Nan̈ino ma Ravan̈a Donia Araiky Taloha Tan̈y?

TSY antambo karaha ataon’ny antambo amy ziôty Safodrano taloha tan̈y in̈y. Didim-pitsaran̈an’ny Zan̈ahary izin̈y. Nampitandreminy antsendriky olo talohan’ny navian’izio, fa ankamarozandrô fo tsy nijery. Fôtony nan̈ino? Karaha ty nazavain’i Jesosy: “Tamy fotoan̈a zen̈y baka, talohan’ny navian’ny Safodrano, olo nihinan̈a ndreky nigiaka, lelahy nan̈ainga aviô viavy ningain̈y, mandrapavian’ny andra nidiran’i Noa tan̈atin’ny sambofiara tao. Tsisy raha nijirendrô foeky firaka Safodrano navy ke nifaoko irô jiaby.”​—Matio 24:38, 39.

Fiain̈anan’olo talohan’ny Safodrano

Maro tombony nanan̈andrô niain̈y talohan’ny Safodrano in̈y fa tsy anan̈antsika iziôty eky. Tamy zen̈y mbala fivolan̈ana araiky fo nampiasain’olo jiaby. (Genesisy 11:1) Zen̈y nahavy irô nivoatra mare tamin’ny asa tan̈ana ndreky siansy, fôtony mila olo mahay sady mahay miaraka miasa vo mahavita zen̈y. Tsy basin’izen̈y fo koa fa ankamarozandrô ela velon̈o, ke irô nahavita nianatra raha maro tan̈atin’ny taon̈o maro niain̈andrô io.

Fa kanefa mbala misy olo mivolan̈a fo fa vandy olo taloha tan̈y ela velon̈o zen̈y, fôtony zen̈y fanjava raha tian’ny Baiboly koran̈iny izikoa fa mikoran̈a taon̈o. Mba marin̈y edy zen̈y va? Diniha fo baka Mahalalila. Karaha ty koran̈in’ny Baiboly momba izy: “Tamy Mahalalila 65 taon̈o, izy niteraka Jareda. ... Fa tafaran’ny nitirihany i Jareda io izy mbala velon̈o tan̈atin’ny 895 taon̈o. Izy baka tiô naty.” (Genesisy 5:15-17) Izikoa ivoan̈a fanjava araiky taon̈o araiky niain̈an’i Mahalalila io, dikan’izen̈y dimy taon̈o fo izy velon̈o. Dikan’izen̈y tsy mety ho fanjava araiky, taon̈o araiky koran̈iny io! Olo tamy zen̈y velon̈o tan̈atin’ny taon̈o maro ankitin̈y, fôtony taranaka vitsivitsy fo elan̈elan̈andrô tamin’i Adama, lelahy voanalohany sady lavorary. Ino aby ma raha vitandrô olo aby tamy zen̈y?

Efa nahainaro fo olo tambony tany teto, taon̈o marobe talohan’ny navian’ny Safodrano, ke i Kaina zanakan’i Adama nahavita nan̈ôrin̈y tanàna, ke Enoka nataony an̈aran’ny tanàna io. (Genesisy 4:17) Nisy industrie isan-karazany koa talohan’ny nisian’ny Safodrano in̈y. Olo tamy zen̈y koa niasa fitaovan̈a isan-karazany tamy “varahin̈y ndreky vy.” (Genesisy 4:22) Irô fitaovan̈a aby io mety nilaindrô tamin’irô niasa tran̈o, nandrafitry, ndreky nan̈amboatra lamba ndreky nitsabo. Asa aby zen̈y voakoran̈a amy tantarandrô olo voanalohany tambony tany teto.

Nahainahay fo olo, ke nety nahavita nampivoatra fampiasan̈a vy, fambolian̈a, aviô fitarimian̈a ôndrikôndriky ndreky aomby, fanoratan̈a ndreky asa tan̈ana. Ohatra, Jobala “voanalohan’ny olo mpitendry lokanga ndreky mitsotro sodin̈y.” (Genesisy 4:21) Nandroso mare irô olo tamy fotoan̈an’izen̈y. Fa tiô fo, niova tampoko fiain̈ana. Ino ma raha nandalo?

