1-2. a) Ino raha mety ho tsapantsika koa fa mandiniky fiain̈anany Jesosy ndreky fanompoan̈anany? b) Ino raha hidinihintsika amy lahatsoratra ty?

 METY ngoma mare atsika izikoa nisy olo marikitry fontsika naty. Amy voanalohany, atsika mety halahelo mare koa fa mieritreritry iro andra vitsivitsy talohany nifatesany, intsaka eky izikoa nijaly oe izy talohanizy naty. Fa koa fa mandeha fotoan̈a, mety ho ravoravo ndraiky atsika lera mieritreritry raha nampianariny atsika, na raha nataony, na koa raha nivolan̈iny baka hankahirezan̈a atsika na mba hamparavoravo atsika.

² Karaha zen̈y koa, malahelo atsika koa fa mamaky tantarany fijalian̈any Jesosy ndreky nifatesany. Amy vanimpotoan̈any Fahatsiarovan̈a, atsika ten̈a mangala fotoan̈a hisaintsain̈ana tsarabe valerany vidipan̈avotan̈a nataony Jesosy. (1 Kor. 11:24, 25) Ravoravo ndraiky atsika koa fa misaintsain̈y raha jiaby nivolan̈iny ndreky nataony taminizy tambony tany teto. Mankahery atsika koa mieritreritry raha ataony amintsika zioty ndreky raha mbala hataony aminy hoavy. Izikoa atsika misaintsain̈y raha aby zen̈y ndreky mieritreritry fitiavany atsika, atsika loso tihan̈aboaka fankasitrahan̈a izy. Zen̈y raha ho hitantsika amy lahatsoratra ty.

3. Nan̈ino atsika tokony hankasitraka vidipan̈avotan̈a?

³ Feno fankasitrahan̈a fontsika lera atsika misaintsain̈y raha nandalo tamy fiain̈anany Jesosy ndreky taminizy naty. Taminizy tambony tany teto, Jesosy nampianatra olo raha tsara handeha hataony Fanjakan̈any Zan̈ahary. Tiantsika mare raha aby ampianariny Baiboly momba vidipan̈avotan̈a ndreky hatsaran̈a indesinizio. Mankasitraka vidipan̈avotan̈a io atsika fotony baka amizio mahavy atsika afaka mifandray marikitry amy Jehovah ndreky Jesosy. Tsy zen̈y fo, lan̈iany mino Jesosy  afaka man̈anten̈a hiain̈y tsisy farany ndreky hifanojy ndraiky aminy havandro efa naty. (Jaona 5:28, 29; Rom. 6:23) Raha ny marin̈y, atsika tsy man̈eva hatsaran̈a aby zen̈y. Tsisy andra koa hahavitantsika hamaly raha tsara nataony Zan̈ahary ndreky Kristy tamintsika. (Rom. 5:8, 20, 21) Fa ndray zen̈y, atsika mbala afaka man̈aboaka amindro fa ten̈a ankasitrahantsika raha nataondro. Amy fomba karakory?

