy atsika hatoky olo na han̈ampody ndraiky fatokisantsika olo. (Vakia  1 Korintianina 13:4-8.) Andininy faha-4 ziô mivolan̈a fa “fitiavan̈a io maharidraha ndreky tsara fan̈ahy.” Jehovah ohatra maharidraha amintsika fo, nata atsika manota aminany. Karaha zen̈y koa, atsika mila maharidraha amindro piaramanompo amintsika aby io, izikoa iro tafivolan̈a na tafan̈ano raha mampameloko na mampalahelo atsika. Andininy faha-5 koa mivolan̈a: “[Fitiavan̈a] tsy mora meloko, tsy mitana heloko ampô.” Dikanizen̈y, atsika tsy tokony hitana an̈aty jerintsika ao raha nampalahelo nataondro rahalahy ndreky ranabavintsika aby io tamintsika. Mandrisiky atsika ‘tsy ho mora meloko’ Mpitoriteny 7:9. Ke ten̈a tsara arehantsika raha volan̈iny Efesianina 4:26 ty: “Aza atao tatrany masoandra milentiky helokonaro.”

7. Nan̈ino toro lalan̈a amy Matio 7:1-5 man̈ampy atsika hatoky piaramanompo?

⁷ Ino koa fomba hafa han̈ampy atsika hatoky iro rahalahy ndreky ranabavintsika aby io? Mila ataontsika mitovy amy niny Jehovah fomba fahitantsika iro. Jehovah ziô tia iro ndreky man̈adin̈a hadisovan̈andro. Tsy tokony mba han̈ano karaha zen̈y koa ma atsika? (Sal. 130:3) Atsika tsy mifantoko aminy hadisovan̈andro, fa atsika mifen̈y mangala onon̈o toetry tsarandro ndreky mandiniky raha tsara mety ho vitandro. (Vakia Matio 7:1-5.) Fitiavan̈a “mino raha jiaby”, zen̈y mahavy atsika matoky iro piaramanompo amintsika aby io. (1 Kor. 13:7) Iro tsy mieritreritry han̈ano raha ratsy atsika. Tsy maintsy misy antony tsara fo mahavy iro man̈ano raha araiky. Zen̈y ma mivolan̈a fa atsika tiany Jehovah hatokitoky olo fahatany fo? Ehe. Atsika matoky iro fotony iro efa nan̈aboaka fa iro mety atokisan̈a. *

8. Akory hahavy anao hatoky iro rahalahy ndreky ranabavinao aby io?

⁸ Mety elaela atsika vo matoky iro rahalahy ndreky ranabavintsika aby io. Ino raha han̈ampy atsika hatoky iro? Ataova raha hahaizanao iro tsarabe. Koa fa lera mivory, mikoran̈esa amindro. Miaraha manompo amindro. Manàn̈a faharetan̈a, ke ambilà mandeha fotoan̈a baka an̈aboahandro fa iro ten̈a mety atokisan̈a. Mazava hoazy fa anao mety tsy direkty hikoran̈a raha jiaby an̈aty jerinao ndreky raha tsapanao aminolo vo hitanao. Fa arakarakany ifankahaizanaro, anao mety loso tihikoran̈a raha maromaro aminany. (Lioka 16:10) Akory ndraiky ataonao izikoa misy rahalahy nandiso fanantinan̈a anao? Aza malaky rivan̈a aminany, fa ambilà mandeha fotoan̈a. Raha nandalo io aza ambela hisakana anao tsy hatoky rahalahy ndreky ranabavy jiaby. Efa nisy panompony Jehovah maromaro tojy raha karaha zen̈y taloha tan̈y. Fa zen̈y tsy nahavy iro tsy hatoky olo eky. Alô atsika handiniky modely nambelandro.

9. a) Akory nan̈aboahany Hana fa izy natoky lamin̈y napetrakany Jehovah fo nata nan̈ano hadisovan̈a iro olo nisoloten̈a Izy aby io? b) Ino raha ianarantsika baka aminy ohatrany Hana? (Zahava sary.)

