Tafara heliny 1940, raimandreniko nianatra Baiboly tamy Vavolombelon̈o Jehovah. Fa iro baka tio nijanon̈o. Mamako ndraiky mbala nahazo gazety Tilikambo Fiambesan̈a ndreky Mifohaza! fo. Taminy 1950, zahay fianakavian̈a araiky nan̈eky han̈atriky fivoriambe iraisampirenena ta New York.

Tsy ela tafarany zen̈y, nitsidiky zahay Rahalahy Lawrence Jeffries. Izy tihan̈ampy zaho hianatra fahamarin̈ana. Fa tamy voanalohany, tsy lanilaniko raha ataony Vavolombelon̈o Jehovah, fotony iro tsy man̈ano politiky avio tsy man̈ano maramila. Ho zaho: “Izikoa tsy man̈eky handeha hiady aby olo jiaby an Ameriky eto, tsy ndraiky ho avy edy fahavalo hangala tany jiaby ty?” Fa Rahalahy Jeffries nan̈azava moramora taminaka karaha ty: “Izikoa olo jiaby an Ameriky eto manompo Zan̈ahary Jehovah, fahitanao izy Jehovah ma hitazan̈a fo koa misy fahavalo avy?” Hitako baka tamy raha nivolan̈iny io ndreky raha hafa nazavainy taminaka, fa kaiky zaho diso hevitry. Ke loso nahaitihianatra Baiboly fo zaho.

Nisy gazety Tilikambo Fiambesan̈a ndreky Mifohaza! efa ela aby zay najarisiny mamako tan̈aty lakaly. Nazoto mare zaho namaky iro io. Koa fa nandeha fotoan̈a, tontohitry zaho fa fahamarin̈ana ankitin̈y raha nianarako io. Ke zaho nan̈eky hianatra Baiboly tamy Rahalahy Jeffries. Nanomboko nivory tsy tapaka koa zaho. Ten̈a tiako raha nianarako! Ke loso pitory vaovao tsara zaho. Niova tanjon̈onaka izikoa fa haiko fa efa ten̈a ‘marikitry andra maventiny Jehovah.’ (Zef. 1:14) Zaho efa tsy nan̈iry hianatra aminy iniversite eky, fa tihan̈ampy olo hianatra fahamarin̈ana.

Vita fianaran̈anaka tamy lise tamy 13 Ziain 1956. Telo andra tafaranizen̈y, tamy fivoriambeny faritry zaho natao batisa. Tsy nampoiziko foeky fa ho maro  hatsaran̈a ho azoko, zaho koa fa nanokan̈a fiain̈ananaka hianaran̈a ndreky hampianaran̈a raha momba Jehovah.

Nanjary pisava lalan̈a zaho, tsiota fanjava tafarany batisanaka. Nisy lahatsoratra ty tamy Fanompoantsika Ilay Fanjakana Desambra 1956: “Afaka Manompo amy Tany Ilàn̈a Pitory Maro ma Anao?” Nahazo zorontran̈onaka izio, ke zaho tihandeha hitory vaovao tsara tamy tany mbala vitsy pitory.​—Mat. 24:14.

Zaho nifindra ta Edgefield, a Caroline Atsimo. Efatra fo pitory tan̈y tamy zen̈y, ke zaho loso fahadimindro. Tamy salony tran̈ony rahalahy araiky, zahay nivory. Mandeha 100 lera laniko tamy fanompoan̈a isaka fanjava. Zaho naro raha natao, fotony izikoa fa nandeha nanompo, zaho nitariky. Fa tsy basinizen̈y fa mbala tio koa kabaro tamy fivorian̈a. Ndray zen̈y, mahagaga fa arakaraka nifen̈ako nan̈ano asany fiangonan̈a, nahainaro fo raha nianarako momba Jehovah.

Nisy man̈angy araiky nampianariko Baiboly nanan̈a tran̈o fikarakaran̈a fandiven̈ana. Ta Johnston, tanàna tsy lavitry zahay nisy izio. Tsara fan̈ahy izy, ke zaho namiany asa tapapotoan̈a, avio nisy tran̈o hely araiky nambelany hivorianay.