4. Akory nataony Maria Magdalena nan̈aboaka fa izy nankasitraka raha nataony Jesosy taminany? (Zahava sary.)

⁴ Diniha hely baka ohatrany man̈angy jiosy araiky kahian̈a Maria Magdalena. Nijaly mare izy fotony nisy demony fito aby nampijaly izy. Izy mety nihevitry fa efa tsisy olo nahavita nan̈ampy izy. Ke mety karakory eky tsapany izikoa fa nadosony Jesosy taminany iro demony aby io? Misaora nankasitraka Jesosy mare izy. Zen̈y nahavy izy nanjary pan̈aradia Jesosy, ke nampiasa fotoan̈anany, angovonany, avio fanan̈ananany hanohan̈ana asa fanompoan̈a nataony Jesosy. (Lioka 8:1-3) Maria ten̈a nankasitraka raha nataony Jesosy taminany io, kanefa mety mbala tsendriky hainy fa ho hisy raha bebenizen̈y handeha hataony Jesosy aminany. Ino eky zen̈y? Izy han̈amia ain̈inany baka “olo jiaby man̈aboaka finoan̈a izy” hahazo fiain̈ana tsisy farany. (Jaona 3:16) Akory nan̈aboahany Maria fa izy nankasitraka Jesosy? Izy tsy nivadiky taminany foeky. Jesosy, ohatra, izikoa fa nijaly taminy hazofijalian̈a, Maria nidoko narikitry tio fotony izy nahinakinaka Jesosy sady tihankahery olo aby tio. (Jaona 19:25) Tafarany Jesosy naty, Maria ndreky man̈angy aroe hafa nandeha tamy fasan̈anany tan̈y han̈osotro raha mangitry aminy vatan̈anany. (Mar. 16:1, 2) Nahazo hatsaran̈a be Maria fotony tsy nivadiky. Jesosy koa fa natsangana tamy maty, Maria fanojy taminany ndraiky, ke iro niaraka nikoran̈a. Vitsy fo pianatra Jesosy nahazo tombontsoa zen̈y.​—Jaona 20:11-18.

5. Akory mety an̈aboahantsika fa atsika mankasitraka raha jiaby nataony Jehovah ndreky Jesosy tamintsika?

 ⁵ Atsika koa afaka man̈aboaka fa atsika mankasitraka raha jiaby nataony Jehovah ndreky Jesosy tamintsika. Amy fomba akory? Atsika afaka mampiasa fotoan̈antsika, angovontsika, avio volantsika hampandihanan̈a asany Fanjakan̈any Zan̈ahary. Atsika, ohatra, afaka man̈ampy amy fan̈oren̈ana ndreky amy fikobabian̈a tran̈o han̈anaovan̈a fanompoan̈a Jehovah.

6. Nan̈ino vidipan̈avotan̈a io kadô namian̈a atsika tsiaraikiaraiky?

⁶ Mandrisiky atsika ho tia Jehovah ndreky Jesosy fandinihan̈a habezany fitiavandro atsika. (1 Jaona 4:10, 19) Izikoa fa haintsika fa Jesosy naty han̈avotan̈a atsika tsiaraikiaraiky, loso mahaitiantsika fo iro. Apostoly Paoly nankasitraka mare raha nataony Jesosy io, ke izy nivolan̈a tamindro Galatianin̈y aby io karaha ty: “Zanaka Zan̈ahary ... efa tia zaho ke namiany zaho ain̈inany.” (Gal. 2:20) Baka amy vidipan̈avotan̈a nahavy Jehovah nitaon̈o anao han̈aton̈o izy baka anao loso namany. (Jaona 6:44) Tsy ravoravo anao mahay fa nisy raha tsara hitany Jehovah taminao matoa izy nafoe raha farany valera taminany baka anao hanjary namany? Tsy mahavy anao hahaiho tia Jehovah ndreky Jesosy ma zen̈y? Ke tsara atsika man̈ontany ten̈a karaha ty: ‘Mandrisiky zaho han̈ino ma fitiavako iro?’

7. Erakany hitantsika amy sary, akory mety an̈aboahantsika fitiavantsika Jehovah ndreky Jesosy? (2 Korintianina 5:14, 15; 6:1, 2)

⁷ Fitiavantsika Zan̈ahary ndreky Kristy mandrisiky atsika hankatia olo. (Vakia 2 Korintianina 5:14, 15; 6:1, 2.) Fomba araiky an̈aboahantsika zen̈y, atsika mifen̈y mitory. Zay olo hitantsika hikoran̈antsika aby. Atsika tsy man̈avakavaka olo, na ino na ino karazan̈a, foko, na manambola na masikiny, na nahita fianaran̈a na tsy nahita fianaran̈a. Izikoa atsika  man̈ano zen̈y, atsika man̈atanteraka fikasan̈any Jehovah ‘hamonjy karazan̈olo jiaby ndreky hahaizandro tsarabe ny marin̈y.’​—1 Tim. 2:4.