Nisy raha tsy nety ma?

Nata naro tombony nanan̈andrô olo niain̈y talohan’ny Safodrano, ratsy fanamponoan̈a fiain̈anandrô. Adama tsy nan̈araka volan̈an’i Zan̈ahary foeky, kanefa Zan̈ahary nampisy fiain̈ana. Kaina koa, nata nan̈ôrin̈y tanàna voanalohany koran̈in’ny tantara, izy koa namono rahalahiny. Amy lerany nahainaro fo olo nan̈ano ny ratsy! Nahainaro fo raha ratsy baka tamy fahotan̈a nafindran’i Adama tamy taranakanany.​—Romanina 5:12.

Tsy maintsy efa faran’ny ratsy raha nataon’olo, tamy Jehovah nanapa-kevitry fa hifaran̈any raha ratsy nisy tamy zen̈y afaka 120 taon̈o. (Genesisy 6:3) Baiboly man̈ambara karaha ty: ‘Be haratsian̈an’olo tambony tany, ke tsisy raha nanjary raha tan̈atin’ny fôndrô rango maraindrain̈y firaka hariva andra. ... Feno raha tsy nanjary tany jiaby.’​—Genesisy 6:5, 11.

Tafaran’izin̈y, Zan̈ahary nan̈azava tamy Noa fa Izy han̈ano safodrano handripahan̈a raha jiaby manam-pahin̈ana. (Genesisy 6:13, 17) Noa tamy zen̈y nanjary “mpitory fahamarin̈ana”, nata sarotro tamin’olo nan̈eky fa ho ravan̈a raha jiaby hitan’ny masondrô tamy zen̈y. (2 Petera 2:5) Olo valo fo nan̈araka raha nivolan̈iny ke irô io fo tsy naty. (1 Petera 3:20) Nan̈ino ma ten̈a raha maventy amintsika raha zen̈y?

Ino ma dikan’ny raha nandalo io iziôty?

Andra iain̈antsika iziôty tsisy ny hafa tamy faha Noa fo. Matetiky atsika maharen̈y olo mamono olo, mamono karazan’olo, aviô olo kafiry amin’ny havandrô tran̈o araiky amindrô. Efa feno olo kafiry koa tany jiaby iziôty sady efa ampitandremin̈y koa olo jiaby fa mbala handripaka olo ratsy fan̈ahy ndraiky koa Zan̈ahary. Aviô Jesosy koa nivolan̈a fa Zan̈ahary nifidy izy hataony Mpitsara, ke ho avy Jesosy han̈avaka olo karaha ataon’ny mpiambin̈y ôndrikôndriky man̈avaka ôndrikôndriky ndreky bengy in̈y fo. Nivolan̈a izy fa lan̈iany olo tsy mety miova, “haripaka mandrakizay.” (Matio 25:31-33, 46) Fa Baiboly ndraiky mivolan̈a fa hisy olo marobe ho tafitsaka velon̈o. Irô io olo manompo Zan̈ahary marin̈y zaraiky fo. Irô io hiain̈y an̈atin’ny fiadan̈ana ndreky filaminan̈a tsisy farany, amin’ny amaray.​—Mika 4:3, 4; Apokalypsy 7:9-17.

Ataon’olo fitokizan̈a irô raha koran̈in’ny Baiboly aby zen̈y ndreky fampitandreman̈a momba fandripahan̈a ho avy io. Efa nivolan̈in’ny Baiboly rango efa ela raha hataon’olo zen̈y. Apostoly Petera nivolan̈a fa irô olo mpisalasala aby io tsy mijery raha mandalo. Karaha ty baka nivolan̈iny: ‘Amin’ny andra farany an̈y, ho hisy olo hankadala ... ke ho irô karaha ty: “Aia ma fimpodianany zen̈y? Fampan̈antinan̈a vandivandy fo zen̈y!” ... Ataondrô sary tsy hita fa efa nisy letry ela lan̈itry io, aviô nisy tany mahery be koa niboaka baka tan̈atin’ny rano, sady tan̈ivon’ny rano, nohon’ny volan̈an’ny Zan̈ahary. Baka tamindrô io nandravan̈ana donia nisy tamy zen̈y, izikoa fa fofon’ny rano tany ty. Fa lan̈itry iziôty ndreky tany iziôty io koa atokan̈a haripaka amin’ny môtro baka amy volan̈a zen̈y, ke akajin̈a mandra-pavian’ny andra hitsaran̈a ndreky handripahan̈a irô olo tsy mavozo Zan̈ahary.’​—2 Petera 3:3-7.

