Alô hizahavantsika akory hamaliany Baiboly fan̈ontanian̈a aby io.

Mivolan̈a Asan’ny Apostoly 24:15 fa “olo marin̈y ndreky tsy marin̈y samby mbala hivilomin̈y.” Olo marin̈y io manondro iro olo nan̈araka volan̈a Zan̈ahary talohany iro naty, ke an̈arandro avoasoratra amy bokiny fiain̈ana. (Mal. 3:16) An̈isany olo tsy marin̈y ndraiky iro olo tsy ten̈a afaka nianatra momba Jehovah taminiro mbala velon̈o, ke an̈arandro tsy avoasoratra amy bokiny fiain̈ana.

Mitovy fo antokonolo aroe koran̈iny Jaona 5:28, 29 ndreky Asan’ny Apostoly 24:15. Jesosy nivolan̈a: “Zay nan̈ano ny tsara hatsangana amy fiain̈ana, fa zay nan̈ano raha ratsy, hatsangana amy fitsaran̈a.” Olo marin̈y aby io nan̈ano ny tsara talohany iro naty. Hatsangana amy fiain̈ana iro fotony an̈arandro mbala avoasoratra amy bokiny fiain̈ana. Fa iro olo tsy marin̈y aby io ndraiky nan̈ano raha ratsy talohany iro naty. Ke iro hatsangana amy fitsaran̈a. Nan̈ino? An̈arandro mbala tsy avoasoratra amy bokiny fiain̈ana ao. Iro hitsarain̈a na hamian̈a fotoan̈a han̈arehan̈a maso tsarabe fitondranten̈andro. Ho afaka hianatra momba Jehovah iro an̈aty fotoan̈a zen̈y, ke mety hisoratin̈y amy bokiny fiain̈ana an̈arandro.

Apokalypsy 20:12, 13 man̈azava fa olo jiaby natsangana amy maty mila man̈araka ‘raha voasoratra aminy horonamboky aby io’, tsy ino zen̈y fa iro lalàn̈a vaovao hamezany Jehovah atsika amy donia vaovao. Ke haripaka lan̈iany olo tsy man̈araka volan̈a Jehovah.​—Isaia 65:20.

Daniela 12:2 efa nan̈ambara fa sasany aminolo maty aby io hifoha ke “hahazo fiain̈ana mandrakizay, fa sasany ndraiky ho afabaraka ndreky tsy hasian̈a fotiny mandrakizay.” Andininy io man̈azava didipitsaran̈a farany ho azonolo natsangana amy maty aby io: Na iro hahazo “fiain̈ana mandrakizay”, na iro “tsy hasian̈a fotiny mandrakizay.” Ke izikoa fa tapitry 1 000 taon̈o, olo sasany hahazo fiain̈ana mandrakizay, fa sasany ndraiky haripaka mandrakizay.​—Apok. 20:15; 21:3, 4.

Ty baka misy ohatra: Iro antokonolo aroe hatsangana amy maty aby io mety ampiran̈iny amy vahiny tihipetraka antany hafa. Iro olo marin̈y aby io mira olo nahazo vizà azahoan̈a lalan̈a hiasa na hipetraka amy tany araiky, ke afaka man̈ano raha maromaro iro sady mba libra tsarabe. Fa olo tsy marin̈y ndraiky mira iro vahiny nahazo vizà tsy maharitry, na vizà niny pizaha tany fo. Iro mila man̈araka lalàn̈any firenena io, vo mahazo mipetraka ao. Karaha zen̈y koa, hahazo hijanon̈o amy Paradisa ao iro olo tsy marin̈y aby io, izikoa iro man̈araka lalàn̈any Jehovah ndreky man̈aboaka fa iro olo marin̈y. Na ino na ino vizà azondro vahiny aby io taminiro vo navy tamy tany araiky, sasany amindro mety hahazo zompirenena (nationalité) koa fa mandeha fotoan̈a, fa sasany ndraiky mety ho voatora hiala ao. Raha zen̈y miankiny amy toetsain̈indro ndreky fitondranten̈andro lera iro midoko amy tany io. Karaha zen̈y fo koa hatao aminolo jiaby hatsangana amy maty. Miankiny amy fitondranten̈andro ndreky tsy fivadihan̈andro amy donia vaovao an̈y, ny hiafarandro.

Jehovah io tsy Zan̈ahary be fitiavan̈a fo fa Zan̈ahary man̈ano ny rariny koa. (Deot. 32:4; Sal. 33:5) Samy hatsangany aby na olo marin̈y na olo tsy marin̈y. Zen̈y fomba han̈aboahany fa izy be fitiavan̈a. Fa ndray zen̈y, iro jiaby io samy tiany han̈araka fitsipikinany momba ny tsara ndreky ratsy. Ke lan̈iany olo tia izy ndreky man̈araka fitsipikinany fo hambelany hidôko amy donia vaovao.