8. Akory an̈aboahantsika fa atsika tia rahalahy ndreky ranabavintsika aby io?

⁸ Ino koa fomba hafa an̈aboahantsika fitiavantsika Zan̈ahary ndreky Kristy? Mifen̈y man̈aboaka fitiavantsika rahalahy ndreky ranabavy aby io. (1 Jaona 4:21) Atsika mikarakara mare raha ilaindro ndreky man̈ampy iro lera iro miatriky raha sarotro. Ohatra, mankahery iro lera misy olo marikitry fondro maty, mamangy iro koa fa marary, avio mifen̈y man̈amia korazy iro lera iro kivy. (2 Kor. 1:3-7; 1 Tes. 5:11, 14) Ampidirintsika amy vavaka ataontsika fo koa iro, fotony haintsika fa “ten̈a mahery fangatahan̈a ataonolo marin̈y.”​—Jak. 5:16.

9. Ino koa fomba hafa an̈aboahantsika fitiavan̈a piaramanompo?

⁹ Mbala misy fomba hafa koa mety an̈aboahantsika fitiavantsika piaramanompo aby io. Ino izio? Mifen̈y atsika man̈ano raha hihavan̈ana amindro. Ke atsika mangala tahaka fomba famafany Jehovah hadisovan̈anolo. Ndray Jehovah fo nafoe Zanany hofoaty nohony fahotan̈antsika, ke atsika tsy tokony mba han̈ambela hadisovan̈any piaramanompo? Tsy tiantsika ho karaha panompo ratsy fan̈ahy tamy fan̈oharan̈any Jesosy in̈y. Sefonany nafoe trosanany tsy somasoma, fa panompo io ndraiky tsy nahay namindra fô foeky. Izy tsy nafoe trosa hely nanan̈any tamy namany. (Mat. 18:23-35) Izikoa misy raha tsy mampifankahazo anao aminolo amy fiangonan̈a, von̈ono ma anao han̈ano raha voanalohany hihavan̈ana aminany, alohany han̈aton̈ana Fahatsiarovan̈a? (Mat. 5:23, 24) Anao koa man̈ano zen̈y, ho hita fa anao tia Jehovah ndreky Jesosy ankitin̈y.

10-11. Akory mety an̈aboahany antipan̈ahy fitiavandro Jehovah ndreky Jesosy? (1 Petera 5:1, 2)

¹⁰ Akory mety an̈aboahany antipan̈ahy fa iro tia Jehovah ndreky Jesosy? An̈isany fomba araiky ten̈a maventy an̈aboahandro zen̈y, iro mikarakara tsara raha ilainy ondrikondriky Jesosy. (Vakia 1 Petera 5:1, 2.) Zen̈y iziô raha nazavainy Jesosy tsarabe taminy apostoly Petera. Nisy fotoan̈a, intelo aby Petera nan̈ano sary tsy nahay Jesosy. Fa baka tio izy tihan̈aboaka mare fa izy ten̈a tia Jesosy. Ke Jesosy koa fa natsangana tamy maty, Jesosy nan̈ontany Petera karaha ty: ‘A Simona zanaka Jaona, tia zaho ma anao?’ Azontsika antoko fa von̈ono han̈ano erakany vitany Petera han̈aboahany fitiavany Tomponany io. Ke ho Jesosy tamy Petera: ‘Ambesa ondrikondriky helinaka.’ (Jaona 21:15-17) Nikarakarainy tsara ondrikondrikiny Tompo, firaka izy naty. Ke naboakany Petera tsarabe fa izy ten̈a tia Jesosy.