⁹ Anao ma efa navy nisy fotoan̈a diso fan̈antinan̈a tamy raha nataony rahalahy araiky manan̈a andraikitry? Izikoa zen̈y, mety hahatsara anao mandiniky ohatrany Hana. Tamy fotoan̈a zen̈y, pisoron̈obe taminy Israely i Ely. Izy olo nanan̈a andraikitry farany an̈abo tamy fanompoan̈a Jehovah. Fa fianakavian̈any Ely ndraiky tsy modely tsara. Pisoron̈o iro zanany aby io, kanefa iro natetiky nan̈ano raha ratsy sady nangalabaraka. Fa zara izikoa Ely nan̈itsy iro. Ndray zen̈y, Ely tsy direkty nadosony Jehovah tsy ho pisoron̈obe. Ke akory nataony Hana? Izy ma efa tsy nandeha nanompo tamy  tran̈olay tan̈y eky, fotony Ely mbala pisoron̈obe tao? Ehe, nandeha tan̈y fo izy. Tandraraiky koa, Hana kivy mare ke nivavaka tamy Jehovah. Fa Ely koa fa nahita izy, tsy mba nan̈ontany antsendriky, fa izy direkty nivolan̈a fa mamo i Hana. (1 Sam. 1:12-16) Fa ndray zen̈y raha nataony Ely, mbala nivoady fo Hana fa izikoa izy mahazo zanaka lelahy, tsaiky io alefany manompo amy tran̈olay an̈y. Ely mbala natokisany fo hikarakara zanany. (1 Sam. 1:11) Nataony Jehovah karakory amy zay zanaka Ely aby in̈y? Iro nisaziny tamy fotoan̈a mety. (1 Sam. 4:17) Fa i Hana ndraiky nitahiny Jehovah ke namezany zanaka lelahy, tsy azovy fa Samoela.​—1 Sam. 1:17-20.

10. Akory nan̈aboahany Davida fa izy mbala natoky olo fo, ndray efa nisy olo nivadiky taminany?

¹⁰ Fa navy nisy namanao marikitry ma namitaka anao? Izikoa zen̈y, diniha tantarany Panjaka Davida. An̈isany kamaradiny Davida i Ahitofela. Kanefa Absaloma zanakany Davida koa fa nitady hangala fanjakan̈any babany, Ahitofela nilan̈y taminy Absaloma. Misora nafy tamy Davida mare raha zen̈y! Samby nivadiky taminany baka na zanany io na namany io. Fa raha zen̈y tsy nambelany Davida hisakana izy tsy hatoky olo hafa eky. Mbala natokisany fo, ohatra, i Hosay kamaradiny. Izy baka tsy nivadiky tamy Davida foeky. Nata izy aby nirisiky ain̈inany han̈ampian̈a Davida. Naboakany baka tamy zen̈y fa izy ten̈a naman̈a tsara. Ke tsy diso Davida izikoa natoky izy.​—2 Sam. 17:1-16.

11. Akory nan̈aboahany panompony Nabala araiky fa izy natoky Abigaila?

¹¹ Diniha koa ohatrany panompony Nabala araiky ty. Nisy fotoan̈a Davida ndreky olonany aby io niaro panompony Nabala, lelahy Israelita pan̈arivo. Tafara tatỳ, Davida mba nangataka tamy Nabala hanin̈y zay tindriny, amiany olonany aby io. Fa Nabala tsy nan̈amia foeky. Neloko mare Davida, ke tapakevitry izy hamono lelahy jiaby tantran̈ony Nabala tao. Izikoa fa ren̈iny panompony Nabala araiky raha zen̈y, direkty izy nandeha nitantara taminy Abigaila, vadiny Nabala. Hainy baka fa izy koa mba an̈isanolo hifoaty. Hainy koa fa Abigaila afaka man̈avotro iro. Marin̈y fa izy afaka nilefa, fa tsy zen̈y raha nataony. Izy natoky fa vitany Abigaila hamaha problemo io. Nan̈ino? Fotony Abigaila viavy nalaza misain̈y. Ke ino amy zay raha niboaka? Nisy korazy mare Abigaila  nandeha nandresy lahatra Davida mba hiova hevitry. Hita baka amy zen̈y fa tsy very boriny fatokisany panompo in̈y Abigaila. (1 Sam. 25:2-35) Abigaila natoky fa Davida han̈ano raha tokony hatao.

