Amy 1 Korintianina 15:8 Paoly nivolan̈a karaha ty: “Farany amy jiaby, mba niboaka taminaka koa izy, karaha amy tsaiky teraka tsy ampy fanjava.” Taloha atsika nan̈azava fa aminy andininy io Paoly mitantara taminizy nahita Jesosy amy voninahitrinany andan̈itry an̈y. Paoly taminio mira efa teraka na natsangana tamy maty, ke namian̈a voninahitry tsialohaloha hiain̈y andan̈itry. Kanefa anjatony taon̈o tafara tatỳ vo nisy karazan̈a fitsanganan̈a karaha zen̈y. Fa izikoa fa nidinihin̈y tsarabe andininy io, mila hahitsy fomba an̈azavantsika izio.

Marin̈y ndraiky fa Paoly iô mikoran̈a raha nandalo taminizy niova Kristianin̈y. Fa ino ma raha tiany koran̈iny taminizy nivolan̈a fa izy “teraka tsy ampy fanjava”? Mety maromaro antony nanavy izy nivolan̈a izio.

Tampoko sady nafy mare tamy Paoly raha nandalo taminizy niova Kristianin̈y. Matetiky tsisy olo man̈ampo fa tsaiky araiky ho teraka tsy ampy fanjava. Saoly (nikahian̈a Paoly izy tafara tatỳ) nandeha nan̈enjiky iro Kristianin̈y ta Damaskosy. Tampoko tiô, tamy lalan̈a, izy nahita fahitan̈a momba Jesosy efa natsangana tamy maty. Tsy nampoiziny foeky raha zen̈y. Ke niova Kristianin̈y i Paoly. Na izy, na iro Kristianin̈y seky handeha hampijaliny aby io, samy tsy nan̈ampo raha zen̈y. Sôsoko zen̈y koa, nafy loatra tamy Paoly raha nandalo io ke nanjary tsy nahita ankendriky masonany.​—Asa. 9:1-9, 17-19.

Paoly niova Kristianin̈y tamy fotoan̈a tsy nampoizin̈y. Volan̈a griky nadika “teraka tsy ampy fanjava” io mety adika koa “teraka amy fotoan̈a tsy tokony ho izy.” Karaha ty nandikany Baiboliny Jerosalema (angiley) izio: “Karaha tamy fotoan̈a tsy nampoizinolo in̈y zaho teraka.” Efa nimpody tandan̈itry tan̈y Jesosy tamy fotoan̈any Paoly niova Kristianin̈y. Paoly tsy mira iro olo aby nikoran̈iny aminy andininy aby talohany andininy io. Iro baka nahita Jesosy efa nitsangana tamy maty talohany izy nanonga andan̈itry. (1 Kor. 15: 4-8) Fa tamy fahitan̈a tsy nampoiziny Paoly io nafahany nahita Jesosy efa natsangana tamy maty. Ndray izio karaha tamy “fotoan̈a tsy tokony ho izy”, na tsy nampoizin̈y.

Nanetry ten̈a izy koa fa nikoran̈a momba ain̈inany. Misy manampahaizan̈a mivolan̈a fa somary man̈ambany ten̈a Paoly, koa zahan̈a volan̈a nampiasainy aminy andininy io. Izikoa zen̈y ankitin̈y tan̈aty jeriny Paoly, dikanizen̈y izy nan̈eky fa izy tsy vain̈y hahazo tombontsoa namian̈a izy io. Sady aminy andininy man̈araka izy nivolan̈a: “Aminy apostoly jiaby, zaho ny olo ten̈a tsisy kontiny. Ndray zaho tsy vain̈y kahian̈a apostoly zen̈y foeky! Fotony zaho nan̈enjiky fiangonan̈a Zan̈ahary. Fa nohony hatsarampan̈ahy tsisy ambaka izy naboakany Zan̈ahary nampa apostoly zaho.”​—1 Kor. 15:9, 10.

Izikoa hitsorin̈y, Paoly mety tihivolan̈a fa tampoko sady tsisy olo nan̈ampo fomba niboahany Jesosy taminany. Mety tsy nampoizin̈y koa fotoan̈a nampiova izy Kristianin̈y, na izy mety nieritreritry fa izy tsy vain̈y hahita fahitan̈a miavaka in̈y. Fa na ino na ino antony, hay be fa ten̈a matomboko tamy Paoly raha nandalo taminany in̈y. Izin̈y nan̈aporofo taminany fa efa natsangana tamy maty ankitin̈y Jesosy. Ke tsy mahagaga izikoa izy matetiky nikoran̈a momba raha tsy nampoizin̈y be in̈y, lera izy nitory taminolo momba nitsanganany Jesosy tamy maty.​—Asa. 22:6-11; 26:13-18.