¹¹ Anaro antipan̈ahy, akory an̈aboahanaro fa ten̈a raha maventy aminaro raha nivolan̈iny Jesosy tamy Petera in̈y, koa fa amy vanimpotoan̈any Fahatsiarovan̈a? Aboakanaro fa anaro ten̈a tia Jehovah ndreky Jesosy, izikoa anaro man̈ano fitsidihan̈a ondrikondriky tsy tapaka, avio man̈ano ezaka manokan̈a man̈ampy olo efa tsy mitory himpody ndraiky amy Jehovah. (Ezek. 34:11, 12) Anaro koa afaka mankahery pianatra Baiboly ndreky olo vaovao avy man̈aton̈o Fahatsiarovan̈a. Raisa tsara iro, fotony atsika man̈anten̈a fa iro mbala hanjary pan̈aradia Jesosy.

12. Nan̈ino man̈amia korazy atsika mieritreritry raha nivolan̈iny Jesosy taminy alin̈y talohany nifatesany? (Jaona 16:32, 33)

¹² Taminy alin̈y talohany nifatesany, Jesosy nivolan̈a tamy pianatranany karaha ty: “Amy  donia ty, anaro hahita fahorian̈a, kanefa mahireza! Zaho efa nandresy donia ty.” (Vakia Jaona 16:32, 33.) Ino raha nan̈ampy Jesosy hanan̈a korazy tsy hivadiky firaka izy naty, izikoa fa nandrahon̈o izy fahavalonany? Izy nilampy tamy Jehovah. Hainy Jesosy fa pan̈aradia izy koa tsy maintsy ho tojy fitsapan̈a miramira amy ninany, ke izy niangavy Jehovah hiaro iro. (Jaona 17:11) Nan̈ino ma zen̈y man̈amia korazy atsika? Fotony Jehovah matanjaka mandilatra iro fahavalontsika aby io. (1 Jaona 4:4) Tsisy raha tsy hitany. Ke matoky atsika fa izikoa atsika milampy amy Jehovah, atsika tsy ho resiny tahotro fa hanan̈a korazy.

13. Akory ahitan̈a fa nisy korazy Josefa baka Arimatia?

¹³ Iritrireta baka ohatrany Josefa baka Arimatia. Izy olo najaindro Jiosy aby io mare, fotony izy an̈isany Fitsaran̈a Avo Jiosy. Mbala tsy nanan̈a korazy foeky Josefa, tamy fotoan̈a nan̈anaovany Jesosy fanompoan̈a tambony tany teto. Nivolan̈a Jaona fa ‘Josefa io pianatra Jesosy, fa izy nisitrisitriky fotony izy navozo iro Jiosy aby io.’ (Jaona 19:38) Tiany Josefa hafatra momba Fanjakan̈any Zan̈ahary, fa ndray zen̈y, tsy naboakany taminolo fa izy nino Jesosy. Mety navozo izy tsao tsy hajainolo eky izikoa haindro fa izy pianatra Jesosy. Kanefa koran̈iny Baiboly fa Jesosy koa fa naty, Josefa loso ‘nanan̈a korazy mare ke izy nandeha tamy Pilato, nangataka fatiny Jesosy.’ (Mar. 15:42, 43) Tsy nasitrikiny Josefa eky fa izy an̈isany pianatrany Jesosy.

14. Ino raha tokony hataonao izikoa anao mavozo olo?

¹⁴ Anao ma efa navozo olo, karaha nataony Josefa? Koa fa a lekoly na ampiasan̈a an̈y, men̈atra ma anao ndraikindraiky mivolan̈a fa anao Vavolombelon̈o Jehovah? Anao ma misalasala ho loso pitory, na han̈ano batisa fotony anao miasaloha amy raha iritriretinolo momba anao? Aza ambela hanakana anao tsy han̈ano raha tokony hataonao, raha karaha zen̈y. Mivavaha amy Jehovah amy fô jiaby. Iangavia izy han̈amia anao korazy han̈anaovan̈a sitraponany. Arakarakany hahitanao fomba amaliany Jehovah vavakanao, hahavy anao hahazo angovo ndreky hahaiho hisy korazy fo.​—Isaia 41:10, 13.