Pisava lalan̈a Rahalahy Jolly Jeffries, zanakany rahalahy nampianatra Baiboly zaho. Niala ta Brooklyn, a New York izy ke nandeha nan̈itatra niaraka taminaka. Nisy rahalahy araiky nampindran̈a zahay tomabily mety atao tran̈o, ke tao zahay nipetraka.

Ambany karamany piasa ta Caroline Atsimo. Aroe na telo dolara fo vola azo an̈atiny andra araiky. Tandraraiky, tsy maintsy vola hely tavela taminaka in̈y fo nividianako hanin̈y, tamy labotiky. Ke zaho koa fa niboaka baka tao, nisy lelahy zay nan̈aton̈o zaho sady nan̈ontany: “Anao tsy mitady asa? Karamaiko dolara araiky isaka lera anao koa pare.” Zaho nirahiny nan̈adio tany nan̈anaovan̈a fan̈oren̈ana zay. Telo andra zaho nan̈ano izio. Hitako baka tamy zen̈y fa zaho mbala tiany Jehovah hijanon̈o ta Edgefield. Nata hely fo volanaka, zaho mbala nafaka nan̈atriky fivoriambe iraisampirenena natao ta New York, taminy 1958.

Nisy raha tsarabe zay nandalo taminy andra faharoe tamy fivoriambe io. Taminio zaho fanojy Ruby Wadlington. Izy pisava lalan̈a maharitry ta Gallatin, Tennessee. Zahay roe samby nan̈iry han̈ano misionera. Ke zahay nan̈atriky fivorian̈a natao ninolo tihan̈ano Sekoliny Gileada, tamy fivoriambe io. Tafara tatỳ, zahay roe nanomboko nifandefa taratasy. Baka tio zaho nirahin̈y han̈ano kabaro ta Gallatin. Nararaotiko tamy zen̈y, nangataka izy ho vadiko. Avio amy zay, zaho nifindra tamy fiangonan̈a nisy Ruby. Nan̈ano mariazy zahay taminy 1959.

Tamy zaho 23 taon̈o, zaho navoatendry pikarakara fiangonan̈any Gallatin (antipan̈ahy pandrindra fikahian̈a zen̈y amy zioty). Zahay fiangonan̈a  voanalohany nitsidihiny Charles Thompson. Vo voatendry piandraikitry faritry izy tamy zen̈y. Izy efa ampy traikefa. Fa izy mbala nan̈ontany hevitrinaka fo amy raha ilainy piaramanompo ndreky fomba nataony piandraikitry faritry hafa koa fa nikarakara fiangonan̈a. An̈isany raha nianarako taminany, sitrany man̈ontany antsendriky ndreky miezaka mandiniky raha ten̈a misy, alohany handamin̈y raha araiky.

Tamy May 1964, zaho voakaiky han̈atriky Sekolin’ny Fanompoana Ilay Fanjakana natao ta South Lansing, a New York. Izio nahadin̈y fanjava araiky. Iro rahalahy aby nampianatra tamy sekoly io nahavy zaho nahaitihianatra raha maro momba Jehovah fo, avio tihinaman̈a marikitry aminany.

Tamy Zanvie 1965, zahay roeny Ruby voakaiky han̈ano asany faritry. Mivelatra mare faritany nanendren̈a zahay. Izio rango ta Knoxville, a Tennessee, firaka tsy lavitry Richmond, a Virginie. Tafiditry an̈atinizio fiangonan̈a ta Caroline Avaratra, Kentucky, ndreky Virginie Andrefa. Fiangonan̈a nisy olo joby fo nitsidihiko tamy zen̈y. Mbala naresaka mare baka fan̈avakavahan̈a tamy faritry atsimony Etazonỳ, ke olo joby ndreky fotsy mbala tsendriky afaka niaraka nivory. Masikiny mare iro piaramanompo aby io, ke zahay nianatra nizara raha nanan̈anay taminolo sahiran̈a. Nisy piandraikitry faritry efa ela zay koa nampianatra zaho leson maventy. Hoizy: “Aboaha fa anao rahalahy, fa tsy sefo, lera mitsidiky fiangonan̈a. Ho afaka han̈ampy iro tsarabe anao izikoa tsapandro fa anao ten̈a rahalahindro ankitin̈y.”