12. Akory nan̈aboahany Jesosy fa izy natoky pianatranany fo ndray iro nan̈ano raha tsy nety?

¹² Nan̈ano hadisovan̈a iro pianatrany Jesosy aby io, fa izy mbala natoky iro fo. (Jaona 15:15, 16) Nisy fotoan̈a, Jakoba ndreky Jaona nangataka tamy Jesosy baka izy han̈amia iro plasy farany tsara amy Fanjakan̈any Zan̈ahary. Akory nataony Jesosy koa fa naharen̈y zen̈y? Izy ma nieritreritry fa ratsy antony anompoandro Jehovah? Nadosony tsy ho apostoly ma iro? Ehe. (Mar. 10: 35-40) Avio, taminy alin̈y nanamboran̈a izy, pianatranany jiaby niala izy. (Mat. 26:56) Fa ndray zen̈y, izy mbala natoky iro fo. Hainy fa iro olo tsy lavorary, ke ‘tiany fo iro firaka tamy farany.’ (Jaona 13:1) Ndray izy aby, lera Jesosy natsangana tamy maty, iro apostolinany 11 tsy nivadiky aby io namezany andraikitry maventy. Iro nasainy hitariky asa fitorian̈a ndreky fan̈anaovan̈a pianatra, avio hikarakara ondrikondrikinany. (Mat. 28:19, 20; Jaona 21:15-17) Tsy diso Jesosy natoky iro lelahy tsy lavorary aby io. Fotony iro jiaby samby tsy nivadiky firaka iro naty. Ke na i Hana, na Davida, na panompony Nabala, na Abigaila, na Jesosy samby nan̈amia ohatra tsara tamy fatokisan̈a olo tsy lavorary.

13. Nan̈ino mety ho sarotro amintsika hatoky olo?

¹³ Efa navy nisy fotoan̈a ma anao nikoran̈a sekire tamy rahalahy araiky natokisanao? Misaora narary mare fonao izikoa ren̈inao fa naboeliny taminolo sekirenao io. Zen̈y ziô raha navoa ranabavy araiky. Izy nitantara problemonany taminy antipan̈ahy araiky, fotony izy natoky fa izio tsy hitantarainy aminolo. Kanefa amarainizin̈y, vadiny antipan̈ahy io nikaiky ranabavy io. Ren̈iny baka fa misy problemo ranabavy io ke izy tihankahery rahavaviny io. Nanjary sarotro tamy ranabavy io natoky antipan̈ahy in̈y. Ke akory nataony? Izy nangataka fan̈ampian̈a taminy antipan̈ahy araiky hafa baka ho vitany hatoky ndraiky antipan̈ahy nivolan̈any problemonany in̈y, ndreky antipan̈ahy jiaby. Ten̈a mety tsarabe raha nataony zen̈y.

14. Ino raha nan̈ampy rahalahy araiky himpody hatoky olo ndraiky?

¹⁴ Tan̈aty fotoan̈a lava, nisy rahalahy araiky neloko mare taminy antipan̈ahy aroe. Izy baka nieritreritry fa iro io efa tsy mety hatokisany eky. Fa izy baka tio nisaintsain̈y raha matomboko nivolan̈iny rahalahy araiky najainy mare. Ty volan̈a nisaintsain̈iny io: “Tsy iro piaramanompo amintsika aby io fahavalontsika, fa i Satana.” Ke nidinihiny tsara raha tokony hataony, avio izy nivavaka tamy Jehovah baka han̈ampy izy. Ke nanjary vitany fo baka tio nihavan̈a tamindro antipan̈ahy aroe in̈y.