15. Jesosy koa fa baka niboaka tamy pianatranany, nandrisiky iro han̈ino haravoan̈andro? (Lioka 24:52, 53)

¹⁵ Nalahelo iro pianatra Jesosy aby io izikoa izy fa naty. Mba diniha hely izikoa anao tamy plasindro. Iro very naman̈a ten̈a tiandro salakady nahatsapa very fan̈antinan̈a koa. (Lioka 24:17-21) Fa Jesosy koa fa natsangana, izy niboaka tamindro. Nazavainy tamindro akory  nampatanteraka faminanian̈any Baiboly taminany. Namezany asa matomboko koa iro. (Lioka 24:26, 27, 45-48) Koa fa nanonga tandan̈itry Jesosy, 40 andra tafara tatỳ, alahelondro pianatranany aby io nivadiky haravoan̈a mare. Ravoravo iro fotony haindro fa velon̈o Jesosy sady von̈ono han̈ampy iro han̈ano asa nan̈irahany iro. Haravoan̈andro io nandrisiky iro tsy ho voly hidera Jehovah.​—Vakia Lioka 24:52, 53; Asa. 5:42.

16. Akory angalantsika tahaka pianatrany Jesosy?

¹⁶ Akory angalantsika tahaka iro pianatrany Jesosy aby io? Atsika mifen̈y ho ravoravo fo manompo Jehovah, tsy amy lerany vanimpotoan̈any Fahatsiarovan̈a fo fa mandavataon̈o. Ho vitantsika raha zen̈y izikoa ataontsika amy toeran̈a voanalohany Fanjakan̈any Zan̈ahary. Ohatra iziô, maro pitory nan̈amboatra lera fiasandro, baka iro afaka mitory, mivory, avio man̈ano fotoampivavahan̈any fianakavian̈a tsy tapaka. Sasany ndraiky, tapakevitry tsy hanan̈a raha isankarazany iritriretinolo fa ilain̈y, amy zen̈y iro afaka man̈ampy fiangonan̈a tsarabe, na koa mifindra amy tany mila pitory maro. Marin̈y fa atsika mila miaritry baka mahavita manompo Jehovah fo, fa ndray zen̈y, izy mampan̈anten̈a hitahy atsika ankitin̈y izikoa asany Fanjakan̈anany ataontsika amy toeran̈a voanalohany.​—Ohab. 10:22; Mat. 6:32, 33.

17. Tapakevitry han̈ano ino anao amy vanimpotoan̈any Fahatsiarovan̈a ty? (Zahava sary.)

¹⁷ Amy talata 4 Avrily, atsika hankalaza Fahatsiarovan̈a amy taon̈o ty. Fa ndray zen̈y, aza ambesan̈a amy zen̈y vo hieritreritry momba fiain̈any Jesosy, nifatesany, avio fitiavan̈a naboakany Jesosy ndreky Jehovah tamintsika. Saintsain̈a matetiky raha aby zen̈y intsaka eky izikoa fa amy vanimpotoan̈any Fahatsiarovan̈a. Ohatra iziô, manokàna fotoan̈a hamakian̈a ndreky hisaintsain̈ana raha nandalo voakoran̈a amy tablô “Ny Herinandro Farany Niainan’i Jesosy Teto An-tany” amy Fan̈ampiny Fan̈azavan̈a B12, amy Fandikan-tenin’ny Tontolo Vaovao. Avio anao koa fa mamaky momba fiain̈any Jesosy, tadiava andininteny han̈ampy anao hahay hankasitraka, ho be fitiavan̈a, hanan̈a korazy ndreky hahaiho ravoravo fo. Avio diniha ino aby raha mety ataonao an̈aboahanao fa anao mankasitraka izy amy fonao jiaby. Matokisa fa Jesosy hankasitraka anao mare amy raha jiaby ataonao hahatsiarovan̈a izy amy vanimpotoan̈any Fahatsiarovan̈a ty.​—Apok. 2:19.