Tamy zahay nitsidiky fiangonan̈a hely zay, Ruby nanomboko nampianatra tsaiky man̈angy misy zanaka viavy hely taon̈o araiky. Mbala tsendriky nisy olo afaka nanohy fianaran̈anany, tamy fiangonan̈a tao. Ke nitohizany Ruby fo izio, fa natao tamy taratasy. Zahay koa fa nimpody nitsidiky fiangonan̈a io, man̈angy io efa nivory tsy tapaka. Loso nisy ranabavy aroe pisava lalan̈a manokan̈a navoatendry tamy fiangonan̈a io. Iro amy zay nanohy fianaran̈any tsaiky man̈angy in̈y. Tsy ela, izy efa vita batisa edy. Kadiriny 30 taon̈o tafara tatỳ, taminy 1995, nisy ranabavy tanora zay nan̈aton̈o Ruby tamy Betelany Patterson. Kaiky izio zanakany man̈angy nampianariny Ruby in̈y. Pianatra tamy Sekoliny Gileada, kilasy faha-100, ranabavy io ndreky vadiny.

Faritry faharoe nitsidihinay, ta Floride. Nila tomabily zahay tamy zen̈y. Ke zahay nividy araiky moramora zay. Kanefa mbala herin̈iandra araiky fo efa nisy raha robaka edy tamy moteranany. Zahay tsisy vola han̈amboaran̈a izio. Zaho nikaiky rahalahy zay, fotony haiko fa izy afaka man̈ampy zahay. Nisy araiky tamy piasanany tao nirahiny nan̈amboatra tomabilinay io. Zahay tsy nangalany rahalahy io vola. “Ambilà fo”, hoizy taminay. Nata zahay aby mbala namezany vola! Hita baka tamy zen̈y fa Jehovah ten̈a mikarakara panomponany ankitin̈y. Izin̈y koa nampianatra zaho hatariky.

Lera zahay nitsidiky fiangonan̈a, zahay nipetraka tamy tran̈ony piaramanompo. Ke zahay loso nahazo kamarady tsara maro. Nisy fotoan̈a, ohatra, zahay niaraka nipetraka tamy fianakavian̈a araiky nanan̈a zanaka lelahy telo taon̈o. Zaho koa fa niboaka, nadin̈ako tamy lamasiny fanoratan̈a tio tatitry nataoko momba fiangonan̈a. Mbala tsy vita firaka tamy farany izio. Hariva andra, lera zaho fa nimpody, hitako fa kaiky tsaiky hely io “nitahitahy” zaho nankefa tatitrinaka in̈y. Tan̈aty taon̈o maro zaho mbala nikotran̈a izy tamizio fo.

Taminy 1971, zaho nahazo taratasy mivolan̈a fa zaho voatendry piandraikitry vondroparitry a New York. Taitry mare zahay! Vo 34 taon̈o fo zaho, tamy zahay fivadiany nifindra tan̈y. Zaho piandraikitry vondroparitry joby hoditry voanalohany nitsidiky tan̈y. Kanefa nandray zaho tsarabe iro.

Tamy zaho piandraikitry vondroparitry, tiako nampianatra raha momba Jehovah isaka farany herin̈iandra, tamy fivoriambeny faritry. Maro tamindro piandraikitry faritry aby io efa zadraharaha mandilatra zaho. Ndray izy aby, araiky tamindro nan̈ano kabarony batisanaka. An̈isandro io koa Theodore Jaracz. Izy nanjary an̈isany Filankevipitantan̈ana tafara tatỳ. Tio koa iro rahalahy maro efa zadraharaha baka tamy Betelany Brooklyn. Ravoravo mare zaho nahita iro piandraikitry faritry ndreky Betelita aby io tsy nihafahafa taminaka. Iro ten̈a piambin̈y be fitiavan̈a ndreky nan̈araka tsarabe volan̈a Zan̈ahary  sady nanohan̈a fandaminan̈a fo. Ten̈a nanetry ten̈a koa iro, ke loso nora taminaka nan̈ano asany vondroparitry.

Taminy 1974, Filankevipitantan̈ana nanendry piandraikitry faritry maromaro hanjary piandraikitry vondroparitry. Fa zaho voatendry piandraikitry faritry ndraiky. Ta Caroline Atsimo faritry niasako. Tamy zen̈y, ravoravo piaramanompo jiaby fotony efa nitambatra fiangonan̈a misy olo joby ndreky olo fotsy.