15. Nan̈ino mila fotoan̈a olo araiky vo mahavita mimpody matoky olo ndraiky? Man̈ameza ohatra.

¹⁵ Anao ma efa navy nadoso tamy tombontsoampanompoan̈a nanan̈anao? Ten̈a mafy raha zen̈y. Karaha zen̈y ziô raha nahazo Grete. Iro roeny mamany Vavolombelon̈o Jehovah tsy nivadiky. Taminy 1930 tan̈y, voasakantsakan̈a asantsika tan Allemagne, tamy fotoan̈any Nazi. Nanan̈a tombontsoa nan̈ano dika soratra Tilikambo Fiambesan̈a zarain̈y amy piaramanompo i Grete tamy zen̈y, ary ten̈a ravoravo izy nan̈ano izio. Fa papany ndraiky nanohitry fahamarin̈ana. Ke izikoa fa haindro rahalahy aby io raha zen̈y, nadosondro tamy Grete tombontsoanany io. Iro navozo tsao hambarany papany Grete tamindro panohitry aby io raha mikasiky fiangonan̈a. Fa tsy zen̈y fo raha niaretany. Taminy Ady Lehibe II, tsy natokisandro rahalahy aby io foeky  iro roeny mamany, ke tsy namiandro gazety. Baka io izy ndreky mamany tsy nivolan̈andro foeky, koa fa fanojy iro tamy lalan̈a. Nampalahelo Grete mare raha zen̈y. Ela be izy vo nahavita namela heloko iro rahalahy aby io ndreky nimpody natoky iro ndraiky. Fa izikoa fa hainy fa Jehovah efa namela helokondro, izy koa mba nan̈ano karaha zen̈y. *

16. Nan̈ino atsika mila mifen̈y mare mba hatoky iro piaramanompo aby io?

¹⁶ Ten̈a tsy mora raha navoa Ranabavy Grete in̈y! Izikoa anao efa navoa raha karaha zen̈y, mifen̈a fo man̈ano raha hahavy anao hatoky olo. Mety tsy ho vita betibetiky ndraiky zen̈y, fa ezaka ataonao tsy very boriny. Karaha ty baka, efa tsy hihinankanin̈y eky ma anao izikoa sendra tafihina raha namparary kibonao? Anao hihina fo, fa anao fo hitandritandrin̈y amy raha ohaninao. Ambaka zen̈y koa, raha araiky nampakivy nataony piaramanompo tsy tokony hambelantsika hisakana atsika tsy hatoky piaramanompo jiaby. Iro io baka tsy lavorary karaha atsika fo. Ho sambatra atsika izikoa mifen̈y fo hatoky iro rahalahintsika aby io. Zen̈y koa han̈ampy atsika han̈ano raha hahavy olo jiaby an̈ivony fiangonan̈a hifampatoky.

17. Nan̈ino ma ten̈a raha maventy fifampitokisan̈a io, avio ino raha hidinihintsika amy lahatsoratra man̈araka?

¹⁷ Sarotro mahita olo atokisan̈a amy doniany Satana ty. Fa atsika ndraiky afaka matoky iro rahalahy ndreky ranabavintsika aby io, fotony atsika mifankatia. Ravoravo ndreky miray sain̈y atsika izikoa mifampatoky. Zen̈y koa hiaro atsika lera misy raha sarotro miboaka aminy amaray an̈y. Akory fo izikoa nisy olo nandiso fan̈antinan̈a anao ke efa tsy atokisanao eky? Aleva tahaka fomba fahitany Jehovah raha, areha toro lalan̈a Baiboly, tiava mare iro rahalahy ndreky ranabavy aby io, avio aleva tahaka ohatranolo aby amy Baiboly ao. Ho vitantsika handefitry ndreky hatoky ndraiky iro rahalahintsika aby io. Izikoa atsika man̈ano zen̈y, atsika hahazo naman̈a maro mankatia atsika mandilatra havantsika. (Ohab. 18:24) Fifampitokisan̈a io tsy mandeha ila. Ke akory an̈aboahantsika amindro piaramanompo aby io fa atsika mety atokisan̈a? Zen̈y raha hidinihintsika amy lahatsoratra man̈araka.