Jesosy nan̈iraka fa mila ampitandremin̈y antsendriky olo jiaby, ke ambara irô fa ho hisy andra fitsaran̈a, aviô mila ambara irô koa fa izikoa fa vita fitsaran̈a io, ho hisy fiadan̈ana. (Matio 24:14) Tsy tôkony hatao kidikidy fampitandreman̈a io, fôtony Zan̈ahary Faran’ny Mahery io tsy mba mavandy.

Donia vaovao ho avy

Izikoa fa avy fivoan-draha jiaby zen̈y, han̈ano karakôry ny amarain’olo? Jesosy nan̈ambara karaha ty tamin’izy nan̈ano Toriteny malaza Tan̈abon’ny Bongo: “Sambatra lan̈iany olo manetry ten̈a, fôtony izy handova tany.” Aviô izy koa nampianatra irô mpianatranany aby io hivavaka amy Zan̈ahary. Ho izy: “Irarian̈a Fanjakan̈anao ho avy! Irarian̈a koa sitrapônao hatao ambony tany eto, karaha an-dan̈itry an̈y!” (Matio 5:5; 6:10) Jesosy foeky nivolan̈a fa ho hisy raha tsara miambin̈y lan̈iany olo tsy mivadiky amy Zan̈ahary. ‘Fotoan̈a han̈ampodianan̈a raha jiaby hanjary vaovao’ nivolan̈an’i Jesosy izio.​—Matio 19:28.

Ke anao koa fa mangala onon̈o raha mbala ho avy aby io, aza atao raha mampisalasala anao raha volan̈in’olo mpankadala aby io. Nata karaha mbala mahadin̈y ela donia ty, aviô nata efa ela nisian’izy ty, atsika tsy tôkony ho rikian̈a amy zen̈y. Efa hitsara olo amy donia ty Zan̈ahary. Ke irarian̈a mba hankahery anao irô raha nivolan̈in’ny apostoly Petera tamy taratasinany aby ty:

‘Ho ravan̈a baka irô raha jiaby io, ke diniha asa olo tôkony ho karakôry anarô! Tôkony hanan̈a fitondran-ten̈a masin̈y anarô ndreky hahafoe ten̈a amy Zan̈ahary, sady hiambin̈y ndreky han̈iry mare havian’ny andran’i Jehovah. ... Nohon’ny anarô miambin̈y raha zen̈y, rahalahy aby, man̈anaova erakan’ny vitanarô baka anarô tsisy tasy, tsisy tsin̈y ndreky mihavan̈a tsarabe. ... Ataova fo koa raha hahavy anarô han̈aboahan̈a hatsaram-pan̈ahy miavaka ndreky hahaizanarô Jesosy Kristy Tompontsika ndreky Mpamonjy atsika.’ (2 Petera 3:11, 12, 14, 18) Ke mangalà fianaran̈a baka tamy raha nandalo tamy faha Noa in̈y. Mifandraisa marikitry amy Zan̈ahary. Ataova raha hahaizan̈a tsarabe Jesosy Kristy. Mifen̈a mare baka tsy hiala amy Zan̈ahary ndreky baka ho an̈isan’olo marobe mifidy ho tafitsaka velon̈o amy faran’ny donia ty, ke hiain̈y amy fiadan̈ana amy donia vaovao io.

[Sary]

Irô olo aby niain̈y talohan’ny Safodrano efa nahay niasa fitaovan̈a baka tamy vy

[Sary]

Ho tsara fiain̈ana amin’ny amaray