Voatendry hitsidiky faritry ta Géorgie zaho tamy faramparany taon̈o 1976. An̈elan̈elan̈a Atlanta ndreky Columbus misy izio. Mbala azoko onon̈o fo zaho nan̈ano kabarony fandiven̈ana tsaiky dimy joby hoditry aby zay. Niroanolo baka tran̈ondro, ke naty iro tsaiky aby io. Mamandro ndraiky naratra ke tafiditry lopitaly. Maro piaramanompo nandeha ta lopitaly tan̈y hankahery raimandreniny tsaiky aby io. Samy nandeha tan̈y na joby na fotsy hoditry. Hitako fa be fitiavan̈a marin̈y rahalahy ndreky ranabavy. Hatsarampan̈ahy karaha in̈y, man̈ampy panompony Zan̈ahary hahavita hiatriky raha farany sarotro.

Taminy 1977, zahay navoakaiky han̈ampy tamy tetikasa araiky tamy Betelany Brooklyn. Izio hatao an̈aty fanjava vitsivitsy. Izikoa fa narikitry ho vita tetikasa io, nisy rahalahy aroe an̈isany Filankevipitantan̈ana nikoran̈a taminaka. Iro nan̈ontany tsao zahay fivadiany von̈ono hanompo maharitry amy Betela. Ke zahay nan̈eky.

Tan̈aty 24 taon̈o, zaho niasa tamy Sampandraharahany Fanompoan̈a. Matetiky iro rahalahy aby ao mahazo fan̈ontanian̈a sarotro valian̈a. Rango zay, Filankevipitantan̈ana efa nan̈amia taridalan̈a mifan̈araka amy toro lalan̈a amy Baiboly. Ke izio nampiasain̈y koa fa hamaly fan̈ontanian̈a ndreky lera mampiofan̈a piandraikitry faritry, antipan̈ahy avio pisava lalan̈a. Fampiofan̈ana aby io nan̈ampy olo maro hanjary Kristianin̈y matotro. Ke mahaimatanjaka fo fandaminan̈any Jehovah.

Maromaro birôny sampan̈a nitsidihiko, nanomboko taminy 1995 firaka taminy 2018. Solonten̈any foibe baka zaho tamy zen̈y, na piandraikitry pitety sampan̈a koa nikahian̈a zen̈y taloha. Zaho tamy zen̈y nankahery Komitiny Sampan̈a, Betelita, ndreky misionera, avio nan̈ampy iro tamy problemondro. Fa ndray iro koa mba nankahery zahay roeny Ruby, lera iro nitantara taminay raha niain̈andro. Nitsidiky Rwanda, ohatra, zahay tamy taon̈o 2000. Ten̈a nanohin̈y fonay nahay akory nataony piaramanompo ndreky fianakavian̈any Betela tan̈y, niatriky fandripahan̈a foko taminy 1994. Maro tamindro naty havan̈a. Fa ndray sarotro raha niaretandro, iro mbala nanan̈a finoan̈a ndreky fan̈antinan̈a, avio iro ravoravo fo.

Zahay zioty efa mandilatra 80 taon̈o. Tan̈aty 20 taon̈o tato zay, zaho an̈isany Komitiny Sampan̈any Etazonỳ. Marin̈y fa zaho tsiary nianatra taminy iniversite, kanefa zaho nahazo fampianaran̈a farany tsara baka amy Jehovah ndreky fandaminan̈anany. Ke zaho nanjary nahay nampianatra olo fahamarin̈ana amy Baiboly, ary zen̈y hazahoandro hatsaran̈a mandrakizay. (2 Kor. 3:5; 2 Tim. 2:2) Masoko foeky nahita fa hafatra baka amy Baiboly mahavita man̈ampy olo hankatsara fiain̈anandro ndreky hifandray amy Zan̈ahary niasa iro. (Jak. 4:8) Ke isaka zahay mahita hiriky, zahay roeny Ruby mbala mifen̈y fo mandrisiky olo hankafỳ tombontsoa miavaka anan̈antsika. Tsy ino zen̈y fa mianatra momba Jehovah ndreky mampianatra olo fahamarin̈ana amy Baiboly.